ཀར་ཡོད་པ་ ཡུ་འདཱེ་ འགོམ་ཧོར་ ཏྃ་རྡེ་ འགྲ་ཝོ་རྒུ་ནི་ ལག་ལ་ ལྟེད་།
22
ཏ་ རྐྱུར་ མེ་ཀ་ནེ་ ཏི་རྒིར་ ཏུའི་ཤེན་ ཀ་འབོ་ལ་ པེ་སག་རྒེ་ ཏུའི་ཤེན་ ཟེ་ནོག་ ཉེ་མོ་ ཡོད་པེན་, 2 ལ་མ་ འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ ཡི་ཤུ་ སེད་ཅེ་ ཐབ་ ཙལ་ ཅེ་ཟེར་ནི་ མི་ཚོག་རྒེ་ ཏོ་ལ་ རྒྱཔ་འགལ་ ཅོ་ནོག་ སམ་འདེ་ ཁོང་རྒུན་ འཇིའི་རྡེ་ཡོད་པེན་།3 ཏེ་ནི་ ལོབ་ཀྲུག་ ཅུག་ཉི་ ནང་ནི་ ཅིག་, ཀར་ཡོད་པ་ ཟེར་ཧ་ནེ་ ཡུ་འདཱེ་ན་ རྡུད་ ཞུའུ་, 4 ཡང་ ཁོ་ ལ་མ་ འུ་རྐྱོང་རྒུན་ འདང་ ཀོན་འཇོག་རྒེ་ ཁང་པ་ སྲུང་ཀ་ནེ་ མག་མི་ འུ་རྐྱོང་རྒུན་ས་ སོང་འདེ་ ཀ་ཟུག་རྒེ་ ཡི་ཤུ་ འགོམ་ཧོར་ ཏྃ་རྡེ་ ཁོང་རྒུ་ནི་ ལག་ལ་ ལྟེ་རྡེན་ ཟེར་རྡེ་ ཀྲཔ་ ཅོའེ་། 5 ཁོང་རྒུན་ ཧོཔ་ ཐེད་ཏེ་ ཁོ་ པེ་ནེ་ ཏང་ཅེ་ལ་ ཁ་ཆམ་། 6 ཁོ་ ཏོ་ལ་ ཁ་ཆམ་འདེ་ མི་ཚོག་ མེད་ཟ་ནི་ ཡི་ཤུ་ ཁོང་རྒུ་ནི་ ལག་ལ་ ལྟེད་ཅེ་ ཧབ་ ཙལ་ཤེ་ འགོ་ཟུག་།
ལྟིང་འཇུག་རྒེ་ འདོན་ཏང་ ནམ་།
7 ཏེ་ནི་ རྐྱུར་ མེ་ཀ་ནེ་ ཏི་རྒིར་ ཏུའི་ཤེན་ ལེཔ་, ཏེ་ ཞག་ལ་ པེ་སག་རྒེ་ ལུག་པོ་ སྲོག་ཆོད་ལ་ པུ་ལེ་ཡོད་པེན་། 8 ཡི་ཤུའི་ པི་ཏྲར་ རྡང་ ཡོ་ཧཱ་ནན་ ལམ་ཅུག་རྒེ་ ཛེ་རྡེན་ མོལ་, “སོང་འདེ་ ཨ་ཧོ་རྒུན་ ཟ་ཅེ་ལ་ པེ་སག་རྒེ་ འདོན་ཏང་ ཀྲལ་འགྲིག་ ཅོའེ་།”
9 ཁོང་རྒུ་ནི་ ཡི་ཤུ་ འདྲི་, “ང་ཞི་ པེ་སག་རྒེ་ འདོན་ཏང་ ཀ་རུ་ ཀྲལ་འགྲིག་ ཅོ་ལེ་?”
