ལུ་ཀ་ 16

ཀྲང་པོ་ མེ་ཀན་ ཆག་ཛོད་།

ཡི་ཤུའི་ ལོབ་ཀྲུག་རྒུན་ལ་ མོལ་, “མི་ ཆུག་པོ་ཞིག་ལ་ ཁོའེ་ ཆག་ཛོད་པེ་ ནོར་ ཀོད་ལ་ ཏང་འདུག་ ཟེར་རྡེ་ སྤེ་ར་ ཚོར་རྦེ་ 2 ཁོའེ་ ཆག་ཛོད་པོ་ འབོའེ་རྡེ་ ཟེར་, ‘ཁྱེ་རང་ངེ་ ཧོར་ལ་ ངེ་ ཅི་ ཚོར་རེ་ནོག་? ཁྱེ་རང་ངེ་ ཀལ་ཧན་ནེ་ ཁག་ ཏང་ མུལ་ སི་སྲུག་རྒུན་ ཏོང་, ཏི་ནི་ཕ་ལ་ ངེ་ ཁྱེ་རང་ ཆག་ཛོད་རྡེ་ ཀོ་སེ་ཀ་ པོ་རེ་ མེད་།’”

3 “ཆག་ཛོད་པེ་ ཁོ་རང་ལ་ ཟེར་, ‘ཏ་ ངེ་ ཅི་ ཅོ་རྒོའེ་? སྤོན་འབོའེ་ ང་ ལེ་ཧ་ནི་ ཕིང་། ས་ཀྱེཏ་ ཧོ་ཅེ་ ཁྱུད་ ང་ མེ་རག་, ལང་ངེ་ལ་ ང་ ཁྲེལ་ཅེ་རག་། 4 ལེ་ཧ་ནི་ ཕིང་འདེ་ ལྟིང་ནི་ མི་རྒུ་ནི་ ང་ ཁང་པེ་ན་ འགྲང་ས་ རྡང་ ཁར་ཞི་ ཏང་ཅེ་ཕི་ ཅོ་རྒོ་ཤེ་རྦོ་ ང་ ཧ་ཀོ་།’”

5 “ཏེ་ནི་ ཁོའེ་ སྤོན་འབོའེ་ པུ་ལོན་ ཏྃ་རྡེ་ ཡོ་ཀན་ ཚང་མ་ རེ་རེ་ ཅོའེ་རྡེ་ འབོའེ་། ཏང་པོ་ལ་ འདྲི་, ‘ཁྱེ་རང་ངེ་ ངེ་ སྤོན་འབོ་ ཤལ་རྒོའེ་ཤེ་ཅེན་ནེ་ པུ་ལོན་ ཙམ་ ཡོད་?’ 6 ཁོའེ་ ལེན་ཏྃ་, ‘ཨོ་ལི་ཝེ་ མར་ ལི་ཀྲར་ ལྟོང་སུམ་འདང་ རྡུན་རྒྱ་།’ ཁོའེ་ ཟེར་, ‘འགྱོ་སྤ་ ཁྱེ་རང་ངེ་ པུ་ལོན་ནེ་ ཐོ་ ཁྱོྃ་རྡེ་ ལྟོང་ཅིག་ཏང་ རྒྱེབ་རྒྱ་ངཔ་ཅུ་ འབྲི་།’”

7 “ཏེ་ནི་ ཁོའེ་ ཡང་ཅིག་ལ་ འདྲི་, ‘ཁྱེ་རང་ལ་ པུ་ལོན་ ཤལ་རྒོ་ཤེ་ ཙམ་ ཡོད་?’ ཁོའེ་ ལེན་ཏྃ་, ‘ཀྲོ་ ཀྱི་ལོ་ ལྟོང་ ཉི་ཤུ་’, ཡང་ ཁོའེ་ ཟེར་, ‘ཁྱེ་རང་ངེ་ པུ་ལོན་ནི་ ཐོ་ ཁྱོྃ་རྡེ་ ལྟོང་ ཅུ་རུག་ འབྲི་།’”

