ཆག་ལེ་རྒུན་ 20

པ་འུ་ལུ་ མ་ཀེ་འདོ་ནི་ཡཱ་, འགི་རིག་ ཏང་ ཏྲོ་ཡཱེ་ལ་ རྐྱོད་།

ཟི་ངིལ་ ཚང་མ་ མེ་ཀན་ ཆ་རྡང་, པ་འུ་ལུའི་ ལོབ་ཀྲུག་རྒུན་ འབོའེ་རྡེ་ ཁོང་རྒུན་ལ་ སེམ་རུའི་ སལ་, ཡང་ ལྟིང་འཇུག་རྒེ་ འཇུ་ མོལ་རྡེ་ ཁོང་ མ་ཀེ་འདོ་ནི་ཡཱ་ རྐྱོད་། 2 པེ་ ཏུའི་ལ་ ཁོང་ ལེབ་སེ་ ས་ཅ་རྒུ་ནི་ན་ ཏེཏ་པ་ཅན་རྒུན་ལ་ སེམ་རུའི་ ས་ལེན་ རྐྱོད་, འགི་རི་རྒེ་ ཡུལ་ཞོང་ལ་ ལེབ་ཏེ་ ལྟིང་ནི་། 3 ཏུ་རུ་ ཁོང་ ལྡ་ སུམ་ ཞུའུ་། ཁོང་ ཆུ་རེལ་ལེ་ན་ སི་རི་ཡཱ་ རྐྱོད་ཅེ་ ཀྲལ་འགྲིག་ ཅོ་ཟ་ནི་, ཡ་ཧུ་འདཱ་པ་རྒུ་ནི་ ཁོང་ སེད་ཅེ་ ཅུའི་ངན་ ལྡིང་ཀན་འབོ་ ཚོར་རྦེ་, ཁོང་ངེ་ ལོག་ཏེ་ མ་ཀེ་འདོ་ནི་ཡཱ་ རྒྱུད་ཏེ་ ཆ་ཅེ་ལ་ ཐག་ཅེད་། 4 ཁོང་ ཉམ་པོ་ འབེ་རེ་ཨཱ་ནེ་ པིར་རུའི་ པུ་ཙ་ སོ་པ་ཏེར་, ཐེ་ས་ལོ་ནི་ཀ་ནེ་ ཨ་རི་ཏར་ཀུ་ རྡང་ སེ་ཀུན་ཏུའི་, འདེར་འབེ་ནེ་ འགཱ་ཡུ་, ཨ་སི་ཨཱེ་ ཡུལ་ཞོང་ནི་ ཏི་ཁི་ཀུ་ རྡང་ ཏྲོ་ཕི་མུ་ ཡང་ ཏི་མོ་ཐི་ ཆ་ཅེ་ ཡོད་པེན་། 5 ཁོང་རྒུན་ པ་འུ་ལུའི་སང་ ངུལ་ལ་ སོང་འདེ་ ཏྲོ་ཡཱེ་ རྒྱལ་སེ་ན་ ང་ཞི་ཕི་ སྲུྃ་རྡེ་ འདེད་། 6 རྐྱུར་ མེ་ཀ་ནེ་ ཏི་རྒིར་ ཏུའི་ཤེན་ནེ་ ལྟིང་ནི་ ང་ཞ་རྒུན་ ཕི་ལིབ་པི་ནི་ ཆུ་རེལ་ལ་ ཞོན་འདེ་ སོང་འབེན་, ཡང་ ཞག་ ངེ་ ལྟིང་ནི་ ཏྲོ་ཡཱེ་ རྒྱལ་ས་ ལེབ་ཏེ་ ཞེན་མ་ ཁྲོ་པ་རྒུན་ ཐུག་, ང་ཞ་ ཏུ་རུ་ ཞག་པོ་ རྡུན་ འདེད་པེན་།

