ཐེ་ས་ལོ་ནི་ཀེ་ ཆོའེ་ཚོག་ལ་ པ་འུ་ལུའི་ ཆག་འབྲི་ ཉི་སྤ་།
པ་འུ་ལུའི་ ཆོག་ནི་ འཇུ་།
1
ང་, པ་འུ་ལུ་ ཡང་ ངེ་ ཁྲོ་པ་ སེ་ལེ་a རྡང་ ཏི་མོ་ཐི་རྒུ་ནི་ ཆོག་ནི་ འི་ ཡི་རྒེ་རྦོ་ ཀོན་འཇོག་ ཨ་ཧོའེ་ ཡབ་ ཏང་ ཙོབོ་ ཡི་ཤུ་ མ་ཤི་ཀེ་ འིན་ཀ་ནེ་ ཐེ་ས་ལོ་ནི་ཀེ་ ཆོའེ་ཚོག་ལ་ འབྲི་འིན་།2 ཨ་ཧོ་རྒུ་ནི་ ཡབ་ ཀོན་འཇོག་ ཏང་ ཙོབོ་ ཡི་ཤུ་ མ་ཤི་ཀེ་ ཐུག་ཞེ་ རྡང་ ཞིའི་རྡེ་ ཁྱི་ཞ་ ཚང་མ་ལ་ ཐོབ་ཤིག་།
ནག་རྒེ་ ཏུའི་ལ་ སེམ་རུའི་ ཛེད་།
3 ཤེ་སྤ་ སྤུན་རྒུན་, ཁྱི་ཞི་ཕི་ ང་ཞ་རྒུ་ནི་ ཀོན་འཇོག་ལ་ ཐུག་ཞེ་ཆེ་ ཞུ་ཅེའོ་ འོའེ་སྤ་ཞིག་ ནོག་, ཅེ་ཟེར་ནི་ ཞག་པེ་ཞག་ ཁྱི་ཞ་རྒུན་ ཏེཏ་པེ་ན་ ལྡ་ནེན་ སོང་འདེ་ ཅིག་ ཏང་ ཅིག་ལ་ ཤེ་སྤ་ ཅོ་ཅེའོ་ ཕེ་ལེན་ ཆ་རུག་། 4 ཏོ་རྦེ་ཕི་ ང་ཞི་, ཁྱི་ཞ་རྒུན་ལ་ རྡུ་ངལ་ རྡང་ པར་རྡོ་ ཐོང་ནྃ་, ཁྱི་ཞ་རྒུ་ནི་ ཉིང་རུའི་ རྡང་ ཏེཏ་པེ་ན་ རྟེམ་པོ་ ཡོ་ཀན་འབོ་ ཀོན་འཇོག་རྒེ་ ཞེན་ ཆོའེ་ཚོག་རྒུ་ནི་ན་ མ་ སྤལ་ངམ་ ཉམ་པོ་ ཤེད་རྡེ་ཡོད་། 5 འི་ ནེ་ལུག་པེ་ ཀོན་འཇོག་རྒེ་ རྡིག་པེ་ཀ་ ཁྲིམ་ཅེད་ ཅོའོ་ ཛེད་ཅེའོ་, འོའེ་སྤ་ འིན་ཀན་ ལྟན་འདུག་, མ་ཚེད་ ཁྱི་ཞ་རྒུན་ ཁོང་ངེ་ རྒྱལ་སྲིད་རྡེ་ཕི་ འོའེ་སྤ་ཅེན་ རིག་ འགྱུར་ཤུག་རྒེ་ ནོག་, ཀ་རྦེ་ཕི་ ཁྱི་ཞ་རྒུན་ལ་ རྡུ་ངལ་ ཐོང་ངེན་ ནོག་། 6 ཀོན་འཇོག་ནི་ འོའེ་སྤ་ ཛེད་ཀན་ ཞུ་རྡེ་ འིན་། ཁོང་ངེ་ ཁྱི་ཞ་ ནག་ ལྟན་ཀན་རྒུན་ལ་ ནག་ ལྟན་ནེ་ ཛེ་རྡེན་།
