ཏི་མོ་ཐི་ལ་ པ་འུ་ལུའི་ ཆག་འབྲི་ ཉི་སྤ་།
པ་འུ་ལུའི་ ཆོག་ནེ་ འཇུ་།
1
འི་ ཡི་རྒེ་རྦོ་ ཀོན་འཇོག་རྒེ་ ཐུག་འདོད་ ནང་ཞིན་, མ་ཤི་ཀ་ ཡི་ཤུའི་ ཧུ་ཚབ་ལ་ འདམ་མེ་ ཛེད་ཀ་ནེ་ ང་ པ་འུ་ལུའི་ ཆོག་ནི་ འིན་། མ་ཤི་ཀ་ ཡི་ཤུའི་ན་ ཏེཏ་པ་ རྒྱུད་ཏེ་, ཐ་མེད་པེ་ མི་ཙེ་ སལ་ཅེ་ ཁོང་ངེ་ ཞལ་ཆེཏ་པེ་ ཧོར་ལ་ ཤེད་ཅེ་ལ་, ང་ ཀ་ལེ་ ཛེད་ཏེ་ འིན་།2 འི་ ཡི་རྒེ་རྦོ་ ངེ་ ཤེ་སྤ་ པུ་ཙ་ ཙོག་སེ་ ཏི་མོ་ཐི་ལ་ འབྲི་འིན་། ཀོན་འཇོག་ ཡབ་ ཏང་ ཨ་ཧོ་རྒུ་ནི་ ཙོབོ་ མ་ཤི་ཀ་ ཡི་ཤུའི་, ཁྱེ་རང་ལ་ ཐུག་ཞེ་, ཉིང་ཞེ་ རྡང་ ཞིའི་རྡེ་ སལ་ཤིག་།
པ་འུ་ལུའི་ ཏི་མོ་ཐི་ལ་ ཧུལ་མ་།
3 ཏི་མོ་ཐི་, ཁྱེ་རང་ངེ་ཕི་ ཀོན་འཇོག་ལ་ ཐུག་ཞེ་ཆེ་ ཞུ་འིན་, ཁོང་ལ་ ངེ་ སེམ་ ལག་མོ་ ཉམ་པོ་ ཞབ་རྟོག་ ཞུ་འིན་, ཀ་ཟུག་ ངེ་ ཕ་མེ་པོ་རྒུ་ནི་ ཞུའི་རྡེ་ འིན་འབེན་, ཚེན་ཉིན་ མེད་རྡེ་ ངེ་ མོ་ལམ་མེ་ན་ ཁྱེ་རང་ འི་ཏུ་ ཅོའེན་། 4 ཨ་ཧོ་རྒུན་ ཕྃ་རྡེ་ ཆ་ཟ་ནི་, ཁྱེ་རང་ངེ་ མིག་ཆུ་ འི་ཏུ་ ཡོྃ་རྡེ་, ང་ ཁྱེ་རང་ ཉམ་པོ་ ཐུག་ཅེ་ འདོད་པ་ མང་པོ་ རག་། ཨ་ཧོ་རྒུན་ ཡང་ ཉམ་པོ་ ཛོམ་མེ་རྡང་, ང་ རྐྱིད་པེ་ ཀང་ཅེ་ རག་།
5 ང་ ཁྱེ་རང་ངེ་ རྡེན་འབེ་ ཏེཏ་པ་རྦོ་ འི་ཏུ་ ཡོྃ་, ཀའོ་ ངུལ་ལ་ ཁྱེ་རང་ངེ་ ཨ་རྦི་ ལུ་ཨི་ས་ རྡང་ ཁྱེ་རང་ངེ་ ཨ་མ་ ཨིའུ་ནི་ཀེ་རྒུ་ནི་ ཅོ་ཡོད་པེན་། ཏེ་རྒ་ ཏེཏ་པ་འབོ་ ཁྱེ་རང་ངེ་ན་ ཏག་ས་ལ་ ཡོད་ཅེ་རྦེ་ ང་ ལོ་ཁྱེལ་ རག་། 6 ཏེ་རྒ་ རྒྱུ་ཚན་རྦེ་ཕི་ ངེ་ ཁྱེ་རང་ངེ་ཀ་ ལག་པ་ པོར་ཟ་ནི་, ཀོན་འཇོག་རྒེ་ སལ་ལེ་ ཛེད་ཀ་ནེ་ ཁྱུད་པོ་ རྟེམ་པོ་ རྡང་ རྒྱའི་ཅུག་ཅེ་ལ་ འི་ཏུ་ ཧུལ་ལེན་། 7 ཀོན་འཇོག་རྒེ་ ཨ་ཧོ་རྒུན་ལ་ འཇིག་ཤེ་ རྡང་ སེམ་ཤུག་ མེ་ཀ་ནེ་ སེམ་ཞིག་ སལ་ལེ་ མ་ཛེད་རྡེ་, ཤུག་ ཡང་ ཤེ་སྤ་ རྡང་ རང་སེམ་ ཆུན་ཉེན་ཀ་ནེ་ སེམ་ཞིག་ སལ་ལེ་ ཛེད་ཏེ་ ནོག་།
8 ཏོ་རྦེ་ཕི་ ཨ་ཧོའེ་ ཙོབོ་ མ་ཤི་ཀེ་ ཧོར་ལ་ ཞེན་མ་རྒུན་ལ་ ཤེད་ཅེ་ ཡང་ ཁོང་ངེ་ ཏོན་ལ་ ང་ ཙོན་ནེ་ན་ ཡོ་ཀན་འབོ་ལ་, ཁྱེ་རང་ ཁྲེལ་ མ་ཁྲེལ་། ཀོན་འཇོག་རྒེ་ ཁྱེ་རང་ལ་ སལ་ཧ་ནེ་ ཤུག་ ཉམ་པོ་ ནེ་ཚུལ་ ཟང་པོ་ ཤེད་ཅེ་ན་, ང་ ཉམ་པོ་ ནག་པར་རྡོ་ ཁུར་ཤེ་ཕི་ ཀྲལ་འགྲིག་ ཅོའེ་། 9 ཀོན་འཇོག་རྒེ་ ཨ་ཧོ་རྒུན་ རྐྱོབ་རྦེ་ ཛེད་ཏེ་ མི་ཙེ་ ཏམ་པ་ཞིག་ པུད་ཅེ་ལ་ འབོ་ ཛེད་ཏེ་ ནོག་། འི་རྦོ་ ཨ་ཧོ་རང་ངེ་ ལེ་ཧ་ ཅོ་ཀན་འབེ་ ཅོའེ་རྡེ་ མག་པེ་, ཁོང་ངེ་ ཐབ་ ཏང་ ཐུག་ཞེ་ ཅོའེ་རྡེ་ ནོག་། ཏུའི་ འགོ་ཟུག་རྒེ་སང་ ངུལ་ལ་, འི་ ཐུག་ཞེ་འབོ་ མ་ཤི་ཀ་ ཡི་ཤུ་ རྒྱུད་ཏེ་ ཁོང་ངེ་ ཨ་ཧོ་རྒུན་ལ་ སལ་ལེ་ ཛེད་ཅེའོ་ འིན་འབེན་། 10 ཏ་ མ་ཤི་ཀ་ ཡི་ཤུ་ ཨ་ཧོའེ་ རྐྱབ་འགོན་ ཕེབ་ཅེ་རྦེ་, ཀོན་འཇོག་རྒེ་ ཏོ་རྒུན་ སལ་སྤོ་ ཅོའེ་རྡེ་ ངོན་ཅུག་རྒེ་ ཛེད་ཏེ་ ནོག་། མ་ཤི་ཀ་ ཡི་ཤུའི་ ཤི་ཅེ་ ཝང་འབོ་ མེ་ཀན་ ཅོའོ་ ཛེད་ཏེ་, ནེ་ཚུལ་ ཟང་པོ་ རྒྱུད་ཏེ་ རྡེན་འབེ་ མི་ཙེ་ རྡང་ ཏུའི་རྒྱུན་ སོན་པོ་ ལུའི་ཤེ་ ལམ་འབོ་ ལྟན་ནེ་ ཛེད་ཏེ་ ནོག་། 11 འི་ ནེ་ཚུལ་ ཟང་པེ་ ཏོན་ལ་ ཀོན་འཇོག་རྒེ་ ང་ ཆོའེ་ཤེད་ཀན་, ཧུ་ཚབ་ ཏང་ རྒྱར་རྒེན་ ཞིག་ འདམ་མེ་ ཛེད་།
