ལུ་ཀ་ 17

རྡིག་པ་, ཏེཏ་པ་ རྡང་ ཁག་ ཁུར་ཤེ་།

ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ མོལ་, “རྡིག་པེ་ན་ འགྱེལ་ཅུག་ཀན་ ནེན་ཏེན་ ཆེན་, འིན་ན་ ཏོ་ ཆ་ཅུག་ཀན་འབོ་ལ་ ཙམ་ཤིག་རྒེ་ འཇི་སྤ་ མི་ཡོང་། 2 འི་ ཆུང་ཙེ་རྒུ་ནི་ ནང་ནི་ ཅིག་ལ་ རྡིག་པ་ ཅོ་ཅུག་རྒེ་སང་ ཁོ་རང་ངེ་ རྐྱེ་ རན་ཀྲག་རྒེ་ རྡོ་ རྡམ་འདེ་ རྒྱམ་ཚོའེ་ན་ ཕང་ན་ རྒྱལ་། 3 ཏེ་ནི་ ཁྱི་ཞི་ ཅོའེ་རྡེ་ སུ་ཞིག་ལ་ རྡིག་པེ་ན་ མི་འགྱེལ་ཤེ་ལ་ ནེན་ཏེན་ ཅོའེ་།”

“ཀལ་ཏེ་ ཁྱི་ཞི་ སྤུན་ཞིག་རྒེ་ རྡིག་པ་ ཅོ་ནི་, ཁོ་ ཁར་རྐྱག་ ཏྃ་རྡེ་ རྐྱོང་, ཡང་ ཀལ་ཏེ་ ཁོའེ་ འགྱོད་པ་ ཅོ་ནི་ ཤག་སྤ་ ཏོང་། 4 ཀལ་ཏེ་ ཁོའེ་ ཉི་མ་ཅིག་རྒེ་ན་ ལེན་ རྡུན་ ཁྱི་ཞི་ རྒྱཔ་འགལ་ལ་ རྡིག་པ་ ཅོའེ་རྡེ་ ལེན་ རྡུན་ ཁྱི་ཞི་ཀ་ ཡོྃ་རྡེ་ འགྱོད་པ་ ཅོ་ནི་, ཁྱི་ཞི་ ཁོ་ ཤག་སྤ་ ཏོང་།”

5 ཧུ་ཚབ་རྒུ་ནི་ ཙོབོ་ ཡི་ཤུ་ ཟེར་, “ང་ཞ་ ཏེཏ་པེ་ན་ ལྡན་ཅུག་རྒེ་ ཛེད་།”

6 ཙོབོ་ ཡི་ཤུའི་ ལེན་སལ་, “ཀལ་ཏེ་ ཁྱེ་རང་ལ་ ཉུང་ཧར་རེ་ ས་ངོན་ ཆུང་ཙེ་ ཟམ་ཤིག་རྒེ་ ཏེཏ་པ་ ཡོད་ནི་ ཁྱེ་རང་ངེ་ འོ་སེ་ ལྕང་མ་ ཟེར་, ‘པ་ཀྲག་ནི་ པུད་ཏེ་ ཚོའེ་ན་ སོང་’ ཡང་ ཏོ་རྦེ་ ཁྱེ་རང་ངེ་ ཁ་ ཉེ་ནེན་།”

