ཆག་ལེ་རྒུན་ 2

ཏེཏ་པ་ཅན་རྒུ་ནི་ཀ་ ཏམ་པེ་ ཐུག་ཡིད་ པབ་།

པེན་ཏི་ཀོ་སེ་ ཏུའི་ཤེན་ནེ་ ཞག་ལ་ ཁོང་ ཚང་མ་ ཁང་པ་ཞིག་རྒེ་ན་ ཛོམ་འདེ་ ཡོད་ཟ་ནེ་ 2 ཧུན་མེད་ལ་ ནམ་ཀ་ནི་ ལུང་ཀྲག་ ཀྲག་པེ་ ཧད་ ཙོག་སེ་ ཡོྃ་རྡེ་ ཁོང་ ཚང་མ་ ཛོམ་འདེ་ ཡོ་ཀ་ནེ་ ཁང་པ་འབོ་ ཀང་། 3 ཏེ་ནི་ ཁོང་རྒུན་ལ་ མེ་ མེ་ལྗབ་ ཙོག་སེ་ མང་པོ་ ཐོང་ ཀཱ་རྒུན་ སོ་སོ་ པེ་རྡེ་ ཁོང་ རེ་རེ་ཀ་ པབ་། 4 ཁོང་ ཚང་མ་ ཏམ་པེ་ ཐུག་ཡིད་རྡེ་ ཀང་ ཡང་ ཐུག་ཡིད་རྡེ་ ཁོང་རྒུན་ལ་ ཁྱུད་ སལ་ཅེ་འབོ་, ཁོང་རྒུ་ནི་ ཧད་ སོ་སོའེ་ན་ སྤེ་ར་ ཏང་ཅེ་ འགོ་ཟུག་།

5 ཏེ་ཏུའི་ལ་ ཀོན་འཇོག་ལ་ ཏེཏ་པ་ ཅོ་ཀ་ནེ་ ཡ་ཧུ་འདཱ་པ་རྒུན་ འཇིག་རྟེན་ནེ་ ཆོག་ ཚང་མ་ནི་ ཡོྃ་རྡེ་, ཡེ་རུ་ཤ་ལེམ་ལ་ ཛོམ་ཏེ་ ཡོད་པེན་། 6 ཏེ་ ཧད་རྒུན་ ཚོར་རེ་རྡང་ མི་ མང་པོ་ ཛོམ་, ཡང་ ཚང་མ་ ཧ་ལེ་རྡེ་ ཧན་ཧོན་ སོང་ ཅེ་ཟེར་ནི་ ཁོང་ ཚང་མེ་ ཁོ་རང་རྒུ་ནི་ ཧད་རྡེ་ན་ ལོབ་ཀྲུག་རྒུ་ནི་ སྤེ་ར་ ཏང་ངེན་ ཚོར་།

