ཐ་མེ་ ཞག་རྒུ་ནི་ འཇི་སྤ་རྒུན་།
3
ཏི་མོ་ཐི་, ཐ་མེ་ ཞག་རྒུ་ནི་ན་ མ་སྲན་ཀྲེ་ འཇི་ནང་ཅེན་ནེ་ ཏུའི་ རིག་ལ་ ཡོང་ཅེའོ་ ཁྱེ་རང་ལ་ རྒྱུའི་ ཡོང་རྒོ་ཤེ་ ནོག་། 2 སྤེར་ན་ མི་རྒུན་ ཁོ་རང་ འདང་ ཁོ་རང་ངེ་ མུལ་རྒུན་ལ་ ཡ་ཤ་ ཅོ་ཀན་, རང་རྟོད་ ཏང་ཀན་ འདང་ ཕོ་སོ་ཅེན་, འབར་ཧེན་, ཁོ་རང་རྒུ་ནི་ ཕ་མ་རྒུ་ནི་ ཁ་ མ་ཉེན་ཀན་, ཀྲིན་ མི་ཀྲན་ཀན་ འདང་, ཏམ་པ་ མན་ཀན་ ཡོང་ཅེན་། 3 ཡང་ ཤེ་སྤ་ མེ་ཀན་, ཤག་སྤ་ མ་ཏང་ཀན་, ཞེན་མ་ལ་ འབར་ཧན་, རང་སེམ་ཆུན་ མ་ཉེན་ཀན་, ནག་ ལྟན་ལ་ ཐེད་ཀན་ འདང་, ཟང་པེ་ རྒྱཔ་འགལ་ ཅོ་ཀན་ ནོག་། 4 ཡ་ཏོ་རྒུན་ལ་ འགྲ་ཝོ་ ལག་ལ་ ལྟད་ཀན་, འགྱོ་སྤ་ སམ་བ་ མ་ཏང་ལ་ ལེ་ཧ་ ཅོ་ཀན་, མྃ་རྡེ་ལ་ ཕོ་སོ་ཅེན་ འདང་, ཀོན་འཇོག་རྒེ་སང་ འཇིག་རྟེན་ནེ་ རྐྱིད་པོ་ལ་ ཡ་ཤ་ ཅོ་ཀན་ ཡོང་ངེན་། 5 ཁོང་རྒུ་ནི་ ཀོན་འཇོག་ལ་ ཅོལ་ཧན་ ཙོག་སེ་ ལྟན་ནེ་ནོག་། ཡིན་ནྃ་ ཀོན་འཇོག་རྒེ་ ནུའི་སྤེ་ ཁོང་ངེ་ མི་ཙེ་ འགྱུར་ཤེ་ལ་ ནང་བ་ ཏང་ངེ་ མག་།6 ཏེ་ཙོག་སེ་ མི་རྒུ་ནི་ ཞེན་མ་རྒུ་ནི་ན་ ལོ་ཁྱེལ་ ཁྱོྃ་རྡེ་ ཁོང་རྒུ་ནི་ ཁང་པ་ སོང་འདེ་, རྡིག་པེ་ རྒྱོན་ནེ་ ཁུ་རུ་ རྡང་ འཇིག་རྟེན་ནེ་ ཞེན་ཡང་ འདོད་པེ་ ཡོག་ལ་ ནན་ཀ་ནེ་ པོ་མོ་ འུ་ཐུག་རྒུ་ནི་ཀ་ནི་ ཕན་ཏོག་ ནེ་ནེན་། 7 ཏོ་ཙོག་སེ་ པོ་མོ་རྒུན་ ཏུའི་རྒྱུན་ ལབ་ཞ་ སོ་མ་ རིག་རྒེ་ ལྟིང་འགྲྃ་ནི་ ཆ་ནོག་, འིན་ན་ ཁོང་རྒུན་ལ་ རྡེན་འབའ་རྦེ་ མ་ནི་ ཧ་ཀོ་ ཉེན་ནེ་ མག་། 8 ཡཱ་ནེ་ རྡང་ ཡམ་འབཱ་རེ་རྒུ་ནི་ ལུང་རྟོན་པ་ མོ་ཤེ་ རྒྱཔ་འགལ་ ཅོའོ་ ཙོག་སེ་, ཏེ་ མི་རྒུ་ནི་ རྡེན་འབེ་ རྒྱཔ་འགལ་ ཅོ་ནོག་། ཁོང་རྒུན་ལ་ སམ་བ་ ངན་པ་ རྡང་ ཟུའི་མེ་ ཏེཏ་པ་ ཡོད་ཏེ་ ནོག་། 9 འིན་ན་ ཁོང་རྒུ་ནི་ མང་པོ་ཞིག་ ཡར་རྒྱེ་ མི་ཅོ་, ཅེ་ཟེར་ནི་ ཡན་ནེ་ རྡང་ ཡམ་འབཱ་རེ་རྒུ་ནི་ ནེ་ལུག་ ཙོག་སེ་, ཁོང་རྒུ་ནི་ ལེ་ཧ་རྒུན་ ཧ་འགྲང་ འིན་ཀན་འབོ་ མི་ཚང་མེ་ སལ་སྤོ་ ཅོའེ་རྡེ་ ཐོང་ངེན་།
