ཆག་ལེ་རྒུན་ 8

ཡང་ རྟེ་ཕན་ སེད་ཅེ་ན་ ས་འུལ་ལེ་ ཆོག་རྐྱོར་ ཅོའེ་རྡེ་ ནོག་།

ཡེ་རུ་ཤ་ལེམ་མེ་ ཆོའེ་ཚོག་ལ་ ནག་ ལྟན་།

ཏེ་རྒ་ ཞག་ནི་ཕ་ལ་ ཡེ་རུ་ཤ་ལེམ་མེ་ན་ ཡོ་ཀ་ནེ་ ཆོའེ་ཚོག་ལ་ ཧོཔ་ ནག་ ལྟན་ཅེ་ འགོ་ཟུག་, ཏོ་རྦེ་ ཅོའེ་རྡེ་ ཧུ་ཚབ་རྒུན་ མ་ཐེ་ལ་ ཞེན་ ཏེཏ་པ་ཅེན་ ཚང་མ་ ཡ་ཧུ་འདཱ་ རྡང་ ས་མ་རི་ཡཱ་ ཡུལ་ཞོང་ སོན་ཏེ་ན་ པེ་རྡེ་ ཤོར་རྒོའེ་། 2 ཀོན་འཇོག་རྒེ་ ཤོད་ལམ་མེ་ཀ་ འགྲུལ་ཧན་ ཁ་ཅིག་རྒེ་ རྟེ་ཕན་ནེ་ སྤུར་རྦོ་ ཁྱེར་རྡེ་ སྤུར་ཧང་ངེ་ན་ པོར་, ཡང་ ཁོང་ངེ་ཕི་ རྡུག་པོ་ ཧོཔ་ ཅོའེ་། 3 འིན་ན་ ས་འུལ་ལེ་, ཆོའེ་ཚོག་ ཞིག་ཅུག་ཅེ་ འགོ་ཟུག་, ཁང་པ་ རེ་རེ་ན་ སོང་འདེ་ ཁོའེ་ ཏེཏ་པ་ཅེན་ནེ་ པུ་ཙ་ རྡང་ པོ་མོ་ ཚང་མ་ ཀྲུད་ཏེ་ ཁྱེར་རྡེ་ ཙོན་ལ་ ཧར་རེ་ཡོད་པེན་།

ཕི་ལིབ་རྦེ་ ས་མ་རི་ཡཱ་ན་ ནེ་ཚུལ་ ཟང་པོ་ ཤེད་།

4 ཏེཏ་པ་ཅེན་ ཤོར་ཧན་ནེ་ མི་རྒུན་ ཀ་རུ་ ལེབ་ནང་ ནེ་ཚུལ་ ཟང་པོ་ ཤེད་རྡེན་ སོང་། 5 ཕི་ལིབ་ ས་མར་རི་ཡཱེ་ རྒྱལ་ས་ ལེབ་རྦེ་རྡང་, ཁོའེ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀེ་ ཧོར་ལ་ ཤེད་། 6 ཕི་ལིབ་རྦེ་ སྤེ་ར་རྒུན་ ཚོར་རྡེ་ ཡང་ ཁོའེ་ ཧ་ལེ་ཤེ་ ཛེད་པ་རྒུན་ ཐོང་འབེ་, མི་རྒུ་ནི་ ཁོའེ་ སྤེ་ར་རྒུན་ མ་ ནྃ་རྟག་ ཏྃ་རྡེ་ ཉེན་ནེ་ཡོད་པེན་། 7 སྤེར་ན་ མི་ མང་པོ་ཞིག་རྒེ་ ནང་ནི་ འགོང་འབོ་རྒུན་ ཕིང་འབེ་ ཏོ་རྒུན་ ཀུ་ཅུ་ ཏང་ངེན་ འབིང་འདེ་ སོང་, ཡང་ ཁོང་ཧན་ རྡང་ ཞ་འོ་ མང་པོ་ རྒྱལ་། 8 ཏོ་རྦེ་ ཅོའེ་རྡེ་ ཏེ་ རྒྱལ་སེ་ མི་རྒུན་ མང་པོ་ ཐེད་།

