འ་ནེ་ མ་རང་མེ་ འབུལ་ལྡུཏ་།
21
ཡི་ཤུའི་ ཀོན་འཇོག་རྒེ་ ཁང་པེ་ན་ ཡོད་ཏུའི་ མི་ ཆུག་པོ་རྒུ་ནི་ འབུལ་ལྡུཏ་ རྒམ་མེ་ན་ ཁོ་རང་རྒུ་ནི་ འབུལ་ལྡུཏ་ པུ་ལེན་ ཟིའི་། 2 ཁོང་ངེ་ ཉལ་རྦ་ཅེན་ འ་ནེ་ མ་རང་མོ་ཞིག་རྒེ་ ཟྃ་རྡེ་ པེ་ནེ་ ཉི་ པུལ་ཧན་འབོ་ལ་ ཟིའི་།3 ཁོང་ངེ་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་, ཞེན་ ཚང་མེ་སང་ འི་ འ་ནེ་ མ་རང་མོ་ ཉལ་རྦ་ཅེན་འབེ་ མང་ངེ་ པུལ་, 4 ཅེ་ཟེར་ནི་ མི་ཚང་མེ་ ཁོ་རང་རྒུན་ལ་ མང་པོ་ ཡོ་ཀ་ནེ་ ནང་ནི་ ཉུང་ཙེ་ཞིག་ ཏྃ་, འིན་ན་ འི་ འ་ནེ་ མ་རང་མོ་རྦེ་ ཉལ་རྦ་ཅེན་ འིན་ནེ་ལ་ ཁོའེ་ སོན་པོ་ ལུའི་ཤེ་ རྒོའེ་ཤེ་ ཡོ་ཀན་ ཚང་མ་ ཏྃ་།”
ཐ་མེ་ ཏུའི་རྡེ་ ལྟའ་རྒུན་།
5 ཡི་ཤུའི་ ལོབ་ཀྲུག་ ཁ་ཅིག་རྒེ་ ཀོན་འཇོག་རྒེ་ ཁང་པ་ ཧ་ལེ་ཤེ་ སིའི་རྡེ་ རིན་ཅེན་ རྡོ་རྒུན་ ཡང་ མི་རྒུ་ནི་ ཀོན་འཇོག་རྒེ་ པུལ་ཧ་ནེ་ ལྟའ་རྒུན་ ཉམ་པོ་ མ་ རྡེ་མོ་ ཅོའེ་རྡེ་ ཡོ་ཀན་འབེ་ ཧོར་ལ་ སྤེ་ར་ ཏང་ངེན་ ཡོད་ཟ་ནི་ ཡི་ཤུའི་ ཁོང་རྒུན་ལ་ མོལ་, 6 “ཁྱི་ཞ་རྒུ་ནི་ འི་རྦོ་ ཐོང་འདུག་རྒེ་? ཏེ་ཏུའི་རྦོ་ལ་ ལེབ་རྦེན་ ནམ་ འི་ རྡོ་ ཅིག་ ཏང་ ཅིག་ཀ་ སག་ཏེ་ མི་ལུའི་, ཚང་མ་ ཞིག་རྒེན་།”
7 ཁོང་རྒུ་ནི་ ཁོང་ལ་ འདྲི་, “ལོབ་རྦོན་ལེ་, ཏོ་ ནམ་ ཆེན་, ཡང་ ཏོ་རྒུན་ འདྲན་འདྲ་ ཀྲུཔ་ཅེ་ ལྟའ་རྦོ་ ཀ་ཟུག་ཤིག་ ཡོང་ངེན་?”