10 ཡི་ཤུའི་ ཁོང་རྒུན་ལ་ མོལ་, “རྒྱལ་སེ་ན་ ཞུ་ཟ་ནི་, ཏུ་རུ་ ཆུ་ཀར་ ཁུར་ཧ་ནེ་ མི་ཞིག་ ཁྱི་ཞ་རྒུན་ལ་ ཐུག་ཅེན་, ཁོའེ་ ལྟིང་འགྲྃ་ནི་ སོང་། ཁོ་ ཞུ་རྡེ་ ཆ་སེ་ ཁང་པེ་ 11 ཁང་རྡག་པོ་ལ་ ཟེར་, ‘ལོབ་རྦོན་ནེ་ འདྲི་རག་, “འགྲོན་པོ་ ཞུ་སེ་ ནང་འབོ་ ཀ་ནེ་ ཡོད་, ཏུ་རུ་ ངེ་ ང་རང་ངེ་ ལོབ་ཀྲུག་རྒུན་ ཉམ་པོ་ པེ་སག་རྒེ་ འདོན་ཏང་ ཟོའེན་?”’ 12 ཁོའེ་ ཁྱི་ཞ་ ལྟང་ཏོག་ལ་ ཀྲལ་འགྲིག་ ཅོ་ཀ་ནེ་ ནང་ ཆོན་མོ་ཞིག་ ལྟན་ཅེན་, ཏུ་རུ་ འདོན་ཏང་ངེ་ ཀྲལ་ ཅོའེ་།” 13 ཏེ་ནི་ ཁོང་རྒུན་ སོང་ ཡང་ ཅི་ཚང་མ་ ཡི་ཤུའི་ མོལ་ཧན་ ནང་ཞིན་ ཐོང་། ཁོང་རྒུ་ནི་ ཏུ་རུ་ པེ་སག་རྒེ་ འདོན་ཏང་ངེ་ ཀྲལ་འགྲིག་ ཅོའེ་།
14 ཏུའི་ཚོད་ ལེབ་རྦེ་རྡང་ ཡི་ཤུ་ ཁོ་རང་ངེ་ ཧུ་ཚབ་རྒུན་ ཉམ་པོ་ ཅོག་ཙེ་ཀ་ ཀན་འདེ་ ཞུའུ་། 15 ཡང་ ཁོང་ངེ་ ཧུ་ཚབ་རྒུན་ལ་ མོལ་, “ང་ རྡུ་ངལ་ ཉུང་ངེ་སང་ ངུལ་ལ་ འི་ པེ་སག་རྒེ་ འདོན་ཏང་ ཁྱི་ཞ་ ཉམ་པོ་ འདེད་ཏེ་ ཟ་ཅེ་ འདོད་པ་ ཆོན་མོ་ ཡོད་པེན་, 16 ཅེ་ཟེར་ནི་ ངེ་ ཁྱི་ཞ་རྒུན་ལ་ ཟེ་འིན་, ངེ་ འི་རྦོ་ ཡང་ མ་ནི་ མི་ཟ་ ནམ་ཚུག་པ་ ཡུ་རྦེ་ ཏོན་ཏག་པོ་ ཀོན་འཇོག་རྒེ་ རྒྱལ་སྲིད་ན་ འདྲན་འདྲ་ མི་ཀྲུཔ་།”
17 ཏེ་ནི་ ཡི་ཤུའི་ འདོན་རྐྱོ་རྦོ་ ནམ་འདེ་ ཀོན་འཇོག་ལ་ ཐུག་ཞེ་ཆེ་ ཞུའི་ ཡང་ ཁོང་རྒུན་ལ་ མོལ་, “འི་རྦོ་ ནེན་འདེ་ ཁྱི་ཞ་རང་རྒུ་ནི་ན་ རྒོའེ་། 18 ངེ་ ཁྱི་ཞ་ ཟེ་འིན་, འི་ རྒུན་འགྲུམ་མེ་ ཁོའེ་རྦོ་ ངེ་ ཡང་ མི་ཐུང་ ནམ་ཚུག་པ་ ཀོན་འཇོག་རྒེ་ རྒྱལ་སྲིད་ མི་ལེབ་།”
