ལུ་ཀ་ 13

རྡིག་པ་རྒུ་ནི་ སེམ་འགྱུར་ཤེ་།

མི་ ཁ་ཅིག་རྒེ་ ཡི་ཤུ་ རོམ་མེ་ ཀ་ལོན་ པི་ལ་ཏུ་ འགཱ་ལིལ་པ་ ཁ་ཅིག་ ཀོན་འཇོག་རྒེ་ ཁང་པ་ལ་ སྲོག་ཆོད་ པུལ་ཟ་ནི་ སེད་ཀན་འབེ་ ཧོར་ལ་ ཤེད་། 2 ཡི་ཤུའི་ ཁོང་རྒུན་ལ་ མོལ་, “ཁྱི་ཞ་རྒུ་ནི་ ཏེ་ འགཱ་ལིལ་པ་རྒུན་ལ་ ཏུ་ཟུག་ རྡུ་ངལ་ ཐོང་འབེ་, ཞེན་ འགཱ་ལིལ་པ་ ཚང་མེ་སང་ མང་ངེ་ རྡིག་ཅེན་ འིན་འགྲོ་ ས་མེ་ རག་རྒེ་? 3 ངེ་ ཁྱི་ཞ་ ཟེ་འིན་, ཏོ་ འདེན་བ་ མག་, འིན་ན་ སེམ་ མ་འགྱུར་ནི་, ཁྱི་ཞ་རྒུ་ནི་ མེ་ཀན་ ཅོའོ་ ཛེད་རྡེན་། 4 ཡང་ སི་ལོམ་མེ་ པིའུ་ ཞིག་ཏེ་ ཤི་ཀ་ནེ་ མི་ ཅོབ་ཀྱེད་པོ་ ཡེ་རུ་ཤ་ལེམ་པ་ ཚང་མེ་སང་ མང་ངེ་ རྡིག་ཅེན་ འིན་འགྲོ་ ས་མེ་ རག་རྒེ་? 5 ངེ་ ཁྱི་ཞ་ ཟེ་འིན་, ཏོ་ རྡེན་འབའ་ མག་, འིན་ན་ ཁྱི་ཞི་ སེམ་ མ་འགྱུར་ནི་, ཁྱི་ཞ་རྒུ་ནི་ མེ་ཀན་ ཅོའོ་ ཛེད་རྡེན་།”

6 ཏེ་ནི་ ཡི་ཤུའི་ འི་ སྲུང་ངུ་རྦོ་ ཤེད་རྡེ་ ཛེད་, “མི་ཞིག་རྒེ་ ཁོ་རང་ངེ་ རྒུན་འགྲུམ་མེ་ ཚེའེ་ན་ སྤིག་རྒེ་ ཁ་ཟོའེ་རྡེ་ ལྕང་མ་ ཙུག་ཏེ་, འབྲེ་རྦུ་ ཙལ་ལེ་ སོང་ འིན་ན་ འབྲེ་རྦུ་ མ་ཐོབ་། 7 ཁོའེ་ ཚེ་འབད་ཀན་ལ་ ཟེར་, ‘ལོ་ སུམ་ སོང་ འི་ ལྕང་མེ་ཀ་ནི་ ང་ འབྲེ་རྦུ་ ཅིག་ལ་ མ་ཐོབ་། ཅེད་ཏེ་ ཕོྃ་ཏོང་, ཏོན་མེད་ལ་ ས་ཅ་ རྒག་ཏེ་ པོར་རྡུག་།’”

8 “ཚེ་འབད་ཀ་ནེ་ ལེན་ཏྃ་, ‘སྤོན་འབོ་, ཏ་རུང་ ལོ་ ཅིག་ པོ་རེ་ ཛེད་, ངེ་ ཀྱིར་ ཧོར་རྡེ་ ས་ཀྱེཏ་ ཧོའེ་རྡེ་ ལུད་ ཏང་ངེན་། 9 ཀལ་ཏེ་ ལྟིང་མེ་ ལོ་ འབྲེ་རྦུ་ མིན་ནི་ རྒྱ་ལེ་ སོང་, འིན་ན་ མ་མིན་ནི་ ཅེད་རྡེན་།’”