7 “ཁྱེ་རང་ངེ་ ཡོག་པོ་ཞིག་ ཞིང་མོ་ ཡང་ ལུག་ ཚོ་ལ་ སོང་འདེ་ ཁང་པ་ ལོག་ཏེ་ ཡོང་ངེ་རྡང་, ཁྱེ་རང་ངེ་ ཁོ་ ཟེ་རེན་ནེ་, ‘ཤོག་, འེ་ཀ་ འདེད་ཏེ་ ཁར་ཞི་ ཟོ་?’ 8 ཁྱེ་ ཁོ་ མི་ཟེར་རེ་, ‘ཕི་རོའེ་ ཚལ་མེ་ ཀྲལ་འགྲིག་ ཅོའེ་, ཡང་ ང་ ཟ་ རྡང་ ཐུང་ ཚར་ཚར་ཚུག་པ་ རྐྱེ་ར་ ཅིང་འདེ་ ཞབ་རྟོག་ ཅོའེ་, ཏེ་ ལྟིང་ནི་ ཁྱེ་རང་ ཟ་ན་ ཐུང་ན་ འགྲིག་?’ 9 ཟེར་ཧན་ ནང་ཞིན་ ཡོག་པོ་རྦེ་ ཅོའེ་རྦེ་, ཁོ་རང་ངེ་ ཁོ་ ཐུག་ཞེ་ཆེ་ ཟེ་རེན་ནེ་? ནེན་ཏེན་ལ་ མི་ཟེར་། 10 ཏེ་རྒ་ ཙོག་སེ་ མོལ་ཧན་ ནང་ཞིན་ ཁྱི་ཞི་, ཅི་ཚང་མ་ ཅོའེ་ ཚར་རྡེ་, ཁྱི་ཞི་ ཟེར་རྒོའེ་, ‘ང་ཞ་ སི་ཝེ་ འོའེ་སྤ་ མན་ཀན་ ཡོག་པོ་ འིན་, ཁག་ ཀལ་ཧ་ནེ་ ལེ་རྦོ་ ང་ཞི་ ཅོའེ་རྦེན་།’”

ཛེ་ནེད་ ཡོ་ཀན་ ཅུ་ རྒྱལ་ཅུག་རྒེ་ ཛེད་།

11 ཡི་ཤུ་ ཡེ་རུ་ཤ་ལེམ་མེ་ རྒྱལ་ས་ ཆོག་ལ་ རྐྱོད་ཟ་ནི་ ས་མ་རི་ཡཱ་ རྡང་ འགཱ་ལིལ་ལེ་ ཡུལ་ཞོང་ངེ་ པར་ཚམ་ནི་ རྐྱོད་། 12 ཁོང་ འགམ་ཡུལ་ཞིག་རྒེ་ན་ རྐྱོད་ཟ་ནི་ ཛེ་ནེད་ ཡོ་ཀན་ ཅུའི་ ཡི་ཤུ་ ཐོང་ ཡང་ ཐག་རིང་ལ་ འདེད་ཏེ་ 13 ཀུ་ཅུ་ ཏང་ངེན་ ཁོང་རྒུ་ནི་ ཟེར་, “ཡི་ཤུ་ སྤོན་འབོ་ལེ་, ང་ཞི་ཀ་ ཉིང་ཞེ་ ཛེད་རྡང་།”

14 ཁོང་རྒུན་ ཟི་རྡེ་རྡང་ ཁོང་ངེ་ མོལ་, “སོང་, ཁྱི་ཞ་རང་ངེ་ ཟུྃ་སྤོ་ ལ་མ་རྒུན་ལ་ ལྟོན་།” ཁོང་རྒུན་ ཆེན་ ཡོད་ཟ་ནི་ ཁོང་རྒུན་ ཛེ་ནེད་ནི་ ཕན་།

15 ཁོང་རྒུ་ནི་ ཕྲོ་ནི་ ཅིག་རྒེ་ ནེད་ རྒྱལ་ཧན་འབོ་ ཐོང་འདེ་ ཧད་ ཆོན་མེ་ན་ ཀོན་འཇོག་ལ་ རྟོད་པ་ པུ་ལེན་ ལོག་ཏེ་ ཡོྃ་། 16 ཡང་ ཡི་ཤུའི་ ཞབ་རྦེ་ འདུན་ལ་ འགྱེལ་རྡེ་ ཁོང་ལ་ ཐུག་ཞེ་ཆེ་ ཞུའི་། ཁོ་ ས་མ་རི་ཡཱ་པ་ཞིག་ འིན་འབེན་།

17 ཡི་ཤུའི་ མོལ་, “ཁྱི་ཞ་ ཅུ་ཀ་ ནེད་ནི་ ཕན་ མ་ཕན་ནེ་? ཞེན་ རྒུ་ཀ་ ཀ་རེ་? 18 ཡ་ཧུ་འདཱ་པ་ མན་ཀན་ ཁྱེ་རང་ མ་ནི་, ཞེན་ ཚང་མ་ ཀོན་འཇོག་ལ་ ཐུག་ཞེ་ཆེ་ ཞུ་ལ་ ལོག་ཏེ་ མ་ཡོྃ་རྡེ་?” 19 ཏེ་ནི་ ཁོང་ངེ་ ཁོ་ མོལ་, “ལོྃ་ ཡང་ སོང་, ཁྱེ་རང་ངེ་ ཏེཏ་པེ་ ཁྱེ་རང་ རྒྱལ་ཅུག་ཏེ་ འིན་།”

