ཆག་ལེ་རྒུན་ 9

ས་འུལ་ལེ་ ཙོབོ་ ཡི་ཤུའི་ཀ་ ཏེཏ་པ་ ཅོའེ་།

འེ་རྒ་ ཏུའི་ལ་ ཙོབོ་ ཡི་ཤུའི་ ལོབ་ཀྲུག་ ཚང་མ་ སེད་རྡེན་ ཟེར་ཧ་ནེ་ ས་འུལ་ ལ་མ་ ཆོན་མེ་ཀ་ སོང་འདེ་, 2 མ་ཤི་ཀེ་ ལམ་མེ་ཀ་ འགྲུལ་ཧན་ནེ་ པུ་ཙ་ རྡང་ པོ་མོ་ ཚང་མ་ ཟུམ་འདེ་, ཙོན་པ་ ཅོའེ་རྡེ་ ཡེ་རུ་ཤ་ལེམ་ལ་ ཁྱོང་ཉེན་ཅེ་ལ་ ཁོ་ ཆོག་རྐྱོར་ ཅོའེ་ ཟེར་རྡེ་ འདཱ་མེ་ཁེ་ ཡ་ཧུ་འདཱ་པེ་ འདུ་ཀང་རྒུ་ནི་ན་ ལྟན་ཅེ་ལ་ ཡི་རྒེ་ཞིག་ འབྲི་རྡེ་ ཏོང་ ཞུའི་། 3 ས་འུལ་ འདཱ་མེ་ཁེ་ ཚམ་ལ་ ལེ་རྦེ་རྡང་, ཧུན་མེད་ལ་ ནམ་ཀ་ནི་ པབ་ཀ་ནེ་ འོད་ འདང་ཤེན་ཞིག་རྒེ་ ཁོ་ ཧོར་། 4 ཁོ་ ཐང་ཀེ་ཀ་ འགྱེལ་, ཡང་ ཁོ་ སུང་ཧད་ཅིག་ ཚོར་, “ས་འུལ་ ས་འུལ་ ཁྱེ་རང་ངེ་ ང་ ཅེ་ ནག་པར་རྡོ་ ལྟན་ནེ་ཡོད་?”

5 ས་འུལ་ལེ་ ཟེར་, “ཙོབོ་ ཉེ་རང་ སུ་ འིན་?”

ཁོང་ངེ་ ལེན་སལ་, “ང་ནི་ ཡི་ཤུ་, ཁྱེ་རང་ངེ་ ནག་པར་རྡོ་ ལྟན་ཀན་འབོ་ འིན་། 6 ཏ་ ཁྱེ་རང་ རྒྱལ་ས་ སོང་, ཡང་ ཏུ་རུ་ ཁྱེ་རང་ལ་ ཅོ་རྒོ་ཤེའོ་ ཤེད་རྡེན་།”

7 ས་འུལ་ ཉམ་པོ་ ཆ་ཀ་ནེ་ མི་རྒུན་ ཧ་ལེ་རྡེ་ ཧ་ན་ཆོ་ནེ་ སོང་ ཅེ་ཟེར་ནི་ ཁོང་རྒུན་ལ་ ཧད་ ཚོར་ འིན་ན་ སུ་ལ་ མ་ཐོང་། 8 ས་འུལ་ལེ་ ཐང་ཀ་ནི་ ལྃ་རྡེ་ མིག་ པེ་རྦེ་ ཁོ་ ཅང་ མ་ཐོང་། ཁོའེ་ ཁྲོ་པ་རྒུ་ནི་ ཁོ་ ལག་པ་ ཐམ་འདེ་ འདཱ་མེ་ཁེ་ལ་ ཁྲིད་ཏེ་ ཁྱེར་། 9 ཞག་ སུམ་ཚུག་པ་, ཁོ་ མིག་ནེ་ མ་ཐོང་ ཡང་ ཏེ་རྒ་ ཏུའི་རྦོ་ ཁོའེ་ ཅང་ ཟ་ལ་ མ་ཟོའེ་, ཅང་ ཐུང་ངེ་ མ་ཐུང་།

