ཡི་ཤུའི་ ཝང་ཆ་ རྒྱཔ་འགལ་།
20
ཞག་ཤིག་ ཡི་ཤུའི་ མི་རྒུན་ལ་ ཀོན་འཇོག་རྒེ་ ཁང་པེ་ན་ ལབ་ཞ་ ས་ལེན་ ནེ་ཚུལ་ ཟང་པོ་ ཤེད་རྡེ་ ཛེ་རྡེན་ ཡོད་ཟ་ནི་, ལ་མ་ འུ་རྐྱོང་རྒུན་, ཆོའེ་ཁྲིམ་ལ་ ཁེ་སྤ་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུན་ ཁོང་ས་ ཡོྃ་རྡེ་ 2 འདྲི་, “ང་ཞ་ ཤོད་རྡང་, ཀ་ ཝང་ཆ་ ཉམ་པོ་ ཁྱེ་རང་ངེ་ ཡུ་རྒུན་ ཅོའེན་ ཡང་ ཁྱེ་རང་ལ་ འི་ ཝང་ཆ་ སུའི་ ཏྃ་?”3 ཡི་ཤུའི་ ཁོང་རྒུན་ལ་ མོལ་, “ངེ་ལ་ ཁྱི་ཞ་རྒུན་ལ་ ཏྲི་ཝ་ཞིག་ འདྲི་འིན་, ཤོད་རྡང་, 4 ཡོ་ཧཱ་ནན་ལ་ ཁྲུའི་སལ་ཅེ་ ཝང་ཆ་ ཀོན་འཇོག་རྒེ་ ཆོག་ནི་ ཐོབ་ཏེ་ ནོག་རྒེ་ ཡ་ མི་ ཆོག་ནི་?”
5 ཁོང་རྒུ་ནི་ ཁོ་རང་རྒུ་ནི་ ཕྲོ་ སྤེ་ར་ ཏྃ་རྡེ་ ཟེར་, “ཀལ་ཏེ་ ཀོན་འཇོག་རྒེ་ ཆོག་ནི་ ནོག་ ཟེར་ནི་ ཁོའེ་ ཨ་ཧོ་ལ་, ‘ཁྱི་ཞི་ ཁོའེ་ཀ་ ཏེཏ་པ་ ཅེ་ མ་ཅོའེ་རྦེན་’ ཟེ་རེན་། 6 འིན་ན་ ཀལ་ཏེ་ ‘མི་ ཆོག་ནི་ ནོག་’ ཟེར་ནི་, མི་ཚང་མེ་ ཨ་ཧོ་རྒུན་ རྡོ་ རྒྱབ་ཏེ་ སེད་རྡེན་ ཅེ་ཟེར་ནི་ ཁོང་རྒུ་ནི་ ཡོ་ཧཱ་ནན་ ལུང་རྟོན་པ་ འིན་ཀན་འབོ་ལ་ ཏེཏ་པ་ ཅོ་ནོག་།” 7 ཏོ་རྦེ་ཕི་ ཁོང་རྒུ་ནི་ ཡི་ཤུ་ ལེན་ཏྃ་, “ཀ་ནི་ ཐོབ་ཏེ་ འིན་ ང་ཞ་ རྒྱུའི་མེད་།”
8 ཡི་ཤུའི་ ཁོང་རྒུན་ལ་ མོལ་, “ངེ་ལ་ མི་ཤེད་, སུའི་ ཝང་ཆེ་ན་ ངེ་ ཡུ་རྒུན་ ཅོ་ཡོད་།”
ཚེ་འབད་ཀན་ ངན་པ་རྒུ་ནི་ སྲུང་ངུ་།
