ཆག་ལེ་རྒུན་ 18

པ་འུ་ལུ་ ཀོ་རིན་ཐི་ རྐྱོད་།

ཏེ་ ལྟིང་ནི་ པ་འུ་ལུ་ ཨེ་ཐེན་ རྒྱལ་ས་ནི་ ཀོ་རིན་ཐི་ རྒྱལ་ས་ རྐྱོད་། 2 ཏུ་རུ་ པ་འུ་ལུ་ལ་ པོན་ཏུ་ན་ རྐྱེ་ཀན་, ཨ་ཀུའི་ལ་ ཟེར་ཧ་ནེ་ ཡ་ཧུ་འདཱ་པ་ཞིག་ ཐུག་, ཁོ་ ཁོ་རང་ངེ་ ན་མ་ པིརི་སི་ལ་ ཉམ་པོ་ ཉེ་ཐུབ་ཅིག་ལ་ ཨི་ཏྲ་ལི་ ཡུལ་ནི་ ཀོ་རིན་ཐི་ རྒྱལ་ས་ ཡོྃ་རྡེ་ འིན་འབེན་, ཅེ་ཟེར་ནི་ རོམ་མེ་ རྒྱ་སྤོ་ ཀོལོ་འདི་འུ་ ཡ་ཧུ་འདཱ་པ་ ཚང་མ་ རོམ་ རྒྱལ་ས་ནི་ འབིང་འདེ་ ཆ་རྒོའེ་ ཟེར་རྡེ་ ཀཱ་ ཏྃ་རྡེ་ འིན་འབེན་། 3 ཨ་ཀུའི་ལ་ རྡང་ པིརི་སི་ལ་རྒུན་ ཙོག་སེ་ པ་འུ་ལུ་ལ་ ཀུར་ ཙེམ་ཅེ་ ལེ་ཧ་ ཛེད་ཀན་ འིན་འབེ་, པ་འུ་ལུ་ ཁོང་རྒུ་ནི་ ཁང་པ་ ཞུ་རྡེ་ ཁོང་རྒུན་ ཉམ་པོ་ ལེ་ཧ་ ཅོའེ་། 4 ངལ་ཚོའེ་ ཞག་ལ་ རིམ་རྒྱི་ ཁོང་ ཡ་ཧུ་འདཱ་པེ་ འདུ་ཀང་ལ་ རྐྱོད་ཏེ་ ཡ་ཧུ་འདཱ་པ་ རྡང་ འགི་རིག་པ་རྒུན་ལ་ ཁོང་ངེ་ ཁྲིན་འབེ་ཀ་ ཏེཏ་པ་ ཅོ་ཅུག་ཅེ་ ཙོན་འགྲུའི་ ཅོའེན་ ཁོང་རྒུན་ ཉམ་པོ་ ཀྲོའེ་འདུར་ ཛེ་རྡེ་ཡོད་པེན་།

5 སེ་ལེ་ རྡང་ ཏི་མོ་ཐི་ མ་ཀེ་འདོ་ནི་ཡཱ་ནེ་ ལེབ་རྦེ་རྡང་, པ་འུ་ལུའི་ རང་ངེ་ ཏུའི་ སོན་ཏེ་ ཆོའེ་ཤེད་རྡེན་ ཡ་ཧུ་འདཱ་པ་རྒུན་ལ་ ཡི་ཤུ་ནི་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ འིན་ཀན་འབེ་ སྤང་པོ་ ཏང་ཅེ་ན་ པུད་། 6 འིན་ན་ ཡ་ཧུ་འདཱ་པ་རྒུ་ནི་ པ་འུ་ལུ་ལ་ རྒྱཔ་འགལ་ ཅོའེ་རྡེ་ ཁོང་ངེ་ ཧོར་ལ་ ངན་པ་ ཟེར་རྦེ་ ཁོང་ངེ་ ཁོ་རང་ངེ་ ནམ་ཟའོ་ སྲུག་ཏེ་ ཁོང་རྒུན་ལ་ སྤང་པུད་རྡེན་ མོལ་, “རྡིག་པ་ ཅོ་ཅེ་རྦེ་ ཁྱི་ཞ་ ཆེད་པ་ ཕོག་ནི་ ཁྱི་ཞ་རང་ངེ་ རྐྱོན་ འིན་, ངེ་ མན་། ཏེ་ནི་ཕ་ལ་ ང་ ཡ་ཧུ་འདཱ་པ་ མན་ཀན་རྒུན་ལ་ ཆོའེ་ཤེད་རྡེ་ལ་ ཆ་ཡོད་།”