8 “སྤོན་འབོ་ ཀྲང་པོ་ མེ་ཀ་ནེ་ ཆག་ཛོད་པོ་ལ་, ཁྲམ་པ་ཅེན་ནེ་ ལེ་ཧ་ ཅོའེ་ཧན་འབེ་ཕི་ རྟོད་པ་ ཏྃ་། འི་ འཇིག་རྟེན་པ་རྒུན་ ཁོ་རང་རྒུ་ནི་ ཁྲོ་པ་རྒུན་ ཉམ་པོ་ འབྲེལ་ ཅོ་ཅེ་ན་, ཀོན་འཇོག་རྒེ་ འོད་རྡེ་ན་ འདེད་ཀ་ནེ་ མི་རྒུ་ནི་སང་ མང་ངེ་ ཤང་པོ་ ཡོད་ཏེ་ ནོག་། 9 ངེ་ ཁྱི་ཞ་རྒུན་ལ་ ཟེ་འིན་, ཁྱི་ཞི་ འཇིག་རྟེན་ནེ་ ནོར་རྒུན་ ཞེན་མ་ ཕན་ཏོག་ ཏང་ཅེ་ རྡང་ ཁོང་རྒུན་ ཉམ་པོ་ ཡ་ཏོ་ ཅོ་ཅེ་ལ་ ཀོལ་། ཏེ་ནི་ ནོར་རྦོ་ མེ་ཀན་ ཆ་རྡང་, རྡེ་བ་ཅན་ནེ་ ཁང་པེ་ན་ ཁྱི་ཞ་རྒུན་ལ་ རྒ་སུའི་ ཞུའིན་།”

10 “ཉུང་ཙེ་ཞིག་རྒེ་ན་ ལོ་ཁྱེལ་ཅེན་རྒུན་, མང་པོ་ ནང་ལ་ ལོ་ཁྱེལ་ཅེན་ ལུའི་རྡེན་། ཉུང་ཙེ་ཞིག་རྒེ་ན་ ཀྲང་པོ་ མ་ཅོ་ཀན་རྒུ་ནི་ མང་པེ་ ནང་ལ་ ཀྲང་པོ་ མི་ཅོ་། 11 ཀལ་ཏེ་ ཁྱི་ཞ་ འཇིག་རྟེན་ནེ་ ནོར་རེ་ ལག་ལེན་ ཅོ་ཅེ་ན་ ལོ་ཁྱེལ་ཅེན་ མེད་ནི་ ཏེ་ནི་ སུའི་ ཁྱི་ཞ་ རྡེན་འབེ་ ནོར་ ལྟེ་རྡེན་? 12 ཀལ་ཏེ་ ཁྱི་ཞ་ ཞེན་མེ་ ནོར་རེ་ན་ ལོ་ཁྱེལ་ཅེན་ མེད་ནི་, ཏེ་ནི་ ཁྱི་ཞ་རང་ངེ་ འིན་ཀན་འབོ་ སུའི་ ཁྱི་ཞ་ ཏང་ངེན་?”

13 “ཡོག་པོ་ཞིག་རྒེ་ སྤོན་འབོ་ ཉི་ལ་ ཞབ་རྟོག་ ཅོ་ མི་ཉེན་, ཅིག་པོ་ལ་ སོག་པོ་ ཡང་ ཅིག་པོ་ལ་ ཤེ་སྤ་ ཅོའེན་, ཡང་ ཅིག་པོ་ལ་ ཉིང་ནི་ ཞབ་རྟོག་ ཡང་ ཅིག་པོ་ལ་ མ་ཐེད་རྡེ་ ཞབ་རྟོག་ ཞུ་ནོག་། ཏེ་རྒ་ ཙོག་སེ་ ཀོན་འཇོག་ ཏང་ ནོར་ ཉ་ཧ་ལ་ ཞབ་རྟོག་ ཞུ་ མི་ཉེན་།”

14 ཏེ་ ཚང་མ་ ཏེ་རྒ་ ཡོ་ཀ་ནེ་ ནོར་འདོད་ཅེན་ པ་རུ་ཤི་པ་རྒུ་ནི་ ཚོར་རྦེ་, ཁོང་རྒུ་ནི་ ཡི་ཤུ་ ཁྲེལ་རྒོད་ ཏྃ་། 15 ཡི་ཤུའི་ ཁོང་རྒུན་ལ་ མོལ་, “མི་རྒུ་ནི་ འདུན་ལ་ ཁྱི་ཞ་རྒུ་ནི་ ཁྱི་ཞ་རང་ ཀྲང་པོ་ འིན་ཀན་ ལྟན་ཅེ་ལ་ ཐེད་ཏུག་, འིན་ན་ ཁྱི་ཞི་ ཉིང་རྒུན་ ཀོན་འཇོག་རྒེ་ ཁྱེན་ནེ་ནོག་། མི་རྒུ་ནི་ མ་ རིན་ཅེན་ ཐེ་ཀན་འབོ་, ཀོན་འཇོག་རྒེ་ ཧུ་འདུན་ལ་ ཏོ་ ཁམ་ལོག་ ཐེན་།”

