ཆག་ལེ་རྒུན་ 3

འགྲུལ་ མ་ཉེན་ཀན་ ལང་ཀན་ཞིག་ ཕན་ཅུག་རྒེ་ ཛེད་།

ཞག་ཤིག་ ཉི་མེ་ ཆུ་ཙོད་ སུམ་པ་ མོ་ལམ་ ཞུ་ཅེ་ ཏུའི་རྦེ་ཀ་ པི་ཏྲར་ འདང་ ཡོ་ཧཱ་ནན་ ཀོན་འཇོག་རྒེ་ ཁང་པ་ལ་ རྐྱོད་། 2 རྐྱེ་རྦ་ནི་ཕ་ལ་ ཞ་འོ་ མི་ཞིག་ ཀོན་འཇོག་རྒེ་ ཁང་པེ་ རྡེ་མོ་ ཟེར་ཧ་ནེ་ རྒྱེ་རྒོའེ་ཀ་ ཞག་ཏང་ ཀོན་འཇོག་རྒེ་ ཁང་པ་ལ་ ཆ་ཀན་རྒུ་ནི་ཀ་ནི་ ལང་ངེ་ལ་ ཁྱོྃ་རྡེ་ པོ་རེ་ཡོད་པེན་། 3 ཁོའེ་ པི་ཏྲར་ རྡང་ ཡོ་ཧཱ་ནན་ ཀོན་འཇོག་རྒེ་ ཁང་པ་ལ་ ཆ་ ཐོང་འདེ་ ཁོང་ལ་ མུལ་ ཏོང་ ཟེ་རེན་ ལང་།

4 པི་ཏྲར་ རྡང་ ཡོ་ཧཱ་ནན་ནི་ ཁོ་ ཆོག་ལ་ མིག་ ནེན་ཏེན་ ལྟོའེ་ ཡང་ པི་ཏྲ་རེ་ མོལ་, “ང་ཞ་ ལྟོའེ་།” 5 ཁོའེ་ མུལ་ ཏང་ངེ་ནོག་ སམ་འདེ་ ཁོང་རྒུན་ལ་ ལྟོའེ་རྡེ་ འདེད་། 6 ཏེ་ནི་ པི་ཏྲ་རེ་ མོལ་, “སེར་ རྡང་ མུལ་རྦོ་ ང་ མེད་, ང་ ཡོ་ཀན་འབོ་ ཁྱེ་རང་ལ་ ཏང་ངེན་, ན་ཙ་རེད་པ་ ཡི་ཤུ་ མ་ཤི་ཀེ་ ཚན་ནེ་ཀ་ ལྃ་རྡེ་ འགྲུལ་།”

7 པི་ཏྲ་རེ་ ཁོའེ་ ལག་པ་ ཡོའེ་སྤ་ ཟུམ་འདེ་ ཁོ་ ལང་ངེ་ལ་ ཡ་ཏོ་ ཅོའེ་, ཏེ་རྒ་མ་རྒ་ ཁོའེ་ ཧང་པ་ རྡང་ ཧང་ཚིག་ ཚང་མ་ ཕན་འདེ་ ཤེད་ཅེན་ འགྱུར་། 8 ཁོ་ ཆོྃ་རྡེ་ ཀོའག་ ལང་ ཡང་ འགྲུལ་ཤེ་ འགོ་ཟུག་། ཏེ་ནི་ ཁོ་ ཆོང་ངེན་, འགྲུ་ལེན་, ཀོན་འཇོག་ལ་ རྟོད་པ་ པུ་ལེན་, ཁོང་རྒུན་ ཉམ་པོ་ ཀོན་འཇོག་རྒེ་ ཁང་པ་ལ་ སོང་།

9 མི་ཚང་མེ་ ཁོ་ འགྲུ་ལེན་, ཀོན་འཇོག་ལ་ རྟོད་པ་ པུ་ལེན་ ཐོང་འདེ་ 10 ཀོན་འཇོག་རྒེ་ ཁང་པེ་ རྡེ་མོ་ ཟེར་ཧ་ནེ་ རྒྱེ་རྒོའེ་ འདུན་ལ་ འདེད་ཀ་ནེ་ ལང་ཀན་ འིན་ཀན་འབོ་ ངོ་ཤེ་། ཡང་ ཁོའེ་ ཏུ་ཟུག་ ཅོའེན་ ཐོང་འབེ་ ཁོང་རྒུན་ ཧ་ལེ་རྡེ་ ཧ་ན་ཆོ་ནེ་ སོང་། 11 ཏེ་ མི་རྦེ་ པི་ཏྲར་ རྡང་ ཡོ་ཧཱ་ནན་ནེ་ ལག་པ་ ཐམ་འདེ་ ཡོད་ཟ་ནི་, མི་ཚང་མ་ ཧ་ལེ་རྡེ་ ཁོང་རྒུན་ ཡོད་སེ་, ཀོན་འཇོག་རྒེ་ ཁང་པེ་ན་ སོ་ལོ་མོན་ནེ་ ཡབ་ ཟེར་སེ་ མལ་ལེ་ཀ་ རྒྱུག་ཏེ་ ཡོྃ་།

