ཆག་ལེ་རྒུན་ 10

ཀོར་ནེ་ལིའུ་རྡེ་ པི་ཏྲར་ལ་ རྐྱོད་ ཞུ་ལ་ མི་ཀལ་།

ཀཱེ་སར་རི་ཡ་ན་ ཨི་ཏྲ་ལི་པེ་ མག་ཚོག་རྒེ་ ནང་ནི་ མག་མི་རྒྱེ་ སྤོན་འབོ་ ཀོར་ནེ་ལིའུ་ ཟེར་ཧན་ཞིག་ ཡོད་པེན་། 2 ཁོ་ རྡང་ ཁོའེ་ ནང་མི་ ཚང་མ་ མ་ ཏེཏ་པ་ཅེན་ འདང་ ཀོན་འཇོག་ལ་ སི་ཝ་ ཅོའེན་ ཁོང་ལ་ འཇིའི་རྡེན་ མི་ཙེ་ པུད་རྡེན་ ཡོད་པེན་། ཁོ་ ཉལ་རྦ་ཅེན་རྒུན་ལ་ ཉིང་ པེ་རྡེ་ ཏང་ཀན་ འདང་ ཞག་ཏང་ ཀོན་འཇོག་ལ་ མོ་ལམ་ ཞུ་ཀན་ཞིག་ ཡོད་པེན་། 3 ཞག་ཤིག་ ཛ་རེ་ ལྟིང་ནི་ ཧ་ལམ་ ཆུ་ཙོད་ སུམ་པ་ཞིག་རྒེ་ཀ་, ཞལ་ཟིག་ཅིག་རྒེ་ན་ ཀོན་འཇོག་རྒེ་ ཕོ་ཉ་ ཁོའེ་ འདུན་ལ་ རྐྱོད་ཏེ་ སལ་སྤོ་ ཐོང་ ཡང་ ཁོང་ངེ་ མོལ་, “ཀོར་ནེ་ལིའུ་།”

4 ཀོར་ནེ་ལིའུ་ འཇིའི་རྡེན་ ཕོ་ཉེ་ ཆོག་ལ་ མིག་ ནེན་ཏེན་ ལྟོའེ་, ཡང་ ཁོའེ་, “ཀྱེ་ ཙོབོ་ ཅི་ འདུག་” ཟེར་།

ཕོ་ཉེ་ ལེན་སལ་, “ཁྱེ་རང་ངེ་ ཞིན་བ་ རྡང་ མོ་ལམ་རྒུན་ ཆོད་པེ་ ཚུལ་ལ་ ཀོན་འཇོག་རྒེ་ ནམ་མེ་ ཛེད་། 5 ཏ་ མི་ ཁ་ཅིག་ ཡོ་པ་ ལམ་ཅུག་ཏེ་ ཤི་མོན་པི་ཏྲར་ ཟེར་ཧ་ནེ་ མིའུ་ འི་རུ་ འབོའེ་རྡེ་ ཁྱོང་། 6 ཁོ་ ཀོ་ཝ་ ཉེ་ཀན་ ཤི་མོན་ནེ་ ཁང་པ་ འདེད་ཏེ་ ཡོད་, ཁོའེ་ ཁང་པ་ རྒྱམ་ཚོའེ་ ཐ་མ་ ཡོད་།”

7 ཡུ་རྒུན་ མོལ་རྡེ་ ཕོ་ཉ་ རྐྱོད་ ཚར་རེ་རྡང་ ཀོར་ནེ་ལིའུ་ རང་ངེ་ ཡོག་པོ་ ཉི་ རྡང་ ཁོ་རང་ས་ ལ་ཧ་ ཅོ་ཀན་ མག་མི་རྒུ་ནི་ ཏེཏ་པ་ཅན་འཇིག་ འབོའེ་། 8 ཡང་ ཁོང་རྒུན་ལ་ སོང་ཀན་ ཚང་མ་ ཤེད་ཏེ་ ཡོ་པ་ ལམ་ཅུག་།