ཤི་མོན་ ངན་ཆོའེ་ ཅོ་ཀེན་།

9 ཞག་ ཁ་ཅིག་ ངུལ་ལ་ ཤི་མོན་ ཟེར་ཧ་ནེ་ མི་ཞིག་རྒེ་ ཁོ་རང་ངེ་ ངན་ཆོའེ་ ཅོ་ཅེ་ ཁྱུད་ རྒྱུད་ཏེ་ ས་མ་རི་ཡཱ་ རྒྱལ་སེ་ མི་ཚང་མ་ ཧ་ལེ་ ཤུག་ཏེ་ ཁོའེ་ ཁོ་རང་ མ་ མི་ཀྲག་པོ་ཞིག་ འིན་ ཟེ་རེ་ཡོད་པེན་། 10 ཏེ་ ཡུལ་མི་ ཆོན་མོ་ འདང་ ཅུང་ཙེ་ ཚང་མེ་, ཁོའེ་ ཟེར་ཧན་རྒུན་ལ་ ནྃ་ མ་སྲན་ཀྲེ་ ཏྃ་རྡེ་ ཁོང་རྒུ་ནི་ ཟེར་རེ་ཡོད་པེན་, “འི་ མི་རྦེ་ན་ ཀོན་འཇོག་རྒེ་ ཤེད་ ཆོན་མོ་ འདུག་།” 11 ཞག་ མང་པོ་ནི་ཕ་ལ་ ཁོའེ་ ངན་ཆོའེ་ ཅོ་ཅེ་ རྒྱུད་ཏེ་ མི་ཚང་མ་ ཧ་ལེ་ ཤུག་པེ་ མི་རྒུ་ནི་ ཁོའེ་ སྤེ་ར་རྒུན་ལ་ རྡེ་མོ་ ཅོའེ་ཏེ་ ཉེན་ནེ་ཡོད་པེན་།

12 འིན་ན་ ཕི་ལིབ་རྦེ་ ཀོན་འཇོག་རྒེ་ རྒྱལ་སྲིད་ ཏང་ ཡི་ཤུ་ མ་ཤི་ཀེ་ ཧོར་ལ་ ཆོའེ་ཤེད་ཅེ་རྦེ་, མི་རྒུ་ནི་ ཏེཏ་པ་ ཅོའེ་རྡེ་ ཁྲུའི་ནེན་, པུ་ཙ་ རྡང་ པོ་མོ་ ཉ་ཧེ་། 13 ངན་ཆོའེ་ ཅོ་ཀན་ ཤི་མོན་ནེ་ལ་ ཏེཏ་པ་ ཅོའེ་རྡེ་ ཁྲུའི་ནེན་། ཕི་ལིབ་ ཀ་རུ་ ཆ་ན་ ཁོ་ ལྟིང་འགྲྃ་ནི་ སོང་ ཡང་ ཧ་ལེ་ཤེ་ ཛེད་པ་ རྡང་ ལྟའ་རྒུན་ ཐོང་འདེ་ ཁོ་ ཧ་ན་ཆོ་ནེ་ སོང་།

14 ཏེ་ནི་ ཡེ་རུ་ཤ་ལེམ་མེ་ན་ ཧུ་ཚབ་རྒུན་ལ་ ས་མ་རི་ཡཱ་པ་རྒུ་ནི་ ཀོན་འཇོག་རྒེ་ ཀེའེ་ཀ་ ཏེཏ་པ་ ཅོའེ་རྡེ་ ཟེར་རྡེ་ ཚོར་རྦེ་, ཁོང་རྒུ་ནི་ པི་ཏྲར་ རྡང་ ཡོ་ཧཱ་ནན་ ཉ་ཧ་ ཏེ་ ཡུལ་ལ་ ཀལ་། 15 པི་ཏྲར་ རྡང་ ཡོ་ཧཱ་ནན་ ཏུ་རུ་ ལེབ་རྦེ་རྡང་ ས་མ་རི་ཡཱ་པ་ ཏེཏ་པ་ཅན་རྒུན་ལ་ ཐུག་ཡིད་ པབ་ཅེ་ཕི་ མོ་ལམ་ ཞུ་ ཛེད་, 16 ཅེ་ཟེར་ནི་ ཁོང་རྒུན་ལ་ ཙོབོ་ ཡི་ཤུའི་ ཚན་ནེ་ཀ་ ཁྲུའི་ ཐོབ་ནི་ ཏ་རུང་ཚུག་པ་ སུ་ཞིག་རྒེ་ཀ་ ཏམ་པེ་ ཐུག་ཡིད་ མ་པབ་རྦེ་ འིན་འབེན་། 17 ཏེ་ནི་ ཁོང་ ཉ་ཧེ་ ཁོང་རྒུ་ནི་ཀ་ ལག་པ་ པོ་རེ་ ཛེ་རྡེ་རྡང་, ཁོང་ ཚང་མེ་ཀ་ ཏམ་པེ་ ཐུག་ཡིད་ པབ་།

