ཡི་ཤུའི་ ངལ་ཚོའེ་ ཞག་ལ་ ཕན་ཅུག་རྒེ་ ཛེད་།
14
ངལ་ཚོའེ་ ཞག་ཅིག་ལ་ ཡི་ཤུ་ པ་རུ་ཤི་པེ་ སྤོན་འབོ་ཞིག་རྒེ་ ཁང་པ་ འདོན་ཏང་ལ་ རྐྱོད་, པ་རུ་ཤི་པ་རྒུ་ནི་ ཁོང་ལ་ ཞིབ་སལ་ ཅོའེ་རྡེ་ ལྟེན་འདུག་། 2 ཡི་ཤུའི་ འདུན་ལ་ ཧང་ལག་ལ་ ཆུ་ ཞུ་ཧ་ནེ་ ནེད་པ་ཞིག་ ཡོད་པེན་། 3 ཡི་ཤུའི་ པ་རུ་ཤི་པ་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུན་ལ་ མོལ་, “ངལ་ཚོའེ་ ཞག་ལ་ ཆོའེ་ཁྲིམ་ ནང་ཞིན་ ནེད་ནི་ ཕན་ཅུག་ནི་ འགྲིག་ཏེ་ ནོག་རྒེ་ ཡང་ མག་?” 4 འིན་ན་ ཁོང་རྒུ་ནི་ ཅང་ ལེན་ མ་ཏྃ་། ཁོང་ངེ་ ཁོ་ ཆག་སེ་ ཛེད་ཏེ་ ཕན་ཅུག་རྒེ་ ཛེད་, ཡང་ ཁོ་ ཁོ་རང་ངེ་ ཁང་པ་ ལམ་ཅུག་རྒེ་ ཛེད་། 5 ཏེ་ནི་ ཡི་ཤུའི་ ཁོང་རྒུན་ལ་ མོལ་, “ཀལ་ཏེ་ ངལ་ཚོའེ་ ཞག་ལ་ ཁྱི་ཞ་ ཅིག་རྒེ་ ཕྲུ་རྒུ་ ཡ་ ལང་ཀྲོ་ རྒོ་རོང་ན་ ཀྲུལ་ནི་, ཁྱི་ཞི་ ཏེ་རྒ་མ་རྒ་ ཁོ་ ཕིང་ མི་ ཕིང་ངེ་?” 6 ཡང་ ཁོང་རྒུ་ནི་ ལེན་ཏང་ མ་ཉེན་།7 འགྲོན་པོ་རྒུ་ནི་ ཀྲལ་འགོ་ལ་ ཙལ་ཧན་འབོ་ ཡི་ཤུའི་ ཟི་རྡེ་རྡང་ ཁོང་ངེ་ འི་ སྲུང་ངུ་རྦོ་ ཤེད་རྡེ་ ཛེད་, 8 “མི་ཞིག་རྒེ་ ཁྱེ་རང་ལ་ པག་རྟོན་ནེ་ འགྲོན་ལ་ འབོ་ནི་, ཀྲལ་འགོའེ་ཀ་ མ་འདེད་, ཅི་ རྒྱུའི་, འགྲོན་ ཏང་ཀན་འབེ་ ཁྱེ་རང་ངེ་སང་ ཁག་ཅེན་ འགྲོན་པོ་ཞིག་ འབོའེ་རྡེ་ ཡོད་ཁྲོ་། 9 ཀལ་ཏེ་ ཡོད་ནི་ ཁྱི་ཞ་ ཉ་ཧ་ལ་ འགྲོན་ ཏང་ཀན་འབོ་ ཡོྃ་རྡེ་ ཁྱེ་རང་ངེ་ ‘ཁྱེ་རང་ འདེད་ཀ་ནེ་ མལ་ལ་ འི་ མིའུ་ལ་ ཏོང་’ ཟེར་ནི་ ཁྱེ་རང་ ཁྲེལ་རྦ་ ཆེན་ ཡང་ ཁྱེ་རང་ ཀྲལ་ལེ་ འཇུག་ལ་ ཆ་རྒོའེ་རྡེན་།”