7 ཙོབོ་ ཡི་ཤུ་ རྡེ་བ་ཅན་ནི་ རང་ངེ་ རྟོབ་ཤུག་ཤེན་ནེ་ ཕོ་ཉ་རྒུན་ འདང་ མེ་ ཆོན་མོ་ ཉམ་པོ་ ངོན་ཟ་ནི་, ཁོང་ངེ་ ཁྱི་ཞ་ ནག་ ཁུར་ཧན་རྒུན་ འདང་ ང་ཞ་རྒུན་ ཐར་ཤུག་རྒེ་ ཛེ་རྡེན་། 8 ཡང་ ཀོན་འཇོག་ མི་ཤེ་ཀན་ འདང་ ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ནེ་ཚུལ་ ཟང་པོ་ལ་ ཁ་ མ་ཉེན་ཀན་རྒུན་ལ་ མེ་ ཆེད་པ་ ཕོག་རྒེན་། 9 ཏོ་རྒུན་ལ་ ཐ་མེད་པེ་ རྡུག་ངལ་ལེ་ ཆེད་པ་ ཕོག་རྒེན་, ཡང་ ཁོང་རྒུན་ ཙོབོ་ རྡང་ ཁོང་ངེ་ ཟི་ཞིད་ཅེན་ནེ་ ཝང་རྒུ་ནི་ སོ་སོ་ པེ་རྡེ་ པོ་རེན་། 10 ཁོང་ ཏེ་ ཞག་ལ་ ཕེབ་ཤིག་, ཁོང་ལ་ ཁོང་ངེ་ ཏམ་པེ་ མི་རྒུ་ནི་ ཆོག་ནི་ སྤལ་ ཐོབ་རྦེན་, ཡང་ ཁོང་ངེ་ཀ་ ཏེཏ་པ་ ཅོ་ཀན་ ཚང་མེ་ ཁོང་ལ་ རྟོད་པ་ པུ་ལེན་། ཁྱི་ཞ་རྒུན་ལ་ ཏོ་རྒུ་ནི་ ཕྲོ་ ནོག་, ཅེ་ཟེར་ནི་ ཁྱི་ཞ་རྒུ་ནི་ ང་ཞི་ སྤང་པོ་ ཏང་ཀན་རྒུ་ནི་ཀ་ ཏེཏ་པ་ ཅོའེ་རྡེ་ ནོག་།
11 ཏེ་རྒ་རྦེ་ཕི་ལ་ ང་ཞ་རྒུ་ནི་ ཏུའི་རྒྱུན་ འི་ མོ་ལམ་རྒུན་ ཞུ་འིན་, ཁྱི་ཞ་རྒུན་ལ་ ཀོན་འཇོག་རྒེ་ འབོ་ ཛེད་ཀ་ནེ་ འོའེ་སྤེ་ མི་ཙེ་ རིག་ པུད་ཅུག་རྒེ་ ཛེད་ཤིག་། ཡང་ ཁོང་ངེ་ ཤེད་ རྒྱུད་ཏེ་ ཁྱི་ཞ་རྒུ་ནི་ ཏེཏ་པེ་ ལེ་ཧ་ ཟང་པོ་ ཅོ་ཅེ་ འདོད་པ་ ཡོ་ཀན་རྒུན་ ཀྲུཔ་ཅུག་རྒེ་ ཛེད་ཤིག་། 12 ཏེ་ནི་ ཁྱི་ཞི་ ཏོ་ཙོག་སེ་ མི་ཙེ་ པུད་ཅེ་ ཅོའེ་རྡེ་, ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཚན་ལ་ སྤལ་ ཐོབ་ཏེ་, ཁྱི་ཞ་རྒུན་ལ་ ཁོང་ ཉམ་པོ་ སྤལ་ ཐོབ་རྦེན་། ཡུ་ ཚང་མ་ ཨ་ཧོ་རྒུ་ནི་ ཀོན་འཇོག་ ཏང་ ཙོབོ་ ཡི་ཤུ་ མ་ཤི་ཀེ་ ཐུག་ཞེ་ རྒྱུད་ཏེ་ ཀྲུཔ་ ཉེན་ནེན་།