པི་ཏྲ་རེ་ ཀོན་འཇོག་རྒེ་ ཁང་པེ་ན་ ཆོའེ་ སལ་།

12 པི་ཏྲ་རེ་ མི་མང་རྒུན་ ཛོམ་མེ་ ཐོང་འདེ་ མོལ་, “ཨིས་ར་ཡེལ་པ་རྒུན་, ཁྱི་ཞ་རྒུན་ ཅེ་ ཧ་ལེ་རྡེ་ འིན་? ང་ཞ་རང་ངེ་ ཤུག་ ཡང་ ང་ཞ་ རྒྱ་ལེ་ ཡོད་ཅེ་རྦེ་, འི་ མིའུ་ འགྲུལ་ཤུག་ ཉེན་འདེ་ ནོག་ སམ་ཏེ་ ང་ཞ་ ཅེ་ ལྟོའེ་རྡེ་ འདེད་རྡེ་ཡོད་། 13 ཨབ་ར་ཧམ་, ཨི་སཱག་, ཡ་ཀུབ་རྦེ་ ཀོན་འཇོག་, ཨ་ཧོའེ་ ཕ་མེ་པོ་རྒུ་ནི་ ཀོན་འཇོག་རྒེ་ ཁོང་ངེ་ ཞབ་རྟོག་པ་ ཡི་ཤུ་ སྤལ་ སལ་ལེ་ ཛེད་། འིན་ན་ ཁྱི་ཞ་རྒུ་ནི་ ཁོང་ ཟུམ་འདེ་ འགྲ་ཝེ་ ལག་ལ་ སེད་རྡེ་ ཏང་, ཡང་ པི་ལ་ཏུ་ ཁོང་ པུད་ཅེ་ ཐག་ཅེད་ནང་, ཁྱི་ཞ་རྒུ་ནི་ པི་ལ་ཏུ་ འདུན་ལ་ ཁོང་ ང་ཞི་ རྒྱ་སྤོ་ མན་ ཟེར་། 14 ཁྱི་ཞ་རྒུ་ནི་ ཏམ་པ་ རྡང་ ཀྲང་པོ་ འིན་ཀན་འབོ་ ཕང་ཏེ་ པི་ལ་ཏུ་ལ་ ཁྱི་ཞི་ཕི་ མི་སེད་ཞིག་ པུད་ཅེ་ལ་ ཞུ་ཝ་ པུལ་། 15 ང་ཞི་ སྤང་པོ་ ཏང་ངེ་ཡོད་, ཁྱི་ཞི་ སྲོག་ སལ་ཧན་འབོ་ སེད་, འིན་ན་ ཀོན་འཇོག་རྒེ་ ཁོང་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཏེ་ ནོག་།”

16 “ཡི་ཤུའི་ ཚན་ནེ་ཀ་ ཏེཏ་པ་ ཅོ་ཅེ་རྦེ་ ཁྱི་ཞི་ ཐོང་འདེ་ ངོ་ཤེ་ཧ་ནེ་ འི་ མིའུ་ ཤེད་ཅེན་ ཅོའོ་ ཛེད་། ཡི་ཤུའི་ན་ ཏེཏ་པ་ ཅོ་ཅེ་རྦེ་ འི་ མི་རྦེ་ ཟུྃ་སྤོ་ རྒྱལ་རྡེ་ ཤེད་ཅེན་ འགྱུར་ཧན་འབོ་ ཁྱི་ཞ་ ཚང་མེ་ ཐོང་ ཉེན་ཏེ་ ནོག་།”