10 “འིན་ན་ ཁྱེ་རང་ལ་ འགྲོན་ལ་ འབོ་ནི་ སོང་འདེ་ ཀྲལ་ འཇུག་ལ་ འདོད་། འགྲོན་ལ་ འབོ་ཀན་འབོ་ ཡོྃ་རྡེ་ ཁྱེ་རང་ལ་, ‘ཡ་ཏོ་ལེ་ ཀྲལ་འགོ་ལ་ རྐྱོད་’ ཟེ་རེན་། ཏེ་ནི་ ཞེན་མ་ འགྲོན་པོ་ ཚང་མེ་ འདུན་ལ་ ཁྱེ་རང་ལ་ སི་ཝ་ ཐོབ་རྦེན་། 11 ཀྲག་པོ་ ལྟན་ཀན་ ཚང་མ་ པབ་མོ་ ཅོའོ་ ཛེ་རྡེན་ ཡང་ ཁོ་རང་ པབ་མོ་ པོར་ཧན་འབོ་ལ་ སི་ཝ་ སལ་ལེ་ ཛེ་རྡེན་།”
12 ཏེ་ནི་ ཡི་ཤུའི་ འགྲོན་ ཏང་ཀན་འབོ་ལ་ མོལ་, “ཁྱེ་རང་ངེ་ ཛ་ར་ ཡ་ ཕི་རོའེ་ ཚལ་མ་ ཏང་ཟ་ནི་ རང་ངེ་ ཡ་ཏོ་རྒུན་, ཡང་ ཨ་ཅོ་ རྡང་ ནོ་, ཡང་ ཉེན་འགྲུམ་རྒུན་ རྡང་ ཁྱིམ་ཙེ་ ཆུག་པོ་རྒུན་ལ་ མ་འབོ་། ཀལ་ཏེ་ འབོ་ནི་, ཁོང་རྒུ་ནི་ ཁྱེ་རང་ལ་ འགྲོན་ ལེན་ཏྃ་རྡེ་ ཁྱེ་རང་ངེ་ ཀྲིན་ལེན་ ལོག་རྒེ་སྲིད་ཅེ་ ནོག་། 13 འིན་ན་ ཁྱེ་རང་ངེ་ འགྲོན་ ཏང་ཟ་ནི་ ཉལ་རྦ་ཅེན་, ལུའི་རྐྱོན་པ་, ཞ་འོ་ རྡང་ ཞ་ར་རྒུན་ལ་ འབོའེ་། 14 ཏེ་ནི་ ཁྱེ་རང་ལ་ ཅིན་ལབ་ ཐོབ་རྦེན་། ཁོང་རྒུ་ནི་ འགྲོན་ ལེན་ཏྃ་ མ་ཉེན་ན་ ཀོན་འཇོག་རྒེ་ མི་ ཀྲང་པོ་རྒུན་ སོན་པོ་ ལྃ་ཤུ་རྒེ་ ཛེད་ཟ་ནི་ ཁྱེ་རང་ལ་ སོལ་རེ་ ས་ལེན་།”
འགྲོན་ ཆོན་མོ་ཞིག་རྒེ་ སྲུང་ངུ་།
15 ཏོ་ ཚོར་རྡེ་ འགྲོན་པོ་ ཅིག་རྒེ་ ཡི་ཤུ་ ཟེར་, “ཀོན་འཇོག་རྒེ་ རྒྱལ་སྲིད་རྡེ་ན་ འགྲོན་ ཟ་ཀན་རྒུན་ ཅིན་ལབ་ཅེན་ ནོག་།”