7 ཁོང་རྒུན་ མ་སྲན་ཀྲེ་ ཧ་ལེ་རྡེ་ ཅིག་ ཏང་ ཅིག་ལ་ ཟེར་, “ཉོན་ནྃ་, འི་ སྤེ་ར་ ཏང་ཀན་ ཚང་མ་ འགཱ་ལིལ་པ་ མ་ནོག་རྒེ་? 8 ཏེ་ནི་ ཀ་ཟུག་རྒེ་ ཁོང་རྒུ་ནི་ ཨ་ཧོ་ རེ་རེ་ ཧད་རྡེ་ན་ སྤེ་ར་ ཏང་ངེན་ ཚོར་རེ་ནོག་། 9 ཨ་ཧོ་རྒུ་ནི་ ཕྲོ་ པར་ཐ་པ་, མེད་ཡེ་པ་, ཨེ་ལམ་པ་, མེ་སོ་པོ་ཏྲོ་མི་ཡཱ་པ་, ཡ་ཧུ་འདཱ་པ་, ཀ་པ་འདོ་ཀི་ཡཱ་པ་, པོན་ཏུ་པ་, ཨ་སི་ཡཱ་པ་, 10 ཕི་རི་ཀི་ཡཱ་པ་, པམ་ཕི་ལི་ཡཱ་པ་, ཨི་འཇིབ་པ་, ཀི་རིན་ནི་ ཉེ་མོ་ ཡོ་ཀ་ནེ་ ལིབ་ཡཱ་པ་, རོམ་མེ་ རྒྱལ་སེ་ པེ་སྤ་, 11 ཡ་ཧུ་འདཱ་པ་ རྡང་ ཡ་ཧུ་འདཱ་པེ་ ཆོའེ་ལ་ ཏེཏ་པ་ ཅོ་ཀན་ ཡ་ཧུ་འདཱ་པ་ མན་ཀན་རྒུན་ ཡང་ ཀེརེ་ཏ་པ་ རྡང་ ཨ་ར་འབི་ཡ་པ་རྒུན་ ཡོད་ཏེ་ མ་ནོག་རྒེ་? འིན་ན་ ཨ་ཧོ་རྒུན་ལ་ འི་ མི་རྒུ་ནི་ ཨ་ཧོ་རང་ངེ་ ཧད་རྡེ་ན་ ཀོན་འཇོག་རྒེ་ ཧ་ལེ་ཤེ་ ཆག་ལེ་རྒུན་ ཤེད་རྡེན་ ཚོར་རེན་ ནོག་།” 12 ཁོང་ ཚང་མ་ ཧ་ལེ་རྡེ་ ཐེ་ཚོམ་ སོང་འདེ་ ཅིག་ ཏང་ ཅིག་ལ་, “འི་ ནེ་ལུག་རྒེ་ ཏོན་འབོ་ ཅི་ ནོག་?” ཟེ་རེན་ འདྲི་།

13 ཞེན་ ཁ་ཅིག་རྒེ་ ཁྲེལ་རྒོད་ ཏང་ངེན་ ཟེར་, “ཡུ་རྒུན་ ཆང་ མང་པོ་ ཐུང་རྡེ་ ར་རོའེ་རྡེ་ འི་ནོག་།”

ཧུ་ཚབ་ པི་ཏྲ་རེ་ མི་ཚོག་ལ་ ཧ་ཀོ་ཅུག་རྒེ་ ཛེད་།

14 ཏེ་ནི་ པི་ཏྲར་ ཧུ་ཚབ་ ཅུག་ཤིག་པ་ ཉམ་པོ་ མི་ཚོག་རྡེ་ འདུན་ལ་ རྐྱོད་ཏེ་ ཧད་ ཆོན་མེ་ ནང་ མོལ་, “ཡ་ཧུ་འདཱ་པ་ རྡང་ ཡེ་རུ་ཤ་ལེམ་ལ་ འདེད་ཀན་རྒུན་ ངེ་ ཟེར་ཤེ་ཅེན་འབོ་ལ་ རྒྱ་ལེ་ ཅོའེ་རྡེ་ ཉོན་ཧེ་། འི་ སོང་ཀན་རྒུན་ ངེ་ ཁྱི་ཞ་ ཧ་ཀོ་ཅུག་རྒེན་, 15 ཁྱི་ཞི་ འི་ མི་རྒུན་ ར་རོའེ་རྡེ་ནོག་ སམ་ཀན་འབོ་ ཀྲང་པོ་ མག་, ལྟོའེ་རྡང་ ང་ཏོག་རྒེ་ ཆུ་ཙོད་ རྒུ་པ་ མ་ནི་ ཆ་ མི་འདུག་། 16 འིན་ན་ ཏུའི་ མང་པེ་ ངུལ་ལ་ ཡུ་རྦེ་ ཧོར་ལ་ ལུང་རྟོན་པ་ ཡོ་ཨེལ་ལེ་ མོལ་,

