ཆག་ལེ་རྒུན་ 14

པ་འུ་ལུ་ རྡང་ འབཱར་ན་འབཱ་ ཨི་ཀོ་ནི་ཡ་ལ་ ཞུའུ་།

ཨི་ཀོ་ནི་ཡམ་མེ་ ནང་ལ་ པ་འུ་ལུ་ རྡང་ འབཱར་ན་འབཱ་, ལོབ་ ནང་ཞིན་ ཡ་ཧུ་འདཱ་པེ་ འདུ་ཀང་རྒུ་ནི་ན་ རྐྱོད་, ཡང་ མ་ ཁྱུད་ཅེན་ ཆོའེ་ཤེད་པེ་, ཡ་ཧུ་འདཱ་པ་ མན་ཀན་ མང་པེ་ ཏེཏ་པ་ ཅོའེ་། 2 འིན་ན་ ཏེཏ་པ་ མ་ཅོ་ཀན་ ཡ་ཧུ་འདཱ་པ་རྒུ་ནི་ ཡ་ཧུ་འདཱ་པ་ མན་ཀན་རྒུན་ལ་ ཁོང་ངེ་ ཧོར་ལ་ འབར་རྡེ་ སྲོ་ ཧུལ་རྡེ་ ཁོང་རྒུ་ནི་ན་ ཏེཏ་པ་ཅན་རྒུ་ནི་ ཆོག་ལ་ སེམ་ངན་ རྐྱེ་ཅུག་། 3 ཏེ་རྒ་རྦེ་ཕི་ལ་ པ་འུ་ལུ་ རྡང་ འབཱར་ན་འབཱ་ ཏུ་རུ་ ཏུའི་ མང་པོ་ཞིག་ ཞུ་རྡེ་, མ་ སེམ་ཤུག་ ཆོན་མོ་ ཉམ་པོ་ མ་ཤི་ཀེ་ ཐུག་ཞེ་ ཧོར་ལ་ ཤེད་རྡེ་ ཛེད་, ཡང་ ཙོབོ་ ཡི་ཤུའི་ ཁོང་རྒུན་ལ་ ཧ་ལེ་ཤེ་ ཛེད་པ་ རྡང་ ལྟའ་རྒུན་ ཅོ་ཅེ་ ཁྱུད་ སལ་རྡེ་, ཏེ་ ཁྲིན་འབོ་ རྡེན་འབའ་ འིན་ཀན་འབོ་ སྤང་པོ་ སལ་ལེ་ ཛེད་། 4 འིན་ན་ རྒྱལ་སེ་ མི་རྒུ་ནི་ན་ པོ་པུད་ཏེ་ ཁ་ཅིག་རྒེ་ ཡ་ཧུ་འདཱ་པ་རྒུ་ནི་ ཡང་ ཁ་ཅིག་རྒེ་ ཧུ་ཚབ་རྒུ་ནི་ ཆོག་ ཅོའེ་།

5 ཡ་ཧུ་འདཱ་པ་, ཡ་ཧུ་འདཱ་པ་ མན་ཀན་ འདང་ ཁོང་རྒུ་ནི་ འུ་རྐྱོང་ ཚང་མ་ ཛོམ་འདེ་ ཧུ་ཚབ་རྒུན་ལ་ ངན་པ་ ཅོའེ་རྡེ་ རྡོ་ རྒྱབ་ཏེ་ སེད་ཅེ་ ཅུའི་ངན་ ལྡིང་། 6 འིན་ན་ པ་འུ་ལུ་ རྡང་ འབཱར་ན་འབཱ་ལ་ ཏེ་ ཅུའི་ངན་འབོ་ ཧོར་ལ་ རྒྱུའི་སོང་པེ་ ཁོང་རྒུན་ ཏེ་ཀ་ནི་ ཤོར་རྡེ་ ལི་ཀ་འོན་ནི་ཡ་ ཡུལ་ཞོང་ངེ་ ལི་སི་ཏི་རཱ་ རྡང་ འདེར་འབེ་ རྒྱལ་ས་ ཡང་ ཏེ་ ཉེ་ཁོར་རེ་ ས་ཅེ་རྒུ་ནི་ན་ རྐྱོད་, 7 ཡང་ ཁོང་རྒུ་ནི་ ཏུ་རུ་ ནེ་ཚུལ་ ཟང་པོ་ ཤེད་།