19 ཏེ་ནི་ འདོན་ཀྱིར་ ནམ་འདེ་ ཀོན་འཇོག་ལ་ ཐུག་ཞེ་ཆེ་ ཞུའི་ ཡང་ ཅག་རྒེ་ ཛེད་ཏེ་ ལོབ་ཀྲུག་རྒུན་ལ་ སལ་ ཡང་ མོལ་, “འི་རྦོ་ ཁྱི་ཞ་རྒུ་ནི་ཕི་ ཏང་ཀ་ནེ་ ངེ་ ཟུྃ་སྤོ་ འིན་། ང་ འི་ཏུ་ ཅོ་ཅེ་ལ་ འོ་ཡུ་ ཅོའེ་།”
20 ཏེ་རྒ་ ཙོག་སེ་ ཁར་ཞི་ ལྟིང་ནི་ ཡང་ རྒུན་འགྲུམ་མེ་ ཁོའེ་རྡེ་ འདོན་རྐྱོ་རྦོ་ ནམ་ ཡང་ མོལ་, “འི་ ཀོ་རེའོ་ ཀོན་འཇོག་ ཏང་ ཁོང་ངེ་ མི་རྒུ་ནི་ པར་ལ་ ངེ་ ཁྲག་ ཉམ་པོ་ ཅོ་ཀ་ནེ་ ཆེཏ་ཏོན་ སོ་མ་ འིན་། 21 འིན་ན་ ལྟོའེ་, ང་ འགྲ་ཝེ་ ལག་ལ་ ལྟེད་ཀ་ནེ་ ལག་པ་ འི་ ཅོག་ཙེ་ཀ་ ང་ ཉམ་པོ་ འདུག་། 22 ཐག་ཅེད་རྡེ་ ཛེད་ཀན་ ནང་ཞིན་ མི་རིག་རྒེ་པུ་ ཤི་རྒོའེ་, འིན་ན་ ཁོ་ འགྲ་ཝེ་ ལག་ལ་ ལྟེད་ཀ་ནེ་ མིའུ་ལ་ ཙམ་ཤིག་རྒེ་ འཇི་སྤ་ མི་ཡོང་།” 23 ཏོ་ སུའི་ ཅོའེན་ ཟེར་རྡེ་ ལོབ་ཀྲུག་རྒུ་ནི་ ཁོ་རང་ ཅིག་ ཏང་ ཅིག་ལ་ འདྲི་ཅེ་ འགོ་ཟུག་།
24 ཏེ་ནི་ ལོབ་ཀྲུག་རྒུ་ནི་ན་ ཁོ་རང་རྒུ་ནི་ ཕྲོ་ནི་ ཀྲག་ཤོག་ སུ་ འིན་ ཟེ་རེན་ ཟེར་ཟེར་ སོང་། 25 ཡི་ཤུའི་ ཁོང་རྒུན་ལ་ མོལ་, “ཡ་ཧུ་འདཱ་པ་ མན་ཀ་ནེ་ རྒྱ་སྤོ་རྒུ་ནི་ མི་རྒུ་ནི་ཀ་ ཉིང་ཞེ་ མེད་པེ་ ཝང་སྲུལ་ལེ་ནོག་, ཡང་ མི་རྒུ་ནི་ཀ་ ཝང་ཆ་ ཡོ་ཀན་རྒུ་ནི་ ཁོ་རང་རྒུན་ལ་ ‘མི་རྒུན་ལ་ ཕན་ཏོག་ ཏང་ཀན་’ ཟེ་རེ་ནོག་། 26 ཁྱི་ཞི་ན་ ཏོ་ཙོག་སེ་ ཡོང་ མི་རྒོའེ་། ཁྱི་ཞི་ ཕྲོ་ནི་ ཀྲག་པོ་ འིན་ཀན་འབོ་ ཆུང་ཤོག འགྱུར་རྒོའེ་ ཡང་ ཝང་སྲུལ་ཧན་འབོ་ ཞབ་རྟོག་ ཞུ་ཀན་ འགྱུར་རྒོའེ་། 27 ཅོག་ཙེ་ཀ་ ཁར་ཞི་ ཟ་ལ་ འདེད་ཀན་འབོ་ ཆེ་ ནོག་རྒེ་ ཡ་ ཞབ་ཤི་ ཞུ་ཀན་འབོ་? ཅོག་ཙེ་ཀ་ ཁར་ཞི་ ཟ་ལ་ འདེད་ཀན་འབོ་ ཆེ་ མག་རྒེ་? འིན་ན་ ངེ་ ཞབ་ཤི་ ཞུ་ཀ་ནེ་ ཚུལ་ལ་ ཁྱི་ཞ་རྒུ་ནི་ ཕྲོ་ མི་ཙེ་ པུད་རྡེ་ཡོད་།”