ཞེན་ཡང་ ལབ་ཞ་ རིག་།

16 ཡི་ཤུའི་ མོལ་, “ཀཱ་ཁྲིམ་ འདང་ ལུང་རྟོན་པ་རྒུ་ནི་ འབྲི་ ཛེད་ཀན་རྒུན་ ཡོ་ཧཱ་ནན་ནེ་ ཏུའི་ཚུག་པ་ ཤེད་རྡེ་ ཛེད་། ཏེ་ཏུའི་ནི་ཕ་ལ་ ཀོན་འཇོག་རྒེ་ རྒྱལ་སྲིད་རྡེ་ ནེ་ཚུལ་ ཟང་པོ་ ཤེད་རྡེན་ ནོག་, ཡང་ ཏེ་ན་ ཆ་ཅེ་ མ་ ཙོན་འགྲུའི་ ཚང་མེ་ ཅོའེན་ ནོག་། 17 འིན་ན་ ཀོན་འཇོག་རྒེ་ ཀཱ་ཁྲིམ་མེ་ ཚིག་ ཡང་ ཚིག་ཅིག་ རྐྱལ་ལེ་སང་, ས་ རྡང་ ནམ་ཀ་ ཉ་ཧ་ རྐྱལ་ཤེའོ་ ལ་མོ་ འིན་།”

18 “ཁོ་རང་ངེ་ ན་མ་ ཅེད་ཏེ་ ཞེན་ པོ་མོ་ཞིག་ ཉམ་པོ་ ན་མ་ ཅོ་ཀན་འབེ་ ལོག་ཡེམ་ ཅོའེ་རྡེ་ ནོག་, ཡང་ ཅེད་ཀ་ནེ་ པོ་མོ་ ཉམ་པོ་ ན་མ་ ཅོ་ཀན་འབོ་ལ་ ལོག་ཡེམ་ ཅོའེ་རྡེ་ ནོག་།”

མི་ ཆུག་པོ་ཞིག་ ཏང་ ལ་ཟར་།

19 “ཆུག་པོ་ མི་ཞིག་ ཀོ་ཤེན་ འདང་ རི་ཤིམ་མེ་ ཀོའེ་ལག་ རིན་ཅེན་ ཀོན་འདེ་, ཞག་ཏང་ འགྲོན་ཏང་ངེན་ རྐྱིད་པོ་ ཅོའེན་ འདེད་རྡེ་ཡོད་པེན་། 20 ཁོའེ་ རྒོའེ་ འདུན་ལ་ ཟུྃ་སྤོ་ སོན་ཏེ་ ཤོའེ་ འབིང་འདེ་ ཡོ་ཀན་ ལ་ཟར་ ཟེར་ཧ་ནེ་ ལང་ཀན་ཞིག་ འདེད་རྡེ་ཡོད་པེན་། 21 ཁོའེ་ མི་ ཆུག་པོ་རྦེ་ ཅོག་ཙེ་ཀ་ནི་ ཀྲུལ་ཧན་རྒུན་ ཟ་ཅེ་ འདོད་པ་ ཅོ་ཡོད་པེན་, ཏེ་ཀ་ ནེན་མ་ ཁྱི་རྒུན་ ཡོྃ་རྡེ་ ཁོའེ་ མ་ཀ་རྒུན་ ལྡག་རྒེ་ཡོད་པེན་།”

22 “ཞག་ཤིག་ ལང་ཀན་འབོ་ ཤི་, ཡང་ ཀོན་འཇོག་རྒེ་ ཕོ་ཉ་རྒུན་ རྐྱོད་ཏེ་ ཁོ་ ཨབ་ར་ཧམ་ས་ ཁུར་རྡེ་ ཁྱེ་རེ་ ཛེད་། མི་ ཆུག་པོ་ལ་ ཤི་ ཡང་ ཧུྃ་། 23 ཉ་ཝེ་ན་ རྡུ་ངལ་ སྲན་ཀྲེ་ ཐོང་ངེན་, ཁོའེ་ ལྟག་ལ་ ལྟོའེ་རྦེ་ ཐག་རིང་ཞིག་ནི་ ཨབ་ར་ཧམ་ འདང་ ཁོང་ངེ་ འདུན་ལ་ ལ་ཟར་ ཐོང་།”

