ལུ་ཀ་ 11

མོ་ལམ་ ཞུ་ཅེ་ ལབ་རྦེ་ ཛེད་།

ཞག་ཤིག་ ཡི་ཤུའི་ ས་ཅ་ཞིག་རྒེ་ཀ་ མོ་ལམ་ ཞུ་ཡོད་པེན་, མོ་ལམ་ ཞུའི་ ཚར་རེ་རྡང་ ལོབ་ཀྲུག་ ཅིག་རྒེ་ ཁོང་ལ་ ཟེར་, “ཙོབོ་ལེ་, ང་ཞ་ མོ་ལམ་ ཞུ་ཅེ་ ལབ་རྦེ་ ཛེད་རྡང་ ཀ་ཟུག་ ཡོ་ཧཱ་ནན་ནེ་ ཁོ་རང་ངེ་ ལོབ་ཀྲུག་རྒུན་ལ་ ལབ་རྦེ་ ཛེད་།”

2 ཡི་ཤུའི་ ཁོང་རྒུན་ལ་ མོལ་, “ཁྱི་ཞི་ མོ་ལམ་ ཞུ་ཟ་ནི་ འི་ཟུག་ ཟེར་,

‘ཡབ་ལེ་, ཉེ་རང་ངེ་ ཚན་ ཏམ་པ་ མི་ ཐམ་ཅེད་རྡེ་ སི་ཝ་ ཅོ་ཤིག་།

ཉེ་རང་ངེ་ རྒྱལ་སྲིད་ འགྱོ་སྤ་ ལེབ་ཤིག་།

3 ཞག་ཏང་ ང་ཞ་ རྒོ་ཤེ་ ཁར་ཞི་ སལ་ལེ་ ཛེད་,

4 ང་ཞི་ རྡིག་པ་ ཅོའེ་ཧན་རྒུན་ལ་ ཤག་སྤ་ སལ་ལེ་ ཛེད་།

ཅེ་ཞུ་ནི་ ང་ཞི་ རྒྱཔ་འགལ་ལ་ རྡིག་པ་ ཅོ་ཀན་ ཚང་མ་ལ་

ང་ཞི་ལ་ ཤག་སྤ་ ཏང་ངེ་ཡོད་།

ཐི་ཚོད་ལྟོའེ་ ཏུའི་ལ་ རྡིག་པ་ ཅོ་ཅེ་ནི་ ང་ཞ་ རྐྱོབ་རྦེ་ཛེད་།’”

5-6 ཏེ་ནི་ ཁོང་ངེ་ ཁོང་རྒུན་ལ་ སྲུང་ངུ་ཞིག་ ཤེད་རྡེ་ ཛེད་, “ཁྱི་ཞི་ ཅིག་, ཁོ་རང་ངེ་ ཡ་ཏོ་ ཁང་པ་ ཚེན་ཕེད་ལ་ སོང་འདེ་ ཟེར་ནི་ ‘ཡ་ཏོ་ འཇུ་འཇུ་ ང་ ཏི་རྒིར་ སུམ་ རྐྱི་རྡེ་ ཏོང་ང་, པེའེ་ནི་ ཡོྃ་ཧ་ནེ་ ངེ་ ཡ་ཏོ་ཞིག་ ཡོྃ་རྦེ་ ང་ ཁོ་ ཟ་ལ་ ཏང་ཅེ་ ཅང་ མེད་།’ 7 ཏེ་ནི་ ནང་ཀུག་ནི་ ཟེར་, ‘ང་ ནག་ མ་ལྟན་། རྒོ་ ཅུག་ཚར་ ཡང་ ང་ རྡང་ ངེ་ ཕྲུ་རྒུ་རྒུན་ མལ་ཙེ་ན་ ཉལ་ཚར་། ངེ་ ཁྱེ་རང་ལ་ ཡ་ཏོ་ ཅོ་ཉེན་ཅེ་ མེ་རག་།’ 8 ངེ་ ཁྱི་ཞ་ ཟེ་རེན་, ཡ་ཏོ་ འིན་ཅེ་རྦེ་ ཁོའེ་ ལྃ་རྡེ་ ཏི་རྒིར་ མ་ཏྃ་རྦེ་, ཁོ་ ཁྲེལ་མེད་རྡེ་ ཏོང་ ཟེ་རེན་ འདེད་ཅེ་ཀ་ནི་ ཁོ་ ལྃ་རྡེ་ ཁོ་ རྒོའེ་ཤེ་ ཡོ་ཀན་འབོ་ ཏང་ངེན་།”

