འ་ནེ་ མ་རང་མོ་ རྡང་ ཁྲིམ་སྤོན་།
18
ཞག་ཤིག་ ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ སུན་ མ་སུན་ ཏུའི་རྒྱུན་ མོ་ལམ་ ཞུ་རྒོ་ཤེ་ལ་ ལབ་ཞ་ ས་ལེན་ སྲུང་ངུ་ཞིག་ ཤེད་རྡེ་ ཛེད་། 2 “རྒྱལ་ས་ཞིག་རྒེ་ན་ ཀོན་འཇོག་ལ་ མི་འཇིའི་ཀན་ ཡང་ མི་རྒུན་ལ་ སི་ཝ་ མེ་ཀ་ནེ་ ཁྲིམ་སྤོན་ཞིག་ ཡོད་པེན་། 3 ཏེ་རྒ་ རྒྱལ་སེ་ན་ འ་ནེ་ མ་རང་མོ་ཞིག་ ཞག་ཏང་ ཁོའེ་ཀ་ ཡོྃ་རྡེ་ ཞུ་ཝ་ པུལ་ལེ་ཡོད་པེན་, ‘ང་ ངེ་ འགྲ་ཝེ་ཀ་ནི་ འོའེ་སྤེ་ ཁྲིམ་ཅེད་ ཅོའོ་ ཛེད་།’ 4 ཁྲིམ་སྤོན་ནེ་ ལེན་ མང་པོ་ ཁོའེ་ ཞུ་ཝ་ ནྃ་ མ་ཏྃ་ འིན་ན་ ལྟིང་འཇུག་ལ་ ཁོའེ་ སམ་, ‘ང་ ཀོན་འཇོག་ལ་ མི་འཇིའི་ཀན་ ཡང་ མི་རྒུན་ལ་ སི་ཝ་ མེ་ཀན་ 5 འིན་ན་ འི་ འ་ནེ་ མ་རང་མོ་རྦེ་ ང་ ནྃ་ ཚེར་ཤུག་པེ་, ངེ་ ཁོ་ འོའེ་སྤེ་ ཁྲིམ་ཅེད་ ཏང་ངེན་, ཏེ་མ་ནི་ ཁོ་ ཞག་ཏང་ ཡོྃ་རྡེ་ ང་ སེམ་མེ་ ཐིལ་ནི་ ངལ་ཤུག་རྒོག་།’”6 ཙོབོ་ ཡི་ཤུའི་ མོལ་, “ཁྲིམ་སྤོན་, འོའེ་སྤ་ མ་ཅོ་ཀ་ནེ་ སྲུང་ངུ་རྦེ་ཀ་ནི་ ལབ་ཞ་ ནེན་། 7 ཀོན་འཇོག་རྒེ་ ཚེན་ཉིན་ མེད་པེ་ ཁོང་ལ་ མོ་ལམ་ ཞུ་ཀན་, ཁོང་ངེ་ འདམ་མེ་ ཛེད་ཀན་རྒུན་ལ་ འོའེ་སྤེ་ ཁྲིམ་ཅེད་ མི་ཛེད་རྡེ་? ཅི་ ཀོན་འཇོག་རྒེ་ ཁོང་རྒུན་ལ་ ཡ་ཏོ་ ཅོ་ལ་ འགོར་ཤུག་རྒེ་ ཛེ་རྡེན་ནེ་? 8 ངེ་ ཁྱི་ཞ་ ཟེ་འིན་, འགྱོ་སྤ་ ཁོང་རྒུན་ལ་ འོའེ་སྤེ་ ཁྲིམ་ཅེད་ ས་ལེན་། འིན་ན་ མི་རིག་རྒེ་པུ་ ཡོང་ངེ་ ཏུའི་ལ་ ཁོ་ འཇིག་རྟེན་ནེ་ཀ་ ཏེཏ་པ་ཅེན་ ཐོང་ངེན་ནེ་?”
