ཆག་ལེ་རྒུན་ 27

པ་འུ་ལུ་ རོམ་ལ་ ཁྱེར་།

ང་ཞ་རྒུན་ ཆུ་རེལ་ལེ་ན་ ཨི་ཏྲ་ལི་ ཡུལ་ལ་ ཀལ་ཤེ་ ཐག་ཅོད་རྡེ་རྡང་, ཀ་ལོན་ནེ་ པ་འུ་ལུ་ རྡང་ ཞེན་ ཙོན་པ་ ཁ་ཅིག་ མག་མི་རྒྱེ་ སྤོན་འབོ་ ཡུ་ལི་འུ་ ཟེར་ཧ་ནེ་ ལག་ལ་ ལྟེད་, ཁོ་ རོམ་མེ་ རྒྱ་སྤེ་ མིག་ས་ལེ་ མག་མི་ ནང་ནི་ འིན་འབེན་། 2 ང་ཞ་རྒུན་ ཨ་འདི་ར་མི་ཏི་ཡམ་ནི་ ལེབ་ཀ་ནེ་ ཆུ་རེལ་ཞིག་ལ་ ཞོན་འདེ་ སོང་འབེན་, ཀའོ་ ཨ་སི་ཨཱེ་ ཡུལ་ཞོང་ངེ་ ཚོའེ་ ཐ་མ་ ཡོ་ཀ་ནེ་ ས་ཆ་རྒུན་ རྒྱུད་ཏེ་ ཆ་ཅེ་ འིན་འབེན་, ཡང་ མ་ཀེ་འདོ་ནི་ཡཱ་ ཡུལ་ཞོང་ངེ་ ཐེ་ས་ལོ་ནི་ཀ་ རྒྱལ་ས་ནེ་ འིན་ཀ་ནེ་ ཨ་རི་ཏར་ཀུ་ ང་ཞ་ ཉམ་པོ་ ཡོད་པེན་།

3 ལྟིང་མེ་ཞག་པོ་ སི་འདཱོན་ རྒྱལ་ས་ ལེབ་རྦེ་རྡང་, རྒོའེ་ཤེ་ཅན་རྒུན་ ཐོབ་ཅེ་ཕི་ ཡུ་ལི་འུ་ ཐུག་ཞེ་ཆེ་ ཞུའི་རྡེ་ པ་འུ་ལུ་ལ་ ཁོང་ངེ་ ཡ་ཏོ་རྒུན་ ཉམ་པོ་ ཐུག་ཅེ་ལ་ རྒོང་སྤ་ ཏྃ་། 4 ཏེ་རྒ་ནི་ ང་ཞ་རྒུན་ ཆུ་རེལ་ལ་ ཞོན་ ཡང་ ལུྃ་སྤོ་ ང་ཞ་ ཆེན་ ཡོད་སེ་ འགོ་ལོག་པོ་ལ་ ཡོྃ་རྦེ་, ང་ཞ་ ལུང་སྤོ་ མེད་ས་ སིབ་རུ་ ཚོ་ལིང་, ཡོའེ་མ་ ཆོག་ལ་ ཕྃ་རྡེ་ སོང་འབེན་། 5 ཏེ་ནི་ ང་ཞ་རྒུན་ སི་ལི་སི་ཡཱ་ རྡང་ པམ་ཕི་ལི་ཡཱེ་ ཉེ་མོ་ལ་ ཡོ་ཀ་ནེ་ རྒྱམ་ཚོ་ རྒྱུད་ཏེ་ ལི་སི་ཡཱ་ ཡུལ་ཞོང་ངེ་ མི་ར་ རྒྱལ་ས་ པབ་པེན་། 6 ཏུ་རུ་ མག་མི་རྒྱེ་ སྤོན་འབོ་ལ་ ཨ་ལེག་ཟན་འདྲིརི་ཡ་ རྒྱལ་ས་ནི་ འིན་ཀ་ནེ་ ཆུ་རེལ་, ཨི་ཏྲ་ལི་ ཡུལ་ལ་ ཆ་ཀན་ཞིག་ ཐོབ་པེ་ ང་ཞ་རྒུན་ ཏོ་རྦེ་ན་ རྐྱོན་།

