ཆག་ལེ་རྒུན་ 21

པ་འུ་ལུ་ ཡེ་རུ་ཤ་ལེམ་ལ་ རྐྱོད་།

ཨེ་ཕེ་སུའི་པེ་ འུ་རྐྱོང་རྒུན་ལ་ ལྟིང་འཇུག་རྒེ་ འཇུ་ ཟེར་རྡེ་ ང་ཞ་ ཆུ་རེལ་ལེ་ན་ ཀོའེ་ ཚོ་ལིང་ལ་ ཁ་ཀྲང་ལ་ སོང་འབེན་། ལྟིང་མེ་ཞག་པོ་ རོ་འདུ་ ཚོ་ལིང་ལ་ ལེཔ་, ཡང་ ཏེ་ལྟིང་ནི་ པ་ཏ་ར་ ཀྲོང་ཁྱེར་ལ་། 2 ཏུ་རུ་ ང་ཞ་རྒུན་ལ་ ཕོ་ནི་ཤི་ཡ་ ཡུལ་ཞོང་ལ་ ཆ་ཀ་ནེ་ ཆུ་རེལ་ཞིག་ ཐོབ་པེ་ ང་ཞ་ ཏེ་ན་ ཞོན་འདེ་ སོང་འབེན་། 3 ཆུ་འགྲུལ་ལེ་ཀ་ནི་ ང་ཞི་ སིབ་རུ་ ཚོ་ལིང་ ཐོང་ ཡང་ ང་ཞ་ ཏེ་ ཚོ་ལིང་ ཡོའེ་མ་ ཆོག་ལ་ ཕྃ་རྡེ་ སི་རི་ཡཱ་ ཆོག་ལ་ སོང་འབེན་། ཏཱ་ཡིར་ རྒྱལ་ས་ ཅ་ལག་ སྤབ་རྒོ་ཤེ་ ཡོད་པེ་ ཆུ་རེལ་རྦོ་ ཏུ་རུ་ པོར་། 4 ང་ཞ་ལ་ ཆུ་འགྲུལ་ནི་ པབ་ཏེ་ ཏེཏ་པ་ཅན་རྒུན་ ཙལ་རྦེ་ ཐོབ་ཏེ་ ཁོང་རྒུན་ ཉམ་པོ་ ཞག་པོ་ རྡུན་ འདེད་པེན་། ཏམ་པེ་ ཐུག་ཡིད་ རྒྱུད་ཏེ་ ཁོང་རྒུ་ནི་ པ་འུ་ལུ་ལ་ ཡེ་རུ་ཤ་ལེམ་ལ་ མི་རྐྱོད་ཅེ་ལ་ ཞུ་ཝ་ པུལ་། 5 ཞག་ རྡུན་ནི་ ལྟིང་ནི་ ང་ཞ་ ཆུ་རེལ་ལ་ ཞོན་ནེ་ ཆ་རྡང་, ན་མ་ རྡང་ ཕྲུ་རྒུ་ ཐེའེ་རྡེ་ ཆོའེ་ཚོག་ སོན་ཏེ་ རྒྱལ་ས་ནི་ འབིང་འདེ་ ང་ཞ་ ལམ་ཅུག་རྒེ་ལ་ རྒྱམ་ཚོའེ་ ཐ་མ་ཚུག་པ་ ཡོྃ་། ཏེ་ཀ་ ང་ཞ་ ཚང་མེ་ པིག་ཛུམ་ རྒྱབ་ཏེ་ མོ་ལམ་ ཞུའི་རྦེན་། 6 ཁོང་རྒུན་ལ་ ལྟིང་འཇུག་རྒེ་ འཇུ་ ཞུའི་རྡེ་ ང་ཞ་རྒུན་ ཆུ་རེལ་ལ་ ཞོན་, ཡང་ ཁོང་རྒུན་ རང་རང་ངེ་ ཁང་པ་ ལོག་ཏེ་ སོང་།

