རྟེ་ཕན་ནེ་ ཡ་ཧུ་འདཱ་པེ་ ཚོག་འདུའི་ན་ རང་ངེ་ སྤང་པོ་ ཏང་།
7
ཏེ་ནི་ ལ་མ་ ཆོན་མེ་ རྟེ་ཕན་ལ་ འདྲི་, “ཁྱེ་རང་ རང་ངེ་ཀ་ ཀལ་ཧ་ནེ་ འི་ རྐྱོན་རྒུན་ ཀྲང་པོ་ ནོག་རྒེ་?”2 རྟེ་ཕན་ནི་ ལེན་སལ་, “ངེ་ སྤུན་ འདང་ འུ་རྐྱོང་རྒུན་ ཉོན་ཧེ་, ཨ་ཧོའེ་ ཕ་མེ་པོ་ ཨབ་ར་ཧམ་ ཧ་རན་ ཡུལ་ལ་ འདེད་རྡེ་སང་ ངུལ་ལ་ མེ་སོ་པོ་ཏྲོ་མི་ཡ་ ཡོད་ཟ་ནི་ ཁོང་ལ་ ཟི་ཞིད་ཅེན་ནི་ ཀོན་འཇོག་ འཇལ་། 3 ཡང་ ཀོན་འཇོག་རྒེ་ ཁོང་ལ་ ཀཱ་ སལ་, ‘ཁྱེ་རང་ངེ་ རང་ཡུལ་ རྡང་ ཉེན་རྒུན་ ཕང་འདེ་ ངེ་ ལྟན་ཅེ་ཅེན་ནི་ ཡུལ་ལ་ སོང་།’ 4 ཨབ་ར་ཧམ་ ཀཱལ་འདེ་ཡ་ ཡུལ་ནི་ འབིང་འདེ་, ཧ་རན་ ཟེར་ཧ་ནེ་ ཡུལ་ལ་ འདེད་རྡེ་ འདུག་, ཡང་ ཁོང་ངེ་ ཨ་རྦ་ ཀྲོང་རྡེ་ ལྟིང་ནི་ ཀོན་འཇོག་རྒེ་ ཁོང་ ཁྱི་ཞ་ འདེད་ཏེ་ ཡོ་ཀ་ནེ་ འི་ ས་ཀྱེཏ་པེ་ཀ་ ཁྱོང་།”
5 “ཀོན་འཇོག་རྒེ་ ནོར་ཧལ་ ཅང་ མ་སལ་, མི་ཀྲར་ ཅིག་རྒེ་ ས་ཀྱེད་འདང་། ཏེ་ཏུའི་ལ་ ཨབ་ར་ཧམ་ལ་ ཕྲ་རྒུ་ མེད་ན་ ཀོན་འཇོག་རྒེ་ འི་ ས་ཀྱེཏ་པོ་ ཁོང་ འདང་ ཁོང་ངེ་ ཕར་རྒྱུད་རྒུན་ལ་ ཏང་ངེན་ མོལ་རྡེ་ ཡབ་ར་ཧམ་ལ་ ཞལ་ཆེཏ་ ཛེད་། 6 ཡང་ ཀོན་འཇོག་རྒེ་ ཨབ་ར་ཧམ་ལ་ མོལ་, ‘ཁྱེ་རང་ངེ་ ཕར་རྒྱུད་རྒུན་ ཞེན་ཡུལ་ཞིག་རྒེ་ན་ ཁྱམ་པོ་ ཙོག་སེ་ འདེད་རྡེན་། ཏེ་ ཡུལ་ལེ་ མི་རྒུ་ནི་ ཁོང་རྒུན་ ཚེ་ཡོག་ ཅོའེ་རྡེ་ ལོ་ ཞིབ་རྒྱ་ ཟམ་ཤིག་ ཁོང་རྒུན་ལ་ ནག་ ལྟན་ནེན་། 7 འིན་ན་ ངེ་ ཁྱི་ཞ་ ཚེ་ཡོག་ལ་ པོར་ཧན་ནེ་ མིར་རྒྱུད་རྒུན་ལ་ ཆེད་པ་ ཅེད་རྡེན་, ཡང་ ཁྱེ་རང་ངེ་ ཕར་རྒྱུད་རྒུན་ ཏེ་ ཡུལ་ནི་ འབིང་འདེ་, ཁོང་རྒུ་ནི་ འི་ ཡུལ་ལེ་ན་ ང་ ཅོལ་ལེན་།’”