17 “ཏ་ ངེ་ སྤུན་རྒུན་ ང་ རྒྱུའི་ཡོད་, ཁྱི་ཞ་ རྡང་ ཁྱི་ཞི་ འུ་རྐྱོང་རྒུ་ནི་ ཡི་ཤུ་ ཉམ་པོ་ ཅོ་ཀན་རྒུན་ ཁོང་ སུ་ འིན་ཀན་འབོ་ མི་ཤེ་ཧན་ ཅོའེ་རྡེ་ འིན་འབེན་། 18 འིན་ན་ ཀོན་འཇོག་རྒེ་ ངུལ་མེ་ ལུང་རྟོན་པ་ ཚང་མ་ རྒྱུད་ཏེ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ རྡུ་ངལ་ ཉོང་རྒོའེ་རྡེན་ མོལ་ཧན་འབོ་ ཀྲུཔ་ཅུག་རྒེ་ ཛེད་། 19 རྡིག་པ་ སེལ་ལེ་ ཛེད་ཅེ་ཕི་ ཁྱི་ཞ་ རང་ངེ་ རྡིག་པ་ ཕྃ་རྡེ་ སེམ་འགྱུར་རྡེ་ ཀོན་འཇོག་ ཆོག་ལ་ ལོག་ཏེ་ ཤོག་ཧེ་། 20 ཏེ་ནི་ ཁྱི་ཞ་ རྡང་ ཙོབོ་རྡེ་ན་ འབྲེལ་ ཡོད་ཅེ་རྦེ་, ཁྱི་ཞི་ སེམ་ལ་ སེམ་རུའི་ ཐོབ་ཏེ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་, ཡི་ཤུ་ ཡང་ ཁྱི་ཞི་ཀ་ ཀ་ལེ་ ཛེ་རྡེན་། 21 ཏུའི་ མང་པེ་ ངུལ་ལ་ ཏམ་པེ་ ལུང་རྟོན་པ་རྒུན་ རྒྱུད་ཏེ་ མོལ་ལེ་ ཛེད་ཀན་ ནང་ཞིན་ ཡི་ཤུ་ ཏེ་ཏེ་ཚུག་པ་ རྡེ་བ་ཅན་ ཞུ་རྒོའེ་རྡེན་ ནམ་ཚུག་པ་ ཀོན་འཇོག་རྒེ་ ཛེད་ཀན་ ཚང་མ་ ཡང་ སོ་མ་ མི་ཛེད་། 22 ལུང་རྟོན་པ་ མོ་ཤེ་ མོལ་, ‘ཙོབོ་ ཁྱི་ཞི་ ཀོན་འཇོག་རྒེ་ ཁྱི་ཞ་རྒུ་ནི་ཕི་ ང་ ཙོག་སེ་ ཁྱི་ཞ་རང་ངེ་ སྤུན་རྒུ་ནི་ ཕྲོ་ནི་ ལུང་རྟོན་པ་ཞིག་ ཀ་ལེ་ ཛེ་རྡེན་། ཡང་ ཁྱི་ཞ་རྒུ་ནི་ ཁོང་ངེ་ མོལ་ཧན་ ཚང་མ་ ཁ་ཉེན་རྒོའེ་། 23 ཏེ་ ལུང་རྟོན་པེ་ ཁ་ མི་ཉེན་ཀན་འབོ་ ཀོན་འཇོག་རྒེ་ མི་རྒུ་ནི་ ཕྲོ་ནི་ པེ་རྡེ་ མེ་ཀན་ ཅོའོ་ ཛེད་རྡེན་།’”

24 པི་ཏྲ་རེ་ ཏ་རུང་ང་ མོལ་, “ཤ་མུ་ཨེལ་ནི་ འགོ་ཟུག་ཏེ་ ལུང་རྟོན་པ་ ཚང་མེ་, འི་ ཞག་རྒུ་ནི་ ཧོར་ལ་ ལུང་རྟན་ ཤེད་རྡེ་ ཛེད་། 25 ཁྱི་ཞ་ ལུང་རྟོན་པ་རྒུ་ནི་ ཞལ་ཆེཏ་རྒུན་ ནོར་ཧལ་ ཐོབ་ཅེ་ཅེན་ ཡང་ ཀོན་འཇོག་རྒེ་ ཁྱི་ཞི་ ཕ་མེ་པོ་རྒུན་ ཉམ་པོ་ ཆེཏ་ཏོན་ ཛེད་ཀན་འབེ་ན་ ཁྱི་ཞ་ ཐེའེ་རྡེ་ ནོག་, ཀ་ཟུག་ ཀོན་འཇོག་རྒེ་ ཨབ་ར་ཧམ་ལ་ མོལ་ལེ་ ཛེད་, ‘ངེ་ ཁྱེ་རང་ངེ་ ཕར་རྒྱུད་རྒུན་ རྒྱུད་ཏེ་ འཇིག་རྟེན་པ་རྒུན་ལ་ ཅིན་ལབ་ ཏང་ངེན་།’ 26 ཀོན་འཇོག་རྒེ་ ཁོ་རང་ངེ་ ཞབ་རྟོག་པ་, ཡི་ཤུ་ སོན་པོ་ ལང་ངེ་ ཛེད་ཏེ་ ཁྱི་ཞ་རང་ངེ་ ངན་པེ་ ལམ་རྒུན་ ཕང་ ཉེན་ཅེ་ ཅིན་ལབ་ སལ་ཅེ་ལ་ ཁོང་ འགོ་མ་རང་ ཁྱི་ཞ་རྒུ་ནི་ཀ་ ཀ་ལེ་ ཛེད་།”