ལོབ་ཀྲུག་ རྡུན་ཅུ་འདོན་ཉི་ ཀ་ལེ་ ཛེད་།
10
ཏེ་ ལྟིང་ནི་ ཙོབོ་ ཡི་ཤུའི་ ཞེན་ ལོབ་ཀྲུག་ རྡུན་ཅུ་ འདམ་མེ་ ཛེད་ ཡང་ ཁོང་རྒུན་ ཉི་ཉི་ ཅོའེ་རྡེ་ ཁོང་ངེ་སང་ ངུལ་ལ་ ཁོང་ རྐྱོད་ཅེ་ཅེན་ནེ་ ཀྲོང་ཁྱེར་ རྡང་ ས་ཅ་ ཚང་མ་ ཀལ་ལེ་ ཛེད་། 2 ཡི་ཤུའི་ ཁོང་རྒུན་ལ་ མོལ་, “ལྟོན་ཏོག་ མང་པོ་ཞིག་ ངེ་ ཆོག་ཆོག་ འདུག་, འིན་ན་ ལྟོན་ཏོག་ ངེ་ཀ་ནེ་ ལེ་མི་ མ་ ཉུང་ཙེ་ཞིག་ མ་ནི་ མི་འདུག་། ཏོ་རྦེ་ཕི་ ལྟོན་ཏོག་རྒེ་ རྡག་པོ་ ཙོབོ་ ཀོན་འཇོག་ལ་ ལྟོན་ཏོག་ ངེ་ཀ་ནེ་ ལེ་མི་ མང་ངེ་ ཀ་ལེ་ ཛེད་ཅེ་ལ་ ཞུ་ཝ་ པུལ་། 3 ཏ་ སོང་ ངེ་ ཁྱི་ཞ་ ཤང་ཀུའི་ ཕྲོ་ ལུ་རྒུ་ ཙོག་སེ་ ལམ་ཅུག་རྒེ་ཡོད་། 4 ཁོ་མག་ ཡང་ འཇོ་ལ་ རྡང་ འཇའ་ཏོ་ མ་ཁུར་, ཡང་ ལམ་ལ་ མི་རྒུན་ལ་ ལོན་སྲུལ་ལེན་ འདེད་ཏེ་ ཏུའི་ ཀོད་ལ་ མ་ཏང་།”5 “ཁྱི་ཞ་ ཁང་པ་ཞིག་རྒེ་ན་ ཆ་རྡང་ འགོ་མ་རང་ ཟེར་, ‘ཀོན་འཇོག་རྒེ་ ཞིའི་རྡེ་ ཏེ་ ཁང་པ་འབོ་ལ་ སལ་ཤིག་།’ 6 ཏེ་ ཁང་པེ་ན་ ཞིའི་རྡེ་ཅེན་ མི་ཞིག་ ཡོད་ནི་, ཀོན་འཇོག་རྒེ་ ཞིའི་རྡེ་ ཁོ་ ས་ལེན་། ཀལ་ཏེ་ མེད་ནི་, ཏེ་ ཞིའི་རྡེ་རྦོ་ ཁྱི་ཞ་ ལོག་ཏེ་ ལེབ་རྦེན་། 7 ཁྱི་ཞ་ ཅི་ ཏང་ཀན་འབོ་ ཟོའེན་ ཐུང་ངེན་ ཏེ་རྒ་ ཁང་པེ་ན་ འདོད་, ཅེ་ཟེར་ནི་ ལེ་ཧ་ ཅོ་ཀ་ནེ་ མི་ལ་ ལ་ཆ་ ཐོབ་ཅེ་ འོའེ་སྤ་ ནོག་། ཁང་པ་ ཅིག་ནི་ ཅིག་ལ་ འགྲུ་ལེན་ མ་འདེད་།”