28 “ང་ ཀག་སྤོ་ ཐོང་ངེ་ ཏུའི་ལ་ ཁྱི་ཞ་ ང་ ཉམ་པོ་ འདེད་ཀན་རྒུན་ ནོག་། 29 ཀ་ཟུག་ ངེ་ ཡབ་རྦེ་ ང་ རྒྱལ་སྲིད་ཞིག་ ཝང་སྲུལ་ལེ་ སལ་ ཏེ་རྒ་ ཙོག་སེ་ ངེ་ལ་ ཁྱི་ཞ་རྒུན་ལ་ རྒྱལ་སྲིད་ཞིག་ ཝང་སྲུལ་ལེ་ ཏང་ངེན་། 30 ཁྱི་ཞ་ ངེ་ རྒྱལ་སྲིད་རྡེ་ན་ ང་ ཉམ་པོ་ ངེ་ ཅོག་ཙེ་ཀ་ནི་ ཟོའེན་, ཐུང་ངེན་ ཡང་ ཨིས་ར་ཡེལ་ལེ་ མི་རིག་ ཅུག་ཉི་ཀ་ ཝང་སྲུལ་ཅེ་ལ་ ཁྲིའི་ཀ་ འདེད་རྡེན་།”
པི་ཏྲ་རེ་ ཡི་ཤུ་ ངོ་ མི་ཤེ་ཟུན་ རྒྱབ་ཅེ་ ཡི་ཤུའི་ ལུང་རྟན་ ཛེད་།
31 ཡི་ཤུའི་ མོལ་, “ཤི་མོན་, ཤི་མོན་, ཁྱི་ཞ་རྒུན་ ཚོད་ལྟ་ནི་ ཀྲོ་ སིག་རྒེ་ ཙོག་སེ་ སིག་ཅུག་ཅེ་ལ་ རྡུད་རྡེ་ ཀོན་འཇོག་ལ་ ཞུ་ཝ་ པུལ་། 32 འིན་ན་ ཁྱེ་རང་ངེ་ ཏེཏ་པ་ མི་ཕང་ཅེ་ ཡང་ རྡིག་པ་ ཕྃ་རྡེ་ སེམ་འགྱུར་རྡེ་ ཡང་ ངེ་ཀ་ ཏེཏ་པ་ ཅོ་རྡང་, ཁྱེ་རང་ངེ་ སྤུན་རྒུན་ལ་ སེམ་རུའི་ ཏང་ཅེ་ལ་ མོ་ལམ་ ཞུའི་རྦེན་།”
33 པི་ཏྲ་རེ་ ལེན་ཏྃ་, “ཙོབོ་, ང་ ཉེ་རང་ ཉམ་པོ་ ཙོན་ལ་ ཆ་ཅེ་ མ་ཚེད་ ཤི་ཅེ་ལ་ ཀྲལ་འགྲིག་ འིན་།”
34 ཡི་ཤུའི་ པི་ཏྲར་ལ་ མོལ་, “ངེ་ ཁྱེ་རང་ལ་ ཟེ་འིན་, ཏི་རིང་ ཅ་པེ་ ཅ་ཧད་ ཏང་ངེ་སང་ ངུལ་ལ་ ཁྱེ་རང་ངེ་ ང་ ལེན་ སུམ་ མི་ཤེ་ཟུན་ ཏང་ངེན་།”
35 ཏེ་ནི་ ཡི་ཤུའི་ ཁོང་རྒུན་ལ་ མོལ་, “ངེ་ ཁྱི་ཞ་ ཁོ་མག་, འཇོ་ལ་ རྡང་ འཇའ་ཏོ་ མེད་རྡེ་ ཀལ་ཟ་ནི་ ཁྱི་ཞ་རྒུན་ལ་ རྒོའེ་ཤེ་ཅན་རྒུན་ འདྲན་འདྲ་ མ་སོང་ངེ་?”