8 ཡི་ཤུའི་ ལེན་སལ་, “སུ་ཞིག་ལ་ ཁྱི་ཞ་ འགོམ་ཧོར་ ཏང་མི་ཅུག་ཅེ་ལ་ ཤང་ ཅོའེ་, ཅེ་ཟེར་ནི་ ངེ་ མིང་ ཁུར་རྡེ་, ‘ང་ འདམ་མེ་ ཛེད་ཀ་ནེ་ མ་ཤི་ཀ་ འིན་ ཡང་ ཏུའི་རྦོ་ ཉེ་མོ་ འདུག་’ ཟེར་ཧན་ མང་པོ་ ཡོང་ཅེན་། ཁོང་རྒུ་ནི་ ལྟིང་འགྲྃ་ནི་ མ་ཆ་། 9 མག་ ཏང་ ཝང་སྲུལ་པ་ ངོ་ལོག་ ཅོ་ཅེ་རྒུན་ ཚོར་རེ་རྡང་ འཇིའི་ མ་འཇིའི་། འགོ་མ་ ཏོ་རྒུན་ ཆ་རྒོའེ་ འིན་ན་ ཐ་མེ་ ཏུའི་ ཏ་རུང་ མི་ལེབ་།” 10 ཏེ་ནི་ ཁོང་ངེ་ ཁོང་རྒུན་ལ་ མོལ་, “རྒྱལ་ཁབ་ ཅིག་ ཏང་ ཅིག་རྒེ་ ཡང་ རྒྱལ་སྲིད་ ཅིག་ ཏང་ ཅིག་རྒེ་ རྒྱཔ་འགལ་ལ་ མག་ ཏང་ངེན་། 11 ས་ཅ་ མང་པེ་ན་ ལོར་ཧོན་, སྃ་འགུལ་ རྡང་ འཇར་ནེད་རྒུན་ ཡོང་ངེན་, ཡང་ ནམ་ཀེ་ན་ འཇི་ནང་ཅེན་ནེ་ ལྟའ་རྒུན་ འདང་ ཀྲག་པོ་ ལྟའ་རྒུན་ ཆེན་།”
12 “འིན་ན་ ཏོ་རྒུན་ ཆ་སང་ ངུལ་ལ་ ངེ་ཀ་ ཏེཏ་པ་ ཅོ་ཅེ་རྦོ་ ཁོང་རྒུ་ནི་ ཁྱི་ཞ་ ཟུམ་འདེ་ ནག་ ལྟན་ནེན་, འདུ་ཀང་རྒུ་ནི་ན་ ཁྱེར་རྡེ་ ཙོན་ཁང་ལ་ ཧ་རེན་ ཡང་ ཁྲིམ་ཅེད་རྡེ་ལ་ ཀ་ལོན་ འདང་ རྒྱ་སྤོ་རྒུ་ནི་ཀ་ ཁྱེར་རེན་། 13 ཏེ་ཏུའི་ ཁྱི་ཞ་, ང་ སུ་ འིན་ཀན་འབེ་ སྤང་པོ་ ཁོང་རྒུན་ལ་ ཏང་ཅེ་ ཧབ་ ཐོབ་རྦེན་། 14 འིན་ན་ ཁོང་རྒུ་ནི་ འདུན་ལ་ ཁྱི་ཞ་ རྐྱོན་མེད་ ཀ་ཟུག་རྒེ་ ལྟན་ནེན་ སམ་འདེ་ ངུལ་ལ་ ཚེར་ མ་ཚེར་། 15 ཅེ་ཟེར་ནི་ ངེ་ ཁྱི་ཞ་རྒུན་ལ་ ཏུ་ཟུག་ སྤེ་ར་ རྡང་ ཤེ་རབ་ ཏང་ངེན་, ཁྱི་ཞི་ འགྲ་ཝོ་ སུ་ཞི་ལ་ ཏོ་ལ་ རྒྱཔ་འགལ་ ཡང་ ལེན་ཏང་ མི་ཉེན་། 16 ཕ་མ་, ཨ་ཅོ་ནོ་, ཉེན་ འདང་ ཡ་ཏོ་རྒུ་ནི་ལ་ ཁྱི་ཞ་ ངོ་ལོག་ ཅོའེ་རྡེ་ ཁྱི་ཞ་ ཁ་ཅིག་ སེད་ཅུག་རྒེན་། 17 ཁྱི་ཞ་ ངེ་ཀ་ ཏེཏ་པ་ ཅོ་ཅེ་འབོ་ མི་ཚང་མེ་ ཁྱི་ཞ་ སོག་པོ་ ཅོའེན་། 18 འཇིའི་ མ་འཇིའི་ཧེ་ ཁྱི་ཞ་རྒུ་ནི་ འགོའེ་ རལ་ཉག་ ཅིག་ལ་ མེ་ཀན་ ཆ་ཅུག་རྒེ་ མི་ཛེད་། 19 ངེ་ན་ རྟེམ་པོ་ འདེད་ནི་ ཁྱི་ཞ་ ཐ་མེད་པེ་ མི་ཙེ་ ཐོབ་རྦེན་།”
