མི་ཙེ་ ཏམ་པ་ཞིག་ པུད་།
4
ཟུྃ་སྤེ་ ཐོག་ནི་ མ་ཤི་ཀེ་ ནག་ ཏང་ པར་རྡོ་ ཉོ་ ཛེད་ཅེ་ཀ་ནི་, ཁྱི་ཞ་རྒུ་ནི་ སམ་ཚུལ་ལ་ ཁོང་ ཙོག་སེ་ ཡོང་ཅེ་ལ་ ཀྲལ་འགྲིག་ ཅོའེ་ཧེ་, ཅེ་ཟེར་ནི་ མ་ཤི་ཀེ་ཕི་ ཟུྃ་སྤེ་ ཐོག་ནི་ རྡུ་ངལ་ ཉོང་ཀན་རྒུ་ནི་ རྡིག་པ་ ཅོ་ཅེ་ འདོད་པ་ ཕྃ་རྡེ་ ནོག་། 2 ཏོ་རྦེ་ ཅོའེ་རྡེ་ ཁྱི་ཞ་རྒུན་ནེ་ འཇིག་རྟེན་ནེ་ན་ ལུའི་ཧ་ནེ་ མི་ཙེ་རྦོ་, འཇིག་རྟེན་ནེ་ འདོད་པ་ ནང་ཞིན་ མ་པུད་རྡེ་, ཀོན་འཇོག་རྒེ་ ཐུག་ཐེད་ ནང་ཞིན་ པུད་རྡེ་ནོག་། 3 ཁྱི་ཞི་ རང་ངེ་ མི་ཙེ་ ཏེཏ་པ་ མེ་ཀན་རྒུན་ ཙོག་སེ་ པུད་ཅེའོ་ ཏ་ ཕང་རྒོའེ་, སྤེར་ན་ ཐ་མེད་པེ་ ལུའི་འབྲེལ་ལེ་ འདོད་པ་, ལུའི་འབྲེལ་ལེ་ འདོད་པ་ མང་པོ་ ཅོ་ཅེ་, ཆང་ ཐུང་ཅེ་, འགྲོན་ཏང་ངེན་ ར་རོའེ་ཤེ་ ཟེའེ་རྒུན་ ནེན་འདེ་ ཀྲན་བ་ རྐྱལ་ཤེ་ འདང་, ཧུ་འདྲ་རྒུན་ལ་ ཅོལ་ཤེ་ ཁམ་ལོག་ ལེ་ཧ་རྒུན་ མ་ཅོ་།4 ཁྱི་ཞ་ ངུལ་མེ་ ཡ་ཏོ་རྒུ་ནི་ ལོབ་ ངན་པ་རྒུ་ནི་ ལྟིང་འགྲྃ་ནི་ པང་ མི་ཏང་ཅེ་རྦེ་ ཁོང་རྒུན་ ཧ་ལེ་རྡེ་ ཁྱི་ཞ་རྒུ་ནི་ ཧོར་ལ་ སྤེ་ར་ ངན་པ་ ཟེ་རེ་ནོག་། 5 འིན་ན་ ཤི་ཀན་ འདང་ སོན་པོ་ ཉ་ཧེ་ཀ་ ཤའ་ ཛེད་རྡེ་ལ་ ཀྲལ་འགྲིག་ ཡོ་ཀ་ནེ་ ཀོན་འཇོག་རྒེ་ འདུན་ལ་ ཁོང་རྒུན་ལ་ སི་སྲུག་ ཏང་རྒོའེ་རྡེན་། 6 ཏེ་རྒ་རྦེ་ཕི་ལ་ ཤི་ཀན་རྒུན་ལ་, ནེ་ཚུལ་ ཟང་པོ་རྦོ་ ཤེད་ཏེ་ འིན་འབེན་, ཞེན་ མི་ ཚུལ་ལ་ ཏོ་རྒུན་ལ་ ཤི་ཅེ་ ཁྲིམ་ ཕོག་ཏེ་ འིན་ན་, ཐུག་ཡིད་རྡེ་ན་ ཁོང་རྒུན་ ཀོན་འཇོག་ ཉམ་པོ་ སོན་པོ་ ལུའི་རྡེ་ནོག་།
