ཆག་ལེ་རྒུན་ 5

ཨ་ན་ནི་ཡཱ་ རྡང་ ཁོའེ་ ན་མ་ སབ་ཕི་ར་།

ཏ་ ཨ་ན་ནི་ཡཱ་ རྡང་ ཁོའེ་ ན་མ་ སབ་ཕི་ར་ ཟེར་ཧ་ནེ་ ཞི་མེད་ཅིག་རྒེ་ རང་ངེ་ ས་ཀྱེཏ་རྡེ་ ཁག་ཅིག་ ཙོང་, 2 ཡང་ ཐོབ་ཀ་ནེ་ མུལ་རྦེ་ ནང་ནི་ ཁག་ཅིག་ སུ་ལ་ རྒྱུའི་ཆ་ མ་ཅུག་ལ་ པོར་རྡེ་ ལུའི་ཧན་འབོ་ ཧུ་ཚབ་རྒུ་ནི་ ཞབ་རྦེ་ འདུན་ལ་ པུལ་། ཁོའེ་ ན་མེ་ འི་ ཚང་མེ་ན་ ཁ་ཆམ་འདེ་ འིན་འབེན་།

3 ཏེ་ནི་ པི་ཏྲ་རེ་ མོལ་, “ཨ་ན་ནི་ཡཱ་, ཅེ་ ཁྱེ་རང་ངེ་ ཉིང་ངེ་ན་ རྡུད་ ཡོང་ཅུག་ཏེ་, ས་ཀྱེཏ་ ཙོང་ཀ་ནེ་ རིན་ནེ་ ཁག་ཅིག་ རང་ངེ་ཕི་ པོར་རྡེ་ ཏམ་པེ་ ཐུག་ཡིད་ལ་ ཟུན་ ཏང་ངེ་ཡོད་། 4 ཏེ་ ས་ཀྱེཏ་པོ་ ཙོང་ངེ་སང་ ངུལ་ལ་ ཁྱེ་རང་ངེ་ མན་འབེན་ནེ་? ཙོང་རྡེ་ ལྟིང་ནེ་ལ་ ཏེ་ མུལ་འབོ་ལ་ ཁྱེ་རང་ངེ་ ཅི་ ཅོ་ནང་ མི་ཐེད་རྡེ་? ཏེ་ནི་ ཁྱེ་རང་ལ་ སེམ་ངན་ ཅོ་ཅེ་ སམ་བ་འབོ་ ཀ་ནི་ ཡོང་? ཁྱེ་རང་ངེ་ ང་ཞ་རྒུན་ལ་ མ་ནོག་ ཀོན་འཇོག་ལ་ ཟུན་ ཏྃ་རྡེ་ ནོག་།”

5 ཏོ་རྒུན་ ཚོར་རེ་རྡང་ ཨ་ན་ནི་ཡཱ་ ཐང་ཀེ་ཀ་ འགྱེལ་ ཡང་ ཤི་། ཏོ་ སོང་ཀན་རྒུན་ ཚོར་ཧན་ ཚང་མ་ ཧོཔ་ འཇིའི་། 6 ཏུ་རུ་ ཡོ་ཀ་ནེ་ ཁྱོག་ཏོང་ ཁ་ཅིག་ ཡོྃ་རྡེ་ ཁོའེ་ རོ་རེ་ན་ ཏུམ་ ཡང་ ཕི་ལོག་ལ་ ཧུང་ངེ་ལ་ ཁྱེར་།

7 ཆུ་ཙོད་ སུམ་ཞིག་རྒེ་ ལྟིང་ནི་, ཁོའེ་ ན་མ་ ཏུ་རུ་ ཡོང་, ཏུ་རུ་ སོང་ཀན་འབོ་ ཁོ་ རྒྱུའི་ མེད་པེན་། 8 ཏེ་ནི་ པི་ཏྲ་རེ་ ཏེ་ པོ་མོ་ལ་ མོལ་, “ཤོད་རྡང་! འི་ མུལ་འབོ་ ཁྱེ་རང་ འདང་ ཁྱེ་རང་ངེ་ མག་པེ་ ས་ཀྱེཏ་ ཙོྃ་རྡེ་ རིན་ ཐོབ་ཀན་ སོན་ཏེ་ འིན་ནེ་?”