པ་རུ་ཤི་པ་ རྡང་ ཁྲལ་ནེན་ཀ་ནེ་ སྲུང་ངུ་།
9 རང་ ཀྲང་པོ་ འིན་ཀན་འབེ་ཀ་ ལོ་ཁྱེལ་ ཡང་ ཞེན་ ཚང་མ་ ཐུ་ཤོག་ སམ་ཀན་ ཁ་ཅིག་ལ་, ཡི་ཤུའི་ འི་ སྲུང་ངུ་རྦོ་ ཤེད་རྡེ་ ཛེད་, 10 “མི་ ཉི་ ཀོན་འཇོག་རྒེ་ ཁང་པ་ལ་ མོ་ལམ་ ཞུ་ལ་ སོང་, ཅིག་པོ་ པ་རུ་ཤི་པ་ ཡང་ ཅིག་པོ་ ཁྲལ་ནེན་ཀེན་a། 11 པ་རུ་ཤི་པའོ་ ལྃ་རྡེ་ ཁོ་རང་ངེ་ ཧོར་ལ་ མོ་ལམ་ ཞུའི་, ‘ཀོན་འཇོག་, ང་ ཉེ་རང་ངེ་ ཞེན་ མི་རྒུན་ ཡང་ནི་ ཅག་པ་, མི་ངན་པ་, ལོག་ཡེམ་ ཅོ་ཀན་, ཡང་ འི་ ཁྲལ་ནེན་ཀན་འབོ་ ཙོག་སེ་ མི་ཛེད་ཅེ་ལ་ ངེ་ ཐུག་ཞེ་ཆེ་ ཞུ་ཡོད་། 12 ང་ རྡུན་ཞག་རྒེ་ན་ ལེན་ ཉི་ ཉུང་ནེ་ལ་ འདེད་རྡེ་ཡོད་, ཡང་ ངེ་ ཡོང་རྒོ་ ཚང་མེ་ ཅུ་ ཁག་པོ་ ཉེ་རང་ལ་ པུ་ལེ་ཡོད་།’”
13 “འིན་ན་ ཁྲལ་ནེན་ཀན་འབོ་ ཞེན་རྒུ་ནི་སང་ ཐག་རིང་ལ་ ལྃ་རྡེ་ འགོ་ རྒུའི་རྡེ་ ནམ་ཀ་ མ་ལྟ་ལ་, ཀྲང་ རྡུང་ངེན་ མོ་ལམ་ ཞུའི་, ‘ཀྱེ་ ཀོན་འཇོག་, ང་ རྡིག་ཅེན་ལ་ ཉིང་ཞེ་ ཛེད་།’”
14 “ངེ་ ཁྱི་ཞ་ ཟེ་འིན་, ཀོན་འཇོག་རྒེ་ ཧུ་འདུན་ལ་ པ་རུ་ཤི་པའོ་ མན་པ་ འི་ མི་རྦོ་ལ་ ཤག་སྤ་ ཐོབ་ཏེ་ ཁོ་རང་ངེ་ ཁང་པ་ ལོག་ཏེ་ སོང་ ཅེ་ཟེར་ནི་ ཀྲག་པོ་ ལྟན་ཀན་ ཚང་མ་ པབ་མོ་ ཅོའོ་ ཛེ་རྡེན་ ཡང་ ཁོ་རང་ པབ་མོ་ པོར་ཧན་འབོ་ལ་ སི་ཝ་ སལ་ལེ་ ཛེ་རྡེན་།”
ཡི་ཤུའི་ ཕྲུ་རྒུ་ ཆུང་ཙེ་རྒུན་ལ་ ཅིན་ལབ་ སལ་།