9 “ཏོ་རྦེ་ཕི་ ངེ་ ཁྱི་ཞ་ ཟེ་འིན་, ཞུའིན་ འདོད་ ཁྱི་ཞ་ སལ་ལེ་ ཛེ་རྡེན་, ཙལ་ལེན་ འདོད་ ཁྱི་ཞ་ ཐོབ་ཅུག་རྒེ་ ཛེ་རྡེན་, རྒོ་ རྡུང་ངེན་ འདོད་ པེ་ ཛེ་རྡེན་། 10 ཞུ་ཀན་ ཚང་མ་ལ་ སལ་ལེ་ ཛེ་རྡེན་, ཙལ་ཧན་ ཚང་མ་ལ་ ཐོབ་རྦེན་, ཡང་ རྒོ་ རྡུང་ཀན་ ཚང་མ་ལ་ པེ་ ཛེ་རྡེན་།”

11 “ཁྱི་ཞ་རྒུ་ནི་ ཕྲོ་ནི་ ཀ་ ཨ་རྦ་རྦེ་ རང་ངེ་ པུ་ཙེ་ ཉ་ ཏོང་ ཟེར་ནི་ རུལ་ ཏང་ངེན་ནེ་? 12 ཡང་ ཕྲུ་རྒུའི་ ཁྲུལ་ ཏོང་ ཟེར་ནི་ ཁོ་ རྡིག་པ་རཱ་ཙེ་ ཏང་ངེན་ནེ་? 13 ཁྱི་ཞ་རྒུན་ རྡིག་ཅེན་ འིན་ན་ རང་ངེ་ ཕྲུ་རྒུ་ལ་ ཕན་ཏོག་ཅེན་ ཏང་ཅེ་ ཤེ་རྡེ་ཡོད་ན་, ཁྱི་ཞི་ རྡེ་བ་ཅན་ལ་ ཞུ་ཧ་ནེ་ ཡབ་རྦེ་ ཁོང་ལ་ ཞུ་ཝ་ ཞུ་ཀན་རྒུན་ལ་ ཏམ་པེ་ ཐུག་ཡིད་ མང་ངེ་ མི་སལ་ལེ་?”

ཡི་ཤུ་ རྡང་ རྡུད་རྡེ་ འགོ་རྦ་ འབེལ་ཟེ་འབུལ་།

14 ཡི་ཤུའི་ མི་ ཧ་འགྲང་ཞིག་ནི་ རྡུད་ ཕིང་ངེ་ ཛེད་། རྡུད་པོ་ ཕིང་ངེ་རྡང་, ཧ་འགྲང་འབེ་ སྤེ་ར་ ཏྃ་, ཡང་ མི་ཚོག་པོ་ ཧ་ལེ་། 15 འིན་ན་ ཁོང་ ཁ་ཅིག་རྒེ་ ཟེར་, “འབེལ་ཟེ་འབུལ་ རྡུད་རྒུ་ནི་ འགོ་རྦེ་ ཁོ་ རྡུད་རྒུན་ ཕིང་ཅེ་ ཁྱུད་ ཏྃ་རྡེ་ ནོག་།” 16 ཞེན་ ཁ་ཅིག་རྒེ་ ཁོང་ལ་ ཐི་ཚོད་ལྟོའེ་རྡེ་ ཀོན་འཇོག་རྒེ་ ཝང་ཆ་ སལ་ཧན་འབོ་ ནེན་ཏེན་ ཅོ་ཅེ་ལ་ ནམ་ཀ་ནི་ ལྟའ་ཞིག་ ལྟོན་ ཟེར་།