10 འདཱ་མེ་ཁེ་ན་ ཡི་ཤུའི་ཀ་ ཏེཏ་པ་ ཅོ་ཀན་ ཨ་ན་ནི་ཡཱ་ ཟེར་ཧན་འབོ་ འདེད་རྡེ་ཡོད་པེན་, ཙོབོ་རྡེ་ ཞལ་ཟིག་ཤིག་རྒེ་ན་ ཁོ་ མོལ་, “ཨ་ན་ནི་ཡཱེ་།”

ཁོའེ་ ལེན་ཏྃ་, “ཙོབོ་ལེ་།”

11 ཙོབོ་རྡེ་ ཁོ་ མོལ་, “ཁ་ཀྲང་ ཟེར་ཧ་ནེ་ སྲང་ངེ་ན་ ཡོ་ཀན་ནེ་ ཡུ་འདཱེ་ ཁང་པ་ སོང་འདེ་, ཏར་སུའི་པ་ ས་འུལ་ ཟེར་ཧ་ནེ་ མི་རྦེ་ ཧོར་ལ་ འདྲི་, ཏག་ས་ ཁོའེ་ མོ་ལམ་ ཞུ་རུག་། 12 ས་འུལ་ལ་ ཞལ་ཟིག་ཤིག་རྒེ་ན་ ཨ་ན་ནི་ཡཱ་ ཡོྃ་རྡེ་ ཡང་ ཐོང་ཉེན་ཅེ་ལ་ ཁོའེ་ཀ་ ལག་པ་ པོ་རེ་ ཐོང་།”

13 ཨ་ན་ནི་ཡཱེ་ ཞུའི་, “ཀྱེ་ ཙོབོ་, འི་ མི་རྦེ་ ཉེ་རང་ངེ་ ཏམ་པ་ མི་རྒུན་ ཉམ་པོ་ ཡེ་རུ་ཤ་ལེམ་མེ་ན་ ཙམ་ཤིག་ ནོད་པ་ རྐྱལ་ཧན་འབེ་ ཧོར་ལ་ ང་ ཞེན་མི་ མང་པོ་ནི་ ཚོར་། 14 ཁོ་ འི་རུ་ལ་ ལ་མ་ འུ་རྐྱོང་རྒུ་ནི་ ཆོག་ནི་ ཝང་ཆ་ ཐོབ་ཏེ་ ཉེ་རང་ངེ་ ཚན་ ཁུར་ཧན་ ཚང་མ་ ཟུམ་འདེ་ ཁྱེར་ཤེ་ཕི་ ཡོྃ་རྡེ་ ནོག་།”

15 འིན་ན་ ཙོབོ་ ཡི་ཤུའི་ ཨ་ན་ནི་ཡཱ་ལ་ མོལ་, “ཏ་ ཁྱེ་རང་ སོང་ ཅེ་ཟེར་ནི་ ཁོ་ ངེ་ འདམ་ཀ་ནེ་ ཞབ་རྟོག་པ་ ཡ་ཧུ་འདཱ་པ་ མན་ཀན་རྒུན་, རྒྱ་སྤོ་རྒུན་ འདང་ ཨིས་ར་ཡེལ་པ་རྒུན་ལ་ ངེ་ ཧོར་ལ་ ཤེད་ཀན་འབོ་ འིན་། 16 ངེ་ ཚན་ ཁུར་ཤེ་ལ་ ཁོ་ ཙམ་ཤིག་རྒེ་ ནག་ ནེན་རྒོ་ཤེ་རྦོ་ ངེ་ ཁོ་ ལྟན་ནེན་།”

