ཅིག་ ཏང་ ཅིག་རྒེ་ ནག་རྒུན་ རྒོའེ་རྡེ་ ཁུར་ཤེ་།
6
ཤེ་སྤ་ སྤུན་རྒུན་, ཀལ་ཏེ་ ཏེཏ་པ་ཅེན་འཇིག་ རྡིག་པེ་ན་ འགྱེལ་ནི་, ཁྱི་ཞ་ ཏམ་པེ་ ཐུག་ཡིད་རྡེ་ན་ ལྡན་ཀན་རྒུ་ནི་, ཏེ་ མིའུ་ལ་ འཇམ་པོ་ ཉམ་པོ་ ཀྲང་པེ་ ལམ་མེ་ཀ་ ལོག་ཏེ་ ཁྱོང་ རྒོ་ཤེ་ ནོག་། འིན་ན་ ཏེ་རྒ་ ཙོག་སེ་ རྡིག་པེ་ན་ ཁྱི་ཞ་རྒུ་ནི་ མི་འགྱེལ་ཤི་ལ་ ཤང་ ཅོའེ་ཧེ་། 2 ཅིག་ ཏང་ ཅིག་རྒེ་ ཁུ་རུ་རྒུན་ རྒོའེ་ཏེ་ ཁུར་ཧེ་། ཏོ་ཙོག་སེ་ ཅོ་ཅེ་ནི་ ཁྱི་ཞ་རྒུ་ནི་ མ་ཤི་ཀེ་ ཁྲིམ་འབོ་, ཀྲུཔ་ཅུག་ཏེ་ ནོག་། 3 ཀལ་ཏེ་ ཁྱི་ཞ་རང་ ཅང་ མན་ནེ་ལ་ མ་ ཀྲག་པོ་ ཚོར་རྡེ་ ཡོད་ནི་, ཁྱི་ཞ་རང་ངེ་ རང་ལ་ འགོ་ཧོར་རྡེ་ ནོག་།4 ཁྱི་ཞ་རང་ངེ་ ལེ་ཧ་ལ་ རྒྱ་ལེ་ ཅོའེ་འདེ་ ལྟག་ཅེད་ ཅོའེ་ཧེ་། ཏེ་ནི་ ཁྱི་ཞ་རྒུན་ལ་ ཞེན་མ་ ཉམ་པོ་ རྡུར་ཧ་ནེ་ རྐྱིད་པོ་ མག་པེ་, ཁྱི་ཞ་རང་ངེ་ ལེ་ཧ་ རྒྱ་ལེ་ ཅོ་ཀ་ནེ་ རྐྱིད་པོ་རྦོ་ ཡོང་ངེན་། 5 ཡང་ འི་ཏུ་ ཅོའེ་ཧེ་, མི་ རེ་རེ་ རང་རང་ངེ་ ཁུ་རུ་རྒུན་ ཁུར་རྒོའེ་རྡེ་ནོག་།
6 ཁྱི་ཞ་རྒུན་ལ་ ཀོན་འཇོག་རྒེ་ ཀའ་ ལབ་རྦེ་ ཛེད་ཀན་རྒུན་ ཉམ་པོ་, ཁྱི་ཞ་ ཡོ་ཀན་ ཕན་ཏོག་ཅེན་ ཚང་མ་ རྒོའེ་ཧེ་།
7 ཁྱི་ཞ་རྒུ་ནི་ རང་འདང་རང་ལ་ འགོམ་ཧོར་རྡེ་ ཀོན་འཇོག་རྒེ་ ཁྲིམ་ཅེད་རྡེ་ ཛེད་ཅེ་རྦོ་ལ་ ནྃ་མེད་ མ་ཅོ་ཧེ་། ཁྱི་ཞ་རང་ངེ་ ཏབ་ཀ་ནེ་ ལྟོན་ཏོག་རྒེ་ འབྲེ་རྦུ་ ཁྱི་ཞ་རྒུ་ནི་ ངེན་། 8 རྡིག་པེ་ འདོད་པ་རྒུན་ འདྲན་འདྲ་ ཀྲུབ་ཅེ་ལ་ མི་ཙེ་ པུད་ཀན་རྒུ་ནི་, ཏེ་ རྡིག་པེ་ འདོད་པ་རྒུ་ནི་ ཀ་ནེ་, རུལ་ཤེ་ རྡང་ ཤི་ཅེ་རྒུན་ ངེན་། འིན་ན་ ཀོན་འཇོག་རྒེ་ ཐུག་ཡིད་ ཐུག་ཐེད་ཅུག་ཀ་ནེ་ མི་ཙེ་ པུད་ཀན་རྒུ་ནི་, ཐུག་ཡིད་ནི་ ཐ་མེད་པེ་ མི་ཙེ་ཞིག་ ངེན་། 9 ཏེ་ནི་ ཨ་ཧོ་ ཟང་པོ་ ཅོ་ཅེ་ལ་ ནྃ་ ཚེར་ རྒོ་ཤེ་ མག་, ཅེ་ཟེར་ནི་ ཀལ་ཏེ་ ཟང་པོ་ ཅོ་ཅེའོ་ ཕང་ མ་ཕང་ནི་, ཀོན་འཇོག་རྒེ་ འདམ་མེ་ ཛེད་ཀ་ནེ་ ཏུའི་རྦེ་ཀ་ ཨ་ཧོ་རྒུ་ནི་ ཅིན་ལབ་ཅེན་ནེ་ ལྟོན་ཏོག་པོ་ ངེན་། 10 ཏོ་རྦེ་ཕི་ ནམ་ ཧབ་ ཐོབ་ན་, ཨ་ཧོ་རྒུ་ནི་ ཚང་མ་ལ་ ཟང་པོ་ ཅོ་རྒོ་ཤེ་ ནོག་, མིག་ས་ལེ་ ཏེཏ་པ་ཅེན་ སྤུན་རྒུན་ལ་།