17 ཁོང་རྒུ་ནི་ སམ་བ་ ངན་པ་འབོ་ ཡི་ཤུའི་ ཁྱེན་འདེ་ མོལ་, “རྒྱལ་སྲིད་རྡེ་ན་ ཡོ་ཀན་རྒུན་ ཐུན་འདེ་ མ་འདེད་ནི་ ཏོ་ མེ་ཀན་ ཆེན་, ཡང་ ནང་ཚང་ཞིག་རྒེ་ མི་རྒུན་ ནོལ་ལེན་ འདེད་ནི་ ཏོ་ ཞིག་རྒེན་། 18 ཀལ་ཏེ་ རྡུད་རྡེ་ ཁོ་རང་ལ་ ནོལ་ལེ་ཡོད་ནི་, ཏེ་ནི་ ཁོའེ་ རྒྱལ་སྲིད་པོ་ ཀ་ཟུག་རྒེ་ ལུའི་རྡེན་? ངེ་ ཏོ་ ཟེ་འིན་, ཅེ་ཟེར་ནི་ ཁྱི་ཞི་, ངེ་ རྡུད་རྡེ་ འགོ་རྦ་ འབེལ་ཟེ་འབུལ་ རྒྱུད་ཏེ་ རྡུད་རྒུན་ ཕིང་འདུག་ ཟེར་རེ་ནོག་། 19 ཀལ་ཏེ་ ངེ་ རྡུད་རྡེ་ འགོ་རྦ་ འབེལ་ཟེ་འབུལ་ རྒྱུད་རྡེ་ རྡུད་རྒུན་ ཕིང་ངེ་ཡོད་ནི་ ཏེ་ནི་ ཁྱི་ཞ་ འགྲང་ཀན་རྒུ་ནི་ སུ་ རྒྱུད་ཏེ་ རྡུད་རྒུན་ ཕིང་ངེ་ནོག་? ཏོ་རྦེ་ཕི་ ཁོང་རྒུ་ནི་ ཁྱི་ཞི་ ཟེར་ཧན་འབོ་ལ་ ཉེད་ཀལ་ ཅོའེན་། 20 འིན་ན་ ཀལ་ཏེ་ ངེ་ ཀོན་འཇོག་རྒེ་ ཁྱུད་ རྒྱུད་ཏེ་ རྡུད་རྒུན་ ཕིང་ངེ་ཡོད་ནི་ ཏེ་ནི་ ཁྱི་ཞི་ཀ་ རྡེ་བ་ཅན་ནེ་ རྒྱལ་སྲིད་ ལེཔ་ ཚར་རྡེ་ འིན་། 21 མི་ ཤུག་ཤེན་ཞིག་རྒེ་ ལག་ཆ་ ཁུར་རྡེ་ རང་ངེ་ ཁར་ སྲུང་ནི་ ཁོའེ་ ནོར་རྒུན་ ཧུ་ མི་ཉེན་། 22 འིན་ན་ ཁོའེ་སང་ ཤུག་ ཆེ་ཞིག་རྒེ་ ཁོ་ ནོལ་རྡེ་ ཕམ་ཀལ་འདེ་ ཁོ་ རྐྱོབ་ཅེ་ལ་ ལོ་ཁྱེལ་ ཡོ་ཀ་ནེ་ ལག་ཆ་རྒུན་ ཀོག་ཏེ་ ཁོའེ་ ནོར་རྒུན་ ཁྱེར་རེན་།”

23 “ང་ ཉམ་པོ་ མི་འདེད་ཀན་རྒུན་ ངེ་ རྒྱཔ་འགལ་ ཅོ་ནོག་ ཡང་ སུ་ཞིག་ ང་ ཉམ་པོ་ ལེ་ཧ་ ཅོ་ཀན་རྒུན་ ངེ་ རྒྱཔ་འགལ་ལ་ ལེ་ཧ་ ཅོ་མག་།”