17 ཏེ་ནི་ ཨ་ན་ནི་ཡཱ་ ས་འུལ་ འདེད་ཏེ་ ཡོད་སེ་ ཁང་པ་ ལེཔ་ ཡང་ ནང་ཀུ་ལ་ སོང་འདེ་ ཁོའེ་ ལག་པ་ ས་འུལ་ལེ་ཀ་ པོར་རྡེ་ མོལ་, “སྤུན་ ས་འུལ་, ཁྱེ་རང་ འི་རུ་ ཡོང་ཟ་ནི་ ལམ་ལ་ ཙོབོ་ ཡི་ཤུ་ འཇལ་རྡེ་ འིན་འབེན་། ཁོང་ངེ་ ཁྱེ་རང་ལ་ ཡང་ ཐོང་ཅེ་ རྡང་ ཏམ་པེ་ ཐུག་ཡིད་རྡེ་ ཀང་ཅེ་ཕི་ ང་ འེ་ཀ་ ཀ་ལེ་ ཛེད་།” 18 ཏེ་རྒ་མ་རྒ་ ས་འུལ་ལེ་ མིག་རྒེ་ཀ་ནི་ པག་སྤ་ ཙོག་སེ་ འདྲུལ་རྡེ་ ཁོ་ ཡང་ ཐོང་ཉེན་། ཏེ་ནི་ ལྃ་རྡེ་ ཁོའེ་ ཁྲུའི་ནེན་, 19 ཁར་ཞི་ ཟོའེ་རྡེ་ ལྟིང་ནི་ ཁོའེ་ ཟུྃ་སྤེ་ན་ ཤུག་ རྐྱེ་།

ས་འུལ་ལེ་ འདཱ་མེ་ཁེ་ ཏང་ ཡེ་རུ་ཤ་ལེམ་མེ་ན་ སྤང་པོ་ སལ་།

ཏེ་ནི་ ས་འུལ་ ཞག་ ཁ་ཅིག་ ལོབ་ཀྲུག་རྒུན་ ཉམ་པོ་ འདཱ་མེ་ཁེ་ལ་ འདེད་ 20 ཡང་ ཡ་ཧུ་འདཱ་པེ་ འདུ་ཀང་རྒུ་ནི་ན་ ཡི་ཤུའི་ ཧོར་ལ་ ཤེད་ཅེ་ འགོ་ཟུག་ཏེ་ མོལ་, “ཁོང་ནི་ ཀོན་འཇོག་རྒེ་ སྲེ་ ནེན་ཏེན་ ནོག་” 21 ཏུ་རུ་ ཡོ་ཀན་རྒུ་ནི་ ཁོང་ངེ་ ལབ་ཞ་ ཚོར་རེ་རྡང་ ཧ་ལེ་རྡེ་ ཅིག་ ཏང་ ཅིག་ལ་ འདྲི་, “འི་ མིའུ་ ཡེ་རུ་ཤ་ལེམ་མེ་ན་ ཙོབོ་ ཡི་ཤུའི་ ཚན་ ཁུར་ཧན་རྒུན་ ཞིག་ཅུག་ཅེ་ལ་ ཙོན་འགྲུའི་ སྲན་ཀྲེ་ ཅོ་ཀན་ ཡང་ འི་རུ་ལ་ ཁོང་རྒུན་ ཟུམ་འདེ་ ཙོན་པ་ ཅོའེ་རྡེ་ ལ་མ་ འུ་རྐྱོང་རྒུ་ནི་ འདུན་ལ་ ཁྱེར་རེ་ལ་ ཡོྃ་རྡེ་ མ་ནོག་རྒེ་?” 22 ས་འུལ་ ཆོའེ་ཤེད་ཅེ་ན་ མང་ངེ་ ཤུག་ཤེན་ འགྱུ་རེན་ སོང་, ཡང་ འདཱ་མེ་ཁེ་ན་ ཡོ་ཀ་ནེ་ ཡ་ཧུ་འདཱ་པ་རྒུ་ནི་, ས་འུལ་ལེ་, ཡི་ཤུ་རྦོ་ ནེན་ཏེན་ལ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ འིན་ཀན་ ལྟན་ཀན་འབེ་ རྒྱཔ་འགལ་ལ་ ཅང་ ཟེར་ མ་ཉེན་།

