འབཱར་ན་འབཱ་ རྡང་ ས་འུལ་ ཆོའེ་ཤེད་ཅེ་ལ་ ཧོ་ ཛེད་།
13
ཨན་ཏི་ཡོག་རྒེ་ ཆོའེ་ཚོག་རྒེ་ན་ ལུང་རྟོན་པ་ རྡང་ ལོབ་རྦོན་རྒུན་ ཡོད་པེན་, ཁོང་རྒུ་ནི་ ཕྲོ་ འབཱར་ན་འབཱ་, ཤི་མི་ཡོན་ མི་ནག་ ཟེར་ཧན་, ཀི་རིན་པ་ ལུ་སི་འུ་, མ་ན་ཧེན་ རྒྱ་སྤོ་ ཧེ་རོད་ ཉམ་པོ་ ལྡན་ཀན་ རྡང་ ས་འུལ་ ཡོད་པེན་། 2 ཁོང་རྒུན་ ཉུང་ནེ་ལ་ འདེད་ཏེ་ ཙོབོ་ལ་ ཅོལ་ལེན་ ཡོད་ཟ་ནི་ ཏམ་པེ་ ཐུག་ཡིད་རྡེ་ ཁོང་རྒུན་ལ་ མོལ་, “ངེ་ འབོ་ཀ་ནེ་ ལེ་ཧ་ ཅོ་ཅེ་ལ་ འབཱར་ན་འབཱ་ རྡང་ ས་འུལ་ ཉ་ཧ་ ཧོའེ་།” 3 ཁོང་རྒུན་ ཉུང་ནེ་ལ་ འདེད་ ཡང་ མོ་ལམ་ ཞུའི་རྡེ་ ཁོང་ ཉ་ཧེ་ཀ་ ལག་པ་ པོར་རྡེ་ ཁོང་རྒུན་ ལམ་ཅུག་རྒེ་ ཛེད་།སིབ་རུ་ལ་ ཆོའེ་ཤེད་།
4 ཏམ་པེ་ ཐུག་ཡིད་ རྒྱུད་ཏེ་ ལམ་ཅུག་རྒེ་ ཛེད་ཀ་ནེ་ འབཱར་ན་འབཱ་ རྡང་ ས་འུལ་ སེ་ལུ་ཀི་ཡཱ་ ཟེར་ས་ ལེཔ་ ཡང་ ཏེ་ཀ་ནི་ ཁོང་རྒུན་ ཆུ་རེལ་ལ་ ཞོན་འདེ་ སིབ་རུ་ ཟེར་ས་ རྐྱོད་། 5 ཁོང་རྒུན་ ས་ལ་མི་ལ་ ལེབ་རྦེ་རྡང་, ཏུ་རུ་ ཡ་ཧུ་འདཱ་པེ་ འདུ་ཀང་རྒུ་ནི་ན་ ཀོན་འཇོག་རྒེ་ ཀའ་ ཤེད་། ཡོ་ཧཱ་ནན་ མར་ཀུ་ ཁོང་རྒུན་ ཉམ་པོ་ ཡ་ཏོ་ ཅོ་ལ་ ཡོྃ་རྡེ་ ཡོད་པེན་།
6 ཁོང་རྒུན་ ཏེ་ ཚོ་ལིང་ངེ་a, ཀྲོང་ཁྱེར་ནི་ ཀྲོང་ཁྱེར་ རྒྱུད་ཏེ་ པ་ཕོ་ ཟེར་ས་ ལེཔ་། ཏུ་རུ་ ཁོང་རྒུན་ལ་ ཡ་ཧུ་འདཱ་པེ་ ལུང་རྟོན་པ་ ཟུའི་མ་, འབར་ཡི་ཤུ་ ཟེར་ཧ་ནི་ ངན་ཆོའེ་ ཅོ་ཀན་འབོ་ ཐུག་། 7 ཁོ་ ཏེ་ ཡུལ་ལེ་ ཀ་ལོན་ སེར་འགི་འུ་ པ་འུ་ལུའི་ ཡོག་ལ་ ལེ་ཧ་ ཅོ་ཀན་ཞིག་ འིན་འབེན་། ཏེ་ རིག་པ་ཅེན་ ཀ་ལོན་འབེ་, འབཱར་ན་འབཱ་ རྡང་ ས་འུལ་ འབོའེ་རྡེ་ ཁྱོྃ་, ཅེ་ཟེར་ནི་ ཁོ་ ཀོན་འཇོག་རྒེ་ ཀའ་ ཉེན་ཅེ་ འདོད་པ་ ཡོད་པེན་། 8 འིན་ན་ ཨེ་ལི་མཱེ་ འགི་རིག་རྒེ་ ཧད་རྡེ་ན་ ངན་ཆོའེ་ ཅོ་ཀན་ལ་ ཟེ་རེ་ནོག་། ཁོང་རྒུ་ནི་ རྒྱཔ་འགལ་ ཅོའེ་རྡེ་ ཀ་ལོན་ སེར་འགི་འུ་ལ་ ཏེཏ་པ་ ཅོ་ཅེ་ནི་ རྒག་ཅེ་ ཙོན་འགྲུའི་ ཅོའེ་།
9 ཏེ་ནི་ ས་འུལ་ ཀ་འབོ་ལ་ པ་འུ་ལུ་ལ་ ཞུ་ཡོད་པེན་, ཏམ་པེ་ ཐུག་ཡིད་རྡེ་ ཀང་འདེ་ ངན་ཆོའེ་ ཅོ་ཀན་འབོ་ལ་ མིག་ ནེན་ཏེན་ ལྟོའེ་ ཡང་ མོལ་། 10 “ཝ་, རྡུད་རྡེ་ རྒྱུད་ ཏང་ ཀྲང་པེ་ འགྲ་ཝོ་, ཁྱེ་རང་ངེ་ན་ འགོ་ཧོར་ཤེ་ རྡང་ ངན་སེམ་ ཚང་མ་ ཀང་འདེ་ འདུག་། ཁྱེ་རང་ངེ་ ཙོབོ་རྡེ་ ལམ་ ཀྲང་པོ་ འིན་ཀན་འབོ་ ཀྲང་པོ་ མག་ ཟེར་ཤེ་རྦོ་ མི་ཕང་ངེ་? 11 ཏ་ ལྟོའེ་, ཙོབོ་ ཀོན་འཇོག་རྒེ་ ཆག་ ཁྱེ་རང་ངེ་ རྒྱཔ་འགལ་ལ་ འིན་། ཁྱེ་རང་ ཞ་ར་ འགྱུར་རྡེ་ ཞག་ ཁ་ཅིག་ ཉི་མ་ མི་ཐོང་” མོལ་རྦེ་, ཏེ་རྒ་མ་རྒ་ ཁོའེ་ འདུན་ལ་ མུན་ཀྲག་ སོང་, ཡང་ སུ་ཞིག་རྒེ་ ཁོ་ ལག་པ་ ཐམ་འདེ་ ཁྱེར་ཤེ་ལ་ ཁོའེ་ ཁར་ཁོར་ལ་ མུལ་ཉུག་ ཏྃ་།
12 ཀ་ལོན་ནེ་ སོང་ཀན་འབོ་ ཐོང་འདེ་ ཡི་ཤུའི་ཀ་ ཏེཏ་པ་ ཅོའེ་, ཅེ་ཟེར་ནི་ ཙོབོ་ ཡི་ཤུའི་ ཧོར་ལ་ ལབ་ཞ་རྒུན་ ཚོར་རྡེ་ ཁོ་ ཧ་ལེ་།
པི་སིད་ཡཱ་ ཡུལ་ལེ་ རྒྱལ་ས་ ཨན་ཏི་ཡོག་།