18 ཧུ་ཚབ་རྒུ་ནི་ ཆག་ པོར་ཤེ་རྦེ་ ཏམ་པེ་ ཐུག་ཡིད་ ཐོབ་རྦེ་ ཐོང་ངེ་རྡང་, ཤི་མོན་ནེ་ ཁོང་ ཉ་ཧེ་ འདུན་ལ་ མུལ་ པུལ་རྡེ་ ཟེར་ 19 “ངེ་ ལག་པ་ པོར་ཧན་རྒུན་ལ་ ཏམ་པེ་ ཐུག་ཡིད་ ཐོབ་ཅེ་ ཁྱུད་པོ་ ང་ སལ་ལེ་ ཛེད་།”

20 འིན་ན་ པི་ཏྲ་རེ་ ཁོ་ མོལ་, “ཁྱེ་རང་ངེ་ མུལ་ ཏྃ་རྡེ་ ཀོན་འཇོག་རྒེ་ ཁྱུད་འབོ་ ཉོ་ཉེ་ནེ་ནོག་ སམ་འབེ་ ཁྱེ་རང་ འདང་ ཁྱེ་རང་ངེ་ མུལ་ ཉ་ཧ་ མེ་ཀན་ ཆ་ཤིག་། 21 ཁྱེ་རང་ངེ་ ཉིང་ ཀོན་འཇོག་རྒེ་ ཧུ་འདུན་ལ་ ཀྲང་པོ་ མེད་ཅེ་རྦེ་ ཁྱེ་རང་ལ་ ང་ཞ་ ཉམ་པོ་ འི་ ལེ་ཧ་ ཅོ་ཅེ་ན་ ཅང་ ཁག་ མེད་ཏེ་ ནོག་། 22 ཁྱེ་རང་ངེ་ན་ ངན་སེམ་ རྐྱེ་ཀན་འབེ་ཕི་ སེམ་འགྱུར་རྡེ་ ཙོབོ་ ཀོན་འཇོག་ལ་ མོ་ལམ་ ཞུའི་། ཅི་ རྒྱུའི་ ཁོང་ངེ་ ཁྱེ་རང་ངེ་ ཏེ་ སེམ་ངན་ སམ་ཀན་འབོ་ལ་ ཤག་སྤ་ སལ་སྲིད་རྡེན་། 23 ངེ་ ཐོང་ཅེ་ལ་ ཁྱེ་རང་ངེ་ ཉིང་འབོ་ ཕྲ་རྡོག་རྒེ་ ཀང་འདེ་ ཁྱེ་རང་ རྡིག་པེ་ ཟུམ་འདེ་ པོར་རྡེ་ འདུག་།”

24 ཏེ་ནི་ ཤི་མོན་ནེ་ ཟེར་, “ཉེ་རང་ངེ་ མོལ་ཧན་རྒུན་ ངེ་ཀ་ མི་པབ་ཅེ་ཕི་ འཇུ་འཇུ་ ཙོབོ་ ཀོན་འཇོག་ལ་ མོ་ལམ་ ཞུ་ ཛེད་།”

25 པི་ཏྲར་ རྡང་ ཡོ་ཧཱ་ནན་ནེ་ ཙོབོ་ ཡི་ཤུའི་ ཀའ་ ཤེད་རྡེ་ ཛེད་ཅེ་ རྡང་ སྤང་པོ་ སལ་རྡེ་ ལྟིང་ནི་ ཡེ་རུ་ཤ་ལེམ་ལ་ ལོག་ཏེ་ རྐྱོད་ཟ་ནི་ ས་མར་རི་ཡཱེ་ འགམ་ཡུལ་ མང་པོ་ཞིག་རྒེ་ ནང་ལ་ ནེ་ཚུལ་ ཟང་པོ་ ཤེད་རྡེ་ ཛེད་།

