མོ་ལམ་མེ་ཕི་ ཞུ་ཝ་།
3
ལྟིང་འཇུག་ལ་, ཤེ་སྤ་ སྤུན་རྒུན་ ཙོབོ་ ཡི་ཤུའི་ ཀའ་, འགྱོ་སྤ་ ཕེལ་ཤེ་ རྡང་ ཁྱི་ཞ་རྒུ་ནི་ སི་ཝ་ ཅོའོ་ ཙོག་སེ་, ཞེན་མ་རྒུ་ནི་ ཀའ་འབོ་ལ་ སི་ཝ་ ཐོབ་ཅེ་ལ་ ང་ཞི་ཕི་ མོ་ལམ་ ཏོབ་ཧེ་། 2 ཡང་ ང་ཞ་ མི་ སོག་པོ་ རྡང་ ངན་སེམ་ཅེན་རྒུ་ནི་ཀ་ནི་ ཐར་ཤེ་ལ་ མོ་ལམ་ ཞུའི་ཧེ་, ཅེ་ཟེར་ནི་ མི་ མང་པེ་ ནེ་ཚུལ་ ཟང་པེ་ཀ་ ཏེཏ་པ་ ཅོའོ་ མག་། 3 འིན་ན་ ཙོབོ་ ལོ་ཁྱེལ་ཅེན་ཞིག་ ནོག་, ཁོང་ངེ་ ཁྱི་ཞ་རྒུན་ རྟེམ་པོ་ ཛེད་ཏེ་ རྡུད་རྡེ་ ལེ་ཧ་ ངན་པ་ནི་ རྐྱོབ་ཏེ་ པོ་རེ་ ཛེ་རྡེན་། 4 ཙོབོ་རྡེ་ན་ ཁྱི་ཞ་རྒུན་ལ་ ང་ཞི་ ལེ་ཧ་ ཅོ་ཅེ་ལ་ ཀཱ་ ཏང་ཀན་རྒུན་ ལག་ལེན་ ཅོའེ་རྡེ་ ནོག་, ཡང་ ཡོང་ཅེ་ཅེན་ནེ་ ཏུའི་ན་ ཅོའེན་ འདེད་ཅེ་, ང་ཞ་རྒུན་ལ་ ལོ་ཁྱེལ་ ཡོད་། 5 ཙོབོ་ ཡི་ཤུའི་ ཁྱི་ཞི་ ཉིང་རྒུན་, ཀོན་འཇོག་རྒེ་ ཙམ་ཤིག་རྒེ་ ཤེ་སྤ་ ཛེད་ཅེ་ རྡང་, མ་ཤི་ཀ་ མ་ ཟོད་སྲེན་ ཞུ་ཧན་ ཙོག་སེ་ ཟོད་སེམ་རྒུན་ མང་ངེ་ ཧ་ཀོ་ཅེ་ན་ ཁྲིད་རྡེ་ ཛེད་ཤིག་།ལེ་མི་ལམ་ མ་འགྱུར་ཧེ་།
6 ཤེ་སྤ་ སྤུན་རྒུན་, ང་ཞི་ ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཝང་ངེ་aན་ ཁྱི་ཞ་རྒུན་ལ་ འི་ ཀཱ་འབོ་ ཏང་ངེ་ཡོད་། ཁྱི་ཞ་རྒུན་ ཏེཏ་པ་ཅེན་ནེ་ ལེ་མི་ལམ་ ཡང་ ང་ཞི་ ཏང་ཀ་ནེ་ ལབ་ཞ་རྒུན་ ནང་ཞིན་ མ་འགྲུལ་ཀན་རྒུ་ནི་ ཐག་རིང་ལ་ འདོད་ཧེ་། 7 ང་ཞ་ ཁྱི་ཞ་ ཉམ་པོ་ ཡོད་ཟ་ནི་, ང་ཞ་ ལེ་མི་ལམ་ མེ་ཀན་འབོ་ ཁྱི་ཞ་རྒུན་ལ་ རྒྱུའི་ནོག་, ང་ཞི་ མི་ཙེ་ པུད་ཚུལ་རྦོ་ སྤེ་ ནེན་རྒོའེ་། 8 རིན་ མ་ཤལ་ལེ་ ང་ཞི་ སུ་ཞིག་རྒེ་ཀ་ནི་ ཁར་ཞི་ མ་ཟོའེ་རྦེན་, འིན་ན་ ཁྱི་ཞ་ སུ་ལ་ པར་འདོ་ མི་ལྟན་ཅེ་ཕི་ ཚེན་ཉིན་ མེད་རྡེ་, ཙོན་འགྲུའི་ ཧོཔ་ ཉམ་པོ་ ལེ་ཧ་ ཅོའེ་རྦེན་། 9 