7 འཇིག་རྟེན་ནེ་ན་ ཡོ་ཀན་ ཚང་མ་ མེ་ཀན་ ཆ་ཅེ་ ཏུའི་ ཚམ་ལ་ ལེབ་ཏེ་ འིན་འབེ་, མོ་ལམ་ ཞུ་ཅེ་ལ་ ནྃ་ རྟེམ་པོ་ ཏྃ་རྡེ་ རང་སེམ་ ཆུན་འདེ་ པོར་ཧེ་། 8 ཚང་མེ་སང་ ཁག་ཅེན་ སྤེ་ར་རྦོ་, ཅིག་ ཏང་ ཅིག་རྒེ་ན་ ཤེ་སྤ་ ཅོའེ་ཧེ་, ཅེ་ཟེར་ནི་ ཤེ་སྤེ་ རྡིག་པ་ མང་པོ་ཞིག་ ཀབ་རྦེ་ནོག་། 9 ཁྱི་ཞི་ ཁང་པེ་ན་ ཡོང་ཀན་རྒུན་ལ་ ཉིང་ པེ་རྡེ་ རྒ་སུའི་ ཞུའི་ཧེ་།
10 ཀོན་འཇོག་རྒེ་ ཐུག་ཞེ་ མང་པེ་ ནང་ནི་, ཁྱི་ཞ་ ཁྱུད་ སལ་ཧན་འབོ་ ཁྱི་ཞ་ རེ་རེ་ རྒྱ་ལེ་ ཅོའེ་རྡེ་ ཅིག་ ཏང་ ཅིག་ལ་ ཞབ་རྟོག་ ཅོ་ཅེ་ན་ ཀོལ་ཧེ་། 11 ཆོའེ་ཤེད་ཅེ་ ཁྱུད་ ཡོ་ཀན་རྒུ་ནི་, ཀོན་འཇོག་ ཁོ་རང་ངེ་ ཀའ་ ཁྱི་ཞ་ རྒྱུད་ཏེ་ ཤེད་རྡེ་ ཛད་རྡེ་ ཙོག་སེ་ ཤོད་ཧེ་། ཡང་ ཞབ་རྟོག་ ཞུ་ནི་, ཀོན་འཇོག་རྒེ་ སལ་ཧ་ནེ་ ཤུག་པོ་ ཉམ་པོ་ ཞུ་ཧེ་། ཏེ་ནི་ ཁྱི་ཞི་ ཅོ་ཀན་ ཚང་མེ་ ཀོན་འཇོག་ལ་ ཡི་ཤུ་ མ་ཤི་ཀ་ རྒྱུད་ཏེ་ རྟོད་པ་ ཁྱོང་ངེན་། ཁོང་ལ་ སྤལ་ རྡང་ ཝང་ ཚང་མ་ ཏུའི་རྒྱུན་ནི་ཏུའི་རྒྱུན་ ཐོབ་ཤིག་, ཨ་མེན་།
མ་ཤི་ཀ་པ་ འིན་ཅེ་རྦེ་ ནག་ ཐོང་ཅེ་།
12 ཤེ་སྤ་ ཡ་ཏོ་རྒུན་, ཁྱི་ཞ་རྒུན་ལ་ མེ་ན་ ཀྲུལ་ཧན་ ཙོག་སེ་ རྡུ་ངལ་ལེ་ ཐི་ཚོད་ལྟ་ ཐོང་ཀན་འབོ་ལ་, ཡམ་ཚན་ ནོག་ སམ་འདེ་ ཁྱི་ཞ་ ཧ་ མ་ལེ་ཧེ་། 13 འིན་ན་ རྒ་མོ་ ཅོའེ་ཧེ་, ཏེ་ ཐི་ཚོད་ལྟ་ཀན་ ཁྱི་ཞ་རྒུན་ མ་ཤི་ཀེ་ རྡུ་ངལ་ལེ་ན་ འདྲེའེ་ཤུག་རྒེ་ནོག, ཏོ་རྦེ་ ཅོའེ་རྡེ་ ཁོང་ངེ་ ཟི་ཞིད་ འཇིག་རྟེན་ སོན་ཏེ་ ངོན་ཅུག་རྒེ་ ཛེད་ཟ་ནི་, ཁྱི་ཞ་རྒུན་ ཧ་ལེ་ཤེ་ ཐེད་པོ་ ཆེན་།
