ཙོབོ་ ཡི་ཤུ་ ལོག་ཏེ་ ཕེབ་ཅེ་ ཧོར་།
2
སྤུན་རྒུན་ ཏ་ ཁྱི་ཞ་ ཨ་ཧོའེ་ ཙོབོ་ ཡི་ཤུ་ མ་ཤི་ཀ་ ལོག་ཏེ་ ཕེབ་ཅེ་ ཏུའི་ རྡང་ ཁོང་ངེ་ ཧུ་འདུན་ལ་ ཨ་ཧོ་ ཚང་མ་ ཛོམ་ཅེ་ ཧོར་ལ་ འི་ ཞུ་ཝ་རྦོ་ ཞུའིན་། 2 ང་ཞི་ ཆོག་ནི་ ལུང་རྟན་ ཡ་ ཁྲིན་ ཡ་ ཡི་རྒེ་ འདུག་ ཟེར་རྡེ་, ཀལ་ཏེ་ སུ་ཞིག་རྒེ་ ཙོབོ་ ཡི་ཤུ་ ལོག་ཏེ་ ཕེབ་ཅེ་ ཏུའི་རྦོ་ ལེཔ་ ཚར་རྡེ་ ནོག་ ཟེར་ནི་, ཁྱི་ཞི་ ཏེཏ་པ་ ཡང་ ཐར་པེ་ཀ་ ཐེ་ཚོམ་ མ་ཅོ་ཧེ་། 3 འཇུ་འཇུ་ སུ་ཞིག་ལ་ ཁྱི་ཞ་རྒུན་ལ་ འགོམ་ཧོར་ ཏང་མ་ཅུག་ཧེ་ ཅེ་ཟེར་ནི་ ཏེ་ ཞག་པོ་ ཏེ་ཏེ་ཚུག་པ་ མི་ལེབ་, ནམ་ཚུག་པ་ ཀོན་འཇོག་ལ་ ངོ་ལོག་ ཅོ་ཅེ་ ཏུའི་རྦོ་ མི་ལེབ་ ཡང་ ཀཱ་ཁྲིམ་ མེ་ཀ་ནེ་ མིའུ་ ངོན་ མི་ངོན་། ཏེ་ མིའུ་ ལྟོང་ས་ ཆོག་ལ་ ཆེན་ ནོག་། 4 མི་རྒུ་ནི་ ཀོན་འཇོག་ སི་ཀན་ ཡང་ ཅོལ་ཧན་ ཚང་མ་ལ་ འི་ མི་རྦེ་ རྒྱཔ་འགལ་ ཅོའེ་རྡེ་ ཁོ་རང་ལ་ ཏོ་རྒུ་ནི་སང་ སི་ཝ་ མང་ངེ་ ཏང་ངེ་ནོག་། ཁོ་ ཀོན་འཇོག་རྒེ་ ཁང་པེ་ན་ ཁྲིའི་ཀ་ འདེད་ཏེ་ ཁོ་རང་ ཀོན་འཇོག་ འིན་ ཟེ་རེ་ནོག་།5 ང་ ཁྱི་ཞ་ ཉམ་པོ་ ཡོད་ཟ་ནི་, ཏོ་རྒུ་ནི་ ཧོར་ལ་ ཁྱི་ཞ་རྒུན་ལ་ ཟེར་ཧན་རྒུན་ འི་ཏུ་ མེ་རག་རྒེ་? 6 ཀཱ་ཁྲིམ་ མེ་ཀ་ནེ་ མི་, ཏུའི་རྦེ་སང་ ངུལ་ལ་ ངོན་མ་ཅུག་ལ་ རྒག་ཏེ་ པོ་རེ་ ཛེད་ཀན་འབོ་ ཁྱི་ཞ་ རྒྱུའི་ནོག་། 7 རྡུད་རྡེ་ ཝང་ངེ་ སང་སྤེ་རེ་ ཚུལ་ལ་ ལེ་ཧ་ ཅོ་ཅེ་ འགོ་ཟུག་ ཚར་རྡེ་ ནོག་། འིན་ན་ རྒག་ཏེ་ པོ་རེ་ ཛེད་ཀན་འབེ་, ཁོ་ ཏེ་ཏེ་ཚུག་པ་ རྒག་ཏེ་ པོ་རེན་ ནམ་ཚུག་པ་ ཀོན་འཇོག་རྒེ་ ཁོང་ ཏེ་ ལམ་མེ་ཀ་ནི་ ཐེན་ནེ་ མི་ཛེད་། 8 ཏེ་ནི་ ཏེ་ ཁྲིམ་ མེ་ཀན་འབོ་ ཡོང་ངེན་, འིན་ན་ ཙོབོ་ ཡི་ཤུའི་ འུག་ ཅིག་ ཉམ་པོ་ ཀཱ་ སལ་རྡེ་, ཁོ་ ཕམ་ཀ་ལེ་ ཛད་རྡེན་།a ཡང་ ཁོང་ ཟི་ཞིད་རྡེ་ན་ རྐྱོད་ཅེ་རྦེ་, ཁོ་ མེ་ཀན་ ཛེད་རྡེན་།