7 ཏཱ་ཡིར་ནེ་ ང་ཞ་ པེ་ཏོ་ལེ་མཱ་འི་ རྒྱལ་ས་ ལེཔ་, ཏུ་རུ་ མ་ཤི་ཀ་པེ་ སྤུན་རྒུན་ལ་ ཐུ་རྒེ་ལ་ སོང་འདེ་ ཁོང་རྒུན་ ཉམ་པོ་ ཞག་ཅིག་ འདེད་པེན་། 8 ལྟིང་མེ་ཞག་པོ་ ཏེ་ཀ་ནི་ འབིང་འདེ་ ང་ཞ་རྒུན་ ཀཱེ་སར་རི་ཡ་ རྒྱལ་ས་ ལེཔ་, ཏུ་རུ་ ནེ་ཚུལ་ ཟང་པོ་ ཤེད་ཀན་, ཕི་ལིབ་རྦེ་ ཁང་པ་ ང་ཞ་ འདེད་པེན་, ཁོ་ ཡེ་རུ་ཤ་ལེམ་མེ་ན་ ཆོའེ་ཚོག་ལ་ ཞབ་རྟོག་ ཞུ་ལ་ འདམ་ཀན་ རྡུན་ནི་ ཕྲོ་ནི་ ཅིག་ འིན་འབེན་། 9 ན་མ་ མ་ཅོ་ཀ་ནེ་ པོ་མོ་ ཞི་ ཁོ་ ཡོད་པེན་, ཀའོ་རྒུན་ལ་ ལུང་རྟན་ ཤེད་ཅེ་ ཁྱུད་ ཐོབ་ཏེ་ ཡོད་པེན་།

10 ང་ཞ་ ཏུ་རུ་ འདེད་ཏེ་ ཞག་ ཁ་ཅིག་ ཆ་རྡང་, ཡ་ཧུ་འདཱ་ནི་ ཨ་འགཱ་འབེ་ ཟེར་ཧ་ནེ་ ལུང་རྟོན་པ་ཞིག་ རྐྱོད་། 11 ང་ཞི་ འདུན་ལ་ རྐྱོད་ཏེ་ པ་འུ་ལུའི་ རྐྱེ་ར་རྦོ་ ཉམ་པོ་ ཁོ་རང་ངེ་ ཧང་ལག་རྒུན་ རྡམ་འདེ་ ལུང་རྟན་ སལ་, “ཏམ་པེ་ ཐུག་ཡིད་རྡེ་ མོལ་རྡུག་, ‘ཡེ་རུ་ཤ་ལེམ་མེ་ན་ ཡ་ཧུ་འདཱ་པེ་ འུ་རྐྱོང་རྒུ་ནི་ འི་ རྐྱེ་ར་རྡེ་ རྡག་རྦོ་ འི་ཟུག་ལ་ རྡམ་འདེ་ ཡ་ཧུ་འདཱ་པ་ མན་ཀན་རྒུ་ནི་ ལག་ལ་ ལྟེ་རྡེན་།’”

12 ཏོ་ ཚོར་རེ་རྡང་, ང་ཞ་ རྡང་ ཏུ་རུ་ ཡོ་ཀ་ནེ་ མི་རྒུ་ནི་ པ་འུ་ལུ་ལ་ འཇུ་འཇུ་ ཡེ་རུ་ཤ་ལེམ་ལ་ མ་རྐྱོད་ ཞུའི་རྡེ་ ཞུ་ཝ་ པུལ་རྦེན་། 13 འིན་ན་ པ་འུ་ལུའི་ མོལ་, “ཁྱི་ཞ་ ཅེ་ ངུའི་རྡེ་, ངེ་ སེམ་ ཆག་ཅུག་རྒེ་ཡོད་? ང་ ཡེ་རུ་ཤ་ལེམ་མེ་ན་ ཙོབོ་ ཡི་ཤུའི་ ཚན་ནི་ཕི་ ལྕ་རྟག་ལ་ རྡམ་ཅེ་ མ་ཚེད་ ཤི་ཅེ་ལ་ ཤི་ཆོག་ཆོག་ འིན་།” 14 ང་ཞི་ ཞུ་ཝ་རྒུན་ ཁོང་ངེ་ མི་ཉེན་ཅེ་ ཧ་ཀོ་རྡང་, ང་ཞི་ ཞུ་ཝ་ པུལ་ཅེ་ ཕྃ་རྡེ་ ཟེར་, “ཙོབོ་ ཀོན་འཇོག་རྒེ་ ཐུག་འདོད་ ཀྲུཔ་ཤིག་།”