20 “ཁྱི་ཞི་, ཡེ་རུ་ཤ་ལེམ་མེ་ རྒྱལ་ས་ མག་མི་རྒུ་ནི་ ཧོར་ལ་ ཐོང་ངེ་རྡང་, ཏོ་ མེ་ཀན་ ཆ་ཅེ་ ཏུའི་ ཉེ་མོ་ ལེབ་ཏེ་ འིན་ཀན་འབོ་ ཤེ་རྒོའེ་། 21 ཏེ་ནི་ ཡ་ཧུ་འདཱེ་ ཡུལ་ཞོང་ངེ་ན་ འདེད་ཀན་རྒུན་ རི་རྒུན་ལ་ ཤོར་རྒོའེ་, ཡེ་རུ་ཤ་ལེམ་མེ་ རྒྱལ་སེ་ན་ ཡོ་ཀན་རྒུན་ ཕི་ལོག་ལ་ འབིང་རྒོའེ་, ཡང་ ཕི་ལོག་ལ་ ཡོ་ཀན་རྒུན་ རྒྱལ་སེ་ན་ ལོག་ཏེ་ ཆ་ མི་རྒོའེ་། 22 འི་ཏུའི་རྦོ་ནི་ ཀོན་འཇོག་རྒེ་ ཆེད་པེ་ ཏུའི་ འིན་, ཏོ་རྦེ་ ཏམ་པེ་ སུང་རབ་རྦེ་ན་ འབྲི་ཀན་ ཚང་མ་ ཀྲུབ་རྦེན་། 23 ཏེ་ཏུའི་ལ་ རྐྱེ་ཅེ་མ་ རྡང་ ཕྲུ་རྒུ་ལ་ འོ་མ་ ཏང་ཀ་ནེ་ ཨ་མ་རྒུན་ལ་ ཙམ་ཤིག་རྒེ་ འཇི་སྤ་ ནོག་, འི་ ས་ཅེ་ན་ རྡུ་ངལ་ ཀྲག་པོ་ ཆེན་, ཡང་ འི་ མི་རྒུ་ནི་ཀ་ ཐུག་སྲོ་ ཀྲག་པོ་ པབ་རྦེན་། 24 འགྲ་ཝེ་ མག་མི་རྒུ་ནི་ ཁོང་རྒུན་ སེད་རྡེན་ ཡང་ ཞེན་ རྒྱལ་ཁབ་ ཚང་མེ་ན་ ཙོན་པ་ ཅོའེ་རྡེ་ ཁྱེར་རེན་, ཡང་ ཡ་ཧུ་འདཱ་པ་ མན་ཀན་རྒུ་ནི་ ཡེ་རུ་ཤ་ལེམ་པ་རྒུན་ ཝང་ངེ་ ཡོག་ལ་ ནེན་འདེ་ པོ་རེན་ ནམ་ཚུག་པ་ ཁོང་རྒུ་ནི་ ཏུའི་རྦོ་ ཚང་ མི་ཚང་།”
25 “ཉི་མ་, ལྡ་ཝ་ རྡང་ ཧར་མ་རྒུ་ནི་ན་ ལྟའ་རྒུན་ ཐོང་ངེན་། རྒྱམ་ཚོའེ་ ཧད་ ཀྲག་པོ་ རྡང་ ཆུལ་རྦག་ ཆོན་མོ་ ལྃ་ཤེ་རྦེ་ འཇིག་རྟེན་ནེ་ཀ་ རྒྱལ་ཁབ་ ཚང་མེ་ མི་རྒུན་ འཇིའི་རྡེ་ ཅིག་ ཏང་ ཅིག་ལ་ ཅི་ སོང་འདེ་ ནོག་ ཟེར་རྡེ་ འདྲིན་། 26 ཀོན་འཇོག་རྒེ་ ནམ་ཀེ་ ཝང་རྒུན་ སྲག་རྒེ་ ཛེད་ཀན་འབོ་ ཐོང་ངེ་རྡང་ འཇིག་རྟེན་ནེ་ཀ་ ཅི་ ཆེན་ སམ་འདེ་ འཇི་ནང་ངེ་ན་ མི་རྒུན་ མུན་ནེན་། 27 ཏེ་ནི་ ཁོང་རྒུ་ནི་ མི་རིག་རྒེ་པུ་ ཝང་ འདང་ ཟི་ཞིད་ ཀྲག་པོ་ ཉམ་པོ་, སྲིན་ནེ་ཀ་ ཞོན་འདེ་ ཡོང་ངེ་ ཐོང་ངེན་། 28 ཏོ་རྒུན་ ཆ་ ཐོང་ངེ་རྡང་, ལྃ་རྡེ་ འགོ་ ཏག་ཏེ་ ལྟག་ལ་ ལྟོའེན་ ཅེ་ཟེར་ནི་ ཁྱི་ཞི་ ཐར་པ་ ཉེ་མོ་ ལེབ་ཏེ་ ནོག་།”
29 ཏེ་ནི་ ཡི་ཤུའི་ ཁོང་རྒུན་ལ་ འི་ སྲུང་ངུ་ ཤེད་རྡེ་ ཛེད་, “སྤིག་རྒེ་ ཁ་ཟོའེ་ ལྕང་མ་ རྡང་ ལྕང་མ་ ཚང་མ་ ལྟོའེ་། 30 ཏོ་རྒུན་ལ་ ལོ་མ་ འབིང་ངེ་རྡང་, ཁྱི་ཞ་ ཡར་ ཉེ་མོ་ ལེབ་ཀན་འབོ་ ཤེ་རྡེ་ནོག་། 31 ཏེ་རྒ་ ཙོག་སེ་ ཁྱི་ཞ་རྒུ་ནི་ ཏེ་ ལྟའ་རྒུན་ ཐོང་རྒྱ་ལ་, ཁྱི་ཞི་ ཀོན་འཇོག་རྒེ་ རྒྱལ་སྲིད་ ཉེ་མོ་ལ་ ལེབ་ཏེ་ འིན་ཀན་འབོ་ ཤེའེ་རྡེ་འིན་། 32 ངེ་ ཁྱི་ཞ་ རྡེན་འབའ་ ཟེ་འིན་, འི་ མི་རབ་པོ་ མེ་ཀན་ ཆ་སང་ ངུལ་ལ་ ཏོ་ ཚང་མ་ ཆེན་། 33 ནམ་ཀ་ རྡང་ འཇིག་རྟེན་ ཉ་ཧ་ མེ་ཀན་ ཆེན་, འིན་ན་ ངེ་ ཟེར་ཧན་རྒུན་ མེ་ཀན་ མ་ནི་ མི་ཆ་།”
34 “འགྲོན་ ཏང་ཅེ་ རྡང་ ར་རོའེ་ཤེ་ རྡང་ འི་ མི་ཙེ་ ཚེར་ཧ་རྒུ་ནི་ ཁྱི་ཞ་རྒུ་ནི་ སེམ་ ཀོན་འཇོག་ནི་ ཐག་རིང་ལ་ མི་ཁྱེར་ཤེ་ལ་ ཤང་ ཅོའེ་། ཏུ་ཟུག་ མ་ཅོ་ནི་, ཏེ་ ཞག་པོ་ ལེབ་ཏེ་ ཧུན་མེད་ལ་ ཁྱི་ཞ་རྒུན་ ཁད་རྡེན་, 35 ཏེ་ ཞག་པོ་ འཇིག་རྟེན་ནེ་ཀ་ མི་ཙེ་ པུད་ཀན་ ཚང་མེ་ཀ་ པབ་རྦེན་། 36 ཏུའི་རྒྱུན་ ཤང་ ཅོའེ་རྡེ་ འདོད་ ཡང་ འི་ ཆ་ཅེ་ཅེན་ནེ་ ནེ་ལུག་ ཚང་མ་ནི་ ཐར་ཤེ་ རྡང་ མི་རིག་རྒེ་པུའི་ འདུན་ལ་ འཇིའི་ མ་འཇིའི་ ལྃ་རྡེ་ འདེད་ ཉེན་ཅེ་ལ་ མོ་ལམ་ ཞུའི་།”