13 ཏེ་ནི་ པ་ཕོ་ རྒྱལ་ས་ནི་ པ་འུ་ལུ་ ཁོང་ངེ་ ཁྲོ་པ་རྒུན་ ཉམ་པོ་ ཆུ་རེལ་ལ་ ཞོན་འདེ་ པམ་ཕི་ལི་ཡཱ་ ཡུལ་ལེ་ན་ ཡོ་ཀ་ནེ་ པེར་འགེ་ ཟེར་ཧེན་ ས་ཅེ་ཀ་ ལེཔ་། ཏུ་རུ་ པ་འུ་ལུ་ རྡང་ འབཱར་ན་འབཱ་རྒུན་ ཕྃ་རྡེ་ ཡོ་ཧཱ་ནན་ མར་ཀུའི་ ཡེ་རུ་ཤ་ལེམ་ལ་ ལོག་ཏེ་ སོང་, 14 འིན་ན་ པ་འུ་ལུ་ རྡང་ འབཱར་ན་འབཱ་ པེར་འགེ་ནེ་ འབིང་འདེ་ པི་སིད་ཡཱ་ ཟེར་ཧེན་ ཡུལ་ལེ་ ཨན་ཏི་ཡོག་ རྒྱལ་ས་ རྐྱོད་།
ངལ་ཚོའེ་ ཞག་ལ་ ཡ་ཧུ་འདཱ་པེ་ འདུ་ཀང་ལ་ རྐྱོད་ཏེ་ ཐང་ཀེ་ཀ་ ཞུའུ་། 15 ཡང་ ཀཱ་ཁྲིམ་ འདང་ ལུང་རྟོན་པེ་ སྤེ་ཆ་རྒུན་ སིལ་ ཚར་རེ་རྡང་, ཡ་ཧུ་འདཱ་པེ་ འདུ་ཀང་ངེ་ འུ་རྐྱོང་རྒུ་ནི་ ཁོང་ ཉ་ཧ་ ཟེར་, “སྤུན་རྒུན་, ཀལ་ཏེ་ ཁྱི་ཞ་རྒུ་ནི་ མི་ཚོག་ལ་ སེམ་རུའི་རྡེ་ ཀའ་ ཤེད་ཅེ་ ཡོད་ནི་ ཤེད་རྡེ་ ཛེད་།”
16 ཏེ་ནི་ པ་འུ་ལུ་ ཞྃ་རྡེ་ ཡང་ ལག་པ་ ཉམ་པོ་ ཁ་རོག་ཏེ་ འདོད་ མོལ་, “ཨིས་ར་ཡེལ་པ་རྒུན་ རྡང་ ཀོན་འཇོག་རྒེ་ འཇི་སྤེ་ན་ འགྲུལ་ཧན་ ཡ་ཧུ་འདཱ་པ་ མན་ཀན་རྒུན་ ངེ་ སྤེ་ར་ ཉོན་ཧེ་། 17 ཨིས་ར་ཡེལ་པེ་ ཅོལ་ཧན་ནེ་ ཀོན་འཇོག་རྒེ་ ཨ་ཧོའེ་ ཕ་མེ་པོ་རྒུན་ འདམ་མེ་ ཛེད་། ཨི་འཇིབ་ ཡུལ་ལེ་ན་ ཡོད་ཟ་ནི་, ཁོང་རྒུ་ནི་ ཀྲང་ཧ་ རྒྱེ་རྡེ་ ཤུག་ཤེན་ འགྱུར་, ཡང་ ཏེ་ ཡུལ་ནི་ ཤུག་ཤེན་ ཀོན་འཇོག་རྒེ་ ཁོང་རྒུན་ ཕིང་འདེ་ ཁྱོང་ངེ་ ཛེད་། 18 རི་ལྟོང་ངེ་ན་ ལོ་ ཞིབ་ཅུ་ཚུག་པ་ ཏེ་ མི་རྒུན་ ཁ་མི་ཉེན་ ཡོད་ནྃ་ ཀོན་འཇོག་རྒེ་ ཁོང་རྒུན་ ཉམ་པོ་ ཟོད་པ་ ཛེད་། 19 ཁོང་ངེ་ ཀེ་ནེན་ནི་ རྒྱལ་ཁབ་ རྡུན་འབོ་ མེ་ཀན་ ཛེད་ཏེ་ ཏེ་ ས་ཀྱེཏ་རྒུན་ ཁོ་རང་ངེ་ མི་རྒུན་ལ་ ནོར་ཧལ་ལ་ སལ་། 20 འི་ ཚང་མ་ ཀྲུཔ་ཅེ་ལ་ ཧ་ལམ་ ལོ་ ཞིབ་རྒྱ་ རྡང་ ངཔ་ཅུ་ འགོར་།”
“ཏེ་ ལྟིང་ནི་ ཀོན་འཇོག་རྒེ་ ཤ་མུ་ཨེལ་ ལུང་རྟོན་པེ་ ཏུའི་ཚུག་པ་ ཁོང་རྒུན་ལ་ འུ་རྐྱོང་རྒུན་ སལ་ལེ་ ཛེད་། 21 ཏེ་ནི་ མི་རྒུ་ནི་ ཀོན་འཇོག་ལ་ རྒྱ་སྤོ་ཞིག་ སལ་ཅེ་ལ་ ཞུ་ཝ་ པུལ་རྦེ་, ཀོན་འཇོག་རྒེ་ ཨིས་ར་ཡེལ་ལེ་ མི་རིག་རྒེ་ འབེན་ཡཱ་མིན་ནི་ ནང་ནི་ ཁིཤ་ པུ་ཙ་ ས་འུལ་ ཟེར་ཧན་འབོ་ སལ་ལེ་ ཛེད་, ཡང་ ཁོའེ་ ལོ་ ཞིབ་ཅུ་ ཝང་སྲུལ་། 22 ཀོན་འཇོག་རྒེ་ ས་འུལ་ རྒྱ་སྤེ་ ཝང་ནི་ ཐེན་ནེ་ ཛེད་ཏེ་ འདཱ་འབིད་ ཁོང་རྒུ་ནི་ རྒྱ་སྤོ་ ཅོའོ་ ཛེད་། ཀོན་འཇོག་རྒེ་ འདཱ་འབིད་རྡེ་ ཧོར་ལ་ མོལ་རྡེ་ ནོག་, ‘ང་ ཡི་ཤེ་ པུ་ཙ་ འདཱ་འབིད་ ཐོབ་, ཁོའེ་ འདོད་པ་རྒུན་ ང་ ཙོག་སེ་ འདུག་། ཁོའེ་ ཅི་ཚང་མ་ ངེ་ འདོད་པ་ ནང་ཞིན་ ཅོའེན་།’”
23 “ཀོན་འཇོག་རྒེ་ རང་ངེ་ ཞལ་ཆེཏ་ ཛེད་ཀན་ ནང་ཞིན་, འདཱ་འབིད་རྡེ་ ཕར་རྒྱུད་ནི་ ཨིས་ར་ཡེལ་པ་རྒུ་ནི་ རྐྱབ་འགོན་, ཡི་ཤུ་ ཀ་ལེ་ ཛེད་། 24 ཡི་ཤུ་ རྐྱོད་རྡེ་སང་ ངུལ་ལ་, ཡོ་ཧཱ་ནན་ནེ་ ཨིས་ར་ཡེལ་པ་ ཚང་མ་ལ་ ཆོའེ་ཤེད་རྡེན་, རྡིག་པ་ ཕྃ་རྡེ་ སེམ་འགྱུར་རྡེ་ ཁྲུའི་ནེན་ཅེ་ལ་ མོལ་ལེ་ ཛེད་། 25 ཡོ་ཧཱ་ནན་ནེ་ ལེ་ཧ་རྒུན་ ཀྲུཔ་ ཚར་ཀྱི་ ཡོད་ཟ་ནི་, ཁོང་ངེ་ མོལ་, ‘ཁྱི་ཞ་རྒུ་ནི་ ང་ སུ་ ནོག་ ས་མེ་རག་? ང་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ མན་། ཁོང་ ངེ་ ལྟིང་ནི་ རྐྱོད་རྡེན་, ང་ ཁོང་ངེ་ ཞབ་ཤི་ ཙོག་སེ་ ཞཔ་ལམ་ རོ་རྦུད་ ཀྲོལ་ཤེ་ འོའེ་སྤ་ མེད་།’”
26 “ངེ་ ཁྲོ་པ་ ཨབ་ར་ཧམ་མེ་ ཕར་རྒྱུད་ ཏང་ ཀོན་འཇོག་རྒེ་ འཇིའི་ རྡང་ སི་ཝེ་ན་ མི་ཙེ་ པུད་ཀ་ནེ་ ཡ་ཧུ་འདཱ་པ་ མན་ཀན་རྒུན་, འི་ ཐར་པེ་ ཁྲིན་འབོ་ ཨ་ཧོ་རྒུ་ནི་ཕི་ ཀལ་ལེ་ ཛེད་ཏེ་ ནོག་། 27 ཡེ་རུ་ཤ་ལེམ་པ་ རྡང་ ཁོང་རྒུ་ནི་ ཝང་སྲུལ་པ་རྒུ་ནི་ ཡི་ཤུ་ ངོ་ མ་ཤེ་, འིན་ན་ ཁོང་ལ་ ཀྲོྃ་ཤེ་ ཁྲིམ་ཅེད་ཏེ་, ངལ་ཚོའེ་ ཞག་ལ་ རིམ་རྒྱི་ སིལ་ཧན་ནེ་ ལུང་རྟོན་པ་རྒུ་ནི་ མོལ་ཧན་རྒུན་ འདྲན་འདྲ་ ཀྲུཔ་ཅུག་། 28 ཁོང་རྒུན་ལ་ ཡི་ཤུ་ སྲོག་རྒེ་ ཆེད་པ་ ཕོག་ཅུག་ཅེ་ལ་ ཅང་ ཉེད་ མ་ཐོབ་ནྃ་ ཁོང་རྒུ་ནི་ པི་ལ་ཏུ་ལ་ ཁོང་ སེད་ཅེ་ལ་ ཞུ་ཝ་ པུལ་། 29 ཡི་ཤུའི་ ཧོར་ལ་ འབྲི་ཛེད་ཏེ་ ཡོ་ཀན་ ཚང་མ་ འདྲན་འདྲ་ ཀྲུབ་ཅུག་ཏེ་ ལྟིང་ནི་ ཁོང་ངེ་ སྤུར་རྦོ་ རྐྱང་ཤིང་ངེ་ཀ་ནི་ སྤབ་ཏེ་ ཁོང་རྒུ་ནི་ སྤུར་ཧང་ངེ་ན་ ཞུའི་། 30 འིན་ན་ ཀོན་འཇོག་རྒེ་ ཁོང་ ཤི་ཀན་རྒུ་ནི་ ཕྲོ་ནི་ སོན་པོ་ ལྃ་ངེ་ ཛེད་, 31 ཡང་ ཞག་ མང་པོ་ཞིག་ འགཱ་ལིལ་ལེ་ ཡུལ་ནི་ ཁོང་ ཉམ་པོ་ ཡེ་རུ་ཤ་ལེམ་ལ་ ཡོྃ་རྡེ་ ཡོ་ཀན་རྒུན་ལ་ ཁོང་ འཇལ་། ཁོང་རྒུ་ནི་ ཏ་ ཨིས་ར་ཡེལ་པ་ ཚང་མེ་ འདུན་ལ་ ཁོང་ངེ་ སྤང་པོ་ ས་ལེན་ ནོག་།”