ཁོའེ་, “རིན་ སོན་ཏེ་ འིན་ལེ་” ཞུའི་།

9 པི་ཏྲར་རེ་ མོལ་, “ཀ་ཟུག་རྒེ་ ཁྱེ་རང་ ཉ་ཧེ་ ཙོབོ་རྡེ་ ཐུག་ཡིད་ལ་ ཚོད་ལྟ་ཅེ་ ཐབ་ ངན་པ་ ལྡིང་འབེན་? ཏ་ ཁྱེ་རང་ངེ་ མག་པ་ ཧུང་ངེ་ལ་ ཁྱེར་ཧན་རྒུན་ རྒོའེ་ཀ་ ཡོད་, ཡང་ ཁྱེ་རང་ལ་ ཕི་ལོག་ལ་ ཁུར་རྡེ་ ཁྱེར་རེན་།”

10 ཏེ་རྒ་མ་རྒ་ ཏེ་ པོ་མོ་ ཁོང་ངེ་ ཞབ་རྦེ་ཀ་ འགྱེལ་རྡེ་ ཤི་། ཁྱོག་ཏོང་རྒུ་ནི་ ཡོང་ ཡང་ པོ་མོ་ ཤི་རྡེ་ ཐོང་རྦེ་, ཁོ་ལ་ ཕི་ལོག་ལ་ ཁྱེར་ཏེ་ ཁོ་རང་ངེ་ མག་པ་ ཉམ་པོ་ ཧུྃ་། 11 མ་ཤི་ཀེ་ ཆོའེ་ཚོག་ སོན་ཏེ་ ཡང་ ཏེ་ ཧོར་ལ་ ཚོར་ཧན་ ཚང་མ་ སྲན་ཀྲེ་ འཇིའི་།

ཧུ་ཚབ་རྒུ་ནི་ ནེད་པ་རྒུན་ ཕན་ཅུག་རྒེ་ ཛེད་།

12 ཧུ་ཚབ་རྒུ་ནི་ མི་ཚོག་རྒེ་ན་ ཧ་ལེ་ཤེ་ ཛད་པ་ མང་པོ་ ལྟན་ནེ་ ཛེད་, ཡང་ ཏེཏ་པ་ཅེན་ ཚང་མ་ ཀོན་འཇོག་རྒེ་ ཁང་པེ་ན་ སོ་ལོ་མོན་ནེ་ ཡབ་རྦེ་ཀ་ ཛོམ་མེ་ཡོད་པེན་། 13 ཡུལ་མི་ ཚང་མེ་ ཁོང་རྒུན་ལ་ སི་ཝ་ མ་ ཀྲག་པོ་ ཅོ་ཡོད་པེན་, འིན་ན་ ཁོང་རྒུ་ནི་ ཕྲོ་ འདྲེའེ་ཤེ་ ཧམ་བ་ སུ་ཞི་ལ་ མ་ཡོང་། 14 ཏེ་ན་ པུ་ཙ་ རྡང་ པོ་མོ་ མང་པོ་ཞིག་རྒེ་ ཙོབོ་ ཡི་ཤུའི་ཀ་ ཏེཏ་པ་ ཅོའེ་ ཡང་ ཏེཏ་པ་ཅན་རྒུ་ནི་ ཀྲང་ཧ་ རྒྱེ་། 15 པི་ཏྲ་རེ་ ཧ་ལེ་ཤེ་ ཛེད་པ་ ལྟན་ནེ་ ཛེད་ཅེ་རྦེ་, ཁོང་ ལམ་ནི་ རྐྱོད་ཟ་ནི་ ཁོང་ངེ་ ཀྲིབ་ཉག་ ཕོག་ནི་ རྒྱལ་ལེན་ སམ་འདེ་ མི་རྒུ་ནི་ ནེད་པ་རྒུན་ ཁྱོྃ་རྡེ་ ལམ་མེ་ཀ་ ཉལ་ལྟེན་ འདང་ ཅར་པ་རྒུ་ནི་ཀ་ པོ་རེ་ཡོད་པེན་། 16 ཡེ་རུ་ཤ་ལེམ་མེ་ ཉེ་ཁོར་རེ་ ཀྲོང་ཁྱེར་རྒུ་ནི་ མི་མང་ མང་པོ་ ཛོམ་, མང་པོ་ཞིག་རྒེ་ ནེད་པ་ རྡང་ འགོང་པོ་ ཞུ་རྡེ་ ནག་ ལྟན་ཀན་རྒུན་ ཁྲིད་ཏེ་ ཁྱོང་, ཡང་ པི་ཏྲ་རེ་ ཚང་མ་ ཕན་ཅུག་རྒེ་ ཛེད་།

