ཆག་ལེ་རྒུན་ 25

པ་འུ་ལུ་ ཕེ་ཏུའི་ས་ ཁྱོྃ་།

ཀཱེ་སར་རི་ཡེ་ རྒྱལ་ས་ ཀ་ལོན་ ཕེ་ཏུའི་ ལེབ་ཏེ་ ཞག་ སུམ་མེ་ ལྟིང་ནི་ ཁོ་ ཡེ་རུ་ཤ་ལེམ་ལ་ སོང་། 2 ཏུ་རུ་ ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུན་ ཁོ་ལ་ ཐུག་རྒེ་ ཡོྃ་རྡེ་, པ་འུ་ལུའི་ རྒྱཔ་འགལ་ལ་ རྐྱོན་རྒུན་ ཀལ་། 3 པ་འུ་ལུ་ལ་ ཤའ་རྦོ་ ཡེ་རུ་ཤ་ལེམ་ལ་ ཅོ་ཅེ་ཕི་, ཁོང་ ཏུ་རུ་ ཀལ་ཅེ་ལ་ ཀཱ་ ཏྃ་རྡེ་ རྒྱབ་རྐྱོར་ ཅོ་ཅེ་ལ་ ཁོང་རྒུ་ནི་ ཕེ་ཏུའི་ལ་ ཞུ་ཝ་ པུལ་ ཁོང་རྒུན་ སྤུང་འགོལ་ ཅོའེ་རྡེ་ པ་འུ་ལུ་ ལམ་རྦར་ལ་ སེད་ཅེ་ ཅུའི་ངན་ ལྡིང་། 4 འིན་ན་ ཕེ་ཏུའི་ ལེན་ཏྃ་, “པ་འུ་ལུ་ ཀཱེ་སར་རི་ཡེ་ན་ པོར་རྡེ་ ཡོད་, ང་ ཏུ་རུ་ འགྱོ་སྤ་ ལོག་ཏེ་ ཆ་ཅེ་ འིན་། 5 ཁྱི་ཞི་ འུ་རྐྱོང་ ཁ་ཅིག་ ང་ ཉམ་པོ་ ལམ་ཅུག་, ཀལ་ཏེ་ ཁོའེ་ ནོར་ཁྲུལ་ ཅོའེ་རྡེ་ ཡོད་ནི་ ཏེ་རྒ་རུ་ ཁོའེ་ རྒྱཔ་འགལ་ལ་ ཉེད་ཀལ་ ཅོའེ་།”

6 ཡེ་རུ་ཤ་ལེམ་མེ་ན་ ཁོང་རྒུན་ ཉམ་པོ་ ཞག་ རྒྱེད་ ཡང་ ཅུ་ འདེད་ཏེ་ ལྟིང་ནི་, ཕེ་ཏུའི་ ཀཱེ་སར་རི་ཡ་ ལོག་ཏེ་ སོང་། ལེབ་ཏེ་ ལྟིང་མེ་ཞག་པོ་ ཁྲིམ་ཁུང་ངེ་ན་ ཁྲི་ཀ་ འདེད་ཏེ་ ཁོའེ་ པ་འུ་ལུ་ ཁྱོང་ཅེ་ལ་ ཀཱ་ ཏྃ་། 7 པ་འུ་ལུ་ ཁྱོང་ངེ་རྡང་, ཡེ་རུ་ཤ་ལེམ་ནི་ ཡོང་ཀ་ནེ་ ཡ་ཧུ་འདཱ་པ་རྒུན་ ཁོང་ལ་ ཀྱིར་ ཧོར་རྡེ་ འདེད་ཏེ་ ཉེད་ཀལ་ མ་སྲན་ཀྲེ་ ཀལ་, འིན་ན་ ཅིག་ལ་ རྡེན་འབའ་ འིན་ཀན་འབོ་ ནེན་ཏེན་ ཅོ་ མ་ཉེན་། 8 ཏེ་ནི་ པ་འུ་ལུའི་ ཁོ་རང་ རྐྱོན་མེད་ འིན་ཀན་ ལྟན་འདེ་ ཞུའི་, “ངེ་ ཡ་ཧུ་འདཱ་པེ་ ཀཱ་ཁྲིམ་ རྡང་ ཀོན་འཇོག་རྒེ་ ཁང་པ་ ཡང་ རོམ་མེ་ རྒྱ་སྤེ་ རྒྱཔ་འགལ་ལ་ མན་ཀན་ ཅང་ མ་ཅོའེ་རྦེན་།”

