ལུ་ཀ་ 9

ཡི་ཤུའི་ ལོབ་ཀྲུག་ ཅུག་ཉི་རྦོ་ ཀ་ལེ་ ཛེད་།

ཡི་ཤུའི་ ལོབ་ཀྲུག་ ཅུག་ཉི་རྦོ་ལ་ འབོ་ ཛེད་ཏེ་ རྡུད་ ཞུ་ཧན་རྒུ་ནི་ ནང་ནི་ རྡུད་ ཚང་མ་ ཕིང་ཅེ་ རྡང་ ནེད་ ཕན་ཅུག་ཅེ་ ཁྱུད་ ཏང་ ཝང་ཆ་ སལ་ལེ་ ཛེད་། 2 ཡང་ ཀོན་འཇོག་རྒེ་ རྒྱལ་སྲིད་རྡེ་ ནེ་ཚུལ་ ཟང་པོ་ ཤེད་ཅེ་ རྡང་ ཟུར་མོ་ ཡོྃ་ཧན་རྒུན་ ཕན་ཅུག་ཅེ་ལ་ ཏེ་ཀ་ནི་ ལམ་ཅུག་རྒེ་ ཛེད་། 3 ཁོང་རྒུན་ལ་ མོལ་, “ཁྱེ་རང་རྒུ་ནི་ པེ་རྡེ་ཕི་ ལག་རྦེར་ ཡང་ འཇོ་ལ་ རྡང་ ཁར་ཞི་ ཡང་ མུལ་ རྡང་ ཀོའེ་ལག་ ཐེ་རྦ་ མ་ཁུར་། 4 ཁྱི་ཞ་ འགྲང་ས་ ཏང་ཀ་ནེ་ ཏེ་རྒ་ ཁང་པེ་ན་ འདོད་ ནམ་ཚུག་པ་ ཏེ་ ཀྲོང་ཁྱེར་ནི་ འབིང་འདེ་ མི་ཆ་། 5 ཀལ་ཏེ་ ཀྲོང་ཁྱེར་ཞིག་རྒེ་ན་ སུ་ཞིག་ལ་ ཁྱི་ཞ་ རྒ་སུའི་ མ་ཅོ་ནི་, ཏེ་ ཀྲོང་ཁྱེར་ནི་ འབིང་འདེ་ ཆ་ཟ་ནི་ རང་ངེ་ འཇའ་ཏོའེ་ ཐལ་རྦ་ སྲུག་ཏེ་ ཁོང་རྒུན་ ཀོན་འཇོག་རྒེ་ ཆེད་པེ་ཕི་ པོར་ཧན་འབོ་ ལྟོན་།”

6 ཁོང་རྒུན་ འགམ་ཡུལ་ནི་ འགམ་ཡུལ་ལ་ རྐྱོད་ཏེ་ ཀང་ལུང་ས་ ནེ་ཚུལ་ ཟང་པོ་ ཤེད་ ཡང་ ཟུར་མོ་ ཡོང་ཀན་རྒུན་ ཕན་ཅུག་རྒེ་ ཛེད་།

7 ཀ་ལོན་ ཧེ་རོད་ལ་ ཡི་ཤུའི་ ཛེད་ཀན་ ཚང་མ་ ཚོར་རྦེ་ ཐ་མ་ཐེ་ཚོམ་ སོང་ ཅེ་ཟེར་ནི་ ཁ་ཅིག་རྒེ་ ཡོ་ཧཱ་ནན་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཏེ་ ནོག་ ཟེར་རེ་ཡོད་པེན་། 8 ཞེན་ ཁ་ཅིག་རྒེ་ ངུལ་མེ་ ལུང་རྟོན་པ་ ཨེ་ལི་ཡཱ་ ངོན་འདེ་ ནོག་ ཡང་ ཁ་ཅིག་རྒེ་ ངུལ་མེ་ ལུང་རྟོན་པ་རྒུ་ནི་ ཕྲོ་ནི་ ཅིག་ སོན་པོ་ ལྃ་རྡེ་ ནོག་ ཟེར་། 9 ཧེ་རོད་འདེ་ ཟེར་, “ངེ་ ཡོ་ཧཱ་ནན་ནེ་ འགོ་ ཅེད་ཅུག་ཏེ་ འིན་འབེན་། ཏེ་ནི་ འི་རྦོ་ སུ་ ནོག་ ཀ་རྦེ་ ཧོར་ལ་ ང་ ཧ་ལེ་ཤེ་ སྤེ་ར་རྒུན་ ཚོར་རེན་ ནོག་” ཡང་ ཁོའེ་ ཡི་ཤུ་ ཐོང་ཅེ་ ཧབ་ཅིག་ སལ་ལེ་ཡོད་པེན་།