པི་ཏྲར་ལ་ ཞལ་ཟིག་ ཐོང་།

9 ལྟིང་མ་ ཞག་པོ་ ཁོང་ ཚང་ཀ་ པེའེ་ན་ ཡོ་པེ་ ཉེ་མོ་ལ་ ལེབ་རྦེ་རྡང་, ཉི་མེ་ཀུང་ ཟམ་ཤིག་ལ་ པི་ཏྲར་ ཁང་པེ་ ཁ་ཏོཏ་ལ་ མོ་ལམ་ ཞུ་ལ་ རྐྱོད་། 10 ཁོང་ ལྟོག་རྦེ་ ཅི་ཏོང་ཞིག་ ཟེན་ སམ་, ཡང་ ཁར་ཞི་ ཀྲལ་འགྲིག་ ཅོའེན་ ཡོད་ཏུའི་, ཁོང་ལ་ ཞལ་ཟིག་ཅིག་ ཐོང་། 11 ཁོང་ལ་ ནམ་ཀ་ པེ་རྡེ་ རེ་ ཆོན་མོ་ ཙོག་སེ་ ཆོག་ཞི་ཀ་ནི་ ཐམ་འདེ་ འཇིག་རྟེན་ ཆོག་ལ་ པུད་རྡེན་ ཐོང་། 12 ཏེ་ནི་ འཇིག་རྟེན་ནི་ཀ་ ཡོ་ཀ་ནེ་ སེམ་ཅེན་, ས་འཇར་རེ་ འབུ་ཙིག་ ཏང་ ཅ་ཅིའུ་ ན་མི་ན་ཙ་རྒུན་ འདུག་པེན་། 13 ཏེ་ནི་ ཁོང་ལ་ སུང་ཧད་ཅིག་རྒེ་, “པི་ཏྲར་ ལྃ་རྡེ་ ཡུ་རྒུན་ སེད་ཏེ་ ཟོ་།” མོལ་ལེན་ ཚོར་།

14 འིན་ན་ པི་ཏྲ་རེ་ ལེན་སལ་, “ཀྱེ་ ཙོབོ་, ཡུ་རྒུན་ མི་ཟ་, ངེ་ ཏི་རིང་ཚུག་པ་ ཀྲིཔ་ ཡང་ ཟ་ མི་ཆོག་ཅེ་ ཁར་ཞི་ཞིག་ མ་ནི་ མ་ཟོའེ་རྦེན་” མོལ་།

15 ཏེ་ནི་ ཁོང་ལ་ ཏེ་རྒ་ སུང་ཧད་པེ་ ལེན་ ཉི་སྤ་ མོལ་, “ཀོན་འཇོག་རྒེ་ སང་མ་ ཛེད་ཀན་འབོ་ལ་ ཀྲིཔ་ མ་ཟེར་།”

16 ལེན་ སུམ་ ཏེ་རྒ་ ཙོག་སེ་ སོང་, ཏེ་ནི་ ཧུན་མེད་ལ་ ཏེ་ རེ་འབོ་ ནམ་ཀ་ ཐེན་འདེ་ ཁྱེར་རེ་ ཛེད་།

17 པི་ཏྲ་རེ་ རང་ངེ་ སམ་འབེ་ན་ ཏེ་ ཞལ་ཟིག་པེ་ ཏོན་ཏག་རྒེ་ ཧོར་ལ་ ས་མེན་ ཡོད་ཟ་ནི་ ཀོར་ནེ་ལིའུ་ པི་ཏྲར་ ཁྱོང་ལ་ ལམ་ཅུག་ཀན་རྒུན་ ཤི་མོན་ནེ་ ཁང་པེ་ རྒོའེ་ཀ་ ལེཔ་། 18 ཏེ་ མི་རྒུ་ནི་ འབོའེ་རྡེ་ ཤི་མོན་པི་ཏྲར་ ཟེར་ཧན་འབོ་ ཏུ་རུ་ འདེད་ཏེ་ ཡོད་རྡེ་ ཟེར་རྡེ་ འདྲི་།