7 ང་ཞ་ ཡོ་ཀ་ནེ་ ཆུ་རེལ་, ཞག་ མང་པོ་ ཀུ་ལེ་ལ་ མ་ནི་ སྲུལ་ མ་ཉེན་, ཡང་ ཀག་སྤོ་ ཉམ་པོ་ ང་ཞ་ ཀི་ནི་ཏུ་ རྒྱལ་ས་ ལེཔ་། ལུང་ཀྲག་ ཡོད་ཅེ་རྦེ་, ང་ཞ་ ཆེན་ ཡོ་ཀ་ནེ་ ལམ་མེ་ཀ་ ཆ་ མ་ཉེན་འབེ་, ང་ཞ་རྒུན་ སལ་མོ་ནེ་ ཆོག་ནི་ ལུང་སྤོ་ རྒག་ཅེ་ལ་ ཀེརེ་ཏ་ ཚོ་ལིང་ ཡོའེ་སྤ་ ཆོག་ལ་ པྃ་རྡེ་ སོང་འབེན་། 8 ཡང་ རྒྱམ་ཚོའེ་ ཐ་མ་ ཐ་མ་ནི་ མ་ ཀག་སྤོ་ ཉམ་པོ་ ང་ཞ་རྒུན་ འཇི་སྤ་ མེད་ ཟེར་ཧ་ནི་ ས་ཅ་ཀ་ ལེཔ་, ཀ་འབོ་ ལ་སེ་ཡ་ རྒྱལ་སེ་ ཉེ་མོ་ལ་ ཡོད་པེན་།

9 ཏུ་རུ་ ལེབ་ཅེ་ལ་ མ་ ཞག་ མང་པོ་ འགོར་, ཡང་ ནམ་ཟ་ སོག་པོ་ ལུའི་ཤེ་ ཏུའི་རྦོ་ ལེབ་པེ་ རྒྱམ་ཚོའེ་ན་ ཆུ་རེལ་ འགྲུལ་ཅེའོ་ མ་ འཇི་སྤ་ཅེན་ འགྱུར་རེ་ཡོད་པེན་། པ་འུ་ལུའི་ ཁོང་རྒུན་ལ་ ཁ་རྡ་ ས་ལེན་ མོལ་། 10 “སྤུན་རྒུན་ ངེ་ སམ་འབེ་ན་ ཨ་ཧོ་རྒུ་ནི་ པེ་རྦོ་ མ་ འཇི་ནང་ཅེན་ འགྱུར་ཤེ་འདུག་ སམ་མེ་རག་, ནོར་ རྡང་ ཆུ་རེལ་ལེ་ ཀོལ་ལ་ མ་ཚེད་ ཨ་ཧོ་རྒུ་ནི་ སྲོག་ལ་ རྐྱལ་ཅེ་ འཇི་སྤ་ འདུག་།” 11 འིན་ན་ མག་མི་རྒྱེ་ སྤོན་འབེ་, པ་འུ་ལུའི་ མོལ་ཧན་ནེ་སང་ ཆུ་རེལ་ སྲུལ་ཀ་ནེ་ སྤོན་འབོ་ རྡང་ ཆུ་རེལ་ལེ་ རྡག་པེ་ ཟེར་ཧན་འབོ་ལ་ མང་ངེ་ རྡེན་ཆེ་། 12 ཏེ་ ས་ཅའོ་ རྒུན་ལ་ འདེད་ཅེ་ཕི་ རྒྱ་ལེ་ མག་, མི་ མང་ཆེ་རྦེ་ ཕོ་ནིག་རྒེ་ རྒྱལ་ས་ ལེབ་ཅེ་ རེ་ཝ་ པོར་རྡེ་ ཆ་ཅེ་ལ་ ཐག་ཅེད་། ཕོ་ནིག་ ཀེརེ་ཏ་ ཚོ་ལིང་ངེ་ ཆུ་རེལ་ པོར་སེ་ མལ་ལ་, ཀའོ་ ལོ་ནུབ་ ཏང་ ཅང་ནུབ་ ཅིག་པོ་ནེ་ རྒྱམ་ཚོའེ་ ཆོག་ལ་ པེ་རྡེ་ ཡོད་ཅེ་རྦེ་ ལུང་སྤོ་ ཧོཔ་ ཡོང་ངེ་ མེད་པེན་།