17 ཙོབོ་ ཀོན་འཇོག་རྒེ་ མོལ་, ‘ཐ་མེ་ ཏུའི་ལ་

ངེ་ ང་རང་ངེ་ སེམ་ཡིད་ མི་ཚང་མེ་ཀ་ ལུག་རྒེན་།

ཡང་ ཁྱི་ཞི་ པུ་ཙ་ རྡང་ པོ་མོ་རྒུ་ནི་ ལུང་རྟན་ ཏང་ངེན་།

ཁྱི་ཞི་ ཁྱོག་ཏོང་རྒུ་ནི་ ཞལ་ཟིག་ ཐོང་ངེན་,

ཡང་ ཁྱི་ཞི་ རྒད་པོ་རྒུན་ལ་ ཉི་ལམ་ ཐོང་ངེན་།

18 ཡང་ ངེ་ ཏེ་རྒ་ ཏུའི་ལ་ ངེ་ ཡོག་པོ་

རྡང་ ཡོག་མོ་རྒུ་ནི་ཀ་ ང་རང་ངེ་ སེམ་ཡིད་ ལུག་རྒེན་།

ཡང་ ཏོ་རྒུ་ནི་ ལུང་རྟན་ ཤ་རྡེན་།

19 ངེ་ ནམ་ཀེ་ན་ ཧ་ལེ་ཤེ་ ལེ་ཧ་ རྡང་

འཇིག་རྟེན་ནེ་ཀ་ ལྟའ་རྒུན་ ལྟན་ནེན་,

ཏོ་རྒུན་ ཁྲག་, མེ་ རྡང་ ཏུད་པ་ ནག་པོ་རྒུན་ འིན་།

20 ཙོབོ་ ཀོན་འཇོག་རྒེ་ ཁག་ཅེན་ འདང་ སྤལ་ཅེན་ནེ་ ཞག་པོ་ ཆ་སང་

ངུལ་ལ་ ཉི་མ་ མུན་ཀྲག་ ཆེན་

ཡང་ ལྡ་ཝ་ ཁྲག་ ཙོག་སེ་ མར་སྤོ་ འགྱུ་རེན་།

21 འིན་ན་ ཙོབོ་རྡེ་ ཚན་ ཁུར་ཀན་ ཚང་མ་

ཐར་པ་ ཐོབ་རྦེན་།’”

22 “ཏ་ ཁྱི་ཞ་ ཨིས་ར་ཡེལ་པ་རྒུན་ ངེ་ སྤེ་ར་ ཉོན་ཧེ་། ཁྱི་ཞ་རྒུན་ལ་ རྒྱུའི་ནོག་ ཀོན་འཇོག་རྒེ་ ཡི་ཤུ་ རྒྱུད་ཏེ་ ཤུག་ཤེན་ ཆག་ལེ་, ཧ་ལེ་ཤེ་ ཛེད་པ་ རྡང་ ལྟའ་རྒུན་ ཛེད་ཏེ་ ཁོང་ངེ་ ན་ཙ་རེད་པ་ ཡི་ཤུ་ ཀལ་ལེ་ ཛེད་ཏེ་ འིན་ཀན་འབོ་ ལྟན་ནེ་ ཛེད་། 23 ཀོན་འཇོག་རྒེ་ ཆ་ཅེ་ཅེན་རྒུན་ ཁྱེན་འདེ་ ཁོང་རང་ངེ་ ཐབ་ ནང་ཞིན་ ཡི་ཤུ་ ཁྱི་ཞ་རྒུ་ནི་ ལག་ལ་ ལྟེད་ཅུག་ ཡང་ ཀོན་འཇོག་རྒེ་ ཁྲིམ་ ཁ་ མ་ཉེན་ཀན་རྒུ་ནི་ ཡ་ཏོ་ ཉམ་པོ་ ཁྱི་ཞ་རྒུ་ནི་ ཁོང་ རྐྱང་ཤིང་ངེ་ཀ་ རྐྱང་ཅུག་ཏེ་ སེད་། 24 འིན་ན་ ཀོན་འཇོག་རྒེ་ ཁོང་ ཤི་རྡེ་ རྡུ་ངལ་ལེ་ན་ ལུའི་ མ་ཤུག་རྒེ་ལ་ སོན་པོ་ ལང་ངེ་ ཛེད་, ཅེ་ཞུ་ནི་ ཤི་ཅེ་ ཝང་ངེ་ ཁོང་ ཟུམ་འདེ་ མ་ནི་ པོར་ མི་ཉེན་། 25 སུང་རབ་རྦེ་ན་ རྒྱ་སྤོ་ འདཱ་འབིད་རྡེ་ མ་ཤི་ཀེ་ ཧོར་ལ་ མོལ་རྡུག་,