ཧུ་ཚབ་རྒུན་ལ་ རྡུག་ངལ་ ལྟན་།

17 ཏོ་ ཐོང་འདེ་ ལ་མ་ ཆོན་མོ་ རྡང་ ཁོང་ངེ་ ཁྲོ་པ་ ས་འདུ་ཀི་པ་རྒུན་ལ་ ཕྲ་རྡོག་ མང་པོ་ ཡོྃ་། 18 ཁོང་རྒུ་ནི་ ཧུ་ཚབ་རྒུན་ ཟུམ་ཅུག་ཏེ ཁོང་རྒུན་ ཙོན་ལ་ ཧར་, 19 འིན་ན་ ཚེན་ལ་ ཀོན་འཇོག་རྒེ་ ཕོ་ཉེ་ ཙོན་ཁང་ངེ་ རྒོ་རྒུན་ པེ་རྡེ་ ཁོང་རྒུན་ ཕི་ལོག་ལ་ ཕིང་འདེ་ ཁྱོང་ ཡང་ མོལ་, 20 “ཏ་ ཀོན་འཇོག་རྒེ་ ཁང་པེ་ ཀྱང་ཧོར་རེ་ན་ སོང་འདེ་ མི་རྒུན་ལ་ མི་ཙེ་ སོ་མ་ ཐོབ་ཅེ་ ཁྲིན་འབོ་ སོན་ཏེ་ ཤོད་ཧེ་།”