ལི་སི་ཏི་རཱ་ རྡང་ འདེར་འབེ་ རྒྱལ་ས་།

8 ལི་སི་ཏི་རཱེ་ན་ ཞ་འོ་ཞིག་ ཡོད་པེན་, ཁོ་ རྐྱེ་རྦེ་ནི་ཕ་ལ་ འགྲུལ་ མ་ཉེན་ནེ་ ཡོན་པེན་། ཁོ་ ཐང་ཀེ་ཀ་ འདེད་ཏེ་, 9 པ་འུ་ལུའི་ མོལ་ཧན་རྒུན་ལ་ ཉེན་ནེ་ཡོད་པེན་། པ་འུ་ལུའི་ ཁོ་ ཁ་ཀྲང་ལ་ ཟིའི་ ཡང་ ཁོའེ་ན་ ཁོ་ རྒྱལ་ཉེན་ཅེ་ ཏེཏ་པ་ ཐོང་འདེ་ 10 ཁོང་ངེ་ ཏེ་ ཞ་འོ་རྦོ་ལ་ ཤེད་ཏང་ མོལ་, “རང་ངེ་ ཧང་པེ་ཀ་ ཀོའག་ ལོྃ་།” ཁོ་ ཆོང་ ཡང་ ལྃ་རྡེ་ འགྲུལ་།

11 མི་ཚོག་རྒེ་ པ་འུ་ལུའི་ ཆག་ལེ་རྦོ་ ཐོང་ངེ་རྡང་, ལི་ཀ་འོན་ནི་ཡ་རྦེ་ ཧད་རྡེ་ན་ ཀུ་ཅུ་ ཏྃ་, “ཀོན་འཇོག་རྒུན་ མི་ལ་ ཟུའི་རྡེ་ པབ་ཏེ་ རྐྱོད་ཏེ་ འདེད་།” 12 ཁོང་རྒུ་ནི་ འབཱར་ན་འབཱ་ལ་ ཟེ་ཡུའི་ ཡང་ པ་འུ་ལུ་ལ་ ཧར་མེ་ མིང་ལ་ ཏག་ ཅེ་ཟེར་ནི་ པ་འུ་ལུ་ ཆོའེ་ཤེད་རྡེ་ ཡོད་པེན་། 13 ཟེ་ཡུའི་ ཀོན་འཇོག་རྒེ་ ཁང་པ་ རྒྱལ་སེ་ ཕི་ལོག་ལ་ ཡོ་ཀ་ནེ་ ལ་མེ་ མེན་ཏོག་རྒེ་ རྐྱེ་ཆ་ རྡང་ ལང་ཀྲོ་ཞིག་ རྒྱལ་སེ་ རྒྱེ་རྒོའེ་ཀ་ ཁྲིད་ཏེ་ ཁྱོྃ་, ཅེ་ཟེར་ནི་ ཁོ་ རྡང་ ཡུལ་མི་རྒུ་ནི་ ཧུ་ཚབ་ ཉ་ཧ་ལ་ སྲོག་ཆོད་ པུ་ལེན་ སམ་།