8 “ཏེ་ཏུའི་ལ་ ཀོན་འཇོག་རྒེ་ ཨབ་ར་ཧམ་ ཉམ་པོ་ འགོཔ་ཅེཏ་ ཅོ་རྒོ་ཤེ་ ཆེཏ་ཏོན་a ཛེད་། ཏེ་ནི་ ཨབ་ར་ཧམ་ ཨ་རྦ་ འགྱུར་རྡེ་ ཞག་ རྒྱེད་པེ་ ཞག་ལ་ ཁོའེ་ ཁོ་རང་ངེ་ པུ་ཙ་ ཨི་སཱག་ལ་ འགོཔ་ཅེཏ་ ཅོ་ཅུག་། ཏེ་རྒ་ ལོབ་པོ་ ཨི་སཱག་ ཡ་ཀུབ་རྦེ་ ཨ་རྦ་ འགྱུར་ཟ་ནི་, ཡང་ ཡ་ཀུབ་ ཨ་ཧོའེ་ ཕ་མེ་པོ་ ཅུག་ཉི་སྤེ་ ཨ་རྦ་ འགྱུར་ ཟ་ནི་ལ་, ཅོའེ་།”
9 “ཡ་ཀུབ་རྦེ་ ཞེན་ ཕྲུ་རྒུ་རྒུན་ ཡོ་སེབ་རྦེ་ཀ་ ཕྲ་རྡོག་ ཅོ་ཅེ་ཀ་ནི་, ཁོང་རྒུ་ནི་ ནོ་ ཡོ་སེབ་ ཨི་འཇིབ་རྦེ་ན་ ཚེ་ཡོག་རྒེ་ཕི་ ཙོང་, འིན་ན་ ཀོན་འཇོག་ ཡོ་སེབ་ ཉམ་པོ་ ཡོད་པེན་། 10 ཀོན་འཇོག་རྒེ་ ཡོ་སེབ་རྦེ་ རྡུ་ངལ་ ཚང་མ་ནི་ རྐྱོབ་ཏེ་ པོ་རེ་ ཛེད་། ཀོན་འཇོག་རྒེ་ ཁོ་ ཨི་འཇིབ་རྦེ་ རྒྱ་སྤོ་ ཕེ་རོའེ་ ཆོག་རྐྱོར་ ཐོབ་ཅུག་རྒེ་ ཛེད་, ཡང་ ཤེ་རབ་ སལ་ལེ་ ཛེད་ཅེ་རྦོ་ ཁོ་ ཏེ་ ཡུལ་ རྡང་ ཁར་ སོན་ཏེ་ཀ་ ཝང་སྲུལ་ལེ་ ཧོའེ་།”
11 “ཏེ་ནི་ ཨི་འཇིབ་ ཏང་ ཀེ་ནེན་ ཡུལ་ སོན་ཏེ་ན་ ལོར་ཧོན་ ལང་རྡེ་ མ་ རྡུ་ངལ་ ཆོན་མོ་ ཐོང་། ཨ་ཧོའེ་ ཕ་མེ་པོ་རྒུན་ལང་ ཟ་རྒྱུ་ ཧོན་མོ་ སོང་འབེན་། 12 ཡ་ཀུབ་རྦེ་ ཨི་འཇིབ་ ཡུལ་ལེ་ན་ འགྲུ་ནེ་ ཡོ་ཀན་འབོ་ ཚོར་རྡེ་, ཁོའེ་ ཨ་ཧོའེ་ ཕ་མེ་པོ་རྒུན་ ཨི་འཇིབ་རྦེ་ ཡུལ་ལ་ ཀལ་, ཏུ་རུ་ ཁོང་རྒུན་ འགོ་མ་རང་ སོང་འདེ་ འིན་འབེན་། 