པ་འུ་ལུ་ རྡང་ སེ་ལེ་ལ་ ཏི་མོ་ཐི་ ཐུག་།
16
པ་འུ་ལུ་ རྡང་ སེ་ལེ་ འདེར་འབེ་ ལྟིང་ནི་ ལི་སི་ཏི་རཱ་ལ་ རྐྱོད་, ཏུ་རུ་ ཏི་མོ་ཐི་ ཟེར་ཧ་ནེ་ ལོབ་ཀྲུག་ ཅིག་ འདེད་རྡེ་ཡོད་པེན་། ཁོའེ་ ཨ་མ་ ཡ་ཧུ་འདཱ་པ་ ཏེཏ་པ་ཅན་ཞིག་ ཡང་ ཨ་རྦ་ འགི་རིག་པ་ འིན་འབེན་། 2 ལི་སི་ཏི་རཱ་ རྡང་ ཨི་ཀོ་ནི་ཡམ་མེ་ན་ ཡོ་ཀན་ ཏེཏ་པ་ཅན་རྒུ་ནི་ ཏི་མོ་ཐི་ ཤོད་ལམ་རྒུན་ལ་ རྟོད་རྡེ་ཡོད་པེན་། 3 པ་འུ་ལུ་ལ་ ཏི་མོ་ཐི་ ཁོང་ ཉམ་པོ་ ཁྱེར་ཤེ་ལ་ འདོད་པ་ ཡོད་པེ་, ཁོང་ངེ་ ཏི་མོ་ཐི་ལ་ འགོཔ་ཅེཏ་a ཅོ་ཅུག་, ཅེ་ཟེར་ནི་ ཏེ་ ཡུལ་ལེ་ ཉེ་ཁོར་ལ་ ཡོ་ཀ་ནེ་ ཡ་ཧུ་འདཱ་པ་རྒུན་ལ་ ཁོའེ་ ཨ་རྦ་ འགི་རིག་པ་ འིན་ཀན་འབོ་ རྒྱུའི་ཡོད་པེན་། 4 ཁོང་རྒུན་ ཀྲོང་ཁྱེར་ ཅིག་ནི་ ཅིག་ལ་ རྐྱོད་ཟ་ནི་, ཏེ་ ཡུལ་ལེ་ ཏེཏ་པ་ཅན་རྒུན་ལ་ ཡེ་རུ་ཤ་ལེམ་མེ་ན་ ཡོ་ཀ་ནེ་ ཧུ་ཚབ་ ཏང་ འུ་རྐྱོང་རྒུ་ནི་ ཐག་ཅེད་ཀན་རྒུན་ སིལ་རྡེ་ ཤེད་རྡེན་, ཡང་ ཏོ་རྒུན་ ཁ་ཉེན་ཅེ་ལ་ སེམ་རུའི་ ས་ལེན་ རྐྱོད་། 5 ཏུ་ཟུག་ ཛེད་ཅེ་རྦེ་ ཆོའེ་ཚོག་རྒུན་ ཏེཏ་པེ་ན་ རྟེམ་པོ་ སོང་ ཡང་ ཏེཏ་པ་ཅན་རྒུ་ནི་ ཀྲང་ཧ་ ཞག་ཏང་ རྒྱེ་རྡེན་ སོང་།པ་འུ་ལུ་ ཞལ་ཟིག་ ཐོང་།
6 པ་འུ་ལུ་ རྡང་ ཁོང་ངེ་ ཁྲོ་པ་རྒུན་ལ་ ཏམ་པེ་ ཐུག་ཡིད་རྡེ་ ཨ་སི་ཨཱ་ན་ ཆོའེ་ཤེད་ཅེ་ནི་ རྒ་རྒེ་ ཛེད་པེ་ ཁོང་རྒུན་ ཕི་རི་ཀི་ཡཱ་ རྡང་ འགཱ་ལ་ཏི་ཡཱ་ ཡུལ་རྒུན་ རྒྱུད་ཏེ་ རྐྱོད་། 7 ཁོང་རྒུན་ མི་སི་ཡ་ ཡུལ་ལེ་ སན་ཚམ་ལ་ ལེབ་རྦེ་རྡང་, ཁོང་རྒུ་ནི་ འབི་ཏི་ནི་ཡཱ་ན་ རྐྱོད་ཅེ་ ཅོའེ་ འིན་ན་ ཡི་ཤུའི་ ཐུག་ཡིད་རྡེ་ ཁོང་རྒུན་ ཏུ་རུ་ རྐྱོད་ མ་ཅུག་། 8 ཏོ་རྦེ་ཕི་ ཁོང་རྒུན་ མི་སི་ཡ་ ཡུལ་ རྒྱུད་ཏེ་ ཏྲོ་ཡཱ་ རྒྱལ་ས་ རྐྱོད་།
9 ཏེ་རྒ་ ཚེན་ལ་ ཞལ་ཟིག་ཞིག་རྒེ་ན་ པ་འུ་ལུ་ལ་ མ་ཀེ་འདོ་ནི་ཡཱ་པ་ ཞིག་ ཁོང་ངེ་ འདུན་ལ་ ལྃ་རྡེ་, “འཇུ་འཇུ་ མ་ཀེ་འདོ་ནི་ཡཱ་ རྐྱོད་ཏེ་ ང་ཞ་ ཡ་ཏོ་ ཛེད་” ཟེ་རེན་ ཞུ་ཝ་ པུ་ལེ་ ཐོང་། 10 པ་འུ་ལུའི་ ཞལ་ཟིག་པོ་ ཟི་རྡེ་ ལྟིང་ནི་ ཏེ་རྒ་མ་རྒ་ ང་ཞ་ མ་ཀེ་འདོ་ནི་ཡཱ་ ཆ་ཅེ་ ཀྲལ་ ཅོའེ་, ཅེ་ཟེར་ནི་ ཀོན་འཇོག་རྒེ་ ང་ཞ་, ཁོང་རྒུན་ལ་ ནེ་ཚུལ་ ཟང་པོ་ ཤེད་ཅེ་ལ་ འབོ་ ཛེད་ཀན་འབོ་ ཧ་ཀོ་།
ཕི་ལིབ་པི་པ་ ལི་འདི་ཡཱེ་ ཏེཏ་པ་ ཅོའེ་།
11 ཏྲོ་ཡཱ་ནེ་ ང་ཞ་རྒུན་ ཆུ་རེལ་ལ་ ཞོན་འདེ་ སུ་མོ་ཏྲ་ཀེ་ལ་ ལེཔ་, ཡང་ ལྟིང་མེ་ཞག་པོ་ལ་ ནེ་ཡཱ་པོ་ལུ་ལ་ ལེཔ་། 12 ཏེ་ཀ་ནི་ ང་ཞ་རྒུན་ མ་ཀེ་འདོ་ནི་ཡཱ་ ཡུལ་ཞོང་ངེ་ རྒྱལ་ས་ མ་ ཁག་ཅེན་ ཕི་ལིབ་པི་ལ་ སོང་འབེན་, ཀ་རྦེ་ན་ རོམ་པ་ མང་པོ་ཞིག་ འདེད་རྡེ་ཡོད་པེན་། ཏུ་རུ་ ང་ཞ་རྒུན་ ཞག་ ཁ་ཅིག་ འདེད་པེན་།
13 ངལ་ཚོའེ་ ཞག་ལ་ མོ་ལམ་ ཞུ་ཅེ་ ས་ཅ་ཞིག་ ཐོབ་རྦེན་ སམ་འདེ་ ང་ཞ་རྒུན་ རྒྱལ་སེ་ རྒོ་ནེ་ འབིང་འདེ་ སྃ་སྤོ་ ཆོག་ལ་ སོང་འབེན་། ཏུ་རུ་ ཛོམ་འདེ་ ཡོ་ཀ་ནེ་ པོ་མོ་རྒུན་ས་ འདེད་ཏེ་ ཁོང་རྒུན་ ཉམ་པོ་ སྤེ་ར་ ཏྃ་རྦེན་། 14 སྤེ་ར་ ཉེན་ཀན་རྒུ་ནི་ ཕྲོ་ ལི་འདི་ཡཱ་ ཟེར་ཧན་ པོ་མོ་ཞིག་ ཡོད་པེན་, ཁོ་ ཐི་ཡ་ཏི་རཱ་ རྒྱལ་ས་ནི་ རྒྱ་སྤེ་ ཀོའེ་ལག་ ཙོག་སེ་ རེ་ རིན་ཅེན་ནི་ ཚོང་ ཅོ་ཀན་ འདང་ ཀོན་འཇོག་ལ་ ཅོལ་ཧན་ཞིག་ འིན་འབེན་། ཙོབོ་ ཀོན་འཇོག་རྒེ་, ཁོའེ་ སེམ་ པ་འུ་ལུའི་ མོལ་ཧན་རྒུན་ལ་ ཏེཏ་པ་ ཅོ་ཅེ་ཕི་ པེ་ཛེད་། 15 ཁོ་ རྡང་ ཁོའེ་ ནང་མི་རྒུ་ནི་ ཁྲུའི་ནེན་ ཡང་ ཁོའེ་ ང་ཞ་ ཞུ་ཝ་ པུལ་, “ཀལ་ཏེ་ ཉི་ཞི་ ང་ ཙོབོ་ ཡི་ཤུའི་ན་ ཏེཏ་པ་ཅེན་ཞིག་ ནོག་ སམ་མེ་ཡོད་ནི་, རྐྱོད་ཏེ་ ངེ་ ཁང་པ་ ཞུ་རྡེ་ ཛེད་།” ཁོའེ་ ང་ཞ་ ཞུ་ཝ་ པུ་ལེན་ འདེད་པེ་ ང་ཞ་ ཚང་མ་ ཁོའེ་ ཁང་པ་ འདེད་པེན་།
པ་འུ་ལུ་ རྡང་ སེ་ལེ་རྒུན་ ཟུམ་།
16 ཞག་ཤིག་ ང་ཞ་ མོ་ལམ་ ཞུ་སེ་ ས་ཅ་ ཆོག་ལ་ ཆེན་ ཡོད་ཟ་ནི་, ང་ཞ་རྒུན་ལ་ ཚེ་ཡོག་ པོ་མོ་ཞིག་ ཐུག་, ཁོའེ་ན་ ལ་ ཞུ་རྡེ་ མི་རྒུན་ལ་ ཡོང་ཅེ་ཅན་རྒུ་ནི་ ཏུའི་ ཧོར་ལ་ ངོན་ཁྱེན་ ཏྃ་རྡེ་ ཁོའེ་ རྡག་པོ་རྒུ་ནི་ཕི་ མུལ་ མང་པོ་ ཅོ་ཡོད་པེན་། 17 པོ་མོ་ནི་ པ་འུ་ལུ་ རྡང་ ང་ཞི་ ལྟིང་འགྲྃ་ནི་ ཡོྃ་རྡེ་ ཀུ་ཅུ་ ཏ་ངེན་ ཟེར་, “ཀུན་ཝང་ ཀོན་འཇོག་རྒེ་ ཞབ་རྟོག་པ་ འིན་ཀ་ནེ་ འི་ མི་རྒུ་ནི་ ཁྱི་ཞ་ ཚང་མ་ ཐར་པེ་ ལམ་མེ་ ཧོར་ལ་ ཤེད་རྡེ་ནོག་།”
18 ཁོའེ་ ཞག་ཏང་ ཏེ་རྒ་ ཙོག་སེ་ ཅོའེན་ འདེད་པེ་ ལྟིང་འཇུག་ལ་ མ་མང་པེ་ ནྃ་ ཚེར་རྡེ་ པ་འུ་ལུའི་ རྒྱབ་ལོག་ལ་ ཟིའི་ ཡང་ སེམ་ཡིད་ ངན་པ་རྦོ་ལ་ མོལ་, “ངེ་ ཁྱེ་རང་ལ་ ཡི་ཤུ་ མ་ཤི་ཀེ་ ཚན་ནེ་ཀ་ ཁོའེ་ ནང་ནི་ འབིང་འདེ་ ཡོང་ཅེ་ལ་ ཀཱ་ ཏ་ངེ་ཡོད་།” ཏེ་རྒ་མ་རྒ་ ཏེ་ སེམ་ཡིད་ ངན་པ་རྦོ་ ཁོའེ་ ནང་ནི་ འབིང་འདེ་ སོང་།