རྒྱམ་ཚོའེ་ན་ ལུང་ཀྲག་ ཏང་ ཆུལ་རྦག་།

13 ལོ་ ཆོག་ནི་ ལུང་སྤོ་ འཇམ་པོ་ ཡོང་ཅེ་ འགོ་ཟུག་ ཆ་རྡང་, ཆུ་རེལ་ སྲུལ་ཧན་རྒུ་ནི་ ཕོ་ནིག་ལ་ ཁམ་ཟང་ ལེབ་ཅེ་ སོང་ སམ་འདེ་ ཁོང་རྒུ་ནི་ ཆུ་རེལ་རྦོ་ ཀྲོལ་རྡེ་ ཀེརེ་ཏ་ ཐ་མ་ནི་ སྲུལ་རྡེ་ ཁྱེར་། 14 འབིང་འདེ་ ཏུའི་ མང་པོ་ཞིག་ མ་ཆ་ ཀེརེ་ཏ་ ཆོག་ནི་ ལུང་ཀྲག་ ཀྲག་པོ་ ཡོྃ་, ཀ་འབོ་ལ་ ཅང་ཤར་རེ་ ལུང་སྤོ་ ཟེར་རེ་ཡོད་པེན་། 15 ལུང་ཀྲག་ ཀྲག་པེ་ ཅོའེ་རྡེ་ ཆུ་རེལ་རྦོ་ ཕོ་ནིག་རྒེ་ ཆོག་ལ་ ཁྱེར་ མ་ཉེན་འབེ་, ཁོང་རྒུ་ནི་ ཆུ་རེལ་རྦོ་ ལུྃ་སྤེ་ ཁྱེར་ས་ ཆོག་ལ་ པུད་ཏྃ་། 16 ཀཱའུ་འདཱ་ ཚོ་ལིང་ངེ་ ལུང་སྤོ་ མེད་ས་ ཆོག་ནི་ ང་ཞ་རྒུན་ ཆ་ཟ་ནི་, སྲོག་ རྐྱོབ་རྦེ་ ཆུ་འགྲུལ་རྦོ་ ང་ཞ་ མ་ ཀག་སྤོ་ ཉམ་པོ་ རྐྱོབ་ཉེན་འདེ་ ཆུ་རེལ་ཀ་ ཏག་། 17 ཏེ་ནི་ ཆུ་རེལ་རྦོ་ ཆག་ཅེ་ནི་ རྐྱོབ་ཅེ་ལ་ ཁོང་རྒུ་ནི་ ལྟག་ནི་ ཡོག་ཚུག་པ་ ཐག་པ་ ཉམ་པོ་ རྡམ་, ཡང་ ཆུ་རེལ་རྦོ་ སིར་ཏི་ ས་ཅེ་ ཁོར་ལ་ པེ་མེ་ན་ ཉེར་ཤེ་ འཇི་སྤ་ ཡོད་པེ་ ཁོང་རྒུ་ནི་ ཆུ་རེལ་ ཀུ་ལེ་ལ་ འགྲུལ་ཤུག་རྒེན་ནི་ ཡོ་ལ་འབོ་ ཆུའི་ན་ པབ་, ཡང་ ལུྃ་སྤེ་ ཆུ་རེལ་རྦོ་ སྲུལ་རྡེ་ ཁྱེར་།

18 ལུང་ཀྲག་ ཏང་ ཆུལ་རྦག་ སྲན་ཀྲེ་ ཆུ་རེལ་རྦོ་ལ་ ཕོག་པེ་, ལྟིང་མེ་ཞག་པོ་ ཆུ་རེལ་ ཡང་མོ་ ཅོ་ཅེ་ལ་ ཁོང་རྒུ་ནི་ ཏེ་ན་ ཡོ་ཀ་ནེ་ ཅ་ལག་རྒུན་ ཆུའི་ན་ ཕང་ཅེ་ འགོ་ཟུག་། 19 ཞག་ སུམ་པེ་ ཞག་ལ་ ཆུ་རེལ་ སྲུལ་ཧན་རྒུ་ནི་ ཆུ་རེལ་ སྲུལ་ཅེ་ ལག་ཆ་ ཚང་མ་ལ་ ཕྃ་། 20 རྒྱམ་ཚོའེ་ན་ ལུང་ཀྲག་ ཏང་ ཆུལ་རྦག་ མ་ཆེ་རྡེ་ལ་ ཞག་ མང་པོ་ ཉི་མ་ ཡང་ ཧར་མ་ མི་ཐོང་ཅེ་ཀ་ནི་, ང་ཞ་ ཐར་ཤེ་ རེ་ཝ་ མ་ལུའི་།

