ཨ་འགཱ་རི་པེ་ འདུན་ལ་ པ་འུ་ལུའི་ ཤའ་།
26
ཏེ་ནི་ རྒྱ་སྤོ་ ཨ་འགཱ་རི་པེ་ པ་འུ་ལུ་ལ་ ཟེར་, “ངེ་ ཁྱེ་རང་ལ་ ཁྱེ་རང་ རྐྱོན་མེད་ འིན་ཀ་ནེ་ ཧོར་ ཤེད་ཅེ་ ཧབ་ ཏང་ངེ་ཡོད་།”པ་འུ་ལུའི་ ལག་པ་ ཉམ་པོ་ ཐུག་ཞེ་ཆེ་ ལྟའ་ ཅོའེན་ མོལ་, 2 “རྒྱ་སྤོ་ ཨ་འགཱ་རི་པ་, ཏི་རིང་ ཉེ་རང་ངེ་ ཧུ་འདུན་ལ་ ཡ་ཧུ་འདཱ་པ་རྒུ་ནི་ ཀལ་ཧ་ནེ་ ཉེད་ཀལ་ ཚང་མེ་ རྒྱཔ་འགལ་ལ་ ང་རང་ རྐྱོན་མེད་ འིན་ཀན་འབོ་ ཤེད་ཉེན་འབེ་, ང་ མ་ སོ་རྡེ་ཅེན་ ཚོར་རེ་རག་། 3 ཅེ་ཟེར་ནི་ ཉེ་རང་ལ་ ཡ་ཧུ་འདཱ་པ་རྒུ་ནི་ ལམ་ལུག་སྲོལ་ རྡང་ མི་ཐུན་འབེ་ སྤེ་ར་ ཚང་མེ་ ཧོར་ལ་ ཐུག་རྒྱུའི་ ནོག་། འཇུ་འཇུ་ ཉེ་རང་ངེ་ ངེ་ ཟེར་ཤེ་ཅེན་རྒུན་ལ་ ཟོད་པ་ ཉམ་པོ་ ཉེན་ནེ་ ཛེད་།”
4 “ང་རང་ངེ་ ཡུལ་ མ་ཚེད་ ཡེ་རུ་ཤ་ལེམ་མེ་ན་, ངེ་ ཆུང་ཏུའི་ནི་ཕ་ལ་ ང་རང་ངེ་ མི་ཙེ་ ཀ་ཟུག་ ཚུལ་ལ་ པུད་ཀན་འབོ་ ཡ་ཧུ་འདཱ་པ་ ཚང་མ་ རྒྱ་ལེ་ ཅོའེ་རྡེ་ རྒྱུའི་ཡོད་། 5 ཁོང་རྒུ་ནི་ ང་ ཏུའི་ཡུན་རིང་ནི་ པར་ལ་ ཤེ་ཤེ་རྦེ་, ཀལ་ཏེ་ ཐེད་རྡེ་ཡོད་ནི་, ཁོང་རྒུ་ནི་ ངེ་ ཨ་ཧོའེ་ ཆོའེ་ ཚང་མེ་སང་ སྲན་ཀྲེ་ ཁྲིམ་ སྲུང་ཀ་ནེ་ རྡེ་, པ་རུ་ཤི་པེ་ མི་ཙེ་ པུད་ཀ་ནེ་ སྤང་པོ་ ཏང་ཉེན་ཅེ་ ནོག་། 6 ཀོན་འཇོག་རྒེ་ ཨ་ཧོ་རྒུ་ནི་ ཕ་མེ་པོ་རྒུན་ལ་ ཛེད་ཀ་ནེ་ ཞལ་ཆེཏ་རྡེ་ན་ ང་ རེ་ཝ་ ཡོད་ཅེ་རྦེ་, ཏི་རིང་ ང་ འེ་ཀ་ ཤའ་ ཅོའོ་ ཁྱོྃ་རྡེ་ ནོག་། 7 ཨ་ཧོའེ་ མི་རིག་ ཅུག་ཉི་རྦེ་, ཏེ་རྒ་ ཞལ་ཆེཏ་པོ་ འདྲན་འདྲ་ ཀྲུཔ་ཅེ་ རེ་ཝ་ པོར་རྡེ་ ཚེན་ཉིན་, ཉིང་ ཏྃ་རྡེ་ ཀོན་འཇོག་ལ་ ཞབ་རྟོག་ ཞུའིན་ ནོག་། ཀྱེ་ རྒྱ་སྤོ་, འེ་རྒ་ རེ་ཝ་ པོར་ཤེ་ཕི་ ང་ ཡ་ཧུ་འདཱ་པ་རྒུ་ནི་ ཉེད་ཀལ་ ཀལ་རྡེ་ ནོག་། 8 ཀོན་འཇོག་རྒེ་ ཤི་ཀན་རྒུན་ སོན་པོ་ ལང་ངེ་ ཛེད་ཉེན་ཅེ་རྦེ་ཀ་ ཁྱི་ཞ་རྒུན་ ཡམ་ཚེན་ ཅེ་ ཆ་རག་?”
9 “ངུལ་ལ་ ངེ་ལ་ ཀོན་འཇོག་ ཐུག་ཐེད་རྡེ་ནོག་ སམ་འདེ་ ན་ཙ་རེད་པ་ ཡི་ཤུ་ ཏེཏ་པ་ ཅོ་ཀན་རྒུ་ནི་ རྒྱཔ་འགལ་ལ་ ཅི་ ཅོ་ཉེན་ནང་ ཅོའེ་རྦེན་། 10 ཡེ་རུ་ཤ་ལེམ་མེ་ན་ ངེ་ ཏེ་རྒ་ ཙོག་སེ་ ཅོའེ་རྦེན་, ངེ་ ལ་མ་ འུ་རྐྱོང་རྒུ་ནི་ཀ་ནི་ ཝང་ཆ་ ནེན་འདེ་ ཏེཏ་པ་ཅེན་ མང་པོ་ ཙོན་ལ་ ཧར་རྦེན་, ཡང་ སྲོག་རྒེ་ ཆེད་པ་ ཕོག་ཀན་རྒུ་ནི་ ཐག་ཅེད་པེ་ནི་ ངེ་ལ་ ཆོག་རྐྱོར་ ཅོའེ་རྦེན་། 11 ང་ ཡ་ཧུ་འདཱ་པེ་ འདུ་ཀང་ རེ་རེ་ན་ སོང་འདེ་ ཁོང་རྒུན་ལ་ ཆེད་པ་ ཅེད་ཏེ་ ཏེཏ་ལོག་ ཅོ་ཅུག་ཅེ་ ཙོན་འགྲུའི་ ཅོ་ཡོད་པེན་། ཁོང་རྒུ་ནི་ རྒྱཔ་འགལ་ལ་ སྲོ་ ཧོཔ་ ཏང་ སོག་པོ་ ཡོད་ཅེ་རྦེ་, ང་ ཡུལ་ ཐག་རིང་རྒུན་ལ་ སོང་འདེ་ ཁོང་རྒུན་ལ་ ནག་ སྲན་ཀྲེ་ ལྟན་འབེན་།”
12 “ལན་ཅིག་ ལ་མ་ འུ་རྐྱོང་རྒུ་ནི་ཀ་ནི་ ཝང་ཆ་ ཁུར་རྡེ་ ང་ ཏེ་རྒ་ ལེ་རྦེ་ཕི་ འདཱ་མེ་ཁེ་ ཆོག་ལ་ ཆ་ཡོད་པེན་། 13 ལམ་ལ་ ཡོད་ཟ་ནི་ ཉི་མེ་ཀུང་ཞིག་ལ་, ཀྱེ་ རྒྱ་སྤོ་, ང་ ནམ་ཀ་ནི་ ཉི་མེ་ འོད་རྡེ་སང་ མང་ངེ་ འདང་ཤེན་ འོད་ཞིག་ པབ་རྦེན་ ཐོང་, ཀའོ་ ང་ རྡང་ ངེ་ ཁྲོ་པ་རྒུན་ལ་ ཁོར་རྡེ་ འདུག་། 14 ང་ཞ་ ཚང་མ་ ཐང་ཀེ་ཀ་ འགྱེལ་, ཡང་ ངེ་ སུང་ཧད་ཅིག་ ཚོར་, ཀ་རྦེ་ ང་ ཨིབ་རི་པེ་ ཧད་རྡེ་ན་ མོལ་ལེ་རག་, ‘ས་འུལ་, ས་འུལ་, ཁྱེ་རང་ངེ་ ང་ ཅེ་ ནག་པར་རྡོ་ ལྟན་ནེ་ཡོད་? ངེ་ འདོད་པེ་ རྒྱཔ་འགལ་ལ་ ནོལ་ཤེའོ་ ཁྱེ་རང་ངེ་ ཁྱེ་རང་ལ་ ནོད་རྐྱལ་རྡེ་ ནོག་།’”
15 “ཏེ་ནི་ ངེ་, ‘ཙོབོ་ ཉེ་རང་ སུ་ འིན་’ ཞུའི་རྦེན་།”
“ཙོབོ་རྡེ་ ལེན་སལ་, ‘ང་ ཁྱེ་རང་ངེ་ ནག་པར་རྡོ་ ལྟན་ཀན་, ཡི་ཤུ་ འིན་། 16 ཏ་ རང་ངེ་ ཧང་པེ་ཀ་ ལོྃ་། ཁྱེ་རང་ ང་ ཞབ་རྟོག་ ཞུ་ཅེ་ རྡང་ སྤང་པོ་ ཏང་ཅེ་ལ་ ཧོ་ཅེ་ཕི་ ང་ ཁྱེ་རང་ལ་ ངོན་འདེ་ འིན་། ཁྱེ་རང་ངེ་ ཏག་ས་ ཐོང་ཀན་ ཡང་ ཡོང་ཅེ་ ཏུའི་ན་ ངེ་ ཁྱེ་རང་ལ་ ལྟན་ཅེ་ཅེན་རྒུན་ འཇིག་རྟེན་པ་རྒུན་ ཤོད་། 17-18 ངེ་ ཁྱེ་རང་ ཁྱེ་རང་ངེ་ མི་རྒུན་ འདང་ ཡ་ཧུ་འདཱ་པ་ མན་ཀན་རྒུ་ནི་ཀ་ནི་ ཏུའི་རྒྱུན་ རྐྱོབ་རྦེན་། ཁོང་རྒུན་ མུན་ཀྲག་ནི་ འོད་རྡེ་ན་ ཡོང་ཅེ་ རྡང་ རྡུད་རྡེ་ ཝང་ནི་ འབིང་འདེ་ ཀོན་འཇོག་ ཆོག་ལ་ ཁྲིད་ཅེ་ཕི་ ངེ་ ཁྱེ་རང་ ཁོང་རྒུ་ནི་ མིག་ པེ་ཅེ་ལ་ ཁོང་རྒུ་ནི་ ཕྲོ་ ཀ་ལེ་ཡོད་། ཏེ་ནི་ ཁོང་རྒུན་ལ་ རྡིག་པ་རྒུ་ནི་ ཤག་སྤ་ ཡང་ ངེ་ན་ ཏེཏ་པེ་ ཅོའེ་རྡེ་ སང་མ་ འགྱུར་ཧན་རྒུ་ནི་ ཕྲོ་ནི་ ཐོབ་རྦེན་།’”