19 ཁོའེ་ རྡག་པོ་རྒུ་ནི་ མུལ་ ཅོ་ཅེ་ ཧབ་ མེ་ཀན་ ཆ་ཀན་འབོ་ ཧ་ཀོ་རྡང་, ཁོང་རྒུ་ནི་ པ་འུ་ལུ་ རྡང་ སེ་ལེ་ ཟུམ་འདེ་ ཁྲོམ་མེ་ན་ ཝང་སྲུལ་པ་རྒུ་ནི་ འདུན་ལ་ ཀྲུ་རྡེན་ ཁྱེར་། 20 ཁོང་རྒུན་ ཁྲིམ་སྤོན་རྒུ་ནི་ འདུན་ལ་ ལེ་རྦེ་རྡང་, “འི་ ཡ་ཧུ་འདཱ་པ་རྒུན་ ཨ་ཧོའེ་ རྒྱལ་སེ་ན་ ཡོྃ་རྡེ་ ཟི་ངིལ་ ཕིང་འདུག་, 21 ཡང་ ཨ་ཧོའེ་ རོམ་པེ་ ཀཱ་ཁྲིམ་ནི་ འགལ་ཧན་ནེ་ ལམ་ལུག་སྲོལ་ རིག་ ཨ་ཧོ་ལ་ ལབ་ཏུག་” ཟེར་།
22 ཏོ་ ཚོར་རེ་རྡང་ མི་ཚོག་རྡེ་ལ་ པ་འུ་ལུ་ རྡང་ སེ་ལེ་ རྒྱཔ་འགལ་ ཅོའེ་, ཡང་ ཁྲིམ་སྤོན་རྒུ་ནི་ ཁོང་ ཉ་ཧ་ ལྕུ་རུ་ པུད་ཏེ་ པེར་ཧ་ ཏང་ཅེ་ ཀཱ་ ཏྃ་། 23 ཁོང་རྒུན་ལ་ པེར་ཧ་ ཉམ་པོ་ མ་སྲན་ཀྲེ་ རྡུང་ ཡང་ ཙོན་ལ་ ཧར་རྡེ་ ཙོན་ཁང་ངེ་ སྤོན་འབོ་ལ་ རྒྱལ་ལ་ ཅོའེ་རྡེ་, སྲུང་ཅུག་ཅེ་ལ་ ཀཱ་ ཏྃ་། 24 ཁོ་ ཏེ་ ཀཱ་རྦོ་ ཐོབ་རྦེ་རྡང་, ཁོའེ་ ཁོང་ ཉ་ཧ་ ཚང་མེ་སང་ ནང་ཀུ་ལ་ ཡོ་ཀ་ནེ་ ཙོན་ཁང་ངེ་ན་ ཧང་པ་རྒུན་ ཤིང་ངེ་ན་ ཅུག་ཏེ་ རྡམ་འདེ་ པོར་།
25 ཚེན་ཕེད་ལ་ པ་འུ་ལུ་ རྡང་ སེ་ལེ་ ཉ་ཧེ་ ཀོན་འཇོག་ལ་ མོ་ལམ་ ཞུའིན་, རྟོད་ལུ་ ཏང་ངེ་ཡོད་པེན་, ཡང་ ཞེན་ ཙོན་པ་རྒུ་ནི་ ཁོང་ལ་ ཉེན་འདེ་ ཡོད་པེན་། 26 ཧུན་མེད་ལ་ སྃ་འགུལ་ ཀྲག་པོ་ ཡོྃ་རྡེ་ ཙོན་ཁང་ངེ་ མག་རྡེན་རྒུན་ རྒུལ་། ཏེ་རྒ་མ་རྒ་ རྒོ་ ཚང་མ་ པེ་, ཡང་ ཏུ་རུ་ ཡོ་ཀ་ནེ་ ཙོན་པ་ ཚང་མེ་ ལྕ་རྟག་རྒུན་ ཀྲོལ་རྡེ་ འདྲུལ་། 27 ཙོན་ཁང་ངེ་ སྤོན་འབོ་ལ་ ཉིད་ཚེད་ ཡང་ ཁོའེ་ ཙོན་ཁང་ངེ་ རྒོ་རྒུན་ པེ་རྡེ་ ཐོང་། ཙོན་པ་ ཚང་མ་ ཤོར་རྡེ་ མེ་ཀག་ སམ་འདེ་, ཁོ་ རང་ངེ་ ར་ཡི་ ཕིང་འདེ་ རང་སྲོག་ ཅེད་ཅེ་ ཅོའེ་། 28 པ་འུ་ལུའི་ ཀུ་ཅུ་ ཏྃ་རྡེ་ ཁོ་ མོལ་, “རང་ངེ་ སྲོག་ མ་ཅེད་, ང་ཞ་ ཚང་མ་ འེ་རྒ་ཀ་ ཡོད་།”
29 ཙོན་ཁང་ངེ་ སྤོན་འབེ་ འོད་ ཁྱོང་ ཟེར་རྡེ་ འབོའེ་ ཡང་ ཁོ་ ནང་ཀུ་ལ་ རྒྱུག་རྒེན་འདང་ སོང་ ཡང་ འདར་རེན་ཞིག་ པ་འུ་ལུ་ རྡང་ སེ་ལེ་ འདུན་ལ་ འགྱེལ་། 30 ཁོའེ་ ཁོང་རྒུན་ ཕི་ལོག་ལ་ ཁྱོྃ་རྡེ་ ཟེར་, “སྤོན་འབོ་ལེ་ ངེ་ ཐར་པ་ ཐོབ་ཅེ་ལ་ ཅི་ ཅོ་རྒོའེ་?”
31 ཁོང་རྒུ་ནི་ ལེན་སལ་, “ཙོབོ་ ཡི་ཤུའི་ཀ་ ཏེཏ་པ་ ཅོའེ་, ཏེ་ནི་ ཁྱེ་རང་ལ་ ཐར་པ་ ཐོབ་རྦེན་, མ་ཚེད་ ཁྱེ་རང་ངེ་ ཁང་པེ་ན་ འདེད་ཀན་རྒུན་ལ་ ཐར་པ་ ཐོབ་རྦེན་།” 32 ཁོང་རྒུ་ནི་ ཙོན་ཁང་ངེ་ སྤོན་འབོ་ རྡང་ ཁོའེ་ ནང་མི་རྒུན་ལ་ ཙོབོ་ ཡི་ཤུའི་ ཧོར་ལ་ ཤེད་རྡེ་ ཛེད་། 33 ཚེན་ནེ་ ཏེ་རྒ་ ཏུའི་ལ་ ཙོན་ཁང་ངེ་ སྤོན་འབོ་རྦེ་ ཁོང་རྒུན་ ཁྱེར་རྡེ་ ཁོང་རྒུ་ནི་ མ་ཀ་རྒུན་ ཁྲུའི་, ཡང་ ཏེ་རྒ་ ཏུའི་ལ་ ཁོ་ རྡང་ ཁོའེ་ ནང་མི་ ཚང་མེ་ ཁྲུའི་ནེན་། 34 ཁོའེ་ པ་འུ་ལུ་ རྡང་ སེ་ལེ་ ཁོ་རང་ངེ་ ཁང་པ་ ཁྱེར་རྡེ་ འདོན་ཏང་ པུལ་, ཁོ་ རྡང་ ཁོའེ་ ནང་མི་ ཚང་མ་ རྐྱིད་པོ་ སོང་ ཅེ་ཟེར་ནི་ ཁོང་རྒུ་ནི་ ཀོན་འཇོག་རྒེ་ཀ་ ཏེཏ་པ་ ཅོའེ་།