པ་འུ་ལུའི་ ཁྱོག་ཏོང་འཇིག་ སོན་པོ་ ལང་ངེ་ ཛེད་།

7 ཟ་ཉི་མེ་ ཞག་ལ་, ཙོབོ་རྡེ་ འདོན་ཏང་ ཟ་ཅེ་ལ་ ང་ཞ་ ཏུ་རུ་ ཡོ་ཀ་ནེ་ ཆོའེ་ཚོག་ ཉམ་པོ་ ཛོམ་, ལྟིང་མེ་ཞག་པོ་ པ་འུ་ལུ་ ཆ་ཅེ་ འིན་འབེ་ ཁོང་ ཚེན་ཕེད་ཚུག་པ་ ཆོའེ་ཤེད་རྡེན་ ཞུའུ་། 8 ལྟང་ཏོག་པ་ ང་ཞ་རྒུན་ ཛོམ་འདེ་ ཡོ་ཀ་ནེ་ ནང་འབེ་ན་ འོད་ མང་པོ་ ཏུག་ཏེ་ ཡོད་པེན་། 9 ཁོང་རྒུ་ནི་ ཕྲོ་ནི་ ཨེའུ་ཏི་ཀུ་ ཟེར་ཧ་ནེ་ ཁྱོག་ཏོང་འཇིག་ ཀར་ཧུང་ངེ་ཀ་ འདེད་ཏེ་ ཡོད་པེན་, པ་འུ་ལུའི་ འགོར་འགོར་ཚུག་པ་ ཁྲོའེ་རྡུར་ ཛེད་ཅེ་རྦེ་ ཁོ་ ཉིད་ ལྕིན་ཀྲེ་ ཡོྃ་, ཡང་ ཐོག་ཚེད་ སུམ་ནི་ ཡོག་ལ་ ཀྲུལ་རྡེ་ ཤི་། 10 པ་འུ་ལུ་ ཡོག་ལ་ རྐྱོད་ཏེ་ ཁྱོག་ཏོང་འབེ་ ཟུྃ་སྤོ་ལ་ ཁྲིལ་རྡེ་, “འཇིའི་ མ་འཇིའི་ཧེ་, ཁོ་ སོན་པོ་ ནོག་” མོལ་། 11 ཏེ་ནི་ པ་འུ་ལུ་ ཁ་ཏོཏ་ལ་ ལོག་ཏེ་ རྐྱོད་ཏེ་ འདོན་ཀྱིར་ ཅག་ཏེ་ ཚང་མ་ ཛོམ་འདེ་ ཟོའེ་, ཡང་ ནམ་ལང་ ཙུག་པ་ ཁྲོའེ་རྡུར་ ཛེད་, ཏེ་ནི་ ཁོང་ ཏེ་ཀ་ནི་ རྐྱོད་། 12 ཁོང་རྒུ་ནི་ ཏེ་ པུ་ཙ་འབོ་ སོན་པོ་ ཁོའེ་ ཁང་པ་ ཁྱེར་ཉེན་འབེ་ ཁོང་རྒུན་ལ་ ཞིའི་རྡེ་ ཐོབ་།

པ་འུ་ལུའི་ ཨེ་ཕེ་སུའི་པེ་ འུ་རྐྱོང་རྒུན་ལ་ ལྟིང་འཇུག་རྒེ་ འཇུ་ ཞུའི་།

13 པ་འུ་ལུ་ ཡ་སོ་ ཀྲོང་ཁྱེར་ལ་ ཞཔ་འགྲུལ་ལ་ རྐྱོད་ཅེ་ ཡང་ ང་ཞ་ ཏུ་རུ་ ཆུ་རེལ་ལེ་ན་ སོང་འདེ་ ཁོང་ ཉམ་པོ་ ཛོམ་ཅེ་ལ་ ཁོང་ངེ་ ཐབ་ལྡིང་། 14 ཨ་སོ་ལ་ ཁོང་ ང་ཞ་རྒུན་ ཉམ་པོ་ ཐུག་རྒེ་རྡང་, ང་ཞི་ ཁོང་ ཆུ་རེལ་ལ་ རྐྱོན་འདེ་ མི་ཏི་ལེ་ནེ་ ཀྲོང་ཁྱེར་ལ་ སོང་པེན་། 15 ཐོ་རེ་ཚུག་པོ་ ཏེ་ཀ་ནི་ ཆུ་རེལ་ལ་ ཞོན་འདེ་ ང་ཞ་རྒུན་ ཀི་འུ་ ཚོ་ལིང་ལ་ ལེཔ་, ཡང་ ལྟིང་མེ་ཞག་པོ་ ས་མོའེ་ ཚོ་ལིང་ལ་ ལེཔ་། ཏེ་སང་ ལྟིང་མེ་ཞག་པོ་ ང་ཞ་རྒུན་ མི་ལེ་ཏུའི་ ཀྲོང་ཁྱེར་ལ་ ལེཔ་། 16 པ་འུ་ལུ་ ཨེ་ཕེ་སུའི་ན་ འདེད་རྡེ་ མ་ཛེད་, ཅེ་ཟེར་ནི་ ཨ་སི་ཨཱེ་ན་ ཞུ་རྡེ་ ཏུའི་ ཀོད་ལ་ མ་ཏྃ་ལ་ ཙམ་ཐུབ་ ཉེན་ནི་ ཡེ་རུ་ཤ་ལེམ་ལ་ འགྱོ་སྤ་ རྐྱོད་ཅེ་ འདོད་པ་ ཛེད་། ཀལ་ཏེ་ ཉེན་ནི་ པེན་ཏི་ཀོའེ་སེ་ ཏུའི་ཤེན་ནེ་ ཞག་ཚུག་པ་ ཏུ་རུ་ ལབ་ཅེ་ལ་ ཐེད་རྡེ་ཡོད་པེན་།

