ཆག་ལེ་རྒུན་ 24

པ་འུ་ལུ་ རྡང་ ཀ་ལོན་ ཕེ་ལིག་།

ཞག་པོ་ ངེ་ ལྟིང་ནི་ ལ་མ་ ཆོན་མོ་ ཨ་ན་ནི་ཡཱ་, འུ་རྐྱོང་ ཁ་ཅིག་ ཏང་ ཏེར་ཏུལ་ལུའི་ ཟེར་ཧ་ནི་ ཁྲིམ་ཙོད་ ཉམ་པོ་ ཕེ་ལིག་རྒེ་ཀ་ པ་འུ་ལུའི་ རྒྱཔ་འགལ་ལ་ ཉེད་ཀལ་ ཀལ་ཧན་རྒུན་ ཤེད་རྡེ་ ཡོྃ་།

2 པ་འུ་ལུ་ ཁྱོང་ངེ་རྡང་, ཁྲིམ་ཙོད་ ཏེར་ཏུལ་ལུའི་ པ་འུ་ལུའི་ཀ་ ཉེད་ ཀ་ལེན་ ཟེར་, “ཀྱེ་ སྤོན་འབོ་ ཕེ་ལིག་ ཉེ་རང་ངེ་ ཝང་ངེ་ ཡོག་ལ་, ང་ཞི་ ཏུའི་ རིང་མོ་ཞིག་ ཞིའི་རྡེ་ ཉོང་, ཡང་ ཉེ་རང་ངེ་ ཤེ་རབ་ རྒྱུད་ཏེ་ འི་ ཡུལ་ལེ་ན་ ཕན་ཏོག་ཅེན་ནེ་ འགྱུར་ཞ་ མང་པོ་ ཁྱོྃ་། 3 སྤོན་འབོ་ ཕེ་ལིག་, ཏེ་ ཚང་མེ་ཕི་ ང་ཞི་ ཉེ་རང་ལ་ ཐུག་ཞེ་ཆེ་ ཞུ་ཡོད་། 4 འིན་ན་ ཉེ་རང་ངེ་ ཏུའི་ རིན་ཅེན་འབོ་ ཀོད་ལ་ མ་ཏང་ལ་ ང་ཞི་ འདོར་ལྡུའི་ཏེ་ ཤེད་ཅེ་ཅེན་འབོ་ སན་ནེ་ ཛེད་། 5 ང་ཞི་ འི་ མིའུ་ ཕུ་སུད་ཕིང་ཀན་ཞིག་ འིན་ཀན་ རྒྱུའི་སོང་, ཁོའེ་ འཇིག་རྟེན་ སོན་ཏེ་ན་ ཡ་ཧུ་འདཱ་པ་རྒུ་ནི་ ཕྲོ་ ཟི་ངིལ་ ཕིང་ངེན་ འདེད་ཏུག་, ཡང་ ཁོ་ ན་ཙ་རེད་པེ་ ཡམ་ཚེན་ རྡེ་ཞིག་རྒེ་ འུ་ཁྲིད་ ནོག་། 6 ང་ཞི་ ཀོན་འཇོག་རྒེ་ ཁང་པ་ལ་ ཀྲིཔ་ ཅོ་ཅེ་ ཙོན་འགྲུའི་ ཅོའེ་རྦེ་ ང་ཞི་ ཁོ་ ཟུམ་འབེན་། ང་ཞི་ ཁོ་ ང་ཞ་རང་ངེ་ ཆོའེ་ཁྲིམ་ ནང་ཞིན་ ཁྲིམ་ཅེད་ ཏྃ་རྡེ་ ཡོད་ཁྲོ་། 7 འིན་ན་ མག་ལྟོང་ངེ་ སྤོན་འབོ་ ལི་སི་ཡ་ ཡོྃ་རྡེ་ འི་ མིའུ་ ང་ཞི་ ལག་ནི་ ཝང་ ཉམ་པོ་ ཀོག་ཏེ་ ཁྱེར་། 8 ཡང་ ཁོའེ་ ཉེད་ཀལ་པ་རྒུན་ ཉེ་རང་ངེ་ འདུན་ལ་ ཡོང་ཅེ་ལ་ ཀ་ ཏྃ་། ཀལ་ཏེ་ ཁོ་ སར་ཤོད་ ཏང་ནི་ ང་ཞི་ ཁོའེ་ཀ་ ཀལ་ཧ་ནེ་ ཉེད་ ཚང་མ་ ནེན་ཏེན་ འིན་ཀན་འབོ་ ཉེ་རང་ལ་ ཧ་ཀོའེན་།” 9 ཡ་ཧུ་འདཱ་པ་རྒུ་ནི་ལ་ ཅིག་ སོང་འདེ་ ཏེར་ཏུལ་ལུའི་ ཉེད་ཀལ་ཧན་ ཚང་མ་ རྡེན་འབའ་ ནོག་ ཟེར་།