9 ཏེ་ ཁྲིམ་ མེ་ཀན་འབོ་ རྡུད་རྡེ་ ཤུག་ ཉམ་པོ་ ཡོང་ངེན་, ཡང་ ཟུའི་མེ་ ཝང་ རྡང་ ལྟའ་ རྡང་ ཧ་ལེ་ཤེ་ ཚང་མ་ ལྟན་ནེན་། 10 ཁོའེ་ ཏེ་ ལྟོང་ཤེ་ཅན་ནེ་ ལམ་མེ་ཀ་ འགྲུལ་ཧན་ ཚང་མ་ལ་ ངན་པེ་ འགོམ་ཧོར་ ན་ཚོག་རྒེ་ན་ ཁྱོང་ངེན་, ཅེ་ཟེར་ནི་ ཁོང་རྒུ་ནི་ རྐྱོབ་ཉེན་ཀ་ནེ་ ཁྲིན་ ཀྲང་པོ་ལ་ ཤེ་སྤ་ ཅོའོ་ མི་འདུག་། 11 ཏེ་རྒ་རྦེ་ཕི་ལ་ ཀོན་འཇོག་རྒེ་ འགོམ་ཧོར་ ཆོན་མོ་ཞིག་ ཆ་ཅུག་རྒེ་ ཛེ་རྡེན་, ཀ་རྦེ་ ཏེ་རྒུན་ལ་ རྡུད་རྡེ་ ཟུའི་མ་ ལེ་ཧ་རྒུན་ལ་ རྡེན་ཆེ་ཤེ་ ཅོ་ཅུག་རྒེན་། 12 ཁོང་རྒུ་ནི་ ཁྲིན་ ཀྲང་པོ་འབེ་ཀ་ ཏེཏ་པ་ མ་ཅོ་ལ་, ངན་པ་འབོ་ལ་ ཐེད་པོ་ ཅོ་ཅེ་རྦེ་ ཅོའེ་རྡེ་, ཁོང་རྒུ་ནི་ཀ་ ཤི་ཅེ་ ཐག་ཅེད་ ས་ལེན་།
ཏེཏ་པེ་ན་ རྟེམ་པོ་ འདེད་ཅེ་ ཧོར་།
13 ཙོབོ་རྡེ་ ཤེ་སྤ་ ཛེད་ཀ་ནེ་ སྤུན་རྒུན་, ང་ཞི་ ཁྱི་ཞ་རྒུ་ནི་ཕི་ ཀོན་འཇོག་ལ་ ཏུའི་རྒྱུན་ ཐུག་ཞེ་ཆེ་ ཞུ་ཅེའོ་ འོའེ་སྤ་ ཚོར་རེ་རག་། ཅེ་ཟེར་ནི་ ཀོན་འཇོག་རྒེ་ ཁྱི་ཞ་རྒུན་ ཐར་པེ་ཕི་ འཇིག་རྟེན་ ཙུག་རྒེ་སང་ ངུལ་ལ་, ཏམ་པེ་ ཐུག་ཡིད་རྡེ་ སང་མ་ ཛེད་ཅེ་ རྡང་ ཙོབོ་ ཡི་ཤུའི་ ཧོར་ལ་ ཀྲང་པེ་ ཁྲིན་འབེ་ཀ་ ཏེཏ་པ་ ཅོ་ཀན་རྒུན་ རྒྱུད་ཏེ་, འདམ་མེ་ ཛེད་ཏེ་ ནོག་། 14 ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ སྤལ་ལེ་ན་ འདྲེའེ་ ཉེན་ཅེ་ཕི་ ཀོན་འཇོག་རྒེ་, ཁྱི་ཞ་རྒུན་ ང་ཞི་ ནེ་ཚུལ་ ཟང་པོ་ ཤེད་ཀན་རྒུན་ རྒྱུད་ཏེ་, ཐར་པ་ ཐོབ་ཅེ་ལ་ འབོ་ ཛེད་རྡེ་ནོག་།
15 ཏོ་རྦེ་ཕི་ སྤུན་རྒུན་, ང་ཞི་ ཁ་ནི་ ཚོར་ཧན་ ཡང་ ཡི་རྒེ་ན་ འབྲི་ཀ་ནེ་ ལབ་ཞ་རྒུ་ནི་ཀ་ ཐེ་ཚོམ་ མ་ཆ་ རྟེམ་པོ་ འདོད་ཧེ་།