9 ཡི་ཤུའི་ མི་རྒུན་ལ་ འི་ སྲུང་ངུ་རྦོ་ ཤེད་རྡེ་ ཛེད་, “མི་ཞིག་རྒེ་ ཁོ་རང་ངེ་ ཞིང་ལ་ རྒུན་འགྲུམ་ ཙུག་ཏེ་ ཞེན་ ཚེ་འབད་ཀན་རྒུན་ལ་ ཤེ་ལ་ ཏྃ་ ཡང་ ལོ་ ཁ་ཅིག་ ཁོ་རང་ ཞེན་ཡུལ་ཞིག་ལ་ འདེ་ལ་ སོང་། 10 ལྟོན་ཏོག་རྒེ་ ཏུའི་ལ་ ཤིང་ཏོག་རྒེ་ ཧལ་ལ་ ནེན་ནེ་ལ་ ཁོའེ་ ཁོ་རང་ངེ་ ཡོག་པོ་ཞིག་ ཤེ་ལ་ ཏང་ཀན་རྒུ་ནི་ཀ་ ལམ་ཅུག་། འིན་ན་ ཁོང་རྒུ་ནི་ ཡོག་པོ་ལ་ རྡུྃ་རྡེ་, ཁོ་ ལག་ལྟོང་ལ་ ལོག་ཏེ་ ལམ་ཅུག་། 11 ཞིང་ངེ་ རྡག་པེ་ ཞེན་ཡང་ ཡོག་པོ་ཞིག་ ལམ་ཅུག་, འིན་ན་ ཁོང་རྒུ་ནི་ ཁོ་ རྡུྃ་ ཡང་ ཁྲེལ་རྦ་ ལྟན་འདེ་ ལག་ལྟོང་ལ་ ལོག་ཏེ་ ལམ་ཅུག་། 12 ཁོའེ་ ཡོག་པོ་ སུམ་པ་རྦོ་ ལམ་ཅུག་པེ་ ཁོང་རྒུ་ནི་ ཁོ་ རྡུྃ་རྡེ་ མ་ཀ་ ཕིང་འདེ་ ཕི་ལོག་ལ་ ཕྃ་ཏྃ་།”
13 “ཏེ་ནི་ རྒུན་འགྲུམ་མེ་ ཚེ་རྡེ་ རྡག་པེ་ སམ་, ‘ཏ་ ངེ་ ཅི་ ཅོ་རྒོའེ་? ངེ་ ཤེ་སྤ་ ཅོ་ཀ་ནེ་ པུ་ཙ་ ལམ་ཅུག་ན་ ཁོ་ སི་ཝ་ ཅོ་ མི་ཅོ་ཧེ་།’”
14 “འིན་ན་ ཚེ་འབད་པ་རྒུ་ནི་ པུ་ཙ་ ཐོང་ངེ་རྡང་, ཁོང་རྒུ་ནི་ ཅིག་ ཏང་ ཅིག་ལ་ ཟེར་, ‘འི་ ཞིང་ ནོར་ཧལ་ལ་ ཐོབ་ཅེ་ཅེན་འབོ་ ཡོང་ངེན་ འདུག་, ཤོག་ཧེ་, ཁོ་ སེད་རྡེན་ ཏེ་ནི་ ཁོའེ་ ནོར་ཧལ་རྦོ་ ཨ་ཧོ་ ཐོབ་རྦེན་།’ 15 ཏོ་རྦེ་ཕི་ ཁོང་རྒུ་ནི་ ཁོ་ རྒུན་འགྲུམ་མེ་ ཚེ་ནི་ ཕི་ལོག་ལ་ ཕིང་འདེ་ སེད་།” ཡི་ཤུའི་ འདྲི་ ཛེད་, “ཏེ་ནེ་ ཁོང་རྒུན་ལ་ རྒུན་འགྲུམ་མེ་ ཚེ་རྡེ་ རྡག་པེ་ ཅི་ ཅོའེན་? 16 ཁོ་ ཡོྃ་རྡེ་ ཚེ་འབད་པ་རྒུན་ སེད་རྡེན་, ཡང་ རྒུན་འགྲུམ་མེ་ ཚེ་རྦོ་ ཞེན་ ཚེ་འབད་པ་ རི་ལ་ ཤེ་ལ་ ཏང་ངེན་།”
མི་རྒུ་ནི་ ཏེ་ སྲུང་ངུ་ ཚོར་རེ་རྡང་ ཟེར་, “ཏོ་ཙོག་སེ་ ངན་པ་ མ་ནི་ མ་ཆ་ཤིག་།”
17 འིན་ན་ ཁོང་ངེ་ ཁོང་རྒུན་ལ་ ཟི་རྡེ་ མོལ་, “ཏེ་ནི་ ཏམ་པེ་ སུང་རབ་རྦེ་ན་ འི་ འབྲི་ཧན་འབེ་ ཏོན་ཏག་པོ་ ཅི་ ནོག་?