ཡི་ཤུའི་ ངལ་ཚོའེ་ ཞག་ལ་ ཕན་ཅུག་རྒེ་ ཛེད་།

10 ངལ་ཚོའེ་ ཞག་ལ་ ཡི་ཤུའི་ ཡ་ཧུ་འདཱ་པེ་ འདུ་ཀང་ཞིག་རྒེ་ན་ ལབ་ཞ་ སལ་ ཟ་ནེ་ 11 པུད་ཀ་ནེ་ ལོ་ ཅོབ་ཀྱེཏ་ནི་ཕ་ལ་ འགོང་འབེ་ ཁོྃ་ཤུ་ཀ་ནེ་ པོ་མོ་ཞིག་ ཡོད་པེན་, ཁོ་ རྒུར་རྒུར་ སོང་འདེ་ ཀྲང་པོ་ ལྃ་ ཉེན་ནེ་ མེད་པེན་། 12 ཡི་ཤུའི་ ཁོ་ ཟི་རྡེ་རྡང་ འདུན་ལ་ འབོ་ ཛེད་ཏེ་ མོལ་, “པོ་མོ་, ཁྱེ་རང་ འི་ ཟུར་མོ་ནི་ ཐ་རེན་།” 13 ཁོང་ངེ་ ཁོའེ་ཀ་ ཆག་ པོ་རེ་ ཛེ་རྡེ་རྡང་, ཏེ་རྒ་མ་རྒ་ ཁོ་ ཀྲང་པོའོ ལྃ་ཉེན་འདེ་ ཀོན་འཇོག་ལ་ རྟོད་པ་ པུལ་།

14 འིན་ན་ འདུ་ཀང་ངེ་ འུ་རྐྱོང་ངེ་ ངལ་ཚོའེ་ ཞག་ལ་ ཡི་ཤུའི་ ནེད་ ཕན་ཅུག་རྒེ་ ཛེད་ཅེ་ཀ་ནི་, སྲོ་ ཡོྃ་རྡེ་ མི་ཚོག་ལ་ ཟེར་, “ཞག་ ཀྲུག་ ལེ་ཧ་ ཅོ་ ཆོག་ཏེ་ ནོག་། ཏེ་རྒ་ ཞག་ ཀྲུག་རྒེ་ན་ ནེད་ནི་ ཕན་ཅུག་ཅེ་ལ་ ཡོྃ་, འིན་ན་ ངལ་ཚོའེ་ ཞག་ལ་ ཕན་ཅུག་ མི་ཉེན་།”

15 ཙོབོ་ ཡི་ཤུའི་ ཁོ་ མོལ་, “ངའིན་པ་ ཁྱི་ཞི་ ལང་ཀྲོ་ རྡང་ པུང་ངུ་ ངལ་ཚོའེ་ ཞག་ལ་ ཀྲཔ་རྐྱུ་ནི་ ཀྲོལ་རྡེ་ ཆུ་ ཏང་ངེ་ལ་ ཁྱེར་རེ་ མེད་རྡེ་? 16 ཏེ་ནི་ པུད་ཀ་ནེ་ ལོ་ ཅོབ་ཀྱེད་ནི་ཕ་ལ་ རྡུད་རྡེ་ རྡམ་འདེ་ པོར་ཧ་ནེ་ ཨབ་ར་ཧམ་མེ་ ཕར་རྒྱུད་ འི་ པོ་མོ་ ངལ་ཚོའེ་ ཞག་ལ་ ཐར་ཤུག་ མི་རྒོའེ་?” 17 ཡི་ཤུའི་ ཏོ་རྒུན་ མོལ་ལེ་རྡང་, ཁོང་ངེ་ འགྲ་ཝོ་རྒུན་ ཁྲེལ་རྦ་ སོང་, འིན་ན་ མི་ཚོག་ སོན་ཏེ་ ཡི་ཤུའི་ ཛེད་ཀན་འབོ་ ཧ་ལེ་ཤེ་ ཆག་ལེ་རྒུན་ ཐོང་འདེ་ མ་ ཐེད་པོ་ སོང་།

ཉུང་ཧར་རེ་ ས་ངོན་ནེ་ སྲུང་ངུ་།

18 ཏེ་ནི་ ཡི་ཤུའི་ མོལ་, “ཀོན་འཇོག་རྒེ་ རྒྱལ་སྲིད་པོ་ ཅི་ ཙོག་སེ་ ནོག་? ངེ་ ཏོ་ ཅི་ཞིག་ ཉམ་པོ་ རྡུར་? 19 ཏོ་ ཉུང་ཧར་རེ་ ས་ངོན་ ཙོག་སེ་ ནོག་ ཀའོ་ མི་ཞིག་རྒེ་ ཁོ་རང་ངེ་ ཚེའེ་ན་ ཏབ་རྦེ་ལ་ ཁྱེར་, ཏོ་ རྐྱེ་རྡེ་ ལྕང་མ་ ལྡན་, ཡང་ ནམ་ཀེ་ ཅ་རྒུ་ནི་ ཏོ་རྦེ་ ཡ་ལག་རྒེ་ཀ་ ཚ་ང་ ཅོའེ་།”