ཡི་ཤུའི་ མི་ ལྟོང་ང་ ཁར་ཞི་ སལ་།

10 ཡི་ཤུའི་ ཧུ་ཚབ་རྒུན་ ལོག་ཏེ་ ཡོྃ་རྡེ་ ཁོང་རྒུ་ནི་ ཅོ་ཀན་ ཚང་མེ་ ཧོར་ལ་ ཤེད་, ཡང་ ཡི་ཤུའི་ ཁོང་རྒུན་ ཅིག་པོ་ ཁྲིད་ཏེ་ འབེད་སེ་འདཱ་ ཟེར་ཧ་ནེ་ ཀྲོང་ཁྱེར་ལ་ རྐྱོད་། 11 འིན་ན་ མི་ཚོག་ལ་ ཏོ་ རྒྱུའི་སོང་འདེ་ ཁོང་ངེ་ ལྟིང་འགྲྃ་ནི་ འགྲྃ་རྡེ་ སོང་། ཡི་ཤུའི་ ཁོང་རྒུན་ལ་ རྒ་སུའི་ ཞུའི་རྡེ་ ཀོན་འཇོག་རྒེ་ རྒྱལ་སྲིད་རྡེ་ ཧོར་ལ་ ཤེད་རྡེ་ ཛེད་ ཡང་ ཁོང་ངེ་ ཟུར་མོ་ ཡོྃ་རྡེ་ ཡོ་ཀན་རྒུན་ ཕན་ཅུག་རྒེ་ ཛེད་།

12 ཉི་མ་ རྒེ་རྒེ་ལ་, ལོབ་ཀྲུག་ ཅུག་ཉི་རྦོ་ ཡི་ཤུ་ས་ ཡོྃ་རྡེ་ ཟེར་, “ཉེ་ཁོར་ རྡང་ འགམ་ཡུལ་རྒུན་ལ་ སོང་འདེ་ ཁོ་རང་རྒུ་ནི་ཕི་ ཁར་ཞི་ ཉོ་ཅེ་ ཡང་ འགྲང་ས་ ཙལ་ཤེ་ལ་ མི་ཚོག་པོ་ ལམ་ཅུག་རྒེ་ ཛེད་རྡང་ ཅེ་ཟེར་ནི་ ཨ་ཧོ་རྒུན་ ཅང་ མེད་སེ་ རི་ལྟོང་ངེ་ན་ ནོག་།”

13 ཡི་ཤུའི་ མོལ་, “ཁྱི་ཞི་ ཁོང་རྒུན་ལ་ ཟ་ཅེ་ ཏོང་།”

ཁོང་རྒུ་ནི་ ལེན་ཏྃ་, “ང་ཞ་ འི་ མི་ཚོག་ལ་ འགབ་ཅེ་ ཁར་ཞི་ ཉོ་ལ་ སོང་འདེ་ མ་ནི་, ང་ཞི་ ལག་ལ་ ཏི་རྒིར་ ང་ རྡང་ ཉ་ ཉི་ མ་ནི་ ཡོད་མེད་།” 14 ཏུ་རུ་ ཡོ་ཀ་ནེ་ པུ་ཙ་རྒུ་ནི་ ཀྲང་ཧ་ ཧ་ལམ་ ལྟོང་ང་ ཡོད་པེན་།

ཡི་ཤུའི་ ལོབ་ཀྲུག་རྒུན་ལ་ མོལ་, “ཏ་ ཚང་མ་ ཧ་ལམ་ ངཔ་ཅུ་ ངཔ་ཅུ་ པོ་ཙོ་ ཅོའེ་རྡེ་ འདེད་ཅུག་།”

15 ཏེ་ནི་ ཁོང་ངེ་ མོལ་ཧན་ ནང་ཞིན་ ཁོང་རྒུ་ནི་ མི་ཚང་མ་ འདེད་ཅུག་། 16 ཡི་ཤུའི་ ཏི་རྒིར་ ང་ རྡང་ ཉ་ ཉི་རྦོ་ ཆག་ལ་ ནམ་ ཡང་ ནམ་ཀ་ ཟི་རྡེ་ ཀོན་འཇོག་ལ་ ཐུག་ཞེ་ཆེ་ ཞུའི་, ཏི་རྒིར་ ཅག་ཏེ་ མི་ཚོག་ལ་ རྒོའེ་ཅེ་ཕི་ ལོབ་ཀྲུག་རྒུན་ལ་ སལ་ལེ་ ཛེད་། 17 ཁོང་ ཚང་མ་ འགྲྃ་འགྲྃ་ ཟོའེ་ ཡང་ ལོབ་ཀྲུག་རྒུ་ནི་ ལག་ལུའི་རྒུན་ རྡུའི་རྦེ་ ཙེ་སྤོ་ ཅུག་ཉི་ ཀང་།