‘ཀ་ རྡོ་རྦོ་ ཁང་པ་ སིག་ཀན་རྒུ་ནི་ ཕན་མི་ཐོག་ ཐེའེ་,
ཏེ་རྒ་ རྡོ་རྦོ་ ཁང་པེ་ ཀྲུར་རྡོ་ འགྱུར་
ཀའོ་ ཚང་མེ་སང་ ཁག་ཅེན་ རྡོ་རྦོ་ ནོག་།’
18 ཏེ་ རྡོ་ཀ་ རྒག་ཕུག་ཀན་ ཚང་མ་ ལྟུམ་བ་ལྟུམ་པེ་ན་ ཆག་རྒེན་, འིན་ན་ ཏེ་ རྡོ་རྦོ་ ཁོང་རྒུ་ནི་ཀ་ ཀྲུལ་ནི་, ཁོང་རྒུན་ མེ་ཀན་ ཆེན་།”
19 ཆོའེ་ཁྲིམ་ལ་ ཁེ་སྤ་རྒུན་ འདང་ ལ་མ་ འུ་རྐྱོང་རྒུ་ནི་ ཏེ་རྒ་མ་རྒ་ ཡི་ཤུ་ ཟུམ་ཅེ་ཕི་ འདོད་པ་ ཡོད་པེན་, ཅེ་ཟེར་ནི་ ཏེ་ སྲུང་འབོ་ ཁོང་རྒུ་ནི་ རྒྱཔ་འགལ་ལ་ ཤེད་རྡེ་ འིན་ཀན་འབོ་ ཧ་ཀོ་། འིན་ན་ ཁོང་རྒུན་ མི་རྒུན་ལ་ འཇིའི་།
རོམ་མེ་ རྒྱ་སྤོ་ ཁྲལ་ ཤལ་ཤེ་།
20 ཁོང་རྒུ་ནི་ མི་ ཀྲང་པོ་ འིན་ཟུན་ ཏྃ་རྡེ་ ཡི་ཤུའི་ཀ་ ནྃ་རྟག་ པོ་རེ་ལ་ སོ་ཝ་རྒུན་ ཀལ་། ཁོང་རྒུ་ནི་ ཡི་ཤུའི་ མོལ་ཧན་ནེ་ སྤེ་རེ་ན་ ཁོང་ ཁད་ཅུག་ཏེ་ རོམ་མེ་ ཀ་ལོན་ནེ་ ལག་ལ་ ལྟེད་ཅེ་ འདོད་པ་ ཅོ་ཡོད་པེན་། 21 སོ་ཝ་རྒུ་ནི་ ཡི་ཤུ་ འདྲི་, “ལོབ་རྦོན་ལེ་, ཉེ་རང་ངེ་ མོལ་ཧན་ འདང་ ལབ་ཞ་ སལ་ཧན་འབོ་ ཀྲང་པོ་ ཡང་ མི་ན་ ཡ་པེ་ མ་ཛེད་རྡེ་ ཀྲང་པོ་ ཉམ་པོ་ ཀོན་འཇོག་རྒེ་ ལམ་མེ་ཀ་ འགྲུལ་ཅེ་ ལབ་རྦེ་ ཛེད་ཀན་འབོ་ ང་ཞ་ རྒྱུའི་ཡོད་། 22 མོལ་ལེ་ ཛེད་རྡང་, རོམ་མེ་ རྒྱ་སྤོ་ལ་ ཁྲལ་ ཤལ་ཅེའོ་ འོའེ་སྤ་ ནོག་རྒེ་ ཡ་ མག་?”
23 ཡི་ཤུའི་ ཁོང་རྒུ་ནི་ ཅུའི་ངན་ ཁྱེན་འདེ་, ཁོང་རྒུན་ལ་ མོལ་ 24 “རོམ་པེ་ མུལ་ལེ་ པེ་ནེ་ཞིག་ ང་ ལྟོན་ནྃ་། འི་ པེ་ནེ་ཀ་ ཡོ་ཀ་ནེ་ པར་ རྡང་ མིང་ སུའི་ ནོག་?”