‘ང་ ཐོང་, ཙོབོ་ ཀོན་འཇོག་ ངེ་ འདུན་ལ་ ཏུའི་རྒྱུན་ ཞུ་རྡེ་ འདུག་།

ཁོང་ ང་ ཡ་ཏོ་ ཛེ་རྡེ་ལ་ ང་ ཉམ་པོ་ ཞུ་ཤེ་ཀ་ནི་

ང་ ཅང་ འཇིའི་རྒོའེ་ མེད་།

26 ཏེ་རྒ་རྦེ་ཕི་ལ་ ངེ་ སེམ་ ཐེད་པོ་ འིན་,

ཡང་ ངེ་ ལྕེ་ ཉེ་རང་ལ་ རྟོད་པ་ པུ་ལེ་ཡོད་།

མ་ཚེད་ ཞིའི་རྡེ་ ཉམ་པོ་ ངེ་ ཟུྃ་སྤོ་ལ་ རེ་ཝ་ ཡོད་,

27 ཅེ་ཟེར་ནི་ ཉེ་རང་ངེ་ ངེ་ སེམ་ཉིད་པོ་

ཤི་ཀན་རྒུ་ནི་ ཕྲོ་ ཕྃ་རྡེ་ པོ་རེ་ མི་ཛེད་,

ཡང་ ཉེ་རང་ངེ་ ཏམ་པེ་ ཞབ་རྟོག་པ་རྦོ་ རུལ་ཅུག་རྒེ་ མི་ཛེད་།

28 ཉེ་རང་ངེ་ ང་ སོན་པོ་ ལྃ་ཤེ་ ལམ་འབོ་ ལྟན་ནེ་ ཛེད་།

ཉེ་རང་ ང་ ཉམ་པོ་ ཞུ་ཤེ་རྦེ་, ང་ རྒ་མོའེ་ ཀང་།’”

29 “ཡ་ཧུ་འདཱ་པེ་ སྤུན་རྒུན་, ཨ་ཧོའེ་ ཕ་མེ་པོ་ རྒྱ་སྤོ་ འདཱ་འབིད་ ཤི་, སྤུར་འབོ་ སྤུར་ཧང་ལ་ ཧུྃ་ ཡང་ ཁོང་ངེ་ སྤུར་ཧང་འབོ་ ཏག་སང་ ཨ་ཧོའེ་ ཕྲོ་ ཡོ་ཀན་འབོ་ ངེ་ ནེན་ཏེན་ ཟེར་ ཉེན་ཅེ་རག་། 30 འིན་ན་ ཁོང་ ལུང་རྟོན་པ་ འིན་འབེན་, ཡང་ ཀོན་འཇོག་རྒེ་ ཁོང་ ཉམ་པོ་ ནའ་ ཁུར་ཧན་ ནང་ཞིན་ ཁོང་ངེ་ ཕར་རྒྱུད་ནི་ ཅིག་ ཁོང་ངེ་ ཞུ་ཁྲིའི་ཀ་ ལྟག་རྒེ་ ཛེད་ཅེ་རྦོ་ལ་ རྒྱུའི་ཡོད་པེན་། 31 རྒྱ་སྤོ་ འདཱ་འབིད་རྡེ་ ཡོང་ཅེ་ཅེན་ནེ་ ཏུའི་ན་ ཆ་ཅེ་ཅེན་རྒུན་ ཐོང་འདེ་ མ་ཤི་ཀ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཅེའོ་ ལུང་རྟན་ སལ་རྡེ་ མོལ་, ‘ཁོང་ ཤི་ཀན་རྒུ་ནི་ ཕྲོ་ ཕྃ་རྡེ་ པོ་རེ་ མ་ཛེད་, ཡང་ ཁོང་ངེ་ ཧུ་ཤ་ རུལ་ཅུག་རྒེ་ མི་ཛེད་།’”