17 མི་ལེ་ཏུའི་ནི་ པ་འུ་ལུའི་ ཨེ་ཕེ་སུའི་ ཆོའེ་ཚོག་རྒེ་ འུ་རྐྱོང་རྒུན་ལ་ ཁོང་ལ་ ཐུག་རྒེ་ལ་ ཡོྃ་ མོལ་རྡེ་ ཁྲིན་ ཀལ་། 18 འུ་རྐྱོང་རྒུན་ ལེབ་རྦེ་རྡང་, པ་འུ་ལུའི་ ཁོང་རྒུན་ལ་ མོལ་, “ཨ་སི་ཨཱ་ན་ འགོ་མ་རང་ ལེབ་རྦེ་ ཞག་ནི་ ཏག་ས་ཚུག་པ་ ངེ་ ཁྱི་ཞ་རྒུན་ ཉམ་པོ་ མི་ཙེ་ ཀ་ཟུག་ཤིག་ལ་ པུད་, ཁྱི་ཞ་རྒུན་ལ་ རྒྱུའི་ནོག་། 19 ང་ ཡ་ཧུ་འདཱ་པ་རྒུ་ནི་ ཅུའི་ངན་ མང་པེ་ རྡོང་ལེན་ ཅོ་རྒོའེ་ནྃ་, ངེ་ ང་རང་ངེ་ མི་ཙེ་ན་ མ་ ཉམ་ཤུང་ འདང་ ཆི་མག་ ཉམ་པོ་ ཙོབོ་ ཡི་ཤུའི་ ཞབ་རྟོག་ ཞུའི་རྦེན་། 20 ཁྱི་ཞི་ ཁང་པེ་ན་ འིན་འགྲོ་ ཡང་ ཕི་ལོག་ལ་ མི་མང་ངེ་ འདུན་ལ་ ཁྱི་ཞ་རྒུན་ལ་ ཕན་ཏོག་ཅེན་ནེ་ ལབ་ཞ་ ཏང་ཅེ་ལ་ ངེ་ ཐེ་ཚོམ་ མ་ནི་ མ་ཅོའེ་རྦེན་། 21 ཀོན་འཇོག་རྒེ་ ཧུ་འདུན་ལ་ སེམ་འགྱུར་འདེ་ ཨ་ཧོའེ་ ཙོབོ་ ཡི་ཤུའི་ཀ་ ཏེཏ་པ་ ཅོ་རྒོ་ཤེ་ སྤང་པོ་ ངེ་ ཡ་ཧུ་འདཱ་པ་ རྡང་ འགི་རིག་པ་རྒུན་ལ་ ཏྃ་རྦེན་།”

