ཆག་ལེ་རྒུན་ 22

“ཡ་ཧུ་འདཱ་པེ་ སྤུན་ འདང་ འུ་རྐྱོང་རྒུན་, ང་ ཉེད་ཀལ་ཧན་རྒུན་ལ་ ངེ་ ལེན་ཏྃ་ཅེ་ཅེན་འབོ་ ཉོན་ཧེ་།” 2 མི་ཚོག་རྒེ་ ཁོང་ངེ་ ཨིབ་རི་རྦེ་ ཧད་རྡེ་ན་ མོལ་ལེ་ ཚོར་རེ་རྡང་, ཁོང་རྒུན་ མང་ངེ་ ཁ་རོག་།

ཏེ་ནི་ པ་འུ་ལུའི་ མོལ་, 3 “ང་ སི་ལི་སི་ཡཱ་ ཡུལ་ཞོང་ངེ་ ཏར་སུའི་ རྒྱལ་ས་ རྐྱེ་ཀ་ནེ་ ཡ་ཧུ་འདཱ་པ་ཞིག་ འིན་, འིན་ན་ འེ་རྒ་ རྒྱལ་སེ་ན་ ལོབ་རྦོན་ འགཱ་མ་ལི་ཨེལ་ནི་ ང་ ལོབ་ཞོང་ ཐོབ་ཏེ་ འིན་། ཁོང་ངེ་ ལོབ་ཀྲུག་ འིན་འབེ་ ང་ ཡ་ཧུ་འདཱ་པེ་ ཆོའེ་ཁྲིམ་ འདང་ ལུག་སྲོལ་རྒུན་ སྲུང་ཅེ་ ལོབ་ཞོང་ རྒྱ་ལེ་ ཐོབ་། ཀོན་འཇོག་ལ་ ངེ་ ཉིང་ངེ་ ཐིལ་ནི་ ཤེ་སྤ་ ཅོ་ཀན་འབོ་ ལག་ལེན་ལ་ ཁྱོྃ་རྦེན་, ཀ་ཟུག་ ཏི་རིང་ ཁྱི་ཞ་ ཚང་མེ་ ཅོའེན་ ནོག་། 4 ངེ་ མ་ཤི་ཀེ་ ལམ་མེ་ཀ་ འགྲུལ་ཧན་རྒུན་ལ་ ནག་ སྲན་ཀྲེ་ ལྟན་འབེན་ ཡང་ ཁ་ཅིག་ ཤི་ལ་ ཤི་། པུ་ཙ་ འིན་འགྲོ་ ཡང་ པོ་མོ་ ངེ་ ཚང་མ་ ཟུམ་འདེ་ ཙོན་ཁང་ལ་ ཧར་རྦེན་། 5 ཏོ་རྦེ་ སྤང་པོ་ ལ་མ་ ཆོན་མོ་ རྡང་ ཚོག་འདུའི་ འུ་རྐྱོང་ ཚང་མ་ འིན་། ཁོང་རྒུ་ནི་ ཆོག་ནི་ འདཱ་མེ་ཁེ་ ཚོག་འདུའི་ ལེ་ཧ་ ཅོ་ཀན་ ཁྲོ་པ་རྒུན་ལ་, ང་ ཝང་ཆ་ ཏང་ཀ་ནེ་ ཡི་རྒེ་ ཁུར་རྡེ་, མ་ཤི་ཀེ་ཀ་ ཏེཏ་པ་ ཅོ་ཀན་རྒུན་ རྡམ་འདེ་ ཡེ་རུ་ཤ་ལེམ་ལ་ ཆེད་པ་ ཅེད་ཅེ་ལ་ ཁྱོང་ཅེ་ཕི་ སོང་འབེན་།”

6 “ཉི་མེ་ཀུང་ ཟམ་ཤིག་ལ་, ང་ འདཱ་མེ་ཁེ་ ཉེ་མོ་ལ་ ལེབ་རྦེ་རྡང་, ཧུན་མེད་ལ་ ནམ་ཀ་ནི་ འོད་རྡེ་ ཟེར་ ཀྲག་པོ་ཞིག་ པབ་ཏེ་ ང་ ཧོར ཏྃ་། 7 ང་ ཐང་ཀེ་ཀ་ འགྱེལ་, ཡང་ ང་ སུང་ཧད་ཅིག་ ཚོར་, ‘ས་འུལ་! ས་འུལ་! ཁྱེ་རང་ངེ་ ང་ ཅེ་ ནག་ ལྟན་ནེ་ཡོད་?’”