24 “མི་ཞིག་རྒེ་ ནང་ནི་ འགོང་པོ་ ཕིང་འདེ་ ལྟིང་ནི་, འགོང་འབེ་ ཆུ་ མེད་ས་ རི་ལྟོང་ངེ་ན་ ཁོར་རེན་ ངལ་ཚོ་ས་ ཙལ་རྡེ་ལ་ མི་ཐོབ་ཅེ་ཀ་ནི་, ཁོའེ་ ཁོ་རང་ལ་ ཟེ་རེ་ནོག་, ‘ང་ འབིང་འདེ་ ཡོང་ཀ་ནེ་ ཏེ་རྒ་ མི་རྦེ་ན་ ལོག་ཏེ་ ཆེན་།’ 25 ཏུ་རུ་ ལེབ་རྦེ་རྡང་, ཏེ་ མལ་རྦོ་ ལག་མོ་ རྡུའི་རྡེ་ ཅི་ཚང་མ་ རང་རང་ངེ་ མལ་ལེ་ཀ་ པོར་རྡེ་ ཐོང་། 26 ཏེ་ནི་ ཁོ་ སོང་འདེ་ ཁོ་རང་ངེ་སང་ མང་ངེ་ ངན་པ་ ཞེན་ འགོང་པོ་ རྡུན་ ཁྲིད་ཏེ་ ཁྱོྃ་ ཡང་ ཏེ་རྒ་ མལ་ལེ་ན་ འདེད་། ཏེ་ནི་ ཏེ་ མི་རྦེ་ ནེ་ལུག་པོ་ ངུ་ལེ་སང་ ཐུ་ སོང་།”

27 ཡི་ཤུའི་ འི་ ཞལ་ཏ་རྒུན་ མོལ་ལེན་ ཡོད་ཟ་ནི་ མི་ཚོག་རྒེ་ ཕྲོ་ནི་ པོ་མོ་ཅིག་རྒེ་ ཀུ་ཅུ་ ཏང་ངེན་ ཟེར་, “ཉེ་རང་ ལྟམ་ཀན་ ཡང་ ཉེ་རང་ལ་ པི་རྦི་ ཏང་ཀ་ནེ་ ཨ་མ་ ཅིན་ལབ་ཅེན་ འིན་།”

28 ཡི་ཤུའི་ ལེན་སལ་, “ཀོན་འཇོག་རྒེ་ ཀའ་ ཉེན་འདེ་ ཏོ་རྒུ་ནི་ཀ་ ལག་ལེན་ ཅོ་ཀན་རྒུན་ མང་ངེ་ ཅིན་ལབ་ཅེན་ འིན་།”

ཡི་ཤུ་ ལྟའ་ ལྟན་ཅེ་ལ་ ཟེར་།

29 མི་ཚོག་པོ་ རྒྱེ་རྡེན་ སོང་འབེ་ ཡི་ཤུའི་ མོལ་, “འི་ མི་རབ་ ངན་པེ་ ང་ ནམ་ཀ་ནི་ ལྟའ་ ལྟོན་ ཟེར་རེ་ནོག་, འིན་ན་ ལུང་རྟོན་པ་ ཡོ་ནཱེ་ ལྟའ་རྦོ་ མ་ནི་ ཁོང་རྒུན་ལ་, ཡང་ ལྟའ་ཞིག་ མི་ལྟན་། 30 ལུང་རྟོན་པ་ ཡོ་ནཱ་ སོང་ཀན་འབོ་ ནི་ནེ་ཝ་པ་རྒུ་ནི་ཕི་ ཀོན་འཇོག་རྒེ་ ཁོ་ ཀ་ལེ་ ཛེད་ཀ་ནེ་ ལྟའ་ཞིག་ འིན་འབེན་, ཏེ་རྒ་ ཙོག་སེ་ མི་རིག་རྒེ་པུ་ ཉམ་པོ་ ཆ་ཅེ་ཅེན་འབོ་ལ་ འི་ མི་རབ་རྦེ་ཕི་ ལྟའ་ཞིག་ འིན་།”