21 ནམ་ ལང་ངེ་རྡང་, ཁོང་རྒུན་ ཀོན་འཇོག་རྒེ་ ཁང་པེ་ ཀྱང་ཧོར་རེ་ན་ སོང་འདེ་ མོལ་ཧན་ ནང་ཞིན་ ཆོའེ་ཤེད་རྡེ་ ཛེད་། ལ་མ་ ཆོན་མོ་ རྡང་ ཁོང་ངེ་ ཁྲོ་པ་རྒུན་ ལེབ་རྦེ་རྡང་, ཡ་ཧུ་འདཱ་པེ་ ཚོག་འདུའི་ ཡང་ནི་ ཨིས་ར་ཡེལ་ལེ་ འུ་རྐྱོང་རྒུ་ནི་ ཐུའི་མི་ ཚང་མ་ འབོའེ་རྡེ་, ཁོང་རྒུ་ནི་ མག་མི་ ཁ་ཅིག་ ཧུ་ཚབ་རྒུན་ ཁྱོང་ངེ་ལ་ ཙོན་ཁང་ལ་ ལམ་ཅུག་། 22 འིན་ན་ ཏེ་ མག་མི་རྒུན་ ཙོན་ཁང་ལ་ ལེབ་རྦེ་རྡང་ ཁོང་རྒུན་ལ་ ཏུ་རུ་ ཧུ་ཚབ་རྒུན་ མ་ཐོབ་, ཡང་ ལོག་ཏེ་ སོང་འདེ་ འི་ ཧོར་རྦོ་ འུ་རྐྱོང་རྒུན་ལ་ ཤེད་, 23 “ཙོན་ཁང་ངེ་ རྒོ་ ཀུ་ལིག་ ཅུག་ཏེ་ མ་རྟེམ་པོ་ ཅོའེ་རྡེ་ རྒོ་ སྲུང་པ་རྒུན་ རྒོ་རྒུ་ནི་ཀ་ སྲུྃ་རྡེ་ ཡོད་པེན་, འིན་ན་ ང་ཞི་ རྒོ་ པེ་རྡེ་ ནང་ཀུ་ལ་ ལྟོའེ་རྦེ་ སུ་ལ་ མི་འདུག་།” 24 ཏེ་ སྤེ་ར་འབོ་ ཚོར་རེ་རྡང་, ཀོན་འཇོག་རྒེ་ ཁང་པ་ སྲུང་ཀ་ནེ་ མག་སྤོན་ འདང་ ལ་མ་ འུ་རྐྱོང་ ཚང་མ་ ཧ་ལེ་, ཡང་ ཅི་ ཆ་ཅེ་ ནོག་ སམ་འདེ་ ཐེ་ཚོམ་ རྐྱེ་།

25 ཏུ་རུ་ མི་ཞིག་ ཡོྃ་རྡེ་ ཟེར་, “ལྟོའེ་རྡང་, ཁྱི་ཞི་ ཙོན་ལ་ ཧར་ཧན་ནེ་ མི་རྒུ་ནི་ ཀོན་འཇོག་རྒེ་ ཁང་པེ་ ཀྱང་ཧོར་རེ་ན་ མི་རྒུན་ལ་ ཆོའེ་ཤེད་ཏུག་།” 26 ཏེ་ནི་ མག་སྤོན་ མག་མི་རྒུན་ ཉམ་པོ་ སོང་འདེ་ ཧུ་ཚབ་རྒུན་ ཝང་ མ་ཅོ་ལ་ ཁྲིད་ཏེ་ ཁྱོང་, ཅེ་ཟེར་ནི་ མི་རྒུ་ནི་ རྡོ་ རྒྱབ་ཏེ་ སེད་རྡེན་ སམ་འདེ་ ཁོང་རྒུན་ འཇིའི་། 27 ཁོང་རྒུ་ནི་ ཧུ་ཚབ་རྒུན་ ཡ་ཧུ་འདཱ་པེ་ ཐུའི་མི་རྒུ་ནི་ ཚོག་སྤེ་ འདུན་ལ་ ཁྱོང་, ཡང་ ལ་མ་ ཆོན་མེ་ ཁོང་རྒུན་ལ་ ཟེར་, 28 “ང་ཞི་ ཁྱི་ཞ་རྒུན་ལ་ ཡི་ཤུའི་ མིང་ ཁུར་རྡེ་ ཆོའེ་ མ་ཤེད་ ཟེར་རྡེ་ སལ་སྤོ་ ཀཱ་ ཏང་རྦེན་, འིན་ན་ ཁྱི་ཞ་རྒུ་ནི་ ཡེ་རུ་ཤ་ལེམ་ སོན་ཏེ་ན་ ཏེ་ ཆོའེ་རྦོ་ ཕེལ་ ཅུག་ཏོག་, ཡང་ ཁོ་ སེད་ཀ་ནེ་ ཉེད་པོ་ ང་ཞི་ཀ་ ཀལ་ཅེ་ ཙོན་འགྲུའི་ ཅོ་རུག་།”