12 ཏོ་རྦེ་ཕི་ ང་ འི་རུ་ ཙོན་ཁང་ངེ་ན་ རྡུ་ངལ་ ཐོང་ངེན་ ཡོད་། འིན་ན་ ང་ ཏོ་རྦེ་ཕི་ ཁྲེལ་རྦ་ མེ་རག་, ཅེ་ཟེར་ནི་ ང་ རྒྱུའི་ཡོད་ སུའི་ཀ་ ངེ་ ཏེཏ་པ་ ཅོའེན་, ཡང་ ང་ ནེན་ཏེན་ ལོ་ཁྱེལ་ རག་, ཁོང་ ལོག་ཏེ་ རྐྱོད་ཅེ་ ཞག་ཚུག་པ་ ཁོང་ངེ་ ཆག་ལ་ ངེ་ ལྟད་ཀན་ ཚང་མ་ རྐྱོབ་ཏེ་ པོ་རེ་ ཛེ་རྡེན་།
13 ཁྱེ་རང་ངེ་ ངེ་ཀ་ནི་ ཚོར་ཧན་ ཚང་མ་, ལབ་ཞ་ ཟང་པེ་ སྤེ་ཞིག་རྒེ་ ཚུལ་ལ་ ཀོལ་རྒོ་ཤེ་ ནོག་། ཁྱེ་རང་ལ་ མ་ཤི་ཀ་ ཡི་ཤུའི་ན་ ཡོ་ཀ་ནེ་ ཏེཏ་པ་ རྡང་ ཤེ་སྤ་ ཉམ་པོ་ ཏོ་རྒུན་ ཅོའེ་། 14 ཡང་ ཨ་ཧོའེ་ན་ ཡོ་ཀ་ནེ་ ཏམ་པེ་ ཐུག་ཡིད་རྡེ་ ཡ་ཏོ་ རྒྱུད་ཏེ་, ཀོན་འཇོག་རྒེ་ ཁྱེ་རང་ངེ་ ལག་ལ་ ལྟད་རྡེ་ ཛེད་ཀ་ནེ་ རིན་ཅེན་ རྡེན་འབའ་རྒུན་ལ་ རྒྱ་ལེ་ ཅོའེ་རྡེ་ སྲུང་རྐྱོབ་ ཅོ་རྒོའེ་།
15 ཨ་སི་ཨཱ་ནི་ འིན་ཀ་ནེ་ མ་ཤི་ཀེ་ ཞབ་རྟོག་པ་ ངེ་ ཁྲོ་པ་ ཚང་མེ་ ང་ ཕྃ་རྡེ་ འིན་ཀན་འབོ་ ཁྱེ་རང་ལ་ རྒྱུའི་ནོག་, པི་འགེ་ལུ་ རྡང་ ཧེར་མོ་འགེ་ནེ་རྒུ་ནི་ལ་ ང་ ཕྃ་རྡེ་ སོང་།
16 ཨོ་ནེ་སི་ཕོ་རུའི་ ནང་ཚང་རྒུ་ནི་ཀ་ ཙོབོ་རྡེ་ ཐུག་ཞེ་ ཟིག་ཤིག་, ཅེ་ཟེར་ནི་ ང་ ཙོན་པ་ འིན་ འིན་ན་ ཁོ་ མ་ནི་ མ་ཁྲེལ་རྦེ་, ལེན་ མང་པོ་ ང་ ཐུག་རྒེ་ལ་ ཡོང་ ཡང་ སེམ་སོ་ ཏྃ་། 17 རོམ་མེ་ན་ ལེབ་ཏེ་ ཁོའེ་ ང་ ཐོབ་ཐོབ་ཚུག་པ་ ཀང་ལུང་ས་ ཚང་མ་ལ་ ཙལ་རྡོག་། 18 མ་ཤི་ཀ་ ལོག་ཏེ་ ཕེབ་པེ་ ཏུའི་ལ་, ཙོབོ་རྡེ་ ཁོ་ ཉིང་ཞེ་ ཛེད་ཤིག་། ཨེ་ཕེ་སུའི་ན་ ཁོའེ་ ང་ ཙམ་ཤིག་རྒེ་ ཞབ་རྟོག་ རྒྱ་ལེ་ ཅོའེ་རྡེ་ ཞུའི་ཧན་འབོ་ ཏི་མོ་ཐི་ ཁྱེ་རང་ལ་ རྒྱ་ལེ་ ཅོའེ་རྡེ་ རྒྱུའི་ནོག་།