19 “ཏེ་རྒ་རྦེ་ཕི་ལ་, ཀྱེ་ རྒྱ་སྤོ་ ཨ་འགཱ་རི་པ་, རྡེ་བ་ཅན་ནེ་ སོང་ཀ་ནེ་ ཞལ་ཟིག་རྒེ་ན་ མོལ་ཧན་རྒུན་ ངེ་ ཁ་ཉེན་པེན་། 20 འགོ་མ་ ངེ་ འདཱ་མེ་ཁེ་, ཏེ་ནི་ ཡེ་རུ་ཤ་ལེམ་ འདང་ ཡ་ཧུ་འདཱེ་ སོན་ཏེ་ན་ ཡོ་ཀན་རྒུན་ལ་, ཏེ་ལྟིང་ནི་ ཡ་ཧུ་འདཱ་པ་ མན་ཀན་རྒུན་ལ་, ཁོ་རང་ངེ་ རྡིག་པ་ ཕྃ་རྡེ་ སེམ་འགྱུར་རྡེ་ ཀོན་འཇོག་ ཆོག་ལ་ སེམ་འགྱུར་རྒོའེ་ ཟེར་རྡེ་ ཆོའེ་ཤེད་པེན་, ཡང་ སེམ་འགྱུར་ཧན་འབོ་ ལག་ལེན་ རྒྱུད་ཏེ་ ལྟན་ཅེ་ལ་ ཟེར་རྦེན་། 21 ཏེ་ རྒྱུ་ཚན་འབེ་ཕི་ ཡ་ཧུ་འདཱ་པ་རྒུ་ནི་ ང་ ཀོན་འཇོག་རྒེ་ ཁང་པེ་ན་ ཟུམ་འདེ་ སེད་ཅེ་ ཙོན་འགྲུའི་ ཅོའེ་། 22 འིན་ན་ ཀོན་འཇོག་རྒེ་ ང་ ཏི་རིང་ཚུག་པ་ རྐྱོབ་རྦེ་ ཛེད་ཅེ་ཀ་ནི་, འེ་ཀ་ ལྃ་རྡེ་ ཉམ་ཤུང་ འདང་ ཁག་ཅེན་ ཚང་མེ་ འདུན་ལ་ ངེ་ སྤང་པོ་ ཏང་ངེ་ཡོད་། ངེ་ མོ་ཤེ་ རྡང་ ཞེན་ ལུང་རྟོན་པ་རྒུ་ནི་ ཆ་ཅེ་ཅེན་རྒུན་ མོལ་ཧན་འབེ་སང་ ཐེ་རྦ་ཞིག་ ཅང་ མ་ཟེར་རྦེན་, 23 ཏོ་ནི་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ རྡུ་ངལ་ ཐོང་ཅེ་ ཡང་ ཤི་ཀན་རྒུ་ནི་ ཕྲོ་ནི་ འགོ་མ་རང་ སོན་པོ་ ཞྃ་ཧན་འབོ་ ནོག་། ཏེ་རྒ་ ཁྲིན་འབོ་ ཡ་ཧུ་འདཱ་པ་ རྡང་ ཡ་ཧུ་འདཱ་པ་ མན་ཀན་རྒུན་ལ་ ཐར་པ་ ཐོབ་ཅེ་ འོད་པོ་ འིན་།”
24 ཧུན་མེད་ལ་ ཕེ་ཏུའི་ ཀུ་ཅུ་ ཏྃ་རྡེ་ ཟེར་, “པ་འུ་ལུ་ ཁྱེ་རང་ ཆལ་ཆོལ་ སོང་འདེ་ ནོག་, ལོབ་ཞོང་ མང་པོ་ ཅོ་ཅེ་རྦེ་ ཁྱེ་རང་ ཉོ་ཅུག་ཏེ་ ནོག་།”