ཕི་ལིབ་ ཏང་ ཨེ་ཐི་ཡོ་པི་པ་ ཐུག་།

26 ཀོན་འཇོག་རྒེ་ ཕོ་ཉ་ཞིག་རྒེ་ ཕི་ལིབ་ལ་ མོལ་, “ཏ་ ལོ་ ཆོག་ལ་ ཡེ་རུ་ཤ་ལེམ་ནི་ འགཱ་ཟ་ ཆོག་ལ་ ཆ་ཀ་ནེ་ ཐང་ལམ་འབེ་ཀ་ སོང་།” 27 ཏེ་ནི་ ཁོ་ སོང་ ཡང་ ལམ་ལ་ ཁོ་ ཨེ་ཐི་ཡོ་པི་པ་ མི་ཞིག་ ཐུག་, ཀའོ་ ཨེ་ཐི་ཡོ་པི་པེ་ རྒྱ་མོ་ ཀན་འདཱ་ཀེ་ ཟེར་ཧན་འབེ་ པང་ཛོད་རྡེ་ ལོན་པོ་ མ་ ཝང་ཅེན་ཞིག་ འིན་འབེན་། ཁོ་ ཡེ་རུ་ཤ་ལེམ་མེ་ ཀོན་འཇོག་རྒེ་ ཁང་པ་ལ་ ཅོལ་ལེ་ སོང་འདེ་ 28 ལྟ་ཀྲམ་ཀྲམ་ཀ་ ཞོན་འདེ་ རང་ཡུལ་ལ་ ལོག་ཏེ་ ཆ་ཟ་ནི་ ལུང་རྟོན་པ་ ཡེ་ཤ་ཡཱེ་ སྤེ་ཆ་ སིལ་ལེ་ཡོད་པེན་།

29 ཏེ་ནི་ ཏམ་པེ་ ཐུག་ཡིད་རྡེ་ ཕི་ལིབ་ལ་ མོལ་, “ལྟ་ཀྲམ་ཀྲམ་ ཉེ་མོ་ལ་ སོང་།”

30 ཕི་ལིབ་ རྒྱུག་ཏེ་ ལྟ་ཀྲམ་ཀྲམ་ ཉེ་མོ་ལ་ སོང་ ཡང་ ཏེ་ཀ་ ཞོན་འདེ་ ཡོ་ཀན་འབེ་ ལུང་རྟོན་པ་ ཡེ་ཤ་ཡཱེ་ སྤེ་ཆ་ སི་ལེན་ ཡོ་ཀན་འབོ་ ཚོར་། ཕི་ལིབ་རྦེ་ ཁོ་ འདྲི་, “ཉེ་རང་ངེ་ སིལ་ལེན་ ཡོ་ཀ་ནེ་ ཏོན་འབོ་ ཉེ་རང་ལ་ ཧ་ཀོ་རྡེ་?”

31 ཏེ་ མི་རྦེ་ ལེན་ཏྃ་, “ཧ་ཀོ་ཅུག་ཀན་ མེད་པེ་, ང་ ཀ་ཟུག་རྒེ་ ཧ་ཀོ་ཉེ་ནེན་?” ཡང་ ཕི་ལིབ་ལ་ ཁོ་ ཉམ་པོ་ ལྟ་ཀྲམ་ཀྲམ་མེ་ན་ ཞོན་ནེ་ལ་ ཟེར་།

32 ཁོའེ་ སིལ་ལེན་ ཡོ་ཀ་ནེ་ ཏམ་པེ་ སུང་རབ་པོ་ནི་,

“ཁོང་ ལུག་ ཙོག་སེ་ སེད་རྡེ་ལ་ ཁྱེར་།

ཡང་ ཀ་ཟུག་ ལུག་ རང་ངེ་ པལ་ འབྲག་ཀ་ནེ་ འདུན་ལ་

ཁ་རོག་ཏེ་ འདེད་ཏེ་ཡོད་, ཏེ་རྒ་ ཙོག་སེ་

ཁོང་ངེ་ལ་ རང་ངེ་ ཞལ་ མ་པེ་།

33 ཁྲེལ་རྦ་ ཅོའེན་འདང་ ཁོང་ལ་ ཀྲང་པོ་ ཤའ་ མ་ཅོའེ་།

ཁོང་ངེ་ ཕར་རྒྱུད་རྡེ་ ཧོར་ལ་ སུ་ལ་ ཤེད་ མི་ཉེན་,

འཇིག་རྟེན་ཀ་ནི་ ཁོང་ངེ་ མི་ཙེ་ ཀོག་ཏེ་ ཁྱེར་།”

