མ་ཤི་ཀེ་ན་ ར་ཝང་
5
ར་ཝང་ངེ་ན་ འདེད་ཅེ་ཕི་ མ་ཤི་ཀེ་ ཨ་ཧོ་རྒུན་ ཐར་ཤུག་རྒེ་ ཛེད་། ཏ་ རྟེམ་པོ་ འདོད་ཧེ་། ཡང་ ལྕིན་ཀྲེ་ ཁྲིམ་མེ་ ཉེ་ཤིང་འབོ་ ཁུར་རྡེ་ ཏོ་རྦེ་ ཚེ་ཡོག་ འགྱུར་ མ་ཤུག་ཧེ་།2 ཉོན་ནྃ་, ང་ པ་འུ་ལུའི་ ཁྱི་ཞ་རྒུན་ལ་ འི་རྦོ་ ཤེད་རྡེ་ཡོད་, ཀལ་ཏེ་ ཁྱི་ཞ་རྒུ་ནི་ ཁྱི་ཞ་རང་ལ་ འགོཔ་ཅེཏ་ ཅོ་ཅུག་རྒེ་ཡོད་ནི་, ཏེ་ནི་ མ་ཤི་ཀེ་ཀ་ནི་ ཡོང་ཀ་ནེ་ ཕན་ཏོག་རྦོ་ ཁྱི་ཞ་རྒུན་ལ་ མི་ཐོབ་། 3 ངེ་ ཡང་ སྤང་པུད་རྡེ་ཡོད་, ཀལ་ཏེ་ ཁྱི་ཞ་རྒུ་ནི་ འགོཔ་ཅེཏ་ ཅོ་ཅུག་ཏེ་ ཀོན་འཇོག་རྒེ་ ཆོག་རྐྱོར་ སལ་ཅེ་ ཅོ་ནི་, ཏེ་ནི་ ཁྱི་ཞ་རྒུ་ནི་ མོ་ཤེ་ ཁྲིམ་ ཚང་མ་ སྲུང་རྒོའེ་། 4 ཁྲིམ་པོ་ སྲུྃ་རྡེ་ ཀོན་འཇོག་རྒེ་ ཧུ་འདུན་ལ་ ཀྲང་པོ་ འགྱུར་ ཉེན་ནེ་ནོག་ སམ་ཀན་ ཁྱི་ཞ་རྒུ་ནི་, འབྲེལ་རྦོ་ མ་ཤི་ཀ་ ཉམ་པོ་ ཆེད་ཏེ་ ནོག་། ཁྱི་ཞ་རྒུན་ ཀོན་འཇོག་རྒེ་ ཐུག་ཞེ་ནི་ ཐག་རིང་ལ་ སོང་འདེ་ ནོག་།
5 ངེ་ འི་ཟུག་ ཟེར་ཆོ་རྒེན་, ང་ཞ་ ཏམ་པེ་ ཐུག་ཡིད་ རྒྱུད་ཏེ་ རྡེན་ཆེ་ཤེ་ ཆ་ཙང་ རག་། མ་ཤི་ཀ་ ཏེཏ་པ་ ཅོ་ཅེ་ རྒྱུད་ཏེ་ ཀོན་འཇོག་རྒེ་ ང་ཞ་ ཀྲང་པོ་ན་ ན་མེན་། 6 ཨ་ཧོ་རྒུ་ནི་ འབྲེལ་ མ་ཤི་ཀ་ ཡི་ཤུ་ ཉམ་པོ་ ཡོད་ཅེ་ཀ་ནི་, འགོཔ་ཅེཏ་ ཅོ་ཀན་ ཡང་ མ་ཅོ་ཀ་ནེ་ན་ ཅང་ ཁྱེད་ མེད་ཏེ་ ནོག་། ཁག་ཅེན་ནི་, ཏེཏ་པ་འབོ་ ཤེ་སྤེ་ན་ ལྟན་ཅེའོ་ ནོག་། 7 ཁྱི་ཞ་རྒུ་ནི་ མི་ཙེ་ པང་འབོ་ མ་ རྒྱ་ལེ་ ཅོའེ་རྡེ་ ཏང་ངེ་ཡོད་པེན་། ཏ་ སུའི་ ཁྱི་ཞ་རྒུན་ལ་ རྡེན་འབེ་ རྒྱབ་ནི་ འགྲུལ་ཤེ་ན་ རྒག་ཞ་ ཏྃ་། 8 ཏེ་ ཁ་ལྕེ་ ཏང་ཅེ་རྦོ་ ནེན་ཏེན་ལ་ ཁྱི་ཞ་རྒུན་ ར་ཝང་ངེ་ན་ འདེད་ཅེ་ལ་ འབོ་ ཛེད་ཀན་ ཀོན་འཇོག་རྒེ་ ཆོག་ནི་ མག་། 9 འི་ ཟུའི་མེ་ ལབ་ཞ་རྦོ་, པག་པེ་ སོན་ཏེ་ན་ རྐྱུར་ ཡོང་ཅུག་ཀ་ནེ་ ཏེ་ རྐྱུར་ ཆུང་ཙེ་ ཙོག་སེ་ ནོག་། 10 ངེ་ ཙོབོ་རྡེ་ན་ རྡེན་ཆེ་ཤེ་ ཅོའེན་, ཁོང་ངེ་ ཁྱི་ཞ་རྒུན་ལ་, ང་ཞི་ ལབ་ཀན་ མན་ནེ་, ཞེན་ སོ་སོ་ ལབ་ཞ་ ཏེཏ་པ་ ཅོ་ཅེ་ནི་ ཐག་རིང་ལ་ པོ་རེ་ ཛེ་རྡེན་། ཁྱི་ཞ་ འགོམ་ཧོར་ཧན་འབོ་ སུ་ཞིག་ འིན་ན་, ཀོན་འཇོག་རྒེ་ ཁྲིམ་ཅེད་ སལ་ལེ་ ཛེ་རྡེན་།
11 ཤེ་སྤ་ སྤུན་རྒུན་, ཀལ་ཏེ་ ངེ་ འགོཔ་ཅེཏ་ ཅོ་རྒོའེ་ ཟེར་རྡེ་ ཏ་རུང་ང་ ལབ་རྦེ་ཡོད་ནི་, ཀ་ཟུག་ ཁ་ཅིག་རྒེ་ ངེ་ ཅོ་རུག་ ཟེ་རེ་ནོག་, ཏེ་ནི་ ཅི་ཕི་ ཏ་རུང་ང་, ང་ ནག་པར་རྡོ་ ཐོང་ངེན་ ནོག་? ཀལ་ཏེ་ ངེ་ མ་ཤི་ཀེ་ རྐྱང་ཤིང་ རྒྱུད་ཏེ་ ཐར་པ་འབོ་ མ་ལབ་པེ་ནི་, ཏེ་ནི་ སུ་ཞི་ལ་ ངེ་ཀ་ སྲོ་ ཡོྃ་རྡེ་ མེད་ཁྲོ་། 12 ཁྱི་ཞ་ ནག་ ལྟན་ཀན་རྒུ་ནི་, ཁོ་རང་རྒུན་ལ་ འགོཔ་ཅེཏ་ ཅོ་ཟ་ནི་ ཁོ་རང་ པུ་ཙ་ འིན་ཀ་ནེ་ ལྟའ་རྦོ་ སོན་ཏེ་ ཅེད་ཤིག་!