16 འིན་ན་ ཡི་ཤུའི་ ལེན་སལ་, “མི་ཞིག་རྒེ་ འགྲོན་ ཆོན་མོ་ ཏང་ཅེ་ལ་ ཀྲལ་འགྲིག་ ཅོའེ་རྡེ་ འགྲོན་པོ་ མང་པོ་ འབོའེ་། 17 འདོན་ཏང་ ཀྲུཔ་རྦེ་རྡང་ འབོའེ་རྡེ་ ཡོ་ཀན་རྒུན་ལ་, ‘ཤོག་ཧེ་, འདོན་ཏང་ ཀྲུཔ་ཏེ་ ཡོད་’ ཟེར་རྡེ་ འབོ་ལ་ ཁོ་རང་ངེ་ ཡོག་པོ་རྒུན་ ལམ་ཅུག་། 18 འིན་ན་ ཁོང་ ཚང་མེ་ ཉེད་ཅོ་ཅེ་ འགོ་ཟུག་ ཏང་པོ་ མི་རྦེ་ ཟེར་, ‘ངེ་ ཏག་ས་རང་ ཞིང་འཇིག་ ཉོའེ་རྦེན་, ཏོ་ལ་ ལྟ་ལ་ ཆ་རྒོའེ་ཡོད་, འཇུ་འཇུ་ ང་ རྒོང་སྤ་ སལ་།’ 19 ཞེན་ཞིག་རྒེ་ ཟེར་, ‘ངེ་ ལང་ཀྲོ་ ཆ་ང་ ཉོའེ་རྦེན་, ཏོ་རྒུན་ ཞིང་ངེ་ཀ་ ཀོལ་རྡེ་ ལྟ་ལ་ ཆ་རྒོའེ་ཡོད་, འཇུ་འཇུ་ ང་ རྒོང་སྤ་ སལ་།’ 20 ཞེན་ཞིག་རྒེ་ ཟེར་, ‘ངེ་ ཏག་ས་རང་ ན་མ་ ཅོའེ་རྦེན་ ང་ ཡོང་ཉེན་ཅེ་ མེ་རག་།’”
21 “ཏེ་ནི་ ཡོག་པོ་རྦོ་ ལོག་ཏེ་ ཡོྃ་རྡེ་ སྤོན་འབོ་ལ་ ཏོ་རྒུན་ ཤེད་། སྤོན་འབོ་ལ་ སྲོ་ མ་སྲན་ཀྲེ་ ཡོྃ་ ཡང་ ཡོག་པོ་ལ་ ཟེར་, ‘འགྱོ་སྤ་ ཀྲོང་ཁྱེར་རེ་ ལམ་ འདང་ སྲང་རྒུན་ལ་ སོང་འདེ་ ཉལ་རྦ་ཅེན་, ལུའི་རྐྱོན་བ་, ཞ་ར་ རྡང་ ཞ་འོ་རྒུན་ ཁྱོང་།’ 22 ཡོག་པེ་ ཟེར་, ‘སྤོན་འབོ་ལེ་, ཉེ་རང་ངེ་ མོལ་ཧན་ ནང་ཞིན་ ཅོའེ་རྦེན་, འིན་ན་ ཏ་རུང་ང་ མལ་ ལྟོང་པ་ འདུག་།’ 23 ཏེ་ནི་ སྤོན་འབོའེ་ ཡོག་པོ་ལ་ ཟེར་, ‘ངེ་ ཁང་པ་ ཀང་ཅུག་ཅེ་ལ་ ཀྲོང་ཁྱེར་ནི་ ཕི་ལོག་རྒེ་ ལམ་ འདང་ སྲང་རྒུན་ལ་ སོང་འདེ་ ཏུ་རུ་ ཡོ་ཀན་རྒུན་ འབོའེ་རྡེ་ ཁྱོང་། 24 ངེ་ ཁྱེ་རང་ལ་ ཟེ་འིན་, འགྲོན་ལ་ འབོ་ཀན་རྒུ་ནི་ ནང་ནི་ ཅིག་ལ་ ངེ་ ཀྲལ་འགྲིག་ ཅོའེ་ཧན་ནེ་ འགྲོན་ནེ་ ཁར་ཞི་ ཉང་ཅེ་ ཧབ་ མི་ཐོབ་།’”
