ཆག་ལེ་རྒུན་ 19

ཨེ་ཕེ་སུའི་ན་ པ་འུ་ལུ་།

ཨ་པོ་ལོ་ ཀོ་རིན་ཐི་ རྒྱལ་སེ་ན་ ཡོད་ཟ་ནི་, པ་འུ་ལུ་ ཨ་སི་ཨཱ་ ཡུལ་ཞོང་ངེ་ ནྃ་ངུ་ལེ་ ལམ་རྒུན་ རྒྱུད་ཏེ་ ཨེ་ཕེ་སུའི་ལ་ ལེཔ་, ཏུ་རུ་ ཁོང་ལ་ ལོབ་ཀྲུག་ ཁ་ཅིག་ ཐུག་། 2 པ་འུ་ལུའི་ ཁོང་རྒུན་ལ་ འདྲི་, “ཁྱི་ཞི་ ཏེཏ་པ་ ཅོ་རྡང་ ཁྱི་ཞི་ཀ་ ཏམ་པེ་ ཐུག་ཡིད་ པབ་རྦེ་?”

ཁོང་རྒུ་ནི་ ལེན་ཏྃ་, “ང་ཞ་ མ་ཐོབ་ལེ་, ང་ཞ་ ཏམ་པེ་ ཐུག་ཡིད་རྡེ་ ཧོར་ལ་ ཚོར་ ཁོ་རང་ མ་ཚོར་ལེ་།”

3 ཏེ་ནི་ པ་འུ་ལུའི་ འདྲི་, “ཁྱི་ཞ་རྒུ་ནི་ ཀ་ཟུག་ ཁྲུའི་ཞིག་ ནེན་འབེན་?”

ཁོང་རྒུ་ནི་ ལེན་ཏྃ་, “ཡོ་ཧཱ་ནན་ནེ་ ཁྲུའི་།”

4 པ་འུ་ལུའི་ མོལ་, “ཁྲུའི་སལ་ཧན་ ཡོ་ཧཱ་ནན་འབོ་ སེམ་འགྱུར་ཤེ་ཕི་ ནོག་, ཁོང་ངེ་ མི་རྒུན་ལ་, ཁོང་ངེ་ ལྟིང་ནི་ རྐྱོད་ཅེ་ཅེན་འབེ་ཀ་ ཏེཏ་པ་ ཅོ་ཅེ་ལ་ མོལ་, ཀ་འབོ་ ཡི་ཤུ་ ནོག་།”

5 ཏོ་ ཚོར་རྡེ་ ཁོང་རྒུ་ནི་ ཙོབོ་ ཡི་ཤུའི་ ཚན་ནེ་ཀ་ ཁྲུའི་ནེན་། 6 པ་འུ་ལུའི་ ཁོང་རྒུ་ནི་ འགོའེ་ཀ་ ཆག་ པོ་རེ་རྡང་, ཁོང་ ཚང་མེ་ཀ་ ཏམ་པེ་ ཐུག་ཡིད་ པབ་། ཁོང་རྒུ་ནི་ ཧད་ སོ་སོའེ་ན་ སྤེ་ར་ ཏྃ་ ཡང་ ལུང་རྟན་ ཤེད་། 7 ཁོང་རྒུ་ནི་ ཀྲང་ཧ་ ཧ་ལམ་ ཅུག་ཉི་ ཡོད་པེན་།