10 ཀ་ལོན་ནེ་ པ་འུ་ལུ་ལ་ ཟེར་ཤེ་ལ་ ལག་ཟོ་ ཏང་ངེ་རྡང་, ཁོང་ངེ་ ལེན་ཏང་ངེན་ མོལ་, “ལོ་ མང་པོ་ཞིག་ནི་ ཉེ་རང་ འི་ རྒྱལ་ཁབ་རྦེ་ ཁྲིམ་སྤོན་ འིན་ཀན་འབོ་ ང་ རྒྱུའི་ཡོད་པེ་ ངེ་ ང་རང་ རྐྱོན་མེད་ འིན་ཀ་ནེ་ ཧོར་ ཉེ་རང་ངེ་ འདུན་ལ་ ཤེད་རྡེ་ ཐེད་རྡེ་རག་། 11 ཞག་ ཅུག་ཉི་ ངུལ་ལ་, ང་ ཡེ་རུ་ཤ་ལེམ་མེ་ ཀོན་འཇོག་རྒེ་ ཁང་པ་ལ་ ཀོན་འཇོག་ལ་ ཅོལ་ལེ་ སོང་ཀན་འབོ་ ཉེ་རང་ངེ་ ལ་མོ་ ཉམ་པོ་ རྒྱུའི་ཅོ་ཉེན་ཅེ་ ནོག་, 12 མ་ཚེད་ ངེ་ཀ་ ཉེད་ཀལ་ ཀལ་ཧན་རྒུ་ནི་ ང་ ཀོན་འཇོག་རྒེ་ ཁང་པེ་ན་ སུ་ཞིག་ ཉམ་པོ་ ཛིང་མོ་ ཏང་ངེན་ ཡང་ འདུ་ཀང་རྒུན་ ཡང་ རྒྱལ་སེ་ན་ མི་ཚོག་རྒེ་ ཕྲོ་ ཟི་ངིལ་ ཕིང་ངེན་ མ་ཐོང་ངེ་ ནོག་། 13 ཁོང་རྒུ་ནི་ ངེ་ཀ་ ཀལ་ཀ་ནེ་ ཉེད་ཀལ་རྒུན་ རྡེན་འབའ་ འིན་ ཟེར་རྡེ་ ཉེ་རང་ལ་ ལྟན་ མི་ཉེན་།”

