ལུག་ རྐྱལ་ཧན་ནེ་ སྲུང་ངུ་།
15
ཁྲལ་ནེན་ཀན་རྒུན་ འདང་ རྡིག་ཅེན་རྒུན་ ཡི་ཤུའི་ ལབ་ཞ་རྒུན་ ཉེན་ནེ་ལ་ ཡོྃ་། 2 འིན་ན་ པ་རུ་ཤི་པ་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ མ་རྒ་མོ་རྒེ་ ཤེད་རྡེན་ ཟེར་, “འི་ མི་རྦེ་ རྡིག་ཅེན་རྒུན་ལ་ རྒ་སུའི་ ཞུའི་རྡེ་ ཁོང་རྒུན་ ཉམ་པོ་ ཁར་ཞི་ ཟ་རུག་།”3 ཏེ་ནི་ ཡི་ཤུའི་ ཁོང་རྒུན་ལ་ འི་ སྲུང་ངུ་ ཤེད་རྡེ་ ཛེད་། 4 “ཁྱི་ཞ་ ཅིག་ལ་ ལུག་ རྒྱ་ ཡོ་ཀན་འབེ་ ནང་ནི་ ལུག་ ཅིག་ རྐྱལ་ནི་, ཞེན་ རྒུབ་ཅུ་ ཀོར་རྒུ་རྦོ་ ཐང་རྟོང་ལ་ པོར་རྡེ་ རྐྱལ་ཧན་འབོ་ ཐོབ་ཐོབ་ཚུག་པ་ ཙལ་ལེ་ མི་ཆ་? 5 ཐོབ་རྦེ་རྡང་, རྒ་མོ་ ཉམ་པོ་ འཇིང་པེ་ཀ་ ཁུར་རྡེ་ 6 ཁང་པ་ ཁྱེར་རེན་། ཏེ་ནི་ ཁོའེ་ ཁོ་རང་ངེ་ ཡ་ཏོ་ རྡང་ ཁྱིམ་ཙེ་རྒུན་ འབོའེ་རྡེ་ ཟེ་རེན་, ‘ང་ ཉམ་པོ་ རྒ་མོ་ རྐྱིད་པོ་ ཅོའེ་ ཅེ་ཟེར་ནི་ ངེ་ ལུག་ རྐྱལ་ཧན་འབོ་ ཐོབ་།’ 7 ངེ་ ཁྱི་ཞ་ ཟེ་འིན་, ཏེ་རྒ་ ཙོག་སེ་ རྡེ་བ་ཅན་ནེ་ན་ མི་ ཀྲང་པོ་ རྡིག་པེ་ཀ་ནི་ སེམ་འགྱུར་ རྒོའེ་ཤེ་ མེད་ སམ་ཀན་ རྒུབ་ཅུ་ ཀོར་རྒུ་སང་ སེམ་འགྱུར་ཤེ་ཧན་ནེ་ རྡིག་ཅེན་ ཅིག་རྒེ་ཕི་ མང་ངེ་ རྒ་མོ་ ཅོའེན་།”
པེ་ནེ་ རྐྱལ་ཧན་ནེ་ སྲུང་ངུ་།
8 “པོ་མོ་ཞིག་ལ་ མུལ་ལེ་ པེ་ནེ་ ཅུ་ ཡོ་ཀན་འབེ་ ནང་ནི་ ཅིག་ རྐྱལ་ནི་, ཁོའེ་ འོད་ ཏུག་ཏེ་ ཁང་པ་ རྡུའི་རྡེ་ པེ་ནེ་ རྐྱལ་ཧན་འབོ་ ཐོབ་ཐོབ་ཚུག་པ་ རྒྱ་ལེ་ ཅོའེ་རྡེ་ མི་ཙལ་ལེ་? 9 ཐོབ་རྦེ་རྡང་, ཁྱིམ་ཙེ་ རྡང་ ཡ་ཏོ་རྒུན་ འབོའེ་རྡེ་ ཟེ་རེན་, ‘ང་ ཉམ་པོ་ རྐྱིད་པོ་ ཅོའེ་ ཅེ་ཟེར་ནི་ ངེ་ པེ་ནེ་ རྐྱལ་ཧན་འབོ་ ཐོབ་།’ 10 ངེ་ ཁྱི་ཞ་ ཟེ་རེན་, ཏེ་རྒ་ ཙོག་སེ་ འགྱོད་པ་ ཅོ་ཀ་ནེ་ རྡིག་ཅེན་ ཅིག་རྒེ་ཕི་ ཀོན་འཇོག་རྒེ་ ཕོ་ཉ་རྒུ་ནི་ལ་ རྒ་མོ་ ཅོའེན་།”