32 “ཏེ་རྒ་ ཡི་ཤུ་, ཀོན་འཇོག་རྒེ་ སོན་པོ་ ལང་ངེ་ ཛེད་, ང་ཞ་རྒུ་ནི་ ཏོ་ སྤང་པོ་ ཏང་ངེ་ཡོད་། 33 ཁོང་ལ་ ཀོན་འཇོག་རྒེ་ ཆག་ ཡོའེ་སྤ་ འདེད་ཅེ་ སྤལ་ ཐོབ་, ཡང་ ཡབ་ ཀོན་འཇོག་རྒེ་ ཞལ་ཆེཏ་ ཛེད་ཀ་ནེ་ ཏམ་པེ་ ཐུག་ཡིད་ སལ་ལེ་ ཛེད་ཀན་འབོ་ ཡི་ཤུའི་ ང་ཞ་ ཚང་མ་ལ་ སལ་ལེ་ ཛེ་རྡེན་ ནོག་, ཡང་ ཏོ་ ཁྱི་ཞི་ ཏག་ས་ ཐོང་ངེན་ ཡང་ ཚོར་རེན་ ནོག་།” 34-35 “རྒྱ་སྤོ་ འདཱ་འབིད་ རྡེ་བ་ཅན་ མ་ཁྱེར་ན་ ཁོའེ་ མོལ་,

‘ཙོབོ་ ཀོན་འཇོག་རྒེ་ ངེ་ ཙོབོ་ལ་ མོལ་།

ངེ་ ཁྱེ་རང་ངེ་ འགྲ་ཝོ་ ཚང་མ་,

ཁྱེ་རང་ངེ་ ཧང་པེ་ ཡོག་ལ་ པོར་པོར་ཚུག་པ་,

ཁྱེ་རང་ ངེ་ ལག་པ་ ཡོའེ་སྤེ་ ཁྲིའི་ཀ་ འདོད་།’”

36 “ཏེ་རྒ་རྦེ་ཕི་ལ་ ཨིས་ར་ཡེལ་པ་ ཚང་མ་ལ་ ནེན་ཏེན་ ཧ་ཀོ་རྒོའེ་: ཏེ་རྒ་ ཡི་ཤུ་ ཀའོ་ ཁྱི་ཞ་རྒུ་ནི་ རྐྱང་ཤིང་ལ་ རྐྱང་, ཀོན་འཇོག་རྒེ་ ཁོང་ ཁོང་ངེ་ འདམ་མེ་ ཛེད་ཀ་ནེ་ མ་ཤི་ཀ་ རྡང་ ཙོབོ་ ཉ་ཧ་ ཛེད་།”

37 པི་ཏྲ་རེ་ སྤེ་ར་རྒུན་ ཚོར་རེ་རྡང་ ཁོང་རྒུན་ ཉིང་ལ་ འདའ་ ཙུག་ཀན་ ཙོག་སེ་ རྐྱོ་མོ་ སོང་འདེ་, ཁོང་རྒུ་ནི་ པི་ཏྲར་ རྡང་ ཞེན་ ཧུ་ཚབ་རྒུན་ལ་ ཞུའི་, “སྤུན་རྒུན་, ང་ཞི་ ཅི་ ཅོ་རྒོའེ་?”

38 པི་ཏྲ་རེ་ ལེན་སལ་, “ཁྱི་ཞ་ རྡིག་པ་རྒུན་ལ་ ཤག་སྤ་ ཐོབ་ཅེ་ཕི་ རང་རང་ངེ་ རྡིག་པ་ ཕྃ་རྡེ་ སེམ་འགྱུར་རྡེ་ ཡི་ཤུ་ མ་ཤི་ཀེ་ ཚན་ནེ་ཀ་ ཁྲུའི་ནེན་། ཏེ་ནི་ ཁྱི་ཞ་རྒུན་ལ་ ཏམ་པེ་ ཐུག་ཡིད་རྡེ་ ཁྱུད་ ཐོབ་རྦེན་། 39 འི་ ཞལ་ཆེཏ་པོ་ ཁྱི་ཞ་, ཁྱི་ཞི་ ཕར་རྒྱུད་ ཏང་ ཡ་ཧུ་འདཱ་པ་ མན་ཀན་རྒུ་ནི་ཕི་ ནོག་, ཀའོ་རྒུན་ལ་ ཨ་ཧོའེ་ ཙོབོ་ ཀོན་འཇོག་རྒེ་ ཁོ་རང་ངེ་ མི་རྒུན་ འགྱུར་ཤེ་ལ་ འབོ་ ཛེད་།” 40 ཏེ་ནི་ པི་ཏྲ་རེ་ ལབ་ཞ་ མང་པོ་ ས་ལེན་ སྤང་པུད་ཏེ་ ཉིང་ནི་ ཞུ་ཝ་ པུ་ལེན་ མོལ་, “འི་ མི་རབ་ ངན་པ་ ཕོག་ཅེ་ ཆེད་པ་ནི་ ཁྱི་ཞ་རང་རྒུན་ རྐྱོབ་ཧེ་།”