ཁོང་རྒུ་ནི་ ཟེར་, “འདྲན་འདྲ་ སོང་ལེ་།”
36 “འིན་ན་ ཁོ་མག་ ཡོ་ཀན་རྒུ་ནི་ ཏོ་ ཁུར་རྒོའེ་ ཏེ་རྒ་ ཙོག་སེ་ འཇོ་ལ་། ར་ཡི་ མེ་ཀན་རྒུ་ནི་ རང་ངེ་ ཀོའེ་ ཙོྃ་རྡེ་ ར་ཡི་ ཉོ་རྒོའེ་། 37 ངེ་ ཁྱི་ཞ་ ཟེ་རེན་, ཏམ་པེ་ སུང་རབ་རྦེ་ན་ ‘ཁོ་ ཁྲིམ་ ཅག་ཀན་རྒུ་ནི་ ཕྲོ་ སི་རྒེན་’ འབྲི་ཀན་འབོ་ ངེ་ན་ ཀྲུཔ་རྒོའེ་། ནེན་ཏེན་ ངེ་ ཧོར་ལ་ ཏེ་ འབྲི་ཀན་འབོ་ ཀྲུབ་རྦེན་ ནོག་།”
38 ཁོང་རྒུ་ནི་ ཟེར་, “ཙོབོ་ལེ་, ང་ཞི་ ལག་ལ་ ར་ཡི་ ཉི་ ཡོད་།”
ཡི་ཤུའི་ མོལ་, “ར་ཡི་ ཧོར་ལ་ མང་པོ་ ཟེར་, ཏ་ འབྲིའོག་།”
ཡི་ཤུའི་ ཨོ་ལི་ཝེ་ རི་ཀ་ མོ་ལམ་ ཞུ་ ཛེད་།
39 ཡི་ཤུའི་ ལོབ་ཀན་ ནང་ཞིན་ རྒྱལ་ས་ནི་ ཕི་ལོག་ལ་ འབིང་འདེ་ ཨོ་ལི་ཝེ་ རི་ཀ་ རྐྱོད་ ཡང་ ཁོང་ངེ་ ལོབ་ཀྲུག་རྒུན་ ཁོང་ངེ་ ལྟིང་འགྲྃ་ནི་ སོང་། 40 ཏེ་ མལ་རྦེ་ཀ་ ལེབ་རྦེ་རྡང་ ཁོང་ངེ་ ཁོང་རྒུན་ལ་ མོལ་, “ཁྱི་ཞ་ རྡིག་པེ་ན་ མི་འགྱེལ་ཤི་ཕི་ མོ་ལམ་ ཞུའི་།”
41 ཏེ་ནི་ རྡོ་ ཕྃ་རྡེ་ ལེབ་ཚོད་ ཟམ་ཤིག་ ཁོང་རྒུ་ནི་ ཐག་རིང་ལ་ རྐྱོད་ཏེ་ པིག་ཛུམ་ རྒྱབ་ཏེ་ མོ་ལམ་ ཞུའི་, 42 “ཡབ་ལེ་ ཀལ་ཏེ་ ཉེ་རང་ ཐུག་ཐེད་ནི་ འི་ རྡུ་ངལ་ལེ་ ཀོ་རེའོ་ ངེ་ཀ་ནི་ ཐེན་ནེ་ ཛེད་, འིན་ན་ ངེ་ འདོད་པ་ ནང་ཞིན་ མན་, ཉེ་རང་ངེ་ ཐུག་འདོད་ ནང་ཞིན་ ཅོའོ་ ཛེད་།” 43 ཏེ་ནི་ རྡེ་བ་ཅན་ནེ་ ཕོ་ཉ་ཞིག་ རྐྱོད་ཏེ་ ཁོང་ལ་ སེམ་ཤུག་ ཅུག་རྒེ་ ཛེད་། 44 རྡུ་ངལ་ སྲན་ཀྲེ་ན་ ཉིང་ངེ་ ཐིལ་ནི་ མོ་ལམ་ ཞུ་ ཛེད་, ཡང་ ཁོང་ངེ་ འབིང་ཀ་ནེ་ ཚད་པ་ ཁྲག་རྒེ་ ཐིག་སྤ་ ཙོག་སེ་ ཐང་ཀེ་ཀ་ ཀྲུལ་།