7 ཏེ་ནི་ ཁོང་ ཡ་ཧུ་འདཱ་པེ་ འདུ་ཀང་ནི་ འབིང་འདེ་ ཀོན་འཇོག་ལ་ ཅོལ་ཧན་ནེ་ མི་ ཏི་ཏུའི་ ཡུའི་ཏུ་ ཟེར་ཧ་ནེ་ ཁང་པ་ རྐྱོད་, ཀའོ་ འདུ་ཀང་ངེ་ ཚམ་ལ་ ཡོད་པེན་། 8 ཏོ་ འདུ་ཀང་ངེ་ འུ་རྐྱོང་ ཀི་རི་པུ་ ཟེར་ཧན་ འདང་ ཁོའེ་ ནང་ཚང་ སོན་ཏེ་ ཙོབོ་ ཡི་ཤུའི་ཀ་ ཏེཏ་པ་ ཅོའེ་, ཁོང་རྒུན་ མན་ཀན་ ཀོ་རིན་ཐི་པ་ མང་པོ་ཞིག་ལ་ པ་འུ་ལུའི་ ཆོའེ་ ཚོར་རྡེ་ ཏེཏ་པ་ ཅོའེ་, ཡང་ ཁྲུའི་ནེན་།

9 ཞག་ཤིག་ ཚེན་ལ་ ཞལ་ཟིག་ཅིག་རྒེ་ན་ ཙོབོ་ ཡི་ཤུའི་ པ་འུ་ལུ་ལ་ མོལ་, “འཇིའི་ མ་འཇིའི་, ཅེཔ་ཁ་རོག་ཏེ་ མ་འདེད་ལ་ ཆོའེ་ ཤོད་། 10 ང་ ཁྱེ་རང་ ཉམ་པོ་ ཡོད་ ཡང་ སུ་ཞིག་ལ་ ཁྱེ་རང་ལ་ ནོད་རྐྱལ་ མི་ཉེན་, ཅེ་ཟེར་ནི་ འི་ རྒྱལ་སེ་ན་ ངེ་ཀ་ ཏེཏ་པ་ ཅོ་ཅེ་ལ་ ངེ་ མི་ མང་པོ་ཞིག་ འདམ་འདེ་ ཡོད་།” 11 ཏོ་རྦེ་ཕི་ པ་འུ་ལུ་ ཏུ་རུ་ ལོ་ ཅིག་ ཏང་ ཕེད་ ཀོན་འཇོག་རྒེ་ ཀའ་ ཤེད་རྡེན་ ཞུའུ་།

12 འགལ་ལི་འོ་ ཟེར་ཧན་འབོ་ ཨ་ཀ་ཡཱ་ ཡུལ་ཞོང་ངེ་ ཀ་ལོན་ ཡོད་ ཏུའི་ལ་, པ་འུ་ལུའི་ རྒྱཔ་འགལ་ལ་ ཡ་ཧུ་འདཱ་པ་རྒུན་ ཅིག་ སོང་འདེ་ ཁོང་ ཟུམ་འདེ་ ཁྲིམ་ཁུང་ལ་ ཁྱེར་། 13 ཁོང་རྒུ་ནི་ ཉེད་ཀལ་རྡེ་ ཟེར་, “འི་ མི་རྦེ་ མི་རྒུན་ལ་ ཀོན་འཇོག་ལ་ ཅོལ་ཤེ་ ཏུ་ཟུག་ ཚུལ་ རིག་རྒེ་ ལབ་ཞ་ ཏང་འདུག་, ཀའོ་ ང་ཞི་ ཀཱ་ཁྲིམ་མེ་ རྒྱཔ་འགལ་ ནོག་།”

14 པ་འུ་ལུའི་ མོལ་ཤེ་ ཅོ་རྡང་, འགལ་ལི་འོའེ་ ཡ་ཧུ་འདཱ་པ་རྒུན་ལ་ ཟེར་, “ཀལ་ཏེ་ འི་ མི་རྦེ་ རོམ་པེ་ ཀཱ་ཁྲིམ་ འདང་ འགལ་ཧན་ནེ་ མི་འོའེ་སྤ་ ཆུང་ཙེ་ ཡང་ ཆོན་མོ་ཞིག་ ཅོའེ་རྡེ་ ཡོད་པེན་ན་ ངེ་ ཁྱི་ཞི་ ཟེར་ཟེར་ ཏང་ཀན་འབོ་ ཉེན་ཅེ་རག་པེ་, 15 འིན་ན་ ཁྱི་ཞི་ ཉེད་ཀལ་རྦོ་ ཁྱི་ཞ་རང་ངེ་ ཀཱ་ཁྲིམ་, མིང་ རྡང་ སྤེ་ར་རྒུ་ནི་ ཧོར་ལ་ ནོག་། ཏོ་རྒུན་ ཁྱི་ཞ་རང་རྒུ་ནི་ ཐག་ཅོད་། ངེ་ ཏོ་ ཙོག་སེ་རྒུ་ནི་ཀ་ ཁྲིམ་ཅེད་ ཏང་ངེ་མེད་།” 16 ཏུ་ཟུག་ ཟེར་རྡེ་ ཁོའེ་ ཁོང་རྒུན་ ཁྲིམ་ཁུང་ནི་ ཕིང་འདེ་ ཏྃ་།