15 ཏེ་ ལྟིང་ནི་ ང་ཞི་ པེ་རྡེ་ཕི་ ཀྲལ་འགྲིག་ ཅོའེ་རྡེ་ ཡེ་རུ་ཤ་ལེམ་ ཆོག་ལ་ ཆ་ཅེ་ འགོ་ཟུག་། 16 ཀཱེ་སར་རི་ཡ་ ཡོ་ཀ་ནེ་ ལོབ་ཀྲུག་ ཁ་ཅིག་ལ་ ང་ཞ་ ཉམ་པོ་ ཡོྃ་། ཁོང་རྒུ་ནི་ ང་ཞ་ སིབ་རུ་པ་ མ་ན་སོན་ནེ་ ཁང་པ་ འདེད་རྡེ་ལ་ ཁྱེར་, ཁོ་ ཏུའི་ མང་པེ་ ངུལ་ལ་ ཡི་ཤུའི་ ལོབ་ཀྲུག་ འགྱུར་རྡེ་ འིན་འབེན་།

པ་འུ་ལུ་ ཡེ་རུ་ཤ་ལེམ་ལ་ རྐྱོད་།

17 ང་ཞ་རྒུན་ ཡེ་རུ་ཤ་ལེམ་ལ་ ལེབ་རྦེ་རྡང་, མ་ཤི་ཀ་པེ་ སྤུན་རྒུ་ནི་ མ་ ཐེད་པོ་ ཉམ་པོ་ རྒ་སུའི་ ཞུའི་། 18 ཐོ་རེ་ཚུག་པོ་ པ་འུ་ལུ་ རྡང་ ང་ཞ་རྒུན་ ཡ་ཀུབ་ལ་ ཐུ་རྒེ་ལ་ སོང་འབེན་, ཏུ་རུ་ ཆོའེ་ཚོག་རྒེ་ འུ་རྐྱོང་ ཚང་མ་ ཛོམ་འདེ་ འདུག་པེན་། 19 པ་འུ་ལུའི་ ཁོང་ ཚང་མ་ལ་ འཇུ་ ཞུའི་རྡེ་ ཀོན་འཇོག་རྒེ་ ཁོང་ རྒྱུད་ཏེ་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ ཆག་ལེ་ ཛེད་ཀན་རྒུ་ནི་ ཧོར་ ཁོང་རྒུན་ལ་ ཞིབ་སལ་ ཤེད་རྡེ་ ཛེད་།