13 ལེན་ ཉི་སྤ་ ཡོང་ཟ་ནི་ ཡོ་སེབ་རྦེ་ ཁོ་རང་ངེ་ ཨ་ཅོ་ནོ་རྒུན་ལ་ ཁོ་ སུ་ འིན་ཀན་འབོ་ ཤེད་, ཡང་ ཨི་འཇིབ་རྦེ་ རྒྱ་སྤོ་ ཕེ་རོ་ལ་ ཡོ་སེབ་རྦེ་ ནང་ཚང་ངེ་ ཧོར་ལ་ རྒྱུའི་སོང་། 14 ཏེ་ ལྟིང་ནི་ ཡོ་སེབ་རྦེ་ རང་ངེ་ ཨ་རྦ་ ཡ་ཀུབ་ ཏང་ ཁོང་ངེ་ ནང་མི་ རྡུན་ཅུ་ཏོན་ང་ ཚང་མ་ ཨི་འཇིབ་ལ་ འབོའེ་རྡེ་ ཁྱོང་། 15 ཡ་ཀུབ་ ཨི་འཇིབ་ ཡུལ་ལ་ སོང་ ཡང་ ཏུ་རུ་ ཁོང་ འདང་ ཨ་ཧོའེ་ ཕ་མེ་པོ་ ཚང་མ་ ཀྲོང་། 16 ཁོང་རྒུ་ནི་ སྤུར་རྒུན་ ཤེ་ཀེམ་ལ་ ཁྱེར་རྡེ་ སྤུར་ཧང་ངེ་ན་ པོར་, ཀ་ ས་ཀྱེཏ་པོ་ ཨབ་ར་ཧམ་མེ་ ཤེ་ཀེམ་པ་ ཧ་མོར་རེ་ པུ་ཙ་རྒུ་ནི་ཀ་ནི་ ཉོའེ་རྡེ་ འིན་འབེན་།”
17 “ཀོན་འཇོག་རྒེ་ ཨབ་ར་ཧམ་ལ་ ཞལ་ཆེཏ་ ཛེད་ཀན་འབེ་ ཏུའི་ འདྲན་འདྲ་ ཆ་ཅེ་ ཉེ་མོ་ ལེབ་རྦེ་རྡང་, ཨི་འཇིབ་རྦེ་ན་ ཨ་ཧོའེ་ མི་རྒུན་ མང་པོ་ ཕེལ་རྡེ་ ཡོད་པེན་། 18 ཏེ་ནི་ ཨི་འཇིབ་རྦེ་ན་ རྒྱ་སྤོ་ སོ་མ་ འབིང་ཀན་འབོ་ལ་ ཡོ་སེབ་རྦེ་ ཅོའེ་ཧན་ནེ་ ཧོར་ལ་ ཅང་ རྒྱུའི་ མེད་པེན་། 19 ཏེ་ རྒྱ་སྤོ་རྦེ་ ཨ་ཧོའེ་ ཕ་མེ་པོ་རྒུན་ ཉམ་པོ་ ལྕེ་ ཀོལ་རྡེ་ ཁོང་རྒུན་ལ་ ནག་ སྲན་ཀྲེ་ ལྟན་, སྤེར་ན་ ཕ་མ་རྒུན་ལ་ ཝང་ ཀོལ་རྡེ་ ཁོང་ངེ་ ཕྲུ་རྒུ་ རྐྱེ་ཧན་རྒུན་ ཤི་ཅེ་ལ་ ཕང་ཅུག་།”