ང་ཞ་རྒུན་ལ་ ང་ཞི་ རྒོའེ་ཤེ་ཅན་རྒུན་ ཏོང་ ཟེར་ཤེ་ ཝང་ ཡོད་ཏེ་ལ་, ཁྱི་ཞ་རྒུན་ ང་ཞི་ སྤེ་ཀ་ འགྲུལ་ཅེ་ཕི་ ང་ཞི་ མི་ཙེ་ ཏེ་ ཚུལ་ལ་ པུད་པེན་། 10 ཡང་ ང་ཞ་ ཁྱི་ཞ་ ཉམ་པོ་ ཡོད་ ཟ་ནི་ལ་, ང་ཞི་ འེ་རྒ་ ཀཱ་འབོ་ ཏྃ་རྦེན་, “ཀལ་ཏེ་ མི་ཞིག་ལ་ ལེ་ཧ་ ཅོ་ཅེ་ འདོད་པ་ མེད་ནི་, ཁོ་ ཟ་ཅེ་ལ་ ཁར་ཞི་ མ་ཏང་ཧེ་།”
11 ཁྱི་ཞི་ ཕྲོ་ནི་ ཁ་ཅིག་ ལེ་ཧ་ ཅང་ མ་ཅོ་ལ་ ལེ་མི་ལམ་ འགྱུར་རྡེ་ ཡོ་ཀན་ ཡང་ ཞེན་མ་རྒུ་ནི་ ལེ་ཧེ་ན་ ཐེ་རྟོག་ ཏང་ངེན་ འདེད་ཅེའོ་ ང་ཞི་ ཚོར་། 12 ཏེ་ཙོག་སེ་ མི་རྒུན་ལ་, ཅེཔ་ཁ་རོག་ཏེ་ རང་ངེ་ ཁར་ཞི་ཕི་ ཙོན་འགྲུའི་ ཅོའེ་རྡེ་ ལེ་ཧ་ ཅོ་རྒོའེ་ཤེ་ལ་ ང་ཞི་ ཙོབོ་ ཡི་ཤུ་ མ་ཤི་ཀེ་ ཝང་ངེ་ན་ སེམ་རུའི་ རྡང་ ཀཱ་ ཏང་ངེ་ཡོད་། 13 ཏ་ ཁྱི་ཞ་ ལུའི་ཧ་ནེ་ སྤུན་རྒུ་ནི་ ལེ་ཧ་ ཟང་པོ་ ཅོའེན་ འདེད་ཅེ་ལ་ ནྃ་ མ་ཚེར་ཧེ་།
14 ཀལ་ཏེ་ སུ་ཞིག་རྒེ་ འི་ ཡི་རྒེ་ན་ འབྲི་ཀ་ནེ་ ལབ་ཞ་རྒུན་ལ་ མ་ཉེན་ནི་, ཏེ་ མི་རྦེ་ཀ་ ནྃ་རྟག་ པོར་། ཁོ་ ཁྲེལ་རྦ་ ཆ་ཅེ་ཕི་ ཁོ་ ཉམ་པོ་ འབྲེལ་ མ་པོར་ཧེ་། 15 འིན་ན་ ཁོ་ འགྲ་ཝོ་ མ་སམ་མེ་ལ་, རང་ངེ་ སྤུན་ཞིག་ ཙོག་སེ་ སྤང་པུད་ཏེ་ ཁ་རྡ་ ཏོང་།
ལྟིང་འཇུག་འགེ་ མོ་ལམ་ འདང་ ཞུ་ཝ་།
16 ཏ་ ཞིའི་རྡེ་ སལ་ལེ་ ཛེད་ཀ་ནེ་ ཙོབོ་ ཡི་ཤུའི་, ཁོ་རང་ངེ་ ཞིའི་རྡེ་ ཁྱི་ཞ་རྒུན་ལ་ ཏུའི་རྒྱུན་ནེ་ ནེ་ལུག་ ཚང་མེ་ན་ སལ་ལེ་ ཛེད་ཤིག་, ཡང་ ཙོབོ་ ཁྱི་ཞ་ ཚང་མ་ ཉམ་པོ་ ཞུ་ཤིག་།
17 ཏ་ ངེ་ ཡི་རྒེ་ འབྲི་ཀན་འབེ་ཀ་ནི་ ཉི་འགུ་ ཁྱོྃ་རྡེ་, ང་ པ་འུ་ལུའི་ རང་ངེ་ ལག་འབྲི་ན་ འི་ འཇུ་ འབྲི་འིན་, ཀའོ་ ཡི་རྒེ་ ཚང་མེ་ན་ ངེ་ ངོ་ལྟའ་འབོ་ འིན་།
18 ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཐུག་ཞེ་ ཁྱི་ཞ་ ཚང་མ་ལ་ ཐོབ་ཤིག་༎