14 འིན་ན་ ཏོ་ པ་འུ་ལུ་ རྡང་ འབཱར་ན་འབེ་ ཚོར་རེ་རྡང་, ཁོང་ རང་ངེ་ ནམ་ཟ་རྒུན་ ཤག་ ཡང་ མི་ཚོག་རྒེ་ ཕྲོ་ རྒྱུག་རྒེན་ སོང་འདེ་ ཀུ་ཅུ་ ཏང་ངེན་ མོལ་, 15 “ཁྱི་ཞི་ འི་ཟུག་ ཅེ་ ཅོའེན་? ང་ཞ་ལ་ ཁྱི་ཞ་རྒུན་ ཙོག་སེ་ མི་ འིན་, ང་ཞི་ ཁྱི་ཞ་རྒུན་ལ་ ནེ་ཚུལ་ ཟང་པོ་ ཤེད་ཅེ་ རྒྱུན་ཚན་འབོ་ ཡུ་ཙོག་སེ་ ཏོན་མེད་རྡེ་ ལེ་ཧ་རྒུན་ ཕྃ་རྡེ་ སོན་པོ་ ཀོན་འཇོག་ ཆོག་ལ་ སེམ་འགྱུར་ཤེ་རྦོ་ འིན་, ཁོང་ངེ་ ནམ་ཀ་, འཇིག་རྟེན་, རྒྱམ་ཚོ་ ཡང་ ཏོ་རྒུ་ནི་ན་ ཡོ་ཀན་ ཚང་མ་ ཛེད་ཏེ་ ནོག་། 16 པུད་ཀ་ནེ་ མི་རབ་རྒུ་ནི་ན་ ཀོན་འཇོག་རྒེ་ འགྱལ་ཁབ་ ཚང་མ་ རང་རང་ ཐེད་སེ་ ལམ་མེ་ཀ་ འགྲུལ་ཅུག་རྒེ་ ཛེད་། 17 ཏེ་ན་ ཀོན་འཇོག་རྒེ་ ཁོང་རྒུན་ ཉམ་པོ་ ཁོང་ འདང་ ཁོང་ངེ་ ཐུག་ཞེ་ ཡོ་ཀ་ནེ་ སྤང་པོ་ ས་ལེན་ ཞུའུ་, སྤེར་ན་ ཁྱི་ཞི་ ཆར་སྤ་ རྡང་ ལྟོན་ཏོག་ རྒྱ་ལེ་, ཟ་ཅེ་ལ་ ཁར་ཞི་ ཡང་ སེམ་ན་ ཐེད་པོ་ ཧང་ངེ་ སལ་ལེ་ཛེད་ཡོད་།” 18 ཏེ་ སྤེ་ར་རྒུན་ ཤེད་ཏེ་ལ་, ཁོང་རྒུན་ལ་ སྲོག་ཆོད་ པུལ་ཅེ་ནི་ མི་ཚོག་པོ་ལ་ རྒག་ཅེ་ མ་ ཀག་སྤོ་ སོང་།

19 ཏེ་ནི་ ཨན་ཏི་ཡོག་ ཏང་ ཨི་ཀོ་ནི་ཡམ་ནེ་ ཡོང་ཀ་ནེ་ ཡ་ཧུ་འདཱ་པ་ ཁ་ཅིག་རྒེ་ ཏེ་ ཡུལ་ལེ་ མི་རྒུན་ ཁོ་རང་རྒུ་ནི་ ཆོག་ལ་ ཁྱོྃ་རྡེ་ པ་འུ་ལུ་ལ་ རྡོ་ རྒྱབ་, ཡང་ ཁོང་ ཤི་རྡེ་ ནོག་ སམ་འདེ་ རྒྱལ་ས་ནི་ ཕི་ལོག་ལ་ ཀྲུད་ཏེ་ ཁྱེར་། 20 འིན་ན་ ལོབ་ཀྲུག་རྒུན་ པ་འུ་ལུའི་ འདུན་ལ་ ཛོམ་མེ་རྡང་, ཁོང་ ལང་འདེ་ རྒྱལ་ས་ ལོག་ཏེ་ རྐྱོད་། ཐོ་རེ་ ང་མོ་ ཁོང་ འབཱར་ན་འབཱ་ ཉམ་པོ་ འདེར་འབེ་ལ་ རྐྱོད་།