29 པི་ཏྲར་ རྡང་ ཞེན་ ཧུ་ཚབ་རྒུ་ནི་ ལེན་སལ་, “མི་རྒུ་ནི་ ཁ་ཉེན་ནེ་སང་ ཀོན་འཇོག་རྒེ་ ཁ་ཉེན་རྒོ་ཤེ་ ཁག་ཆེ་ནོག་། 30 ང་ཞི་ ཕ་མེ་པེ་ ཀོན་འཇོག་རྒེ་ ཁྱི་ཞི་ རྐྱང་ཤིང་ངེ་ཀ་ རྐྱང་འདེ་ སེད་ཀ་ནེ་ ཡི་ཤུ་, ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་། 31 ཨིས་ར་ཡེལ་པ་རྒུ་ནི་ རྡིག་པ་ ཅོ་ཀན་རྒུ་ནི་ཀ་ རྡིག་པ་ ཕྃ་རྡེ་ སེམ་འགྱུར་རྡེ་ ཤག་སྤ་ ཐོབ་ཅེ་ཕི་ ཀོན་འཇོག་རྒེ་ ཡི་ཤུ་ རྒྱལ་ལུ་ རྡང་ རྐྱབ་འགོན་ ཅོའོ་ ཛེད་ཏེ་, སི་ཝ་ཅེན་ནི་ ཀོ་ས་, ཆག་ ཡོའེ་སྤེ་ཀ་ པོ་རེ་ ཛེད་། 32 ང་ཞ་ ཏོ་རྒུ་ནི་ སྤང་པོ་ འིན་ ཡང་ ཏམ་པེ་ ཐུག་ཡིད་ཏང་, ཏེ་རྒ་ ཐུག་ཡིད་པོ་ ཀོན་འཇོག་རྒེ་ ཁ་ཉེན་ཀན་རྒུན་ལ་ སལ་ལེ་ ཛེད་།”

33 ཏོ་རྒུན་ ཚོར་རྦེ་ སྲོ་ སྲན་ཀྲེ་ ཡོྃ་རྡེ་ ཁོང་རྒུ་ནི་ ཧུ་ཚབ་རྒུན་ སེད་ཅེ་ སམ་བ་ ཏང་། 34 འིན་ན་ འགཱ་མ་ལི་ཨེལ་ ཟེར་ཧ་ནེ་ པ་རུ་ཤི་པ་ ཆོའེ་ཁྲིམ་ལ་ ཁེ་སྤ་ རྡང་ ཡུལ་མི་ ཚང་མེ་ སི་ཝ་ཅེན་ནེ་ མི་ཞིག་ ཡ་ཧུ་འདཱ་པེ་ ཚོག་འདུའི་ ཕྲོ་ནི་ ལང་འདེ་ ཁོང་རྒུན་ ཙི་རྦི་ཤིག་རྒེ་ཕི་ ཕི་ལོག་ལ་ ཁྱེར་ ཟེར་རྡེ་ ཀཱ་ ཏང་། 35 ཏེ་ནི་ ཁོའེ་ ཁོང་རྒུན་ལ་ ཟེར་, “ངེ་ ཁྲོ་པ་ ཨིས་ར་ཡེལ་པ་རྒུན་ ཁྱི་ཞི་ ཏེ་ མི་རྒུན་ལ་ ཅི་ ཅོ་ནྃ་ སམ་བ་ ཏྃ་རྡེ་ ཅོའེ་ཧེ་, 36 ཅེ་ཟེར་ནི་ འི་སང་ ངུལ་མ་ཞིག་ ཐེའུ་འདཱ་ ཟེར་ཧན་ཞིག་ འབིང་འདེ་ ཁོ་ མ་ ཁག་ཅེན་ མི་ཞིག་ འིན་ཟུན་ ཏྃ་རྦེ་ མི་ ཞིབ་རྒྱ་ ཟམ་ཤིག་ ཁོའེ་ རྒྱབ་ནི་ འགྲྃ་ འིན་ན་ ཁོ་ སེད་། ཏེ་ནི་ ཁོ་ ཆོའོ་ ཅོ་ཀན་ ཚང་མ་ ཡན་འདེ་ ཁོའེ་ ལེ་ཧ་ལ་ འབྲེ་རྦུ་ མ་མིན་། 37 ཏོ་རྦེ་ ལྟིང་ནི་ མི་ཀྲྃ་ སིག་ ཏུའི་ལ་, འགཱ་ལིལ་པ་ ཡུ་འདཱ་ ཟེར་ཧན་ཞིག་ འབིང་འབེན་, ཁོའེ་ རྒྱབ་ནི་ལ་ མི་ མང་པོ་ སོང་, ཁོ་ལ་ སེད་, ཡང་ ཁོ་ འགྲང་ཀན་ ཚང་མ་ ཡན་འདེ་ མེ་ཀན་ སོང་།”