པུ་ཙ་ རྐྱལ་ཧ་ནེ་ སྲུང་ངུ་།
11 ཡི་ཤུའི་ ཏ་རུང་ལ་ མོལ་, “མི་ཞིག་ལ་ པུ་ཙ་ ཉི་ ཡོད་པེན་། 12 པུ་ཙ་ ཆུང་ཙེ་རྦེ་ ཨ་རྦ་ ཟེར་, ‘ཨ་རྦ་ ངེ་ ཧལ་ལ་ ནོར་ཧལ་རྦོ་ སལ་།’ ཏེ་ནི་ ཨ་རྦེ་ ཁོ་རང་ངེ་ ནོར་རྦོ་ པུ་ཙ་ ཉ་ཧེ་ན་ རྒོའེ་།”
13 “ཞག་ ཁ་ཅིག་རྒེ་ ལྟིང་ནི་, པུ་ཙ་ ཆུང་ཙེ་རྦོ་ ནོར་ ཚང་མ་ ཁུར་རྡེ་, ཐག་རིང་ངེ་ ཡུལ་ཞིག་ལ་ སོང་། ཁོའེ་ ནོར་ ཚང་མ་ ཧ་འགྲང་ངེ་ ཤོད་པ་ ངན་པེ་ན་ ཀོད་ལ་ ཏྃ་། 14 ནོར་ ཡོ་ཀན་ ཚང་མ་ རྐྱག་ ཚར་རེ་རྡང་, ཏེ་ ཡུལ་ལ་ ལོར་ཧོན་ ཀྲག་པོ་ ལྃ་, ཏེ་རྒྱ་ལ་ ཁོ་ ཅི་ཚང་མ་ ཚར་རྡེ་ མེད་པེན་། 15 ཏེ་ནི་ ཁོ་ ལེ་ཧ་ ཙལ་ལེ་ལ་ ཏེ་རྒ་ ཡུལ་ལེ་ མི་ཞིག་རྒེ་ཀ་ སོང་, ཡང་ ཁོའེ་ ཞིང་ངེ་ཀ་ ཕག་རྒུན་ལ་ ཁར་ཞི་ ཏྃ་ལ་ ཁོ་ ལམ་ཅུག་། 16 ཁོའེ་ ཕག་རྒེ་ ཁར་ཞི་འབོ་ ཟོའེ་རྡེ་ ཁོ་རང་ངེ་ ཀྲོཏ་པ་ འགྲྃ་ཤོག་ཅེ་ འདོད་པ་ ཅོའེ་, འིན་ན་ ཁོ་ སུའི་ལ་ ཅང་ མ་ཏང་།”
17 “ཏེ་ནི་ ཁོ་ སམ་བ་ ཡོྃ་རྡེ་ ཟེར་, ‘ངེ་ ཨ་རྦེ་ ལ་པ་ མང་པེ་ འགྲྃ་འགྲྃ་ ཟོའེ་རྡེ་ ལག་ལུའི་ པོ་རེ་ཡོད་པེན་, འིན་ནང་ ང་ འེ་ཀ་ ལྟོག་རི་ ཐོང་འདེ་ ཤི་ཀྱི་ རག་། 18 ང་ ང་རང་ངེ་ ཨ་རྦེ་ཀ་ ལོག་ཏེ་ སོང་འདེ་ ཟེ་འིན་, “ངེ་ ཀོན་འཇོག་ ཏང་ ཉེ་རང་ངེ་ རྒྱཔ་འགལ་ལ་ རྡིག་པ་ ཅོའེ་རྡེ་ ནོག་། 19 ང་ ཉེ་རང་ངེ་ པུ་ཙ་ འིན་ ཟེར་ཤེ་ འོའེ་སྤ་ མན་, ཉེ་རང་ངེ་ ལ་པ་ཞིག་ ཙོག་སེ་ ང་ པོ་རེ་ ཛེད་།”’ 20 ཏེ་ནི་ ཁོ་ ལྃ་རྡེ་ ཁོ་རང་ངེ་ ཨ་རྦ་ས་ སོང་།”
“ཁོ་ ཨ་རྦ་ནི་ ཏ་རུང་ ཐག་རིང་ལ་ ཡོད་ཏེ་ལ་ ཁོའེ་ པུ་ཙ་ ཡོང་ངེ་ ཐོང་འདེ་ ཨ་རྦེ་ སེམ་ ཉིང་ཞེ་ ཀང་། ཨ་རྦ་ རྒྱུག་རྒེན་འདང་ སོང་ ཡང་ པུ་ཙ་ ཁྲིལ་རྡེ་ འོ་ ཏྃ་། 21 པུ་ཙེ་ ཁོ་ ཟེར་ ‘ཨ་རྦ་ལེ་, ངེ་ ཀོན་འཇོག་ ཏང་ ཉེ་རང་ངེ་ རྒྱཔ་འགལ་ལ་ རྡིག་པ་ ཅོའེ་རྡེ་ ནོག་། ང་ ཉེ་རང་ངེ་ པུ་ཙ་ འིན་ ཟེར་ཤེ་ འོའེ་སྤ་ མན་།’”