21 མི་རྒུ་ནི་ ཁར་ཞི་ མ་ཟ་ ཞག་ མང་འབེ་ སོང་རྦེ་, པ་འུ་ལུ་ ཁོང་རྒུ་ནི་ ཕྲོ་ ལྃ་རྡེ་ མོལ་, “ཁྲོ་པ་རྒུན་, ཀལ་ཏེ་ ཁྱི་ཞ་རྒུ་ནི་ ངེ་ ཟེར་ཧན་འབོ་ལ་ ཉེན་འདེ་ ཀེརེ་ཏ་ནི་ མ་ འབིང་འབེ་ནི་ ཡུ་ཙོག་སེ་ ནོད་རྐྱལ་ རྡང་ ཀོལ་ལ་ སོང་འདེ་ མེད་ཁྲོ་། 22 འིན་ན་ ངེ་ ཁྱི་ཞ་རྒུན་ལ་ ཏ་རུང་ངེ་ རེ་ཝ་ རྟེམ་པོ་ པོར་ཤེ་ལ་ ཟེ་འིན་, ཅེ་ཟེར་ནི་ ཁྱི་ཞི་ ཕྲོ་ནི་ སུ་ལ་ མི་ཤི་, ཆུ་རེལ་ ཅིག་པོ་ མེ་ཀན་ ཆེན་། 23 ངེ་ ཞབ་རྟོག་ ཞུ་ཀན་ ཀོན་འཇོག་ ཀ་རྦེ་ ང་ འིན་, ཁོང་ངེ་ ཕོ་ཉ་, འདང་ ཚེན་ལ་ ང་ས་ རྐྱོད་ཏེ་ 24 མོལ་, ‘པ་འུ་ལུ་ འཇིའི་ མ་འཇིའི་, ཁྱེ་རང་ རོམ་མེ་ རྒྱ་སྤེ་ འདུན་ལ་ ཤའ་ ཅད་རྡེ་ཕི་ ནེན་ཏེན་ ལེབ་རྦེན་, ཡང་ ཀོན་འཇོག་རྒེ་ ཁྱེ་རང་ ཉམ་པོ་ ཆུ་རེལ་ལེ་ན་ ཡོ་ཀན་ ཚང་མ་ལ་ རྐྱོབ་རྦེན་།’ 25 ཏེ་རྒ་རྦེ་ཕི་ ཁྲོ་པ་རྒུན་ རེ་ཝ་ ཐོན་པོ་ པོར་, ང་ རྡེན་ཆེ་རྡེ་ ཡོད་ ཀོན་འཇོག་རྒེ་ མོལ་ཧན་འབོ་ འདྲན་འདྲ་ ཀྲུབ་རྦེན་། 26 འིན་ན་ ཨ་ཧོའེ་ ཆུ་རེལ་ ཚོ་ལིང་ཞིག་རྒེ་ ཉེ་མོ་ལ་ ནེན་འདེ་ ཁད་རྡེན་།”

