ཤང་ ཅོ་ཅེ་ རྡང་ སེམ་རུའི་ ཏང་ཅེ་།
12
ཏེ་ཏུའི་ལ་ ལྟོང་ཕྲག་ མང་པེ་ མི་ཚོག་ ཛོམ་ཅེ་ ཅིག་ ཏང་ ཅིག་ ནེན་ནེ་ཡོད་པེན་, ཡི་ཤུའི་ ངུལ་ལ་ ཁོ་རང་ངེ་ ལོབ་ཀྲུག་རྒུན་ལ་ ཟི་རྡེ་ མོལ་, “པ་རུ་ཤི་པེ་ རྐྱུར་མེ་ཀ་ནི་ ཤང་ ཅོའེ་ ཀ་འབོ་ ཁོང་ངེ་ ངའིན་པ་ ནོག་། 2 ཀབ་ཏེ་ པོར་ཧན་ ཚང་མ་ ཕིང་ངེ་ ཛེ་རྡེན་ ཡང་ རྦེ་རྡེ་ པོར་ཧན་ ཚང་མ་ མི་རྒུན་ལ་ ངོན་ཅུག་རྒེ་ ཛེ་རྡེན་། 3 ཁྱི་ཞི་ མུན་ཀྲག་རྒེ་ན་ ཟེར་ཧན་རྒུན་ ཉི་མེ་ འོད་རྡེ་ན་ ཚོར་རེན་, ཡང་ ཁྱི་ཞི་ ཁང་པེ་ ནང་ཀུ་ལ་ ནམ་ཅོག་རྒེ་ན་ ཤུབ་ཏེ་ ཟེར་ཧན་རྒུན་ ཁང་པེ་ ཁ་ཏོཏ་ནི་ ཀུ་ཅུ་ ཏྃ་རྡེ་ ཤེད་རྡེན་།”4 “ངེ་ ཡ་ཏོ་རྒུན་ ཁྱི་ཞ་ ཟེ་འིན་, ལུའི་ ཅིག་པོ་ སེད་ ཉེན་ཀན་རྒུན་ལ་ མ་འཇིའི་ ཏེ་སང་ མང་ངེ་ ཁོང་ལ་ ཅང་ ཅོ་ མི་ཉེན་། 5 འིན་ན་ འཇིའི་རྒོ་ཤེ་ཅེན་འབོ་ ངེ་ ཁྱི་ཞ་རྒུན་ལ་ ཤེད་རྡེན་, ལུའི་ སེད་ཏེ་ ལྟིང་ནི་ ཉ་ཝེ་ན་ ཕང་ངེ་ ཛེད་ཅེ་ ཝང་ཆ་ ཡོ་ཀ་ནེ་ ཀོན་འཇོག་ལ་ འཇིའི་། འོ་ནེ་ ངེ་ ཁྱི་ཞ་ ཟེ་འིན་, ཁོང་ལ་ འཇིའི་།”
6 “པེ་ནེ་ ཉི་ལ་ ཅི་སྤ་ ང་ ཙོང་ངེ་ མི་འདུག་རྒེ་? འིན་ན་ ཀོན་འཇོག་རྒེ་ ཏོ་རྒུ་ནི་ ནང་ནི་ ཅིག་ལ་ ཞེད་རྡེ་ ཛེད་ཏེ་ མི་འདུག་། 7 ཁྱི་ཞི་ འགོའེ་ཀ་ ཡོ་ཀ་ནེ་ སྲེ་ ཀྲང་ཧ་ལ་ ཁོང་ངེ་ ཁྱེན་ནེ་ ཛེད་རྡེ་ནོག་། ཏེ་རྒ་རྦེ་ཕི་ འཇིའི་ མ་འཇིའི་, ཀོན་འཇོག་རྒེ་ ཧུ་འདུན་ལ་ ཅི་སྤ་ མང་པེ་སང་ ཁྱི་ཞ་ ཅིག་ མང་ངེ་ རིན་ཆེ་ ནོག་།”
8 “ངེ་ ཁྱི་ཞ་ ཟེ་འིན་, མི་རྒུ་ནི་ འདུན་ལ་, ཡི་ཤུ་ ངེ་ ཙོབོ་ འིན་ ཟེར་ཧན་ ཚང་མ་ མི་རིག་རྒེ་པུ་ལ་ ཀོན་འཇོག་རྒེ་ ཕོ་ཉ་རྒུ་ནི་ འདུན་ལ་ ཁོང་རྒུན་ ཁོའེ་ རྡེན་འབེ་ ལོབ་ཀྲུག་ འིན་ ཟེ་འིན་། 9 འིན་ན་ མི་རྒུ་ནི་ འདུན་ལ་ ང་ མི་ཤེ་ཟུན་ ཏང་ཀན་ ཚང་མ་, ངེ་ལ་ ཀོན་འཇོག་རྒེ་ ཕོ་ཉ་རྒུ་ནི་ འདུན་ལ་ ཁོང་རྒུན་ མི་ཤེ་ ཟེ་འིན་། 10 མི་རིག་རྒེ་པུའི་ རྒྱཔ་འགལ་ལ་ ཟེར་ཧན་ ཚང་མ་ ཤག་སྤ་ སལ་ལེ་ ཛེ་རྡེན་, འིན་ན་ ཏམ་པེ་ ཐུག་ཡིད་རྡེ་ རྒྱཔ་འགལ་ལ་ ཟེར་ཧན་རྒུན་ལ་ ཤག་སྤ་ མ་ནི་ མི་སལ་།”