20 “ཏེ་རྒ་ ཏུའི་ལ་ མོ་ཤེ་ རྐྱེ་ ཡང་ ཁོ་ ཉམ་པོ་ ཀོན་འཇོག་ ཐུག་ཉེ་ ཛེད་། ལྡ་ སུམ་ཚུག་པ་ ཁོ་ ཁོ་རང་ངེ་ ཕ་མེ་ ལྟ་ཏོག་ ཅོའེ་། 21 ཡང་ ཁོའེ་ ཕ་མ་ ཁོ་ ཁང་པ་ནི་ ཕི་ལོག་ལ་ ཕང་རྒོའེ་རྡང་, ཨི་འཇིབ་རྦེ་ རྒྱ་མོ་ ཕེ་རོའེ་ པོ་མེ་ ཁོ་ སོའེ་རྦུ་ལ་ ནེན་འདེ་ རང་ངེ་ ཕྲུ་རྒུ་ ཚོག་སེ་ ཅོའེ་རྡེ་ སྲལ་རྡེ་ པོར་། 22 མོ་ཤེ་ ཨི་འཇིབ་རྦེ་ ཤེ་རབ་ ཡོན་ཏན་ ཚང་མ་ ལོབ་ཏེ་ ཁོ་ སྤེ་ར་ རྡང་ ལེ་ཧེ་ན་ ཁེ་སྤ་ ཡོད་པེན་།”
23 “ལོ་ ཞིབ་ཅུ་ ཆ་རྡང་ མོ་ཤེ་ ཁོ་རང་ངེ་ མི་ ཨིས་ར་ཡེལ་པ་རྒུན་ལ་ ཐུག་ཅེ་ ཐག་ཅེད་། 24 ཏེ་ནི་ ཨིས་ར་ཡེལ་པ་ཞིག་རྒེ་ཀ་ མི་འོའེ་སྤ་ ཆ་ ཐོང་འབེ་ ཁོ་ རྐྱོབ་རྦེ་ལ་ སོང་, ཡང་ ཏོ་ལ་ ལེན་ཏྃ་རྡེ་ ཁོའེ་ ཨི་འཇིབ་པའོ་ སེད་ཏང་། 25 མོ་ཤེ་, ཀོན་འཇོག་རྒེ་ ཁོ་ རྒྱུད་ཏེ་ ཨིས་ར་ཡེལ་པ་ ཚང་མ་ ཨི་འཇིབ་རྦེ་ ང་ཡོག་ནི་ པུད་ཅེའོ་ ཁོའེ་ མི་རྒུ་ནི་ ཧ་ཀོའེན་ སམ་མེ་ཡོད་པེན་, འིན་ན་ ཁོང་རྒུན་ལ་ ཧ་མ་ཀོ་།”
26 “ཐོ་རེ་ཚུག་པོ་ མོ་ཤེ་ ཨིས་ར་ཡེལ་པ་ ཉི་ ནོལ་ལེན་ ཐོང་འདེ་ ཁོང་རྒུན་ལ་ ཐུན་ཅུག་ཅེ་ ཙོན་འགྲུའི་ ཅོའེན་ ཟེར་, ‘ཁྱི་ཞ་ སྤུན་ ནོག་, ཅེ་ ཅིག་ ཏང་ ཅིག་ ནོལ་ལེ་ཡོད་?’”
27 “འིན་ན་ ཏེ་ མི་འོའེ་སྤ་ ཅོ་ཀན་ མི་རྦེ་ མོ་ཤེ་ འ་ངོ་ལ་ རིལ་ཏྃ་རྡེ་ ཟེར་, ‘ཁྱེ་རང་ སུའི་ ང་ཞི་ཀ་ ཝང་སྲུལ་པ་ རྡང་ ཁྲིམ་སྤོན་ལ་ ཧོའེ་? 28 འདང་ ཏེ་ ཨི་འཇིབ་པའོ་ སེད་རྡེ་ ཙོག་སེ་ ཁྱེ་རང་ངེ་ ང་ལ་ སེད་རྡེན་ནེ་?’ 29 ཏུ་ཟུག་ ཚོར་རེ་རྡང་ མོ་ཤེ་ མི་འདི་ཡའན་ ཟེར་ཧ་ནེ་ ཡུལ་ལ་ ཤོར་རྡེ་ སོང་, ཡང་ ཏུ་རུ་ འདེད་ཏེ་ པུ་ཙ་ ཉི་རྡེ་ ཨ་རྦ་ འགྱུར་།”