ཆུ་རེལ་ ཆག་།

27 ཚེན་ ཅུཔ་ཞི་ ཞག་ལ་ ང་ཞ་རྒུན་ ཨ་འདྲི་ཡཱ་ རྒྱམ་ཚོའེ་ འ་ངོ་ ཆོག་ལ་ ལུྃ་སྤེ་ རིལ་རྡེ་ ཁྱེར་ཟ་ནི་ ཚེན་ཕེད་ ཟམ་ཤིག་ལ་ ཆུ་རེལ་ སྲུལ་ཀན་རྒུ་ནི་ ས་ཀྱེཏ་རྡེ་ ཉེ་མོ་ལ་ ལེབ་ཏིག་རག་ ཟེ་རེན་ ཚོར་། 28 ཏེ་ནི་ ཁོང་རྒུ་ནི་ ཆུ་ ཙམ་ཤིག་ རྒོ་རོང་ འདུག་ ཏཔ་པེ་, མི་ཀྲེར་ སུམ་ཅུ་སོབ་རྡུན་ འབིང་, ཡང་ ཙི་རྦིག་ཤིག་ ལྟིང་ནི་ ཏཔ་པེ་, ཚེད་པོ་ མི་ཀྲར་ ཉི་ཤུ་སེབ་རྡུན་ འབིང་། 29 ཆུ་རེལ་རྦོ་ ཀྲག་ལ་ ཕོག་ཅེ་ འཇི་སྤེ་ན་ ཁོང་རྒུ་ནི་ ཆུ་རེལ་ རྒག་ཅེ་ཕི་ ཆུ་རེལ་ལེ་ འཇུག་ནེ་ ལྕིན་ཀྲེ་ ལྕག་ ཏག་ཀ་ནེ་ ཐག་པ་ ཞི་ ཆུའི་ན་ ཏྃ་, ཡང་ ནམ་ལྃ་ཤེ་ཕི་ མོ་ལམ་ ཞུའི་།

30 ཏེ་ནི་ ཆུ་རེལ་ སྲུལ་ཧན་རྒུ་ནི་ ཆུ་རེལ་ལེ་ འགོ་ནེ་ ལྕིན་ཀྲེ་ ལྕག་ ཏག་ཀ་ནེ་ ཐག་པ་ སྤབ་ཟུན་ ཏྃ་རྡེ་ ཤོར་ཤེ་ཕི་ ཆུ་འགྲུལ་རྦོ་ སྤབ་། 31 པ་འུ་ལུའི་ མག་མི་རྒྱེ་ སྤོན་འབོ་ རྡང་ མག་མི་རྒུན་ལ་ མོལ་, “ཀལ་ཏེ་ འི་ མི་རྒུན་ ཆུ་རེལ་ལེ་ན་ མ་འདེད་ནི་ ཁྱི་ཞི་ སྲོག་ མི་ཐར་།” 32 ཏེ་ནི་ མག་མི་རྒུ་ནི་ ཆུ་འགྲུལ་ ཅིང་འདེ་ ཡོ་ཀ་ནེ་ ཐག་པ་ ཅེད་ཏེ་ རྒྱམ་ཚོའེ་ན་ འདྲུལ་ཤུག་།

33 ནམ་ལྃ་རྡེ་ པ་འུ་ལུའི་ མི་རྒུན་ལ་ ཁར་ཞི་ ཟ་ཅུག་ཅེ་ལ་ ཙོན་འགྲུའི་ ཅོའེན་ མོལ་, “ཁྱི་ཞི་ ཞག་ ཅུཔ་ཞི་ནེ་ཕ་ལ་ འཇི་སྤ་ རྡང་ ཐེ་ཚོམ་མེ་ན་ ཁར་ཞི་ ལག་པ་ མ་སེ་། 34 འཇུ་འཇུ་ ངེ་ ཁྱི་ཞ་རྒུན་ལ་ སོན་པོ་ ལུའི་ཤེ་ཕི་ ཁར་ཞི་ ཟ་ཅེ་ལ་ ཞུ་ཝ་ པུ་ལེ་ཡོད་། ཁྱི་ཞ་ ཅིག་ལ་ འགོའེ་ སྤུ་ཉག་ ཅིག་ མི་རྐྱལ་།” 35 ཏོ་ མོལ་རྡེ་ ལྟིང་ནི་ ཁོང་ངེ་ ཏི་རྒིར་ཞིག་ ནེན་འདེ་ ཁོང་ ཚང་མེ་ འདུན་ལ་ ཀོན་འཇོག་ལ་ ཐུག་ཞེ་ཆེ་ པུལ་རྡེ་ ཅག་ཏེ་ ཟོའེ་། 36 ཏེ་ནི་ མི་ཚང་མ་ལ་ ཧམ་བ་ རྐྱེ་རྡེ་ ཁར་ཞི་ ཟོའེ་། 37 ཆུ་རེལ་ལེ་ན་ ཡོ་ཀ་ནེ་ ཀྲང་ཧ་ ཉིབ་རྒྱ་ རྡུན་ཅུ་འདོན་རུག་ ཡོད་པེན་། 38 ཁོང་རྒུན་ ཁར་ཞི་ ཟོའེ་རྡེ་ འགྲྃ་རྡེ་རྡང་, ཆུ་རེལ་ ཡང་མོ་ ཆ་ཅེ་ཕི་ ཁོང་རྒུ་ནི་ ཆུ་རེལ་ན་ ཡོ་ཀ་ནེ་ འགྲུ་ན་ ཚང་མ་ ཆུའི་ན་ ཕྃ་།