23 ཞག་ ཁ་ཅིག་ ལྟིང་ནི་ ཡ་ཧུ་འདཱ་པ་རྒུ་ནི་ ཁོང་ སེད་ཅེ་ ཀྲཔ་ ཅོའེ་, 24 འིན་ན་ ས་འུལ་ལ་ ཁོང་རྒུ་ནི་ ཅུའི་ངན་རྒུན་ རྒྱུའི་སོང་། ཏོ་རྒུན་ ཚེན་ཉིན་ མེད་པེ་ རྒྱལ་སེ་ རྒོ་རྒུ་ནི་ཀ་ ཁོང་ སེད་ཅེ་ལ་ སྲུྃ་རྡེ་ འདེད་རྡེ་ཡོད་པེན་། 25 འིན་ན་ ས་འུལ་ལེ་ ལོབ་ཀྲུག་རྒུ་ནི་ ཁོང་ ཚན་ལ་ ཙེ་སྤོ་ཞིག་རྒེ་ན་ རྒྱང་རྡེ་ རྒྱལ་སེ་ སིག་པེ་ན་ ཡོ་ཀ་ནེ་ ཀར་ཧུང་ཞིག་ནི་ ཡོག་ལ་ སྤབ་།

26 ཁོང་ ཡེ་རུ་ཤ་ལེམ་ལ་ ལེབ་རྦེ་རྡང་, ལོབ་ཀྲུག་རྒུན་ ཉམ་པོ་ འདེད་ཅེ་ ཙོན་འགྲུའི་ ཅོའེ་, འིན་ན་ ཁོང་ ཚང་མ་ འཇིའི་ ཅེ་ཟེར་ནི་, ས་འུལ་ རྡེན་འབའ་ མ་ཤི་ཀེ་ ལོབ་ཀྲུག་ འགྱུར་རྡེ་ འིན་ཀན་འབེ་ཀ་ ཁོང་རྒུན་ རྡེན་ མ་ཆེ་། 27 འིན་ན་ འབཱར་ན་འབཱ་ ཟེར་ཧན་འབེ་, ས་འུལ་ ཁོ་རང་ ཉམ་པོ་ ཧུ་ཚབ་རྒུ་ནི་ ཕྲོ་ ཁྲིད་ཏེ་ ཁྱོྃ་། འབཱར་ན་འབེ་ ཁོང་རྒུན་ལ་ ཟེར་, ས་འུལ་ ལམ་ནི་ ཆེན་ ཡོད་ཟ་ནི་ ཙོབོ་ ཡི་ཤུ་ འཇལ་རྡེ་ ཁོ་ ཉམ་པོ་ ཞལ་ཏ་ ཛེད་ཀན་ ཡང་ ཀ་ཟུག་ ཧམ་བ་ ཉམ་པོ་ འདཱ་མེ་ཁེ་ན་ ཁོང་ངེ་ ཡི་ཤུའི་ སྤང་པོ་ ཏང་ཀན་རྒུ་ནི་ ཧོར་ལ་ ཤེད་། 28 ས་འུལ་ ཧུ་ཚབ་རྒུན་ ཉམ་པོ་ འདེད་, ཡང་ ཡེ་རུ་ཤ་ལེམ་ སོན་ཏེ་ན་ ཧམ་བ་ ཉམ་པོ་ ཙོབོ་ ཡི་ཤུའི་ ཧོར་ལ་ ཤེད་རྡེན་ འགྲུལ་། 29 ཁོང་ངེ་ འགི་རིག་རྒེ་ ཧད་ ཏང་ཀ་ནེ་ ཡ་ཧུ་འདཱ་པ་རྒུན་ ཉམ་པོ་ལ་ ཀྲོའེ་རྡུར་ ཅོ་ཡོད་པེན་, འིན་ན་ ཏོ་རྒུ་ནི་ ཁོང་ སེད་ཅེ་ ཙོན་འགྲུའི་ ཅོའེ་། 30 ཏེཏ་པ་ཅན་རྒུན་ལ་ ཏོ་ རྒྱུའི་ཆ་རྡང་, ཁོང་རྒུན་ ཡོྃ་རྡེ་ ས་འུལ་ ཀཱེ་སར་རི་ཡ་ རྒྱལ་ས་ ཁྱེར་རྡེ་ ཏར་སུའི་ ཀྲོང་ཁྱེར་ལ་ ལམ་ཅུག་།