19 པི་ཏྲར་, ཁོ་ ཐོང་ཀ་ནེ་ ཞལ་ཟིག་པེ་ ཧོར་ལ་ སམ་བ་ ཏང་ངེན་ ཡོད་ཏུའི་ ཏམ་པེ་ ཐུག་ཡིད་རྡེ་ ཁོང་ལ་ མོལ་, “ཤི་མོན་ མི་ སུམ་མེ་ ཁྱེ་རང་ ཙལ་རྡུག་། 20 ཏ་ ལྃ་རྡེ་ ཡོག་ལ་ སོང་, ཡང་ ཁོང་རྒུན་ ཉམ་པོ་ ཆ་ཅེ་ལ་ ཐེ་ཚོམ་ མ་ཅོ་, ཅེ་ཟེར་ནི་ ཁོང་རྒུན་ ངེ་ ལམ་ཅུག་ཏེ་ འིན་།”

21 ཏེ་ནི་ པི་ཏྲར་ ཡོག་ལ་ པབ་ཏེ་ སོང་, ཡང་ ཁོང་རྒུན་ལ་, “ཁྱི་ཞི་ ཙལ་ཧན་ནེ་ མིའུ་ ང་ འིན་, ཁྱི་ཞ་ ཅི་ཕི་ ཡོང་རྦེན་?” ཟེར་རྡེ་ འདྲི་།

22 ཁོང་རྒུ་ནི་ ལེན་ཏྃ་, “ང་ཞ་རྒུན་ མག་མི་རྒྱེ་ སྤོན་འབོ་ ཀོར་ནེ་ལིའུ་ ཆོག་ནི་ ཡོྃ་རྡེ་ འིན་, ཁོང་ ཀྲང་པོ་ རྡང་ ཀོན་འཇོག་ལ་ སི་ཝ་ ཅོའེན་ ཁོང་ངེ་ འཇིའི་རྡེ་འདང་ མི་ཙེ་ པུད་ཀན་ཞིག་ འིན་, ཡང་ ཡ་ཧུ་འདཱ་པ་ ཚང་མེ་ ཁོང་ལ་ སི་ཝ་ ཅོ་ཡོད་། ཀོན་འཇོག་རྒེ་ ཏམ་པེ་ ཕོ་ཉེ་ ཁོང་ལ་ ཤི་མོན་ པི་ཏྲ་རེ་ མོལ་ཧན་རྒུན་ ཉེན་ཅེ་ལ་ ཉེ་རང་ ཁོང་ངེ་ ཁང་པ་ འབོའེ་ མོལ་ཏེ་ ཀཱ་ སལ་ཏོག་།” 23 ཏེ་ནི་ པི་ཏྲ་རེ་ ཁོང་རྒུན་ ནང་ལ་ འབོའེ་རྡེ་ ཏུ་རུ་ འདེད་ཅུག་རྒེ་ ཛེད་།

པི་ཏྲར་ ཀོར་ནེ་ལིའུ་ ཁང་པ་ རྐྱོད་།

ལྟིང་མེ་ཞག་པོ་ པི་ཏྲར་ ཏེ་ མི་རྒུན་ ཉམ་པོ་ རྐྱོད་, ཡང་ ཁོང་ ཉམ་པོ་ ཡོ་པ་ནི་ ཞེན་ ཏེཏ་པ་ཅན་རྒུན་ལ་ སོང་། 24 ལྟིང་མེ་ཞག་པོ་ ཁོང་རྒུན་ ཀཱེ་སར་རི་ཡ་ ལེཔ་། ཀོར་ནེ་ལིའུ་ ཁོང་ རྐྱོད་ཅེ་ལ་ སྲུྃ་རྡེ་ ཡོད་པེན་, ཡང་ ཁོའེ་ རང་ངེ་ ཉེན་འགྲུམ་རྒུན་ རྡང་ ཡ་ཏོ་ ཉེ་མོ་རྒུན་ འབོའེ་རྡེ་ ཡོད་པེན་། 25 པི་ཏྲར་ ཁང་པ་ ལེབ་ཏེ་ ཀོར་ནེ་ལིའུ་ ཐུག་རྒེ་རྡང་, ཁོའེ་ ཁོང་ངེ་ ཞབ་རྦེ་ཀ་ འགྱེལ་རྡེ་ ཆག་པུལ་། 26 འིན་ན་ པི་ཏྲ་རེ་ ཁོ་ “ལོང་” མོལ་རྡེ་ ལང་ངེ་ ཛེད་, “ང་ནི་ ཁྱེ་རང་ ཙོག་སེ་ མི་ཞིག་ འིན་ ང་ ཆག་ མ་པུལ་” མོལ་།