20 ཡི་ཤུའི་ ཡང་ འདྲི་ ཛེད་, “ངེ་ ཀོན་འཇོག་རྒེ་ རྒྱལ་སྲིད་པོ་ ཅི་ཞིག་ ཉམ་པོ་ རྡུར་? 21 ཏོ་ རྐྱུར་ ཙོག་སེ་ འིན་, ཀའོ་ པོ་མེ་, ཕེ་ མང་པེ་ན་ སྲེ་རྡེ་ རུའི་རྡེ་ རྐྱུར་རྦོ་ པག་པེ་ སོན་ཏེ་ན་ འདྲེའེ་།”

རྒྱེ་རྒོ་ ཕྲ་མེ་ སྲུང་ངུ་།

22 ཡི་ཤུ་ ཀྲོང་ཁྱེར་ རྡང་ འགམ་ཡུལ་རྒུན་ རྒྱུད་ཏེ་ ཡེ་རུ་ཤ་ལེམ་ ཆོག་ལ་ རྐྱོད་ཟ་ནི་ ཁོང་ངེ་ ལབ་ཞ་ སལ་ལེ་ ཛེད་། 23 མི་ཞིག་རྒེ་ ཡི་ཤུ་ འདྲི་, “ཙོབོ་ལེ་ མི་ ཉུང་ཙེ་ཞིག་ལ་ མ་ནི་ ཐར་པ་ མི་ཐོབ་རྦེ་?”

ཁོང་ངེ་ ལེན་སལ་, 24 “རྒོ་ ཁྲ་མོ་ནི་ ཞུ་ཤེ་ ཙོན་འགྲུའི་ སྲན་ཀྲེ་ ཅོའེ་, ཅེ་ཟེར་ནི་ ངེ་ ཁྱི་ཞ་ ཟེ་འིན་, མི་ མང་པེ་ ཏེ་ནང་ནི་ ཞུ་ཤེ་ ཙོན་འགྲུའི་ ཅོའེན་, འིན་ན་ ཞུ་ མི་ཉེན་། 25 ཁང་རྡག་ ལྃ་རྡེ་ རྒོ་ ཅུག་ཚར་རེ་རྡང་, ཁྱི་ཞ་རྒུན་ ཕི་ལོག་ལ་ ལུའི་རྡེ་ རྒོ་ རྡུང་ངེན་ འཇུ་འཇུ་, ‘ཙོབོ་ལེ་ ང་ཞི་ཕི་ རྒོ་ པེ་ཛེད་’ ཟེ་འིན་། ཁོའེ་ ལེན་ཏང་ངེན་, ‘ངེ་ ཁྱི་ཞ་ ཤེ་རྡེ་མེད་ ཡང་ ཁྱི་ཞ་ ཀ་ནི་ ཡོྃ་རྡེ་ འིན་ ང་ རྒྱུའི་མེད་།’ 26 ཏེ་ནི་ ཁྱི་ཞི་ ཟེ་རེན་, ‘ང་ཞི་ ཉེ་རང་ ཉམ་པོ་ ཟོའེ་རྦེན་ ཐུྃ་རྦེན་, ང་ཞི་ ཀྲོང་ཁྱེར་རེ་ ལམ་རྒུ་ནི་ཀ་ ཉེ་རང་ངེ་ ལབ་ཞ་ སལ་ལེ་ ཛེད་།’ 27 འིན་ན་ ཁོའེ་ ལེན་ཏང་ངེན་, ‘ངེ་ ཁྱི་ཞ་ ཤེ་རྡེ་མེད་ ཡང་ ཁྱི་ཞ་ ཀ་ནི་ ཡོྃ་རྡེ་ འིན་ ང་ རྒྱུའི་མེད་, ལེ་ཧ་ ངན་པ་ ཅོ་ཀན་རྒུན་ ང་ས་ནི་ ཐག་རིང་ལ་ སོང་།’”