8 “ཀྲོང་ཁྱེར་ཞིག་ལ་ ལེབ་རྦེ་རྡང་ ཁྱི་ཞ་ རྒ་སུའི་ ཅོ་ནི་ ཁོང་རྒུ་ནི་ ཏང་ཀ་ནེ་ ཁར་ཞི་རྒུན་ ཟོ་། 9 ཏུ་རུ་ ཡོ་ཀ་ནེ་ ནེད་པ་རྒུན་ ཕན་ཅུག་ ཡང་ ཁོང་རྒུན་ལ་ ‘ཀོན་འཇོག་རྒེ་ རྒྱལ་སྲིད་ ཁྱི་ཞི་ ཉེ་མོ་ ནོག་’ ཟེར་རྡེ་ ཤོད་། 10 འིན་ན་ ཀྲོང་ཁྱེར་ཞིག་རྒེ་ན་ ལེབ་ཏེ་ སུ་ཞིག་ལ་ ཁྱི་ཞ་ རྒ་སུའི་ མ་ཅོ་ནི་, ཏེ་ ཀྲོང་ཁྱེར་རེ་ ལམ་མེ་ཀ་ སོང་ ཡང་ ཟེར་། 11 ‘ང་ཞི་ འཇའ་ཏོ་ འཇར་ཧ་ནེ་ ཁྱི་ཞི་ ཀྲོང་ཁྱེར་རེ་ ཐལ་རྦ་རྦོ་ལ་ ཕི་རྡེ་ ང་ཞི་ ཁྱི་ཞ་རྒུན་ ཀོན་འཇོག་རྒེ་ ཆད་པེ་ཕི་ པོར་རྡེ་ འིན་ཀན་འབོ་ ལྟན་ནེ་ཡོད་། ཏེ་ན་ འི་རྦོ་ ཧ་ཀོ་རྒོའེ་: ཀོན་འཇོག་རྒེ་ རྒྱལ་སྲིད་ ཉེ་མོ་ ནོག་།’ 12 ངེ་ ཁྱི་ཞ་ ཟེ་འིན་, ཀོན་འཇོག་རྒེ་ འདམ་མེ་ ཛེད་ཀ་ནེ་ ཞག་ལ་, སོ་འདོམ་ ཀྲོང་ཁྱེར་རེ་ མི་ ངན་པ་རྒུ་ནི་སང་ ཏེ་ ཀྲོང་ཁྱེར་རེ་ མི་རྒུན་ལ་ ཆེད་པ་ ཧོཔ་ཅིག་ མང་ངེ་ ཕོག་རྒེན་།”
13 “ཀོ་ར་ཟིན་པ་ རྡང་ འབེད་སེ་འདཱ་པ་རྒུན་ ཁྱི་ཞ་རྒུན་ལ་ ཙམ་ཤིག་རྒེ་ འཇི་ནང་ མག་། ཀལ་ཏེ་ ཁྱི་ཞི་ན་ ལྟན་ཀ་ནེ་ ཛེད་པ་རྒུན་, ཏཱ་ཡིར་ རྡང་ སི་འདཱོན་ ཀྲོང་ཁྱེར་ ངན་པ་རྒུ་ནི་ན་ ལྟན་འབེན་ནི་, ཁོང་རྒུ་ནི་ རྡིག་པ་ ཕྃ་རྡེ་ སེམ་འགྱུར་རྡེ་ ཕ་ཙ་ ཀོན་འདེ་, ཀོག་ཏལ་ ཡོག་རྒེན་ རྡུག་པོ་ ཅོའེ་རྡེ་ ཡོད་ཁྲོ་། 14 འིན་ན་ ཀོན་འཇོག་རྒེ་ ཁྲིམ་ཅེད་རྡེ་ ཞག་ལ་, ཏཱ་ཡིར་ རྡང་ སི་འདཱོན་པ་ ཀྲོང་ཁྱེར་རེ་ མི་ ངན་པ་རྒུ་ནི་སང་ ཁྱི་ཞ་ ཆེད་པ་ ཧོཔ་ཅིག་ མང་ངེ་ ཕོག་རྒེན་། 15 ཝ་ ཀ་ཕར་ན་ཧུམ་པ་རྒུན་ ཅི་ ཁྱི་ཞ་, སི་ཝ་ ཏྃ་རྡེ་ ནམ་ཀ་ ཁྱེར་རེ་ ཛེ་རྡེན་ ས་མེ་ རག་རྒེ་? མ་ནི་ མི་ཐེན་། ཁྱི་ཞ་རྒུན་ ཉ་ཝེ་ན་ ཕང་ངེ་ ཛེ་རྡེན་།”