9 འིན་ན་ ཕེ་ཏུའི་ ཡ་ཧུ་འདཱ་པ་རྒུན་ལ་ ཀ་ཀྲིན་ ལྟན་ཅེ་ འདོད་པ་ ཅོའེ་རྡེ་ ཁོའེ་ པ་འུ་ལུ་ལ་ ཟེར་, “ཁྱེ་རང་ ཡེ་རུ་ཤ་ལེམ་མེ་ན་ ངེ་ འདུན་ལ་ འི་ ཤའ་རྦོ་ལ་ ཁྲིམ་ཅེད་ཅེ་ལ་ ཆ་ ཐེད་རྡེ་ རག་རྒེ་?”

10 འིན་ན་ པ་འུ་ལུའི་ མོལ་, “ང་ རོམ་མེ་ རྒྱ་སྤེ་ ཁག་ཁུར་པེ་ ཁྲིམ་ཁུང་ལ་ འིན་, ངེ་ ཤའ་རྡེ་ ཁྲིམ་ཅེད་ འེ་རྒ་རུ་ ཆ་རྒོའེ་། ངེ་ ཡ་ཧུ་འདཱ་པ་རྒུ་ནི་ རྒྱཔ་འགལ་ལ་ རྐྱོན་ ཅང་ མ་ཅོའེ་ཀན་འབོ་ ཉེ་རང་ལ་ རྒྱ་ལེ་ ཅོའེ་རྡེ་ རྒྱུའི་ནོག་། 11 ཀལ་ཏེ་ ང་ འགཱལ་རྡེ་ ཤི་ཅེ་ ཆེད་པ་ ཕོག་ནྃ་, ང་ ཤི་ཅེ་ཕི་ འཇིའི་རྡེ་ མེ་རག་། འིན་ན་ ཀལ་ཏེ་ འི་ ཡ་ཧུ་འདཱ་པ་རྒུ་ནི་ ངེ་ཀ་ ཉེད་ཀལ་ ཀལ་ཧན་རྒུན་ རྡེན་འབའ་ མ་འབིང་ནི་ ཏེ་ནི་ ང་ འི་ མི་རྒུ་ནི་ ལག་ལ་ ལྟེད་ཅེ་ ཝང་ སུ་ཞི་ལ་ མེད་། ངེ་ རོམ་མེ་ རྒྱ་སྤོ་ལ་ འི་ ཤའ་རྡེ་ ཁྲིམ་ཅེད་ ཛེད་ཅེ་ལ་ ཞུ་ཝ་ པུ་ལེ་ཡོད་།” 12 ཕེ་ཏུའི་ ཁོ་རང་ངེ་ ཁེ་སྤ་ ཁད་རྡ་ ཏང་ཀན་རྒུན་ ཉམ་པོ་ ཀྲཔ་ ཅོའེ་རྡེ་ ཟེར་, “ཁྱེ་རང་ངེ་ རོམ་མེ་ རྒྱ་སྤོ་ལ་ ཞུ་ཝ་ པུལ་རྦེ་, རོམ་མེ་ རྒྱ་སྤེ་ཀ་ ཀལ་ལེན་།”