8 པ་འུ་ལུ་ ཡ་ཧུ་འདཱ་པེ་ འདུ་ཀང་ངེ་ན་ རྐྱོད་ཏེ་ ཧ་ལམ་ ལྡ་ སུམ་, མ་ ཧམ་བ་ ཉམ་པོ་ ཆོའེ་ཤེད་ཏེ་ ཀོན་འཇོག་རྒེ་ རྒྱལ་སྲིད་རྡེ་ ཧོར་ལ་ ཉེན་ཀན་རྒུ་ནི་ ཏེཏ་པ་ ཅོ་ཉེན་ཅེ་ ཀྲོའེ་རྡུར་ ཅོའོ་ ཛེད་། 9 འིན་ན་ ཁ་ཅིག་རྒེ་ སེམ་ མ་ ཀྱོང་པོ་ ཅོའེ་རྡེ་ ཏེཏ་པ་ ཅོ་ཅེ་ལ་ མ་ཐེད་, ཡང་ མི་མང་ངེ་ འདུན་ལ་ མ་ཤི་ཀེ་ ལམ་མེ་ཀ་ འགྲུལ་ཧན་རྒུ་ནི་ ཧོར་ལ་ སྤེ་ར་ ངན་པ་ མང་པོ་ ཟེར་། ཏོ་རྦེ་ཕི་ པ་འུ་ལུའི་ ཁོང་རྒུན་ ཕྃ་རྡེ་ ལོབ་ཀྲུག་རྒུན་ ཁོ་རང་ ཉམ་པོ་ ཁྲིད་ཏེ་ ཁྱེར་, ཡང་ ཏྲེ་ར་ནུ་, ལོབ་ཞོང་ ཅོ་སེ་ མལ་ལེ་ན་ ཞག་ཏང་ ཀྲོའེ་རྡུར་ ཛེ་རྡེ་ཡོད་པེན་། 10 ཏེ་ ཀྲོའེ་རྡུར་རེ་ ཚིར་ཀའོ་ ཧ་ལམ་ ལོ་ ཉི་ཚུག་པ་ འགྲུལ་རྦེ་, ཨ་སི་ཨཱ་ ཡུལ་ཞོང་ངེ་ན་ འདེད་ཀ་ནེ་ ཡ་ཧུ་འདཱ་པ་ རྡང་ འགི་རིག་པ་རྒུན་ལ་ ཙོབོ་ ཡི་ཤུའི་ ཀའ་ ཚོར་།

11 ཀོན་འཇོག་རྒེ་ པ་འུ་ལུ་ རྒྱུད་ཏེ་ མ་ ཧ་ལེ་ཤེ་ ཛེད་པ་རྒུན་ ཛེ་རྡེ་ཡོད་པེན་། 12 སྤེར་ན་ པ་འུ་ལུའི་ ཆག་ ཐུག་ཀ་ནེ་ ཆག་ཕི་ ཡང་ ཀོའེ་ལག་ མི་ ཟུར་མོ་ ཡོང་ཀན་རྒུན་ལ་ ཐུག་ནི་ ཟུར་མོ་ རྒྱལ་ཅེ་ ཡང་ རྡུད་ ཞུ་རྡེ་ ཡོ་ཀན་རྒུན་ འབིང་འདེ་ ཆ་ཡོད་པེན་།

13 ཀྲོང་ཁྱེར་ནི་ ཀྲོང་ཁྱེར་ལ་ རྡུད་ ཞུ་ཧན་རྒུན་ ཕིང་ངེ་ལ་ ཆ་ཀ་ནེ་ ཡ་ཧུ་འདཱ་པ་ ཁ་ཅིག་རྒེ་ ཙོབོ་ ཡི་ཤུའི་ ཚན་ ཀོལ་རྡེ་ རྡུད་རྒུན་ ཕིང་ཅེ་ ཙོན་འགྲུའི་ ཅོའེ་རྡེ་ ཟེར་, “པ་འུ་ལུའི་ ཆོའེ་ཤེད་ཀ་ནེ་ ཡི་ཤུའི་ ཚན་ནེ་ཀ་ འབིང་འདེ་ ཆ་ཅེ་ལ་ ངེ་ ཀཱ་ ཏང་ངེ་ཡོད་།” 14 ཡ་ཧུ་འདཱ་པེ་ ལ་མ་ འུ་རྐྱོང་ ཧེ་ཝཱ་ ཟེར་ཧ་ནི་ པུ་ཙ་ རྡུན་ཀེ་ ཏུ་ཟུག་ ཅོ་ཡོད་པེན་། 15 འིན་ན་ ཞག་ཤིག་ རྡུད་པེ་ ཁོང་རྒུན་ལ་ ཟེར་, “ང་ ཡི་ཤུ་ ཤེ་ཡོད་, ཡང་ པ་འུ་ལུ་ལ་, འིན་ན་ ཁྱེ་རང་རྒུན་ སུ་ འིན་?” 16 ཏེ་ནི་ ཏེ་ རྡུད་ ཞུ་ཧ་ནེ་ མིའུ་ ཁོང་རྒུ་ནི་ཀ་ ཆོྃ་, ཁོང་རྒུ་ནི་སང་ ཤེད་ཆེ་ སོང་འདེ་ ཁོང་རྒུན་ལ་ ཧོཔ་ རྡུྃ་རྦེ་ ཁོང་རྒུན་ ཁྲག་ འབིང་ངེན་ ལྕུ་རུ་ ཏེ་ ཁང་པ་ནི་ ཤོར་།