པ་འུ་ལུའི་ ཏི་མོ་ཐི་ལ་ ལབ་ཞ་ སལ་།
10 འིན་ན་ ཏི་མོ་ཐི་, ངེ་ ཅི་ ལབ་རྦེ་ཡོད་, ངེ་ མི་ཙེ་ པུད་ཚུལ་, ཅི་ ཏོན་ནེ་ཕི་ ངེ་ མི་ཙེ་ འིན་, ངེ་ ཏེཏ་པ་ ངེ་ ཟོད་པ་, ངེ་ ཤེ་སྤ་, ཡང་ ངེ་ རྡུ་ངལ་ ཁུར་ཤེ་ ཁྱུད་རྒུན་ ཁྱེ་རང་ལ་ རྒྱུའི་ནོག་། 11 ཨན་ཏི་ཡོག་, ཨི་ཀོ་ནི་ཡམ་ འདང་, ལི་སི་ཏི་རཱ་རྒུ་ནི་ན་ ང་ ནག་ ཏང་ པར་རྡོ་ ལྟན་། ཏུ་རུ་ ཡོད་ཟ་ནི་ ངེ་ ཙམ་ཤིག་རྒེ་ ནག་ ཏང་ རྡུ་ངལ་རྒུན་ ཁུར་, འིན་ན་ ཙོབོ་རྡེ་ ང་ ཏེ་ ཚང་མེ་ ནང་ནི་ ཐར་ཤུག་རྒེ་ ཛེད་ཀན་འབོ་ ཁྱེ་རང་ལ་ རྒྱུའི་ནོག་། 12 འོ་ནེ་, མ་ཤི་ཀ་ ཡི་ཤུའི་ན་ ཀོན་འཇོག་རྒེ་ ཐུག་ཉེ་ཤེ་ཅན་ནེ་ ལམ་ལ་ འགྲུ་ལེན་ མི་ཙེ་ པུད་ཉིན་ ཡོ་ཀན་ ཚང་མ་ ནག་ ཐོང་ངེན་། 13 འིན་ན་ མི་ངན་ རྡང་ འགོ་ཧོར་ཧན་རྒུན་, སོག་པོ་ནི་ ཐུ་ཤོག་ ཆོག་ལ་ ཆེན་། ཁོང་རྒུ་ནི་ ཞེན་མ་རྒུན་ལ་ འགོ་ཧོར་རེན་, ཡང་ ཁོ་རང་རྒུན་ལ་ འགོམ་ཧོར་རེ་ན་ སོང་འདེ་ ནོག་།
14 འིན་ན་ ཁྱེ་རང་ལ་ ལབ་ཞ་ ཐོབ་ཀན་རྒུ་ནི་ཀ་ རྟེམ་པོ་ འདེད་ཏེ་ ཏོ་རྒུན་ རྡེན་འབའ་ འིན་ཀན་འབོ་ ཏེཏ་པ་ ཅོའེ་, ཅེ་ཟེར་ནི་ ཁྱེ་རང་ལ་ ཏེ་ ལབ་ཀ་ནེ་ མི་རྒུན་ ལོ་ཁྱེལ་ཅེན་ འིན་ཀན་འབོ་ རྒྱུ་ནོག་། 15 ཁྱེ་རང་ལ་ ཕྲུ་རྒུའི་ ཏུའི་ནི་ཕ་ལ་ ཏམ་པེ་ སུང་རབ་རྦེ་ ནང་ནི་ ལབ་ཏེ་ འིན་འབེན་། ཡང་ ཏེ་ ལབ་ཞ་རྒུ་ནི་ ཁྱེ་རང་ལ་ མ་ཤི་ཀ་ ཡི་ཤུའི་ན་ རྡེན་ཆེ་ཤེ་ ཅོ་ཅེ་ རྒྱུད་ཏེ་, ཐར་པ་ ཐོབ་ཅེ་ལ་ ཤེ་རབ་པོ་ སལ་རྡེ་ འིན་། 16 ཏམ་པེ་ སུང་རབ་ ཚང་མ་, མི་ རྒྱུད་ཏེ་ ཀོན་འཇོག་རྒེ་ འབྲི་ཛེད་ཏེ་ ནོག་, ཡང་ ཏོ་ ཨ་ཧོ་རྒུན་ལ་ ལབ་ཅེ་, རྐྱོན་འཇོད་ ཅོ་ཅེ་, ལམ་ ཀྲང་པོ་ ལྟན་ཅེ་ རྡང་ མི་ཙེ་ ཀྲང་པོ་ཞིག་ པུད་ཅེ་ལ་ ཁྲིད་ཅེ་རྒུ་ནི་ན་ ཕན་ཏོག་ཅེན་ ནོག་། 17 ཀོན་འཇོག་རྒེ་ ཏོ་ ཁོ་རང་ངེ་ མི་རྒུན་ལ་ ལེ་ཧ་ ཟང་པོ་ ཚང་མ་ ཅོ་ཅེ་ ཁྱུད་ སལ་རྡེ་ ཀྲལ་འགྲིག་ པོ་རེ་ ཛེད་ཅེ་ལ་ ཀོལ་ལེ་ ཛེ་རྡེ་ནོག་།