པི་ཏྲ་རེ་ ཁོའེ་ ལེ་ཧ་རྒུན་ སལ་སྤོ་ ཧ་ཀོ་ཅུག་རྒེ་ ཛེད་།
11
ཡ་ཧུ་འདཱེ་ན་ ཡོ་ཀ་ནེ་ ཧུ་ཚབ་རྒུན་ རྡང་ ཞེན་ ཏེཏ་པ་ཅན་རྒུན་ལ་ ཡ་ཧུ་འདཱ་པ་ མན་ཀན་རྒུ་ནི་ལ་ ཀོན་འཇོག་རྒེ་ ཀེའེ་ཀ་ ཏེཏ་པ་ ཅོའེ་རྡོག་ ཟེར་རྡེ་ ཚོར་། 2 པི་ཏྲར་ ཡེ་རུ་ཤ་ལེམ་ལ་ ལོག་ཏེ་ རྐྱོད་རྡེ་རྡང་, ཡ་ཧུ་འདཱ་པ་ ཏེཏ་པ་ཅེན་ ཁ་ཅིག་རྒེ་ ཁོང་ལ་ ཟེར་ཟེར་ ཏྃ་རྡེ་ ཟེར་, 3 “ཉེ་རང་ ཡ་ཧུ་འདཱ་པ་ མན་ཀན་ ཀྲིཔ་རྒུ་ནི་ ཁང་པ་ སོང་འདེ་ ཁོང་རྒུན་ ཉམ་པོ་ ཁར་ཞི་ ཟོའེ་རྡོག་།”4 ཏེ་ནི་ པི་ཏྲ་རེ་ སོང་ཀན་ ཚང་མ་ འགོ་ནི་ འཇུག་ཚུག་པ་ ཚིར་ཚིར་ ཚིར་ལ་ ཁོང་རྒུན་ལ་ ཤེད་། 5 “ངེ་ ཡོ་པ་ ཀྲོང་ཁྱེར་རེ་ན་ མོ་ལམ་ ཞུའིན་ ཡོད་པེན་, ཧུན་མེད་ལ་ ངེ་ འི་ ཞལ་ཟིག་པོ་ ཐོང་: ནམ་ཀ་ནི་ རེ་ ཆོན་མོ་ ཙོག་སེ་ ཀྲུ་ ཞི་ཀ་ནི་ ཟུམ་འདེ་ ངེ་ འདུན་ལ་ སྤབ་། 6 ངེ་ ཏོ་ལ་ ནེན་ཏེན་ ཅོའེ་རྡེ་ ལྟོའེ་རྦེ་, ཏེ་ན་ སྲལ་ཧན་ འདང་ ནག་ཚོག་རྒེ་ སེམ་ཅེན་, ས་འཇར་རེ་ འབུ་ཙིག་ ན་མི་ན་ ཚང་ འདང་ ཅ་ཅིའུ་རྒུན་ ཐོང་། 7 ཏེ་ནི་ ང་ སུང་ཧད་ཅིག་རྒེ་ ‘པི་ཏྲར་ ཏ་ ལྃ་རྡེ་ ཡུ་རྒུན་ སེད་ཏེ་ ཟོ་’ མོལ་ལེན་ ཚོར་།”
8 “ངེ་ ཟེར་རྦེན་, ‘ཀྱེ་ ཙོབོ་ མ་ནི་ མི་ཟ་, ཏི་རིང་ཚུག་པ་ ངེ་ ཡ་ཧུ་འདཱ་པེ་ ཁྲིམ་ སྲུྃ་རྡེ་ ཡུ་ཙོག་སེ་ ཀྲིཔ་ རྡང་ ཁམ་ལོག་ ཁར་ཞི་རྒུན་ མ་ཟོའེ་རྦེན་།’”