14 “ངེ་ མ་ཤི་ཀེ་ ལམ་མེ་ཀ་ འགྲུལ་རྡེ་ ང་ཞི་ ཕ་མེ་པོ་རྒུ་ནི་ ཀོན་འཇོག་ལ་ ཅོལ་ཧན་འབོ་ རྡེན་འབའ་ ཡང་ ལུང་རྟོན་པ་ རྡང་ ཀཱ་ཁྲིམ་མེ་ སྤེ་ཆ་རྒུ་ནི་ན་ འབྲི་རྡེ་ ཡོ་ཀན་ ཚང་མེ་ཀ་ ཏེཏ་པ་ ཅོ་ཡོད་, འིན་ན་ ཁོང་རྒུ་ནི་ ཏོ་རྦོ་ལ་ མི་ཐུན་འབེ་ ཆོའེ་ རྡེ་ ཟེར་རྡུག་། 15 ཁོང་རྒུ་ནི་ན་, ཀོན་འཇོག་རྒེ་ མི་ ཀྲང་པོ་ རྡང་ ངན་པ་ ཉ་ཧ་ སོན་པོ་ ལང་རྡེ་ ཛེད་ཅེ་ རེ་ཝ་ ཡོ་ཀན་འབོ་ ངེ་ ནང་ལ་ ཡོད་། 16 ཏོ་རྦེ་ཕི་ ངེ་ མི་ ཚང་མ་ རྡང་ ཀོན་འཇོག་རྒེ་ ཧུ་འདུན་ལ་ ང་རང་ངེ་ སེམ་ ལག་མོ་ པོར་ཤེ་ ཙོན་འགྲུའི་ ཅོ་ཡོད་།”

17 “ལོ་ མང་པོ་ཞིག་རྒེ་ ལྟིང་ནི་, ང་ ངེ་ ཡུལ་སྤ་ ཉལ་རྦ་ཅེན་རྒུན་ལ་ རོག་རྒེ་ མུལ་ ཁྱོང་ཅེ་ རྡང་ ཀོན་འཇོག་ལ་ ཆོད་པ་རྒུན་ པུལ་ཅེ་ལ་ ཡེ་རུ་ཤ་ལེམ་ལ་ ལོག་ཏེ་ ཡོྃ་རྦེན་། 18 ཁོང་རྒུ་ནི་ ང་ ཀོན་འཇོག་རྒེ་ ཁང་པེ་ན་ ཐོང་ཟ་ནི་ ང་ ང་ཞི་ ཆོའེ་ ཀཱ་ཁྲིམ་ ནང་ཞིན་ལ་ སང་མ་ སོང་འདེ་ འིན་འབེན་, ཡང་ ངེ་ ཉེ་ཁོར་ལ་ མི་ཚོག་ ཡང་ ཟི་ངིལ་ མེད་པེན་། 19 འིན་ན་ ཏུ་རུ་ ཨ་སི་ཨཱ་རྦེ་ ཡ་ཧུ་འདཱ་པ་ ཁ་ཅིག་ འདུག་པེན་, ཀལ་ཏེ་ ངེ་ རྒྱཔ་འགལ་ལ་ ཟེར་ཤེ་ ཡོད་ནི་, ཏེ་ནི་ ཁོང་རྒུན་ ཉེ་རང་ངེ་ འདུན་ལ་ ང་ རྐྱོན་ ཀ་ལེ་ ཡོང་རྒོའེ་། 20 འེ་ཀ་ ཡོ་ཀན་རྒུ་ནི་, ང་ ཡ་ཧུ་འདཱ་པེ་ ཚོག་འདུའི་ འདུན་ལ་ ཡོད་ཟ་ནི་ ཁོང་རྒུན་ལ་ ངེ་ན་ རྐྱོན་ ཐོབ་ཀན་རྒུན་ ཤེད་རྒོའེ་། 21 ‘ངེ་ ཤི་ཀན་རྒུན་ སོན་པོ་ ལང་ཤེ་རྦེ་ཀ་ ཏེཏ་པ་ ཅོའེ་རྦེ་, ཏི་རིང་ ངེ་ཀ་ ཤའ་ ཏང་ངེ་ནེ་’ ཟེར་རྡེ་ ཀུ་ཅུ་ ཏང་ཅེ་པོ་ ཅིག་པོ་རྦོ་, ངེ་ རྐྱོན་ འིན་འབེན་།”

