ཕྲུ་རྒུ་ རྡང་ ཕ་མ་།
6
ཕྲུ་རྒུ་རྒུན་, ཁྱི་ཞ་ ཙོབོ་རྡེ་ འིན་ཅེ་ཀ་ནི་, རང་ངེ་ ཕ་མེ་ ཁ་ཉོན་ཧེ་, ཅེ་ཟེར་ནི་ ཏུ་ཟུག་ ཅོ་ཅེའོ་ ཀྲང་པོ་ ནོག་། 2-3 “ཁྱི་ཞ་རྒུ་ནི་ ཨ་རྦ་ རྡང་ ཨ་མ་ལ་ སི་ཝ་ ཅོའེ་ཧེ་།” ཏོ་འབོ་ ཀོན་འཇོག་རྒེ་ ཀཱ་རྒྱ་ ཏང་པོ་, ཀའོ་ ཉམ་པོ་ “ཁྱི་ཞ་རྒུན་ལ་ འཇིག་རྟེན་ནེ་ཀ་ མི་ཙེ་ ཁམ་ཟང་ འདང་ ཚེ་ རིང་མེ་ ཐོང་ངོམ་ ཆེན་” མོལ་ཧ་ནེ་ ཞལ་ཆེཏ་པོ་ ཛེད་།4 ཨ་རྦ་རྒུ་ནི་ རང་ངེ་ ཕྲུ་རྒུ་ལ་ མང་པོ་ སྲོ་ ཡོང་ མ་ཅུག་ཧེ་། འིན་ན་ ཁོང་རྒུན་ལ་ རྐྱོྃ་རྡེ་ ཙོབོ་རྡེ་ ལབ་ཞེ་ན་ ལམ་ ཟང་པོ་ཀ་ ཁྲིད་ཧེ་།
ཡོག་པོ་ རྡང་ སྤོན་འབོ་།
5 ཁྱི་ཞ་ ཚེ་ཡོག་རྒུ་ནི་ འི་ འཇིག་རྟེན་ནེ་ན་, ཁྱི་ཞ་རང་ངེ་ སྤོན་འབོ་ལ་ སི་ཝ་ རྡང་ འཇི་སྤ་ ཉམ་པོ་ ཉིང་ནི་ ཁ་ཉོན་ཧེ་, ཀ་ཟུག་ ཁྱི་ཞ་རྒུ་ནི་ མ་ཤི་ཀེ་ ཁ་ཉེན་ནེ་ཡོད་། 6 ཁོང་རྒུན་ ཐེད་ཅུག་ཅེ་ལ་, ཁོང་རྒུ་ནི་ ཁྱི་ཞ་ ལྟ་ཟ་ནི་, ཅིག་པོ་ ཁ་ མ་ཉེན་ནི་, མ་ཤི་ཀེ་ ཚེ་ཡོག་ ཙོག་སེ་ ཉིང་ནི་ ཀོན་འཇོག་རྒེ་ ཐུག་འདོད་ ཅོའེན་, ཞབ་རྟོག་ ཞུའི་ཧེ་། 7 མི་རྒུ་ནི་ཕི་ མན་, ཙོབོ་ མ་ཤི་ཀེ་ཕི་ འིན་ སམ་འདེ་ ཞབ་རྟོག་ ཉིང་ནི་ རྒ་མོ་ ཉམ་པོ་ ཞུ་ཧེ་། 8 འི་ཏུ་ ཅོའེ་ཧེ་, ཚེ་ཡོག་ འིན་འགྲོ་ ཡང་ ར་ཝང་ཅེན་, ལེ་ཧ་ ཟང་པོ་ ཅོ་ཀན་ ཨ་ཧོ་ རེ་རེ་ལ་ ཙོབོ་རྡེ་ སོལ་རེ་ སལ་ལེ་ ཛེ་རྡེན་།