31 “ཁྲིམ་ཅེད་རྡེ་ ཞག་ལ་ ལྃ་ཟ་ནི་ ལོ་ ཆོག་རྒེ་ རྒྱ་མེ་ འི་ མི་རབ་པོ་ལ་ ཆེད་པ་ ཕོག་ཅེ་ འོའེ་སྤ་ ནོག་ ཟེ་རེན་ ཅེ་ཟེར་ནི་ ཁོ་ རྒྱ་སྤོ་ སོ་ལོ་མོན་ནེ་ ཤེ་རབ་རྦེ་ སྤེ་ར་རྒུན་ ཉེན་ནེ་ལ་ ས་ཅ་ མ་ ཐག་རིང་ནི་ ཡོྃ་, ལྟོའེ་རྡང་ སོ་ལོ་མོན་ནེ་སང་ ཀྲ་རྒེ་ཞིག་ ཏག་ས་ འེ་ཀ་ ཡོད་། 32 ཀོན་འཇོག་རྒེ་ ཁྲིམ་ཅེད་རྡེ་ ཞག་ལ་ ལྃ་ཟ་ནི་ ནི་ནེ་ཝ་པ་རྒུ་ནི་ འི་ མི་རབ་པོ་ལ་ ཆེད་པ་ ཕོག་ཅེ་ འོའེ་སྤ་ ནོག་ ཟེ་རེན་ ཅེ་ཟེར་ནི་ ཁོང་རྒུ་ནི་ ཡོ་ནཱེ་ ཆོའེ་ཤེད་ཀན་འབོ་ ཉེན་འདེ་, སེམ་འགྱུར་, ལྟོའེ་རྡང་ ཡོ་ནཱ་སང་ ཀྲ་རྒེ་ཞིག་ ཏག་ས་ འེ་ཀ་ ཡོད་།”

ཀོན་འཇོག་རྒེ་ འོད་།

33 “སུ་ཞིག་ལ་ འོད་ ཏུག་ཏེ་ རྦེ་རྡེ་ ཡང་ ཟྃ་རྦུའི་ ཡོག་ལ་ མ་པོ་རེ་, ནང་ལ་ ཡོང་ཀན་ ཚང་མེ་ ཐོང་ཅེ་ལ་ འོད་རྟག་སེ་ཀ་ པོ་རེན་།”

34 “ཁྱི་ཞི་ མིག་པོ་ ཟུྃ་རྡེ་ འོད་པོ་ འིན་། མིག་པོ་ ཁམ་ཟང་ ཡོད་ནི་, ཁྱི་ཞི་ ལུའི་ སོན་ཏེ་ འོད་རྡེ་ ཀང་ངེན་, འིན་ན་ མིག་པོ་ ཁམ་ཟང་ མེད་ནི་, ཁྱི་ཞི་ ལུའི་ སོན་ཏེ་ མུན་ཀྲག་རྒེ་ ཀང་ངེན་།” 35 “ནེན་ཏེན་ ཅོ་ཤིག་, ཁྱི་ཞ་རང་ངེ་ན་ འོད་ ཡོད་ སམ་ཀན་འབོ་ ངོའེ་རྦོ་ལ་ མུན་ཀྲག་ཏ་ མན་ནེ་? 36 ཏ་ ཀལ་ཏེ་ ཁྱི་ཞི་ ཟུྃ་སྤོ་ སོན་ཏེ་ འོད་རྡེ་ ཀང་འདེ་, ཁག་ཅིག་ལ་ མུན་ཀྲག་རྒེ་ན་ མ་ལུའི་ན་, ཏོ་ནི་ ཁྱི་ཞི་ཀ་ འོད་ ཀྲག་པོ་ ཕོག་ཀན་ ཙོག་སེ་ ཁྱི་ཞི་ ཟུྃ་སྤོ་ སོན་ཏེ་ འདང་ཤེན་ འགྱུ་རེན་།”

ཡི་ཤུའི་ ཆོའེ་རྡེ་ འུ་རྐྱོང་རྒུན་ལ་ ཉེད་ཀལ་ ཅོའོ་ ཛེད་།

37 ཡི་ཤུའི་ ཞལ་ཏ་ མོལ་ ཚར་རེ་རྡང་, པ་རུ་ཤི་པ་ཞིག་རྒེ་ ཁོང་ལ་ ཁོ་རང་ངེ་ ཁང་པ་ འདོན་ཏང་ལ་ རྐྱོད་ ཞུའི་རྦེ་ ཡི་ཤུ་ རྐྱོད་ཏེ་ ཅོག་ཙེ་ འདུན་ལ་ ཞུའུ་། 38 ཕ་མེ་པེ་ ལུག་སྲོལ་ ནང་ཞིན་ ཆག་ མ་སིལ་ལེ་ ཁོང་ འདོན་ཏང་ འདོན་ནེ་ལ་ ཞུ་ཅེའོ་ ཐོང་འདེ་ པ་རུ་ཤི་པ་ ཧ་ལེ་།