ཕེ་ཏུའི་ རྡང་ རྒྱ་སྤོ་ ཨ་འགཱ་རི་པ་།

13 ཞག་ ཁ་ཅིག་རྒེ་ ལྟིང་ནི་ རྒྱ་སྤོ་ ཨ་འགཱ་རི་པ་ རྡང་ ཁོའེ་ ནོ་མོ་ འབེར་ནི་ཀཱ་ ཀཱེ་སར་རི་ཡ་ ཕེ་ཏུའི་ལ་ རྒ་སུའི་ ཅོའེ་རྡེ་ ཏེཏ་ཀུའི་ ལྟན་ནེ་ལ་ ཡོྃ་། 14 ཁོང་རྒུན་ ཞག་ ཁ་ཅིག་ ཏུ་རུ་ འདེད་པེ་, ཕེ་ཏུའི་ པ་འུ་ལུའི་ ཤའ་རྦེ་ ཧོར་ལ་ རྒྱ་སྤོ་ལ་ ཤེད་, “འི་རུ་ ཕེ་ལིག་རྒེ་ ཙོན་ལ་ ཧར་ཧན་ནེ་ མི་ཞིག་ འདུག་། 15 ང་ ཡེ་རུ་ཤ་ལེམ་ལ་ ཡོད་ཟ་ནི་, ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུ་ནི་ འི་ མི་རྦེ་ རྒྱཔ་འགལ་ལ་ ཉེད་ཀལ་རྡེ་ ཁོ་ ཤི་ཅེ་ ཆེད་པ་ ཏང་ཅེ་ལ་ ང་ ཟེ་རེ་རག་། 16 ངེ་ ཁོང་རྒུན་ལ་ རོམ་པེ་ ཁྲིམ་ ནང་ཞིན་, ནམ་ཚུག་པ་ མི་ཞིག་ལ་ ཁོ་ ཉེད་ཀལ་ཧན་རྒུ་ནི་ འདུན་ལ་ ཁོ་རང་ རྐྱོབ་ཅེ་ལ་ ཧབ་ མ་ཏྃ་ལ་ སུ་ཞིག་རྒེ་ ལག་ལ་ ཆེད་པ་ ཅེད་ཅེ་ལ་ ལྟེད་ཆོག་རྒེ་ མག་ ཟེར་འབེན་།”

17 “ཁོང་རྒུན་ འི་རུ་ ལེབ་རྦེ་རྡང་, ངེ་ འགོར་ མ་ཅུག་ལ་ ཐོ་རེ་ཚུག་པོ་ ཁོ་ ཁྲིམ་ཅེད་རྡེ་ལ་ ཁྱོང་ཅེ་ ཀཱ་ ཏྃ་རྦེན་། 18 ཏེ་ ཁོང་རྒུ་ནི་ ཉེད་ཀལ་ཧན་པ་ ཁོང་ ཉེད་ཀལ་ལེ་རྒྱ་ལ་, ངེ་ སམ་ཀན་འབེ་ན་ ཉེད་ཀལ་ ཅིག་ལ་ མ་ཅོའེ་རྦེན་། 19 ཁོང་རྒུ་ནི་ ཁྲུག་པ་རྦོ་ ཁོ་རང་རྒུ་ནི་ ཆོའེ་ ལབ་ཞ་ ཁ་ཅིག་རྒེ་ཀ་ ཁ་མི་ཆམ་ཤེ་ རྡང་ ཤི་ཀ་ནེ་ མི་ ཡི་ཤུ་ ཟེར་ཧན་འབེ་ ཧོར་ལ་ ནོག་, ཀའོ་ པ་འུ་ལུའི་ སོན་པོ་ འིན་ ཟེར་འདུག་། 20 ཡུ་ཙོག་སེ་ ནེ་ལུག་རྒེ་ སར་ཤོད་ ཏང་ཅེ་ ང་ ཧ་མ་ཀོ་རྦེ་, ངེ་ ཁོ་ ཁྱེ་རང་ ཡེ་རུ་ཤ་ལེམ་ལ་ ཏེ་ ཤའ་རྦོ་ལ་ ཁྲིམ་ཅེད་ཅུག་ཅེ་ལ་ ཆ་ལ་ ཐེད་རྡེ་ རག་རྒེ་ ཟེར་རྡེ་ འདྲི་རྦེན་། 21 འིན་ན་ པ་འུ་ལུའི་ རོམ་མེ་ རྒྱ་སྤོ་ལ་ ཏེ་ ཤའ་རྦོ་ ཐག་ཅེད་ཅུག་ཅེ་ཕི་ ཞུ་ཝ་ པུལ་, ཏོ་རྦེ་ཕི་ ངེ་ ཁོ་ རོམ་མེ་ རྒྱ་སྤེ་ཀ་ ཀལ་ཤེ་ ཀྲལ་འགྲིག་ ཆ་ཆ་ཚུག་པ་ འི་རུ་ པོར་ཤེ་ལ་ ཀཱ་ ཏྃ་རྦེན་།”

22 ཏེ་ནི་ རྒྱ་སྤོ་ ཨ་འགཱ་རི་པེ་ ཕེ་ཏུའི་ལ་ ཟེར་, “ང་ ཏེ་ སྤེ་ར་རྒུན་ ཏེ་རྒ་ མི་རྦེ་ ཁ་ནི་ ཚོར་ཉིན་ རག་།”