11 “ཁོང་རྒུ་ནི་ ཁྱི་ཞ་ འདུ་ཀང་, ཝང་སྲུལ་པ་ རྡང་ ཝང་ཆ་ ཡོ་ཀན་རྒུ་ནི་ འདུན་ལ་ ཁྱོང་ངེ་རྡང་ རང་ རྐྱོན་མེད་ ཀ་ཟུག་རྒེ་ ལྟན་ནེན་ ཡང་ ཅི་ ཟེ་རེན་ སམ་འདེ་ ཚེར་ མ་ཚེར་། 12 ཅེ་ཟེར་ནི་ ཏེ་རྒ་ ཏུའི་ལ་ ཟེར་རྒོ་ཤེའོ་ ཏམ་པེ་ ཐུག་ཡིད་རྡེ་ ཁྱི་ཞ་ སལ་ལེ་ ཛེ་རྡེན་།”
མི་ སམ་མེད་ ཆུག་པོ་ཞིག་རྒེ་ སྲུང་ངུ་།
13 ཏེ་ནི་ མི་ཚོག་རྡེ་ ཕྲོ་ནི་ མི་ཞིག་རྒེ་ ཡི་ཤུ་ ཟེར་, “ལོབ་རྦོན་ལེ་, ང་ཞ་ ནོར་ཧལ་ ཐོབ་ཀན་འབོ་ ང་ ཉམ་པོ་ རྒོ་ཅེ་ལ་ ངེ་ ཨ་ཅོ་ མོ་ལ་།”
14 ཡི་ཤུའི་ ཁོ་ མོལ་, “ཡ་ཏོ་ ཁྱི་ཞི་ ནོར་ཧལ་ རྒོ་ཀ་ནེ་ ཁྲིམ་སྤོན་ ཡང་ མེ་འབར་ ང་ སུའི་ ཧོའེ་?” 15 ཏེ་ནི་ ཁོང་ངེ་ མི་ཚོག་ལ་ མོལ་, “ཤང་ ཅོའེ་, ནབ་སེམ་མེ་ན་ ཚང་མ་ནི་ ཐག་རིང་ལ་ ཁྱི་ཞི་ རང་ རྐྱོབ་ཏེ་ པོར་ ཅེ་ཟེར་ནི་ མི་ཞིག་རྒེ་ མི་ཙེ་ རིན་འབོ་ ཁོ་ ཡོ་ཀ་ནེ་ ནོར་རེ་ཀ་ རག་ལེ་རྡེ་ མག་།”
16 ཏེ་ནི་ ཡི་ཤུའི་ སྲུང་ངུ་ཞིག་ ཤེད་རྡེ་ ཛེད་, “མི་ ཆུག་པོ་ཞིག་རྒེ་ ས་ཀྱེཏ་ལ་ ལྟོན་ཏོག་ རྒྱ་ལེ་ མ་མང་པོ་ རྐྱེ་། 17 ཁོའེ་ སམ་ ‘ཏ་ ངེ་ ཅི་ ཅོའེན་? འི་ ལྟོན་ཏོག་ ཚང་མ་ ཆུད་ཅེ་ པང་ང་ ང་ མེད་།’ 18 ཏེ་ནི་ ཁོའེ་ ཁོ་རང་ལ་ ཟེར་, ‘ངེ་ པང་ང་རྒུན་ འདང་ ཅ་ལག་ པོར་ས་ ཤིག་ཏེ་ ཆོན་མོ་ རིག་ སིག་རྒེན་ ཡང་ ཏོ་རྒུ་ནི་ན་ ངེ་ འགྲུ་ནའ་ རྡང་ ནོར་ ཚང་མ་ པོ་རེན་། 19 ངེ་ ང་རང་ངེ་ ཟེ་འིན་, ང་ སོ་རྡེ་ཅེན་, ཏ་ ང་ ལོ་ མང་པེ་ཕི་ ནོར་ འདུག་། ངལ་ཚོའེ་རྡེ་ ཟོ་, ཐུང་, རྐྱིད་པོ་ རྡང་ ཐེད་པོ་ ཅོའེ་།’”
20 “འིན་ན་ ཀོན་འཇོག་རྒེ་ ཁོ་ མོལ་, ‘སམ་མེད་ ཁྱེ་རང་, ཏི་རིང་ ཚེན་ལ་ ཁྱེ་རང་ངེ་ སྲོག་ ངེ་ ཁྱེར་རེན་། རང་ངེ་ཕི་ སག་ཀ་ནེ་ ནོར་རྒུན་ སུ་ ཕ་ནེན་?’”