30 “ལོ་ ཞིབ་ཅུའི་ ལྟིང་ནི་, སི་ནཱ་ རི་ ཉེ་མོ་ ཡོ་ཀ་ནེ་ རི་ལྟོང་ཞིག་རྒེ་ན་, རྦུར་སེ་ མེ་ འབར་ཧན་ཞིག་རྒེ་ ནང་ནི་ ཀོན་འཇོག་རྒེ་ ཕོ་ཉ་ཞིག་ ཁོང་ལ་ འཇལ་། 31 ཏོ་ ཐོང་འདེ་ མོ་ཤེ་ ཧ་ལེ་, ཡང་ ཏེ་ མེ་འབོ་ ལྟ་ལ་ ཉེ་མོ་རི་ སོང་འབེ་ ཁོ་ ཏེ་ རྦུར་སེ་ ནང་ནི་ ཙོབོ་ ཀོན་འཇོག་རྒེ་ ཧད་ ཚོར་། 32 ‘ང་ནི་ ཁྱེ་རང་ངེ་ ཕ་མེ་པོ་རྒུ་ནི་ ཀོན་འཇོག་, ཨབ་ར་ཧམ་, ཨི་སཱག་ ཏང་ ཡ་ཀུབ་རྦེ་ ཀོན་འཇོག་ འིན་།’ མོལ་ཧན་འབོ་ ཚོར་རྦེ་ མོ་ཤེ་ འཇིའི་རྡེ་ འདར་, ཡང་ ཁོང་ལ་ ལྟ་ མ་ཁྱུད་།”
33 “ཏེ་ནི་ ཙོབོ་ ཀོན་འཇོག་རྒེ་ མོ་ཤེ་ལ་ མོལ་, ‘ཁྱེ་རང་ངེ་ འཇའ་ཏོ་ པུད་ ཅེ་ཟེར་ནི་ ཁྱེ་རང་ ལྃ་རྡེ་ ཡོ་ཀན་ནེ་ ས་ཀྱེཏ་པོ་ ཏམ་པ་ འིན་། 34 ང་ ཨི་འཇིབ་ ཡུལ་ལ་ ཡོ་ཀ་ནེ་ ངེ་ མི་རྒུ་ནི་ རྡུ་ངལ་ པར་རྡོ་རྒུན་ ཐོང་, ཡང་ ཉ་ངན་ནི་ ཀུ་ཅོ་རྒུན་ ཚོར་རྦེ་ ང་ ཁོང་རྒུན་ ཐར་ཤུག་ཅེ་ལ་ པབ་ཏེ་ ཡོྃ་རྡེ་ འིན་། ཏ་ སོང་, ཁྱེ་རང་ ངེ་ ཨི་འཇིབ་ལ་ ལོག་ཏེ་ ཀལ་ལེན་།’”
35 “ཡུ་ ཏེ་རྒ་ མོ་ཤེ་ འིན་འབེན་ ཀ་འབོ་ལ་, ཨིས་ར་ཡེལ་པ་རྒུ་ནི་ ‘ཁྱེ་རང་ སུའི་ ང་ཞི་ཀ་ ཝང་སྲུལ་པ་ རྡང་ ཁྲིམ་སྤོན་ལ་ ཧོའེ་?’ ཟེར་རྡེ་ མ་སིག་རྒེ་ལ་ འིན་འབེན་། ཏེ་རྒ་ མོ་ཤེ་ལ་ རྦུར་སེ་ མེ་ འབར་ཀ་ནེ་ ཕྲོ་ནི་ འཇལ་ཧ་ནེ་ ཕོ་ཉ་ རྒྱུད་ཏེ་ ཀོན་འཇོག་རྒེ་ ཝང་སྲུལ་པ་ རྡང་ ཐར་ཤུག་ཀན་ལ་ ཧོ་ ཛེད་། 36 ཁོའེ་ ཨིས་ར་ཡེལ་པ་ ཚང་མ་ ཨི་འཇིབ་ནི་ ཕི་ལོག་ལ་ ཕིང་རྡེ་ ཁྱེར་, ཡང་ ཧ་ལེ་ཤེ་ ཛེད་པ་ རྡང་ ལྟའ་རྒུན་ ཨི་འཇིབ་, རྒྱམ་ཚོ་ མར་སྤོ་ རྡང་ རི་ལྟོང་ངེ་ན་ ལོ་ ཞིབ་ཅུ་ ལྟན་ནེ་ ཛེད་།”