ཀོན་འཇོག་རྒེ་ རྒྱལ་སྲིད་ ཉེ་མོ་ ལེཔ་།

20 ཞག་ཤིག་ པ་རུ་ཤི་པ་རྒུ་ནི་ ཀོན་འཇོག་རྒེ་ རྒྱལ་སྲིད་ ནམ་ ལེབ་རྦེན་ ཟེར་རྡེ་ འདྲི་ཀན་འབོ་ལ་ ཡི་ཤུའི་ ལེན་སལ་, “ཞིབ་སལ་ ཅོའེ་རྡེ་ ལྟོའེན་ འདེད་ནྃ་ ཀོན་འཇོག་རྒེ་ རྒྱལ་སྲིད་པོ་ ལེབ་རྦེ་ མི་ཐོང་། 21 ཡང་ མི་རྒུ་ནི་ ‘འེ་ཀ་ནི་ ཡང་ འ་ཀ་ནི་ འདུག་’ མི་ཟེར་ ཅེ་ཟེར་ནི་ ཀོན་འཇོག་རྒེ་ རྒྱལ་སྲིད་པོ་ ཁྱི་ཞ་རྒུ་ནི་ ཕྲོ་ ཡོད་ཏེ་ ནོག་།”

22 ཏེ་ནི་ ཁོང་ངེ་ ཁོ་རང་ངེ་ ལོབ་ཀྲུག་རྒུན་ལ་ མོལ་, “ཏུའི་རྦོ་ ལེབ་རྦེན་ ནམ་ ཁྱི་ཞ་རྒུ་ནི་ མི་རིག་རྒེ་པུ་ ལོག་ཏེ་ ཡོང་ཅེ་ ཞག་པོ་ ཐོང་ཅེ་ འདོད་པ་ པོ་རེན་ འིན་ན་ ཐོང་ མི་ཉེན་། 23 མི་རྒུ་ནི་ ཁྱི་ཞ་ ཟེ་རེན་, ‘ལྟོའེ་, ཁོང་ འེ་ཀ་ནི་ ཡང་ འ་ཀ་ནི་ འདུག་’, ཁོང་རྒུ་ནི་ ལྟིང་འགྲྃ་ནི་ རྒྱུག་རྒེན་ མ་ཆ་། 24 ལོག་རྒེ་ འོད་ ནམ་ཀེ་ ཆོག་ ཅིག་ནི་ ཞེན་ཆོག་ ཅིག་ལ་ ཁྱབ་རྦེ་ ཙོག་སེ་ མི་རིག་རྒེ་པུ་ ལོག་ཏེ་ ཡོང་ ཟ་ནི་ལ་ ཆེན་། 25 འིན་ན་ ཏེ་ཏུའི་སང་ ངུལ་ལ་ ཁོ་ རྡུ་ངལ་ མང་པོ་ ཐོང་འདེ་ འི་ མི་རབ་པེ་ ཁོ་ སུ་ འིན་ཀན་འབེ་ཀ་ ཏེཏ་པ་ མ་ཅོ་ལ་ ཕང་ངེན་།”

26 “མི་ ཀྲང་པོ་ ནོ་ཨཱེ་ ཏུའི་ལ་ སོང་ཀན་ ཙོག་སེ་ མི་རིག་རྒེ་པུ་ ཡོང་ངེ་ ཏུའི་ལ་ ཆེན་། 27 ནོ་ཨཱ་ ཆུ་རེལ་ལེ་ན་ ཞུ་རྡེ་ ཏེ་ ཞག་ཚུག་པ་ མི་རྒུ་ནི་ ཟོའེན་, ཐུང་ངེན་, ན་མ་ ཅོའེན་ འདང་ པག་མ་ ཏང་ངེན་ འདེད་། ཏེ་ནི་ འཇིག་རྟེན་ནེ་ཀ་ ཆུ་ལོག་ ཡོྃ་རྡེ་ མི་ཚང་མ་ ཆུའི་ན་ ནུབ་ཏེ་ ཤི་།”