32 “ང་ཞི་ འི་ ནེ་ཚུལ་ ཟང་པོ་ ཤེད་རྡེ་ཡོད་: ཀོན་འཇོག་རྒེ་ ཨ་ཧོའེ་ ཕ་མེ་པོ་རྒུན་ ཉམ་པོ་ ཞལ་ཆེཏ་པོ་ ཛེད་, 33 ཁོང་རྒུ་ནི་ ཕར་རྒྱུད་ ཨ་ཧོ་རྒུན་ལ་, ཡི་ཤུ་ སོན་པོ་ ལང་ངེ་ ཛེད་ཏེ་ ཀོན་འཇོག་རྒེ་ ཏེ་ ཞལ་ཆེཏ་པོ་ ཀྲུཔ་ཅུག་རྒེ་ ཛེད་, ཀ་ཟུག་ སུང་འགུར་ ཉི་སྤེ་ན་ ཡི་ཤུའི་ ཧོར་ལ་ འབྲི་ཛེད་ཏེ་ ནོག་,
‘ཁྱེ་རང་ ངེ་ པུ་ཙ་ འིན་།
ཏི་རིང་ ང་ ཁྱེ་རང་ངེ་ ཨ་རྦ་ལ་ འགྱུར་རྡེ་ འིན་།’
34 ཀོན་འཇོག་རྒེ་ ཁོང་ ཤི་ཀན་རྒུ་ནི་ ཕྲོ་ནི་ སོན་པོ་ ལྃ་ངེ་ ཛེད་ཅེ་ཀ་ནི་, ཁོང་ ཏ་ མ་ནི་ མི་རུལ་། ཀོན་འཇོག་རྒེ་ མོལ་ལེ་ ཛེད་,
‘འདཱ་འབིད་ ཉམ་པོ་ ཁ་ཅེད་ ཅོ་ཀ་ནེ་ ཏམ་པ་ ཅིན་ལབ་
ངེ་ ཁྱི་ཞ་རྒུན་ལ་ ཏང་ངེན་།’
35 ཞེན་ སུང་འགུར་ཞིག་རྒེ་ན་ མོལ་རྡེ་ ནོག་།
‘རང་ངེ་ ཏམ་པ་འབོ་ ཉེ་རང་ངེ་ རུལ་ཅུག་རྒེ་ མི་ཛེད་།’”
36 “འདཱ་འབིད་རྡེ་ རང་ངེ་ མི་ཙེ་ན་ ཀོན་འཇོག་རྒེ་ ཐུག་འདོད་ ནང་ཞིན་ ཁོང་ལ་ ཞབ་རྟོག་ ཞུའི་རྡེ་ ལྟིང་ནི་ ཀྲོྃ་, ཡང་ ཕ་མེ་པོ་རྒུན་ ཉམ་པོ་ ཁོང་ངེ་ ཟུྃ་སྤོ་ སྤུར་ཧང་ངེ་ན་ པོར་རྦེ་ རུལ་། 37 འིན་ན་ ཀོན་འཇོག་རྒེ་ སོན་པོ་ ལང་ངེ་ ཛེད་ཀན་འབོ་ལ་ རུལ་ཅེ་ ཉོང་ མ་ཉེན་། 38 སྤུན་རྒུན་ ཉོན་ཧེ་, ང་ཞ་ འེ་ཀ་ ཡི་ཤུ་ རྒྱུད་ཏེ་ ཁྱི་ཞི་ རྡིག་པ་རྒུན་ལ་ ཤག་སྤ་ ཐོབ་ཅེའོ་ ཁྱི་ཞ་རྒུན་ལ་ ཤེད་རྡེ་ལ་ ཡོྃ་རྦེན་། 39 ཡི་ཤུའི་ཀ་ ཏེཏ་པ་ ཅོ་ཀན་ ཚང་མ་ལ་ རྡིག་པ་རྒུ་ནི་ ཐར་ཏེ་ རྐྱོན་མེད་ འགྱུར་རྡེ་ ནོག་, ཀའོ་ ཁྱི་ཞ་རྒུན་ལ་ མོ་ཤེ་ ཀཱ་ཁྲིམ་ རྒྱུད་ཏེ་ ཐོབ་ ཉེན་ཅེ་ མ་ནི་ མེད་རྦེན་། 40 ཤང་ ཅོའེ་, ལུང་རྟོན་པ་རྒུ་ནི་ མོལ་ཧན་རྒུན་ ཁྱི་ཞ་རྒུ་ནི་ཀ་ ཆ་ མ་ཅུག་ཧེ་,
41 ‘ལྟོའེ་རྡང་, ང་ ཚིག་ ཏང་ཀན་རྒུན་
ཧ་ལེ་རྡེན་ ཡང་ ཤིན་།
ངེ་ ཁྱི་ཞི་ ཏུའི་ན་ ཏུ་ཟུག་ ལེ་ཞིག་ ཅོ་ཅེ་ འིན་,
ཀ་རྦེ་ ཧོར ཁྱི་ཞ་ ཤེད་ནྃ་ ཁྱི་ཞ་རྒུན་ལ་ མ་ནི་ རྡེན་ མི་ཆེ་།’”
42 པ་འུ་ལུ་ རྡང་ འབཱར་ན་འབཱ་ འདུ་ཀང་ནི་ ཕི་ལོག་ལ་ འབིང་འདེ་ རྐྱོད་ཟ་ནི་ མི་རྒུ་ནི་ ཁོང་རྒུན་ལ་, ལྟིང་མ་ ངལ་ཚོའེ་ ཞག་ལ་, ཡུ་ཙོག་སེ་ ལབ་ཞ་ མང་ངེ་ ཤེད་རྡེ་ ཛེད་ ཟེར་རྡེ་ ཞུ་ཝ་ པུལ་། 43 མི་ཚོག་ ཤོལ་ལེ་འདང་ ཡ་ཧུ་འདཱ་པ་ རྡང་ ཡ་ཧུ་འདཱ་པེ་ ཆོའེ་ལ་ ཏེཏ་པ་ ཅོ་ཀན་ མང་པོ་ཞིག་ པ་འུ་ལུ་ རྡང་ འབཱར་ན་འབཱ་ རྒྱབ་ནི་ སོང་། ཁོང་ ཉ་ཧེ་ ཁོང་རྒུན་ལ་ སྤེ་ར་ ཏང་ངེན་ ཀོན་འཇོག་རྒེ་ ཐུག་ཞེ་ཀ་ རྟམ་པོ་ འདེད་ཅེ་ལ་ མ་སྲན་ཀྲེ་ ཞུ་ཝ་ པུལ་།
44 ལྟིང་མ་ ངལ་ཚོའེ་ ཞག་ལ་, ཧ་ལམ་ རྒྱལ་ས་ སོན་ཏེ་ མི་རྒུན་ ཀོན་འཇོག་རྒེ་ ཀའ་ ཉེན་ནེ་ལ་ ཛོམ་། 45 ཏུ་ཟུག་ མི་ཚོག་ མང་པོ་ ཐོང་འདེ་ ཡ་ཧུ་འདཱ་པ་རྒུན་ལ་ ཕྲ་རྡོག་ ཡོྃ་, ཡང་ པ་འུ་ལུའི་ ལབ་ཞ་རྒུན་ལ་ རྒྱཔ་འགལ་ ཅོའེ་རྡེ་ ཁོང་ངེ་ ཧོར་ལ་ འབར་།