25 པ་འུ་ལུའི་ ལན་ལ་, “ཕེ་ཏུའི་ ཧུན་འདུན་, ང་ ཉོའེ་རྡེ་ མན་། ངེ་ ཟེར་ཧན་རྒུན་ ཀྲང་པོ་ འིན་ ཆལ་ཆོལ་ མན་། 26 རྒྱ་སྤོ་ལ་ ཡུ་རྒུ་ནི་ ཧོར་ལ་ ཐུག་རྒྱུའི་ ཡོད་པེ་ ངེ་ ཁོང་ལ་ ཅི་ཚང་མ་ ཤེད་ནྃ་ འགྲིག་ཏེ་ ནོག་། ཏེ་ སོང་ཀན་ ཚང་མེ་ ཧོར་ལ་ ཁོང་ངེ་ རྒྱུའི་ཡོད་ཅེ་འབོ་ ང་ ནེན་ཏེན་ རག་ ཅེ་ཟེར་ནི་ ཏོ་རྒུན་ སང་སྤེར་ན་ མ་ཅོ་ལ་ ནོག་། 27 ཨ་འགཱ་རི་པ་ རྒྱ་སྤོ་ ཉེ་རང་ངེ་ ལུང་རྟོན་པ་རྒུ་ནི་ མོལ་ཧན་རྒུན་ལ་ རྡེན་ཆེ་ཤེ་ཡོད་རྡེ་? ང་ རྒྱུའི་ཡོད་ ཉེ་རང་ང་ འདེན་ཆེ་རྡེ་ནོག་།”
28 རྒྱ་སྤོ་ ཨ་འགཱ་རི་པེ་ པ་འུ་ལུ་ ཟེར་, “ཅི་ འི་ཟུག་ འགྱོ་སྤ་ ང་ མ་ཤི་ཀ་པ་ ཅོ་ཅེ་ཕི་ ལྟ་ཡོད་རྡེ་?”
29 པ་འུ་ལུའི་ མོལ་, “ཏུའི་ ཆུང་ཙེ་ འིན་འགྲོ་ ཡང་ རིང་མོ་, ངེ་ ཀོན་འཇོག་ལ་ མོ་ལམ་ ཞུ་ཡོད་, ཉེ་རང་ ཅིག་པོ་ མན་ འེ་ཀ་ ཛོམ་འདེ་ ངེ་ སྤེ་ར་ ཉེན་ཀན་ ཚང་མ་ལ་, འི་ ལག་པ་ རྡམ་ཀ་ནེ་ ལྕག་འབོ་ མ་ཐེ་ལ་ ང་ ཙོག་སེ་ འགྱུར་ཧེ་།”
30 ཏེ་ནི་ རྒྱ་སྤོ་ ལྃ་ ཡང་ ཁོ་ ཉམ་པོ་ ཀ་ལོན་, འབེར་ནི་ཀཱ་ རྡང་ ཞེན་མ་ ཚང་མ་ ལྃ་ཏེ་ སོང་། 31 ཆ་རྒྱ་ལ་ ཁོང་རྒུ་ནི་ ཅིག་ ཏང་ ཅིག་ལ་ ཟེར་, “ཙོན་ལ་ པོར་ཤེ་ ཡང་ སྲོག་རྒེ་ ཆེད་པ་ ཏང་རྒོ་ཤེ་ ལེ་ཧ་ཤིག་ འི་ མི་རྦེ་ ཅང་ མ་ཅོའེ་རྡོག་།”
32 རྒྱ་སྤོ་ ཨ་འགཱ་རི་པེ་ ཕེ་ཏུའི་ལ་ ཟེར་, “ཀལ་ཏེ་ འི་ མི་རྦེ་ རོམ་མེ་ རྒྱ་སྤོ་ལ་ ཁོའེ་ ཤའ་རྦོ་ལ་ ཁྲིམ་ཅེད་ ཅོ་ཅེ་ལ་ ཞུ་ཝ་ མ་པུལ་རྦེ་ནི་, ཁོ་ པུད་ནྃ་ འགྲིག་ཅེ་ འདུག་།”