17 འི་ ནེ་ཚུལ་རྦོ་ ཨེ་ཕེ་སུའི་ན་ ཡོ་ཀ་ནེ་ ཡ་ཧུ་འདཱ་པ་ རྡང་ འགི་རིག་པ་རྒུན་ལ་ རྒྱུའི་ཆ་རྡང་, ཁོང་རྒུ་ནི་ ཙོབོ་ ཡི་ཤུའི་ འཇིའི་རྡེ་ན་, ཁོང་ངེ་ ཚན་ལ་ སི་ཝ་ ཀྲག་པོ་ ཏྃ་། 18 ཏེཏ་པ་ ཅོ་ཀ་ནེ་ མི་ མང་པོ་ ཡོྃ་རྡེ་ རང་རང་ངེ་ ལེ་ཧ་ ངན་པ་རྒུན་ མི་ཚང་མེ་ འདུན་ལ་ ཤེད་ཏེ་ སེམ་འགྱུར་། 19 ཡང་ ངན་ཆོའེ་ ཅོ་ཀན་རྒུ་ནི་ རང་ངེ་ ངན་པ་ ངན་ཆོའེ་ སྤེ་ཆ་རྒུན་ ཁྱོྃ་རྡེ་ མི་ཚང་མེ་ འདུན་ལ་ མེ་ ཏུག་, ཏེ་ སྤེ་ཆ་རྒུ་ནི་ རིན་ཚད་པོ་ སི་རྦེ་, མུལ་ལེ་ འགྱིར་མོ་ ལྟོང་ ངཔ་ཅུ་ འབིང་། 20 ཏོ་རྦེ་ ཅོའེ་རྡེ་ ཙོབོ་ ཡི་ཤུའི་ ཀའ་ ཀང་ལུྃ་ས་ ཕེལ་ ཡང་ འབྲེ་རྦུ་ ཀྲག་པོ་ མིན་།

21 ཏེ་ ཚང་མ་ སོང་འདེ་ ལྟིང་ནི་ པ་འུ་ལུའི་ མ་ཀེ་འདོ་ནི་ཡཱ་ རྡང་ ཨ་ཀ་ཡཱ་ ཡུལ་རྒུན་ རྒྱུད་ཏེ་ ཡེ་རུ་ཤ་ལེམ་ལ་ ཆ་ཅེ་ལ་ ཐག་ཅེད་, ཡང་ ཁོང་ངེ་ མོལ་, “ཏུ་རུ་ འདེད་ཏེ་ ལྟིང་ནི་ ང་ རོམ་ལ་ ཆ་རྒོའེ་།” 22 པ་འུ་ལུའི་ ཁོང་ངེ་ ཁྲོ་པ་ ཏི་མོ་ཐི་ རྡང་ ཨེ་རེ་ཏུའི་རྒུན་ མ་ཀེ་འདོ་ནི་ཡཱ་ ལམ་ཅུག་ ཡང་ ཁོ་རང་ ཨ་སི་ཨཱ་ན་ ཞག་ ཁ་ཅིག་ ཞུའུ་།