24 “ཁོའེ་ ཧད་ ཆོན་མོ་ ཉམ་པོ་ ཟེར་, ‘ཨ་རྦ་ ཨབ་ར་ཧམ་, ངེ་ཀ་ ཉིང་ཞེ་ ཛེད་ཏེ་ ལ་ཟར་རེ་ ཛུ་རྒུ་རྦོ་ ཆུའི་ན་ ཅུག་ཏེ་ ངེ་ ལྕེ་འབོ་ ཀྲང་མོ་ ཅོ་ཅུག་རྒེ་ལ་ ཀ་ལེ་ ཛེད་རྡང་, ཅེ་ཟེར་ནི་ ང་ འི་ མེ་ན་ རྡུ་ངལ་ ཆོན་མོ་ ཐོང་ངེ་རག་།’”

25 “འིན་ན་ ཨབ་ར་ཧམ་མེ་ ལེན་ཏྃ་, ‘པུ་ཙ་ འི་ཏུ་ ཅོའེ་, ཁྱེ་རང་ལ་ རང་ངེ་ མི་ཙེ་ན་ རྐྱིད་པོ་རྒུན་ ཐོབ་ཟ་ནི་ ལ་ཟར་ལ་ རྡུ་ངལ་རྒུན་ ཐོབ་ཏེ་ འིན་འབེན་། ཏ་ འེ་ཀ་ ལ་ཟར་ལ་ རྐྱིད་པོ་ ཡང་ ཁྱེ་རང་ལ་ རྡུ་ངལ་ ཐོང་འདུག་, 26 ཏོ་ ཚང་མ་ མ་ཚེད་ ང་ཞ་ རྡང་ ཁྱེ་རང་ངེ་ པར་ལ་ ལུང་པ་ ཆོན་མོ་ཞིག་ ཡོད་། འེ་ཀ་ནི་ ཁྱེ་རང་ ཆོག་ལ་ ཆ་ ཐེད་ན་ ཆ་ མི་ཉེན་, ཡང་ ཏེ་ཀ་ནི་ སུ་ཞིག་ལ་ ང་ཞ་ས་ ཡོང་ མི་ཉེན་།’”

27 “ཁོའེ་ ཟེར་, ‘འཇུ་འཇུ་ ཡབ་ ཨབ་ར་ཧམ་, ལ་ཟར་ ངེ་ ཨ་རྦེ་ ཁང་པ་ ཀ་ལེ་ ཛེད་ཏེ་ 28 ངེ་ ཨ་ཅོ་ནོ་ ང་ཀ་ རྡིག་པེ་ མི་ཙེ་ པུད་ཅེ་ མ་ཕང་ན་ ཁོང་རྒུན་ལ་ འི་ པར་རྡོ་ཅེན་ནེ་ ས་ཅེ་ན་ ལེབ་རྦེན་ མོལ་རྡེ་ སྤང་པུད་ཅུག་རྒེ་ ཛེད་རྡང་།’”

29 “འིན་ན་ ཨབ་ར་ཧམ་མེ་ ལེན་ཏྃ་, ‘མོ་ཤེ་ རྡང་ ཞེན་ ལུང་རྟོན་པ་རྒུ་ནི་ འབྲི་ཧན་རྒུན་ ཁོང་རྒུ་ནི་ ལག་ལ་ ཡོད་ཏེ་ ནོག་, ཏོ་རྒུན་ལ་ ཉེན་རྒོའེ་།’”

30 “ཁོའེ་ ཟེར་, ‘ཡབ་ ཨབ་ར་ཧམ་ ཏུ་ཟུག་ མ་མོལ་། ཀལ་ཏེ་ ཤི་ཀན་རྒུ་ནི་ ཕྲོ་ནི་ ཅིག་ ཁོང་རྒུ་ནི་ཀ་ ཆ་ནི་, ཁོང་རྒུ་ནི་ རྡིག་པ་ ཕྃ་རྡེ་ སེམ་ འགྱུ་རེན་།’”

31 “ཨབ་ར་ཧམ་མེ་ ཁོ་ ཟེར་, ‘ཀལ་ཏེ་ ཁོང་རྒུ་ནི་ མོ་ཤེ་ རྡང་ ལུང་རྟོན་པ་རྒུ་ནི་ འབྲི་ཧན་རྒུན་ ཁ་ མ་ཉེན་ནི་, ཤི་ཀན་རྒུ་ནི་ ཕྲོ་ནི་ ལྃ་རྡེ་ ཆ་ཀན་འབེ་ ཁ་ལ་ ཁོང་རྒུ་ནི་ མི་ཉེན་།’”