35 ནམ་ ཟ་ར་ཟི་རེ་ ལྃ་རྡེ་རྡང་, ཁྲིམ་སྤོན་རྒུ་ནི་ ཙོན་ཁང་ངེ་ སྤོན་འབེ་ཀ་ མག་མི་རྒུན་ ཀལ་རྡེ་, “ཁོང་རྒུན་ པུད་ཏོང་” ཟེར་རྡེ་ ཀཱ་ ཏྃ་། 36 ཙོན་ཁང་ངེ་ སྤོན་འབོ་རྦེ་ པ་འུ་ལུ་ ཞུའི་, “ཁྲིམ་སྤོན་རྒུ་ནི་ ཉེ་ཞ་ པུད་ ཟེར་རྡེ་ ཀཱ་ ཏྃ་རྡོག་། ཏ་ ཉེ་ཞ་རྒུན་ ཞིའི་རྡེ་ ཉམ་པོ་ རྐྱོད་།”
37 འིན་ན་ པ་འུ་ལུའི་ ལེན་སལ་, “ང་ཞ་ རོམ་པ་ འིན་འདེ་ལ་ ཁྲིམ་སྤོན་རྒུ་ནི་ ང་ཞི་ཀ་ ཁྲིམ་ མ་སྲུལ་ལེ་ མི་རྒུ་ནི་ འདུན་ལ་ ང་ཞ་ རྡུྃ་རྡེ་ ཙོན་ཁང་ལ་ ཧར་། ཏ་ ཅི་ ཁོང་རྒུ་ནི་ ང་ཞ་ སུ་ལ་ རྒྱུའི་ཆ་ མ་ཅུག་རྒེ་ལ་ པུད་ཏང་ངེན་ ས་མེ་ནོག་རྒེ་? ང་ཞ་ མི་ཆ་། ཁོ་རང་རྒུན་ འེ་ཀ་ ཡོྃ་རྡེ་, ང་ཞ་ ཙོན་ནི་ ཕིང་འདེ་ ཁྱེར་རྒོའེ་།”
38 མག་མི་རྒུན་ སོང་འདེ་ སྤེ་ར་རྒུན་ ཤེད་ ཡང་ པ་འུ་ལུ་ རྡང་ སེ་ལེ་ཧ་རྒུན་ རོམ་པ་ འིན་ཀན་འབོ་ ཚོར་རྡེ་ ཁྲིམ་སྤོན་རྒུན་ ཧོཔ་ འཇིའི་། 39 ཁྲིམ་སྤོན་རྒུན་ ཙོན་ཁང་ལ་ ཡོྃ་ ཡང་ པ་འུ་ལུ་ རྡང་ སེ་ལེ་ལ་ རྒོང་སྤ་ སལ་ཅེ་ལ་ ཞུའི་། ཁོང་རྒུན་ ཙོན་ནེ་ ཕི་ལོག་ལ་ ཁྱེར་རྡེ་ ཁོང་རྒུན་ལ་ རྒྱལ་ས་ནི་ འབིང་འདེ་ ཆ་ཅེ་ལ་ ཞུ་ཝ་ པུལ་། 40 པ་འུ་ལུ་ རྡང་ སེ་ལེ་ ཙོན་ཁང་ནི་ ཕི་ཏ་ འབིང་འདེ་ ལི་འདི་ཡཱེ་ ཁང་པ་ རྐྱོད་, ཏུ་རུ་ ཁོང་རྒུ་ནི་ སྤུན་རྒུན་ ཉམ་པོ་ ཐུག་ཏེ་ ཁོང་རྒུན་ལ་ སེམ་རུའི་ སལ་ལེ་ ཛེད་, ཡང་ ཏེ་ ཡུལ་ནི་ རྐྱོད་།