9 “ནམ་ཀ་ནི་ ཏེ་ སུང་ཧད་པེ་ ལེན་ ཉི་སྤ་ མོལ་, ‘ཀོན་འཇོག་རྒེ་ སང་མ་ ཛེད་ཀན་རྒུན་ལ་ ཁྱེ་རང་ངེ་ ཀྲིཔ་ མ་ཟེར་།’ 10 ཏེ་རྒ་རྦོ་ ཚེར་ སུམ་ སོང་, ཏེ་ ལྟིང་ནི་ ཏེ་ ཚང་མ་ ལོག་ཏེ་ ནམ་ཀ་ ཐེན་ནེ་ ཛེད་།”
11 “ཏེ་རྒ་ ཏུའི་ལ་ ཀཱེ་སར་རི་ཡ་ནི་ ང་ས་ ཀལ་ཧ་ནེ་ མིང་འགོ་ སུམ་, ང་ འབྲང་ས་ འདེད་ཀ་ནེ་ ཁང་པ་རྦེ་ རྒོའེ་ཀ་ ལེཔ་། 12 ཏམ་པེ་ ཐུག་ཡིད་རྡེ་ ང་ མོལ་ ‘ཁྱེ་རང་ འི་ མི་རྒུན་ ཉམ་པོ་ ཐེ་ཚོམ་ མེད་རྡེ་ སོང་།’ འི་ ཏེཏ་པ་ཅན་ ཀྲུག་ཀ་ལ་ ང་ ཉམ་པོ་ ཡོྃ་, ཡང་ ང་ཞ་རྒུན་ ང་ འབོ་ལ་ ཀལ་ཧ་ནེ་ མི་རྦེ་ ཁང་པེ་ན་ སོང་འབེན་། 13 ཁོའེ་ ང་ཞ་ ཤེད་, ཁོ་ ཁོ་རང་ངེ་ ཁང་པེ་ན་ ཀོན་འཇོག་རྒེ་ ཕོ་ཉ་ཞིག་ འཇལ་རྡེ་ ‘ཡོ་པ་ ཟེར་ས་ མི་རྒུན་ ལམ་ཅུག་ཏེ་ ཤི་མོན་པི་ཏྲར་ ཟེར་ཧ་ནེ་ མིའུ་ འི་རུ་ འབོའེ་རྡེ་ ཁྱོྃ་། 14 ཁོའེ་ ཤེད་ཀ་ནེ་ ལོན་འབེ་ ཁྱེ་རང་ འདང་ ཁྱེ་རང་ངེ་ ནང་ཚང་ ཚང་མ་ ཐར་པ་ ཐོབ་རྦེན་ མོལ་ལེ་རག་།’”
15 “ངེ་ ཤེད་ཅེ་ འགོ་ཟུག་ ཅོ་རྡང་, ཁོང་རྒུ་ནི་ཀ་ལ་ ཏམ་པེ་ ཐུག་ཡིད་ པབ་ ཀ་ཟུག་རྒེ་ ཨ་ཧོ་རྒུ་ནི་ཀ་ འགོ་མ་ པབ་ཏེ་ འིན་འབེན་། 16 ཏེ་ནི་ ང་ ཙོབོ་ ཡི་ཤུའི་ ‘ཡོ་ཧཱ་ནན་ནེ་ ཆུའི་ ཁྲུའི་སལ་རྡེ་ འིན་འབེན་, འིན་ན་ ཁྱི་ཞ་རྒུན་ལ་ ཏམ་པེ་ ཐུག་ཡིད་རྡེ་ ཁྲུའི་ཐོབ་རྦེན་’ མོལ་ཧན་འབོ་ འི་ཏུ་ ཡོྃ་། 17 ཙོབོ་ ཡི་ཤུ་ མ་ཤི་ཀ་ ཏེཏ་པ་ ཅོ་ཀན་ ཨ་ཧོ་རྒུན་ལ་ སལ་ཧ་ནེ་ ཏེ་རྒ་ ཁྱུད་པོ་ ཀོན་འཇོག་རྒེ་ ཁོང་རྒུན་ལ་ སལ་རྡེ་ འིན་ན་, ཏེ་ནི་ ཀོན་འཇོག་ལ་ རྒྱཔ་འགལ་ ཅོ་ཉེ་ནེན་ སམ་ཀན་ ང་ སུ་ ནོག་?”