ཨེ་ཕེ་སུའི་ན་ ཟི་ངིལ་ འབིང་།

23 ཏེ་རྒ་ ཏུའི་ལ་ ཡེ་ཕེ་སུའི་ན་ མ་ཤི་ཀེ་ ལམ་མེ་ཀ་ འགྲུལ་ཧན་ནེ་ རྒྱཔ་འགལ་ལ་ མ་ ཟི་ངིལ་ སྲན་ཀྲེ་ འབིང་། 24 འདེ་མེ་ཏྲི་འུ་ ཟེར་ཧ་ནེ་ སེར་འགར་ ཀ་རྦེ་ ཨར་ཏི་མི་ ཀོན་འཇོག་རྒེ་ ཁང་པེ་ ཟོ་རྒུན་ མུལ་ལ་ ཅོའེ་རྡེ་ ཙོང་ངེ་ཡོད་པེན་། ཁོའེ་ ཚོང་འབོ་ རྒྱ་ལེ་ འགྲུལ་རྦེ་, ལེ་མི་ ཟོ་པ་ མང་པོ་ཞིག་ ལེ་ཧེ་ཕི་ པོར་རྡེ་ ཡོད་པེན་། 25 ཁོའེ་ རང་ངེ་ ཁྲོ་པ་ ཟོ་པ་ ཚང་མ་ ཡང་ ཚོང་ འདང་ འབྲེལ་རྡེ་ ཡོ་ཀ་ནེ་ མི་རྒུན་ འབོའེ་རྡེ་ ཟེར་, “ལེ་ཅེད་པ་ ཁྲོ་པ་རྒུན་, འི་ ལེ་ཧ་རྦོ་ རྒྱུད་ཏེ་ ཨ་ཧོ་ལ་ ཡོང་རྒོ་ མང་པོ་ ཡོ་ཀན་འབོ་ ཁྱི་ཞ་རྒུན་ལ་ རྒྱུའི་ནོག་། 26 འིན་ན་ ཁྱི་ཞ་རྒུ་ནི་ ཐོང་ངེན་ ཡང་ ཚོར་རེན་ ནོག་, ཏེ་ མི་ པ་འུ་ལུའི་ ཨེ་ཕེ་སུའི་ མ་ཚེད་ ཨ་སི་ཨཱེ་ ཡུལ་ སོན་ཏེ་ན་ མི་ ལག་པ་ནི་ ཅོ་ཀ་ནེ་ ཧུ་འདྲ་རྒུན་ རྡེན་འབེ་ ཀོན་འཇོག་ མག་ ཟེར་རྡེ་ མི་ མང་པོ་ ཁོའེ་ ཤེད་ཀན་འབེ་ཀ་ ཏེཏ་པ་ ཅོ་ཅུག་། 27 མི་རྒུ་ནི་ ཨ་ཧོའེ་ ཟོ་ལེ་རྦོ་ལ་ རིན་ཅེན་ ཅོ་ཅེའོ་ ཕང་ཅེ་ འཇི་སྤ་ མ་ཚེད་, འཇིག་རྦོ་ ཨར་ཏི་མི་ ལ་མོའེ་ ཀོན་འཇོག་རྒེ་ ཁང་པེ་ ཧོར་ལ་ སྤེ་ར་ སོག་པོ་རྒུན་ ཟེ་རེན་། ཡང་ འི་ ཡུལ་ སོན་ཏེ་ མ་ཐེ་, འཇིག་རྟེན་ སོན་ཏེ་ན་ འི་ ལ་མོ་ལ་ ཅོལ་ཧན་རྒུ་ནི་ལ་ ཁོང་ལ་ ཀོན་འཇོག་ ཙོག་སེ་ སི་ཝ་ མི་ཏང་།”