ཡི་ཤུའི་ ལོབ་ཀྲུག་ འགྱུར་ཤེ་ལ་ ཅི་ཚང་མ་ ཕང་རྒོའེ་།
25 མི་ཚོག་ མང་པོ་ཞིག་ ཡི་ཤུའི་ ལྟིང་འགྲྃ་ནི་ ཡོྃ་, ཡང་ ཁོང་རྒུ་ནི་ ཆོག་ལ་ འགྱུར་རྡེ་ ཁོང་ངེ་ མོལ་, 26 “ངེ་ ལྟིང་འགྲྃ་ནི་ ཡོང་འདུག་ འིན་ན་ རང་ངེ་ ཨ་རྦ་, ཨ་མ་, ན་མ་, ཕྲུ་རྒུ་, མི་སྲིང་ མ་ཚེད་ རང་ངེ་ སྲོག་ལ་ ངེ་སང་ མང་ངེ་ ཡ་ཤ་ ཅོ་ཀན་འབོ་ ངེ་ ལོབ་ཀྲུག་ འགྱུར་ མི་ཉེན་། 27 ཡང་ རང་ངེ་ རྡུ་ངལ་ལེ་ རྐྱང་ཤིང་ ཁུར་རྡེ་ ངེ་ ལྟིང་ནི་ མ་འགྲྃ་ཀན་འབོ་ ངེ་ ལོབ་ཀྲུག་ འགྱུར་ མི་ཉེན་།”
28 “ཀལ་ཏེ་ ཁྱི་ཞ་ ཅིག་རྒེ་ ཁང་པ་ ཀྲག་པོ་ཞིག་ སིག་རྒེན་ སམ་ནི་, ངུལ་ལ་ འདེད་ཏེ་ ཏོ་ སིག་ རྒོ་ཤེ་ མུལ་ ཁོ་རང་ངེ་ ལག་ལ་ འདུག་རྒེ་ མི་འདུག་ མི་ལྟ་? 29 ཏེ་མ་ནི་ མག་རྡེན་ ཏིང་འདེ་ ཁང་པ་ སོན་ཏེ་ ཀྲུཔ་ མི་ཉེན་, ཏེ་ནི་ ཏོ་ ཐོང་ཀན་ ཚང་མེ་ ཧབ་རྒོད་ ཏྃ་རྡེ་ ཟེ་རེན་ 30 ‘འི་ མི་རྦེ་ ཁང་པ་ ཀྲག་པོ་ཞིག་ སིག་ཅེ་ ཅོའེ་རྦེ་ འིན་ན་ ཀྲུཔ་ མ་ཉེན་།’”
31 “ཡང་ མག་མི་ ལྟོང་ཅུ་ ཡོ་ཀ་ནེ་ རྒྱ་སྤེ་, མག་མི་ ལྟོང་ཉི་ཤུ་ ཁྲིད་ཏེ་ ཡོ་ཀ་ནེ་ རྒྱ་སྤེ་ རྒྱཔ་འགལ་ལ་ མག་ཏྃ་ལ་ ཆ་སང་ ངུལ་ལ་ ཁོའེ་ ལག་ལ་ ཏེ་ རྒྱ་སྤོ་རྦོ་ལ་ ཕམ་ཀལ་ཅེ་ ཁྱུད་ འདུག་རྒེ་ མི་འདུག་ ལྟ་ མི་ལྟ་? 32 ཀལ་ཏེ་ ཁྱུད་ མེད་ནི་ ཁོའེ་ ཏ་རུང་ ཐག་རིང་ལ་ ཡོ་ཀ་ནེ་ འགྲ་ཝོ་ལ་ ཞིའི་རྡེ་ཕི་ ནང་འགྲིག་ ཅོ་ཅེ་ལ་ ཐུའི་མི་རྒུན་ ཀལ་ལེན་། 33 ཏེ་རྒ་ ཙོག་སེ་ ཁྱི་ཞ་རྒུན་ལ་ ཡོ་ཀན་ ཚང་མ་ ཕང་ མ་ཕང་ནི་ ཁྱི་ཞ་ ངེ་ ལོབ་ཀྲུག་ འགྱུར་ མི་ཉེན་།”