34 ལོན་པོ་འབེ་ ཕི་ལིབ་ལ་ ཟེར་, “ལུང་རྟོན་པེ་ འི་ ཚིག་སྤེ་རྦོ་ ཁོ་རང་ངེ་ ཧོར་ལ་ འབྲི་ཛེད་ཏེ་ ནོག་རྒེ་ ཡ་ ཞེན་མ་ཞིག་རྒེ་ ཧོར་ལ་, ཐུག་ཞེ་ ཛེད་ཏེ་ ང་ ཧ་ཀོ་ཅུག་རྒེ་ ཛེད་?” 35 ཏེ་ནི་ ཕི་ལིབ་རྦེ་ སུང་རབ་རྦེ་ ཏེ་རྒ་ ཚིག་པོ་ནི་ འགོ་ཟུག་ཏེ་ ཁོ་ ཡི་ཤུའི་ ཧོར་ལ་ ནེ་ཚུལ་ ཟང་པོ་ ཤེད་རྡེ་ ཛེད་།

36 ཁོང་རྒུན་ ལམ་ནི་ ཆ་ཟ་ནི་ ཆུ་ ཡོད་སེ་ མལ་ཞིག་ལ་ ལེབ་པེ་, ལོན་པེ་ ཟེར་, “ཟི་རྡང་ འེ་ཀ་ ཆུ་ འདུག་, ཏ་ ཅེ་ ངེ་ ཁྲུའི་ མི་ནེན་?” 37 ཕི་ལིབ་རྦེ་ ཁོང་ལ་ མོལ་, “ཀལ་ཏེ་ ཉེ་རང་ངེ་ ཉིང་ནི་ ཏེཏ་པ་ ཅོ་ནི་ ཏེ་ནི་ ཁྲུའི་ནེན་ན་ འགྲིག་།” ཏེ་ ལོན་པེ་ ཁོང་ལ་ ཞུའི་, “ངེ་ ཏེཏ་པ་ ཅོའེན་ ཡི་ཤུ་ མ་ཤི་ཀ་ ཀོན་འཇོག་རྒེ་ སྲེ་ ནོག་།” 38 ཁོའེ་ ལྟ་ཀྲམ་ཀྲམ་འབོ་ པོར་ ཟེར་རྡེ་ ཀཱ་ ཏྃ་, ཕི་ལིབ་ ཏང་ ལོན་པོ་ ཉ་ཧ་ ཆུའི་ན་ ཞུའུ་, ཡང་ ཕི་ལིབ་རྦེ་ ཁོ་ ཁྲུའི་ཏང་། 39 ཁོང་རྒུན་ ཆུ་ནི་ ཕི་ལོག་ལ་ འབིང་ངེ་རྡང་, ཀོན་འཇོག་རྒེ་ ཐུག་ཡིད་རྡེ་ ཕི་ལིབ་ ཁོའེ་ འདུན་ལ་ ཁྱེར་རེ་ ཛེད་པེ་ ལོན་པོ་ ཁོང་ ཡང་ མ་ནི་ མ་ཐུག་, ཡང་ མ་ཐེད་པོ་རྡང་ ཉམ་པོ་ ཁོ་རང་ངེ་ ཡུལ་ལ་ ལོག་ཏེ་ སོང་། 40 ཕི་ལིབ་རྦེ་ ཁོ་རང་ ཨ་ཟོ་ཏུ་ རྒྱལ་ས་ ལེབ་ཏེ་ ཐོང་, ཡང་ ཀཱེ་སར་རི་ཡ་ ལེཔ་ ལེབ་ཚུག་པ་ ཁོང་ ཆ་ཀ་ནེ་ ཀྲོང་ཁྱེར་ ཚང་མེ་ན་ ནེ་ཚུལ་ ཟང་པོ་ ཤེད་རྡེན་ སོང་།