46 ཏེ་ནི་ པ་འུ་ལུ་ རྡང་ འབཱར་ན་འབེ་ མ་ ཧམ་བ་ ཉམ་པོ་ ཡ་ཧུ་འདཱ་པ་རྒུན་ལ་ ལེན་སལ་, “ང་ཞ་ ཀོན་འཇོག་རྒེ་ ཀའ་ འགོ་མ་ ཁྱི་ཞ་རྒུན་ལ་ ཤེད་རྒོའེ་རྡེ་ འིན་འབེན་། ཁྱི་ཞི་ ཏོ་ ཕྃ་རྡེ་ ཁྱི་ཞ་རང་ ཐ་མེད་པེ་ མི་ཙེ་ ཐོབ་ཅེ་ འོའེ་སྤ་ མི་ཐེའེ་ཤེ་ཀ་ནི་ ང་ཞི་ ཡ་ཧུ་འདཱ་པ་ མན་ཀན་རྒུན་ལ་ ཉེན་ཅེ་ ཧབ་ ཏང་ངེ་ཡོད་, 47 ཅེ་ཟེར་ནི་ ཙོབོ་ ཀོན་འཇོག་རྒེ་ ང་ཞ་ འི་ ཀཱ་འབོ་ སལ་,
‘འཇིག་རྟེན་ནེ་ ཀྲུ་ཀྲུའི་ན་ ཐར་པ་ ཁྱོང་ཅེ་ལ་
ངེ་ ཁྱེ་རང་རྒུན་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ འོད་ ཙོག་སེ་ ཀལ་རྡེ་ འིན་།’”
48 འི་རྦོ་ ཡ་ཧུ་འདཱ་པ་ མན་ཀན་རྒུ་ནི་ ཚོར་རེ་རྡང་, ཁོང་རྒུན་ ཧོཔ་ ཐེད་ཏེ་ ཙོབོ་རྡེ་ ཀའ་ རྟོད་པ་ པུལ་, ཡང་ ཀོན་འཇོག་རྒེ་ ཐ་མེད་པེ་ མི་ཙེ་ཕི་ འདམ་མེ་ ཛེད་ཀན་རྒུ་ནི་ ཏེཏ་པ་ ཅོའེ་། 49 ཙོབོ་ ཀོན་འཇོག་རྒེ་ ཀའ་ ཏེ་ ཡུལ་ཞོང་ སོན་ཏེ་ན་ ཕེལ་།
50 འིན་ན་ ཡ་ཧུ་འདཱ་པེ་ ནང་ནི་ ཁ་ཅིག་རྒེ་ ཏོ་ རྒྱལ་སེ་ ཆོའེ་སྤ་ པོ་མོ་ སི་ཝ་ཅེན་ རྡང་ འུ་རྐྱོང་རྒུན་ལ་ པ་འུ་ལུ་ རྡང་ འབཱར་ན་འབེ་ རྒྱཔ་འགལ་ལ་ སྲོ་ ཡོང་ཅུག་པེ་, ཁོང་རྒུ་ནི་ མི་རྒུན་ལ་ ཁོང་ ཉ་ཧེ་ ནག་ ལྟན་ཅུག་ཏེ་ རྒྱལ་ས་ནི་ ཕི་ལོག་ལ་ ཕིང་ཅུག་། 51 ཁོང་ ཉ་ཧེ་ ཁོ་རང་རྒུ་ནི་ འཇའ་ཏོའེ་ ཐལ་རྦ་ སྲུག་ཏེ་ ཁོང་རྒུན་ ཀོན་འཇོག་རྒེ་ ཆད་པེ་ཕི་ པོར་ཧན་འབོ་ ལྟན་ནེ་ ཛེད་ ཡང་ ཁོང་རྒུན་ ཏེ་ཀ་ནི་ ཨི་ཀོ་ནི་ཡམ་མེ་ན་ རྐྱོད་། 52 ཨན་ཏི་ཡོག་རྒེ་ན་ ཡོ་ཀ་ནེ་ ལོབ་ཀྲུག་རྒུན་ ཐེད་པོ་ རྡང་ ཏམ་པེ་ ཐུག་ཡིད་རྡེ་ ཀང་།