13 ངེ་ ཤེ་སྤ་ སྤུན་རྒུན་, ཁྱི་ཞ་རྒུན་ ར་ཝང་ཅེན་ནེ་ མི་ཙེ་ པུད་རྡེ་ལ་ འབོ་ ཛེད་ཏེ་ ནོག་། འིན་ན་ ཏེ་ ར་ཝང་འབོ་ ཁྱི་ཞ་རྒུ་ནི་ རྡིག་པེ་ འདོད་པ་རྒུན་ འདྲན་འདྲ་ ཀྲུཔ་ཅེ་ ཧབ་ཤིག་རྒེ་ ཚུལ་ལ་ མ་ཀོལ་ཧེ་། ཏེ་སང་ཏེ་, ཏེ་ ར་ཝང་འབོ་ ཁྱི་ཞ་རྒུ་ནི་ ཅིག་ ཏང་ ཅིག་ལ་ ཤེ་སྤེ་ན་ ཞབ་རྟོག་ ཞུ་ཅེ་ཕི་ ཀོལ་ཧེ་། 14 ངེ་ ཏོ་ ཟེ་འིན་, ཅེ་ཟེར་ནི་ ཁྲིམ་ སོན་ཏེ་ འི་ ཀཱ་ ཅིག་པེ་ན་ རྡུའི་རྡེ་ ནོག་, “རང་ངེ་ ཁྱིམ་ཙེ་པ་རྒུན་ལ་ རང་ ཙོག་སེ་ ཤེ་སྤ་ ཅོའེ་།” 15 འིན་ན་ ཀལ་ཏེ་ ཁྱི་ཞ་རྒུ་ནི་ ཤང་ཀུ་ ཙོག་སེ་ ཅིག་ ཏང་ ཅིག་ལ་ མེ་རྐྱོན་ ཅོ་ཅེ་ རྡང་ ནོད་པ་ རྐྱལ་ནི་, ཤང་ ཅོའེ་ཧེ་, ཏེ་མ་ནི་ ཁྱི་ཞ་རྒུ་ནི་ ཅིག་ ཏང་ ཅིག་ལ་ མེ་ཀན་ ཅོའེན་།
ཐུག་ཡིད་རྡེ་ ཝང་ངེ་ན་ མི་ཙེ་ པུད་ཅེ་།
16 ངེ་ ཟེར་ཤེ་རྦོ་, ཏམ་པེ་ ཐུག་ཡིད་རྡེ་ ལྟན་ཀ་ནེ་ མི་ཙེ་ ལམ་འབེ་ཀ་ འགྲུལ་ཧེ་། ཏེ་ནི་ ཁྱི་ཞ་རྒུ་ནི་ རྡིག་པེ་ འདོད་པེ་ ཅོ་ཅུག་ཀ་ནེ་ ལེ་ཧ་རྒུན་ འདྲན་འདྲ་ ཀྲུབ་ མི་ཅུག་། 17 རྡིག་པེ་ འདོད་པ་, ཏམ་པེ་ ཐུག་ཡིད་རྡེ་ འདོད་པེ་ འགོ་ལོག་པོ་ ཅོ་ནོག་, ཡང་ ཏམ་པེ་ ཐུག་ཡིད་རྡེ་ འདོད་པེ་, རྡིག་པེ་ འདོད་པེ་ འགོ་ལོག་པོ་ ཛེད་རྡེ་ནོག་། ཡུ་ ཉ་ཧེ་ མི་ཐུན་ཅེ་ཀ་ནི་ ཁྱི་ཞ་ ཐེད་ཀན་འབོ་ ཅོ་ཉེན་ནེ་ མག་། 18 འིན་ན་ ཁྱི་ཞ་རྒུན་ ཐུག་ཡིད་རྡེ་ ཁྲིད་ཟ་ནི་, ཁྱི་ཞ་རྒུན་ མོ་ཤེ་ ཁྲིམ་མེ་ ཡོག་ལ་ འདུག་རྒོའེ་ མེ་ཀག་།
