ཞབ་རྟོག་པ་ རྡུན་ འདམ་མེ་ ཛེད་།
6
ཏེཏ་པ་ཅན་རྒུ་ནི་ ཀྲང་ཧ་ ཕེ་ལེན་ ཡོད་ཟ་ནི་, འགི་རིག་པེ་ འ་ནེ་ མ་རང་མོ་རྒུན་ལ་ ཞག་ཏང་ངེ་ ཁར་ཞི་ རྒོ་ཅེ་ལ་ ཡ་པེ་ ཅོ་ཅེ་འབོ་ ཐོང་འདེ་ འགི་རིག་རྒེ་ ཏེཏ་པ་ཅན་ནེ་ ཨིབ་རི་པེ་ ཏེཏ་པ་ཅན་རྒུ་ནི་ རྒྱཔ་འགལ་ལ་ ཟེར་རྒྱུ་ ཏང་།2 ཏོ་ ཚོར་རེ་རྡང་ ཧུ་ཚབ་ ཅུག་ཉི་རྦེ་ ཞེན་ ལོབ་ཀྲུག་རྒུན་ རྡུའི་རྡེ་ ཁོང་རྒུན་ལ་ མོལ་, “ཀལ་ཏེ་ ཁར་ཞི་ རྒོའེན་ འདེད་ཏེ་ ཀོན་འཇོག་རྒེ་ ཀའ་ ལབ་ཅེ་རྦོ་ལ་ ནྃ་ མ་ཏང་ནི་ ང་ཞ་རྒུ་ནི་ ནོར་ཁྲུལ་ ཅོའེ་རྡེ་ ནོག་། 3 ཏེ་རྒ་རྒེ་ཕི་ལ་ སྤུན་རྒུན་, ཁྱི་ཞ་རང་ངེ་ ཕྲོ་ནི་ ཏམ་པེ་ ཐུག་ཡིད་ ཏང་ ཤེ་རབ་ ཀང་ཀན་ སི་ཝ་ཅེན་ པུ་ཙ་ རྡུན་ འདོམ་ཧེ་, ང་ཞི་ ཁོང་རྒུན་ལ་ ཏེ་ ལེ་ཧ་རྦོ་ ཅོ་ཅེ་ ཁག་ ལྟེ་རྡེན་། 4 ཏེ་ནི་ ང་ཞ་རྒུ་ནི་ ཏུའི་ ཚང་མ་ མོ་ལམ་ ཞུ་ཅེ་ རྡང་ ཀོན་འཇོག་རྒེ་ ཀའ་ ལབ་ཅེ་ལ་ རྟེམ་པོ་ ཅོའེ་རྡེ་ འདེད་རྡེན་།”
5 ཏེ་ སྤེ་ར་འབོ་ ཚོར་རྡེ་ ཏུ་རུ་ ཛོམ་ཀན་ ཚང་མ་ ཐེད་ ཡང་ ཁོང་རྒུ་ནི་ འདམ་ཀན་རྒུན་: རྟེ་ཕན་ ཏེཏ་པ་ རྡང་ ཏམ་པེ་ ཐུག་ཡིད་རྡེ་ ཀང་ཀན་, ཕི་ལིབ་, པོརོ་ཀོར་, ནི་ཀ་ནོར་, ཏི་མོན་, པར་མེ་ན་, ངུལ་ལ་ ཡ་ཧུ་འདཱ་པེ་ ཆོའེ་ལ་ ལྟན་ཀན་ ཨན་ཏི་ཡོག་པ་ ནི་ཀོ་ལཱ་ རྡུན་ཀ་ ནོག་། 6 ཏོ་ རྡུན་ཀ་ ཧུ་ཚབ་རྒུ་ནི་ འདུན་ལ་ ཁྱེར་རྦེ་ ཁོང་རྒུ་ནི་ ཁོང་རྒུ་ནི་ འགོའེ་ཀ་ ཆག་ པོར་རྡེ་ མོ་ལམ་ ཞུ་ ཛེད་།
7 ཀོན་འཇོག་རྒེ་ ཀའ་ མང་ངེ་ རྐྱེན་ སོང་, ཏེཏ་པ་ཅན་རྒུ་ནི་ ཀྲང་ཧ་ ཡེ་རུ་ཤ་ལེམ་མེ་ན་ མང་པོ་ ཕེལ་ ཡང་ ཡ་ཧུ་འདཱ་པེ་ ལ་མ་ མང་པོ་ཞིག་ལ་ ཏེཏ་པ་ ཅོའེ་།
རྟེ་ཕན་ ཟུམ་།