16 ཡི་ཤུའི་ ཁོང་ངེ་ ལོབ་ཀྲུག་རྒུན་ལ་ མོལ་, “ཁྱི་ཞི་ ཁྲིན་ ཉེན་ཀན་རྒུ་ནི་ ངེ་ལ་ ཉེན་འདེ་ ནོག་, ཡང་ ཁྱི་ཞི་ ཁྲིན་ མ་ཉེན་ཀན་རྒུ་ནི་ ང་ལ་ མ་ཉེ་ནེ་ ནོག་། ང་ མ་ཉེན་ཀན་རྒུ་ནི་ ངེ་ ཀ་ལེ་ ཛེད་ཀན་འབོ་ལ་ མ་ཉེ་ནེ་ ནོག་།”
17 ཏེ་ནི་ རྡུན་ཅུ་ རྐྱིད་པོ་ ཉམ་པོ་ ལོག་ཏེ་ ལེབ་ཏེ་ ཟེར་, “ཙོབོ་, ཉེ་རང་ངེ་ ཚན་ནེ་ཀ་ རྡུད་ ཚང་མེ་ལ་ ང་ཞི་ ཁ་ཉེན་།”
18 ཡི་ཤུའི་ ཁོང་རྒུན་ལ་ མོལ་, “རྡུད་ ལོག་ ཙོག་སེ་ ནམ་ཀེ་ ནང་ནི་ ཀྲུལ་ལེ་ལ་ ངེ་ ཐོང་། 19 ལྟོའེ་, ངེ་ ཁྱི་ཞ་རྒུན་ལ་ རུལ་ འདང་ རྡིག་པ་རཱ་ཙེ་རྒུན་ ཧང་ཡོག་ལ་ ནེན་ཅེ་ ཝང་ ཡང་ ཨ་ཧོ་རྒུ་ནི་ འགྲ་ཝོ་ རྡུད་རྡེ་ ཝང་ ཚང་མ་ མེ་ཀན་ ཅོ་ཅེ་ ཁྱུད་ ཏྃ་རྡེ་ འིན་ ཡང་ ཁྱི་ཞ་རྒུན་ལ་ སུ་ཞིག་ལ་ ནོད་རྐྱལ་ མི་ཉེན་། 20 རྡུད་རྒུན་ ཁྱི་ཞི་ ཁ་ ཉེན་ཀན་འབེ་ཀ་ རྒ་མོ་ མ་ཅོ་, འིན་ན་ ཁྱི་ཞ་རྒུ་ནི་ མིང་ རྡེ་བ་ཅན་ནེ་ན་ འབྲི་རྡེ་ འིན་ཀན་འབེ་ཀ་ རྒ་མོ་ ཅོའེ་།”
ཡི་ཤུའི་ ཡབ་ ཀོན་འཇོག་ལ་ རྟོད་པ་ པུ་ལེ་ ཛེད་།
21 ཏེ་རྒ་ ཏུའི་ལ་ ཡི་ཤུ་ ཏམ་པེ་ ཐུག་ཡིད་ རྐྱོད་ཏེ་ རྒ་མོ་ ཀང་འདེ་ མོལ་, “ངེ་ ཡབ་ ནམ་ཀ་ རྡང་ འཇིག་རྟེན་ནེ་ ཙོབོ་ལེ་, ངེ་ ཉེ་རང་ལ་ རྟོད་པ་ པུ་ལེ་ཡོད་ ཅེ་ཟེར་ནི་ ཉེ་རང་ངེ་ ཀྲང་པེ་ ལམ་འབོ་ ཁེ་སྤ་ རྡང་ ཡོན་ཏེན་ཅེན་རྒུ་ནི་ རྦེ་རྡེ་, ཕྲུ་རྒུ་ ཙོག་སེ་ ཡོ་ཀན་རྒུན་ལ་ ངོན་ཅུག་རྒེ་ ཛེད་། འོ་ནེ་ ཡབ་ལེ་ ཏུ་ཟུག་ ཛེད་ཅེའོ་ལ་ ཉེ་རང་ ཐུག་ཐེད་།”