ཁོང་རྒུ་ནི་ ལེན་ཏྃ་, “རོམ་མེ་ རྒྱ་སྤེ་།”
25 ཁོང་ངེ་ ཁོང་རྒུན་ལ་ མོལ་, “རྒྱ་སྤེ་ འིན་ཀན་འབོ་ རྒྱ་སྤོ་ལ་ ཏོང་ ཡང་ ཀོན་འཇོག་རྒེ་ འིན་ཀན་འབོ་ ཀོན་འཇོག་ལ་ པུལ་།”
26 མི་རྒུ་ནི་ འདུན་ལ་ ཁོང་ངེ་ མོལ་ཧན་འབོ་ རྒྱུད་ཏེ་ ཡི་ཤུ་ ཁད་ཅུག་ མ་ཉེན་ ཡང་ ཁོང་ངེ་ ལེན་སལ་ཧན་འབོ་ལ་ ཧ་ལེ་རྡེ་ ཁོང་རྒུན་ ཡའང་ སོང་།
སོན་པོ་ ལྃ་ཤེ་ ཧོར་ལ་ ཏྲི་ཝ་།
27 ཏེ་ནི་ ཤི་ཀན་རྒུན་ སོན་པོ་ ལྃ་རྡེ་ མག་ ཟེར་ཧ་ནེ་ ས་འདུ་ཀི་པ་ ཁ་ཅིག་ ཡི་ཤུ་ས་ ཏྲི་ཝ་ཞིག་ འདྲི་ལ་ ཡོྃ་, 28 ཁོང་རྒུ་ནི་ ཟེར་, “ལོབ་རྦོན་ལེ་ མོ་ཤེ་རྡེ་ ཨ་ཧོ་རྒུན་ལ་ ཁྲིམ་འཇིག་ སལ་ལེ་ ཛེད་ཏེ་ འདུག་, ‘ཀལ་ཏེ་ པུ་ཙ་ཞིག་ ཕྲུ་རྒུ་ མེད་རྡེ་ ཤི་ནི་, ཨ་ཅོ་ ཡང་ ནོའེ་ ཁོའེ་ ཕར་རྒྱུད་ ལུའི་ཤེ་ཕི་ ཤི་ཀ་ནེ་ ན་མ་ ཉམ་པོ་ པག་རྟོན་ ཅོའེ་རྡེ་ ཕྲུ་རྒུ་ རྐྱེ་ཅུག་ རྒོའེ་།’ 29 ཏ་ ཨ་ཅོ་ནོ་ རྡུན་ ཡོད་པེན་, ཏང་པོ་རྦེ་ ན་མ་ ཅོའེ་ ཡང་ ཕྲུ་རྒུ་ མེད་པེ་ ཤི་, 30 ཏེ་རྒ་ ཙོག་སེ་ ཉི་སྤ་ 31 རྡང་ སུམ་པ་རྦོ་ མ་ཚེད་ རྡུན་ཀེ་ ཏེ་རྒ་ པོ་མོ་ ཉམ་པོ་ ན་མ་ ཅོའེ་ འིན་ན་ ཕྲུ་རྒུ་ མེད་པེ་ ཤི་, 32 ཡང་ ལྟིང་འཇུག་ལ་ པོ་མོ་རྦོ་ ཤི་། 33 པོ་མོ་རྦེ་ ཁོང་ རྡུན་ཀ་ ཉམ་པོ་ ན་མ་ ཅོའེ་རྦེ་, ཤི་ཀན་རྒུན་ སོན་པོ་ ལྃ་རྡེ་ ཏུའི་ལ་ ཁོ་ ཁོང་རྒུ་ནི་ ནང་ནི་ སུའི་ ན་མ་ འགྱུ་རེན་?”
34 ཡི་ཤུའི་ ལེན་སལ་, “འི་ འཇིག་རྟེན་ནེ་ མི་རྒུ་ནི་ པག་མ་ ཅོ་ནོག་། 35 འིན་ན་ ཡོང་ཅེ་ཅེན་ནེ་ ཏུའི་ན་ ཤི་ཀན་རྒུ་ནི་ ཕྲོ་ནི་ སོན་པོ་ ལྃ་ཤེ་ འོའེ་སྤ་ ཡོ་ཀན་རྒུ་ནི་ ན་མ་ མི་ཅོ་ ཡང་ པག་མ་ མི་ཏང་། 36 ཡང་ ཁོང་རྒུན་ ཡང་ མ་ནི་ མི་ཤི་ ཅེ་ཟེར་ནི་ ཁོང་རྒུན་ རྡེ་བ་ཅན་ནེ་ ཕོ་ཉ་ ཙོག་སེ་ ནོག་། ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཅེ་ཀ་ནི་ ཁོང་རྒུན་ ཀོན་འཇོག་རྒེ་ ཕྲུ་རྒུ་རྒུན་ ནོག་།”