20 ཡུ་རྒུན་ ཚོར་རེ་རྡང་ ཁོང་རྒུ་ནི་ ཀོན་འཇོག་ལ་ རྟོད་པ་ པུལ་, ཏེ་ནི་ པ་འུ་ལུ་ལ་ མོལ་, “ཤེ་སྤ་ སྤུན་ ལྟོའེ་རྡང་, ཡ་ཧུ་འདཱ་པ་ ལྟོང་ མང་པོ་ཞིག་རྒེ་ ཏེཏ་པ་ ཅོའེ་, ཡང་ ཁོང་ ཚང་མེ་ མོ་ཤེ་ ཀཱ་ཁྲིམ་རྒུན་ལ་ ཉིང་ངེ་ ཐིལ་ནི་ ཤེ་སྤ་ ཅོ་རུག་། 21 ཁོང་རྒུ་ནི་, ཉེ་རང་ངེ་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ འདེད་ཀ་ནེ་ ཡ་ཧུ་འདཱ་པ་ ཚང་མ་ལ་ མོ་ཤེ་ ཁྲིམ་རྒུན་ མི་སྲུང་ཅེ་ ཡང་ པུ་ཙ་རྒུན་ལ་ འགོཔ་ཅེཏ་ མི་ཅོ་ཤེ་ ཡང་ ཡ་ཧུ་འདཱ་པེ་ ལུག་སྲོལ་རྒུན་ ཁ་ མི་ཉེན་ཤེ་རྒུན་ ལབ་ཏུག་ ཟེར་རྡེ་ ཚོར་རྡོག་། 22 ཏ་ ཨ་ཧོ་རྒུ་ནི་ ཅི་ ཅོའེན་? ཉེ་རང་ འི་རུ་ རྐྱོད་ཀན་འབོ་ ཁོང་རྒུ་ནི་ ཚོར་ཤེ་ ནེན་ཏེན་ ནོག་། 23 ང་ཞི་ ས་མེ་རག་ ཉེ་རང་ངེ་ འི་རྦོ་ ཅོ་རྒོའེ་། འེ་ཀ་ ང་ཞ་ ཉམ་པོ་ ཀོན་འཇོག་རྒེ་ འདུན་ལ་ ཏམ་འཇའ་ ཅོ་ཀ་ནེ་ མི་ ཞི་ ཡོད་། 24 ཉེ་རང་ ཁོང་རྒུན་ ཉམ་པོ་ ཀོན་འཇོག་རྒེ་ ཁང་པ་ལ་ རྐྱོད་ཏེ་ སང་མ་ ཅོ་ཅེ་ ལུག་སྲོལ་ལེ་ན་ ཐུའི་, ཡང་ འགོ་རིལ་ ཅོའེ་རྡེ་ སྲ་ འབྲག་ཅེ་ རིན་ རང་ མ་ཚེད་ ཁོང་རྒུ་ནི་ཕི་ལ་ ཤོལ་། ཏེ་ནི་ ཉེ་རང་ངེ་ རྒྱཔ་འགལ་ལ་ ཟེར་ཧན་རྒུན་ རྡེན་འབའ་ མན་ཀན་ ཡང་ ཉེ་རང་ངེ་ ཡ་ཧུ་འདཱ་པེ་ ཀཱ་ཁྲིམ་རྒུན་ སྲུང་འདུག་ ཟེར་རྡེ་ ཚང་མ་ལ་ རྒྱུའི་ཆེན་། 25 ཏེཏ་པ་ཅེན་ནེ་ ཡ་ཧུ་འདཱ་པ་ མན་ཀན་རྒུན་ལ་ ང་ཞི་ ཐག་ཅེད་རྡེ་ ཧོར་ལ་ ཡི་རྒེ་ འབྲི་རྡེ་ ཀལ་རྦེན་། ཏེ་ ཡི་རྒེ་རྦེ་ན་ ཧུ་འདྲ་རྒུན་ལ་ ཆོད་པ་ པུལ་ཧན་རྒུན་, ཁྲག་ ཡོ་ཀན་ ཡང་ རྐྱེ་ཙིར་རྡེ་ སེད་ཀ་ནེ་ ཤ་ ཟ་ མི་རྒོའེ་, ཡང་ ལུའི་འབྲེལ་ ངན་པ་རྒུ་ནི་ ཐག་རིང་ལ་ འདེད་རྒོའེ་ ཟེར་རྡེ་ འབྲི་རྡེ་ ཡོད་།”

26 ལྟིང་མ་ཞག་ལ་ པ་འུ་ལུ་ རྡང་ ཏེ་ མི་རྒུ་ནི་ ལུག་སྲོལ་ ནང་ཞིན་ལ་ སང་མ་ ཅོའེ་རྡེ་ ལྟིང་ནི་ པ་འུ་ལུ་ ཁོང་རྒུན་ ཉམ་པོ་ ཀོན་འཇོག་རྒེ་ ཁང་པེ་ན་ རྐྱོད་ཏེ་ སང་མ་ ཅོ་ཅེ་ ཚར་རྡེ་ ཁོང་རྒུ་ནི་ རང་རང་ངེ་ཕི་ ཆོད་པ་ པུལ་ཉེན་ཅེ་ ཞག་པོ་ ལ་མ་རྒུན་ལ་ ཤེད་རྡེ་ ཛེད་།