པི་ཏྲ་རེ་ ཡི་ཤུ་ སུ་ འིན་ཀན་འབོ་ ཤེད་།

18 ཞག་ཤིག་ ཡི་ཤུ་ ཅིག་པོ་ མོ་ལམ་ ཞུ་ལ་ རྐྱོད་ ཁོང་ངེ་ ལོབ་ཀྲུག་རྒུན་ ཁོང་ངེ་ ཚམ་ལ་ ཡོད་པེན་, ཁོང་ངེ་ ཁོང་རྒུན་ལ་ འདྲི་ ཛེད་, “མི་རྒུ་ནི་ ང་ སུ་ ནོག་ ཟེར་རྡུག་?”

19 ཁོང་རྒུ་ནི་ ལེན་ཏྃ་, “ཁ་ཅིག་རྒེ་ ཁྲུའི་སལ་ཧན་ ཡོ་ཧཱ་ནན་, ཁ་ཅིག་རྒེ་ ལུང་རྟོན་པ་ ཨེ་ལི་ཡཱ་, ཡང་ ཞེན་མ་རྒུ་ནི་ ལུང་རྟོན་པ་ ཤི་ཀན་རྒུ་ནི་ ཕྲོ་ནི་ ཅིག་ཅིག་ སོན་པོ་ ལྃ་རྡེ་ ནོག་ ཟེར་རྡུག་།”

20 ཡི་ཤུའི་ མོལ་, “ཁྱི་ཞི་ ང་ སུ་ ནོག་ ཟེ་འིན་?”

པི་ཏྲ་རེ་ ལེན་ཏྃ་, “ཉེ་རང་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ ཞུ་རྡེ་ནོག་།”

21 ཡི་ཤུའི་ ཁོང་རྒུན་ལ་ ཏེ་ སྤེ་ར་རྒུན་ སུ་ལ་ མི་ཤེད་ཅེ་ལ་ ཀཱ་ སལ་། 22 ཁོང་ངེ་ མོལ་, “ཡ་ཧུ་འདཱ་པེ་ འུ་རྐྱོང་རྒུན་, ལ་མ་ འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ཀ་ནི་ མི་རིག་རྒེ་པུ་ལ་ རྡུ་ངལ་ མང་པོ་ ཉོང་འདེ་ ཤི་རྒོ་ཤེ་ ཡང་ ཞག་ སུམ་པེ་ ཞག་ལ་ སོན་པོ་ ལྃ་རྡེན་།”

23 ཏེ་ནི་ ཁོང་ངེ་ ཁོང་ ཚང་མ་ལ་ མོལ་, “ངེ་ ལྟིང་འགྲྃ་ནི་ ཡོང་ལ་ ཐེད་ཀན་རྒུན་, རང་འདོད་ ཕྃ་རྡེ་ ཞག་ཏང་ རང་ངེ་ རྡུ་ངལ་ རྐྱང་ཤིང་ ཁུར་རྡེ་ ང་ འགྲྃ་རྒོའེ་། 24 རང་སྲོག་ རྐྱོབ་ཉིན་ ཡོ་ཀན་རྒུ་ནི་ རྡེན་འབེ་ མི་ཙེ་ རྐྱལ་ལེན་, འིན་ན་ ངེ་ཕི་ ཁོང་ངེ་ སྲོག་ རྐྱལ་ཧན་རྒུ་ནི་ རྡེན་འབེ་ མི་ཙེ་འབོ་ རྐྱོབ་རྦེན་། 25 མི་ཞིག་ལ་ འཇིག་རྟེན་ སོན་ཏེ་ ཐོབ་ཏེ་ལ་ རང་ངེ་ རྡེན་འབེ་ མི་ཙེ་ རྐྱལ་ནི་ ཅི་ ཕན་ཏོག་? 26 ཀལ་ཏེ་ སུ་ཞིག་རྒེ་ ང་ རྡང་ ངེ་ ལབ་ཞེ་ སྤང་པོ་ ཏང་ཅེ་ལ་ ཁྲེལ་རྦ་ ཚོར་ནི་, ང་ མི་རིག་རྒེ་པུ་ ང་རང་ངེ་ ཟི་ཞིད་ ཏང་ ཡབ་རྦེ་ ཟི་ཞིད་རྡེ་ན་ ཏམ་པེ་ ཕོ་ཉ་རྒུན་ ཉམ་པོ་ ལོག་ཏེ་ ཡོང་ཟ་ནི་, ང་ ཁོའེ་ཀ་ ཁྲེལ་རྦ་ ཚོར་རེན་། 27 ངེ་ ཁྱི་ཞ་ རྡེན་འབའ་ ཟེ་འིན་, འེ་ཀ་ ཡོ་ཀན་ ཁ་ཅིག་རྒེ་ ཀོན་འཇོག་རྒེ་ རྒྱལ་སྲིད་ ཐོང་འདེ་ མ་ནི་ མི་ཤི་།”