22 “འིན་ན་ ཨ་རྦེ་ ཡོག་པོ་རྒུན་ འབོའེ་རྡེ་ ཟེར་, ‘འགྱོ་སྤ་ ཅོའེ་, ཚང་མེ་སང་ རིན་ཅེན་ ཀོའེ་ ཁྱོྃ་རྡེ་ ཁོ་ ཧོན་, ལག་པ་ སེར་རེ་ སེར་རྡུབ་ ཏང་ ཧང་པ་ འཇའ་ཏོ་ ཧོན་། 23 པེ་ཏོ་ རྒྱ་སྤ་ ཁྱོྃ་རྡེ་ སོད་, ཨ་ཧོ་རྒུ་ནི་ འགྲོན་ ཏྃ་རྡེ་ རྒ་མོ་ རྐྱིད་པོ་ ཅོའེན་, 24 ཅེ་ཟེར་ནི་ ངེ་ འི་ པུ་ཙ་འབོ་ ཤི་རྡེ་ འིན་འབེན་, ཏ་ སོན་པོ་ ནོག་། རྐྱལ་རྡེ་ འིན་འབེན་, ཏ་ ཐོབ་ཏེ་ ནོག་།’ ཡང་ ཁོང་རྒུ་ནི་ རྒ་མོ་ རྐྱིད་པོ་ ཅོ་ཅེ་ འགོ་ཟུག་།”
25 “ཏེ་རྒ་ ཏུའི་ལ་ པུ་ཙ་ ཆོན་མོ་རྦོ་ ཞིང་ནི་ ལོག་ཏེ་ ཁང་པེ་ ཚམ་ལ་ ལེབ་རྦེ་རྡང་, ཁོ་ ལུ་ རྡང་ སེ་ ཏང་ཀན་ ཚོར་། 26 ཁོའེ་, ཡོག་པོ་ཞིག་ འབོའེ་རྡེ་ ཅི་ ནོག་ ཟེར་རྡེ་ འདྲི་, 27 ཡོག་པོ་རྦེ་ ལེན་ཏྃ་, ‘ཉེ་རང་ངེ་ ནོ་ ལོག་ཏེ་ ཡོྃ་ ཡང་ ཁོ་ ཁམ་ཟང་ ཁྲང་སྤོ་ ལེབ་ཅེ་ཀ་ནི་ ཉེ་རང་ངེ་ ཨ་རྦེ་ པེ་ཏོ་ རྒྱ་སྤ་འབོ་ སེད་ཏེ་ རྒ་མོ་ རྐྱིད་པོ་ ཅོའེན་ ནོག་།’”
28 “ཨ་ཅོ་ལེ་ སྲོ་ ཡོྃ་རྡེ་ ནང་ཀུ་ལ་ མ་སོང་། ཏེ་ནི་ ཨ་རྦ་ ཕི་ལོག་ལ་ ཡོྃ་རྡེ་ ཁོ་ འཇུ་འཇུ་ ནང་ལ་ ཤོག་ ཟེར་། 29 འིན་ན་ པུ་ཙེ་ ཨ་རྦ་ལ་ ཟེར་, ‘ངེ་ འི་ཟམ་ ལོ་ མང་པོ་ ཉེ་རང་ངེ་ ཡོག་པོ་ ཙོག་སེ་ ཞབ་རྟོག་ ཞུའི་རྦེན་ ཡང་ ཉེ་རང་ངེ་ ཁ་ ནམ་ མ་ཉེན་? ང་ ང་རང་ངེ་ ཡ་ཏོ་རྒུན་ ཉམ་པོ་ རྒ་མོ་ ཅོ་ལ་ ཉེ་རང་ངེ་ རེ་འུ་ཞིག་ལ་ མ་ཏྃ་། 30 འིན་ནང་ ཉེ་རང་ངེ་ འི་ པུ་ཙ་ ཀ་རྦེ་ འཇང་ཙོ་མ་རྒུན་ ཉམ་པོ་ ཉེ་རང་ངེ་ ནོར་ ཚང་མ་ ཀོད་ལ་ ཏྃ་རྡེ་ ལོག་ཏེ་ ཡོང་ངེ་རྡང་, ཉེ་རང་ངེ་ ཁོའེ་ཕི་ པེ་ཏོ་ རྒྱག་སྤ་རྦོ་ སེད་།’”