ཀོན་འཇོག་རྒེ་ འོད་རྡེ་ན་ མི་ཙེ་ པུད་།
5
ཁྱི་ཞ་ ཀོན་འཇོག་རྒེ་ ཤེ་སྤ་ ཕྲུ་རྒུ་རྒུན་ འིན་ཅེ་ཀ་ནེ་, ཁོང་ འགྲུལ་ལེ་ ཛེད་ཀ་ནེ་ ལམ་མེ་ཀ་ ཁྱི་ཞ་རྒུན་ལ་ འགྲུལ་ཧེ་། 2 ཁྱི་ཞ་རྒུ་ནི་ མི་ཙེ་ ཤེ་སྤེ་ན་ པུད་ཧེ་, ཀ་ཟུག་ མ་ཤི་ཀེ་ ཨ་ཧོ་རྒུན་ལ་ ཤེ་སྤ་ ཛེད་ཏེ་ ཨ་ཧོ་རྒུ་ནི་ཕི་ ཀྲོང་རྡེ་ ཛེད་, ཁོང་ནི་ ཀོན་འཇོག་ལ་ ཏྲི་ཞིམ་མེ་ ཆོད་པ་ རྡང་ སྲོག་ཆོད་ ནོག་།3 འིན་ན་ ཁྱི་ཞ་རྒུ་ནི་ན་ ལུའི་འབྲེལ་ ངན་པ་, ཡང་ ལེ་ངན་ ཀྲིཔ་ ཡང་ ནབ་སེམ་ ཆུང་ཙེ་ཞིག་ལ་ ཡོང་ མི་རྒོའེ་, ཅེ་ཟེར་ནི་ ཀོན་འཇོག་རྒེ་ མི་ ཏམ་པ་རྒུ་ནི་ན་ ཏོ་ཙོག་སེ་ རྡིག་པེ་ཕི་ ས་ཅ་ མེ་ཀག་། 4 ཁྱི་ཞ་རྒུ་ནི་ ཁྲེལ་མེད་རྡེ་ སྲུང་ངུ་, ཏོན་མེད་རྡེ་ སྤེ་ར་, རྡང་ ཁམ་ལོག་ ཧ་རྦག་ ཏང་ མི་རྒོའེ་། ཏོ་ཙོག་སེ་ འོའེ་སྤ་ མན་ཀ་ནེ་ སྤེ་ར་ ཏང་ངེ་སང་ ཀོན་འཇོག་ལ་ ཐུག་ཞེ་ཆེ་ ཞུ་རྒོ་ཤེ་ ནོག་། 5 འི་རྦོ་ ནེན་ཏེན་ ནོག་, ལོག་ཡེམ་, ཀྲིཔ་རྦེ་ ལེ་ཧ་, ཡང་ ནབ་སེམ་a ཏོ་ཙོག་སེ་ མི་རྒུན་ལ་ མ་ཤི་ཀ་ རྡང་ ཀོན་འཇོག་རྒེ་ རྒྱལ་སྲིད་རྡེ་ན་ ཅང་ ནོར་ཧལ་ མི་ཐོབ་།
6 འགོ་ལོག་ ལབ་ཀན་རྒུ་ནི་ ཁྱི་ཞ་ འགོམ་ཧོར་ ཏང་མ་ཅུག་། ཅེ་ཟེར་ནི་ ཀོན་འཇོག་རྒེ་ ཀཱ་ མ་ཉེན་ཀན་རྒུ་ནི་ ཏེ་ ཤོད་པ་ ངན་པ་རྒུན་ ཅོ་ཅེ་རྦེ་ ཅོའེ་རྡེ་, ཀོན་འཇོག་ལ་ ཏོ་རྒུ་ནི་ཀ་ ཐུག་སྲོ་ རྐྱོད་ཏེ་ ཆེད་པ་ སལ་ལེ་ནོག་། 7 ཏོ་རྦེ་ཕི་ལ་ ཏོ་ཙོག་སེ་ མི་རྒུན་ ཉམ་པོ་ འདྲེའེ་ མ་འདྲེའེ་། 8 ངུལ་མ་ཞིག་ལ་ ཁྱི་ཞ་རྒུན་ མུན་ཀྲག་རྒེ་ ཀང་འདེ་ ཡོད་པེན་, འིན་ན་ ཏག་ས་ ཙོབོ་རྡེ་ན་ འིན་ཅེ་རྦེ་ ཁྱི་ཞ་ འོད་རྡེ་ ཀང་འདེ་ ནོག་། ཏེ་རྒ་རྦེ་ཕི་ལ་ འོད་རྡེ་ མི་རྒུན་ ཙོག་སེ་ མི་ཙེ་ པུད་ཧེ་། 9 ཏེ་ འོད་ ཟང་པོ་, ཀྲང་པོ་ རྡང་ རྡེན་འབའ་ འབྲེ་རྦུ་རྒུན་ ཅིག་པོ་ མི་ནེ་ནོག་།