ཡི་ཤུའི་ ཟི་ཞིད་ འཇལ་།

28 ཏོ་རྒུན་ མོལ་རྡེ་ ཧ་ལམ་ ཞག་ རྒྱེད་རྡེ་ ལྟིང་ནི་ ཡི་ཤུའི་ པི་ཏྲར་, ཡོ་ཧཱ་ནན་ འདང་ ཡ་ཀུབ་ ཁྲིད་ཏེ་ རི་ཞིག་རྒེ་ཀ་ མོ་ལམ་ ཞུ་ལ་ རྐྱོད་། 29 མོ་ལམ་ ཞུའིན་ ཡོད་ཟ་ནི་ ཁོང་ངེ་ ཞལ་འདོང་ངེ་ན་ འགྱུར་ཞ་ ཡོྃ་, ཡང་ ཁོང་ངེ་ ནམ་ཟ་ ལྟ་མི་ཉེན་ཅེ་ འོད་ཅེན་ ཀར་སྤོ་ འགྱུར་། 30 ཧུན་མེད་ལ་ ཁོང་རྒུ་ནི་ མི་ ཉི་, མོ་ཤེ་ རྡང་ ཨེ་ལི་ཡཱེ་ ཡི་ཤུ་ ཉམ་པོ་ ཞལ་ཏ་ ས་ལེན་ འཇལ་། 31 ཟི་ཞིད་རྡེ་ན་ ཁོང་རྒུ་ནི་ ཡི་ཤུ་ འཇིག་རྟེན་ནི་ རྐྱོད་ཅེ་ མོལ་ལེ་ ཛེ་རྡེན་ ཚོར་, ཀའོ་ ཡེ་རུ་ཤ་ལེམ་མེ་ན་ ཁོང་ངེ་ འགྱོ་སྤ་ ཀྲུཔ་ཅུག་རྒེ་ ཛེ་རྡེན་།

32 པི་ཏྲར་ རྡང་ ཁྲོ་པ་རྒུན་ ཉིད་ལ་ ཆེན་ ཡོད་པེན་, འིན་ན་ ཉིད་ ཚེད་རྡེ་རྒྱ་ལ་ ཁོང་རྒུ་ནི་ ཡི་ཤུའི་ ཟི་ཞིད་ རྡང་ ཁོང་ ཉམ་པོ་ ཞྃ་རྡེ་ ཡོ་ཀ་ནེ་ མི་ ཉ་ཧ་ འཇལ་། 33 ཡང་ མོ་ཤེ་ རྡང་ ཨེ་ལི་ཡཱ་ ཡི་ཤུ་ ཕྃ་རྡེ་ རྐྱོད་ཟ་ནི་ པི་ཏྲ་རེ་ ཡི་ཤུ་ ཟེར་, “སྤོན་འབོ་ལེ་, ང་ཞ་ འེ་ཀ་ ཡོད་ཅེའོ་ རྒྱལ་ལེ་ སོང་། ང་ཞི་ ཀུར་ སུམ་ སྤུ་རྒེན་, ཉེ་རང་ངེ་ཕི་ ཅིག་, མོ་ཤེ་ཕི་ ཅིག་ ཡང་ ཨེ་ལི་ཡཱེ་ཕི་ ཅིག་།” ཁོ་ ཅི་ ཟེར་རྒོ་ཤེ་རྦོ་ ཧ་མ་ཀོ་རྦེ་, ཁོའེ་ ཏོ་ ཟེར་།