15 ཞག་ཤིག་ མི་རྒུ་ནི་ ཕྲུ་རྒུ་ ཆུང་ཙེ་རྒུན་ ཡི་ཤུའི་ ཆག་སེ་ ཛེད་ཏེ་ ཅིན་ལབ་ སལ་ཅེ་ལ་ ཁྱོྃ་། ཏོ་ ཐོང་ངེ་རྡང་ ལོབ་ཀྲུག་རྒུ་ནི་ ཁྱོང་ཀན་རྒུན་ལ་ ཡི་ཤུ་ འོབ་རྒྱལ་ ལྟན་ཅེ་ཀ་ནི་ ཁར་རྐྱག་ ཏྃ་།
16 འིན་ན་ ཡི་ཤུའི་ ཕྲུ་རྒུ་རྒུན་ ཁོ་རང་ས་ འབོ་ ཛེད་ཏེ་ མོལ་, “ཕྲུ་རྒུ་ ཆུང་ཙེ་རྒུན་ རྒག་ མ་རྒག་ལ་ ང་ས་ ཡོང་ཅུག་, ཡུ་རྒུ་ནི་ཕི་ ཀོན་འཇོག་རྒེ་ རྒྱལ་སྲིད་པོ་ འིན་། 17 ངེ་ ཁྱི་ཞ་ རྡེན་འབའ་ ཟེ་འིན་, ཀོན་འཇོག་རྒེ་ རྒྱལ་སྲིད་ ཕྲུ་རྒུ་ ཆུང་ཙེ་རྒུན་ ཙོག་སེ་ ནེན་འདེ་ མ་ནི་ ཏེ་ན་ ཞུའུ་ མི་ཉེན་།”
མི་ ཆུག་པོ་ཞིག་རྒེ་ སྲུང་ངུ་།
18 ཡ་ཧུ་འདཱ་པེ་ སྤོན་འབོ་ཞིག་རྒེ་ ཡི་ཤུ་ འདྲི་, “ལོབ་རྦོན་ ཟང་པོ་ལེ་, ཐ་མེད་པེ་ མི་ཙེ་ ནོར་ཧལ་ལ་ ཐོབ་ཅེ་ཕི་ ཅི་ ཅོ་རྒོའེ་?”
19 ཡི་ཤུའི་ ཁོ་ འདྲི་ ཛེད་, “ཅི་ཕི་ལ་ ཁྱེ་རང་ངེ་ ང་ ཟང་པོ་ ཟེ་འིན་? ཀོན་འཇོག་ ཅིག་པོ་ མ་ཐེ་ལ་ སུ་ལ་ ཟང་པོ་ མན་། 20 ཁྱེ་རང་ངེ་ ཀཱ་རྒྱ་རྒུན་ ཤེ་རྡེ་ནོག་: རང་ངེ་ ཞི་མེད་ མན་ཀན་ ཞེན་མ་ ཉམ་པོ་ ལུའི་འབྲེལ་ ‘མ་ཅོ་, མི་ མ་སེད་, ཧུ་མ་ཧུ་, ཟུན་ནེ་ སྤང་པོ་ མ་ཏྃ་, རང་ངེ་ ཨ་རྦ་ རྡང་ ཨ་མ་ སི་ཝ་ ཅོའེ་།’”
21 ཁོའེ་ ཡི་ཤུ་ ཟེར་, “ཏེ་ ཚང་མ་ ངེ་ ཆུང་ཏུའི་ནི་ཕ་ལ་ སྲུྃ་རྡེ་ འིན་།”
22 ཏོ་ སན་ནེ་རྡང་ ཡི་ཤུའི་ ཁོ་ མོལ་, “ཏ་རུང་ ཁྱེ་རང་ལ་ ཅོ་རྒོ་ཤེ་ ཅིག་ ལུའི་རྡེ་ འདུག་། སོང་ ཡང་ ཁྱེ་རང་ངེ་ རྒྱུ་ནོར་ ཚང་མ་ ཙོྃ་རྡེ་ མུལ་འབོ་ ཉལ་རྦ་ཅེན་རྒུན་ལ་ ཏོང་, རྡེ་བ་ཅན་ནེ་ན་ ཁྱེ་རང་ལ་ པང་ཛོད་ ཐོབ་རྦེན་། ཏེ་ནི་ ཡོྃ་རྡེ་ ངེ་ རྒྱབ་ནི་ འགྲོྃ་།”