28 “ཏེ་རྒ་ ཙོག་སེ་ ལོཏ་ ཟེར་ཧ་ནེ་ ཏུའི་ལ་ སོང་ཀག་, མི་རྒུན་ ཟོའེན་, ཐུང་ངེན་, ཉོའེན་, ཚོང་ཏང་ངེན་, ཞིང་ ཏབ་རྦེན་ འདང་ ཁང་པ་ སིག་རྒེན་ ཡོད་པེན་, 29 འིན་ན་ ལོཏ་ སོ་འདོམ་མེ་ རྒྱལ་ས་ནི་ འབིང་ངེ་རྡང་, ནམ་ཀ་ནི་ མེ་ རྡང་ མུ་ཟི་ ཞེ་ནེན་ ཡོ་ཀན་རྒུན་ པབ་ཏེ་ ཚང་མ་ མེ་ཀན་ སོང་། 30 ཏེ་རྒ་ ཙོག་སེ་ མི་རིག་རྒེ་པུ་ ཡང་ རྐྱོད་རྡེ་ ཏུའི་ལ་ ཆེན་། 31 ཏེ་ ཞག་ལ་ ཁང་པེ་ ཁ་ཏོཏ་ལ་ ཡོ་ཀན་རྒུན་ ཡོག་ལ་ པབ་ཏེ་ ཁང་པེ་ན་ ཅ་ལག་རྒུན་ ནེན་ནེ་ལ་ མ་ཆ་། ཏེ་རྒ་ ཙོག་སེ་ ཞིང་ངེ་ཀ་ ལེ་ཧ་ ཅོའེན་ ཡོ་ཀན་རྒུན་ ལོག་ཏེ་ ཁང་པ་ ཅི་ཏོང་ ནེན་ནེ་ལ་ མ་ཆ་། 32 ལོཏ་རྡེ་ ན་མ་ སོང་ཀན་འབོ་ འི་ཏུ་ ཅོའེ་། 33 རང་སྲོག་ ཐམ་འདེ་ འདེད་ཀན་རྒུ་ནི་ རྡེན་འབེ་ མི་ཙེ་ རྐྱལ་ལེན་, འིན་ན་ ངེ་ཕི་ ཁོ་རང་ངེ་ སྲོག་ རྐྱལ་ཧན་རྒུ་ནི་ རྡེན་འབེ་ མི་ཙེ་འབོ་ རྐྱོབ་རྦེན་། 34 ངེ་ ཁྱི་ཞ་རྒུན་ལ་ ཟེ་འིན་, ཏེ་ ཚེན་ལ་ མི་ ཉི་ མལ་ས་ ཅིག་རྒེ་ཀ་ ཉིད་ ཏྃ་རྡེ་ ཡོ་ཀན་རྒུ་ནི་ ནང་ནི་ ཅིག་པོ་ ནམ་ཀ་ ཁྱེར་རེ་ ཛེ་རྡེན་ ཡང་ ཅིག་པོ་ པོ་རེན་། 35 རན་ཀྲག་རྒེ་ཀ་ ཀྲོ་ ཐག་རྒེན་ ཡོ་ཀན་ པོ་མོ་ ཉི་ ནང་ནི་ ཅིག་པོ་ ནམ་ཀ་ ཁྱེར་རེ་ ཛེ་རྡེན་ ཡང་ ཅིག་པོ་ པོ་རེན་། 36 མི་ ཉི་ ཞིང་ལ་ ཡོད་ཏུའི་ ཅིག་པོ་ ནེ་ནེན་, ཡང་ ཅིག་པོ་ པོ་རེན་།”

37 ཁོང་རྒུ་ནི་ འདྲི་, “ཙོབོ་, འི་ ཚང་མ་ ཀ་རུ་ ཆེན་?”

ཁོང་ངེ་ ལེན་སལ་, “རོ་ ཡོད་ས་ ལག་རྒུན་ ཁོར་རེ་ནོག་།”