པ་འུ་ལུ་ ཟུམ་།

27 སང་མ་ ཅོ་ཅེ་ ཞག་ རྡུན་ ཚང་ཀྱི་ ཡོད་ཟ་ནི་ པ་འུ་ལུ་ ཀོན་འཇོག་རྒེ་ ཁང་པ་ལ་ ཐོང་ཀ་ནེ་ ཨ་སི་ཨཱ་པེ་ ཡ་ཧུ་འདཱ་པ་ ཁ་ཅིག་རྒེ་ མི་མང་ལ་ སྲུག་སྤེར་ ཏྃ་རྡེ་ ཁོང་ ཟུམ་། 28 ཏེ་ ཨ་སི་ཨཱ་པ་རྒུ་ནི་ ཀུ་ཅུ་ ཏྃ་རྡེ་ ཟེར་, “ཨིས་ར་ཡེལ་པ་རྒུན་ ང་ཞ་ ཡ་ཏོ་ ཅོའེ་། འེ་རྒ་ མི་རྦེ་ ཀང་ལུྃ་ས་ ཚང་མ་ལ་ ཨ་ཧོ་རྒུན་, ཨ་ཧོའེ་ ཀཱ་ཁྲིམ་ འདང་ འི་ ཀོན་འཇོག་རྒེ་ ཁང་པེ་ རྒྱཔ་འགལ་ལ་ ལབ་ཞ་ ཏང་ཅེ་, མ་ཚེད་ ཡ་ཧུ་འདཱ་པ་ མན་ཀན་རྒུན་ ཨ་ཧོའེ་ ཀོན་འཇོག་རྒེ་ ཁང་པ་ལ་ ཁྱོྃ་རྡེ་ འི་ ཏམ་པེ་ ས་ཅ་རྦོ་ ཀྲིཔ་ ཅོའེ་།” 29 ཁོང་རྒུ་ནི་ ངུལ་ལ་ རྒྱལ་སེ་ན་ པ་འུ་ལུ་ ཨེ་ཕེ་སུའི་པ་ ཏྲོ་ཕི་མུ་ ཡ་ཧུ་འདཱ་པ་ མན་ཀན་འབོ་ ཉམ་པོ་ ཐོང་འདེ་, ཁོའེ་ ནེན་ཏེན་ འི་ མིའུ་ ཀོན་འཇོག་རྒེ་ ཁང་པ་ལ་ ཁྱེར་རྡེ་ ཡོད་ཁྲོ་ སམ་ཅེ་ཀ་ནི་ ཏུ་ཟུག་ ཟེར་།

30 ཏེ་ནི་ རྒྱལ་ས་ སོན་ཏེ་ན་ ཟི་ངིལ་ ཞུའུ་, ཡང་ མི་ཚང་མ་ རྒྱུག་ཏེ་ ཡོྃ་རྡེ་ ཛོམ་། ཁོང་རྒུ་ནི་ པ་འུ་ལུ་ ཟུམ་འདེ་ ཀོན་འཇོག་རྒེ་ ཁང་པེ་ ནང་ནི་ ཀྲུད་རྡེན་ ཕི་ལོག་ལ་ ཁྱེར་རྡེ་, ཏེ་རྒ་མ་རྒ་ ཀོན་འཇོག་རྒེ་ ཁང་པེ་ རྒོ་རྒུན་ ཅུག་། 31 ཁོང་རྒུ་ནི་ པ་འུ་ལུ་ སེད་ཅེ་ ཅོའེན་ ཡོད་ཟ་ནི་, རོམ་མེ་ མག་ལྟོང་ངེ་ སྤོན་འབོ་ལ་ རྒྱལ་ས་ སོན་ཏེ་ན་ ཟི་ངིལ་ འབིང་འདོག་ ཟེར་རྡེ་ ཚོར་། 32 ཁོ་ ཏེ་རྒ་མ་རྒ་ མག་མི་ རྡང་ མག་མི་རྒྱེ་ སྤོན་འབོ་རྒུན་ ཁྲིད་ཏེ་ མི་ཚོག་ ཡོད་ས་ རྒྱུག་ཏེ་ སོང་། ཏེ་ མག་ལྟོང་ངེ་ སྤོན་འབོ་ རྡང་ མག་མི་རྒུན་ ཡོང་ལ་ ཐོང་ཏེ་, མི་ཚོག་རྒེ་ པ་འུ་ལུ་ལ་ རྡུང་ཅེ་ རྒག་།