18 ཟེར་ཟེར་ ཏང་ ཏྃ་ཀན་རྒུ་ནི་ ཏེ་ སྤེ་ར་རྒུན་ ཚོར་རེ་རྡང་, ཁོང་རྒུ་ནི་ རྒྱཔ་འགལ་ ཅོ་ཅེ་ ཕྃ་རྡེ་ ཀོན་འཇོག་ལ་ རྟོད་པ་ པུ་ལེན་ ཟེར་, “ཏ་ ཧ་ཀོ་, སེམ་འགྱུར་ཧན་ནེ་ ཡ་ཧུ་འདཱ་པ་ མན་ཀན་རྒུན་ལ་ ཀོན་འཇོག་རྒེ་ ཐ་མེད་པེ་ མི་ཙེ་ ཐོབ་ཅེ་ ཧབ་ སལ་ལེ་ ཛེད་ཏེ་ ནོག་།”
ཨན་ཏི་ཡོག་ རྒྱལ་སེ་ན་ ཡོ་ཀ་ནེ་ ཆོའེ་ཚོག་།
19 རྟེ་ཕན་ སེད་ཏེ་ ལྟིང་ནི་ ནག་ ཐོང་ཀ་ནེ་ ཏེཏ་པ་ཅན་རྒུན་ ཤོར་རྡེ་ ཐག་རིང་ངེ་ ཡུལ་, ཕོ་ནི་ཤི་ཡ་, སིབ་རུ་ རྡང་ ཨན་ཏི་ཡོག་ རྒྱལ་ས་རྒུན་ལ་ ལེཔ་། ཁོང་རྒུ་ནི་ ཀོན་འཇོག་རྒེ་ ཀའ་ ཡ་ཧུ་འདཱ་པ་རྒུན་ལ་ མ་ནི་ མ་ཤེད་། 20 འིན་ན་ ཁོང་རྒུ་ནི་ ཕྲོ་ནི་ སིབ་རུ་ རྡང་ ཀི་རིན་ ཡུལ་ནི་ འིན་ཀན་ ཁ་ཅིག་ ཨན་ཏི་ཡོག་ རྒྱལ་ས་ སོང་འདེ་ ཡ་ཧུ་འདཱ་པ་ མན་ཀན་རྒུན་ལ་ ཙོབོ་ ཡི་ཤུ་ མ་ཤི་ཀེ་ ཧོར་ལ་ ནེ་ཚུལ་ ཟང་པོ་ ཤེད་ཅེ་ འགོ་ཟུག་ ཅོའེ་། 21 ཙོབོ་ ཀོན་འཇོག་རྒེ་ ཁྱུད་ ཁོང་རྒུན་ ཉམ་པོ་ ཡོད་པེན་, ཡང་ མི་ མང་པེ་ ཁྲིན་འབེ་ཀ་ ཏེཏ་པ་ ཅོའེ་རྡེ་ ཙོབོ་ ཡི་ཤུའི་ རྒྱབ་ནི་ འགྲྃ་།
22 ཏེ་ ནེ་ཚུལ་རྦོ་ ཡེ་རུ་ཤ་ལེམ་ལ་ ཡོ་ཀ་ནེ་ ཆོའེ་ཚོག་རྒེ་ ཚོར་, ཡང་ ཁོང་རྒུ་ནི་ འབཱར་ན་འབཱ་ ཨན་ཏི་ཡོག་ལ་ ལམ་ཅུག་། 23 འབཱར་ན་འབཱ་ ཏུ་རུ་ ལེབ་རྦེ་རྡང་, ཀོན་འཇོག་རྒེ་ ཏེ་ ཏེཏ་པ་ཅན་རྒུ་ནི་ན་ ཆག་ལེ་ ཛེད་ཅེའོ་ ཐོང་འདེ་ མང་པོ་ ཐེད་, ཡང་ ཁོང་རྒུན་ལ་ ཙོབོ་ ཡི་ཤུའི་ན་ རྟེམ་པོ་ འདེད་ཅེ་ལ་ ཙོན་འགྲུའི་ སྲན་ཀྲེ་ ཅོ་ཅེ་ སེམ་རུའི་ སལ་། 24 འབཱར་ན་འབཱ་ནི་ མ་ མི་ ཟང་པོ་ཞིག་, ཏམ་པེ་ ཐུག་ཡིད་རྡེ་ ཀང་འདེ་ ཏེཏ་པ་ རྟེམ་པོ་ཅེན་ འིན་འབེན་། ཁོང་ རྒྱུད་ཏེ་ མི་ མང་པེ་ ཙོབོ་ ཡི་ཤུའི་ན་ ཏེཏ་པ་ ཅོའེ་།
25 ཏེ་ནི་ འབཱར་ན་འབཱ་ ས་འུལ་ ཙལ་ལེ་ ཏར་སུའི་ རྒྱལ་ས་ རྐྱོད་། 26 ས་འུལ་ ཐོབ་རྦེ་རྡང་, ཁོང་ ཨན་ཏི་ཡོག་ལ་ ཁོ་རང་ ཉམ་པོ་ ཁྱོྃ་། ཏུ་རུ་ ཁོང་ ཉ་ཧ་ ལོ་ སོན་ཏེ་ ཆོའེ་ཚོག་རྒེ་ན་ ཛོམ་འདེ་ མི་ མ་ མང་པོ་ལ་ ཡི་ཤུའི་ ཧོར་ལ་ ལབ་རྦེ་ ཛེད་། ཨན་ཏི་ཡོག་རྒེ་ན་ འགོ་མ་རང་ མ་ཤི་ཀེ་ ལོབ་ཀྲུག་རྒུན་ལ་ མ་ཤི་ཀ་པ་ ཟེར་།
27 ཏེ་རྒ་ ཏུའི་ལ་ ལུང་རྟོན་པ་ ཁ་ཅིག་ ཡེ་རུ་ཤ་ལེམ་ནི་ པབ་ཏེ་ ཨན་ཏི་ཡོག་ལ་ རྐྱོད་། 28 ཁོང་རྒུ་ནི་ ཕྲོ་ནི་ ཅིག་ ཨ་འགཱ་འབུ་ ཟེར་ཧན་འབོ་ ལྃ་རྡེ་ ཏམ་པེ་ ཐུག་ཡིད་ རྒྱུད་ཏེ་ རོམ་མེ་ ང་ཡོག་ལ་ ཡོ་ཀ་ནེ་ ཡུལ་ སོན་ཏེ་ན་ ལོར་ཧོན་ ཧོཔ་ ལྃ་ཤེ་ ལུང་རྟན་འབོ་ སལ་། འི་ ལོར་ཧོན་ རོམ་མེ་ རྒྱ་སྤོ་ ཀོལོ་འདི་འུ་ ཏུའི་ལ་ སོང་ཏེ་ འིན་། 29 ལོབ་ཀྲུག་རྒུ་ནི་ རང་རང་ངེ་ ཁྱུད་ ནང་ཞིན་ ཡ་ཧུ་འདཱེ་ན་ ཡོ་ཀ་ནེ་ ཏེཏ་པ་ཅན་རྒུན་ལ་ མུལ་ རོག་ ཅོ་ཅེ་ལ་ ཐག་ཅེད་། 30 ཡེ་རུ་ཤ་ལེམ་མེ་ ཆོའེ་ཚོག་རྒེ་ འུ་རྐྱོང་རྒུ་ནི་ ལག་ལ་ ཏང་ཅེ་ལ་ ས་འུལ་ རྡང་ འབཱར་ན་འབཱ་ ཉམ་པོ་ ཁོང་རྒུ་ནི་ མུལ་ འདུའི་ཧན་འབོ་ ཀལ་།