38 “ཏེ་རྒ་རྦེ་ཕི་ལ་ ཏག་ས་ འི་ ནེ་ལུག་པོ་ལ་ ལྟོའེ་རྡེ་ ངེ་ ཁྱི་ཞ་རྒུན་ལ་ ཟི་ཡོན་, ཏེ་ མི་རྒུན་ལ་ ཅང་ མ་ཅོ་ལ་ པུད་ཏོང་, ཀལ་ཏེ་ ཁོང་ངེ་ ལེ་ཧ་རྒུན་ མི་ ཆོག་ནི་ འིན་ནི་ ཏོ་རྒུན་ལ་ འབྲེ་རྦུ་ མི་མིན་། 39 ཀལ་ཏེ་ ཏོ་རྒུན་ ཀོན་འཇོག་ ཆོག་ནི་ འིན་ནི་, ཁྱི་ཞ་ ཁོང་རྒུ་ནི་ ལེ་ཧ་རྦོ་ རྒག་ མི་ཉེན་, མ་ཚེད་ ཁྱི་ཞ་རྒུན་ལ་ ཧ་ཀོ་རྒོའེ་ ཁྱི་ཞི་ ཀོན་འཇོག་རྒེ་ རྒྱཔ་འགལ་ ཅོའེ་རྡེ་ ནོག་།” ཁོང་རྒུ་ནི་ ཁོའེ་ ཟེར་ཧན་འབོ་ལ་ ཁ་ཆམ་།

40 ཏེ་ནི་ ཧུ་ཚབ་རྒུན་ལ་ འབོའེ་ ཡང་ རྟལ་ལྕག་ རྒྱབ་ཅུག་ཏེ་ ཏི་ནི་ཕ་ལ་ ཡི་ཤུའི་ ཚན་ ཁུར་ཏེ་ ཆོའེ་ཤེད་ མི་ཆོག་ ཟེར་རྡེ་ ཁོང་རྒུན་ པུད་ཏང་།

41 ཁོང་རྒུན་ལ་ ཡི་ཤུའི་ ཚན་ནེ་ཀ་ རྡུ་ངལ་ ཁུར་ཤེ་ འོའེ་སྤ་ ཐོབ་ཅེ་ཀ་ནི་, ཁོང་རྒུན་ ཡ་ཧུ་འདཱ་པེ་ ཚོག་འདུའི་ནི་ ཕི་ལོག་ལ་ ཐེད་རྡེན་ འབིང་འདེ་ སོང་། 42 ཁོང་རྒུ་ནི་ ཆོའེ་ཤེད་ཅེ་ མ་ཕང་ལ་ ཞག་ཏང་ ཀོན་འཇོག་རྒེ་ ཁང་པ་ འདང་ ཁང་པ་རྒུན་ལ་ སོང་འདེ་, ཡི་ཤུ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ འིན་ཀན་འབེ་ ཧོར་ལ་ ཆེད་མེད་ལ་ ནེ་ཚུལ་ ཟང་པོ་ ཤེད་།