39 ནམ་ལྃ་རྡེ་རྡང་ རྒྱམ་ཚོའེ་ ཐ་མེ་ ས་ཀྱེཏ་ཞིག་ ཐོང་, འིན་ན་ ཀ་ ས་ཅ་ ཡིན་ རྒྱུའི་ མ་སོང་། ཉེན་ནི་ ཆུ་རེལ་ ཏེ་ ས་ཀྱེཏ་རྡེ་ ཉེ་མོ་ པེ་མེ་ན་ ཁད་ཅུག་ཅེ་ལ་ ཁོང་རྒུ་ནི་ ཐག་ཅེད་། 40 ཁོང་རྒུ་ནི་ ལྕིན་ཀྲེ་ ལྕག་ ཏག་ཀ་ནེ་ ཐག་པ་རྒུན་ ཅེད་ཏེ་ རྒྱམ་ཚོའེ་ན་ ཕྃ་, ཏེ་རྒ་ ཏུའི་ལ་ ཆུ་རེལ་ ཀྱོག་ཅེ་ ཤིང་ལ་ རྡམ་ཀ་ནེ་ ཐག་པ་རྒུན་ ཀྲོལ་, ཏེ་ནི་ ཆུ་རེལ་ལེ་ འདུན་ནི་ ཡོ་ལའོ་ ཏག་ཏེ་ ལུང་སྤོ་ལ་ ཆུ་རེལ་འབོ་ ཐ་མ་ ཆོག་ལ་ ཁྱེར་ཤུག་། 41 འིན་ན་ སམ་ཀ་ནེ་སང་ ངུལ་ལ་ ཆུ་རེལ་ལེ་ འདུན་འབོ་ པེ་མེ་ན་ ཁད་, ཡང་ རྒྱབ་པོ་ ཆུལ་རྦག་ ཤེད་ཅེན་ནེ་ ཅོའེ་རྡེ་ ཆག་ཅེ་ འགོ་ཟུག་།

42 ཙོན་པ་རྒུན་ ཆུ་ལ་ རྐྱལ་ཏྃ་རྡེ་ ཤོར་རྡེ་ མི་ཆ་ཅེ་ཕི་ མག་མི་རྒུ་ནི་ ཁོང་རྒུན་ སེད་ཅེ་ ཐབ་ལྡིང་ངེ་ཡོད་པེན་། 43 འིན་ན་ མག་མི་རྒྱེ་ སྤོན་འབོ་ལ་ པ་འུ་ལུ་ རྐྱོབ་ཅེ་ འདོད་པ་ ཡོད་པེ་, ཁོང་རྒུན་ལ་ ཏེ་ ཐབ་ལྡིང་ ནང་ཞིན་ ཅོ་ མ་ཅུག་། ཁོའེ་ ཀཱ་ ཏྃ་, “འགོ་མ་ རྐྱལ་ཉེན་ཀན་རྒུན་ ས་ཀྱེཏ་ ཆོག་ལ་ ཆ་ཅེ་ལ་ ཆུའི་ན་ ཆོང་ 44 ཡང་ ལུའི་ཧན་རྒུ་ནི་ སྤང་ལེབ་ ཏང་ ཆུ་རེལ་ ཆག་ཀ་ནེ་ ཤིང་རྒུ་ནི་ འགྱུད་རྡེ་ ཕིང་།” ཏུ་ཟུག་ ཅོ་ཅེ་ཀ་ནི་ ཚང་མ་ ས་ཧམ་པེ་ཀ་ ཁམ་ཟང་ ཉམ་པོ་ ཅུང་ཉེན་།