28 ཏོ་ ཚང་མ་ ཚོར་རེ་རྡང་ ཟོ་ལེ་པ་རྒུན་ལ་ མ་སྲན་ཀྲེ་ སྲོ་ ཡོྃ་རྡེ་ ཀུ་ཅུ་ ཏང་ངེན་ ཟེར་, “ཨེ་ཕེ་སུའི་པེ་ ལ་མོ་ ཨར་ཏི་མི་ མ་ འཇི་སྤོ་ འིན་།” 29 ཐོང་ངེན་ ཐོང་ངེན་ འདང་ རྒྱལ་ས་ སོན་ཏེ་ན་ ནེ་ལུག་ སོག་པོ་ སོང་, མི་རྒུ་ནི་ མ་ཀེ་འདོ་ནི་ཡཱ་པ་ པ་འུ་ལུའི་ པེ་ ཁྲོ་པ་ འགཱ་ཡུ་ རྡང་ ཨ་རི་ཏར་ཀུ་ ཟུམ་འདེ་ ཀྲུད་རྡེན་ མི་རྒུན་ ཛོམ་སེ་ ས་ཅེ་ཀ་ ཁྱེར་། 30 པ་འུ་ལུ་ལ་ མི་ཚོག་རྒེ་ ཕྲོ་ རྐྱོད་ཉིན་ ཡོད་པེན་, འིན་ན་ ལོབ་ཀྲུག་རྒུ་ནི་ རྒག་ཏེ་ རྐྱོད་ མ་ཅུག་། 31 ཡང་ ཏེ་ རྒྱལ་ཁབ་རྦེ་ སྤོན་འབོ་, པ་འུ་ལུའི་ ཡ་ཏོ་ ཁ་ཅིག་རྒེ་ལ་ ཁོང་ལ་ མི་ཚོག་ ཛོམ་ས་ མ་རྐྱོད་ ཟེར་རྡེ་ ཞུ་ཝ་ པུ་ལེན་ ཁྲིན་ ཀལ་།

32 མི་ཚོག་རྒེ་ན་ ཐེ་ཙོམ་ མང་པོ་ སོང་, མི་ སོ་སོའེ་ སྤེ་ར་ སོ་སོ་ ཟེ་རེན་ ཀུ་ཅུ་ ཏང་ངེ་ཡོད་པེན་, ཡང་ མང་ཆེ་རྦོ་ལ་ ཁོང་རྒུན་ ཏུ་རུ་ ཅི་ཕི་ལ་ ཡོྃ་རྡེ་ འིན་ཀན་འབོ་ལ་ རྒྱུའི་ མེད་པེན་། 33 ཏེ་ ནེ་ལུག་པོ་ ཧ་ཀོ་ཅུག་ཅེ་ལ་ ཡ་ཧུ་འདཱ་པ་རྒུ་ནི་ ཨ་ལེག་ཟན་འདེར་ མི་ཚོག་རྒེ་ འདུན་ལ་ ཕུལ་། ཁོའེ་ མི་རྒུན་ལ་ ཅེཔ་ཁ་རོག་ཏེ་ ལྟའ་ ཅོའེ་རྡེ་ སྤེ་ར་ ཟེར་ཤེ་ ཙོན་འགྲུའི་ ཅོའེ་། 34 འིན་ན་ མི་རྒུ་ནི་ ཁོ་ ཡ་ཧུ་འདཱ་པ་, ཨར་ཏི་མི་ལ་ མ་སི་ཀན་ འིན་ཀན་འབོ་ ཤེ་རྡེ་རྡང་, མི་ཚང་མ་ ཅིག་ སོང་འདེ་ ཆུ་ཙོད་ ཉི་ ཟམ་ ཀུ་ཅུ་ ཏང་ངེན་ ཟེར་, “ཨེ་ཕེ་སུའི་པེ་ ལ་མོ་ ཨར་ཏི་མི་ འཇི་སྤོ་ འིན་།”