8 “ངེ་ འདྲི་རྦེན་, ‘ཙོབོ་ ཉེ་རང་ སུ་ ཞུ་རྡེ་ འིན་?’”

“ཁོང་ངེ་ མོལ་ལེ་རག་, ‘ང་ ཁྱེ་རང་ངེ་ ནག་ ལྟན་ཀན་ ཡི་ཤུ་ ན་ཙ་རེད་པ་ ཡི་ཤུ་ འིན་།’ 9 ངེ་ ཁྲོ་པ་རྒུ་ནི་ ཏེ་ འོད་པོ་ ཐོང་, འིན་ན་ ཁོང་རྒུ་ནི་ ང་ མོལ་ཧ་ནེ་ ཧད་པོ་ ཧ་མ་ཀོ་།”

10 “ངེ་ འདྲི་རྦེན་, ‘ཀྱེ་ ཙོབོ་ ངེ་ ཅི་ ཅོ་?’”

“ཙོབོ་རྡེ་ ང་ མོལ་ལེ་རག་, ‘ལོྃ་, འདཱ་མེ་ཁེ་ལ་ སོང་, ཏུ་རུ་ ཁྱེ་རང་ལ་ ཅི་ ཅོ་རྒོ་ཤེ་ ཚང་མ་ ཤེད་རྡེན་།’ 11 ངེ་ ཁྲོ་པ་རྒུ་ནི་ ང་ ལག་པ་ ཐམ་འདེ་ འདཱ་མེ་ཁེ་ལ་ ཁྲིད་ཏེ་ ཁྱེར་ ཅེ་ཟེར་ནི་ འོད་རྡེ་ འདྃ་ ཀྲག་པེ་, ངེ་ མིག་པོ་ ཞར་ ཤུག་།”

12 “ཏུ་རུ་ ཨ་ན་ནི་ཡཱ་ ཞུ་ཀ་ནེ་ མི་ཞིག་ ང་ ལྟ་ལ་ ཡོྃ་། ཁོང་ ཀོན་འཇོག་རྒེ་ ཤོད་ལ་མེ་ཀ་ འགྲུལ་ཧན་ འདང་ ཀཱ་ཁྲིམ་རྒུན་ སྲུང་ཀན་, ཡང་ ཏུ་རུ་ འདེད་ཀ་ནེ་ ཡ་ཧུ་འདཱ་པ་རྒུ་ནི་ ཁོང་ལ་ མ་ སི་ཝ་ ཅོ་ཡོད་པེན་། 13 ཁོང་ ངེ་ འདུན་ལ་ ཡོྃ་རྡེ་ མོལ་ལེ་རག་, ‘སྤུན་ ས་འུལ་, ཁྱེ་རང་ལ་ ཡང་ ཐོང་ཤིག་’, ཏེ་རྒ་མ་རྒ་ ང་ ཁོང་ ཐོང་ཉེན་།”

14 “ཏེ་ནི་ ཁོང་ངེ་ མོལ་, ‘ཨ་ཧོའེ་ ཕ་མེ་པོ་ ཀོན་འཇོག་རྒེ་ ཁྱེ་རང་ལ་ ཁོང་ངེ་ ཐུག་འདོད་ ཤེ་ཤེ་, ཀྲང་པོ་ འིན་ཀན་འབོ་ འཇལ་ཤེ་ རྡང་ ཁོང་ངེ་ ཞལ་ཏ་ ཚོར་ཤེ་ལ་ འདམ་མེ་ ཛེད་ཏེ་ འིན་། 15 ཁྱེ་རང་ངེ་ མི་ཚང་མ་ལ་ ཁྱེ་རང་ལ་ ཐོང་ཀན་ འདང་ ཚོར་ཧན་རྒུ་ནི་ སྤང་པོ་ ཏང་ངེན་། 16 ཏ་ ཅི་ཕི་ སྲུྃ་རྡེ་ འིན་, ལྃ་རྡེ་ ཁྲུའི་ནེན་ ཡང་ རང་ངེ་ རྡིག་པ་རྒུན་ སེལ་ཅེ་ལ་ ཙོབོ་ ཡི་ཤུ་ མོ་ལམ་ ཞུའི་།’”