21 “ཀོན་འཇོག་རྒེ་ འདུན་ལ་ ཆུག་པོ་ མ་འགྱུར་རེ་ རང་ངེ་ཕི་ འཇིག་རྟེན་ནེ་ཀ་ ནོར་ སག་ཀན་རྒུན་ལ་ ཏེ་རྒ་ ཙོག་སེ་ ཆེན་།”
ཚེར་ མ་ཚེར་།
22 ཏེ་ནི་ ཡི་ཤུའི་ རང་ངེ་ ལོབ་ཀྲུག་རྒུན་ལ་ མོལ་, “ཏོ་རྦེ་ཕི་ ངེ་ ཁྱི་ཞ་ ཟེ་འིན་, ཅི་ ཟོའེན་, ཡང་ ཟུག་ལ་ ཅི་ ཀོན་ནེན་ སམ་འདེ་ རང་ངེ་ མི་ཙེ་ཕི་ ཚེར་ མ་ཚེར་། 23 ཁར་ཞི་སང་ སྲོག་པོ་ ཡང་ ཀོའེ་རྡེ་སང་ ལུའི་རྦོ་ ཁག་ཆེ་ མག་རྒེ་? 24 ཕོ་རོག་རྒུན་ལ་ ལྟོའེ་, ཏོ་རྒུ་ནི་ ཞིང་ མི་ཏབ་ ཡང་ ཞིང་ མི་ངེ་, ཏོ་རྒུན་ལ་ ཛོད་ ཡང་ པང་ང་ མི་འདུག་, འིན་ན་ ཀོན་འཇོག་རྒེ་ ཏོ་རྒུན་ལ་ ཁར་ཞི་ སལ་ལེ་ ཛེད་ཏུག་། ཅ་རྒུ་ནི་སང་ ཁྱི་ཞ་ མང་ངེ་ རིན་ མི་ཆེ་། 25 ཁྱི་ཞ་ སུ་ཞིག་རྒེ་ ཚེར་ཧ་ ཅོའེ་རྡེ་ ཁྱི་ཞི་ མི་ཙེ་ན་ ཆུ་ཙོད་ ཅིག་ རྐྱེད་ ཉེན་ནེན་ནེ་? 26 ཁྱི་ཞི་ ཚེར་ཧ་ ཅོའེ་རྡེ་ ཏོ་ཙོག་སེ་ ཆུང་ཙེ་ ལེ་ཧ་ཞིག་ ཅོ་ མ་ཉེན་ན་, ཏེ་ནི་ ཞེན་ ལུའི་ཧན་རྒུ་ནི་ཕི་ ཅེ་ ཚེར་ཧ་ ཅོ་ཡོད་?”