23 ཏོ་ ཚོར་རེ་རྡང་, ཁོ་ ཚེར་ཧ་ སྲན་ཀྲེ་ ཡོྃ་ ཅེ་ཟེར་ནི་ ཁོ་ མ་ཆུག་པོ་ ཡོད་པེན་། 24 ཡི་ཤུའི་ ཁོ་ ཟི་རྡེ་ མོལ་, “ཆུག་པོ་རྒུན་ ཀོན་འཇོག་རྒེ་ རྒྱལ་སྲིད་རྡེ་ན་ ལེབ་ཅེ་ ཙམ་ཤིག་རྒེ་ ཀག་སྤོ་ མག་། 25 ནེན་ཏེན་, མི་ ཆུག་པོ་ ཀོན་འཇོག་རྒེ་ རྒྱལ་སྲིད་རྡེ་ན་ ལེབ་ཅེ་སང་ ཁབ་རྦེ་ མིག་ནི་ ང་རྦོང་ ཕིང་ཅེའོ་ ལ་ ཆེན་།”
26 ཏོ་ ཚོར་ཧན་རྒུ་ནི་ ཁོང་ལ་ འདྲི་, “ཏེ་ནི་ སུ་ ཐར་པ་ ཐོབ་རྦེན་?”
27 ཡི་ཤུའི་ ལེན་སལ་, “མི་ ཅོ་ མི་ཉེན་ཀན་འབོ་ ཀོན་འཇོག་ལ་ ཛེད་ ཉེན་ནེ་ནོག་།”
28 པི་ཏྲ་རེ་ ཡི་ཤུ་ ཟེར་, “ཟི་རྡང་ ང་ཞི་ ཅི་ཚང་མ་ ཕྃ་རྡེ་ ཉེ་རང་ལ་ འགྲྃ་རྦེན་།”
29 ཁོང་ངེ་ ཁོང་རྒུན་ལ་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་, ཀོན་འཇོག་རྒེ་ རྒྱལ་སྲིད་རྡེ་ཕི་ ཁང་པ་ ཡང་ ན་མ་ རྡང་ ཨ་ཅོ་ནོ་ ཡང་ ཕ་མ་ རྡང་ ཕྲུ་རྒུ་ ཕང་ཀན་ ཚང་མ་ལ་, 30 འེ་རྒ་ མི་ཙེ་ན་, ཏོ་རྒུ་ནི་ ལྡབ་ མང་པོ་ མ་ཚེད་ ཀོན་འཇོག་རྒེ་ རྒྱལ་སྲིད་རྡེ་ ཏུའི་ལ་ ཐ་མེད་པེ་ མི་ཙེ་ ཐོབ་རྦེན་།”
ཡི་ཤུའི་ ལེན་ སུམ་པ་ ཁོ་རང་ ཀྲོང་ཤེ་ ལུང་རྟན་ སལ་ལེ་ ཛེད་།
31 ཡི་ཤུའི་ ཁོང་ངེ་ ལོབ་ཀྲུག་ ཅུག་ཉི་རྦོ་ སོ་སོ་ ཁྱེར་རྡེ་ མོལ་, “ཨ་ཧོ་རྒུན་ ལྟག་ལ་ ཡེ་རུ་ཤ་ལེམ་ལ་ ཆ་ཅེ་ ནོག་, ཡང་ ལུང་རྟོན་པ་རྒུ་ནི་ མི་རིག་རྒེ་པུའི་ ཧོར་ལ་ འབྲི་ཧན་ ཚང་མ་ འདྲན་འདྲ་ ཀྲུབ་རྦེན་། 