37 “འི་འབོ་ ཏེ་རྒ་ མོ་ཤེ་རྦོ་ ནོག་, ཀ་རྦེ་ ཨིས་ར་ཡེལ་པ་རྒུན་ལ་ མོལ་, ‘ཀོན་འཇོག་རྒེ་ ཁྱི་ཞ་རྒུ་ནི་ ཕྲོ་ནི་ ང་ ཙོག་སེ་ ལུང་རྟོན་པ་ཞིག་ ལང་ངེ་ ཛེ་རྡེན་།’ 38 ཁོང་ རི་ལྟོང་ངེ་ན་ ཨ་ཧོའེ་ ཕ་མེ་པོ་རྒུན་ ཉམ་པོ་ ཡོད་པེན་ ནམ་ ཁོང་ལ་ རི་ སི་ནཱེ་ཀ་ ཕོ་ཉེ་ སྤེ་ར་ སལ་, ཡང་ ཏུ་རུ་ མོ་ཤེ་ལ་ ཨ་ཧོ་ ཚང་མ་ལ་ ཏང་ཅེ་ཕི་ སྲོག་ སལ་ཧ་ནེ་ ཀའ་རྒུན་ ཐོབ་།”
39 “འིན་ན་ ཨ་ཧོའེ་ ཕ་མེ་པོ་རྒུན་ མོ་ཤེ་ ཁ་ཉེན་ཅེ་ལ་ མ་ཐེད་། ཁོང་རྒུན་ལ་ མོ་ཤེ་ ཕྃ་ཏེ་ ཨི་འཇིབ་ ཡུལ་ལ་ ལོག་ཏེ་ ཆ་ཅེ་ འདོད་པ་ རྐྱེ་། 40 ཁོང་རྒུ་ནི་ ཨ་རོན་ལ་ ཟེར་, ‘ཁྱེ་རང་ངེ་ ང་ཞ་ ལམ་ལྟན་ཀ་ནེ་ ཧུ་འདྲ་རྒུན་ ཅོའེ་ ཅེ་ཟེར་ནི་ ཨི་འཇིབ་ ཡུལ་ནི་ ཕིང་འདེ་ ཁྱོང་ཀ་ནེ་ མོ་ཤེ་ལ་ ཅི་ སོང་ ང་ཞ་ རྒྱུའི་མེད་།’ 41 ཏེ་ཏུའི་ལ་ ཁོང་རྒུ་ནི་ པེ་ཏོ་ ཙོག་སེ་ ཧུ་འདྲ་ཞིག་ ཅོའེ་, ཡང་ རང་ངེ་ ལག་པ་ནི་ ཅོའེ་ཧ་ནེ་ ཧུ་འདྲ་ སྲོག་ཆོད་ པུ་ལེན་ རྒ་མོ་ ཅོའེ་། 42 འིན་ན་ ཀོན་འཇོག་རྒེ་ ཁོང་རྒུན་ལ་ རྒྱབ་ འགྱུར་རེ་ ཛེད་ཏེ་, ནམ་ཀེ་ ཧར་མ་རྒུན་ལ་ ཅོལ་ཤེ་ལ་ པུད་ སལ་, ཀ་ཟུག་ ལུང་རྟོན་པ་རྒུ་ནི་ སྤེ་ཆེ་ན་ འབྲི་ཛེད་ཏེ་ ནོག་,
‘ཁྱི་ཞ་ ཨིས་ར་ཡེལ་པ་རྒུན་ རི་ལྟོང་ལ་ ལོ་ ཞིབ་ཅུ་ ཡོད་རྡེ་ ཏུའི་ལ་
ཅི་ ཁྱི་ཞི་ ང་ སྲོག་རྒེ་ ཆོད་པ་ རྡང་ འབུལ་ལྡུཏ་རྒུན་ པུལ་རྦེ་ནེ་?