27 ཏེ་ནི་ པི་ཏྲར་ ཀོར་ནེ་ལིའུ་ ཉམ་པོ་ སྤེ་ར་ ས་ལེན་ ཁང་པེ་ན་ རྐྱོད་, ཡང་ མི་ མང་པོ་ཞིག་ ཛོམ་འདེ་ ཡོ་ཀན་འབོ་ ཟིའི་། 28 ཁོང་ངེ་ ཏོ་ མི་རྒུན་ལ་ མོལ་, “ཡ་ཧུ་འདཱ་པ་ཞིག་ལ་ ཡ་ཧུ་འདཱ་པ་ མན་ཀན་ཞིག་ ཉམ་པོ་ འབྲེལ་ པོར་ཤེའོ་ ཡ་ཧུ་འདཱ་པེ་ ཁྲིམ་ ནང་ཞིན་ འགལ་རྡེ་ འིན་ཀན་ ཁྱི་ཞ་རྒུན་ལ་ རྒྱུའི་ནོག་། འིན་ན་ ངེ་ སུ་ཞིག་ལ་ རིག་ངན་ ཡང་ ཀྲིཔ་ ཟེར་ མི་ཆོག་ཅེ་འབོ་, ཀོན་འཇོག་རྒེ་ ང་ ངོན་ཅུག་རྒེ་ ཛེད་། 29 ཏོ་རྦེ་ཕི་ལ་ ཁྱི་ཞ་རྒུ་ནི་ ང་ འི་རུ་ འབོ་ཟ་ནི་ ངེ་ ཅང་ རྒྱཔ་འགལ་ མ་ཅོ་ལ་ ཡོང་རྦེན་། ཏ་ ཁྱི་ཞི་ ང་ ཅི་ཕི་ འི་རུ་ འབོའེ་རྡེ་ འིན་?”

30 ཀོར་ནེ་ལིའུ་ ལེན་ཏྃ་, “ཏི་རིང་ངེ་སང་ ཞག་ ཞི་ ངུལ་ལ་ ཛ་རེ་ ལྟིང་ནི་ ཆུ་ཙོད་ སུམ་པ་, འེ་རྒ་ ཏུའི་ཚོད་ ཟམ་ཤིག་རྒེ་ཀ་, ངེ་ ང་རང་ངེ་ ཁང་པེ་ན་ མོ་ལམ་ ཞུ་ཡོད་པེན་, ཧུན་མེད་ལ་ ནམ་ཟ་ འདང་ཤེན་ ནམ་ཀ་ནི་ མི་ཞིག་ ངེ་ འདུན་ལ་ ཞྃ་ཏེ་ ཞུའུ་། 31 ཁོང་ངེ་ ང་ མོལ་ལེ་རག་, ‘ཀོར་ནེ་ལིའུ་ ཀོན་འཇོག་རྒེ་ ཁྱེ་རང་ངེ་ མོ་ལམ་རྒུན་ སན་ནེ་ ཛེད་, ཡང་ ཁྱེ་རང་ངེ་ ཞིན་པ་ ཏང་ཀན་རྒུ་ནི་ཀ་ ནྃ་ སལ་། 32 ཏ་ སུ་ཞིག་ ཡོ་པ་ ལམ་ཅུག་ཏེ་ ཤི་མོན་པི་ཏྲར་ ཟེར་ཧན་འབོ་ འི་རུ་ འབོའེ་རྡེ་ ཁྱོྃ་། ཁོང་ ཤི་མོན་ ཀོ་ཝ་ ཉེ་ཀ་ནེ་ ཁང་པ་ འདེད་ཏེ་ ཡོད་, ཁོའེ་ ཁང་པ་ རྒྱམ་ཚོའེ་ ཐ་མ་ ཡོད་།’ 33 ཏེ་རྒ་རྦེ་ཕི་ལ་ ཏེ་རྒ་མ་རྒ་ ངེ་ ཉེ་རང་ལ་ འབོ་ལ་ མི་ ཀལ་འབེན་ ཡང་ ཉེ་རང་ འེ་ཀ་ རྐྱོད་པེ་ ང་ཞ་ མ་ ཐེད་པོ་ སོང་། ཙོབོ་ ཀོན་འཇོག་རྒེ་ ཉེ་རང་ལ་ མོལ་ཧན་རྒུན་ ཉེན་ཅེ་ལ་ ཀོན་འཇོག་རྒེ་ ཧུ་འདུན་ལ་ ང་ཞ་ ཚང་མ་ འེ་ཀ་ ཛོམ་འདེ་ འིན་།”