22 “ཏ་ ཏམ་པེ་ ཐུག་ཡིད་རྡེ་ ངེ་ སེམ་ ཁྲིད་ཏེ་ ཁྱེར་རེ་ ཛེད་ཅེ་རྦེ་ ང་ ཡེ་རུ་ཤ་ལེམ་ལ་ ཆ་རྒོའེ་། ང་ རྒྱུའི་མེད་ ཏུ་རུ་ ང་ ཉམ་པོ་ ཅི་ ཆེན་། 23 ང་ རྒྱུའི་ཡོད་, ཏམ་པེ་ ཐུག་ཡིད་རྡེ་ རྒྱལ་ས་ ཚང་མེ་ན་ ངེ་ཕི་ ཙོན་ རྡང་ རྡུ་ངལ་རྒུན་ སྲུྃ་རྡེ་ ཡོ་ཀན་འབེ་ སྤང་པུད་རྡེ་ ཛེ་རྡེ་ཡོད་། 24 ཀལ་ཏེ་ ཀོན་འཇོག་རྒེ་ ཐུག་ཞེ་ ཧོར་རེ་ ནེ་ཚུལ་ ཟང་པོ་ ཤེད་ཅེ་ ཁག་ ཀའོ་ ཙོབོ་ ཡི་ཤུའི་ ང་ ལྟེད་རྡེ་ ཛེད་, ཏོ་ ཀྲུཔ་ཅུག་ མ་ཉེན་ནེ་ ངེ་ སྲོག་པོ་ ངེ་ཕི་ རིན་མེད་ འིན་།”

25 “ཏག་ས་ཚུག་པ་ ངེ་ ཁྱི་ཞ་རྒུན་ལ་ ཀོན་འཇོག་རྒེ་ རྒྱལ་སྲིད་རྡེ་ ཧོར་ལ་ ཤེད་པེན་, འིན་ན་ ང་ རྒྱུའི་ཡོད་ ཏི་ནི་ཕ་ལ་ ཁྱི་ཞི་ ཕྲོ་ནི་ སུ་ཞིག་ལ་ ང་ ཡང་ མ་ནི་ མི་ཐོང་། 26 ཏི་རིང་ ངེ་ ཁྱི་ཞ་རྒུན་ལ་ ཟེ་འིན་, སུ་ཞིག་ ཏེཏ་པ་ མེད་པེ་ ཤི་རྡེ་ ཀོན་འཇོག་རྒེ་ ཐ་མེ་ཀ་ནེ་ ཆེད་པ་ ཕོག་ནི་ ཏོ་ ངེ་ རྐྱོན་ མན་, 27 ཅེ་ཟེར་ནི་ ངེ་ ཁྱི་ཞ་རྒུན་ལ་ ཐེ་ཚོམ་ མེད་པ་ ཀོན་འཇོག་རྒེ་ ཨ་ཧོ་རྒུ་ནི་ཕི་ ཛེད་ཀ་ནེ་ ཐབ་ ཚང་མེ་ ཧོར་ལ་ སྤང་པོ་ ཏྃ་རྦེན་། 28 ཁྱི་ཞ་རང་ འདང་ ཀོན་འཇོག་རྒེ་ ལུག་ ཚང་མ་ རྐྱོབ་ཏེ་ པོར་ཧེ་, ཀ་རྦེ་ཀ་ ཁྱི་ཞ་རྒུན་ ཏམ་པེ་ ཐུག་ཡིད་རྡེ་ འུ་རྐྱོང་ལ་ འདམ་མེ་ ཛེད་ཏེ་ འིན་, ཙོབོ་ རང་ངེ་ ཧུ་ཁྲག་ ཤལ་ལེ་ ཛེད་ཏེ་ ཉོ་ལ་ ཛེད་ཀ་ནེ་ ཆོའེ་ཚོག་པོ་ལ་ ལུག་ཟི་ ཙོག་སེ་ ལྟ་ཏོག་ ཅོའེ་ཧེ་། 29 ང་ སོང་འདེ་ ལྟིང་ནི་ ཁྱི་ཞ་རྒུ་ནི་ ཕྲོ་ ནོད་པ་ རྐྱལ་ཧན་ནེ་ ཤང་ཀུ་རྒུན་ ཡོྃ་རྡེ་ ཆོའེ་ཚོག་རྒེ་ན་ ནོད་པ་ རྐྱལ་ཅེ་རྦོ་ ང་ རྒྱུའི་ཡོད་། 30 ཁྱི་ཞ་རང་ངེ་ ཕྲོ་ནི་ ཀོན་འཇོག་རྒེ་ རྡེན་འབེ་ ཁྲིན་འབོ་ འགྱུར་རྡེ་ ཟུན་ ཏང་ཀན་རྒུན་ འབིང་འདེ་ མ་ཤི་ཀེ་ ལོབ་ཀྲུག་རྒུན་ ཁོ་རང་རྒུ་ནི་ རྒྱབ་ནི་ ཁྲིད་ཏེ་ ཁྱེར་ཤེ་ ཙོན་འགྲུའི་ ཅོའེན་། 31 ཤང་ ཅོའེ་ཧེ་, ཁྱི་ཞ་རྒུན་ ཉམ་པོ་ ལོ་ སུམ་ ཡོད་ཟ་ནི་, ཚེན་ཉིན་ མེད་པེ་ ངེ་ མིག་ཆུ་ ཉམ་པོ་ ཁྱི་ཞ་རྒུན་ལ་ ཀོན་འཇོག་རྒེ་ ལམ་མེ་ཀ་ནི་ ཐག་རིང་ལ་ མི་ཆ་ཤི་ལ་ ཏུའི་རྒྱུན་ སྤང་པུད་ཀན་འབོ་ འི་ཏུ་ ཅོའེ་ཧེ་།”

