འུ་རྐྱོང་ འདང་ ཁྱོག་ཏོང་རྒུན་ལ་ ལབ་ཞ་།
5
ང་ལ་ མ་ཤི་ཀེ་ ཆོའེ་ཚོག་རྒེ་ འགོ་ཁྲིད་, ཁོང་ངེ་ རྡུ་ངལ་ལེ་ སྤང་པོ་ ཡང་ ཁོང་ ངོན་ཟ་ནི་, ཁོང་ངེ་ སྤལ་ལེ་ན་ འདྲེའེ་ཤེ་ཅེན་ནེ་, ཁྱི་ཞི་ ཕྲོ་ ཆོའེ་ཚོག་རྒེ་ འུ་རྐྱོང་རྒུན་ལ་ ཞུ་ཝ་ རིག་ ཡོད་: 2 ལུག་ཟི་ ཙོག་སེ་ ཁྱི་ཞི་ ལག་ལ་ ཀོན་འཇོག་རྒེ་ ལྟེད་རྡེ་ ཛེད་ཀ་ནེ་ ལུག་རྒུན་ལ་, རྒྱ་ལེ་ ཅོའེ་རྡེ་ ལྟ་ཏོག་ ཅོའེ་ཧེ་། ཁྱི་ཞ་རྒུ་ནི་ ཏོ་ ཝང་ ཏྃ་རྡེ་ ཅོ་ཅུག་ཀན་ ཙོག་སེ་ མ་ཅོ་ལ་, འུ་རྐྱོང་ཞིག་རྒེ་ ཚུལ་ལ་ རང་ ཐེད་ཏེ་ ཅོའེ་ཧེ་། འི་ ལེ་ཧ་རྒུན་ ནོར་ ཡང་ པེ་ནེ་ ལྟོའེ་རྡེ་ མ་ཅོ་, འིན་ན་ ཀོན་འཇོག་ལ་ ཞབ་རྟོག་རྒེ་ ཆག་ལེ་ འིན་ སམ་འདེ་ ཅོའེ་ཧེ་། 3 ཁྱི་ཞི་ ལག་ལ་ ལྟེད་ཀ་ནེ་ ཆོའེ་ཚོག་པོ་ ཝང་ ཉམ་པོ་ ཁྲིད་ མ་ཁྲིད་རྡེ་, ཁོང་རྒུ་ནི་ཕི་ སྤེ་ཞིག་ལ་ འགྱུར་ཧེ་། 4 ལུག་ཟི་ ཚང་མེ་ སྤོན་འབོ་, ཡི་ཤུ་ རྐྱོད་ཟ་ནི་, ཁྱི་ཞ་རྒུན་ལ་ ཀོན་འཇོག་རྒེ་ ཆོག་ནི་ ཏུའི་རྒྱུན་ ལུའི་ཤེ་ སྤལ་ལེ་ ཐོར་ཤོག་པོ་ ཐོབ་རྦེན་།5 ཏེ་རྒ་ ཙོག་སེ་ ཁྱོག་ཏོང་རྒུ་ནི་, ཁྱི་ཞ་རང་ འུ་རྐྱོང་རྒུ་ནི་ ཝང་ངེ་ ཡོག་ལ་ པོར་རྡེ་ ཁ་ཉོན་ཧེ་། ཡང་ ཉམ་ཤུང་ ཉམ་པོ་ ཅིག་ ཏང་ ཅིག་ལ་ ཞབ་རྟོག་ ཞུའི་ཧེ་, ཅེ་ཟེར་ནི་ ཀོན་འཇོག་རྒེ་ ཏམ་པེ་ སུང་རབ་རྦེ་ན་ མོལ་རྡེ་ འདུག་,
“ངེ་ ཕོ་སོ་ཅེན་རྒུན་ལ་ རྒྱཔ་འགལ་ ཅོའེན་།
འིན་ན་ ཉམ་ཤུང་རྒུན་ལ་ ཐུག་ཞེ་ ཏང་ངེ་ཡོད་།”
6 ཏོ་རྦེ་ཕི་ ཀོན་འཇོག་རྒེ་ ཤུག་ཤེན་ ཆག་རྒེ་ ཡོག་ལ་ སེམ་ པབ་མོ་ ཉམ་པོ་ འདོད་ཧེ་, ཏེ་ནི་ ཏུའི་རན་ནེ་རྡང་, ཁྱི་ཞ་རྒུན་ལ་ ཀོན་འཇོག་རྒེ་ སི་ཝ་ སལ་ལེ་ ཛེ་རྡེན་། 7 རང་ངེ་ ཚེར་ཧ་ རྡང་ རྡུ་ངལ་ ཚང་མ་ ཀོན་འཇོག་རྒེ་ ཆག་ལ་ ལྟོད་, ཅེ་ཞུ་ནི་ ཁོང་ངེ་ ཁྱི་ཞ་ ལྟ་ཏོག་ ཛེ་རྡེ་ནོག་། 8 ཁྱི་ཞ་རྒུ་ནི་ ཤང་ ཅོའེ་རྡེ་, རང་སེམ་ ཆུན་ཏེ་ པོར་ཧེ་, ཅེ་ཟེར་ནི་ རྡུད་རྒུ་ནི་ འགོ་རྦ་ ཁྱི་ཞི་ འགྲ་ཝོ་རྦོ་ ཀུ་ཅུ་ ཏང་ཀ་ནེ་ སིང་འགེ་ ཙོག་སེ་, མི་རྒུན་ སེད་ཏེ་ ཟ་ཅེ་ཕི་ ཙལ་ལེན་ འགྲུལ་རྡུག་། 9 ཏེཏ་པ་ རྟེམ་པོ་ ཉམ་པོ་ ཁོའེ་ རྒྱཔ་འགལ་ལ་ ནོལ་ཧེ་, ཅེ་ཟེར་ནི་ འཇིག་རྟེན་ སོན་ཏེ་ན་ ཁྱི་ཞི་ སྤུན་རྒུན་ལ་, ཏེ་རྒ་ ཙོག་སེ་ རྡུ་ངལ་ ཐོང་ངེན་ ཡོ་ཀན་འབོ་, ཁྱི་ཞ་ རྒྱུའི་ནོག་།
10 ཐུག་ཞེ་ རྡང་ ལྡན་ཀ་ནེ་ ཀོན་འཇོག་རྒེ་, མ་ཤི་ཀ་ རྒྱུད་ཏེ་, ཁྱི་ཞ་རྒུན་ ཁོང་ངེ་ ཐ་མེད་པེ་ སྤལ་ལེ་ན་ འདྲེའེ་ཤེ་ལ་ འབོ་ ཛེད་། ཏ་ ཁྱི་ཞ་རྒུན་ལ་ སྲིབ་ཅིག་ རྡུ་ངལ་ ཉུང་འདེ་ ལྟིང་ནི་ ཀོན་འཇོག་ ཁོ་རང་ངེ་ ཁྱི་ཞ་རྒུན་ལ་ ཅི་ཚང་མ་ ལོག་ཏེ་ སལ་ལེ་ ཛེ་རྡེན་, ཡང་ ཤུག་ཤེན་, རྟེམ་པོ་ རྡང་ རྒུལ་མི་ཉེན་ཅེ་ ཅོའོ་ ཛེད་རྡེན་། 11 ཏུའི་རྒྱུན་ནི་ཏུའི་རྒྱུན་ལ་ ཝང་ ཚང་མ་ ཁོང་ངེ་ ཆག་ལ་ ལུའི་ཤིག་། ཨ་མེན་།
ལྟིང་འཇུག་རྒེ་ འཇུ་།
12 ངེ་ ལོ་ཁྱེལ་ཅེན་ ཐེ་ཀ་ནེ་ སྤུན་, སེ་ལེ་a ཡ་ཏོ་ ཉམ་པོ་ འི་ ཡི་རྒེ་ ཆུང་ཙེ་འབོ་ འབྲི་ཡོད་། འི་ ཡི་རྒེ་ འབྲི་ཅེ་ རྒྱུ་ཚན་འབོ་, ཁྱི་ཞ་རྒུན་ལ་ སེམ་རུའི་ ཏང་ཅེ་ རྡང་ ཁྱི་ཞ་རྒུན་ལ་ ཆེན་ ཡོ་ཀན་རྒུན་, ཀོན་འཇོག་རྒེ་ ཐུག་ཞེ་ ཁག་ཞིག་ འིན་ཀན་འབེ་ སྤང་པོ་ ཏང་ཅེ་པོ་ འིན་། འི་ ཐུག་ཞེ་ན་ རྟེམ་པོ་ འདོད་ཧེ་།
13 ཁྱི་ཞ་ ཉམ་པོ་ འདམ་ཀ་ནེ་ འབཱ་འབེ་ལོན་ནེ་b ཆོའེ་ཚོག་རྒེ་ ཁྱི་ཞ་རྒུན་ལ་ འཇུ་ ཞུ་རུག་། ངེ་ པུ་ཙ་ ཙོག་སེ་ མར་ཀུའི་ལ་ ཁྱི་ཞ་ འཇུ་ ཞུ་རུག་། 14 ཅིག་ ཏང་ ཅིག་ལ་, མ་ཤི་ཀ་པེ་ ཤེ་སྤ་ ཉམ་པོ་ འཇུ་ ཞུའི་ཧེ་།c
མ་ཤི་ཀེ་ན་ འིན་ཀན་ ཚང་མ་ལ་ ཞིའི་རྡེ་ ཐོབ་ཤིག་། ཨ་མེན་༎