19 རྡིག་པེ་ འདོད་པེ་ ལེ་ཧ་རྒུན་ མ་ སལ་སྤོ་ ཐོང་ངེ་ནོག་། ཏོ་རྒུན་ ལུའི་འབྲེལ་ ངན་པ་ ཅོ་ཅེ་, ཤོད་པ་ ངན་པེ་ ལེ་ཧ་རྒུན་ ཅོ་ཅེ་, ཐ་མེད་པེ་ ལུའི་འབྲེལ་ལེ་ འདོད་པ་, 20 ཧུ་འདྲ་ ཅོལ་ཤེ་, ངན་ཆོའེ་ ཅོ་ཅེ་, མི་ སོག་པོ་ ཅོ་ཅེ་, ཁྲུག་པ་ ཏང་ཅེ་, ཕྲ་རྡོག་, མང་པོ་ སྲོ་ ཡོང་ཅེ་, རྟོད་པ་ ཡང་ སི་ཝེ་ འདོད་པ་ པོར་ཤེ་, ཁོན་འདེ་ འདེད་ཅེ་, པོ་པུད་ཅེ་, 21 ཞེན་མ་ ཡོ་ཀན་རྒུ་ནི་ འདོད་པ་ ཅོ་ཅེ་, ར་རོའེ་ཤེ་, འགྲོན་ཏང་ངེན་ ར་རོའེ་ཤེ་ ཟེའེ་རྒུན་ ནེན་འདེ་ ཀྲེན་བ་ རྐྱལ་ཤེ་ འདང་ ཞེན་ཡང་ ཡུ་ཙོག་སེ་ རྡིག་པ་རྒུན་ ཅོ་ནོག་། ངེ་ ཁྱི་ཞ་རྒུན་ལ་ ཡང་ སྤང་ པུ་རྡེ་ཡོད་, ཏོ་ཙོག་སེ་ མི་ཙེ་ པུད་ཀན་རྒུན་ལ་ ཀོན་འཇོག་རྒེ་ རྒྱལ་སྲིད་པོ་ ནོར་ཧལ་ལ་ མ་ནི་ མི་ཐོབ་།
22 འིན་ན་ ཏམ་པེ་ ཐུག་ཡིད་ནི་ མིན་ཀ་ནེ་ འབྲེ་རྦུ་ནི་, ཤེ་སྤ་, རྐྱིད་པོ་, ཞིའི་རྡེ་, ཟོད་པ་, ཀ་ཀྲིན་, རྒྱལ་ལེ་, ལོ་ཁྱེལ་ཅེན་, 23 འཇམ་པོ་ རྡང་ རང་སེམ་ ཆུན་ཅེ་ཅེན་ ནོག་། ཏོ་ཙོག་སེ་ ཤོད་པ་རྒུ་ནི་ རྒྱཔ་འགལ་ལ་ ཁྲིམ་ ཅང་ མེ་ཀག་།
24 མ་ཤི་ཀ་ ཡི་ཤུའི་ འིན་ཀན་རྒུ་ནི་, རྡིག་པེ་ འདོད་པ་ རྡང་ འདོད་ཆག་ ངན་པ་རྒུན་ རྐྱང་ཤིང་ངེ་ཀ་ རྐྱང་འདེ་ མེ་ཀན་ ཅོའེ་རྡེ་ ནོག་། 25 ཏམ་པེ་ ཐུག་ཡིད་རྡེ་ ཨ་ཧོ་རྒུན་ལ་ མི་ཙེ་ པུད་ཅུག་རྒེ་ ཛེད་ཅེ་ཀ་ནི་, ཐུག་ཡིད་རྡེ་ རྒྱབ་ནི་ འགྲུ་ལེན་ཞིག་, མི་ཙེ་ ཁག་ ཚང་མ་ ཁོང་ལ་ ཁྲིད་ཅུག་ཧེ་། 26 ཨ་ཧོ་རྒུན་ ཕོ་སོ་ ཚོར་ མི་རྒོའེ་, ཡང་ ཅིག་ ཏང་ ཅིག་རྒེ་ན་ སྲོ་ ཡ་ ཕྲ་རྡོག་རྒུན་ ཡོང་ཅུག་ མི་རྒོའེ་།