45 མོ་ལམ་ ཞུའི་ ཚར་རེ་རྡང་ ཁོང་ ཞྃ་རྡེ་ ལོབ་ཀྲུག་རྒུན་ས་ ལོག་ཏེ་ རྐྱོད་། ཁོང་རྒུན་ ཉིད་ལ་ སོང་འདེ་ ཟིའི་, ཚེར་ཧ་ ཅོའེ་རྡེ་ ཁོང་རྒུན་ སྲན་ཀྲེ་ ངལ་རྡེ་ ཡོད་པེན་། 46 ཁོང་ངེ་ ཁོང་རྒུན་ལ་ འདྲི་ ཛེད་, “ཁྱི་ཞ་ ཅེ་ ཉིད་ལོག་ཏེ་ འིན་? ལོྃ་རྡང་, ཁྱི་ཞ་ རྡིག་པེ་ན་ མི་འགྱེལ་ཤི་ཕི་ མོ་ལམ་ ཞུའི་།”
ཡི་ཤུ་ ཟུམ་།
47 ཡི་ཤུའི་ ཞལ་ཏ་ ས་ལེན་ ཡོད་ཟ་ནི་ ལོབ་ཀྲུག་ ཅུག་ཉི་རྦེ་ ནང་ནི་ ཅིག་, ཡུ་འདཱ་ ཟེར་ཧན་འབེ་ མི་ཚོག་ལ་ འགོ་ ཅོའེ་རྡེ་ ཡི་ཤུ་ འོ་ ཏང་ངེ་ལ་ ཁོང་ས་ ཡོྃ་། 48 འིན་ན་ ཡི་ཤུའི་ ཁོ་ མོལ་, “ཡུ་འདཱ་, ཁྱེ་རང་ངེ་ འོ་ ཏྃ་རྡེ་ མི་རིག་རྒེ་པུ་ འགྲ་ཝེ་ ལག་ལ་ ཏང་ངེ་ ཡོད་རྡེ་?”
49 ཡི་ཤུའི་ ལོབ་ཀྲུག་རྒུ་ནི་ ཆ་ཅེ་ཅེན་འབོ་ ཐོང་ངེ་རྡང་ ཁོང་རྒུ་ནི་ ཟེར་, “ཙོབོ་ལེ་, ང་ཞི་ ར་ཡི་ རྒྱབ་རྦེ་?” 50 ཡང་ ཁོང་ ཅིག་ཅིག་རྒེ་ ལ་མ་ ཆོན་མེ་ ཡོག་པོ་ལ་ ར་ཡི་ རྒྱབ་ཏེ་ ཁོའེ་ ནམ་ཅོག་ ཡོའེ་སྤ་ ཅེད་ཏྃ་།
51 འིན་ན་ ཡི་ཤུའི་ མོལ་, “ཏ་ འབྲིའོག་, འི་ཟུག་ མ་ཅོ་” ཡང་ ཏེ་ མི་རྦེ་ ནམ་ཅོག་པོ་ལ་ ཆག་ སེ་རྡེ་ ཕན་ཅུག་རྒེ་ ཛེད་།
52 ཏེ་ནི་ ཡི་ཤུའི་ ལ་མ་ འུ་རྐྱོང་, ཀོན་འཇོག་རྒེ་ ཁང་པ་ སྲུང་ཀ་ནེ་ མག་མི་ འུ་རྐྱོང་ འདང་ ཡ་ཧུ་འདཱ་པེ་ འུ་རྐྱོང་ ཁོང་ ཟུམ་མེ་ ཡོང་ཀན་རྒུན་ལ་ མོལ་, “ར་ཡི་ རྡང་ པེར་ཧ་ ཁུར་རྡེ་ ང་ ཟུམ་མེ་ལ་ ཡོྃ་རྡེ་ ཅེ་ ང་ ཅག་པ་ ནོག་རྒེ་? 