41 ཁོའེ་ ཆོའེ་ཤེད་ཀན་འབོ་ལ་ ཏེཏ་པ་ ཅོ་ཀན་རྒུ་ནི་ ཁྲུའི་ནེན་, ཡང་ ཏེ་ ཞག་ལ་ མ་ཤི་ཀེ་ཀ་ ཏེཏ་པ་ ཅོ་ཀན་ ལྟོང་སུམ་ ཧ་ལམ་ ཆོའེ་ཚོག་རྒེ་ ཕྲོ་ ཐེའེ་ ཛེད་།

ཏེཏ་པ་ཅན་རྒུ་ནི་ ཐུན་འབྲེལ་།

42 ཁོང་རྒུ་ནི་ ཧུ་ཚབ་རྒུན་ ལབ་ཞ་ ནེན་ཅེ་, ཐུན་འབྲེལ་ ཅོ་ཅེ་, འདོན་ཀྱིར་ ཅག་ཅེ་ རྡང་ མོ་ལམ་ ཏབ་ཅེ་རྒུན་ མ་ ཁག་ཅེན་ སམ་འདེ་ ཏུའི་རྒྱུན་ ཛོམ་མེ་ཡོད་པེན་།

43 ཧུ་ཚབ་རྒུ་ནི་ ཧ་ལེ་ཤེ་ ཛེད་པ་ རྡང་ ལྟའ་ མང་པོ་ ལྟན་ནེ་ ཛེད་ཅེ་རྦེ་ མི་ཚང་མེ་, འཇིའི་རྡེ་ན་ ཀོན་འཇོག་ལ་ སི་ཝ་ ཛེད་། 44 ཏེཏ་པ་ཅེན་ ཚང་མ་ ལེན་ མང་པོ་ ཛོམ་འདེ་, ཅི་ཚང་མ་ ཅིག་ ཏང་ ཅིག་ ཉམ་པོ་ རྒོ་ཡོད་པེན་། 45 ཡོ་ཀ་ནེ་ ནོར་རྒུན་ ཙོྃ་རྡེ་ རྒོའེ་ཧན་རྒུན་ལ་ རྒོའེ་རྡེ་ ཏང་ངེ་ཡོད་པེན་། 46 ཁོང་རྒུན་ ཞག་ཏང་ ཀོན་འཇོག་རྒེ་ ཁང་པེ་ ཀྱང་ཧོར་རེ་ན་ ཛོམ་མེ་ཡོད་པེན་། ཁང་པ་རྒུ་ནི་ན་ འདོན་ཀྱིར་ ཅག་ཏེ་ རྒ་མོ་ རྡང་ ཐེད་པོ་ ཉམ་པོ་ ཉིང་ པེ་རྡེ་ ཚང་མ་ ཉམ་པོ་ རྒོའེ་རྡེ་ ཟེན་, 47 ཀོན་འཇོག་ལ་ རྟོད་པ་ པུ་ལེན་, མི་ཚང་མེ་ ཆོག་རྐྱོར་ ཐོབ་ཅེ་ལ་ ཁོང་རྒུ་ནི་ ཐེད་པོ་ ཅོའེ་། ཐར་པ་ ཐོབ་ཀན་རྒུ་ནི་ ཀྲང་ཧ་ ཞག་པེ་ཞག་ ཙོབོ་ ཕེལ་ཅུག་རྒེ་ ཛེད་།