པ་འུ་ལུ་ རྡང་ འབཱར་ན་འབཱ་ ཨན་ཏི་ཡོག་ལ་ ལོག་ཏེ་ རྐྱོད་།

21 པ་འུ་ལུ་ རྡང་ འབཱར་ན་འབེ་ འདེར་འབེ་ རྒྱལ་སེ་ན་ ནེ་ཚུལ་ ཟང་པོ་ ཤེད་པེ་ མི་ མང་པོ་ཞིག་རྒེ་ ཏེཏ་པ་ ཅོའེ་། ཏེ་ནི་ ཁོང་རྒུན་ ལི་སི་ཏི་རཱ་, ཨི་ཀོ་ནི་ཡམ་ རྡང་ ཨན་ཏི་ཡོག་རྒེ་ རྒྱལ་ས་རྒུན་ལ་ ལོག་ཏེ་ རྐྱོད་། 22 ཁོང་རྒུ་ནི་ ལོབ་ཀྲུག་རྒུན་ལ་ ཏེཏ་པེ་ན་ རྟེམ་པོ་ འདེད་ཅེ་ལ་ སེམ་རུའི་ ཏང་ངེན་ མོལ་, “ཀོན་འཇོག་རྒེ་ རྒྱལ་སྲིད་རྡེ་ན་ ལེབ་རྦེ་ལ་ ཨ་ཧོ་ རྡུག་ངལ་ མང་པེ་ རྡོང་ལེན་ ཅོ་རྒོའེ་རྡེན་།” 23 ཁོང་ ཉ་ཧེ་ ཆོའེ་ཚོག་ ཚང་མེ་ན་ ཏེཏ་པ་ཅན་ནི་ཕི་ འུ་རྐྱོང་རྒུན་ འདམ་མེ་ ཛེད་, ཡང་ ཉུང་ནེ་ འདེད་ཏེ་ མོ་ལམ་ ཞུའི་རྡེ་ ཁོང་རྒུན་ ཙོབོ་ ཡི་ཤུའི་ ཆག་ལ་ ལྟེད་རྡེ་ ཛེད་ ཀ་འབེ་ན་ ཁོང་རྒུ་ནི་ ཏེཏ་པ་ ཅོའེ་། 24 ཏེ་ནི་ ཁོང་ ཉ་ཧ་ པི་སིད་ཡཱ་ རྒྱུད་ཏེ་ པམ་ཕི་ལི་ཡཱེ་ ཡུལ་ལ་ རྐྱོད་། 25 ཁོང་རྒུ་ནི་ པེར་འགེ་ ཀྲོང་ཁྱེར་རེ་ན་ ནེ་ཚུལ་ ཟང་པོ་ ཤེད་རྡེ་ ཛེད་ཏེ་ ལྟིང་ནི་ ཨ་ཏ་ལི་ཡཱ་ ཆོག་ལ་ རྐྱོད་།

26 ཏེ་ཀ་ནི་ པ་འུ་ལུ་ རྡང་ འབཱར་ན་འབཱ་ ཆུ་རེལ་ལ་ ཞོན་འདེ་ ཨན་ཏི་ཡོག་ རྒྱལ་ས་ ལོག་ཏེ་ རྐྱོད་, ཀ་རུ་ ཏེཏ་པ་ཅན་རྒུ་ནི་ ཁོང་ ཉ་ཧེ་ ལེ་ཧ་ ཅོ་ཅེ་ལ་ ཀོན་འཇོག་རྒེ་ ཐུག་ཞེ་ ཆག་ལ་ ལྟེད་རྡེ་ ཛེད་ཏེ་ འིན་འབེན་, ཀ་འབོ་ ཁོང་རྒུ་ནི་ ཀྲུཔ་ཅུག་ ཚར་རྡེ་ ནོག་། 27 ཨན་ཏི་ཡོག་ལ་ ལེབ་ཏེ་ ཁོང་རྒུ་ནི་ ཆོའེ་ཚོག་པོ་ ཛོམ་ ཅུག་ཏེ་, ཀོན་འཇོག་རྒེ་ ཁོང་ རྒྱུད་ཏེ་ ཛེད་ཀ་ནེ་ ལེ་ཧ་རྒུན་ འདང་ ཡ་ཧུ་འདཱ་པ་ མན་ཀན་རྒུན་ལ་ ཏེཏ་པ་ ཅོ་ཅུག་རྒེ་ ཛེད་ཀ་ནེ་ ཧོར་རྒུན་ ཤེད་། 28 ཡང་ ཁོང་རྒུན་ ཏུ་རུ་ ལོབ་ཀྲུག་རྒུན་ ཉམ་པོ་ ཞག་ མང་པོ་ ཞུའུ་།