པ་འུ་ལུའི་ ལྟིང་འཇུག་རྒེ་ ཁ་རྡ་།
11 ཏ་ ངེ་ ང་རང་ངེ་ ལག་པ་ ཉམ་པོ་ འབྲི་ནི་, ལྟོའེ་རྡང་, ངེ་ འབྲི་ཀན་རྒུན་ ཙམ་ཤིག་རྒེ་ ཆོན་མོ་ རི་ མི་འདུག་།
12 འགོཔ་ཅེཏ་ ཅོ་རྒོའེ་ནོག་ ཟེར་རྡེ་ ཁྱི་ཞ་རྒུན་ལ་ ཝང་ ཏང་ཀན་རྒུ་ནི་, ཏོ་ ཁོ་རང་རྒུན་ ཟང་པོ་ ཐོང་ཅེ་ མ་ཚེད་, མ་ཤི་ཀ་ རྐྱང་ཤིང་ངེ་ཀ་ ཀྲོང་ཤེ་ རྒྱུད་ཏེ་ ཐར་པ་ ཐོབ་ཅེ་ ཅིག་པོ་ ལབ་ཏེ་, ཁོ་རང་རྒུན་ལ་ ནག་པར་རྡོ་ མི་ཐོང་ཤི་ཕི་ལ་ ཅོ་ནོག་། 13 འགོཔ་ཅེཏ་ ཅོའེ་རྡེ་ ཡོ་ཀན་རྒུ་ནི་ལ་ ཁྲིམ་ ཚང་མ་ ཁ་ཉེན་ནེ་ མག་། འིན་ན་ ཁྱི་ཞི་ འགོཔ་ཅེཏ་ ཅོ་ཀན་འབེ་ཀ་ ཁོང་རྒུན་ལ་ ཕོ་སོ་ ཅོ་ཉེན་ཅེ་ འདོད་པེ་ ཅོའེ་རྡེ་ ཁོང་རྒུ་ནི་ ཁྱི་ཞ་ ཏོ་ ཅོ་ཅུག་རྒེ་ནོག་།
14 ངེ་ འདོད་པ་རྦོ་ ཨ་ཧོ་རྒུ་ནི་ ཙོབོ་ ཡི་ཤུ་ མ་ཤི་ཀེ་ རྐྱང་ཤིང་ ཅིག་པེ་ཀ་ མ་ཐེ་ལ་ ཡང་ ཅི་ཞིག་རྒེ་ཀ་ལ་ ངེ་ ཕོ་སོ་ མ་ནི་ མི་ཅོ་། ཁོང་ ངེ་ཕི་ ཀྲོང་ཤེ་ཀ་ནི་ འཇིག་རྟེན་འབོ་ ངེ་ཕི་ ཤི་ཀན་ ཙོག་སེ་ཡིན་། ཡང་ ང་ འཇིག་རྟེན་ནེ་ཕི་ ཤི་ཀན་ ཙོག་སེ་ཡིན་། 15 འགོཔ་ཅེཏ་ ཅོའེ་རྡེ་ ཡོད་ཁྲོ་ ཡ་ མེད་ཁྲོ་ ཏོ་རྦེ་ ཅང་ ཕན་ཏོག་ མེ་ཀག་། ཁག་ཅེན་འབོ་, འགྱུར་ཞ་ ཁྱོྃ་རྡེ་ མི་ཙེ་ སོ་མ་ཞིག་ པུད་ཅེའོ་ ནོག་། 16 མི་ཙེ་ སོ་མེ་ ལམ་མེ་ཀ་ འགྲུལ་ཧན་རྒུན་ལ་, ཀོན་འཇོག་རྒེ་ ཞིའི་རྡེ་ རྡང་ ཉིང་ཞེ་རྒུན་ ཐོབ་རྦེན་། ཏོ་རྒུན་ ཀོན་འཇོག་རྒེ་ རྡེན་འབེ་ མི་རྒུན་ ནོག་།
17 འདོར་རྡུའི་ནི་ ཏི་ནི་ཕ་ལ་ ཏོ་རྒུ་ནི་ ཧོར་ལ་, སུ་ཞིག་ལ་ ང་ ནག་ མ་ལྟན་ཧེ་, ཅེ་ཟེར་ནི་ ངེ་ ཟུྃ་སྤེ་ཀ་ ཡི་ཤུའི་ རྒྱབ་ནི་ འགྲུལ་ཧ་ནེ་ རྡུ་ངལ་ལེ་ ལྟའ་རྒུན་ ཕོག་ཏེ་ ཡོད་།
18 ཤེ་སྤ་ སྤུན་རྒུན་, ཨ་ཧོ་རྒུ་ནི་ ཙོབོ་ ཡི་ཤུ་ མ་ཤི་ཀེ་ ཐུག་ཞེའོ་, ཁྱི་ཞ་རྒུ་ནི་ ཐུག་ཡིད་ ཉམ་པོ་ ཞུ་ཤིག་, ཨ་མེན་༎