པི་ཏྲར་ རྡང་ ཡོ་ཧཱ་ནན་ ཚོག་འདུའི་རྡེ་ འདུན་ལ་ ཁྱེར་།
4
པི་ཏྲར་ རྡང་ ཡོ་ཧཱ་ནན་ནེ་ མི་མང་ལ་ ལབ་ཞ་ ས་ལེན་ ཡོད་ཟ་ནི་ ལ་མ་རྒུན་, ཀོན་འཇོག་རྒེ་ ཁང་པ་ སྲུང་ཀ་ནེ་ མག་སྤོན་ འདང་ ས་འདུ་ཀི་པ་རྒུན་ ཏུ་རུ་ ཡོྃ་། 2 ཏེ་ འུ་རྐྱོང་རྒུན་ལ་ སྲོ་ ཡོྃ་རྡེ་ ཡོད་པེན་ ཅེ་ཟེར་ནི་ ཧུ་ཚབ་རྒུ་ནི་ མི་ཚོག་ལ་ ཡི་ཤུ་ རྒྱུད་ཏེ་ ཤི་ཀན་རྒུན་ སོན་པོ་ ལང་ངེ་ ཛེད་ཅེ་ ལབ་ཞ་ སལ་ལེ་ཡོད་པེན་། 3 ཁོང་རྒུ་ནི་ པི་ཏྲར་ རྡང་ ཡོ་ཧཱ་ནན་ ཟུམ་འདེ་ ལྟིང་མ་ཞག་ཚུག་པ་ ཙོན་ཁང་ལ་ ཧར་ཤུག་, ཅེ་ཟེར་ནི་ མུན་ཀྲག་ སོང་ཚར་རྡེ་ ཡོད་པེན་། 4 འིན་ན་ ཁོང་ངེ་ ཆོའེ་ ཚོར་ཧན་ མང་པེ་ ཡི་ཤུའི་ཀ་ ཏེཏ་པ་ ཅོའེ་, ཏེཏ་པ་ཅན་རྒུ་ནི་ ཀྲང་ཧ་ ལྟོང་ང་ ཟམ་ཤིག་ ཡོད་པེན་, ཀ་རྦེ་ན་ པོ་མོ་ རྡང་ ཕྲུ་རྒུ་རྒུན་ མ་ཐེ་ ནོག་།5 ཏེ་ནི་ ལྟིང་མེ་ཞག་ལ་ ཡུལ་ལེ་ སྤོན་འབོ་རྒུན་, འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུན་ ཡེ་རུ་ཤ་ལེམ་ལ་ ཛོམ་། 6 ལ་མ་ ཆོན་མོ་ ཨན་ནཱ་, ཀ་ཡ་ཕཱ་, ལ་མ་ ཆོན་མོའེ་ ཉེན་: ཡོ་ཧཱ་ནན་, ཨ་ལེག་ཟན་འདེར་ རྡང་ ཞེན་རྒུན་ ཏེ་ ཕྲོ་ ཡོད་པེན་། 7 ཁོང་རྒུ་ནི་ པི་ཏྲར་ རྡང་ ཡོ་ཧཱ་ནན་ ཚོག་འདུའི་ འདུན་ལ་ འབོའེ་རྡེ་ འདྲི་, “ཁྱེ་རང་རྒུ་ནི་ སུའི་ ཝང་ངེ་ན་ ཡང་ སུའི་ མིང་ ཁུར་རྡེ་ ཏེ་ ལེ་ཧ་རྒུན་ ཅོའེ་རྡེ་ འིན་?”