33 མག་ལྟོང་ སྤོན་འབོ་ པ་འུ་ལུའི་ འདུན་ལ་ ཡོྃ་, ཡང་ ཁོང་ ཟུམ་འདེ་ ལྕ་རྟག་ ཉི་ ཉམ་པོ་ རྡམ་ཅེ་ལ་ ཀཱ་ ཏང་། ཡང་ ཁོའེ་ འི་ མིའུ་ སུ་ ནོག་ ཅི་ རྐྱོན་ ཅོའེ་རྡོག་? ཟེར་རྡེ་ འདྲི་། 34 མི་ཚོག་རྒེ་ ནང་ནི་ ཁ་ཅིག་རྒེ་ སྤེ་ར་ ཅིག་ ཡང་ ཁ་ཅིག་རྒེ་ ཡང་ སྤེ་ར་ ཅིག་ ཟེར་། ཐེ་ཚོམ་ ཅོའེ་ཏེ་ མག་ལྟོང་ངེ་ སྤོན་འབོ་ལ་ རྡེན་འབའ་ སོན་ཏེ་ ཧ་ཀོ་ མ་ཉེན་ནེ་, པ་འུ་ལུ་ མག་མི་ ཀྱི་ལེ་ན་ ཁྱེར་ ཟེར་རྡེ་ ཀཱ་ ཏང་། 35 པ་འུ་ལུ་ ཐེམ་ཧེ་ཀ་ ལེབ་རྦེ་རྡང་, མི་ཚོག་ལ་ སྲོ་ ཧོཔ་ ཡོྃ་རྡེ་ ཐོང་འདེ་ མག་མི་རྒུ་ནི་ ཁོང་ ཁུར་རྡེ་ ཁྱེར་། 36 པ་འུ་ལུའི་ རྒྱབ་ནི་ ཡོང་ཀ་ནེ་ མི་མང་ངེ་ ཀུ་ཅུ་ ཏང་ངེན་ ཟེར་, “ཁོ་ སོད་, ཁོ་ སོད་” ཟེར་།

པ་འུ་ལུའི་ མི་ཚོག་ལ་ སྤེ་ར་ སལ་།

37 པ་འུ་ལུ་ ཀྱི་ལེ་ ནང་ཀུ་ལ་ ཁྱེར་རེན་ ཡོད་ཟ་ནི་ ཁོང་ངེ་ མག་ལྟོང་ངེ་ སྤོན་འབོ་ལ་ མོལ་, “ངེ་ ཉེ་རང་ལ་ སྤེ་ར་ཞིག་ ཟེར་ནི་ འགྲིག་རྒེ་?”

མག་ལྟོང་ངེ་ སྤོན་འབེ་ པ་འུ་ལུ་ལ་ འདྲི་, “ཁྱེ་རང་ངེ་ འགི་རིག་རྒེ་ ཧད་ ཤེ་རྡེ་ཡོད་རྡེ་? 38 ཞག་ ཁ་ཅིག་ ངུལ་ལ་ རོམ་མེ་ རྒྱ་སྤོ་ལ་ ངོ་ལོག་ ཅོའེ་རྡེ་ ལྟེན་ཤིག་ ལྟོང་ཞི་ རི་ལྟོང་ལ་ ཁྲིད་ཏེ་ ཁྱེར་ཧན་ནེ་ ཨི་འཇིབ་པ་རྦོ་ ཁྱེ་རང་ མན་ནེ་?”

39 པ་འུ་ལུའི་ མོལ་, “མན་, ང་ ཡ་ཧུ་འདཱ་པ་ སི་ལི་སི་ཡཱེ་ ཡུལ་ཞོང་ངེ་ མ་ ཁག་ཅེན་ རྒྱལ་ས་ ཏར་སུའི་ ཡུལ་མི་ཞིག་ འིན་། འཇུ་འཇུ་ ང་ འི་ མི་རྒུན་ལ་ སྤེ་ར་ ཟེར་ཤེ་ རྒོང་སྤ་ སལ་།”

40 མག་སྤོན་ནེ་ རྒོང་སྤ་ ཐོབ་ཏེ་ ཁོང་ངེ་ ཐེམ་ཧེ་ཀ་ ལྃ་འདེ་ མི་ཚོག་ལ་ ཅེཔ་ཁ་རོག་ཏེ་ འདེད་ཅེ་ལ་ ལག་པ་ ཉམ་པོ་ ལྟའ་ ཅོའེ་། མི་ཚོག་ ཅེཔ་ཁ་རོག་རྡང་, ཁོང་ངེ་ ཨིབ་རི་རྦེ་ ཧད་རྡེ་ན་ མོལ་ཅེ་ འགོ་ཟུག་།