27 “སྤང་ཏང་ངེ་ མེན་ཏོག་རྒུན་ ཀ་ཟུག་ལ་ ལྡན་འདུག་ ལྟོའེ་རྡང་, ཏོ་རྒུ་ནི་ ལེ་ཧ་ ཅོའོ་ མག་ ཡང་ པལ་ ཁལ་རྡེ་ ཀོའེ་ ཐག་རྒེ་ མི་འདུག་། འིན་ན་ ངེ་ ཁྱི་ཞ་ ཟེ་འིན་, རྒྱ་སྤོ་ སོ་ལོ་མོན་, ཁོ་རང་ངེ་ སྤལ་ལེ་ན་ མ་ ཀྲག་པོ་ ཀོའེ་ལག་ ཀོན་ནང་ ཏོ་ མེན་ཏོག་རྒུན་ ཙོག་སེ་ རྡེ་མོ་ རྡང་ ཛེ་སྤོ་ ཐོང་ངེ་ མེད་པེན་། 28 ཀལ་ཏེ་ ཀོན་འཇོག་རྒེ་ ཏི་རིང་ ཡོ་ཀན་ ཐོ་རེ་ མེ་ སྲག་རྒེ་ལ་ ཕང་ཅེ་ཅེན་ནེ་ སྤང་ཏང་ངེ་ མེན་ཏོག་རྒུན་ལ་ ཏོ་ཙོག་སེ་ ཀོའེ་ལག་ ཧོན་ ཉེན་ནེ་ཡོད་ནི་, ཏེཏ་ཆུང་ཅེན་རྒུན་ ཀོན་འཇོག་རྒེ་ ཁྱི་ཞ་རྒུན་ལ་ ཏོ་རྒུ་ནི་སང་ ཀོའེ་ལག་ ཀྲག་པོ་ ཧོན་ནེ་ མི་ཛེད་རྡེ་?”
29 “ཏོ་རྦེ་ཕི་ ཏུའི་རྒྱུན་ ཁྱི་ཞི་ ཅི་ ཟོའེན་ ཡང་ ཐུང་ངེན་ མ་སམ་, ཏོ་རྒུ་ནི་ཕི་ ཚེར་ཧ་ མ་ཅོ་། 30 འཇིག་རྟེན་ནེ་ ཞེན་ ཆོའེ་ལུག་རྒེ་ མི་རྒུན་ ཏོ་ ཚང་མེ་ ལྟིང་འགྲྃ་ནི་ རྒྱུག་རྒེ་ནོག་, ཡང་ ཁྱི་ཞི་ རྡེ་བ་ཅན་ནེ་ ཡབ་རྦེ་, ཁྱི་ཞི་ ཏོ་ཙོག་སེ་ རྒོའེ་ཤེ་ཅན་རྒུན་ ཁྱེན་ནེ་ ཛེ་རྡེ་ནོག་། 31 འིན་ན་ ཁྱི་ཞ་རྒུན་ ཀོན་འཇོག་རྒེ་ རྒྱལ་སྲིད་པོ་ ཙོལ་, ཏེ་ནི་ ཁོང་ངེ་ ཏེ་ཀ་ ནེན་འདེ་ ཁྱི་ཞི་ ཞེན་ རྒོའེ་ཤེ་ཅན་རྒུན་ལ་ སལ་ལེ་ ཛེ་རྡེན་།”
32 “ངེ་ ལུག་ ཏུམ་འབུ་ ཆུང་ཙེ་, འཇིའི་ མ་འཇིའི་། ཁྱི་ཞི་ རྡེ་བ་ཅན་ནེ་ ཡབ་ ཁྱི་ཞ་རྒུན་ལ་ ཁོ་རང་ངེ་ རྒྱལ་སྲིད་ སལ་ལེ་ ཐུག་ཐེད་རྡེ་ནོག་། 33 རང་ངེ་ ནོར་རྒུན་ ཙོྃ་རྡེ་ ཉལ་རྦ་ཅེན་རྒུན་ལ་ ཞིན་པ་ ཏོང་། ཏུ་ཟུག་ ཅོ་ནི་ ཁྱི་ཞི་ ཁྱི་ཞ་རང་ངེ་ཕི་ མ་ནི་ མི་ཆེད་ཅེ་ ཁོ་མག་ ཏང་ རྡེ་བ་ཅན་ནེ་ན་ མི་ཚར་ཤི་ ནོར་ ཐོབ་རྦེན་, ཏུ་རུ་ ཧུན་མ་ མི་ཡོང་ ཡང་ མུག་སྤེ་ མི་ཟ་། 34 ཁྱི་ཞི་ ནོར་སག་ས་ ཁྱི་ཞི་ ཉིང་ལ་ ཆག་རྡེན་།”