32 “ཏ་ ངེ་ ཀོན་འཇོག་ ཏང་ ཁོང་ངེ་ ཐུག་ཞེ་ ཧོར་རེ་ ཁྲིན་འབོ་ ཁྱི་ཞ་རྒུ་ནི་ ལག་ལ་ ལྟེད་རྡེ་ཡོད་, ཏེ་ ཁྲིན་འབེ་ ཁྱི་ཞ་རྒུན་ ཏེཏ་པེ་ན་ ལྡན་ཅུག་རྒེ་ ཛེད་ཅེ་, ཡང་ ཏམ་པ་ ཛེད་ཀན་ ཚང་མེ་ ཕྲོ་ ཁྱི་ཞ་རྒུན་ལ་ ནོར་ཧལ་ སལ་ལེ་ ཛེད་ཉེན་ནེན་། 33 ཞེན་མེ་ སེར་ ཡ་ མུལ་ ཡ་ ཀོའེ་ལག་རྒེ་ འདོད་པ་ ངེ་ མ་ཅོའེ་རྦེན་། 34 ངེ་ རང་ངེ་ ལག་པ་ འབད་ཏེ་ ང་རང་ འདང་ ངེ་ ཁྲོ་པ་རྒུ་ནི་ རྒོའེ་ཤེ་ འདྲན་འདྲ་ ཅོའེ་ཧན་འབོ་ ཁྱི་ཞ་ རྒྱུའི་ནོག་། 35 ངེ་ ཅོའེ་ཧན་ ཚང་མེ་ན་ ཁྱི་ཞ་རྒུན་ལ་ ཙོན་འགྲུའི་ ཉམ་པོ་ ལེ་ཧ་ ཅོའེ་རྡེ་ ཨ་ཧོ་རྒུ་ནི་ ཉམ་ཤུང་རྒུན་ལ་ ཡ་ཏོ་ ཅོ་རྒོ་ཤེའོ་ ལྟན་འབེན་། ཨ་ཧོ་རྒུ་ནི་ ཙོབོ་ ཡི་ཤུའི་ མོལ་ཧན་འབོ་ ཡིད་ཏུ་ལ་ པོར་ཤིག་, ‘ནེན་ཅེ་སང་ ཏང་ཅེའོ་ མང་ངེ་ ཅིན་ལབ་ཅེན་ འིན་།’”

36 ཏེ་ ཞལ་ཏ་རྒུན་ མོལ་རྡེ་ ལྟིང་ནི་ པ་འུ་ལུའི་ ཚང་མ་ ཉམ་པོ་ པིག་ཛུམ་ རྒྱབ་ཏེ་ མོ་ལམ་ ཞུའི་། 37 ཁོང་ ཚང་མ་ པ་འུ་ལུ་ལ་ ཁྲིལ་ཡིན་ འོ་ ཏང་ངེན་ ལྟིང་འཇུག་རྒེ་ འཇུ་ ཞུའིན་ ངུའི་། 38 ཁོང་རྒུ་ནི་ཕི་ ཚང་མེ་སང་ ཚེར་ཧ་ ཆོན་མོ་ནི་ པ་འུ་ལུའི་ ཏི་ནི་ཕ་ལ་ ཁོང་རྒུ་ནི་ ཁོང་ ཡང་ མི་ཐོང་ མོལ་ཅེ་འབོ་ འིན་འབེན་། ཏེ་ནི་ ཁོང་ ཚང་མ་ ཆུ་རེལ་ཚུག་པ་ པ་འུ་ལུ་ རྐྱལ་ལེ་ སོང་།