22 ཏེ་ནི་ མ་ཤི་ཀེ་ ལམ་མེ་ཀ་ འགྲུལ་ཧན་རྒུ་ནི་ ཧོར་ལ་ རྒྱ་ལེ་ རྒྱུའི་ཡོ་ཀན་ནེ་ ཕེ་ལིག་རྒེ་, “མག་ལྟོང་ངེ་ སྤོན་འབོ་ ལི་སི་ཡ་ ལེབ་རྦེ་རྡང་, ཁྱེ་རང་ངེ་ ཤའ་རྦོ་ལ་ ཐག་ཅེད་ ཏང་ངེན་” ཟེར་རྡེ་ མི་ཚོག་ ཤོལ་ཅུག་། 23 ཁོའེ་ མག་མི་རྒྱེ་ སྤོན་འབོ་ལ་, པ་འུ་ལུ་ལ་ སྲུང་ཀན་ པོར་ འིན་ན་ ཁར་རེ་ན་ འགྲུལ་ཅེ་ ར་ཝང་ ཏོང་ ཡང་ ཁོང་ངེ་ ཁྲོ་པ་རྒུན་ལ་ ཁོང་ངེ་ རྒོའེ་ཤེ་ ཁྱོང་ཅེ་ལ་ རྒག་ མ་རྒོའེ་ ཟེར་རྡེ་ ཀཱ་ ཏང་།

24 ཞག་ ཁ་ཅིག་རྒེ་ ལྟིང་ནི་, ཕེ་ལིག་ རང་ངེ་ ན་མ་ འགྲུརུ་སིལ་ལཱ་ ཉམ་པོ་ ཡོྃ་, ཁོའེ་ ན་མ་ ཡ་ཧུ་འདཱ་པ་ཞིག་ འིན་འབེན་། ཕེ་ལིག་རྒེ་ པ་འུ་ལུ་ལ་ འབོ་ཀན་ ཏྃ་རྡེ་ མ་ཤི་ཀ་ ཡི་ཤུའི་ན་ ཏེཏ་པེ་ ཧོར་ལ་ པ་འུ་ལུའི་ཀ་ནི་ ཉེན་། 25 པ་འུ་ལུའི་ ལེ་ཧ་ ཀྲང་པོ་ ཅོ་ཅེ་, རང་སེམ་ ཆུན་ཅེ་ རྡང་ ཡོང་ཅེ་ཅེན་ནེ་ ཀོན་འཇོག་རྒེ་ ཁྲིམ་ཅེད་རྡེ་ ཧོར་ལ་ ཤེད་རྡེ་ ཛེད་པེ་, ཕེ་ལིག་ འཇིའི་རྡེ་ ཟེར་, “ཏ་ འགྲིག་, ཁྱེ་རང་ སོང་, ཡང་ ཞག་ཤིག་ ང་ ལོང་ ཡོད་ཟ་ནི་ ངེ་ འབོའེན་།” 26 པ་འུ་ལུའི་ ཆོག་ནེ་ ཕག་སུབ་རྦེ་ མུལ་ ཐོབ་ཅེ་ རེ་ཝ་ ཅོའེ་རྦེ་ ཁོའེ་ པ་འུ་ལུ་ལ་ སྤེ་ར་ ཏང་ཅེ་ལ་ ལེན་ མང་པོ་ འབོའེ་།

27 ལོ་ ཉི་ ལྟིང་ནི་, ཕེ་ལིག་རྒེ་ ཚབ་ལ་, ཕེ་ཏུའི་ པོར་ཀི་འུ་ ཟེར་ཧ་ནེ་ མི་ཞིག་ ཀ་ལོན་ལ་ ཧོའེ་། ཕེ་ལིག་ལ་ ཡ་ཧུ་འདཱ་པ་རྒུ་ནི་ ཆོག་རྐྱོར་ རྒོའེ་ཤེ་ཀ་ནི་ ཁོའེ་ པ་འུ་ལུ་ ཙོན་ཁང་ངེ་ན་ པོར་།