8 ཀོན་འཇོག་རྒེ་ ཐུག་ཞེ་ རྡང་ ཤུག་ ཀང་འདེ་, རྟེ་ཕན་ནི་ མི་རྒུ་ནི་ ཕྲོ་ ཧ་ལེ་ཤེ་ ཛེད་པ་ རྡང་ ལྟའ་ མང་པོ་ ལྟན་ནེ་ཡོད་པེན་། 9 ཚེ་ཡོག་ནེ་ ཐར་ཧན་རྒུ་ནི་ འདུ་ཀང་ངེ་ ཐུའི་མི་ ཁ་ཅིག་རྒེ་ རྟེ་ཕན་ ཉམ་པོ་ ཟེར་ཟེར་ འགོ་ཟུག་ ཅོའེ་། ཁོང་རྒུན་ ཀི་རིན་, ཨ་ལེག་ཟན་འདྲིརི་ཡ་, སི་ལི་སི་ཡཱ་ རྡང་ ཨ་སི་ཨཱ་ནེ་ ཡོང་ཀ་ནེ་ ཡ་ཧུ་འདཱ་པ་རྒུན་ འིན་འབེན་། 10 འིན་ན་ རྟེ་ཕན་ནི་ ཏམ་པེ་ ཐུག་ཡིད་ ཡང་ ཤེ་རབ་ ཉམ་པོ་ མོལ་ཧན་འབེ་ཀ་ ཁོང་རྒུན་ ལོག་ མ་ཉེན་།
11 ཏེ་ནི་ ཁོང་རྒུ་ནི་ སང་སྤེར་ ཐོག་ནི་ ལྕེ་ ཀོལ་ཀ་ནེ་ མི་ ཁ་ཅིག་རྒེ་, “རྟེ་ཕན་ནེ་ ལུང་རྟོན་པ་ མོ་ཤེ་ རྡང་ ཀོན་འཇོག་ལ་ ཏེཏ་ལོག་ ཞུ་ཅེའོ་ ང་ཞི་ ཚོར་” ཟེར་ཤུག་། 12 ཏུ་ཟུག་ ཚོར་ཤེ་རྦེ་ མི་རྒུན་, འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུན་ལ་ རྟེ་ཕན་ནེ་ཀ་ སྲོ་ སྲན་ཀྲེ་ ལང་། ཁོང་རྒུ་ནི་ རྟེ་ཕན་ ཟུམ་འདེ་ ཡ་ཧུ་འདཱ་པེ་ ཚོག་འདུའི་རྡེ་ འདུན་ལ་ ཁྱེར་།
13 ཁོང་རྒུ་ནི་ ཟུན་མ་ སྤང་པོ་ མང་པོ་ ཕིང་ ཡང་ ཁོ་རྒུན་ལ་ ཟེར་ཤུག་, “འི་ མི་རྦེ་ ཏུའི་རྒྱུན་ ཏམ་པེ་ ཀོན་འཇོག་རྒེ་ ཁང་པ་ འདང་ ཀཱ་ཁྲིམ་རྒུ་ནི་ རྒྱཔ་འགལ་ལ་ ཟེར་རྡུག་། 14 སྤེར་ན་ ན་ཙ་རེད་པ་ ཡི་ཤུའི་ འི་ ཀོན་འཇོག་རྒེ་ ཁང་པ་འབོ་ ཤིག་ཅེ་ ལུང་རྟོན་པ་ མོ་ཤེ་ ཨ་ཧོ་ སལ་ཧ་ནེ་ ལུག་སྲོལ་རྒུན་ འགྱུ་རེན་ ཟེར་ཧན་འབོ་ ང་ཞི་ ཚོར་།”
15 ཡ་ཧུ་འདཱ་པེ་ ཚོག་འདུའི་ན་ རྡུའི་རྡེ་ ཡོ་ཀན་རྒུ་ནི་ རྟེ་ཕན་ལ་ ནེན་ཏེན་ ཅོའེ་རྡེ་ ལྟོའེ་, ཅེ་ཟེར་ནི་ ཁོའེ་ རྡོང་འབོ་ ཀོན་འཇོག་རྒེ་ ཕོ་ཉེ་ ཞལ་འདོང་ ཙོག་སེ་ ཐོང་ངེ་ཡོད་པེན་།