ཡ་ཧུ་འདཱ་པ་ མན་ཀན་རྒུ་ནི་ ནེ་ཚུལ་ ཟང་པོ་ ཚོར་།

34 ཏེ་ནི་ པི་ཏྲ་རེ་ མོལ་ཅེ་ འགོ་ཟུག་, “ཀོན་འཇོག་རྒེ་ སུ་ལ་ ཡ་པེ་ མི་ཛེད་ཅེ་འབོ་ ང་ ནེན་ཏེན་ ཧ་ཀོ་། 35 འིན་ན་ ཀོན་འཇོག་རྒེ་ རྒྱལ་ཁབ་ ཚང་མེ་ ནང་ནི་ ཁོང་ངེ་ འཇིའི་ རྡང་ སི་ཝ་ན་ ལམ་ ཟང་པེ་ཀ་ འགྲུལ་ཧན་རྒུན་ལ་ ནེ་ཚུལ་ ཟང་པོ་ ཉེན་ཅེ་ལ་ རྒ་སུའི་ ཛེད་རྡེ་ནོག་། 36 ཨིས་ར་ཡེལ་པ་རྒུ་ནི་ཕི་ ནེ་ཚུལ་ ཟང་པོ་ནི་, ཡི་ཤུ་ མ་ཤི་ཀེ་ ཨ་ཧོ་ ཚང་མེ་ ཙོབོ་ ཡང་ ཁོང་ རྒྱུད་ཏེ་ ཀོན་འཇོག་ ཉམ་པོ་ ཞིའི་རྡེ་ ཡོད་ཅེའོ་ ནོག་། 37 ཡོ་ཧཱ་ནན་ནེ་ ཁྲུའི་ནེན་ཅེ་ ཧོར་ལ་ ཤེད་རྡེ་ ལྟིང་ནི་, འགཱ་ལིལ་ལེ་ ཡུལ་ནི་ འགོ་ཟུག་ཏེ་ ཡ་ཧུ་འདཱ་ སོན་ཏེ་ན་ སོང་ཀན་འབོ་ ཁྱི་ཞ་རྒུན་ལ་ རྒྱུའི་ནོག་: 38 ཀོན་འཇོག་རྒེ་ ན་ཙ་རེད་པ་ ཡི་ཤུ་ ཏམ་པེ་ ཐུག་ཡིད་ ཏང་ ཤུག་ ཉམ་པོ་ ཧོ་ ཛེད་, ཡང་ ཁོང་ ས་ཅ་ མང་པོ་ རྐྱོད་ཏེ་ ཆག་ལེ་ ཟང་པོ་ ཛེད་ཅེ་ རྡང་ རྡུད་རྦོ་ ཝང་ངེ་ ཡོག་ལ་ ཡོ་ཀན་རྒུན་ ཕན་ཅུག་རྒེ་ ཛེད་, ཅེ་ཞུ་ནི་ ཀོན་འཇོག་ ཁོང་ ཉམ་པོ་ ཞུ་རྡེ་ འིན་འབེན་།”

