ཡེ་རུ་ཤ་ལེམ་མེ་ ཚོག་འདུའི་།
15
ཡ་ཧུ་འདཱ་ ཡུལ་ནི་ ཨན་ཏི་ཡོག་ལ་ ཡོང་ཀ་ནེ་ མི་ ཁ་ཅིག་རྒེ་ ཏེཏ་པ་ཅན་རྒུན་ལ་, “ཀལ་ཏེ་ ལུང་རྟོན་པ་ མོ་ཤེ་ ཀཱ་ཁྲིམ་ ནང་ཞིན་ ཁྱི་ཞི་ པུ་ཙ་རྒུན་ལ་ འགོཔ་ཅེཏ་a མ་ཅོ་ནི་ ཁྱི་ཞ་རྒུན་ལ་ ཐར་པ་ མི་ཐོབ་” ཟེ་རེན་ ལབ་ཞ་ ཏང་། 2 ཡང་ པ་འུ་ལུ་ རྡང་ འབཱར་ན་འབེ་ ཁོང་རྒུ་ནི་ ལབ་ཅེ་ རྒྱཔ་འགལ་ ཅོ་ཅེ་རྦེ་ ཁོང་རྒུན་ ཉམ་པོ་ སྲན་ཀྲེ་ ཟེར་ཟེར་ སོང་། ཏེ་ ཆོའེ་ཚོག་རྒེ་, པ་འུ་ལུ་, འབཱར་ན་འབཱ་ ཡང་ ཏེཏ་པ་ཅན་ ཁ་ཅིག་ ཡེ་རུ་ཤ་ལེམ་ལ་ ཧུ་ཚབ་ ཏང་ འུ་རྐྱོང་རྒུ་ནི་ འདུན་ལ་ ཏེ་ ལབ་ཅེ་ ཧོར་ལ་ སྤེ་ར་ ཏང་ངེ་ ཆ་ཅེ་ལ་ འདམ་། 3 ཆོའེ་ཚོག་རྒེ་ ཁོང་རྒུན་ ལམ་ཅུག་, ཡང་ ཁོང་རྒུན་ ཕོ་ནི་ཤི་ཡ་ རྡང་ ས་མ་རི་ཡཱ་ ཡུལ་རྒུན་ རྒྱུད་ཏེ་ ཆ་ཟ་ནི་ ཁོང་རྒུ་ནི་ ཏེཏ་པ་ཅན་རྒུན་ལ་ ཡ་ཧུ་འདཱ་པ་ མན་ཀན་རྒུ་ནི་ མ་ཤི་ཀེ་ཀ་ ཏེཏ་པ་ ཅོའེན་ ཡོ་ཀན་འབོ་ ཤེད་, ཏོ་ ཚོར་རྡེ་ སྤུན་ ཚང་མ་ མང་པོ་ ཐེད་།4 ཡེ་རུ་ཤ་ལེམ་ལ་ ལེབ་རྦེ་རྡང་, ཏུ་རུ་ ཡོ་ཀ་ནེ་ ཆོའེ་ཚོག་, ཧུ་ཚབ་རྒུན་ འདང་ འུ་རྐྱོང་རྒུ་ནི་ ཁོང་རྒུན་ལ་ རྒ་སུའི་ ཞུའི་། ཀོན་འཇོག་རྒེ་ ཁོང་རྒུན་ རྒྱུད་ཏེ་ ཛེད་ཀ་ནེ་ ཆག་ལེ་རྒུ་ནི་ ཧོར་ལ་ ཁོང་ངེ་ ཤེད་རྡེ་ ཛེད་། 5 འིན་ན་ པ་རུ་ཤི་པེ་ རྡེ་ ནང་ནི་ འིན་ཀན་ ཏེཏ་པ་ཅེན་ ཁ་ཅིག་ ལྃ་རྡེ་ ཟེར་, “ཏེཏ་པ་ཅེན་ ཡ་ཧུ་འདཱ་པ་ མན་ཀན་ པུ་ཙ་རྒུན་ལ་ འགོཔ་ཅེཏ་ ཅོ་རྒོའེ་ ཡང་ ལུང་རྟོན་པ་ མོ་ཤེ་ ཀཱ་ཁྲིམ་རྒུན་ ཁ་ཉེན་རྒོའེ་།”