37 “རྦུར་སེ་ ལྕང་མ་ མེ་ལ་ འབར་ཧ་ནེ་ ཧོར་ལ་ འབྲི་ ཛེད་ཀན་འབེ་ན་ མོ་ཤེ་ལ་ ཤི་ཀན་རྒུན་ སོན་པོ་ ལང་ངེ་ ཛེད་ཅེ་འབོ་ ལྟན་ནེ་ནོག་, ཅེ་ཟེར་ནི་ ཁོའེ་ ཙོབོ་ ཀོན་འཇོག་ལ་ ‘ཨབ་ར་ཧམ་མེ་ ཀོན་འཇོག་, ཨི་སཱག་རྒེ་ ཀོན་འཇོག་ ཏང་ ཡ་ཀུབ་རྦེ་ ཀོན་འཇོག་’ ཟེར་། 38 ཏོ་རྦེ་ ཁོང་ནི་ ཤི་ཀན་རྒུ་ནི་ ཀོན་འཇོག་ མ་ནོག་, སོན་པོ་རྒུ་ནི་ ཀོན་འཇོག་ ཞུ་རྡེ་ འིན་ཀན་འབོ་ ལྟན་ནེ་ནོག་, ཅེ་ཟེར་ནི་ ཁོང་ ཚང་མ་ ཀོན་འཇོག་རྒེ་ འདུན་ལ་ སོན་པོ་ ནོག་།”
39 ཆོའེ་ཁྲིམ་ལ་ ཁེ་སྤ་ མི་ ཁ་ཅིག་རྒེ་ ཁོང་ལ་ ཟེར་, “ལོབ་རྦོན་ལེ་, ཉེ་རང་ངེ་ ལེན་ རྒྱ་ལེ་ སལ་།” 40 ཏེ་ནི་ཕ་ལ་ སུ་ཞིག་རྒེ་ ཁོང་ལ་ ཏྲི་ཝ་ འདྲི་ཅེ་ ཧམ་བ་ མ་ཅོའེ་།
རྒྱ་སྤོ་ འདཱ་འབིད་རྡེ་ སྲེ་ སུ་ འིན་།
41 ཏེ་ནི་ ཡི་ཤུའི་ ཁོང་རྒུན་ལ་ མོལ་, “ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་, རྒྱ་སྤོ་ འདཱ་འབིད་རྡེ་ ཕར་རྒྱུད་ ནོག་ ཀ་ཟུག་རྒེ་ ཟེ་རེ་ནོག་? 42-43 སུང་འགུར་རེ་ སྤེ་ཆེ་ན་ འདཱ་འབིད་རྡེ་ འབྲི་རྡེ་ འདུག་,
‘ཀོན་འཇོག་རྒེ་ ངེ་ ཙོབོ་ མོལ་།
“ངེ་ ཁྱེ་རང་ངེ་ འགྲ་ཝོ་ ཚང་མ་,
ཁྱེ་རང་ངེ་ ཧང་པེ་ ཡོག་ལ་ པོར་པོར་ཚུག་པ་,
ཁྱེ་རང་ ངེ་ ལག་པ་ ཡོའེ་སྤེ་ ཁྲིའི་ཀ་ འདོད་།”’
44 ཀལ་ཏེ་ འདཱ་འབིད་རྡེ་ མ་ཤི་ཀ་ ‘ཙོབོ་’ ཟེར་རེ་ཡོད་ནི་, ཏེ་ནི་ ཀ་ཟུག་རྒེ་ མ་ཤི་ཀ་ ཁོའེ་ ཕར་རྒྱུད་ ནོག་?”
ཆོའེ་ཁྲིམ་ལ་ ཁེ་སྤ་རྒུ་ནི་ ཤང་ ཅོའེ་།
45 མི་ཚང་མ་ ཉེན་ནེན་ ཡོད་ཟ་ནི་ ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ མོལ་, 46 “ཆོའེ་ཁྲིམ་ལ་ ཁེ་སྤ་རྒུ་ནི་ཀ་ནི་ ཤང་ ཅོའེ་། ཁོང་རྒུན་ ཆོའེ་རྡེ་ ཀོའེ་ལག་ རིང་མོ་ ཀོན་འདེ་ འགྲུ་ལེ་ལ་, ཡང་ ཁྲོམ་མེ་ན་ མི་རྒུ་ནི་ཀ་ནི་ སི་ཝ་ ཐོབ་ཅེ་ལ་ ཐེད་རྡེ་ནོག་། འདུ་ཀང་ངེ་ན་ སི་ཝ་ཅེན་ནེ་ མལ་ལེ་ཀ་ ཡང་ འགྲོན་ལ་ ཀྲལ་འགོའེ་ཀ་ འདེ་རྡེ་ལ་ ཐེད་རྡེ་ནོག་། 47 འ་ནེ་ མ་རང་མོ་རྒུན་ལ་ འགོ་ཧོར་རྡེ་ ཁོང་ངེ་ ཁང་པ་རྒུན་ ཁྱེར་ཤེ་, ཡང་ མི་རྒུན་ལ་ ལྟན་ཅེ་ཕི་ མོ་ལམ་ རིང་མོ་ ཞུ་རུག་། ཏོ་རྦེ་ ཅོའེ་རྡེ་ ཁོང་རྒུན་ལ་ ཆེད་པ་ སྲན་ཀྲེ་ ཕོག་རྒེན་།”