9 ཏེ་རྒ་ ཙོག་སེ་ ཁྱི་ཞ་ སྤོན་འབོ་རྒུ་ནི་, རང་ངེ་ ཚེ་ཡོག་རྒུན་ལ་ རྒྱ་ལེ་ ཅོའེ་ཧེ་། ཁོང་རྒུན་ལ་ འཇི་ནང་ མ་ལྟན་ཧེ་, ཅེ་ཟེར་ནི་ རྡེ་བ་ཅན་ནེ་ན་ མ་ཤི་ཀ་རྦོ་, ཁྱི་ཞ་ རྡང་ ཁོང་ ཉ་ཧེ་ སྤོན་འབོ་ ཞུ་རྡེ་ འིན་ཀན་ ཡང་ ཁོང་ངེ་ སུ་ཞི་ལ་ ཡ་པེ་ མ་ཛེད་ཀན་འབོ་, ཁྱི་ཞ་ རྒྱུའི་ནོག་།
རྡུད་རྡེ་ རྒྱཔ་འགལ་ལ་ ནོལ་ཤེ་ མག་ཆ་།
10 ལྟིང་འཇུག་རྒེ་ ཁ་རྡ་, ཁྱི་ཞ་རྒུན་ ཙོབོ་ རྡང་ ཁོང་ངེ་ ཧ་ལེ་ཤེ་ ཤུག་རྒེ་ན་ ཤེད་ཅེན་ འགྱུར་ཧེ་། 11 རྡུད་རྡེ་ ཅུའི་ངན་རྒུ་ནི་ཀ་ ནོལ་ ཉེན་ཅེ་ཕི་, ཁྱི་ཞི་ ཀོན་འཇོག་རྒེ་ སལ་ལེ་ ཛེད་ཀ་ནེ་ མག་ཆ་ ཚང་མ་ ཀོན་ཧེ་། 12 ཅེ་ཟེར་ནི་ ཨ་ཧོའེ་, མི་རྒུ་ནི་ རྒྱཔ་འགལ་ལ་ མ་ནོག་, མ་ཐོང་ཀ་ནེ་ འཇིག་རྟེན་ནེ་ ངན་པ་ སེམ་ཡིད་རྡེ་ ཝང་སྲུལ་པ་རྒུ་ནི་ རྒྱཔ་འགལ་ལ་ ནོལ་ལེན་ ནོག་, ཀའོ་རྒུན་ འི་ ཏུའི་ མུན་ཀྲག་རྒེ་ ཝང་སྲུལ་པ་, ཝང་ ཡོ་ཀན་ འདང་ པར་ནང་ངེ་ ངན་པ་ ཝང་རྒུན་ ནོག་།
13 ཏེ་རྒ་རྦེ་ཕི་ལ་ ངན་པེ་ ཞག་པོ་ ལེཔ་ཟ་ནི་, ཁྱི་ཞ་རྒུ་ནི་ ནོལ་ ཉེན་ཅེ་ཕི་, ཀོན་འཇོག་རྒེ་ སལ་ཧ་ནེ་ ནོལ་ཤེ་ མག་ཆ་ ཚང་མ་ ཀོན་ཧེ་། ཏེ་ནི་ མག་རྒེ་ ལྟིང་ནི་ལ་ ཁྱི་ཞ་རྒུན་ རང་རང་ངེ་ མལ་ལེ་ཀ་ རྟེམ་པོ་ ལྃ་རྡེ་ ལུའི་རྡེན་། 14 རང་རང་ངེ་ མལ་རྦོ་ རྟེམ་པོ་ ཟུམ་འདེ་ ཀོན་འཇོག་རྒེ་ ཀའ་ རྡེན་འབེ་ རྐྱེ་ར་རྦོ་ རང་ངེ་ རྐྱེད་པེ་ཀ་ སྲིལ་ཤིག་, ཡང་ མི་ཙེ་ ཀྲང་པོ་ པུད་ཅེ་ མག་ཆའོ་ ཁྱི་ཞ་རང་ངེ་ ཀྲང་ངེ་ཀ་ ཀོན་ཧེ་། 15 ཁྱི་ཞ་རྒུ་ནི་ ཧང་པེ་ཀ་ ནེ་ཚུལ་ ཟང་པོ་ ཞིའི་རྡེ་ འཇའ་ཏོ་རྦོ་ ཀོན་འདེ་ མག་རྒེ་ཕི་ ཀྲལ་འགྲིག་ ཅོའེ་། 16 ཏོ་རྒུ་ནི་ཀ་ ནེན་མ་, རྡུད་རྡེ་ མེ་ཅེན་ནེ་ འདྃ་རྒུན་ སེད་ཉེན་ཅེ་ཕི་ལ་, ཁྱི་ཞ་རྒུ་ནི་ ལག་པེ་ན་ ཏེཏ་པེ་ ཕ་ལི་རྦོ་ ཟུམ་ཧེ་། 17 ཁྱི་ཞ་རྒུ་ནི་ འགོའེ་ཀ་ ཐར་པེ་ མག་རྒེ་ ཏི་རྦི་རྦོ་ ཀོན་ཧེ་། ཡང་ ཏམ་པེ་ ཐུག་ཡིད་རྡེ་ ར་ཡི་རྦོ་ ཁུར་ཧེ་, ཀའོ་ ཀོན་འཇོག་རྒེ་ ཀའ་ ནོག་།
18 ཁྱི་ཞ་རྒུ་ནི་ ཏམ་པེ་ ཐུག་ཡིད་རྡེ་ན་ ཏུའི་རྒྱུན་ ཞུ་ཝ་ རྡང་ མོ་ལམ་ ན་ཚོག་ ཚང་མ་ པུལ་ཧེ་། ཤང་ ཅོའེ་རྡེ་ ཀོན་འཇོག་རྒེ་ ཏམ་པ་ མི་ ཚང་མེ་ཕི་ མོ་ལམ་ ཞུ་ཅེ་ མ་ནི་ མ་ཕང་ཧེ་།
19 ང་ ཟེར་ཤེ་ ཧབ་ ཐོབ་ཟ་ནི་, འཇི་ནང་ མེད་པེ་, ནེ་ཚུལ་ ཟང་པེ་ སང་སྤེ་རེ་ ཧོར་རྦོ་ མ་ སེམ་རུའི་ ཉམ་པོ་ ཤེད་ཉེན་ཅེ་ལ་ ངེ་ཕི་ལ་ མོ་ལམ་ ཞུའི་ཧེ་། 20 ང་ ནེ་ཚུལ་ ཟང་པོ་ ཤེད་ཅེ་ན་ མ་ཤི་ཀེ་ ཧུ་ཚབ་ འིན་ཅེ་རྦེ་, ཙོན་ཁང་ལ་ ཧར་། ཏེ་རྒ་རྦེ་ཕི་ལ་ ངེ་ སེམ་ཤུག་ ཉམ་པོ་ ནེ་ཚུལ་ ཟང་པོ་འབོ་ ཤེད་ཉེན་ཅེ་ལ་, མོ་ལམ་ ཞུའི་ཧེ་, ཀའོ་ ངེ་ ཅོ་རྒོའེ་།
ལྟིང་འཇུག་རྒེ་ འཇུ་།
21 ཏི་ཁི་ཀུའི་, མ་ཤི་ཀ་པེ་ སྤུན་ མ་ ཤེ་སྤ་ རྡང་ ཙོབོ་རྡེ་ ཞབ་རྟོག་པ་ མ་ ལོ་ཁྱེལ་ཅེན་ཞིག་ འིན་། ཁོའེ་ ཁྱི་ཞ་རྒུན་ལ་ ངེ་ ནེ་ལུག་ ཏང་ ངེ་ ཅོའེན་ ཡོ་ཀན་ ཚང་མེ་ ཧོར་ལ་ ཞིབ་སལ་ ཅོའེ་རྡེ་ ཤེད་རྡེན་། 22 ང་ཞི་ ནེ་ལུག་རྒུ་ནི་ ཧོར་ལ་ ཧ་ཀོ་ཅུག་ཅེ་ རྡང་ ཁྱི་ཞ་རྒུ་ནི་ སེམ་ལ་ སེམ་རུའི་ རྐྱེ་ཅུག་ཅེ་ཕི་, ངེ་ ཁོ་ ཁྱི་ཞ་ས་ ཀ་ལེ་ཡོད་།