53 ཀོན་འཇོག་རྒེ་ ཁང་པེ་ན་ ཞག་ཏང་ ངེ་ ལབ་ཞ་ ཏང་ཟ་ནི་ ཁྱི་ཞི་ ང་ ཅེ་ མ་ཟུམ་འབེན་? འིན་ན་ འི་རྦོ་ ཁྱི་ཞ་རྒུ་ནི་ ཏུའི་ཚོད་, མུན་ཀྲག་རྒེ་ ཝང་སྲུལ་ལེ་ ཏུའི་ ནོག་།”
པི་ཏྲ་རེ་ ཡི་ཤུ་ མི་ཤེ་ཟུན་ ཏང་།
54 ཏེ་ནི་ ཀོན་འཇོག་རྒེ་ ཁང་པ་ སྲུང་ཀན་རྒུ་ནི་ ཁོང་ ཟུམ་འདེ་, ལ་མ་ ཆོན་མེ་ ཕོ་ཀྲང་ལ་ ཁྱེར་ ཡང་ པི་ཏྲར་ ཐག་རིང་ཞིག་ནི་ ཁོང་ངེ་ རྒྱབ་ནི་ སོང་། 55 ཁོང་རྒུ་ནི་ ཕོ་ཀྲང་ངེ་ ཀྱང་ཧོར་རེ་ ཞུང་ལ་ མེ་ ཏྃ་རྡེ་ ཏོ་ལ་ ཁོར་རྡེ་ འདེད་, པི་ཏྲར་ལ་ ཁོང་རྒུན་ ཉམ་པོ་ འདེད་། 56 ཏེ་ནི་ ཡོག་མོ་ཞིག་རྒེ་ པི་ཏྲར་ མེའེ་ འདེད་ཏེ་ ཐོང་འབེ་ ཁོ་འབེ་ ཞིབ་སལ་ ཅོའེ་རྡེ་ ལྟོའེ་ ཡང་ ཟེར་, “འི་ མི་ལ་ ཡི་ཤུ་ ཉམ་པོ་ འདུག་པེ་།”
57 འིན་ན་ པི་ཏྲ་རེ་ ཟུན་ ཏྃ་རྡེ་ ཟེར་, “པོ་མོ་, ངེ་ ཁོ་ ཤེ་རྡེ་མེད་།”
58 ཙི་རྦིག་ཤི་ ལྟིང་ནི་ ཡང་ མི་ཞིག་རྒེ་ ཁོ་ ཐོང་འདེ་ ཟེར་, “ཁྱེ་རང་ལ་ ཁོང་རྒུ་ནི་ ཁྲོ་པ་ ཅིག་ ནོག་།”
པི་ཏྲ་རེ་ ཁོ་ ཟེར་, “ཡ་ཏོ་, ང་ མན་།”
59 ཆུ་ཙོད་ ཅིག་ ཟམ་ཤིག་རྒེ་ ལྟིང་ནི་ ཞེན་ མི་ཞིག་རྒེ་ ཟེར་, “ནེན་ཏེན་ འི་ མི་ལ་ ཁོའེ་ ཁྲོ་པ་རྒུ་ནི་ ནང་ནི་ ཅིག་ ནོག་ ཅེ་ཟེར་ནི་ ཁོ་ འགཱ་ལིལ་པ་ ནོག་།”
60 འིན་ན་ པི་ཏྲ་རེ་ ལེན་ཏྃ་, “ཁྱེ་རང་ངེ་ ཅི་ ཟེར་རྡེ་ འིན་ ང་ ཧ་ཀོ་ མེ་རག་།” ཁོའེ་ ཏོ་ ཟེ་རེན་ ཡོད་ཟ་ནི་, ཅ་པེ་ ཅ་ཧད་ ཏྃ་།