35 འིན་ན་ རྒྱལ་སེ་ སྤོན་འབོ་རྦེ་, མི་ཚོག་པོ་ལ་ ཁ་རོག་ཅུག་ཉེན་ ཡང་ ཟེར་, “ཨེ་ཕེ་སུའི་པ་རྒུན་, ཨེ་ཕེ་སུའི་ རྒྱལ་ས་, ལ་མོ་ ཨར་ཏི་མི་ ཀོན་འཇོག་རྒེ་ ཁང་པ་ འདང་ ནམ་ཀ་ནི་ པབ་ཀ་ནེ་ ཁོང་ངེ་ ཧུ་འདྲ་ སྲུང་ཀན་ འིན་ཀན་འབོ་ ཚང་མ་ལ་ རྒྱུའི་ནོག་། 36 འི་ རྡེན་འབའ་རྒུན་ལ་ སུ་ཞིག་ལ་ རྒྱཔ་འགལ་ ཅོ་མི་ཉེན་ཅེ་རྦེ་, ཁྱི་ཞ་ ཚང་མ་ ཅེཔ་ཁ་རོག་ཏེ་ འདོད་ཧེ་ ཡང་ རིང་འགྱོག་ན་ ཧ་འགྲང་ངེ་ ལེ་ཧ་ མ་ཅོ་ཧེ་། 37 ཁྱི་ཞི་ ཟུམ་འདེ་ འེ་ཀ་ ཁྱོང་ཀན་རྒུ་ནི་ ང་ཞི་ ལ་མོ་ལ་ ཏེཏ་ལོག་ མ་ཅོའེ་རྡོག་ ཡང་ ཁོང་ངེ་ ཀོན་འཇོག་རྒེ་ ཁང་པ་ལ་ མ་ ཅོམ་འདོག་།”

38 “ཀལ་ཏེ་ སེར་འགར་ འདེ་མེ་ཏྲི་འུ་ རྡང་ ཁོའེ་ ཁྲོ་པ་ ཟོ་པ་རྒུ་ནི་ ཁོང་རྒུ་ནི་ ཁྲིམ་ ཅག་ཏོག་ སམ་མེ་ཡོད་ནི་, ཁྲིམ་ཁུང་ པེ་རྡེ་ ཁྲིམ་སྤོན་རྒུན་ ཡོད་ཏེ་ ནོག་, ཏུ་རུ་ ཁོང་རྒུ་ནི་ རྒྱཔ་འགལ་ལ་ ཤའ་ ཏང་ཉེན་ཅེ་ ནོག་། 39 ཀལ་ཏེ་ ཁྱི་ཞ་རྒུན་ལ་ ཁོང་རྒུ་ནི་ རྒྱཔ་འགལ་ལ་ ཞེན་ཡང་ ཉེད་ཀལ་ ཡོད་ནི་ ཏོ་རྒུན་ལ་ ཏེ་ ཁྲིམ་སྤོན་རྒུ་ནི་ ཐག་ཅེད་ ཉེན་ཅེ་ ནོག་། 40 ཏི་རིང་ སོང་ཀན་ ཚང་མེ་ ལྟིང་ནི་ རོམ་པེ་ ཝང་སྲུལ་རྦེ་ ཨ་ཧོ་ ཟི་ངིལ་ འབིང་ཅུག་ཅེ་ལ་ ཉེད་ཀལ་ ཀལ་ཤེ་ འཇི་སྤ་ ནོག་། འི་ ཟི་ངིལ་ ཕིང་ཅེ་རྦེ་ཕི་ ཅང་ རྒྱུ་ཚན་ རྒྱལ་ལེ་ཞིག་ མེད་པེ་ ཨ་ཧོའེ་ ཅི་ ལེན་ཏང་ངེན་།” 41 ཏོ་རྒུན་ ཟེར་རྡེ་ ལྟིང་ནི་ ཁོའེ་ ཏེ་ མི་ཚོག་པོ་ ཤོལ་ཅུག་།