6 ཏེ་རྒ་རྦེ་ཕི་ལ་ ཧུ་ཚབ་ ཏང་ འུ་རྐྱོང་རྒུན་ ཏེ་ ལབ་ཞེ་ ཧོར་ལ་ ཀྲཔ་ ཛེད་ཅེ་ལ་ ཛོམ་། 7 མ་མང་པོ་ ཀྲཔ་ ཅོའེ་རྡེ་ ལྟིང་ནི་ པི་ཏྲར་ ལྃ་རྡེ་ ཁོང་རྒུན་ལ་ མོལ་, “སྤུན་རྒུན་ ཁྱི་ཞ་རྒུན་ལ་ རྒྱུའི་ནོག་, ཞག་ ཁ་ཅིག་ ངུལ་ལ་, འགོ་མ་རང་ ཡ་ཧུ་འདཱ་པ་ མན་ཀན་རྒུ་ནི་ ནེ་ཚུལ་ ཟང་པོ་ ཚོར་རྡེ་ ཏེཏ་པ་ ཅོ་ཅེ་ཕི་ ཀོན་འཇོག་རྒེ་ ཁྱི་ཞི་ ཕྲོ་ནི་ ང་ ཁོང་རྒུན་ལ་ ཆོའེ་ཤེད་ཅེ་ལ་ འདམ་མེ་ ཛེད་། 8 ཨ་ཧོ་རྒུ་ནི་ སེམ་མེ་ན་ ཡོ་ཀན་ ཚང་མ་ ཁྱེན་ནེ་ ཛེད་ཀ་ནེ་ ཀོན་འཇོག་རྒེ་ ཨ་ཧོ་རྒུན་ ཙོག་སེ་ ཡ་ཧུ་འདཱ་པ་ མན་ཀན་རྒུན་ལ་ ཏམ་པེ་ ཐུག་ཡིད་ སེལ་ལེ་ ཛེད་ཏེ་ ཁོང་རྒུན་ནང་ ཀོན་འཇོག་རྒེ་ འིན་ཀན་འབེ་ སྤང་པོ་ སལ་། 9 ཀོན་འཇོག་རྒེ་ ཨ་ཧོ་ རྡང་ ཁོང་རྒུ་ནི་ན་ ཅང་ ཁྱེད་ པོ་རེ་ མ་ཛེད་, ཅེ་ཟེར་ནི་ ཏེཏ་པ་ ཅོ་ཅེ་རྦེ་ ཁོང་རྒུ་ནི་ སེམ་ ལག་མོ་ ཛེད་། 10 ཏ་ ཡ་ཧུ་འདཱ་ མན་ཀན་ ཏེཏ་པ་ཅན་རྒུ་ནི་ སྤུང་པེ་ཀ་, ཨ་ཧོ་ ཡང་ ཨ་ཧོའེ་ ཕ་མེ་པོ་རྒུ་ནི་ ཁུར་ མ་ཉེན་ཀ་ནེ་ ཁུ་རུ་ ལྕིན་ཀྲེ་ ཀལ་རྡེ་ ཁྱི་ཞ་རྒུ་ནི་ ཅི་ ཀོན་འཇོག་ལ་ ཐུག་སྲོ་ རྐྱོད་ཅུག་རྒེ་ཡོད་? 11 མན་, ཙོབོ་ ཡི་ཤུ་ མ་ཤི་ཀེ་ ཐུག་ཞེ་ རྒྱུད་ཏེ་ ཨ་ཧོ་ལ་ ཐར་པ་ ཐོབ་ཀན་ ཙོག་སེ་ ཁོང་རྒུན་ལ་ ཐོབ་ཏེ་ འིན་ཀན་འབོ་ལ་ ཨ་ཧོའེ་ ཏེཏ་པ་ ཅོ་ནོག་།”