22 “ངེ་ ཡབ་ ཀོན་འཇོག་རྒེ་ ཝང་ཆ་ ཚང་མ་ ང་ ལྟེད་རྡེ་ ཛེད་ཏེ་ འིན་། ཡབ་རྦེ་ མ་ནི་ ཞེན་སུ་ལ་ པུ་ཙ་ མི་ཤེ་, ཡང་ པུ་ཙེ་ མ་ནི་ ཞེན་སུ་ལ་ ཡབ་ ངོ་ མི་ཤེ་, འིན་ན་ ངེ་ འདམ་ཀན་རྒུན་ལ་ ཡབ་ ངོན་ཅུག་རྒེན་།”
23 ཏེ་ནི་ ལོབ་ཀྲུག་རྒུན་ ཆོག་ལ་ འགྱུར་རྡེ་ ཞེན་མ་རྒུན་ལ་ ཚོར་ མ་ཤུག་ལ་ མོལ་, “ངེ་ ཅོ་ཀན་རྒུན་ ཐོང་ཀ་ནེ་ ཁྱི་ཞི་ མིག་རྒུན་ ཅིན་ལབ་ཅེན་ འིན་། 24 ངེ་ ཁྱི་ཞ་ རྡེན་འབའ་ ཟེ་འིན་, ཁྱི་ཞ་རྒུན་ལ་ ཐོང་ཀན་ འདང་ ཚོར་ཧན་རྒུན་, ངུལ་མེ་ ལུང་རྟོན་པ་ རྡང་ རྒྱ་སྤོ་ མང་པོ་ཞིག་རྒེ་ ཐོང་ཅེ་ རྡང་ ཚོར་ཤེ་ འདོད་པ་ ཡོད་ནི་ མ་ཐོང་ངེ་ ཡང་ མ་ཚོར་རེ་ འིན་འབེན་།”
ས་མ་རི་ཡཱ་པ་ ཟང་པེ་ སྲུང་ངུ་།
25 ཆོའེ་ཁྲིམ་ལ་ ཁེ་སྤ་ཞིག་ ལྃ་རྡེ་ ཡི་ཤུ་ ཚོད་ལྟ་ཅེ་ལ་ འདྲི་, “ལོབ་རྦོན་ལེ་, ཐ་མེད་པེ་ མི་ཙེ་ ནོར་ཧལ་ལ་ ཐོབ་ཅེ་ཕི་ ངེ་ ཅི་ ཅོ་རྒོའེ་?”
26 ཡི་ཤུའི་ ཁོ་ མོལ་, “ཀཱ་ཁྲིམ་མེ་ སྤེ་ཆ་རྒུ་ནི་ན་ ཅི་ འབྲི་ཛེད་ཏེ་ འདུག་? ཁྱེ་རང་ངེ་ ཏོ་རྒུ་ནི་ ནང་ནི་ ཅི་ ཧ་ཀོ་?”
27 ཁོའེ་ ལེན་ཏྃ་, “ཙོབོ་ ཀོན་འཇོག་ལ་ ཉིང་ སོན་ཏེ་, སེམ་ སོན་ཏེ་, ཤེད་ སོན་ཏེ་ རྡང་ སམ་བ་ སོན་ཏེ་ན་ ཤེ་སྤ་ ཅོའེ་, ཡང་ རང་ངེ་ ཤེ་སྤ་ ཅོ་ཀན་ ཙོག་སེ་ ཁྱེ་རང་ངེ་ ཁྱིམ་ཙེ་པ་ལ་ ཤེ་སྤ་ ཅོའེ་།”
28 ཡི་ཤུའི་ ཁོ་ མོལ་, “ཁྱེ་རང་ངེ་ ལེན་ ཀྲང་པོ་ ཏྃ་། ཏ་ ཏེ་རྒ་ ཙོག་སེ་ ཅོ་ནི་ ཐ་མེད་པེ་ མི་ཙེ་ ཐོབ་རྦེན་།”
29 ཁོའེ་ ཁོ་རང་ ཤེ་རབ་ཅེན་ འིན་ཀན་འབོ་ ལྟན་ཅེ་ལ་ ཡི་ཤུ་ འདྲི་, “ངེ་ ཁྱིམ་ཙེ་ སུ་ ནོག་?”