32 ཁོ་ ཡ་ཧུ་འདཱ་པ་ མན་ཀན་རྒུ་ནི་ ལག་ལ་ ལྟེ་རྡེན་ ཡང་ ཁོང་རྒུ་ནི་ ཁོ་ ཁྲེལ་རྦ་ ལྟན་འདེ་, ཐུ་ ཏྃ་རྡེ་ རྡང་ རྟལ་ལྕག་ རྒྱབ་ཏེ་ སེད་རྡེན་། 33 ཡང་ ཞག་ སུམ་པེ་ ཞག་ལ་ ཡང་ སོན་པོ་ ལྃ་རྡེན་།”
34 འིན་ན་ ལོབ་ཀྲུག་རྒུན་ལ་ ཁོང་ངེ་ མོལ་ཧན་རྒུན་ ཅང་ ཧ་མ་ཀོ་། ཏེ་ སྤེ་རེ་ ཏོན་རྒུན་ སང་སྤེར་ན་ པོར་རྦེ་ ཁོང་རྒུན་ལ་ ཧ་ཀོ་ མ་ཉེན་།
ཞ་ར་ ལང་ཀན་ཞིག་ ཕན་ཅུག་རྒེ་ ཛེད་།
35 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་, ཡེ་རི་ཀོའེ་ ཉེ་མོ་ལ་ ཡོད་ཟ་ནི་, ཞ་ར་ཞིག་ ལམ་མེ་ ཐ་མ་ ལྃ་རྡེ་ འདེད་ཏེ་ ཡོད་པེན་། 36 ཏེ་ཀ་ནི་ མི་ཚོག་ ཆེན་ ཡོ་ཀན་འབོ་ ཚོར་རྡེ་ ཁོའེ་ ཁོང་རྒུན་ལ་ ཅི་ ནོག་ ཟེར་རྡེ་ འདྲི་? 37 ཁོང་རྒུ་ནི་ ཟེར་, “ན་ཙ་རེད་པ་ ཡི་ཤུ་ རྐྱོད་རྡེན་ ནོག་།” 38 ཏེ་ནི་ ཁོའེ་ ཀུ་ཅུ་ ཏང་ངེན་ ཟེར་, “ཡི་ཤུ་, རྒྱ་སྤོ་ འདཱ་འབིད་རྡེ་ ཕར་རྒྱུད་ ངེ་ཀ་ ཉིང་ཞེ་ ཛེད་།”
39 ངུལ་ལ་ ཆ་ཀན་རྒུ་ནི་ ཁོ་ལ་ ཁར་རྐྱག་ ཏྃ་རྡེ་ ཅེཔ་ཁ་རོག་ ཟེར་, འིན་ན་ ཁོའེ་ མང་ངེ་ ཀུ་ཅུ་ ཏྃ་རྡེ་ ཟེར་, “རྒྱ་སྤོ་ འདཱ་འབིད་རྡེ་ ཕར་རྒྱུད་, ངེ་ཀ་ ཉིང་ཞེ་ ཛེད་རྡང་།”
40 ཡི་ཤུ་ སྲུང་ངེ་ ཛེད་ ཡང་ ཞ་ར་འབོ་ ཁོང་ངེ་ འདུན་ལ་ ཁྱོང་ཅེ་ལ་ མོལ་། ཁོ་ ཡི་ཤུའི་ འདུན་ལ་ ལེབ་རྦེ་རྡང་, ཁོང་ངེ་ ཁོ་ འདྲི་ ཛེད་, 41 “ངེ་ ཁྱེ་རང་ངེ་ཕི་ ཅི་ ཅོ་?”
ཁོའེ་ ཟེར་, “ཙོབོ་ལེ་, ང་ ཡང་ ཐོང་ཅུག་རྒེ་ ཛེད་།”