43 འིན་ན་ ཁྱི་ཞི་ མོ་ལོག་རྒེ་ ཀུར་ རྡང་,
རེ་ཕན་ ཟེར་ཧ་ནེ་ ཧར་མེ་ ཧུ་འདྲ་ ཉ་ཧ་ ཁུར་རྡེ་ ཁྱེར་རེ་ཡོད་པེན་།
ཀའོ་ ཁྱི་ཞ་རང་ངེ་ ཅོལ་ཤེ་ལ་ ཅོའེ་།
ཏོ་རྦེ་ཕི་ ངེ་ ཁྱི་ཞ་ ཁྱི་ཞ་རང་ངེ་ ཡུལ་ནེ་, འབཱ་འབེ་ལོན་ནེ་སང་ ཐག་རིང་ལ་ ཁྱམ་ ཅུག་རྒེན་།’”
44 “རི་ལྟོང་ངེ་ན་ ཀོན་འཇོག་རྒེ་ ཆེཏ་ཏོན་ འབྲི་ཀན་ པོར་ཧ་ནེ་ ཀུར་རྦོ་ ཨ་ཧོའེ་ ཕ་མེ་པོ་རྒུན་ ཉམ་པོ་ ཡོད་པེན་། ཡང་ ཏེ་ ཀུར་རྦོ་ ཀོན་འཇོག་རྒེ་ མོ་ཤེ་ལ་ ལྟན་ནེ་ ཛེད་ཀ་ནེ་ སྤེ་ ནང་ཞིན་ ཅོའེ་རྡེ་ འིན་འབེན་། 45 ཏེ་ ལྟིང་ནི་ ཨ་ཧོའེ་ ཕ་མེ་པོ་རྒུ་ནི་ ཏེ་ ཀུར་རྦོ་ ཁུར་རྡེ་ ཡོ་ཤུ་ཨེ་ ཝང་ངེ་ ཡོག་ལ་ འི་ ས་ཀྱེཏ་པེ་ཀ་ ཁྱོང་, ཏེ་ ཡུལ་མི་རྒུན་ ཨ་ཧོའེ་ ཕ་མེ་པོ་རྒུ་ནི་ཕི་ ཀོན་འཇོག་རྒེ་ ཕིང་ངེ་ ཛེད་། ཡང་ ཏེ་ ཀུར་རྦོ་ རྒྱ་སྤོ་ འདཱ་འབིད་རྡེ་ ཏུའི་ཚུག་པ་ འི་ ས་ཅེ་ཀ་ ལུའི་།”
46 “ཀོན་འཇོག་རྒེ་ ཆོག་རྐྱོར་ ཛེད་ཀ་ནེ་ རྒྱ་སྤོ་ འདཱ་འབིད་རྡེ་ ཨིས་ར་ཡེལ་པེ་ ཅོལ་ཀ་ནེ་ ཀོན་འཇོག་རྒེ་ཕི་ ཀོན་འཇོག་རྒེ་ ཁང་པ་ཞིག་ ཞང་ཅེ་ལ་ ཞུ་ཝ་ པུལ་། 47 འིན་ན་ འདཱ་འབིད་རྡེ་ པུ་ཙ་ སོ་ལོ་མོན་ནེ་ ཀོན་འཇོག་རྒེ་ཕི་ ཏེ་ ཀོན་འཇོག་རྒེ་ ཁང་པ་འབོ་ ཞང་། 48 འིན་ན་, ཀུན་ཝང་ ཀོན་འཇོག་ནི་ མི་ ལག་པ་ནི་ སིག་ཀ་ནེ་ ཀོན་འཇོག་རྒེ་ ཁང་པེ་ན་ ཞུ་རྡེ་ མག་, ཀ་ཟུག་ ཀོན་འཇོག་རྒེ་ ལུང་རྟོན་པ་ རྒྱུད་ཏེ་ མོལ་,
49 ‘ནམ་ཀ་རྦོ་ ངེ་ ཞུ་ཁྲིའི་ འིན་
ཡང་ འཇིག་རྟེན་ནི་ ངེ་ ཧང་པ་ པོར་ས་།
ཁྱེ་རང་ངེ་ ངེ་ཕི་ ཀ་ཟུག་ ཁང་པ་ཞིག་ སིག་རྒེན་?
ཡང་ ང་ ངལ་ཚོ་སེ་ ས་ཅ་ ཀ་རུ་ ཡོང་རྒོའེ་?
50 ཅི་ཚང་མ་ ངེ་ ལག་ནི་ ཅོའེ་ཧན་ མ་ནོག་རྒེ་?’”