ཤང་ ཅོ་ཅེ་།
35 “ཞབ་རྟོག་ ཞུ་ཅེ་ཕི་ ཀྲལ་འགྲིག་ ཅོའེ་རྡེ་ ཁྱི་ཞ་རང་ངེ་ འོད་ སྤར་རྡེ་ པོར་, 36 ཀ་ཟུག་ སྤོན་འབོ་ པག་རྟོན་ནེ་ འགྲོན་ནི་ ལོག་ཏེ་ ལེབ་ཅེ་ལ་ སྲུྃ་རྡེ་ འདེད་ཀ་ནེ་ ཡོག་པོ་རྒུ་ནི་ ཅོ་ཡོད་། རྒོ་ རྡུང་ངེ་རྡང་ ཁོང་རྒུ་ནི་ འགོར་ མ་ཤུག་རྒེ་ སྤོན་འབོ་ལ་ རྒོ་ པེ་། 37 སྤོན་འབོ་ ཡོང་ངེ་རྡང་ སྲུྃ་རྡེ་ ཉིད་མ་ཏང་ངེ་ ཐོང་ཀ་ནེ་ ཡོག་པོ་རྒུ་ནི་ཀ་ ཐེད་པོ་ ཆེན་། ངེ་ ཁྱི་ཞ་ རྡེན་འབའ་ ཟེ་འིན་, སྤོན་འབེ་ ཞབ་རྟོག་པེ་ ཀོའེ་ལག་ ཀོན་འདེ་ ཁོང་རྒུན་ ཁར་ཞི་ ཟ་སེ་ ཅོག་ཙེ་ འདུན་ལ་ འདེད་ཅུག་ཏེ་, ཁོང་རྒུན་ལ་ ཞབ་རྟོག་ ཞུའིན་། 38 སྤོན་འབོ་ ཚེན་ཕེད་ལ་ ཡང་ ནམ་ ཟ་ར་ཟི་རེ་ ནམ་ལྃ་ཀྱི་ ཡོྃ་ཏེ་ནི་ ཁོང་རྒུན་ ཉིད་ མ་ཏང་ལ་ ཤང་ ཅོའེ་རྡེ་ ཐོང་ནི་, ཁོང་རྒུན་ལ་ སོལ་རེ་ ཏང་ངེན་།”
39 “འིན་ན་ འི་རྦོ་ ཧ་ཀོ་ཅུག་ཧེ་, ཀལ་ཏེ་ ཚེན་ལ་ ཧུན་མ་ ཡོང་ཅེ་ ཏུའི་ཚོད་པོ་ ཁང་རྡག་ལ་ རྒྱུའི་ཡོད་པེ་ནི་, ཁོའེ་ ཁོ་རང་ངེ་ ཁང་པེ་ན་ ཧུན་མ་ ཞུའུ་ མི་ཤུག་། 40 ཏོ་རྦེ་ཕི་ ཁྱི་ཞ་ ཏུའི་རྒྱུན་ ཀྲལ་འགྲིག་ འདེད་རྒོའེ་ ཅེ་ཟེར་ནི་ ཁྱི་ཞ་རྒུ་ནི་ རེ་ཝ་ མེད་རྡེ་ ཏུའི་ལ་ མི་རིག་རྒེ་པུ་ ཡོང་སྲིད་ཅེ་ ནོག་།”
41 པི་ཏྲ་རེ་ འདྲི་ “ཙོབོ་, འི་ སྲུང་ངུའི་ སྤེ་རྦོ་ ང་ཞི་ཕི་ འིན་ནེ་ ཡ་ མི་ཚང་མེ་ཕི་ འིན་?”