17 “ང་ ཡེ་རུ་ཤ་ལེམ་ལ་ ལོག་ཏེ་ ཡོྃ་རྡེ་ ལྟིང་ནི་ ཀོན་འཇོག་རྒེ་ ཁང་པེ་ན་ མོ་ལམ་ ཞུ་ཟ་ནི་, ངེ་ ཞལ་ཟིག་ཅིག་ ཐོང་། 18 ཏེ་ན་ ཙོབོ་རྡེ་ ང་ མོལ་ལེ་རག་, ‘འགྱོ་སྤ་ ཅོའེ་, ཡེ་རུ་ཤ་ལེམ་ནི་ ཏག་ས་རང་ འབིང་འདེ་ སོང་ ཅེ་ཟེར་ནི་ ཁྱེ་རང་ངེ་ ངེ་ ཧོར་ལ་ སྤང་པོ་ ཏང་ཅེ་རྦོ་ལ་ འི་ མི་རྒུ་ནི་ མི་ཉེན་།’”

19 “ངེ་ ཙོབོ་ལ་ ཟེར་རྦེན་, ‘ཀྱེ་ ཙོབོ་ ངེ་ འདུ་ཀང་ ཚང་མེ་ ནང་ནི་ ཉེ་རང་ལ་ ཏེཏ་པ་ ཅོ་ཀན་རྒུན་ ཟུམ་འདེ་ ཙོན་ལ་ ཧར་རྡེ་ རྡུང་ཀན་འབོ་ འི་ མི་རྒུན་ལ་ རྒྱུའི་ཡོད་། 20 ཡང་ ཉེ་རང་ངེ་ སྤང་པོ་ ཏང་ཀན་ རྟེ་ཕན་ སེད་ཟ་ནི་ ང་རང་ ཏུ་རུ་ ཁོང་ སེད་ཀན་རྒུ་ནི་ ཀོའེ་ལག་རྒུན་ སྲུང་ངེན་ ཁོང་རྒུ་ནི་ ཅོ་ཀ་ནེ་ ལེ་རྦེ་ན་ ང་ལ་ ཁ་ཆམ་འདེ་ འིན་།’”

21 “ཏེ་ནི་ ཙོབོ་རྡེ་ ང་ མོལ་, ‘སོང་ ངེ་ ཁྱེ་རང་ ཐག་རིང་ལ་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ ཀ་ལེན་།’”

22 ཏེ་ སྤེ་ར་འབོ་ ཟེར་ཟེར་ཚུག་པ་ མི་ཚོག་ སོན་ཏེ་ པ་འུ་ལུའི་ ཞལ་ཏ་རྒུན་ ཞིབ་སལ་ ཉམ་པོ་ ཉེན་འདེ་ འདེད་། ཏོ་ ཚོར་རེ་རྡང་, ཁོང་རྒུ་ནི་ ཀུ་ཅུ་ ཏང་ངེན་ ཟེར་, “འི་ མིའུ་ འཇིག་རྟེན་ནེ་ཀ་ནི་ མེ་ཀན་ ཅོའེ་། ཁོ་ སོན་པོ་ འདེད་ཅེ་ འོའེ་སྤ་ མི་འདུག་།”

23 མི་རྒུ་ནི་ ཆེད་མེད་ལ་ ཀུ་ཅུ་ ཏང་ངེན་ རང་རང་ངེ་ ཁ་ཏོཏ་ནི་ ཀོའེ་རྒུན་ པུད་ཏེ་ ཕྃ་, ཡང་ ལག་པེ་ན་ ཐལ་རྦ་ ཁུར་རྡེ་ ཡོག་།