ཕེ་ཏུའི་ ཟེར་, “ཉེ་རང་ངེ་ ཁོའེ་ ཧོར་ལ་ ཐོ་རེ་ ཉེ་ནེན་།”

23 ལྟིང་མེ་ཞག་པོ་ རྒྱ་སྤོ་ ཨ་འགཱ་རི་པ་ རྡང་ འབེར་ནི་ཀཱ་ མ་ ལྟཔ་ ཆོན་མོ་ ཉམ་པོ་ ཏེ་ ཀྲོང་ཁྱེར་རེ་ མི་ སི་ཝ་ཅེན་ འདང་ མག་མི་ སྤོན་འབོ་ ཆོན་མོ་རྒུན་ ཁྲིད་ཏེ་ ཙོན་ཁང་ངེ་ ནང་ལ་ ཡོྃ་། ཕེ་ཏུའི་ ཀཱ་ ཏྃ་རྦེ་ པ་འུ་ལུ་ ཙོན་ཁང་ངེ་ ནང་ལ་ ཁྱོང་། 24 ཕེ་ཏུའི་ ཟེར་, “རྒྱ་སྤོ་ ཨ་འགཱ་རི་པ་ རྡང་ འེ་ཀ་ ང་ཞ་ ཉམ་པོ་ ཡོ་ཀ་ནེ་ མི་མང་, འི་ མི་རྦོ་ལ་ ལྟོའེ་, ཁོའེ་ རྒྱཔ་འགལ་ལ་ ཡ་ཧུ་འདཱ་པ་ ཚང་མེ་ ཡེ་རུ་ཤ་ལེམ་མེ་ན་ མ་ཚེད་ འི་རུ་ལ་ ཀུ་ཅུ་ ཏང་ངེན་ ང་ ཟེར་, ‘འི་ མི་རྦོ་ལ་ སེད་ཅེ་ ཆེད་པ་ ཕོག་ཅེ་ འོའེ་སྤ་ ནོག་།’ 25 འིན་ན་ ང་ རྒྱུའི་སོང་, སེད་རྒོ་ཤེ་ ཆེད་པ་ ཕོག་ཅེ་ ལེ་ཧ་ ཁོའེ་ ཅང་ མ་ཅོའེ་རྡོག་། ཁོའེ་ རོམ་མེ་ རྒྱ་སྤོ་ལ་ ཁོའེ་ ཤའ་རྦོ་ལ་ ཐག་ཅེད་ཅེ་ ཞུ་ཝ་ པུལ་རྦེ་ ངེ་ ཁོ་ རོམ་མེ་ རྒྱ་སྤེ་ཀ་ ཀལ་ཅེ་ ཐག་ཅེད་པེན་།”

26 “འིན་ན་ རོམ་མེ་ རྒྱ་སྤོ་ལ་ ཁོའེ་ རྒྱཔ་འགལ་ལ་ ནེན་ཏེན་ ཅང་ འབྲི་ཅེ་ མེད་ཅེ་ཀ་ནི་, ངེ་ ཁོ་ ཁྱི་ཞ་ ཚང་མ་ རྡང་ མིག་སལ་ ཅོའེ་རྡེ་ རྒྱ་སྤོ་ ཨ་འགཱ་རི་པེ་ ཧུ་འདུན་ལ་ ཁྱོྃ་རྡེ་ འིན་། ཡང་ ཨ་ཧོའེ་ ཁོ་ སར་ཤོད་ ཏྃ་རྡེ་ ལྟིང་ནི་ ང་ ཁོའེ་ ཤའ་རྒེ་ ཧོར་ལ་ སྤེ་ར་ རིག་ རོམ་མེ་ རྒྱ་སྤོ་ལ་ འབྲི་ཅེ་ལ་ ཐོབ་རྦེན་། 27 ཅེ་ཟེར་ནི་ ཙོན་པ་ཞིག་རྒེ་ རྐྱོན་རྒུན་ ཀྲང་པོ་ མ་ཤེ་རྡེ་ལ་ རོམ་མེ་ རྒྱ་སྤེ་ཀ་ ཀལ་ཅེའོ་ འོའེ་སྤ་ མག་ ས་མེ་རག་།”