ཡི་ཤུ་ མ་ཤི་ཀེ་ མག་མི་ ཟང་པོ་།
2
ཏི་མོ་ཐི་, ངེ་ པུ་ཙ་, ཀོན་འཇོག་རྒེ་ ཁྱེ་རང་ལ་ མ་ཤི་ཀ་ ཡི་ཤུ་ རྒྱུད་ཏེ་ སལ་ལེ་ ཛེད་ཀ་ནེ་ ཐུག་ཞེ་ན་ ཤུག་ཤེན་ འགྱུར་། 2 ངེ་ མི་ མང་པེ་ འདུན་ལ་ ལབ་ཞ་ ཏང་ཀན་རྒུན་ ཁྱེ་རང་ངེ་ ཚོར་རྡེ་ ནོག་, ཏ་ ཏེ་ ལབ་ཞ་རྒུན་ ཁྱེ་རང་ངེ་ ལོ་ཁྱེལ་ཅེན་ནེ་ མི་རྒུན་ལ་ ལབ་རྒོའེ་, ཏེ་ནི་ ཞན་མ་ ཤེད་ཅེ་ ལོབ་ཞོང་ ཁོང་རྒུན་ལ་ ཐོབ་རྦེན་།3 མ་ཤི་ཀ་ ཡི་ཤུའི་ མག་མི་ ཟང་པོ་ཞིག་རྒེ་ ཚུལ་ལ་ ང་ ཉམ་པོ་ རྡུ་ངལ་རྒུན་ ཁུར་། 4 མག་མི་རྒུ་ནི་ མག་མི་ མན་ཀན་ མི་རྒུ་ནི་ མི་ཙེ་ན་ ཐེ་རྟོག་ ཏང་ངེ་ མག་, ཅེ་ཟེར་ནི་ ཁོང་རྒུ་ནི་ ཁོ་རང་ངེ་ མག་མི་ འུ་རྐྱོང་ ཐེད་ཅུག་ཅེ་ ཙོན་འགྲུའི་ ཅོ་ནོག་། 5 ཡང་ ཡང་སྤ་ སེ་ཀན་ཞིག་ལ་ རྒྱལ་ཁེ་ སོལ་རེ་ ཐོབ་རྦེ་ མག་, ནམ་ཚུག་པ་ ཁོང་རྒུན་ ཁྲིམ་མེ་ཀ་ འགྲུལ་ མི་འགྲུལ་། 6 ཏེ་རྒ་ ཙོག་སེ་, ཙོན་འགྲུའི་ ཅོ་ཀ་ནེ་ ཞིང་འབད་པ་, ཁོ་རང་ངེ་ ལེ་ཧ་ ཅོ་ཀ་ནེ་ རྟོན་ཏོག་རྒེ་ ཧལ་ལ་ ཏང་པོ་རྦོ་ ཐོབ་ རྒོའེ་ནོག་། 7 ངེ་ ཟེར་ཧན་རྒུ་ནི་ ཧོར་ལ་ སམ་བ་ ཏོང་། ཙོབོ་རྡེ་ ཁྱེ་རང་ལ་ འི་ ཚང་མ་ ཧ་ཀོ་ཅེ་ན་ ཡ་ཏོ་ ཛེད་རྡེན་།
8 རྒྱ་སྤོ་ འདཱ་འབིད་རྡེ་ ཕར་རྒྱུད་, ཡི་ཤུ་ མ་ཤི་ཀ་ ཀྲོྃ་རྡེ་ སོན་པོ་ ཞྃ་རྡེ་ འིན་ཀན་འབོ་ འི་ཏུ་ ཅོའེ་, ཏོ་ ངེ་ ཤེད་ཀ་ནེ་ ནེ་ཚུལ་ ཟང་པོ་ འིན་། 9 ཀ་རྦེ་ཕི་ ང་ རྡུ་ངལ་ ཐོང་འདུག་, ཡང་ ཁྲིམ་ཅག་ཀན་ཞིག་ ཙོག་སེ་ ལྕ་རྟག་ ཉམ་པོ་ ཅིང་འདེ་ པོར་། འིན་ན་ ཀོན་འཇོག་རྒེ་ ཀའ་འབོ་ ལྕ་རྟག་ལ་ རྡམ་འདེ་ པོར་ མི་ཉེན་། 10 ཏོ་རྦེ་ཕི་ ཀོན་འཇོག་རྒེ་ འདམ་མེ་ ཛེད་ཀ་ནེ་ མི་རྒུན་ལ་ ཐར་པ་ ཐོབ་ཅེ་ལ་ ང་ རྡུ་ངལ་ ཅི་ཞིག་ ཆ་ནང་ ཁུར་ཤེ་ལ་ ཐེད་པོ་ འིན་། ཏེ་ ཐར་པ་འབོ་ མ་ཤི་ཀ་ ཡི་ཤུའི་ན་ ཐ་མེད་པེ་ ཟི་ཞིད་ ཉམ་པོ་ འདུག་ཅེའོ་ འིན་།
11 འི་ ཞལ་ཏ་རྒུན་ ལོ་ཁྱེལ་ཅེན་ ནོག་།
“ཀལ་ཏེ་ ཨ་ཧོ་རྒུན་ མ་ཤི་ཀ་ ཉམ་པོ་ ཤི་ནི་,
ཨ་ཧོ་རྒུན་ ཁོང་ ཉམ་པོ་ སོན་པོ་ ལུའི་རྡེན་།
12 ཀལ་ཏེ་ ཨ་ཧོ་རྒུ་ནི་ རྡུ་ངལ་ ཁུར་ནི་,
ཁོང་ ཉམ་པོ་ ཨ་ཧོ་རྒུ་ནི་ ཝང་ངེ་ལ་ སྲུལ་ལེན་།
ཀལ་ཏེ་ ཨ་ཧོ་རྒུ་ནི་ ཁོང་ ཤེ་རྡེ་མེད་ ཟེར་ནི་,
ཁོང་ངེ་ལ་ ཨ་ཧོ་རྒུན་ ཤེ་རྡེ་མེད་ མོལ་ལེན་།
13 ཀལ་ཏེ་ ཨ་ཧོ་རྒུན་ ལོ་ཁྱེལ་ཅེན་ མ་ལུའི་ནི་,
ཁོང་ ལོ་ཁྱེལ་ཅེན་ ཞུ་རྡེ་ནོག་། ཅེ་ཟེར་ནི་
ཁོང་ངེ་ ཁོང་ སུ་ འིན་ཀན་འབེ་ རྒྱཔ་འགལ་ མི་ཛེད་།”
ཀོན་འཇོག་ ཐུག་ཐེད་ཅུག་ཀ་ནེ་ ཞབ་རྟོག་པ་ཞིག་།
14 ཏེ་ ལབ་ཞ་རྒུ་ནི་ ཧོར་ལ་ མི་ཚང་མ་ལ་ འི་ཏུ་ ཧུལ་, ཡང་ ཁོང་རྒུན་ལ་ སྤེ་ར་ ཁག་ཅེན་ མན་ཀ་ནེ་ཀ་ ཁྲབ་ཅེ་རྒུན་ རྒོག་ ཟེར་རྡེ་ ཀོན་འཇོག་རྒེ་ ཧུ་འདུན་ལ་ རྡམ་འཇག་ ཏོང་། ཡུ་ཙོག་སེ་ ཁྲུག་པེ་ཀ་ནི་ ཕན་ཏོག་ མེད་པེ་, ཏོ་ ཉེན་ཀན་ ཏེཏ་པ་ཅན་རྒུ་ནི་ མི་ཙེ་ འདོད་མེད་ ཅོ་ནོག་། 15 ཀོན་འཇོག་རྒེ་ ཧུ་འདུན་ལ་ ཁོང་ ཐུག་ཐེད་ ཅུག་ཀན་ཞིག་ ལྟན་ཅེ་ལ་ ཙོན་འགྲུའི་ ཅོའེ་། ཁྱེ་རང་ ཁྲེལ་རྒོའེ་ མེ་ཀན་ རྡང་ རྡེན་འབེ་ ཀའ་རྒུན་ རྒྱ་ལེ་ ཅོའེ་རྡེ་ ཧ་ཀོ་ཅུག་ ཉེན་ཀ་ནེ་ ཞབ་རྟོག་པ་ ཟང་པོ་ཞིག་ ཡོང་རྒོའེ་། 16 ཏོན་ཏག་ མེ་ཀན་ འདང་ ཧ་འགྲང་ངེ་ སྤེ་ར་རྒུ་ནི་ ཐག་རིང་ལ་ འདོད་ཧེ་, ཀའོ་རྒུ་ནི་ མང་ངེ་ ཤོད་པ་ ངན་པ་ ཆོག་ལ་ ཁྲིད་ཏེ་ ཁྱེ་རེ་ནོག་། 17 ཏོ་ཙོག་སེ་ སྤེ་ར་རྒུན་ ཤ་ ཟ་ཀ་ནེ་ མ་ཀ་ ངན་པ་ ཙོག་སེ་ རྒྱེ་རྡེ་ནོག་, སྤེར་ན་ ཧེ་མི་ནེ་ཡུ་ རྡང་ པི་ལེ་ཏུ་རྒུན་ ཙོག་སེ་ ནོག་། 18 ཁོང་རྒུ་ནི་ མ་ཤི་ཀེ་ན་ ཏེཏ་པ་ཅེན་ ཤི་ཀན་རྒུན་ སོན་པོ་ ལང་ ཚར་རྡེ་ ནོག་ ཟེར་ཏེ་ རྡེན་འབེ་ ལམ་འབོ་ ཕྃ་རྡེ་ ནོག་། ཡང་ ཏུ་ཟུག་ ཟེར་རྡེ་ ཏེཏ་པ་ཅེན་ ཁ་ཅིག་རྒེ་ སོན་པོ་ ལྃ་ཤེ་ རེ་ཝ་རྦོ་ ཅག་ཏེ་ ཁོང་རྒུ་ནི་ ཏེཏ་པ་ མེ་ཀན་ ཅོའེ་རྡེ་ ནོག་།
19 འིན་ན་ ཀོན་འཇོག་རྒེ་ རྡེན་འབའ་འབོ་ མག་རྡེན་ ཙོག་སེ་ རྟེམ་པོ་ ལུའི་རྡེན་ ཀ་རྦེ་ཀ་: “ཙོབོ་རྡེ་ ཁྱེན་ནེ་ནོག་ ཁོང་ངེ་ འིན་ཀན་རྒུན་” ཡང་ “ཡི་ཤུ་, ངེ་ ཙོབོ་ འིན་ ཟེར་ཧན་ ཚང་མ་, ངན་པ་ ཅོ་ཅེ་ནི་ འགྱུར་རྒོའེ་” འབྲི་ ཛེད་རྡེ་ ཡོད་ཏེ་ ནོག་།
20 སྤེར་ན་ ནང་ཚང་ ཆུག་པོ་ཞིག་རྒེ་ ཁང་པེ་ན་ ནོད་ ཁ་ཅིག་ སེར་ རྡང་ མུལ་ལེ་ ཡང་ ཁ་ཅིག་ ཤིང་ འདང་ ཀ་ལག་རྒུ་ནི་ ཅོའེ་རྡེ་ ཡོད་ཏེ་ ནོག་། རིན་ཅེན་ནེ་ ནོད་རྒུན་ མིག་ས་ལེ་ རྒ་རྟོན་ནེ་ཕི་ ཡང་ ཁྱེ་མོ་ ནོད་རྒུན་ ཞག་ཏང་ངེ་ རྒོའེ་ཤེ་ན་ ཀོལ་ལེ་ནོག་། 21 ངེ་ ངུལ་ལ་ ཟེར་ཧན་རྒུ་ནི་ཀ་ནི་ སང་མ་ པོར་ཧན་རྒུན་, མིག་ས་ལེ་ སི་ཝེ་ཕི་ ཀོལ་ལེ་ ཛེད་ཅེ་ ལག་ཆ་ རིག་ འགྱུ་རེན་, ཏམ་པ་ རྒྱུད་ཏེ་ སྤོན་འབེ་ཕི་ ཕན་ཏོག་ཅེན་ འགྱུ་རེན་, ཡང་ ལེ་ཧ་ ཟང་པོ་ ཚང་མ་ ཅོ་ཅེ་ལ་ ཀྲལ་འགྲིག་ འདེད་རྡེན་།
22 ཁྱོག་ཏོང་ངེ་ ལུའི་ འདོད་པ་ ངན་པ་རྒུ་ནི་ ཤོར་རྡེ་ ཀྲང་པོ་ རྡང་ ལོ་ཁྱེལ་ཅེན་ནེ་ མི་ཙེ་ པུད་ཅེ་, ཤེ་སྤ་ རྡང་, ཞིའི་རྡེ་རྒུ་ནི་ རྒྱབ་ནི་ རྒྱུག་ཧེ་, ཏོ་རྒུན་ མ་ཚེད་ ཁྱི་ཞི་ འབྲེལ་, སེམ་ ལག་མོ་ ཉམ་པོ་ ཙོབོ་ ཀོན་འཇོག་ལ་ མོ་ལམ་ ཞུའི་ཧན་རྒུན་ ཉམ་པོ་ ལྡན་ཅུག་རྒོ་ཤེ་ ནོག་།
23 ཡང་ ངེ་ ཟེ་འིན་, ཧ་འགྲང་ འདང་ ཏོན་ཏག་ མེ་ཀ་ནེ་ ཁྲུག་པ་རྒུ་ནི་ན་ མ་འདྲེའེ་, ཅེ་ཟེར་ནི་ འེ་ཀ་ནི་ ནོལ་ཤེ་ ཅིག་པོ་ མིན་ནེ་ནོག་། 24 ཙོབོ་རྡེ་ ཞབ་རྟོག་པ་ ཁྲུག་པ་ མ་ཏང་ལ་, མི་ཚང་མ་ལ་ ཉིང་ཞེ་ ལྟན་ཀན་, མི་ ཀྱོང་པོ་རྒུན་ ཉམ་པོ་ ཟོད་པ་ཅེན་ ཡང་ རྒྱ་ལེ་ ཅོའེ་རྡེ་ ལབ་ཉེན་ཀན་ཞིག་ ཡོང་རྒོའེ་། 25 འཇམ་པོ་ ཉམ་པོ་ རྒྱཔ་འགལ་ ཅོ་ཀན་རྒུན་ལ་ ལབ་ཞ་ ཏོང་། ཅི་ རྒྱུའི་, ཀོན་འཇོག་རྒེ་ ཁོང་རྒུ་ནི་ ཉིང་རྒུན་ འགྱུར་ཤུག་རྒེ་ ཛེད་ཏེ་ རྡེན་འབེ་ ལབ་ཞེ་ རྒྱབ་ནི་ འགྲུལ་ཤེ་ལ་ ཧབ་ སལ་སྲིད་ཅེ་ ནོག་། 26 ཏེ་ནི་ ཁོང་རྒུན་ སམ་བ་ཅེན་ འགྱུར་རྡེ་ རྡུད་རྒུ་ནི་ ཟུམ་འདེ་ པོར་རྡེ་ ཡོ་ཀན་འབེ་ ནང་ནི་ ཐ་རེན་, ཀ་རྦེ་ ཁོང་རྒུན་ ཁོའེ་ འདོད་པ་ ནང་ཞིན་ ཅོ་ཅུག་ཅེ་ལ་ ཟུམ་འདེ་ ཡོད་པེན་།