12 ཏེ་ནི་ ཏུ་རུ་ ཛོམ་ཀ་ནེ་ མི་ཚང་མ་ ཅེཔ་ཁ་རོག་ཏེ་ འབཱར་ན་འབཱ་ རྡང་ པ་འུ་ལུ་ རྒྱུད་ཏེ་ ཀོན་འཇོག་རྒེ་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ ཀ་ཟུག་ ཧ་ལེ་ཤེ་ ཆག་ལེ་ རྡང་ ཛེད་པ་ ཛེད་ཀ་ནེ་ ཧོར་ལ་ ཤེད་ཀན་རྒུན་ ཉེན་།
13 ཁོང་རྒུ་ནི་ མོལ་ ཚར་རྡེ་ ལྟིང་ནི་ ཡ་ཀུབ་རྦེ་ མོལ་, “སྤུན་རྒུན་ ངེ་ སྤེ་ར་ལ་ ཉེན་ནེ་ ཛེད་། 14 ཀོན་འཇོག་རྒེ་ འགོ་མ་རང་ ཡ་ཧུ་འདཱ་པ་ མན་ཀན་རྒུ་ནི་ཀ་ ཉིང་ཞེ་ རྐྱེ་རྡེ་ ཁོང་རྒུ་ནི་ ཕྲོ་ནི་ ཁོ་རང་ངེ་ཕི་ མི་རྒུན་ འདམ་མེ་ ཛེད་ཀན་འབེ་ ཧོར་ལ་ ཤི་མོན་ པི་ཏྲ་རེ་ ཨ་ཧོ་ལ་ ཤེད་རྡེ་ ཛེད་། 15 ལུང་རྟོན་པ་རྒུ་ནི་ ལུང་རྟན་ རྒྱུད་ཏེ་ འདྲན་འདྲ་ ཀྲུཔ་ཏེ་ ནོག་, ཀ་ཟུག་ སུང་རབ་རྦེ་ན་ འབྲི་ཛེད་ཏེ་ ནོག་,
16 ‘ཏོ་རྦེ་ ལྟིང་ནི་ ང་ ལོག་ཏེ་ ཡོང་ངེན་
ཡང་ རྒྱ་སྤོ་ འདཱ་འབིད་རྡེ་ རྒྱལ་སྲིད་ ཞིག་ཀན་འབོ་ ཡང་ ལྃ་ངེན་
ཞིག་ཀན་རྒུན་ སིག་ཏེ་ ཡང་ སོ་མ་ ཅོའེན་
17 ཏོ་རྒུན་ ཅོ་ཅེ་ རྒྱུ་ཚན་འབོ་
ལུའི་ཧན་ནེ་ འཇིག་རྟེན་པ་རྒུ་ནི་ ཙོབོ་ ཙལ་ཉེན་ཅེ་ ཡང་
ངེ་ མིང་ ཁུར་ཧ་ནེ་ ཡ་ཧུ་འདཱ་པ་ མན་ཀན་ ཚང་མེ་ལ་།
18 ངེ་ འགོ་མ་ནི་ཕ་ལ་ ཏེ་ ཚང་མ་ ངོན་ཅུག་ཏེ་ འིན་།’”
19 “ཏེ་རྒ་རྦེ་ཕི་ལ་ ངེ་ ཐག་ཅེད་པོ་, ཨ་ཧོ་རྒུ་ནི་ ཀོན་འཇོག་ ཆོག་ལ་ སེམ་ འགྱུ་རེན་ ཡོ་ཀ་ནེ་ ཡ་ཧུ་འདཱ་པ་ མན་ཀན་རྒུན་ལ་ ཀག་སྤོ་ ཐོང་ཅུག་ མ་རྒོའེ་། 20 འིན་ན་ ཡི་རྒེ་ འབྲི་རྡེ་ ཁོང་རྒུན་ལ་ ཧུ་འདྲ་རྒུན་ལ་ ཆོད་པ་ པུལ་རྡེ་ ཀྲིཔ་ ཆ་ཀ་ནེ་ ཁར་ཞི་ མི་ཟ་ཅེ་, ལུའི་འབྲེལ་ ངན་པ་རྒུ་ནི་ ཐག་རིང་ལ་ འདེད་ཅེ་, རྐྱེ་ཙིར་རྡེ་ སེད་ཀ་ནེ་ སེམ་ཅེན་རྒུ་ནི་ ཤ་ ཡང་ ཁྲག་ཅེན་ནེ་ ཤ་ མི་ཟ་ཅེ་ ཧོར་ལ་ སལ་སྤོ་ ཅོའེ་རྡེ་ ཤེད་རྒོའེ་། 21 ཅེ་ཟེར་ནི་ མོ་ཤེ་ ཀཱ་ཁྲིམ་མེ་ན་ ཏེ་རྒུན་ ངུལ་ མ་ནི་ཕ་ལ་ རྒྱལ་ས་ ཚང་མེ་ འདུ་ཀང་རྒུ་ནི་ན་ ངལ་ཚོའེ་ རིམ་རྒྱི་ མི་རྒུ་ནི་ཕི་ སིལ་ལེན་ ནོག་།”
ཏེཏ་པ་ཅེན་ནེ་ ཡ་ཧུ་འདཱ་པ་ མན་ཀན་རྒུན་ལ་ ཡི་རྒེ་ འབྲི་།
22 ཏེ་ནི་ ཧུ་ཚབ་རྒུན་, འུ་རྐྱོང་རྒུན་ འདང་ ཆོའེ་ཚོག་ སོན་ཏེ་ ཛོམ་འདེ་ ཁོང་རྒུ་ནི་ ཕྲོ་ནི་ མི་ ཉི་ འདམ་འདེ་ པ་འུ་ལུ་ རྡང་ འབཱར་ན་འབཱ་ ཉམ་པོ་ ཨན་ཏི་ཡོག་ལ་ ལམ་ཅུག་ཅེ་ལ་ ཐག་ཅེད་། ཏེ་ འདམ་ཀེ་རྒུན་ ཆོའེ་ཚོག་རྒེ་ འུ་རྐྱོང་ འབཱར་ས་བ་ ཟེར་ཧ་ནེ་ ཡུ་འདཱ་ རྡང་ སེ་ལེ་ ཉ་ཧ་ འིན་འབེན་། 23 ཁོང་རྒུན་ ཉམ་པོ་ འི་ ཆག་འབྲི་རྦོ་ ཀལ་,
“ཧུ་ཚབ་ ཏང་ འུ་རྐྱོང་རྒུ་ནི་ ཆོག་ནི་, ཨན་ཏི་ཡོག་, སི་རི་ཡཱ་, སི་ལི་སི་ཡཱེ་ན་ ཡོ་ཀ་ནེ་ ཡ་ཧུ་འདཱ་པ་ མན་ཀ་ནེ་ སྤུན་རྒུན་ལ་ འཇུ་ལེ་།”
24 “ང་ཞི་ ཕྲོ་ནི་ ང་ཞི་ མ་ཀལ་ཀ་ནེ་ མི་ ཁ་ཅིག་ ཁྱི་ཞི་ ཕྲོ་ ལེབ་ཏེ་ སྤེ་ར་ རིག་ ཟེར་ཏེ་ ཁྱི་ཞི་ སེམ་ལ་ ཐེ་ཚོམ་ རྐྱེ་ཅུག་ཀན་འབོ་ ང་ཞི་ ཚོར་། 25 ཏེ་རྒ་རྦེ་ཕི་ལ་ ང་ཞ་རྒུན་ནེ་ ང་ཞི་ ཕྲོ་ནི་ མི་ ཉི་ འདམ་འདེ་ ང་ཞི་ ཤེ་སྤ་ པ་འུ་ལུ་ རྡང་ འབཱར་ན་འབཱ་ ཉམ་པོ་ ཁྱི་ཞ་རྒུ་ནི་ཀ་ ཀལ་ཅེ་ལ་ ཀྲཔ་ སོང་། 26 ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ཕི་ འབཱར་ན་འབཱ་ རྡང་ པ་འུ་ལུ་ སྲོག་ སལ་ཅེ་ལ་ མ་འཇིའི་། 27 ང་ཞི་ འི་ ཡི་རྒེ་ན་ འབྲི་ཧན་འབོ་ སྤང་པོ་ ཏང་ཅེ་ལ་ ཡུ་འདཱ་ རྡང་ སེ་ལེ་, ཁོང་རྒུན་ ཉམ་པོ་ ཀ་ལེ་ཡོད་།”
28 “འི་ སྤེ་ར་ ཁག་ཅེན་རྒུན་ མན་ཀན་ ཞེན་ཡང་ ལྕིད་ཅིག་ ཁྱི་ཞ་རྒུ་ནི་ཀ་ མི་ ཀལ་ཅེ་ལ་ ཏམ་པེ་ ཐུག་ཡིད་ ཏང་ ང་ཞ་རྒུ་ནི་ ཐག་ཅེད་། 29 ཁྱི་ཞི་ ཧུན་འདྲ་རྒུན་ལ་ ཆོད་པ་ པུལ་ཧ་ནེ་ ཁར་ཞི་, ཡང་ ཁྲག་, ཏང་ སེམ་ཅེན་ རྐྱེ་ཙིར་ཏེ་ སེད་ཀ་ནེ་ ཤ་ མ་ཟ་, ཡང་ ལུའི་འབྲེལ་ ངན་པ་རྒུ་ནི་ ཐག་རིང་ལ་ འདོད་ཧེ་། ཡུ་རྒུན་ ཁ་ཉེན་ནི་ ཁྱི་ཞ་ རྒྱ་ལེ་ ཆེན་, འཇུ་ལེ་།”
30 ཏེ་ནི་ ལམ་ཅུག་པེ་ ཁོང་རྒུན་ ཨན་ཏི་ཡོག་ལ་ སོང་ ཡང་ ཏུ་རུ་ ཆོའེ་ཚོག་ སོན་ཏེ་ འབོའེ་རྡེ་ ཆག་འབྲི་རྦོ་ ཁོང་རྒུ་ནི་ ལག་ལ་ ཏྃ་། 31 ཏེ་ སེམ་རུའི་ཅེན་ནེ་ ཡི་རྒེ་ སིལ་རྦེ་ མི་རྒུན་ ཐེད་པོ་ སོང་།
32 ལུང་རྟོན་པ་ འིན་ཀན་ ཡུ་འདཱ་ རྡང་ སེ་ལེ་རྒུ་ནི་ ཏེཏ་པ་ཅན་རྒུན་ལ་ སེམ་རུའི་ཅེན་ནེ་ ལབ་ཞ་ མང་པོ་ སལ་རྡེ་ ཁོང་རྒུན་ ཏེཏ་པེ་ན་ རྟེམ་པོ་ འགྱུར་ཤུག་རྒེ་ ཛེད་། 33 ཞག་ ཁ་ཅིག་རྒེ་ ལྟིང་ནི་ སྤུན་རྒུ་ནི་ སེ་ལེ་ རྡང་ ཡུ་འདཱ་ ཁོང་ ཀལ་ཧ་ནེ་ ཁྲོ་པ་རྒུན་ས་ ཁམ་ཟང་ ལེབ་ཅེ་ལ་ མོ་ལམ་ ཞུའི་རྡེ་ ཁོང་རྒུན་ ལོག་ཏེ་ ལམ་ཅུག་། 34 འིན་ན་ སེ་ལེ་ ཏུ་རུ་ འདེད་ཅེ་ ཐག་ཅེད་། 35 འིན་ན་ པ་འུ་ལུ་ རྡང་ འབཱར་ན་འབཱ་ ཨན་ཏི་ཡོག་རྒེ་ན་ ཞུའུ་, ཏུ་རུ་ ཁོང་རྒུན་ འདང་ ཞེན་མ་ མང་པེ་, ཙོབོ་ ཡི་ཤུའི་ ཀའ་རྒུན་ ཤེད་རྡེན་ ལབ་ཞ་ སལ་ལེ་ ཛེད་།
པ་འུ་ལུ་ རྡང་ འབཱར་ན་འབཱ་ ཉ་ཧ་ པེ་།
36 ཞག་ ཁ་ཅིག་ ལྟིང་ནི་ པ་འུ་ལུའི་ འབཱར་ན་འབཱ་ལ་ མོལ་, “ཨ་ཧོའེ་ ཙོབོ་ ཡི་ཤུའི་ ཀའ་ ཤེད་ཀ་ནེ་ ཀྲོང་ཁྱེར་རྒུན་ལ་ ཨ་ཧོ་ ཡང་ སོང་འདེ་ ཏེཏ་པ་ཅན་རྒུ་ནི་ ཏེཏ་པེ་ ནེ་ལུག་པོ་ ཀ་ཟུག་ཤིག་ འདུག་ ལྟོའེན་?” 37 འབཱར་ན་འབེ་ ཡོ་ཧཱ་ནན་ ཀ་འབོ་ལ་ མར་ཀུ་ལ་ ཟེར་རེ་ཡོད་པེན་, ཁོང་རྒུན་ ཉམ་པོ་ ཁྱེར་ཉིན་ ཡོད་པེན་། 38 འིན་ན་ པ་འུ་ལུའི་, མར་ཀུ་ ཁོང་རྒུན་ ཉམ་པོ་ ཁྱེར་ཤེ་རྦོ་ ཁྲམ་པ་ཅེན་ནེ་ ལེ་ཧ་ མག་ སམ་, ཅེ་ཟེར་ནི་ ཁོའེ་ པམ་ཕི་ལི་ཡཱེ་ན་ ཁོང་རྒུན་ ཉམ་པོ་ ལེ་ཧ་ ཅོའེན་ མ་འདེད་ལ་ ཕྃ་རྡེ་ སོང་འདེ་ འིན་འབེན་། 39 པ་འུ་ལུ་ རྡང་ འབཱར་ན་འབེ་ན་ ཧོཔ་ ཟེར་ཟེར་ སོང་འབེ་ ཁོང་རྒུན་ སོ་སོ་ པེ་རྒོའེ་, འབཱར་ན་འབཱ་ མར་ཀུ་ ཁྲིད་ཏེ་ ཆུ་རེལ་ལ་ ཞོན་འདེ་ སིབ་རུ་ སོང་། 40 འིན་ན་ པ་འུ་ལུའི་ སེ་ལེ་ ཁོང་ ཉམ་པོ་ ཁྱེར་ཤེ་ལ་ འདམ་, ཡང་ ཏེཏ་པ་ཅན་རྒུ་ནི་ ཁོང་རྒུན་ ཙོབོ་ ཀོན་འཇོག་རྒེ་ ཐུག་ཞེ་ ཆག་ལ་ ལྟེད་། 41 པ་འུ་ལུ་ སི་རི་ཡཱ་ རྡང་ སི་ལི་སི་ཡཱ་ རྒྱུད་ཏེ་ ཆོའེ་ཚོག་རྒུན་ རྟེམ་པོ་ ཛེད་རྡེན་ རྐྱོད་།