39 ཏེ་ནི་ ཙོབོ་ ཡི་ཤུའི་ ཁོ་ མོལ་, “ཁྱི་ཞ་ པ་རུ་ཤི་པ་རྒུ་ནི་ ཀོ་རེ་ རྡང་ ཐ་ལི་ ཕི་ཏ་འབོ་ ལག་མོ་ ཅོ་རུག་, འིན་ན་ ཁྱི་ཞི་ ནང་ཀུ་ ནབ་སེམ་ འདང་ རང་འདོད་རྡེ་ ཀང་འདེ་ འདུག་། 40 ཁྱི་ཞ་ ཧ་འགྲང་རྒུན་ ཕི་ཏ་ ཛེད་ཀན་འབེ་ ནང་ཀུ་ལ་ ཛེད་ཏེ་ མག་རྒེ་? 41 ཁྱི་ཞི་ ཉིང་ནི་ རྒོའེ་ཤེ་ཅན་རྒུན་ལ་ ཞིན་བ་ ཏོང་, ཏེ་ནི་ ཁྱི་ཞི་ ནང་ཀུ་ རྡང་ ཕི་ལོག་ ཉ་ཧ་ནི་ ལག་མོ་ ཐེའེ་ ཛེ་རྡེན་།”

42 “པ་རུ་ཤི་པ་རྒུན་, ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་། ཁྱི་ཞ་རྒུ་ནི་ མན་སེ་ ཚེའེ་ཀ་ནི་ ཡོང་རྒོ་ ཆུང་ཤོག་རྡེ་ ནང་ནི་ལ་ ཁག་ཅུ་རྦོ་ པུལ་འདུག་པེ་, འིན་ན་ འོའེ་སྤེ་ ཁྲིམ་ཅེད་ ཏང་ ཀོན་འཇོག་རྒེ་ ཡ་ཤ་ ཅོ་ཅེ་རྒུན་ལ་ ནྃ་ པོ་རེ་ མི་འདུག་། ཁྱི་ཞི་ ཏེ་ ཀཱ་ཁྲིམ་རྒུན་ལ་ ནྃ་ ཅོ་ཅེ་ མ་ཚེད་ ཡོང་རྒོའེ་ ཁག་ཅུ་རྦོ་ ཀོན་འཇོག་ལ་ པུལ་རྒོའེ་།”

43 ཡི་ཤུའི་ མོལ་, “པ་རུ་ཤི་པ་རྒུན་, ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་། ཁྱི་ཞི་ འདུ་ཀང་ངེ་ན་ སི་ཝ་ཅེན་ནེ་ མལ་ ཙ་ལེ་ནོག་, ཡང་ ཁྲོམ་མེ་ན་ མི་རྒུན་ཀ་ནི་ སི་ཝ་ ཐོབ་ཅེ་ལ་ ཐེད་རྡེ་ནོག་། 44 ཁྱི་ཞ་རྒུན་ལ་ ཙམ་ཤིག་རྒེ་ འཇི་སྤ་ མི་ཡོང་, ཁྱི་ཞ་རྒུ་ནི་ ལྟའ་ མེ་ཀ་ནེ་ རོམ་ཀང་ ཙོག་སེ་ ནོག་, ཏེ་ ས་ཅ་ མ་ཤེ་ ཏེ་རྒ་ འགྲུལ་ཅེ་ཀ་ནི་ མི་རྒུན་ ཀྲིཔ་ འགྱུར་རེ་ནོག་།”

45 ཆོའེ་ཁྲིམ་ལ་ ཁེ་སྤ་རྒུ་ནི་ ཕྲོ་ནེ་ཅིག་རྒེ་ ཡི་ཤུ་ ཟེར་, “ལོབ་རྦོན་ལེ་, འི་ཟུག་ མོལ་རྡེ་ ཉེ་རང་ངེ་ ང་ཞ་ལ་ ཁྲེལ་རྦ་ ཅོའེ་།”