39 “ཡི་ཤུའི་ ཡ་ཧུ་འདཱ་པེ་ ཡུལ་ འདང་ ཡེ་རུ་ཤ་ལེམ་མེ་ན་ ཛེད་ཀན་རྒུ་ནི་ སྤང་པོ་ ང་ཞ་རྒུན་ འིན་། ཁོང་རྒུ་ནི་ ཁོང་ རྐྱང་ཤིང་ལ་ རྐྱང་འདེ་ སེད་། 40 འིན་ན་ ཀོན་འཇོག་རྒེ་ ཁོང་ ཞག་ སུམ་པེ་ ཞག་ལ་ སོན་པོ་ ལང་ངེ་ ཛེད་ཏེ་ ང་ཞ་རྒུན་ལ་ ངོན་ཅུག་རྒེ་ ཛེད་། 41 ཚང་མ་ལ་ ཁོང་ མ་འཇལ་, འིན་ན་ ཀོན་འཇོག་རྒེ་ སྤང་པོ་ ཏང་ངེ་ལ་ འདམ་མེ་ ཛེད་ཀན་ ང་ཞ་རྒུ་ནི་ ཁོང་ འཇལ་། ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་རྡེ་ ང་ཞ་རྒུ་ནི་ ཁོང་ ཉམ་པོ་ ཟོའེ་རྦེན་ ཡང་ ཐུྃ་རྦེན་། 42 ཀོན་འཇོག་རྒེ་ ང་ཞ་ མི་རྒུན་ལ་ ཡི་ཤུ་ནི་, ཤི་སོན་ ཉ་ཧེ་ཀ་ ཤའ་ ཛེད་ཅེ་ལ་ ཁོང་ངེ་ ཧོ་ ཛེད་ཀན་འབེ་ སྤང་པོ་ ཏང་ཅེ་ རྡང་ ཆོའེ་ཤེད་ཅེ་ལ་ ཀཱ་ སལ་། 43 ཡི་ཤུའི་ཀ་ ཏེཏ་པ་ ཅོ་ཀན་ ཚང་མ་ལ་ ཁོང་ངེ་ ཚན་ རྒྱུད་ཏེ་ རྡིག་པ་ ཅོ་ཀན་རྒུན་ལ་ ཤག་སྤ་ ཐོབ་རྦེན་ ཟེར་རྡེ་ ཁོང་ངེ་ ཧོར་ལ་ ལུང་རྟོན་པ་ ཚང་མེ་ སྤང་པོ་ སལ་རྡེ་ ནོག་།”

44 པི་ཏྲ་རེ་ འི་ སྤེ་ར་རྒུན་ ཤེད་རྡེན་ ཡོད་ཟ་ནི་, ཁོང་ངེ་ ཁྲིན་ ཉེན་ནེན་ ཡོ་ཀན་ ཚང་མེ་ཀ་ ཏམ་པེ་ ཐུག་ཡིད་ པབ་། 45 པི་ཏྲར་ ཉམ་པོ་ ཡོང་ཀ་ནེ་ ཡ་ཧུ་འདཱ་པ་ ཏེཏ་པ་ཅན་རྒུ་ནི་, ཡ་ཧུ་འདཱ་པ་ མན་ཀན་རྒུ་ནི་ཀ་ ཏམ་པེ་ ཐུག་ཡིད་ པབ་ཀན་འབོ་ ཐོང་འདེ་ ཧ་ལེ་། 46 ཅེ་ཟེར་ནི་ ཡ་ཧུ་འདཱ་པ་ མན་ཀན་རྒུ་ནི་ ཞེན་ ཧད་རྡེ་ན་ ཀོན་འཇོག་ལ་ རྟོད་པ་ པུ་ལེན་ ཁོང་རྒུ་ནི་ ཚོར་།

ཏེ་ནི་ པི་ཏྲ་རེ་ མོལ་, 47 “ཁོང་རྒུན་ལ་ ཆུའི་ཁྲུའི་ ནེན་ཅེ་ནེ་ རྒག་ཅེ་ ཧམ་བ་ སུའི་ ཅོའེན་ ཀའོ་རྒུན་ལ་ ང་ཞ་ ཐོབ་ཀ་ནེ་ ཏེ་རྒ་ ཏམ་པེ་ ཐུག་ཡིད་འབོ་ ཐོབ་ཏེ་ ནོག་།” 48 པི་ཏྲ་རེ་ ཁོང་རྒུན་ལ་ ཡི་ཤུ་ མ་ཤི་ཀེ་ ཚན་ནེ་ཀ་ ཁྲུའི་ ནེན་རྒོའེ་ ཟེར་རྡེ་ ཀཱ་ སལ་། ཏེ་ནི་ ཁོང་རྒུ་ནི་ པི་ཏྲར་ལ་ ཞག་ ཁ་ཅིག་ ཁོང་ ཉམ་པོ་ ཞུ་ཤེ་ལ་ ཞུ་ཝ་ པུལ་།