30 ཡི་ཤུའི་ སྲུང་ངུ་ རྒྱུད་ཏེ་ ལེན་སལ་, “ཡ་ཧུ་འདཱ་པ་ཞིག་ ཡེ་རུ་ཤ་ལེམ་ནི་ ཡོག་ལ་ ཡེ་རི་ཀོ་ལ་ སོང་, ཁོ་ ལམ་ལ་ ཅག་པེ་ སྤུང་འགོལ་ ཅོའེ་རྡེ་ ལྕུ་རུ་ ཅོའེ་ ཡང་ ཁོ་ སྲན་ཀྲེ་ རྡུྃ་རྡེ་ ཤི་ལ་ པོར་། 31 ཏེ་ཀ་ ལམ་ནི་ ཡ་ཧུ་འདཱ་པེ་ ལ་མ་ཞིག་ སོང་, ཡང་ ཁོ་ ཐོང་ངེ་རྡང་ ཡ་ཏོ་ ཅོ་ཅེ་ཀ་ནི་ ཁོ་ ལམ་མེ་ འ་ངོ་ ཆོག་ནི་ སོང་། 32 ཏེ་རྒ་ ཙོག་སེ་ ཀོན་འཇོག་རྒེ་ ཁང་པེ་ན་ ཞབ་རྟོག་ ཞུ་ཀན་ ལི་ཝི་ཞིག་ ཏེ་ཀ་ ལེབ་ཏེ་ ཁོ་ ཐོང་ངེ་རྡང་ ཁོ་ལ་ ལམ་མེ་ འ་ངོ་ ཆོག་ནི་ སོང་།”
33 “འིན་ན་ ས་མ་རི་ཡཱ་པ་ པེ་སྤ་ཞིག་ ཏེ་ཀ་ ལེཔ་ ཡང་ ཁོའེ་ ཕོག་ཀ་ནེ་ མིའུ་ ཐོང་ངེ་རྡང་ ཁོའེ་ཀ་ ཉིང་ཞེ་ རྐྱེ་། 34 ཁོའེ་ འདུན་ལ་ སོང་འདེ་ མ་ཀ་རྒུན་ རྒྱལ་ཅེ་ལ་ མར་ རྡང་ རྒུན་འགྲུམ་མེ་ ཁོའེ་ ལུག་ཏེ་ རེ་ ལག་མོ་ སྲིལ་། ཏེ་ནི་ ཁོ་རང་ངེ་ པུང་ངུའི་ཀ་ རྐྱོན་འདེ་ པེ་ཧང་ལ་ ཁྱེར་རྡེ་ ཁོ་ ལྟ་ཏོག་ ཅོའེ་། 35 ཐོ་རེ་ ང་མོ་ ཁོའེ་ པེ་ཧང་ སྲུལ་ཧན་འབོ་ལ་ མུལ་ལེ་ པེ་ནེ་ ཉི་ ཏྃ་རྡེ་, ‘འི་ མིའུ་ལ་ ལྟ་ཏོག་ ཅོའེ་, འེ་སང་ མང་ངེ་ ཆ་ནི་ ང་ ལོག་ཏེ་ ཡོང་ངེ་རྡང་ ཁྱེ་རང་ལ་ ཏང་ངེན་’ ཟེར་།”
36 “ཏེ་ སུམ་མེ་ ཕྲོ་ནི་ ཅག་པེ་ སྤུང་འགོལ་ ཅོ་ཀན་ མི་རྦེ་ ཁྱིམ་ཙེ་པ་འབོ་ ཁྱེ་རང་ངེ་ སུ་ ནོག་ ས་མེ་རག་?”
37 ཆོའེ་ཁྲིམ་ལ་ ཁེ་སྤ་རྦེ་ ལེན་ཏྃ་, “ཁོ་ ཉིང་ཞེ་ ལྟན་ཀན་འབོ་།” ཡི་ཤུའི་ ཁོ་ མོལ་, “སོང་འདེ་ ཏེ་རྒ་ ཙོག་སེ་ ཅོའེ་།”
ཡི་ཤུ་ མར་ཡམ་ འདང་ མར་ཐཱེ་ ཁང་པ་ རྐྱོད་།
38 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ ཡེ་རུ་ཤ་ལེམ་ལ་ རྐྱོད་ཟ་ནི་ འགམ་ཡུལ་ཞིག་ལ་ ལེཔ་, ཏུ་རུ་ མར་ཐཱ་ ཟེར་ཧ་ནེ་ པོ་མོ་ཞིག་རྒེ་ ཁོང་ལ་ ཁོ་རང་ངེ་ ཁང་པ་ རྒ་སུའི་ ཞུའི་། 39 ཁོའེ་ ནོ་མོ་ མར་ཡམ་ ཙོབོ་རྡེ་ ཞབ་རྦེ་ འདུན་ལ་ འདེད་ཏེ་ ཁོང་ངེ་ ལབ་ཞ་རྒུན་ལ་ ཉེན་ནེ་ཡོད་པེན་། 40 འིན་ན་ ཡི་ཤུ་ འདོན་ཏང་ རྒྱེ་སྤ་ ཀྲལ་འགྲིག་ ཅོ་ཅེ་ན་ མར་ཐཱ་ ཡན་འདེ་ ལུའི་། ཁོ་ ཡི་ཤུ་ས་ ཡོྃ་རྡེ་ ཟེར་, “ཙོབོ་ལེ་, ངེ་ ནོ་མེ་ ང་རང་ ཅིག་པོ་ལ་ ལེ་ཧ་ ཚང་མ་ ཅོ་ ཅུག་ཀན་འབོ་ལ་ ནྃ་ སལ་ལེ་ མེད་རྡེ་? ཁོ་ ང་ ཡ་ཏོ་ ཅོའེ་ མོལ་ལང་།”