8 ཏེ་ནི་ ཏམ་པེ་ ཐུག་ཡིད་རྡེ་ ཀང་འདེ་ པི་ཏྲ་རེ་ ལེན་ཏྃ་, “མི་རྒུ་ནི་ སྤོན་འབོ་ རྡང་ འུ་རྐྱོང་རྒུན་, 9 ང་ཞི་ ཁོ་ཧན་ནེ་ མི་ ཕན་ཅུག་ཏེ་ ལེ་ཧ་ ཟང་པོ་ ཅོ་ཅེ་རྦེ་, ཏི་རིང་ ང་ཞ་ ཏྲི་ཝ་ འདྲི་རག་? ཁོ་ ཀ་ཟུག་རྒེ་ རྒྱལ་, རྒྱུའི་ཆ་ ཉིན་རག་རྒེ་? 10 འི་རྦོ་ ཁྱི་ཞ་ རྡང་ ཨིས་ར་ཡེལ་པ་ ཚང་མེ་ ཤེ་རྒོའེ་, ན་ཙ་རེད་པ་ ཡི་ཤུ་ མ་ཤི་ཀ་ ཁྱི་ཞི་ རྐྱང་ཤིང་ངེ་ཀ་ རྐྱང་ འིན་ན་ ཀོན་འཇོག་རྒེ་ ཁོང་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཀ་ནེ་ ཚན་ནེ་ཀ་ འི་ མིའུ་ ཕན་འདེ་ ཁྱི་ཞི་ འདུན་ལ་ ལྃ་རྡེ་ ནོག་། 11 ཁོང་ངེ་ ཧོར་ལ་ སུང་རབ་རྦེ་ན་ མོལ་རྡེ་ ནོག་,
‘ཀཱ་ རྡོ་རྦོ་ ཁང་པ་ སིག་ཀན་རྒུ་ནི་ ཕན་མི་ཐོག་ ཐེའེ་,
ཏེ་རྒ་ རྡོ་རྦོ་ ཁང་པེ་ ཀྲུར་རྡོ་ འགྱུར་།
ཀ་འབོ་ ཚང་མེ་སང་ ཁག་ཅེན་ རྡོ་འབོ་ ནོག་།’”
12 “ཡི་ཤུ་ མ་ཤི་ཀ་ མ་ཐེ་ལ་ ཞེན་ སུ་ཞིག་ རྒྱུད་ཏེ་ ཨ་ཧོ་ ཐར་སྤ་ མི་ཐོབ་, འཇིག་རྟེན་ སོན་ཏེ་ན་ ཞེན་སུ་ཞིག་ལ་ ཀོན་འཇོག་རྒེ་ ཏེ་ མིང་འབོ་ སལ་ལེ་ མ་ཛེད་, ཀའོ་ རྒྱུད་ཏེ་ ཨ་ཧོ་རྒུན་ལ་ ཐར་པ་ ཐོབ་རྦེན་།”
13 ཏེ་ནི་ ཁོང་རྒུ་ནི་ པི་ཏྲར་ རྡང་ ཡོ་ཧཱ་ནན་ མ་སིལ་ཧན་, ཁེ་སྤ་ མི་ མན་ འིན་ན་ མ་ སེམ་རུའི་ ཉམ་པོ་ སྤང་པོ་ ཏང་ཅེ་ ཐོང་འདེ་ ཧ་ལེ་, ཡང་ ཁོང་ ཉ་ཧ་ ཡི་ཤུའི་ ཁྲོ་པ་ འིན་ཀན་འབོ་ ཧ་ཀོ་། 14 ཁོང་རྒུ་ནི་ ཕན་ཅུག་ཀ་ནེ་ མིའུ་ ཁོང་ ཉམ་པོ་ ལྃ་རྡེ་ ཡོད་པེ་, ཁོང་རྒུན་ལ་ པི་ཏྲར་ རྡང་ ཡོ་ཧཱ་ནན་ནེ་ རྒྱཔ་འགལ་ལ་ ཅང་ ཟེར་ མ་ཉེན་། 15 ཏོ་རྦེ་ཕི་ ཁོང་ ཉ་ཧ་ ཡ་ཧུ་འདཱ་པེ་ ཚོག་འདུའི་ནི་ ཕི་ལོག་ལ་ ཕིང་, ཡང་ ཁོང་རྒུ་ནི་ ཀྲཔ་ ཅོའེ་རྡེ་ ཅིག་ ཏང་ ཅིག་ལ་ འདྲི་, 16 “ཨ་ཧོ་རྒུ་ནི་ འི་ མི་ ཉ་ཧ་ ཅི་ ཅོའེན་? ཏེ་ ལྟའ་རྦོ་ མ་སོང་ ཨ་ཧོའེ་ ཟེར་ མི་ཉེན་ ཅེ་ཟེར་ནི་ ཁོང་རྒུ་ནི་ ཧ་ལེ་ཤེ་ ཛེད་པེ་ ལྟན་ཀན་འབོ་ ཡེ་རུ་ཤ་ལེམ་པ་ ཚང་མ་ལ་ རྒྱུའི་ནོག་། 17 འིན་ན་ ཡི་ཤུའི་ ཧོར་ལ་ ཁྲིན་འབོ་ མི་མང་ངེ་ན་ ཏ་རུང་ལ་ མི་ རྒྱེ་ཅེ་ཕི་ ཨ་ཧོའེ་ ཁོང་ ཉ་ཧ་ ཏི་ནི་ཕ་ལ་ ཡི་ཤུའི་ མིང་ ཁུར་རྡེ་ ཆོའེ་ཤེད་ མི་ཆོག་ ཟེར་ཏེ་ ཀཱ་ ཏང་ངེན་།” 18 ཏེ་ནི་ ཁོང་ ཉ་ཧ་ འབོའེ་རྡེ་ ཡི་ཤུའི་ ཧོར་ལ་ སུ་ལ་ སྤེ་ར་ ཡང་ ཆོའེ་ཤེད་ མི་ཆོག་ ཟེར་རྡེ་ ཀཱ་ ཏང་།
19 འིན་ན་ པི་ཏྲར་ རྡང་ ཡོ་ཧཱ་ནན་ནེ་ ཁོང་རྒུན་ལ་ མོལ་, “ཁྱི་ཞི་ ཅི་ ས་མེ་རག་, ཀོན་འཇོག་རྒེ་ ཧུ་འདུན་ལ་ ཀ་འབོ་ ཀྲང་པོ་ ནོག་, ཁོང་ངེ་ ཀཱ་ ཁ་ཉེན་ཅེའོ་ ནོག་རྒེ་ ཡ་ ཁྱི་ཞི་ ཀཱ་ ཁ་ཉེན་ཅེའོ་? 20 ང་ཞི་ ཐོང་ཀན་ འདང་ ཚོར་ཧན་རྒུན་ མི་རྒུན་ལ་ མ་ཤེད་རྡེ་འདེད་ ཉེན་ཅེ་ མེད་།”
21 ཏེ་ སོང་ཀན་འབོ་ ཐོང་འདེ་ མི་ ཚང་མེ་ ཀོན་འཇོག་ལ་ རྟོད་པ་ པུལ་རྦེ་, མི་རྒུ་ནི་ ཟི་ངིལ་ མ་ཕིང་ལ་ ཡ་ཧུ་འདཱ་པེ་ ཚོག་འདུའི་ ཁོང་ ཉ་ཧ་ ཆེད་པ་ ཀ་ཟུག་ཤིག་ ཅད་ཅེའོ་ ཐག་ཅེད་ མ་ཉེན་། ཏེ་རྒ་རྦོ་ཕི་ལ་ ཁོང་རྒུ་ནི་ སྤང་པུད་ཏེ་ ཁོང་ ཉ་ཧ་ པུད་ཏང་། 22 ཧ་ལེ་ཤེ་ ཛེད་པ་ ཛེད་ཏེ་ ཕན་ཅུག་ཀ་ནེ་ མི་རྦོ་ལ་ ལོ་ ཞིབ་ཅུ་སང་ མང་ངེ་ ཆ་ཡོད་པེན་།
ཏེཏ་པ་ཅན་རྒུ་ནི་ མོ་ལམ་།
23 ཁོང་ ཉ་ཧ་ པུད་ཏེ་ ལྟིང་ནི་ ཞེན་ ཏེཏ་པ་ཅེན་ སྤུན་རྒུ་ནི་ ཕྲོ་ སོང་ ཡང་ ལ་མ་ ཆོན་མོ་ རྡང་ འུ་རྐྱོང་རྒུ་ནི་ ཟེར་ཧན་ ཚང་མ་ ཁོང་རྒུན་ལ་ ཤེད་། 24 ཁོང་རྒུ་ནི་ ཏོ་ ཚོར་རེ་རྡང་ ཚང་མེ་ ཧད་ ཆོན་མེ་ན་ ཀོན་འཇོག་ལ་ མོ་ལམ་ ཞུའི་, “ཀྱེ་ ཙོབོ་, ཉེ་རང་ངེ་ ནམ་ཀ་, འཇིག་རྟེན་, རྒྱམ་ཚོ་ རྡང་ ཏོ་རྒུ་ནི་ན་ ཡོ་ཀན་ ཚང་མ་ ཛེད་ཏེ་ འིན་། 25 ཏམ་པེ་ ཐུག་ཡིད་ རྒྱུད་ཏེ་ ཉེ་རང་ངེ་ ཡོག་པོ་ ང་ཞི་ ཕ་མེ་པོ་ རྒྱ་སྤོ་ འདཱ་འབིད་རྡེ་ ཞལ་ནི་ མོལ་,
‘རྒྱལ་ཁབ་རྒུན་ལ་ སྲོ་ སྲན་ཀྲེ་ ཅེ་ ཡོང་ངེ་ནོག་།
མི་རྒུ་ནི་ ཀོན་འཇོག་རྒེ་ རྒྱབ་འགལ་ལ་ ཅུའི་ངན་ ཅེ་ ལྡིང་ངེ་ནོག་།
26 ཙོབོ་ ཀོན་འཇོག་ ཏང་ ཁོང་ངེ་ འདམ་མེ་ ཛེད་ཀན་ནེ་ མ་ཤི་ཀེ་ རྒྱཔ་འགལ་ལ་,