28 “ཨབ་ར་ཧམ་, ཨི་སཱག་, ཡ་ཀུབ་ ཏང་ ལུང་རྟོན་པ་ ཚང་མ་ ཀོན་འཇོག་རྒེ་ རྒྱལ་སྲིད་རྡེ་ན་ ཡང་ ཁྱི་ཞ་རྒུན་ ཕི་ལོག་ལ་ ཕང་ཀན་འབོ་ ཁྱི་ཞི་ ཐོང་ངེ་རྡང་, ཁྱི་ཞ་ ངུ་ཅེ་ རྡང་ སོ་ སིག་ཅེ་ ཡོང་ངེན་། 29 མི་རྒུན་ ཤར་, ལོ་, ནུབ་, ཅང་ནི་ ཡོྃ་རྡེ་, ཀོན་འཇོག་རྒེ་ རྒྱལ་སྲིད་རྡེ་ན་ འདོན་ཏང་ངེ་ཕི་ རང་ངེ་ མལ་ལེ་ཀ་ འདེད་རྡེན་། 30 ནེན་ཏེན་, ལྟིང་འཇུག་ལ་ ཡོ་ཀན་རྒུན་ འགོ་ལ་ ལེབ་རྦེན་ ཡང་ འགོ་ལ་ ཡོ་ཀན་རྒུན་ ལྟིང་འཇུག་ལ་ ལུའི་རྡེན་།”

ཡི་ཤུ་ ཡེ་རུ་ཤ་ལེམ་པ་རྒུ་ནི་ཀ་ ཐུག་རྐྱོ་མོ་ རྐྱོད་།

31 ཏེ་རྒ་ ཏུའི་ལ་ པ་རུ་ཤི་པ་ ཁ་ཅིག་ ཡོྃ་རྡེ་ ཁོང་ལ་ ཟེར་, “འེ་ཀ་ནི་ ཞེན་ ས་ཅ་ཞིག་ལ་ རྐྱོད་ ཅེ་ཟེར་ནི་ རྒྱ་སྤོ་ ཧེ་རོད་འདེ་ ཉེ་རང་ སེད་ཅེ་ ཧབ་ ཙལ་རྡུག་།”

32 ཡི་ཤུའི་ ཁོང་རྒུན་ལ་ མོལ་, “སོང་ ཡང་ ཏེ་ ཝ་ཙེ་ལ་ ཟེར་, ‘ཏི་རིང་ འདང་ ཐོ་རེ་ ངེ་ རྡུད་རྒུན་ ཕིང་ཅེ་ རྡང་ ནེད་པ་རྒུན་ ཕན་ཅུག་རྒེ་ཡོད་ ཡང་ ཞག་ སུམ་པེ་ ཞག་ལ་ ང་ ཅོའོ་ ཡོང་ཀ་ནེ་ ལེ་རྦོ་ ཀྲུཔ་རྦེན་།’ 33 འོ་ནེ་, ཏི་རིང་, ཐོ་རེ་ རྡང་ ནྃ་རྒུན་ ངེ་ ཡེ་རུ་ཤ་ལེམ་ལ་ ཆ་ཅེ་ ང་རང་ངེ་ པེ་རྦོ་ རྒག་ མི་རྒོའེ་, ཅེ་ཟེར་ནི་ ནེན་ཏེན་ ལུང་རྟོན་པ་ཞིག་ ཡེ་རུ་ཤ་ལེམ་མེ་ ཕི་ལོག་ལ་ མི་སེད་།”

34 “ཡེ་རུ་ཤ་ལེམ་པ་, ཡེ་རུ་ཤ་ལེམ་པ་, ལུང་རྟོན་པ་རྒུན་ སེད་ཀན་ ཡང་ ཁྱི་ཞི་ཀ་ ལམ་ཅུག་རྒེ་ ཛེད་ཀན་རྒུན་ལ་ རྡོ་ རྒྱབ་ཏེ་ སེད་ཀན་རྒུན་, ཅ་མེ་ རང་ངེ་ ཅབ་རུག་རྒུན་ རྐྱོབ་ཅེ་ལ་ ཤོག་པེ་ ཡོག་ལ་ རྡུ་ ཙོག་སེ་, ངེ་ལ་ ཁྱི་ཞ་ ལེན་ མང་པོ་ རྡུ་ཅེ་ འདོད་པ་ ཅོའེ་རྦེན་, འིན་ན་ ཁྱི་ཞི་ ང་ ཅོ་ མ་ཅུག་། 35 ཏ་ ལྟོའེ་, ཁྱི་ཞི་ ཀོན་འཇོག་རྒེ་ ཁང་པེ་ན་ ཞུ་ཧན་འབོ་ འབིང་འདེ་ རྐྱོད་། ངེ་ ཁྱི་ཞ་ རྡེན་འབའ་ ཟེ་འིན་, ཁྱི་ཞི་ ང་ ཡང་ མི་ཐོང་ ནམ་ཚུག་པ་ ཁྱི་ཞི་, ‘ཙོབོ་ ཀོན་འཇོག་རྒེ་ ཝང་ཆེ་ན་ རྐྱོད་ཀན་འབོ་ ཅིན་ལབ་ཅེན་ འིན་’ མི་ཟེར་།”