4
ཀོན་འཇོག་ ཏང་ མ་ཤི་ཀ་ ཡི་ཤུ་ ཁོ་རང་ངེ་ རྒྱལ་སྲིད་ རྐྱོང་ཅེ་ལ་ རྐྱོད་ཟ་ནི་, ཁོང་ངེ་ སོན་པོ་ རྡང་ ཤི་ཀན་ ཉ་ཧེ་ ཁྲིམ་ཅེད་ ཛེ་རྡེན་། ཁོང་ ཉ་ཧེ་ ཧུ་འདུན་ལ་ ངེ་ ཁྱེ་རང་ལ་ ཉིང་ནི་ སྤང་པུད་རྡེ་ཡོད་: 2 ཧབ་ ཡོད་ཁྲོ་, ཡང་ མེད་ཁྲོ་, ཀོན་འཇོག་རྒེ་ ཀའ་རྒུན་ ཤེད་ཅེ་ལ་ ཀྲལ་འགྲིག་ འདོད་། ཟོད་པ་ རྡང་ ལབ་ཞ་ ཟང་པོ་ ཉམ་པོ་ ཁྱེ་རང་ངེ་ མི་རྒུན་ལ་ རྐྱོན་རྒུན་ ལྟོན་, ནོར་ཧན་རྒུན་ལ་ ཁར་རྐྱག་ ཏོང་, ཡང་ སེམ་རུའི་ ཏོང་།3 ཏུ་ཟུག་ ཏུའི་ཞིག་ ལེབ་རྦེན་, མི་རྒུ་ནི་ རྡེན་འབའ་ རྡང་ ཟང་པེ་ ལབ་ཞ་རྒུན་ལ་ མ་ཉེན་ནི་, ཁོ་རང་རྒུ་ནི་ འདོད་པེ་ རྒྱབ་ནི་ འགྲུ་ལེན་ ཡང་ ཁོང་ངེ་ ནམ་ཅོག་རྒེ་ ཉེན་ཉིན་ འགྲོ་ཀན་རྒུན་ ཤེད་ཀ་ནེ་ རྒྱར་རྒེན་ རིག་ ཙལ་ལེན་། 4 ཁོང་རྒུ་ནི་ ནམ་ཅོག་རྒུན་ རྡེན་འབའ་ནེ་ ཐག་རིང་ལ་ ཁྱེར་ཏེ་ ཅོའེ་མེ་ སྲུང་རྒུན་ ཆོག་ལ་ འགྱུ་རེན་།
5 འིན་ན་ ཏོ་ཙོག་སེ་ ནེ་ལུག་ ཚང་མེ་ན་ ཁྱེ་རང་ངེ་ ཤང་ ཅོའེ་རྡེ་ སལ་སྤོ་ སམ་བ་ ཏང་རྒོ་ཤེ་ ནོག་། ཙོབོ་རྡེ་ཕི་ རྡུ་ངལ་ ཁུར་ཤེ་ལ་ འཇིའི་ མ་འཇིའི་, ཞེན་མ་རྒུན་ལ་ ནེ་ཚུལ་ ཟང་པོ་ ཤེད་ཅེ་ ལེ་ཧ་རྒུན་ ཅོའེ་, ཡང་ ཁྱེ་རང་ལ་ ཀོན་འཇོག་རྒེ་ ཅོ་ལ་ སལ་ཧ་ནེ་ ཁག་ ཚང་མ་ ཅོའེ་།
6 ང་རང་ངེ་ ཧོར་ལ་ ཟེར་ནི་ ངེ་ མི་ཙེ་རྦོ་, ཀོན་འཇོག་ལ་ པུལ་ཧ་ནེ་ ཆུའི་ ཆུ་པུད་ ཙོག་སེ་ ཕོའེན་འདང་ ཡོད་, ང་ ཤི་ཅེ་ ཏུའི་རྦོ་ ཉེ་མོ་ལ་ ལེབ་ཏེ་ འདུག་། 7 ཡང་སྤ་ སེ་ཀན་ཞིག་ ཙོག་སེ་, ངེ་ལ་ འགྲེན་རྡུར་ རྒྱ་ལེ་ ཅོའེ་རྡེ་ ཏྃ་རྦེན་, ངེ་ པང་ ཏྃ་ ཚར་རྡེ་ འིན་, ཡང་ ངེ་ ཏེཏ་པ་ མ་ཕང་ངེ་ རྟེམ་པོ་ ཡོད་། 8 ཏ་ ཀྲང་པེ་ ཐོར་ཤོག་པོ་ ངེ་ཕི་ སྲུྃ་རྡེ་ ཡོད་, ཀའོ་ ཁྲིམ་ཅེད་ སལ་ཧ་ནེ་ ཙོབོ་ ཀྲང་པེ་, ཁོང་ ལོག་ཏེ་ ཕེབ་ཅེ་ ཞག་པོ་ལ་ ང་ སལ་ལེ་ ཛེ་རྡེན་། ཡང་ ཏེ་ སོལ་རེ་རྦོ་ ང་རང་ ཅིག་པོ་ལ་ མན་, ཁོང་ འཇལ་ཤེ་ལ་ མ་མང་པོ་ འདོད་པ་ ཆོན་མོ་ པོར་ཧན་ ཚང་མེ་ཕི་ལ་།
པ་འུ་ལུའི་ ལྟིང་འཇུག་རྒེ་ ལབ་ཞ་།
9 ཏི་མོ་ཐི་, འཇུ་འཇུ་ འི་རུ་ འགྱོ་སྤ་ ཡོང་ཅེ་ ཙོན་འགྲུའི་ ཅོའེ་། 10 སྤུན་ འདེ་མཱ་ འི་ འཇིག་རྟེན་ནེ་ རྐྱིད་པོ་རྒུན་ལ་ ཤེ་སྤ་ ཅོ་ཅེ་རྦེ་, ང་ ཕྃ་རྡེ་ ཐེ་ས་ལོ་ནི་ཀེ་ རྒྱལ་ས་ སོང་། ཀི་རི་ཀན་རྦོ་ འགཱ་ལ་ཏི་ཡཱ་ ཡང་ ཏི་ཏུའི་རྦོ་ འདལ་མ་ཏི་ཡཱ་ ཡུལ་རྒུན་ལ་ སོང་། 11 ང་ ཉམ་པོ་ ལུ་ཀ་ ཅིག་པོ་ ཡོད་། ཁྱེ་རང་ ཡོང་ཟ་ནི་, མར་ཀུའི་ལ་ ཉམ་པོ་ ཁྲིད་ཏེ་ ཁྱོང་, ཅེ་ཟེར་ནི་ ངེ་ ཞབ་རྟོག་རྒེ་ ལེ་ཧེ་ན་ ཁོ་ མ་ ཕན་ཏོག་ཅེན་ཞིག་ འིན་། 12 ཏི་ཁི་ཀུའི་ ངེ་ ཨེ་ཕེ་སུའི་ རྒྱལ་ས་ ལམ་ཅུག་པིན་། 13 ཁྱེ་རང་ ཡོང་ཟ་ནི་, ཏྲོ་ཡཱེ་ ཀྲོང་ཁྱེར་རེ་ན་ ཡོ་ཀ་ནེ་ ཀར་པུའི་ ཁང་པེ་ན་ ངེ་ པོར་རྡེ་ ཡོ་ཀ་ནེ་ ཀོའེ་རྦོ་ ཁུར་རྡེ་ ཁྱོང་། ངེ་ སྤེ་ཆ་རྒུན་ ཁུར་རྡེ་ ཁྱོང་, ཁག་ཅེན་ ཅོའེ་རྡེ་ པག་ཤོག་རྒེ་ཀ་ འབྲི་ཧ་ནེ་ ཤོག་རིལ་རྒུན་ ཁྱོང་།
14 ལྕག་ལེ་ ཅོ་ཀན་ ཨ་ལེག་སན་འདེར་རེ་, ང་ མང་པོ་ ནོད་པ་ རྐྱལ་, འིན་ན་ ཁོའེ་ ཅོ་ཀན་རྒུན་ལ་ ཙོབོ་རྡེ་ ཁྲིམ་ཅེད་ སལ་ལེ་ ཛེ་རྡེན་། 15 ཁྱེ་རང་ངེ་ལ་ ཁོའེ་ཀ་ནི་ ཤང་ ཅོའེ་, ཅེ་ཟེར་ནི་ ང་ཞི་ ལབ་ཞ་རྒུན་ལ་ ཁོའེ་ མ་མང་པོ་ རྒྱཔ་འགལ་ ཅོའེ་རྡེ་ འིན་འབེན་།