10 ཙོབོ་ ཐུག་ཐེད་རྡེ་ ཛེད་ཀན་རྒུན་ ཙལ་ཅེ་ ཙོན་འགྲུའི་ ཅོའེ་ཧེ་། 11 མུན་ཀྲག་རྒེ་ ལེ་ཧ་ འབྲེ་རྦུ་ མ་མིན་ཀན་རྒུ་ནི་ན་ མ་འདྲེའེ་ཧེ་, འིན་ན་ སེམ་འགྱུར་ཤེ་ཕི་ ཁོང་རྒུ་ནི་ རྐྱོན་རྒུན་ ལྟོན་ཧེ་། 12 ཁོང་རྒུ་ནི་ སྃ་རྡེ་ རྡིག་པེ་ ལེ་ཧ་ ཅོ་ཀན་རྒུ་ནི་ ཧོར་ལ་ སྤེ་ར་ ཏང་ཅེའོ་ ཁོ་རང་, ཁྲེལ་རྦ་ཞིག་ ནོག་། 13 འིན་ན་ འོད་རྡེ་ན་ རྦེ་རྡེ་ པོར་ཧན་ ཚང་མ་ སལ་སྤོ་ ཅོའེ་རྡེ་ ཐོང་ངེ་ནོག་། 14 འོད་ ཕོག་ཀན་ ཚང་མེ་ འདྃ་ ཏང་ངེ་ནོག་། ཏེ་རྒ་རྦེ་ཕི་ལ་ ཏམ་པེ་ སུང་རབ་རྦེ་ན་
“ཉིད་ལོག་ཀན་རྒུན་ ཉིད་ནི་ ལོྃ་ཧེ་།
ཤི་ཀན་རྒུ་ནི་ ཕྲོ་ནི་ སོན་པོ་ ལོྃ་ཧེ་།
ཡང་ མ་ཤི་ཀེ་ འདྃ་རྦོ་ ཁྱི་ཞི་ཀ་ ཕོག་རྦེན་།”
15 ཏེ་རྒ་རྦེ་ཕི་ལ་ ཁྱི་ཞ་རྒུ་ནི་ མི་ཙེ་ པུད་ཅེ་ན་ ཤང་ ཅོའེ་ཧེ་། ཧ་འགྲང་རྒུན་ ཙོག་སེ་ མ་པུད་རྡེ་, ཤེ་རབ་ཅེན་རྒུན་ ཙོག་སེ་ མི་ཙེ་ པུད་ཧེ་། 16 ཧབ་ ཐོབ་ཀན་ ཚང་མ་ ཀོལ་ཧེ་, ཅེ་ཟེར་ནི་ འི་ ཏུའི་རྒུན་ ངན་པ་ ནོག་། 17 ཧ་འགྲང་ ཙོག་སེ་ མ་འགྱུར་རེ་ ཙོབོ་རྡེ་ ཐུག་འདོད་ འིན་ཀན་འབོ་ ཧ་ཀོ་ཅེ་ ཙོན་འགྲུའི་ ཅོའེ་ཧེ་། 18 ར་རོའེ་རྡེ་ མ་འདེད་ཧེ་, ཏོ་རྦེ་ ཤོད་པ་ ངན་པེ་ ལེ་ཧ་རྒུ་ནི་ན་ ཁྲིད་རྡེ་ནོག་, འིན་ན་ ཁྱི་ཞ་རྒུ་ནི་ མི་ཙེ་རྦོ་ ཏམ་པེ་ ཐུག་ཡིད་རྡེ་ ཧོང་ཧེ་། 19 ཁྱི་ཞ་རྒུ་ནི་ ཕྲོ་ སུང་འགུར་, འགུར་མ་ རྡང་ ཆོའེ་ལུ་རྒུན་ ཏང་ངེན་, ཙོབོ་རྡེ་ཕི་, ཁྱི་ཞ་རྒུ་ནི་ ཉིང་ངེ་ན་ རྟོད་པེ་ ལུ་ ཧོང་ཧེ་། 20 ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཨ་ཧོའེ་ཕི་ ཛེད་ཀན་ ཚང་མ་ལ་, ཏུའི་རྒྱུན་ ཨ་ཧོའེ་ ཡབ་ ཀོན་འཇོག་ལ་ ཐུག་ཞེ་ཆེ་ ཞུའི་ཧེ་།
ན་མ་ རྡང་ མག་པ་རྒུན་།
21 ཁྱི་ཞ་རྒུ་ནི་ མ་ཤི་ཀ་ སི་ཝ་ ཅོ་ཅེ་རྦེ་, ཅིག་ ཏང་ ཅིག་རྒེ་ ཝང་ངེ་ ཡོག་ལ་ པོར་ཧེ་།