51 “ཁྱི་ཞ་ ཀྱོང་པོ་ ཀྲེཏ་ཀྲེཏ་, ཏེཏ་པ་ མེ་ཀ་ནེ་ ཉིང་, ཡང་ ཀོན་འཇོག་རྒེ་ ཀའ་ ཉེན་ཅེ་ན་ འགུད་ཏི་རྒུན་, ཁྱི་ཞི་ ཕ་མེ་པོ་རྒུན་ ཙོག་སེ་ ཁྱེ་རང་རྒུ་ནི་ལ་ ཏམ་པེ་ ཐུག་ཡིད་ལ་ ཏུའི་རྒྱུན་ རྒྱཔ་འགལ་ ཅོ་ནོག་། 52 ཁྱི་ཞི་ ཕ་མེ་པོ་རྒུ་ནི་ ནག་ མ་ལྟན་ཀ་ནེ་ ལུང་རྟོན་པ་ཞིག་ སུ་ ཡོད་? ཏོ་རྒུ་ནི་ ཀྲང་པོ་ རྐྱོད་ཅེ་ཅེན་ནེ་ ཧོར་ལ་ ཤེད་ཀ་ནེ་ ལུང་རྟོན་པ་རྒུན་ལ་ སེད་ཏེ་ འིན་འབེན་, ཁྱི་ཞི་ ཏེ་ ཀྲང་པོ་ མི་ནི་ འགྲ་ཝེ་ ལག་ལ་ ལྟེད་ཏེ་ སེད་ཅུག་། 53 ཀོན་འཇོག་རྒེ་ ཕོ་ཉ་རྒུན་ རྒྱུད་ཏེ་ ཐོབ་ཀ་ནེ་ ཀཱ་ཁྲིམ་རྒུན་ལ་ ཁྱི་ཞི་ མ་སྲུང་།”
རྟེ་ཕན་ སེད་།
54 ཏེ་ སྤེ་ར་རྒུན་ ཚོར་རེ་རྡང་ ཡ་ཧུ་འདཱ་པེ་ ཚོག་འདུའི་ ཐུའི་མི་ ཚང་མ་ སྲོ་ སྲན་ཀྲེ་ ཡོྃ་རྡེ་ སོ་ སིག་། 55 འིན་ན་ ཏམ་པེ་ ཐུག་ཡིད་རྡེ་ ཀང་འདེ་ རྟེ་ཕན་ནེ་ ནམ་ཀ་ ཟིའི་རྦེ་, ཁོ་ ཀོན་འཇོག་རྒེ་ ཟི་ཞིད་ ཏང་ ཁོང་ངེ་ སི་ཝ་ཅེན་ནེ་ ཆག་ ཡོའེ་སྤེ་ ཆོག་ལ་ ཡི་ཤུ་ ཞྃ་རྡེ་ འཇལ་། 56 ཁོའེ་ ཟེར་, “ལྟོའེ་རྡང་! ནམ་ཀ་ པེ་ཏེ་ ང་ མི་རིག་རྒེ་པུ་ ཀོན་འཇོག་རྒེ་ ཆག་ ཡོའེ་སྤེ་ ཆོག་ལ་ ཞྃ་རྡེ་ འཇལ་རྡུག་།”
57 ཏེ་ནི་ ཁོང་རྒུ་ནི་ ནམ་ཅོག་ ཀབ་ཏེ་ ཀུ་ཅུ་ སྲན་ཀྲེ་ ཏང་ངེན་ རྟེ་ཕན་ ཆོག་ལ་ རྒྱུག་། 58 ཁོ་ ཀྲུད་རྡེན་ རྒྱལ་ས་ནི་ ཕི་ལོག་ལ་ ཕིང་འདེ་ སེད་རྡེ་ལ་ རྡོ་ རྒྱབ་ཅེ་ འགོ་ཟུག་, ཡང་ རྟེ་ཕན་ལ་ ཉེད་ཀལ་ཧན་རྒུ་ནི་ རང་ངེ་ ཀོའེ་ལ་རྒུན་ པུད་ཏེ་ ས་འུལ་ ཟེར་ཧ་ནེ་ ཁྱོག་ཏོང་འབེ་ འདུན་ལ་ པོར་།