16 ང་ ཁྲིམ་སྤོན་ནེ་ འདུན་ལ་ ཏང་པོ་རང་ ཁྲིད་ཏེ་ ཁྱེར་ཟ་ནི་, སུ་ཞི་ལ་ ང་ ཡ་ཏོ་ལ་ མ་ཡོྃ་། ཚང་མེ་ ང་ ཕྃ་རྡེ་ སོང་། ཀོན་འཇོག་རྒེ་ ཏོ་རྒུ་ནི་ཀ་ ཉེད་ ཀ་ལེ་ མ་ཛེད་ཤིག་། 17 འིན་ན་ ངེ་ ནེ་ཚུལ་ ཟང་པོ་ སོན་ཏེ་ ཤེད་ ཉེན་ཏེ་ ཡ་ཧུ་འདཱ་པ་ མན་ཀན་ ཚང་མེ་ ཚོར་ཤེ་ཕི་, ཙོབོ་ ང་ ཉམ་པོ་ ཞུ་རྡེ་ ཛེད་ཏེ་ ང་ ཤེད་ སལ་ལེ་ ཛེད་། ཡང་ ཁོང་ངེ་ སིང་འགེ་རྒུན་ལ་ ཟ་ཅུག་ཅེ་ཀ་ནི་ ང་ ཐར་ཤུག་རྒེ་ ཛེད་། 18 འོ་ནེ་, ཙོབོ་རྡེ་ ང་ ངན་པེ་ སྤུང་འགོལ་ ཅོ་ཅེ་ཅེན་ ཚང་མེ་ཀ་ནི་ རྐྱོབ་ཏེ་ ཁོ་རང་ངེ་ རྡེ་བ་ཅན་ནེ་ རྒྱལ་སྲིད་རྡེ་ན་ ང་ ཁམ་ཟང་ ཁྲིད་ཏེ་ ཁྱེར་རེ་ ཛེ་རྡེན་། ཀོན་འཇོག་ལ་ ཏུའི་རྒྱུན་ནི་ཏུའི་རྒྱུན་ སྲོག་ ཡོ་ཀན་ ཚང་མེ་ཀ་ནི་ སྤལ་ ཐོབ་ཤིག་, ཨ་མེན་།
པ་འུ་ལུའི་ ལྟིང་འཇུག་རྒེ་ འཇུ་།
19 པིརི་སི་ལ་ རྡང་ ཁོའེ་ མག་པ་ ཨ་ཀུའི་ལ་ རྡང་ སྤུན་ ཨོ་ནེ་སི་ཕོ་རུའི་ ཁང་པེ་ན་ འདེད་ཀན་ ཚང་མ་ལ་ ངེ་ ཆོག་ནི་ འཇུ་ ཟེར་། 20 ཨེ་རེ་ཏུའི་ ཀོ་རིན་ཐི་ རྒྱལ་ས་ལ་ འདེད་, ཡང་ སྤུན་ ཏྲོ་ཕི་མུ་ལ་ ཟུར་མོ་ ཡོྃ་རྦེ་, ངེ་ མི་ལེ་ཏུའི་ ཀྲོང་ཁྱེར་རེ་ན་ པོར་རྡེ་ ཡོྃ་རྦེན་།
21 རྒུན་ཏུའི་སང་ ངུལ་ལ་, འི་རུ་ ཡོང་ཅེ་ ཙོན་འགྲུའི་ ཧོཔ་ ཅོའེ་། སྤུན་ ཨེའུ་འབུ་ལུ་ཡི་ ཁྱེ་རང་ལ་ འཇུ་ ཞུ་རུག་, ཡང་ ཏེ་རྒ་ ཙོག་སེ་ སྤུན་ པུ་འདེན་, སྤུན་ ལི་ནུ་, སྲིང་མོ་ ཀོལོ་འདི་ཡ་ ཡང་, ཞེན་ སྤུན་ ཚང་མེ་ལ་ ཁྱེ་རང་ལ་ འཇུ་ ཞུ་རུག་།
22 ཙོབོ་ ཁྱེ་རང་ངེ་ ཐུག་ཡིད་ ཉམ་པོ་ ཞུ་ཤིག་། ཡང་ ཁོང་ངེ་ ཐུག་ཞེ་ ཁྱི་ཞ་ ཚང་མ་ ཉམ་པོ་ ལུའི་ཤིག་༎