འཇིག་རྟེན་ནེ་ རྒྱ་སྤོ་རྒུན་ མག་རྒེ་ཕི་ ཀྲལ་འགྲིག་ ཏུག་,
ཡང་ ཝང་སྲུལ་པ་རྒུན་ ཛོམ་འདེ་ འདུག་།’”
27 “ནེན་ཏེན་ལ་ འི་ རྒྱལ་སེ་ན་ རྒྱ་སྤོ་ ཧེ་རོད་ ཏང་ རོམ་མེ་ ཀ་ལོན་ པོན་ཏིའུ་པི་ལ་ཏུ་, ཡ་ཧུ་འདཱ་པ་ མན་ཀན་རྒུན་ འདང་ ཨིས་ར་ཡེལ་པ་རྒུན་ ཉམ་པོ་ ཛོམ་འདེ་ ཉེ་རང་ངེ་ འདམ་མེ་ ཛེད་ཀན་ ཏམ་པེ་ ཞབ་རྟོག་པ་ ཡི་ཤུའི་ རྒྱཔ་འགལ་ལ་ ཅུའི་ངན་ ལྡིང་། 28 ཁོང་རྒུ་ནི་ མ་ཤི་ཀ་ ཅོའེ་ཧན་འབོ་ ཉེ་རང་ངེ་ ཝང་ འདང་ ཐུག་འདོད་ ནང་ཞིན་ ངུལ་ལ་ ཐག་ཅེད་རྡེ་ ཛེད་ཏེ་ འིན་འབེན་། 29 ཀྱེ་ ཙོབོ་, ཏ་ ཁོང་རྒུ་ནི་ རྡམ་ཞག་ ཏང་ཀན་འབོ་ སན་ནེ་ ཛེད་ཏེ་ ང་ཞ་ ཉེ་རང་ངེ་ ཡོག་པོ་རྒུན་ལ་ ཉེ་རང་ངེ་ ཏམ་པེ་ ཀའ་ ཧམ་བ་ ཉམ་པོ་ ཤེད་ཅེ་ ཤེད་ སལ་། 30 ཉེ་རང་ངེ་ ཆག་ རྐྱང་ངེ་ ཛེད་ཏེ་ རྒྱལ་ཅུག་ཅེ་, ཉེ་རང་ངེ་ ཏམ་པེ་ ཞབ་རྟོག་པ་ ཡི་ཤུའི་ ཚན་ ཝང་ཅེན་ནེ་ན་ ཧ་ལེ་ཤེ་ ཛེད་པ་ རྡང་ ལྟའ་རྒུན་ ཅོའོ་ ཛེད་།”
31 མོ་ལམ་ ཏབ་ ཚར་རེ་རྡང་ ཁོང་རྒུན་ ཛོམ་འདེ་ ཡོ་ཀ་ནེ་ ནང་འབོ་ རྒུལ་ལེ་ ཛེད་། ཚང་མ་ ཏམ་པེ་ ཐུག་ཡིད་རྡེ་ ཀང་འདེ་ ཀོན་འཇོག་རྒེ་ ཀའ་ ཧམ་མ་ ཉམ་པོ་ ཤེད་།
ཏེཏ་པ་ཅན་རྒུ་ནི་ ནོར་རྒུན་ རྒོའེ་རྡེ་ ཏང་།
32 ཏེཏ་པ་ཅེན་ ཚང་མ་ ཉིང་སེམ་ ཐུན་འདེ་ སུ་ཞིག་ལ་ རང་ངེ་ ནོར་རྦོ་ ང་རང་ངེ་ འིན་ མ་ཟེ་རེ་ལ་ ཅི་ཚང་མ་ ཞེན་མ་རྒུན་ ཉམ་པོ་ རྒོ་ཡོད་པེན་། 33 ཧུ་ཚབ་རྒུ་ནི་ ཤུག་ ཆོན་མོ་ ཉམ་པོ་ ཙོབོ་ ཡི་ཤུ་ ཤི་ཀན་རྒུ་ནི་ ཕྲོ་ནི་ སོན་པོ་ ཞང་ཧན་འབེ་ སྤང་པོ་ ཏང་ ཡང་ ཚང་མེ་ཀ་ ཐུག་ཞེ་ ཆོན་མོ་ པབ་། 34 ཁོང་རྒུ་ནི་ ཕྲོ་ནི་ རྒོའེ་ཤེ་ཅེན་ སུ་ལ་ མེད་འབེན་, ཅེ་ཟེར་ནི་ ཞིང་ ཡང་ ཁང་པ་ ཡོ་ཀན་རྒུ་ནི་ ཏོ་རྒུན་ ཙོྃ་རྡེ་ 35 ཧུ་ཚབ་རྒུ་ནི་ ཞབ་རྦེ་ འདུན་ལ་ ཏེ་ མུལ་རྒུན་ པུ་ལེ་ཡོད་པེན་། ཏེ་ནི་ ཁོང་རྒུ་ནི་ རྒོའེ་ཤེ་ ནང་ཞིན་ ཏོ་ ཚང་མ་ལ་ རྒོའེ་རྡེ་ སལ་ལེ་ཡོད་པེན་།