46 ཡི་ཤུའི་ ལེན་སལ་, “ཆོའེ་ཁྲིམ་ལ་ ཁེ་སྤ་རྒུན་ ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་, ཁྱི་ཞ་རྒུ་ནི་ ཁུར་ མི་ཉེན་ཤེ་ ཁྲིམ་མེ་ ཁུ་རུ་ ལྕིན་ཀྲེ་ མི་རྒུན་ལ་ ཀ་ལེ་ནོག་, འིན་ན་ ཡ་ཏོ་ ཅོ་ཅེ་ལ་ ཁོ་རང་རྒུ་ནི་ ཛུ་རྒུ་ལ་ སེ་ ཐེད་རྡེ་ མག་། 47 ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་། ཁྱི་ཞི་ ལུང་རྟོན་པ་རྒུན་ལ་ སྤུར་ཧང་ སིག་ཏུག་ ཀའོ་རྒུན་ ཁྱི་ཞི་ ཕ་མེ་པོ་རྒུ་ནི་ སེད་། 48 ཁྱི་ཞི་ ཁྱི་ཞ་རང་ངེ་ ཕ་མེ་པོ་རྒུ་ནི་ ཅོའེ་ཧན་རྒུན་ལ་ ཁ་ཆམ་འདེ་ སྤང་པོ་ ཏང་འདུག་ ཅེ་ཟེར་ནི་ ཁོང་རྒུ་ནི་ ལུང་རྟོན་པ་རྒུན་ སེད་ ཡང་ ཁྱི་ཞི་ ཁོང་རྒུ་ནི་ སྤུར་ཧང་ སིག་། 49 ཏོ་རྦེ་ ཅོའེ་རྡེ་ ཀོན་འཇོག་རྒེ་ ཤེ་རབ་རྦེ་ན་ ཁྱི་ཞི་ ཧོར་ལ་ མོལ་, ‘ངེ་ ཁོང་རྒུ་ནི་ཀ་ ལུང་རྟོན་པ་རྒུན་ འདང་ ཧུ་ཚབ་རྒུན་ ཀལ་ལེན་, ཁོང་རྒུ་ནི་ ཁ་ཅིག་ སེད་རྡེན་ ཡང་ ཁ་ཅིག་ལ་ ནག་པར་རྡོ་ ལྟ་ནེན་།’”

50 “ཏོ་རྦེ་ཕི་ འཇིག་རྟེན་ ཚུག་རྦེ་ནི་ཕ་ལ་ ལུང་རྟོན་པ་ ཚང་མེ་ སྲོག་ ལེན་ཀ་ནེ་ ཉེད་ཀལ་རྦོ་ འེ་རྒ་ མི་རབ་པེ་ཀ་ ཕོག་རྒེན་, 51 ཨ་འབེལ་ སེད་ཀན་ནེ་ ཏྃ་རྡེ་ ཀོན་འཇོག་རྒེ་ ཁང་པ་ འདང་ ཆོད་ཁྲི་ པར་ལ་ སེད་ཀེ་ནི་ འབཱ་རག་ཡཱེ་ པུ་ཙ་ ཟ་ཀར་ཡཱེ་ཚུག་པ་། ངེ་ རྡེན་འབའ་ ཟེ་འིན་, ཏོ་ སོང་ཀན་ ཚང་མེ་ ཆེད་པ་འབོ་ འི་ མི་རབ་རྦེ་ཀ་ ཕོག་རྒེན་།”

52 “ཆོའེ་ཁྲིམ་ལ་ ཁེ་སྤ་, ཁྱི་ཞ་ ཙམ་ཤིག་ འཇི་སྤ་ མི་ཡོང་། ཁྱི་ཞི་ ཀོན་འཇོག་ ཤེ་ཤེ་ ལམ་འབོ་ རྦེ་རྡེ་ པོར་རྡུག་, ཁྱི་ཞ་རང་རྒུན་ ཏེ་ན་ ཆ་ མི་འདུག་ མ་ཚེད་ ཏེ་ན་ ཆེན་ ཡོ་ཀན་རྒུན་ལ་ རྒག་རྐྱིལ་ ཏང་འདུག་།”

53-54 ཡི་ཤུ་ ཏེ་ཀ་ནི་ རྐྱོད་ཟ་ནི་ ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་ ཚང་མ་ སྲོ་ ཡོང་ཅེ་ཀ་ནི་ ཁོང་ལ་ ཏྲི་ཝ་ མང་པོ་ འདྲི་རྡེ་ ཁོང་ ཁད་ཅུག་ཅེ་ ཙོན་འགྲུའི་ ཅོའེ་།