61 ཙོབོ་ ཡི་ཤུའི་ འགྱུར་རྡེ་ པི་ཏྲར་ལ་ ཟིའི་། ཏེ་ནི་ པི་ཏྲར་ལ་ ཙོབོ་, “ཅ་པེ་ ཅ་ཧད་ ཏང་ངེ་སང་ ངུལ་ལ་ ཁྱེ་རང་ངེ་ ང་ ལེན་ སུམ་ མི་ཤེ་ཟུན་ ཏང་ངེན་” མོལ་ཧན་འབོ་ འི་ཏུ་ ཡོྃ་, 62 ཡང་ ཁོ་ ཕི་ལོག་ལ་ སོང་འདེ་ ཧོཔ་ ངུའི་།
63 ཡི་ཤུ་ སྲུང་ཀན་རྒུ་ནི་ ཁོང་ལ་ ཚིག་ ཏང་ངེན་ རྡུང་ཅེ་ འགོ་ཟུག་། 64 ཁོང་རྒུ་ནི་ ཁོང་ངེ་ མིག་ ལག་པི་ ཉམ་པོ་ ཀབ་ ཡང་ འགྲམ་ལྕག་ ཏང་རྡེ་ ཟེར་, “ལུང་རྟན་ ས་ལང་ ཁྱེ་རང་ལ་ རྡུང་ཀན་འབོ་ སུ་ ནོག་?” 65 ཡང་ སྤེ་ར་ སོག་པོ་ མང་པོ་ ཟེར་རྡེ་ ཁོང་ལ་ ཁྲེལ་རྦ་ ལྟན་།
ཡི་ཤུ་ ཡ་ཧུ་འདཱ་པེ་ ཚོག་འདུའི་ན་ ཁྱེར་།
66 ནམ་ ཟ་ར་ཟི་རེ་ ལང་ངེ་རྡང་ ཡ་ཧུ་འདཱ་པེ་ འུ་རྐྱོང་རྒུན་, ལ་མ་ འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ ཚོག་འདུའི་ ཚོག་རྡེ་ ཡི་ཤུ་ ཁོང་རྒུ་ནི་ འདུན་ལ་ ཁྱོང་ཅུག་། 67 ཁོང་རྒུ་ནི་ ཟེར་, “ང་ཞ་ ཤོད་རྡང་, ཁྱེ་རང་ འདམ་མེ་ ཛེད་ཀ་ནེ་ མ་ཤི་ཀ་ འིན་ནེ་?”
ཁོང་ངེ་ ལེན་སལ་, “ཀལ་ཏེ་ ངེ་ ཁྱི་ཞ་ ཟེར་ནི་ ཁྱི་ཞ་ རྡེན་ མི་ཆེ་, 68 ཡང་ ཀལ་ཏེ་ ངེ་ ཏྲི་ཝ་ཞིག་ འདྲི་ནི་ ཁྱི་ཞི་ ལེན་ མི་ཏང་། 69 འིན་ན་ ཏི་ནི་ཕ་ལ་ མི་རིག་རྒེ་པུ་ ཀུན་ཝང་ ཀོན་འཇོག་རྒེ་ ཆག་ ཡོའེ་སྤེ་ ཁྲིའི་ཀ་ འདེད་རྡེན་།”
70 ཁོང་ ཚང་མེ་ ཟེར་, “ཁྱེ་རང་ ཀོན་འཇོག་རྒེ་ སྲེ་ འིན་ནེ་?” ཁོང་ངེ་ ལེན་སལ་ “ཁྱི་ཞི་ ཟེར་ཧན་འབོ་ ང་ འིན་།”
71 ཏེ་ནི་ ཁོང་རྒུ་ནི་ ཟེར་, “ཨ་ཧོ་ལ་ འི་སང་ མང་ངེ་ སྤང་པོ་ ཅེ་ རྒོའེ་རྡེན་? ཁོའེ་ ཟེར་ཧན་འབོ་ ཨ་ཧོ་རྒུ་ནི་ ཚོར་།”