31 ཏེ་ནི་ ཡ་ཧུ་འདཱ་, འགཱ་ལིལ་ རྡང་ ས་མ་རི་ཡཱ་ ཡུལ་ སོན་ཏེ་ན་ ཡོ་ཀ་ནེ་ ཆོའེ་ཚོག་རྒུན་ལ་ རྡུ་ངལ་ མ་ཐོང་ལ་ ཞིའི་རྡེ་ ཡོད་པེན་། ཏམ་པེ་ ཐུག་ཡིད་ རྒྱུད་ཏེ་ ཁོང་རྒུན་ལ་ ཤེད་རྡེ་ རྡང་ སེམ་རུའི་ ཐོབ་, ཡང་ ཙོབོ་རྦེ་ འཇིའི་ཤེ་ རྡང་ སི་ཝེ་ན་ མི་ཙེ་ པུད་ཅེ་རྦེ་ ཁོང་རྒུ་ནི་ ཀྲང་ཧ་ རྒྱེ་རྡེན་ སོང་།

ཨེ་ནི་ཡཱ་ རྡང་ ཏ་འབི་ཏ་།

32 པི་ཏྲར་ ས་ཅ་ ཅིག་ནི་ ཅིག་ལ་ ཆ་ཟ་ནི་, ཁོ་ ལིད་འདཱ་ ཀྲོང་ཁྱེར་རེ་ན་ འདེད་ཀ་ནེ་ ཏེཏ་པ་ཅན་རྒུ་ནི་ ཕྲོ་ ལེཔ་། 33 ཏུ་རུ་ ཁོང་ལ་ ཨེ་ནི་ཡཱ་ ཟེར་ཧ་ནེ་ མི་ཞིག་ ཐུག་ ཀ་འབོ་ལ་ ཟ་ཕོག་ཏེ་ འགྲུལ་ མ་ཉེན་ལ་ མལ་སེ་ཀ་ འདེད་ཏེ་ ལོ་ རྒྱེད་ ཆ་ཡོད་པེན་། 34 ཏེ་ནི་ པི་ཏྲ་རེ་ ཁོའོ་, “ཨེ་ནི་ཡཱ་ ཡི་ཤུ་ མ་ཤི་ཀེ་ ཁྱེ་རང་ ཕན་ཅུག་རྒེ་ ཛེད་ཏེ་ འིན་; ཏ་ ལོང་, རང་ངེ་ མལ་ས་ སྲིལ་” མོལ་རྦེ་ ཁོ་ ཏེ་རྒ་མ་རྒ་ལ་ ཀོའག་ ལང་། 35 ཏེ་ མི་ ཐོང་ཀན་ ལིད་འདཱ་པ་ རྡང་ ཤ་རོན་པ་ ཚང་མེ་ ཙོབོ་ ཡི་ཤུའི་ཀ་ ཏེཏ་པ་ ཅོའེ་།