42 ཙོབོ་ ཡི་ཤུའི་ ཡང་ སྲུང་ངུ་ཞིག་ རྒྱུད་ཏེ་ ལེན་སལ་, “སྤོན་འབེ་ ཁོ་རང་ངེ་ ཁང་པེ་ ལྟ་ཏོག་ ཏང་ ཞེན་ ཡོག་པོ་རྒུན་ལ་ ཏུའི་ཀ་ ཞག་ཏང་ངེ་ ཁར་ཞི་ ཏང་ཅེ་ཕི་ ཧོ་ཀན་ ལོ་ཁྱེལ་ཅེན་ འདང་ ཤེ་རབ་ཅེན་ནེ་ ཆག་ཛོད་ སུ་ ནོག་? 43 སྤོན་འབོ་ ལོག་ཏེ་ ཡོང་ངེ་རྡང་ ཡོག་པོ་རྦེ་ ཁོའེ་ ཧོའེ་ཧེ་ནེ་ ལེ་ཧ་རྦོ་ ཅོའེན་ ཐོང་ནི་ ཁོ་ སོལ་རེ་ ཏང་ངེན་། 44 ངེ་ ཁྱི་ཞ་ རྡེན་འབའ་ ཟེ་འིན་, སྤོན་འབེ་, ཁོ་རང་ངེ་ ནོར་ ཚང་མ་ ལྟ་ཏོག་ ཅོ་ཅེ་ ཁག་པོ་ ཁོ་ ཏང་ངེན་། 45 འིན་ན་ ཀལ་ཏེ་ ཡོག་པོ་རྦེ་, ངེ་ སྤོན་འབོ་ ཏུའི་ཡུན་རིང་ ལོག་ཏེ་ མི་ཡོང་ སམ་འདེ་ ཞེན་ ཡོག་པོ་ རྡང་ ཡོག་མོ་རྒུན་ལ་ རྡུང་ཅེ་ འགོ་ཟུག་ ཅོའེ་རྡེ་ ཟོའེན་ ཆང་ ཐུང་ངེན་ ར་རོའེ་ནི་, 46 ཁོའེ་ རེ་ཝ་ མེད་རྡེ་ ཞག་ལ་ ཡང་ ཁོ་ རྒྱུའི་མེད་རྡེ་ ཏུའི་ཚོད་པེ་ཀ་ སྤོན་འབོ་ ཡོྃ་རྡེ་ ཁོ་ ལྟུམ་བ་ལྟུམ་པེ་ན་ ཅེད་ཏེ་ ཏེཏ་པ་ མེ་ཀན་རྒུན་ ཕང་སེ་ ས་ཅེ་ཀ་ ཕང་ངེན་།”
47 “སྤོན་འབེ་ ཐུག་འདོད་པོ་ རྒྱུའི་ཡོད་ཏེ་ལ་ ཀྲལ་འགྲིག་ ཡང་ ཏོ་རྒུན་ ལག་ལེན་ མ་ཅོ་ཀ་ནེ་ ཡོག་པོ་རྒུན་ལ་ ཆེད་པ་ ཧོཔ་ ཏང་ངེན་། 48 འིན་ན་ སྤོན་འབོའེ་ ཐུག་འདོད་པོ་ མ་ཤེ་རྡེ་ ཆེད་པ་ ཕོག་ཅེ་ ལེ་ཧ་ ཅོ་ཀ་ནེ་ ཡོག་པོ་རྒུན་ལ་ ཆེད་པ་ ཉུང་ཙེ་ ཕོག་རྒེན་། ཁག་ མང་ངེ་ ཀལ་ཧན་རྒུ་ནི་ཀ་ནི་ ཞབ་རྟོག་ མང་ངེ་ ཐོབ་ཅེ་ རེ་ཝ་ པོ་རེན་, ཡང་ མང་ངེ་ ལྟེད་ཀན་རྒུ་ནི་ཀ་ནི་ མང་ངེ་ སོད་རྡེན་།”
ཞིའི་རྡེ་ མེད་ པོ་ པུད་ཅེ་།
49 “ང་ འི་ འཇིག་རྟེན་པ་རྒུ་ནི་ སེམ་མེ་ན་ མེ་ སྤར་རེ་ ཡོང་རྦེན་, ཡང་ ངེ་ འདོད་པ་རྦོ་ སྤར་ ཚར་རྡེ་ འབའ་རེན་ ཡོད་ཅེའོ་ འིན་། 50 འིན་ན་ ངེ་ རྡུ་ངལ་ལེ་ ཁྲུའི་ཞིག་ ནེན་ཅེ་ འིན་, ཏོ་ འདྲན་འདྲ་ ཀྲུཔ་ཀྲུཔ་ཚུག་པ་ ང་ སེམ་འདོམ་ སྲན་ཀྲེ་ རག་། 51 ཁྱི་ཞི་ ང་ འཇིག་རྟེན་ནེ་ཀ་ ཞིའི་རྡེ་ ཁྱོ་ངེ་ལ་ ཡོྃ་རྡེ་ ནོག་ ས་མེ་ རག་རྒེ་? མན་, ངེ་ ཁྱི་ཞ་ ཟེ་འིན་, ང་ པོ་ པུད་རྡེ་ལ་ ཡོྃ་རྡེ་ འིན་། 52 ཏི་ནི་ཕ་ལ་, སྤེར་ན་ ནང་མི་ ངེ་ ནང་ཚང་ངེ་ན་ པོ་ པུད་རྡེན་, སུམ་འབེ་ ཉི་ རྒྱཔ་འགལ་ ཡང་ ཉི་རྦེ་ སུམ་མེ་ རྒྱཔ་འགལ་ ཅོའེན་,
53 ངེ་ཀ་ ཏེཏ་པ་ ཅོ་ཅེ་རྦེ་,
ཨ་རྦེ་ རང་ངེ་ པུ་ཙ་ ངོ་ལོག་ ཡང་
པུ་ཙེ་ རང་ངེ་ ཨ་རྦ་ལ་ ངོ་ལོག་ ཅོའེན་།
ཨ་མེ་ རང་ངེ་ པོ་མོ་ལ་ ངོ་ལོག་ ཡང་
པོ་མེ་ རང་ངེ་ ཨ་མ་ལ་ ངོ་ལོག་ ཅོའེན་།
པུ་ཙེ་ ཨ་མེ་ པུ་ཙེ་ ན་མ་ལ་ ངོ་ལོག་ ཡང་
པུ་ཙེ་ ན་མེ་ རང་ངེ་ མག་པེ་ ཨ་མ་ལ་ ངོ་ལོག་ ཅོའེན་།”
ལྟའ་རྒུན་ ཧ་ཀོ་ཅེ་།
54 ཡི་ཤུའི་ མི་ཚོག་ལ་ མོལ་, “ཁྱི་ཞི་ ནུབ་ ཆོག་ནི་ སྲིན་ ལང་ངེ་ ཐོང་ངེ་རྡང་, ཆར་སྤ་ ཏྃ་ནོག་ ཟེར་རྡུག་, ཡང་ ཆར་སྤ་ ཏང་འདུག་། 55 ཡང་ ལོ་ ཆོག་ནི་ ལུྃ་སྤོ་ རྒྱུག་རྒེ་རྡང་, ཁྱི་ཞི་ ཚེད་ ཡོང་ཅེ་ ནོག་ ཟེར་རྡུག་, ཡང་ ཚེད་ ཡོང་འདུག་། 56 ཝ་ ངའིན་པ་རྒུན་, ཁྱི་ཞི་ ནམ་ཀ་ རྡང་ ཐང་ཀེ་ཀ་ སོང་ཀ་ནེ་ ནམ་ལེ་ ལྟའ་རྒུན་ ཤེད་ཉེན་འདུག་, འིན་ན་ ཁྱི་ཞ་རྒུ་ནི་ འི་ཏུའི་རྡེ་ ལྟའ་རྒུན་ ཅེ་ ཤེད་ཉེན་ནེ་ མེ་རག་?”
57 “ཀྲང་པོ་ ཅི་ འིན་ ཁྱི་ཞ་རང་ངེ་ ཐག་ཅོད་ ཅེ་ ཉེན་ནེ་ མེ་རག་? 58 ཁྱེ་རང་ངེ་ ཉེད་ཀལ་པ་ ཉམ་པོ་ ཁྲིམ་སྤོན་ནེ་ འདུན་ལ་ ལེབ་རྦེ་སང་ ངུལ་ལ་ ལམ་ལ་ ནང་འགྲིག་ ཅོ་ཅེ་ ཙོན་འགྲུའི་ ཅོའེ་, ཏེ་མ་ནི་ ཁོའེ་ ཁྱེ་རང་ ཁྲིམ་སྤོན་ནེ་ འདུན་ལ་ ཁྱེར་རེ་སྲིད་ཅེ་ ནོག་, ཡང་ ཁྲིམ་སྤོན་ནེ་ ཁྲིམ་ཁུང་ངེ་ མག་སྤོན་ལ་ ལྟེད་ཏེ་, ཁྱེ་རང་ ཙོན་ཁང་ལ་ ཧ་རེན་། 59 ངེ་ ཁྱི་ཞ་ ཟེ་འིན་, ཁྱེ་རང་ ཙོན་ཁང་ནི་ ཏེ་ཏེ་ཚུག་པ་ མི་པུད་ ནམ་ཚུག་པ་ ཁྱེ་རང་ངེ་ ཆེད་པེ་ མུལ་ ཚང་མ་ མི་ཤལ་།”