པ་འུ་ལུ་ རོམ་པ་ འིན་ཀན་ ངོན་ཅུག་།

24 མག་ལྟོང་ངེ་ སྤོན་འབེ་ པ་འུ་ལུ་ ཀྱི་ལེ་ན་ ཁྱེར་ཤེ་ལ་ ཀཱ་ ཏྃ་, ཡང་ རྟལ་ལྕག་ རྒྱབ་ཏེ་ མི་རྒུ་ནི་ ཅི་ཕི་ ཁོའེ་ རྒྱཔ་འགལ་ལ་ ཀུ་ཅུ་ ཏྃ་རྡེ་ ནོག་ ཏོ་ རྒྱུའི་ ཅོ་ཅེ་ལ་ ཟེར་། 25 རྟལ་ལྕག་ རྒྱབ་ཅེ་ལ་ ཁོང་རྒུ་ནི་ པ་འུ་ལུའི་ ལག་པ་ ཅིང་ངེ་རྡང་, འདུན་ལ་ ཡོ་ཀ་ནེ་ མག་མི་རྒྱེ་ སྤོན་འབོ་ཞིག་ལ་ པ་འུ་ལུའི་ མོལ་, “རོམ་པ་ཞིག་ལ་ ཁོའེ་ རྐྱོན་ རྒྱུའི་ མ་ཅོ་ལ་ རྟལ་ལྕག་ རྒྱབ་ཅེ་རྦེ་ འོའེ་སྤ་ ནོག་རྒེ་?”

26 ཏོ་ ཚོར་རེ་རྡང་, ཁོ་ མག་ལྟོང་ངེ་ སྤོན་འབེ་ཀ་ སོང་འདེ་ ཟེར་, “ཉེ་རང་ངེ་ ཅི་ ཛེད་ཏེ་ འིན་? འི་ མིའུ་ རོམ་པ་ ནོག་།”

27 མག་ལྟོང་ངེ་ སྤོན་འབོ་ ཡོྃ་རྡེ་ པ་འུ་ལུ་ལ་ འདྲི་, “ང་ ཤོད་རྡང་, ཁྱེ་རང་ རོམ་པ་ འིན་ནེ་?”

ཁོང་ངེ་ མོལ་, “ང་ འིན་།”

28 མག་ལྟོང་ངེ་ སྤོན་འབེ་ ཟེར་, “མུལ་ མང་པོ་ ཏྃ་རྡེ་ མ་ནི་ ང་ རོམ་པ་ མ་འགྱུར་།”

པ་འུ་ལུའི་ མོལ་, “ང་ རྐྱེ་རྦ་ནི་ཕ་ལ་ རོམ་པ་ འིན་།”

29 པ་འུ་ལུ་ལ་ ཏྲི་སོ་ ཏང་ཅེ་ལ་ འདེད་ཏེ་ ཡོ་ཀན་རྒུན་, ཏེ་རྒ་མ་རྒ་ འབིང་འདེ་ སོང་། རོམ་པ་ འིན་ཀ་ནེ་ པ་འུ་ལུ་ ལྕ་རྟག་ལ་ ཏག་ཅེ་ལ་ ཀཱ་ ཏང་ཅེའོ་ ནོར་རྡེ་ འིན་ཀན་ ཧ་ཀོ་རྡང་, མག་ལྟོང་ངེ་ སྤོན་འབོ་ མང་པོ་ འཇིའི་།

30 ལྟིང་མེ་ཞག་པོ་ མག་ལྟོང་ངེ་ སྤོན་འབེ་ ཡ་ཧུ་འདཱ་པ་རྒུ་ནི་ པ་འུ་ལུ་ལ་ ཉེད་ ཅི་ ཀལ་རྡེ་ ནོག་ རྒྱུའི་ ཅོ་ཅེ་ལ་ ཡ་ཧུ་འདཱ་པེ་ ཚོག་འདུའི་ ཐུའི་མི་རྒུན་ འདང་ ལ་མ་ འུ་རྐྱོང་རྒུན་ འབོའེ་རྡེ་ ཁྱོྃ་། ཏེ་ནི་ ཁོའེ་ པ་འུ་ལུ་ ཁྱོང་ཅུག་ཏེ་ ཁོང་རྒུ་ནི་ འདུན་ལ་ ལྃ་རྡེ་ འདེད་ཅུག་།