17 ཏེ་ནི་ ཁོང་རྒུ་ནི་ འདུ་ཀང་ངེ་ འུ་རྐྱོང་ སོའེ་ཐེ་ནེ་ ཟེར་ཧན་འབོ་ ཟུམ་འདེ་ ཁྲིམ་ཁུང་ངེ་ན་ ཧོཔ་ རྡུྃ་, འིན་ན་ འགལ་ལི་འོའེ་ ཏོ་རྦེ་ཀ་ ནྃ་ མ་ཏྃ་།

པ་འུ་ལུ་ ཨན་ཏི་ཡོག་ལ་ ལོག་ཏེ་ རྐྱོད་།

18 ཞག་ ཁ་ཅིག་ ཀོ་རིན་ཐི་ལ་ ཞུ་རྡེ་ ལྟིང་ནི་ པ་འུ་ལུའི་ ཏེཏ་པ་ཅན་རྒུན་ལ་ ལྟིང་འཇུག་རྒེ་ འཇུ་ ཞུའི་རྡེ་ ཆུ་རེལ་ལེ་ན་ ཞོན་འདེ་ སི་རི་ཡཱེ་ ཡུལ་ཞོང་ལ་ རྐྱོད་, ཁོང་ ཉམ་པོ་ པིརི་སི་ལ་ རྡང་ ཨ་ཀུའི་ལ་ ཡོད་པེན་། ཆུ་རེལ་ན་ ཆ་སང་ ངུལ་ལ་ ཀོན་འཇོག་ལ་ ཁ་ཅེད་ ཛེད་ཏེ་ ཡོ་ཀན་འབེ་ ཅོའེ་རྡེ་ པ་འུ་ལུའི་ ཀེན་ཁེ་རེ་ ཟེར་སེ་ན་ ཁོ་རང་ངེ་ སྲ་ འབྲག་།

19 ཁོང་རྒུན་ ཨེ་ཕེ་སུའི་ལ་ ལེབ་རྦེ་རྡང་ པ་འུ་ལུའི་, ཨ་ཀུའི་ལ་ རྡང་ པིརི་སི་ལ་ ཚོའེ་ ཐ་མ་ ཕྃ་ ཡང་ ཁོང་ ཡ་ཧུ་འདཱ་པེ་ འདུ་ཀང་ལ་ རྐྱོད་ཏེ་ ཡ་ཧུ་འདཱ་པ་རྒུན་ ཉམ་པོ་ སུང་རབ་རྦེ་ ཧོར་ལ་ ཀྲོའེ་རྡུར་ ཛེད་། 20 ཁོང་རྒུ་ནི་ པ་འུ་ལུ་ལ་ ཏ་རུང་ མང་ངེ་ ཞུའུ་ ཟེར་རྡེ་ ཞུ་ཝ་ ཕུལ་རྦེ་, ཁོང་ མ་ཞུའུ་། 21 འིན་ན་ ཁོང་ འདུ་ཀང་ནི་ འབིང་འདེ་ རྐྱོད་ཟ་ནི་ མོལ་, “ཀལ་ཏེ་ ཀོན་འཇོག་རྒེ་ ཐུག་འདོད་ ཡོད་ནི་ ང་ ཁྱི་ཞ་རྒུན་ས་ ཡང་ ཡོང་ངེན་།” ཏེ་ནི་ ཁོང་ ཆུ་རེལ་ལ་ ཞོན་ནེ་ ཛེད་ཏེ་ ཨེ་ཕེ་སུའི་ན་ རྐྱོད་། 22 ཚོའེ་ ཐ་མེ་ རྒྱལ་ས་ ཀཱེ་སར་རི་ཡ་ ལེབ་རྦེ་རྡང་, ཁོང་ ཡེ་རུ་ཤ་ལེམ་ལ་ རྐྱོད་ཏེ་, ཏུ་རུ་ ཡོ་ཀ་ནེ་ ཏེཏ་པ་ཅན་རྒུན་ལ་ ཐུག་། ཏེ་ནི་ ཨན་ཏི་ཡོག་ རྒྱལ་ས་ ཆོག་ལ་ རྐྱོད་།