22 ན་མ་ ཁྱི་ཞ་རྒུན་ རང་ངེ་ མག་པེ་ ཝང་ངེ་ ཡོག་ལ་ འདོད་ཧེ་, ཀ་ཟུག་ ཁྱི་ཞི་ ཁྱི་ཞ་རང་ ཙོབོ་རྡེ་ ཝང་ངེ་ ཡོག་ལ་ པོ་རེ་ཡོད་། 23 ཅེ་ཟེར་ནི་ མག་པ་རྦོ་ནི་ ན་མེ་ འགོ་ ཙོག་སེ་ ནོག་, ཀ་ཟུག་ མ་ཤི་ཀ་ ཆོའེ་ཚོག་རྒེ་ ཨུ་ འིན་, ཡང་ ཁོང་ ཁོང་ངེ་ ཧུ་ཟུག་ ཆོའེ་ཚོག་རྒེ་ རྐྱབ་འགོན་ ནོག་། 24 མ་ཤི་ཀེ་, ཆོའེ་ཚོག་ ཁོ་རང་ངེ་ ཝང་ངེ་ ཡོག་ལ་ པོར་རེ་ ཙོག་སེ་ ན་མ་རྒུ་ནི་ལ་, ཁོ་རང་རྒུན་ ཅི་ས་ཐོག་ནི་ ཁོ་རང་ངེ་ མག་པེ་ ཝང་ངེ་ ཡོག་ལ་ པོར་རྒོའེ་།
25-26 མག་པ་རྒུན་, རང་ངེ་ ན་མ་ ཤེ་སྤ་ ཅོའེ་ཧེ་, ཀ་ཟུག་ མ་ཤི་ཀེ་ རང་ངེ་ ཆོའེ་ཚོག་ལ་ ཤེ་སྤ་ ཛེད་ཏེ་, ཁོ་རང་ངེ་ ཆོའེ་ཚོག་ ཏམ་པ་ ཅོའོ་ ཛེད་ཅེ་ལ་ ཀྲོང་རྡེ་ ཛེད་, ཡང་ ཀོན་འཇོག་རྒེ་ ཀའ་ ཉམ་པོ་ ལག་མོ་ ཛེད་ཏེ་ ཆུ་ ཉམ་པོ་ ཁྲུ་ ཛེད་། 27 ཏོ་རྒུན་ ཅོའོ་ ཛེད་ ཅེ་ཞུ་ནི་ ཁོང་ངེ་ ནག་ཙིག་ ཡང་ སུལ་ རྡང་ འགྲིག་ཅེ་ མེ་ཀན་, འིན་ན་ འདང་ཤེན་, ཏམ་པ་ རྡང་ རྐྱོན་མེ་ཀ་ནེ་ ཆོའེ་ཚོག་ཅིག་, ཁོ་རང་ལ་ ལྟེད་ཅེ་ ནོག་། 28 ཏེ་རྒ་ ཙོག་སེ་, མག་པ་རྒུ་ནི་ རང་ངེ་ ཟུྃ་སྤོ་ལ་ ཤེ་སྤ་ ཅོའོ་ ཙོག་སེ་, རང་ངེ་ ན་མ་ ཤེ་སྤ་ ཅོ་རྒོ་ཤེ་ ནོག་། རང་ངེ་ ན་མ་ ཤེ་སྤ་ ཅོ་ཀན་རྒུ་ནི་ ཁོ་རང་ལ་ ཤེ་སྤ་ ཅོའེ་རྡེ་ ནོག་། 29 ཨ་ཧོ་ སུ་ཞིག་ལ་ རང་ངེ་ ཟུྃ་སྤོ་ལ་ སོག་པོ་ མ་ཅོ་ལ་, ཏོ་ལ་ ཁར་ཞི་ ལྟེར་རྡེ་, ལྟ་ཏོག་ ཅོ་ནོག་, ཀ་ཟུག་ མ་ཤི་ཀེ་ ཆོའེ་ཚོག་ལ་ ལྟ་ཏོག་ ཛེ་རྡེ་ཡོད་། 30 ཅེ་ཟེར་ནི་ ཨ་ཧོ་རྒུན་ མ་ཤི་ཀེ་ ཧུ་ཟུག་རྒེ་ ཡན་ལག་ ནོག་།
31 ཏམ་པེ་ སུང་རབ་རྦེ་ན་ མོལ་རྡུག་
“ཏེ་རྒ་རྦེ་ཕི་ལ་ པུ་ཙ་ ཁོ་རང་ངེ་ ཨ་རྦ་ རྡང་ ཨ་མ་ནི་ ཕྃ་རྡེ་
ཁོ་རང་ངེ་ ན་མ་ ཉམ་པོ་ ཛོམ་མེ་ནོག་
ཡང་ ཁོང་ ཉ་ཧ་ ཟུྃ་སྤོ་ ཅིག་ འགྱུ་རེན་།”