36 ཡོ་པ་ ཀྲོང་ཁྱེར་རེ་ན་ ཏ་འབི་ཏ་ འགི་རིག་རྒེ་ ཧད་རྡེ་ན་ འདོར་ཀ་ ཟེར་ཧ་ནེ་ ཏེཏ་པ་ཅེན་ནེ་ པོ་མོ་ཞིག་ ཡོད་པེན་། ཁོའེ་ ཏུའི་རྒྱུན་ ལེ་ཧ་ ཟང་པོ་ རྡང་ ཉལ་རྦ་ཅེན་རྒུན་ལ་ ཡ་ཏོ་ ཅོ་ཡོད་པེན་། 37 པི་ཏྲར་ ལིད་འདཱེ་ན་ ཡོད་ཏུའི་, ཏེ་ པོ་མོ་ལ་ ཟུར་མོ་ ཧོཔ་ ཡོྃ་རྡེ་ ཤི་, ཡང་ ཁོའེ་ ཟུྃ་སྤོ་ ཁྲུའི་རྡེ་ ལྟང་ཏོག་རྒེ་ ནང་ཞིག་རྒེ་ན་ པོར་། 38 ལིད་འདཱ་ ཀྲོང་ཁྱེར་རྦོ་ ཡོ་པ་ནི་ ཉེ་མོ་ ཡོད་པེ་, ལོབ་ཀྲུག་རྒུན་ལ་ པི་ཏྲར་ ལིད་འདཱ་ ཡོ་ཀན་འབོ་ ཚོར་རྡེ་, ཁོང་རྒུ་ནི་ པི་ཏྲ་རེ་ཀ་ མི་ ཉི་, “ཐུག་ཞེ་ ཛེད་ཏེ་ འི་རུ་ འགྱོ་སྤ་ རྐྱོད་རྡེ་ ཛེད་” ཞུ་ལ་ ལམ་ཅུག་།

39 པི་ཏྲར་ ཏེ་ མི་ ཉ་ཧ་ ཉམ་པོ་ རྐྱོད་ ཡང་ ཁོང་ ཏུ་རུ་ ལེབ་རྦེ་རྡང་, མི་རྒུ་ནི་ ཁོང་ ལྟང་ཏོག་རྒེ་ ནང་འབེ་ན་ ཁྱེར་། ཏུ་རུ་ འ་ནེ་ མ་རང་མོ་ ཚང་མ་ ངུའིན་, འདོར་ཀེ་ ཁོང་རྒུན་ ཉམ་པོ་ ཡོད་ཟ་ནི་ ཁོའེ་ ཙེམ་ཀ་ནེ་ ཀོའེ་ལག་རྒུན་ པི་ཏྲར་ལ་ ལྟན་།

40 པི་ཏྲ་རེ་ ཏེ་ ནང་ངེ་ན་ ཡོ་ཀན་ ཚང་མ་ ཕི་ལོག་ལ་ ཕིང་, ཡང་ པིག་ཛུམ་ རྒྱབ་ཏེ་ མོ་ལམ་ ཞུ་ ཛེད་། ཏེ་ནི་ ཤི་ཀ་ནེ་ ཟུྃ་སྤེ་ ཆོག་ལ་ ལྟོའེ་རྡེ་, “ཏ་འབི་ཏ་ ལོང་” མོལ་། ཏ་འབི་ཏེ་ རང་ངེ་ མིག་ པེ་ ཡང་ པི་ཏྲར་ ཐོང་འདེ་ ལང་། 41 པི་ཏྲ་རེ་ ལག་པ་ ཐམ་འདེ་ ཁོ་ ཧང་པེ་ཀ་ ལང་ཅུག་རྒེ་ ཛེད་། ཏེ་ནི་ ཏེཏ་པ་ཅེན་ འདང་ འ་ནེ་ མ་རང་མོ་རྒུན་ འབོའེ་རྡེ་ ཏ་འབི་ཏ་ སོན་པོ་ འིན་ཀན་འབོ་ ལྟན་ནེ་ ཛེད་། 42 འི་ ཧོར་རེ་ ནེ་ཚུལ་རྒུན་ ཡོ་པ་ ཀྲོང་ཁྱེར་ སོན་ཏེ་ན་ ཕེལ་, ཡང་ མི་ མང་པེ་ ཙོབོ་རྡེ་ཀ་ ཏེཏ་པ་ ཅོའེ་། 43 པི་ཏྲར་ ཞག་ མང་པོ་ཞིག་ ཡོ་པེ་ན་ ཤི་མོན་ ཀོ་ཝ་ ཉེ་ཀ་ནེ་ ཁང་པ་ འདེད་།