23 ཨན་ཏི་ཡོག་ལ་ ཞག་ ཁ་ཅིག་ ཞུ་རྡེ་ ལྟིང་ནི་, ཁོང་ འགཱ་ལ་ཏི་ཡཱ་ རྡང་ ཕི་རི་ཀི་ཡཱ་ ཡུལ་ཞོང་ ཚང་མ་ལ་ རྐྱོད་ཏེ་, ལོབ་ཀྲུག་རྒུ་ནི་ ཏེཏ་པ་ རྟེམ་པོ་ ཅོའོ་ ཛེད་།

24 ཏེ་རྒ་ ཏུའི་ལ་ ཨ་ལེག་ཟན་འདྲིརི་ཡ་པ་ ཨ་པོ་ལོ་ ཟེར་ཧ་ནེ་ ཡ་ཧུ་འདཱ་པ་ཞིག་, ཨེ་ཕེ་སུའི་ལ་ ལེཔ་, ཁོ་ རྒྱ་ལེ་ སིལ་ཧན་ སྤེ་ར་ ཏྃ་ལ་ ཁེ་སྤ་ ཡང་ ཁོའེ་ ཡ་ཧུ་འདཱ་པེ་ སུང་རབ་རྦེ་ན་ ཧ་ཀོ་ ཐར་ཁྱེལ་ ཡོད་པེན་། 25 ཁོ་ ཙོབོ་རྡེ་ ཐར་པེ་ ལམ་མེ་ ཧོར་ལ་ ལབ་ཞ་ ཐོབ་ཏེ་ སེམ་ཤུག་ ཏང་ ཤུག་ ཆོན་མོ་ ཉམ་པོ་ ཡི་ཤུའི་ ཧོར་ལ་ ཤེད་ཀན་རྒུན་ རྡེན་འབའ་ འིན་འབེན་, འིན་ན་ ཁོ་ ཡོ་ཧཱ་ནན་ནེ་ སལ་ཧ་ནེ་ ཁྲུའི་ ཅིག་པེ་ ཧོར མ་ནི་ རྒྱུའི་ མེད་པེན་། 26 ཁོའེ་ འདུ་ཀང་ངེ་ན་ ཀོན་འཇོག་རྒེ་ ཀའ་ མ་ ཤུག་ཤེན་ ཉམ་པོ་ ཤེད་ཅེ་ འགོ་ཟུག་། པིརི་སི་ལ་ རྡང་ ཨ་ཀུའི་ལ་, ཨ་པོ་ལོའེ་ ཆོའེ་ཤེད་ཀན་འབོ་ ཚོར་རེ་རྡང་, ཁོང་རྒུ་ནི་ ཁོ་ སོ་སོ་ ཁྱེར་རྡེ་ ཀོན་འཇོག་རྒེ་ ཐར་པེ་ ལམ་མེ་ ཧོར་ རྡང་ མང་ངེ་ སལ་སྤོ་ ཅོའེ་རྡེ་ ཧ་ཀོ་ཅུག་།

27 ཨ་པོ་ལོའེ་ ཨ་ཀ་ཡཱ་ རྐྱོད་ཅེ་ འདོད་པ་ ངོན་ ཅུག་པེ་ ཏུ་རུ་ ཡོ་ཀ་ནེ་ ཏེཏ་པ་ཅན་རྒུ་ནི་ ཁོ་ ཆ་ཅེ་ལ་ སེམ་རུའི་ ཏྃ་རྡེ་ ཨ་ཀ་ཡཱ་ ཡོ་ཀ་ནེ་ ལོབ་ཀྲུག་རྒུན་ལ་ ཨ་པོ་ལོའེ་ལ་ རྒ་སུའི་ ཞུ་ཅེ་ལ་ ཡི་རྒེ་ འབྲི་། ཏུ་རུ་ ལེབ་རྦེ་རྡང་, ཙོབོ་རྡེ་ ཐུག་ཞེ་ རྒྱུད་ཏེ་ ཏེཏ་པ་ ཅོའེ་ཧན་རྒུན་ལ་ ཁོང་ མ་ ཕན་ཏོག་ཅེན་ འགྱུར་། 28 ཁོང་ངེ་ མི་མང་ངེ་ འདུན་ལ་ ཡ་ཧུ་འདཱ་པ་རྒུན་ལ་, ཡི་ཤུ་རྦོ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ འིན་ཀན་འབོ་ ཏམ་པེ་ སུང་རབ་ རྒྱུད་ཏེ་ ལྟན་ནེན་, ཁོང་རྒུན་ལ་ ཕམ་ཀལ་ལེ་ཡོད་པེན་།