14 ཀལ་ཏེ་ མ་ཤི་ཀེ་ཀ་ རྡེན་ཆེ་ཤེ་ ཅོ་ཅེ་རྦེ་, སྤེ་ར་ སོག་པོ་ ཟེར་རྡེ་ ཁྲེལ་རྦ་ ཅོ་ནི་, ཁྱི་ཞ་ ཅིན་ལབ་ཅེན་ འིན་, ཅེ་ཟེར་ནི་ ཀོན་འཇོག་རྒེ་ སྤལ་ཅན་ནེ་ ཐུག་ཡིད་པོ་ ཁྱི་ཞ་རྒུན་ ཉམ་པོ་ ཞུ་རྡེ་ནོག་། 15 ཁྱི་ཞ་རྒུན་ལ་ རྡུ་ངལ་ སོང་ཀན་འབོ་, མི་ སེད་ཏེ་, ཧུན་མ་ ཧུའི་རྡེ་, ལེ་ཧ་ སོག་པོ་ ཅོའེ་རྡེ་ ཡང་ ཞེན་མེ་ ལེ་ཧེ་ན་ ཐེ་ཏོག་ ཏང་ཅེ་རྦེ་ ཡོང་ མི་རྒོའེ་། 16 ཀལ་ཏེ་ ཁྱི་ཞ་ མ་ཤི་ཀ་པ་ འིན་ཅེ་རྦེ་ རྡུ་ངལ་ ཆ་ནི་, ཁྲེལ་རྦ་ མ་ཚོར་, འིན་ན་ མི་ཚང་མེ་ ཁྱི་ཞ་ མ་ཤི་ཀེ་ འིན་ཀན་ ཤེ་ཤེ་རྦོ་ལ་, ཀོན་འཇོག་ལ་ རྟོད་པ་ པུལ་ཧེ་། 17 ཏ་ ཀོན་འཇོག་རྒེ་ རང་ངེ་ མི་རྒུ་ནི་ཀ་ནི་ འགོ་ཟུག་ ཛེད་ཏེ་ ཁྲིམ་ཅེད་ ཛེད་ཅེ་ ཞག་པོ་ ལེབ་ཏེ་ ནོག་། ཀལ་ཏེ་ ཨ་ཧོ་ མ་ཤི་ཀ་པ་རྒུ་ནི་ འགོ་ཟུག་ནི་, ཀོན་འཇོག་རྒེ་ ནེ་ཚུལ་ ཟང་པོ་ལ་ ཁ་ མ་ཉེན་ཀན་རྒུ་ནི་ ནེ་ལུག་པོ་ ཀ་ཟུག་ཤིག་ ཡོང་ངེན་? 18 ཀ་ཟུག་ ཏམ་པེ་ སུང་རབ་རྦེ་ན་ མོལ་ལེ་ ཛེད་ཏེ་ འདུག་།
“ཏ་ ཀྲང་པོ་རྒུན་ལ་ མ་ ཀག་སྤོ་ ཉམ་པོ་ ཐར་པ་ ཐོབ་ནི་,
རྡིག་ཅེན་ འདང་ ཀོན་འཇོག་ལ་ མ་འཇིའི་ཧན་རྒུན་ལ་ ཅི་ མི་ཆ་།”
19 ཏེ་རྒ་རྦེ་ཕི་ལ་ ཀོན་འཇོག་རྒེ་ ཐུག་འདོད་ ནང་ཞིན་ རྡུ་ངལ་ རྡང་ པར་རྡོ་ ཁུར་ཧན་རྒུ་ནི་ ལེ་ཧ་ ཟང་པོ་ ཅོའེན་ རང་ངེ་ སྲོག་པོ་ ལོ་ཁྱེལ་ཅེན་ ཛམ་ལིང་ ཞང་ཀན་, ཀོན་འཇོག་རྒེ་ ཆག་ལ་ ལྟེད་རྒོ་ཤེ་ ནོག་།