34 ཁོའེ་ ཏོ་རྒུན་ ཟེ་རེན་ ཡོད་ཟ་ནི་ སྲིན་ཞིག་ པབ་ཏེ་ ཁོང་རྒུན་ ཀབ་, སྲིན་ནེ་ ཀབ་རྦེན་ ཡོད་ཟ་ནི་ ཁོང་རྒུན་ ཧོཔ་ འཇིའི་། 35 ཏེ་ནི་ སྲིན་ནེ་ ནང་ནི་ སུང་ཧང་ཅིག་རྒེ་ མོལ་, “འི་རྦོ་ ངེ་ སྲེ་ ང་རང་ངེ་ འདམ་ཀན་འབོ་ འིན་, ཁོའེ་ ཟེར་ཧན་རྒུན་ལ་ ཉོན་།” 36 སུང་ཧད་པོ་ ཚར་རེ་རྒྱལ་ལ་, ཁོང་རྒུ་ནི་ ཡི་ཤུ་ ཅིག་པོ་ མ་ཐེ་ལ་ སུ་ལ་ མ་འཇལ་། ལོབ་ཀྲུག་རྒུ་ནི་ ཐོང་ཀན་ འདང་ ཚོར་ཧན་རྒུན་ ཏེ་ཏུའི་ལ་ སུ་ལ་ མ་ཤེད་རྡེ་ སྃ་རྡེ་ པོར་།

ཡི་ཤུའི་ པུ་ཙ་ཞིག་རྒེ་ ནང་ནི་ རྡུད་ ཕིང་ངེ་ ཛེད་།

37 ལྟིང་མ་ཞག་ལ་ ཁོང་རྒུན་ རི་ནི་ པབ་ཏེ་ རྐྱོད་རྒྱ་ལ་, མི་ཚོག་ མང་པོ་ཞིག་ ཡི་ཤུ་ ཐུག་རྒེ་ལ་ ཡོྃ་། 38 མི་ཚོག་རྒེ་ ཕྲོ་ནི་ མི་ཞིག་རྒེ་ ཀུ་ཅུ་ ཏང་ངེན་ ཟེར་, “ལོབ་རྦོན་ལེ་, འཇུ་འཇུ་ ངེ་ པུ་ཙ་ ཕན་ཅུག་རྒེ་ ཛེད་རྡང་, ཁོ་ ངེ་ ཕྲུ་རྒུ་ ཅིག་ཅིག་པོ་ འིན་། 39 རྡུད་པོ་ ངེ་ པུ་ཙེ་ན་ ཞུ་རྡེ་རྡང་ ཁོའེ་ ཀུ་ཅུ་ སྲན་ཀྲེ་ ཏང་འདུག་ ཡང་ ཁོའེ་ ཟུྃ་སྤོ་ སོན་ཏེ་ འདར་རེན་ ཐང་ཀེ་ཀ་ རྒྱབ་ཏེ་ ཁ་ནི་ རྦོའེ་ འབིང་འདུག་། ཏུའི་ མང་ཆེ་ རྡུད་པོ་ ཁོའེ་ན་ འདེད་ཏེ་ ཁོ་ ནག་ སྲན་ཀྲེ་ ལྟན་འདུག་། 40 ཉེ་རང་ངེ་ ལོབ་ཀྲུག་རྒུན་ལ་ རྡུད་པོ་ ཕིང་ འཇུ་འཇུ་ ཟེར་རྡེ་ ཞུ་ཝ་ པུལ་རྦེན་ འིན་ན་ ཁོང་རྒུན་ལ་ ཏོ་ ཕིང་ མ་ཉེན་།”

41 ཡི་ཤུའི་ མོལ་, “ཏེཏ་པ་ མེ་ཀན་ འདང་ མི་རབ་ ངན་པ་, ནམ་ཚུག་པ་ ང་ ཁྱི་ཞ་རྒུན་ ཉམ་པོ་ འདེད་? ནམ་ཚུག་པ་ ངེ་ ཁྱེ་རང་རྒུན་ལ་ སྲེན་རྒོའེ་? ཁྱེ་རང་ངེ་ པུ་ཙ་འབོ་ འེ་ཀ་ ཁྱོང་།”

42 པུ་ཙ་འབོ་ ཡོང་ཟ་ནི་ རྡུད་པེ་ ཁོ་ ཐང་ཀེ་ཀ་ རྒྱབ་ཏེ་ ཟུྃ་སྤོ་ འདར་རེན་ ལུའི་། འིན་ན་ ཡི་ཤུའི་ རྡུད་པོ་ལ་ ཀབ་རྐྱོན་ ཛེད་ཏེ་ པུ་ཙ་འབོ་ ཕན་ཅུག་རྒེ་ ཛེད་ ཡང་ ཁོ་ ཁོ་རང་ངེ་ ཨ་རྦ་ལ་ ལྟེད་། 43 ཁོང་ ཚང་མ་ ཀོན་འཇོག་རྒེ་ ཆག་ལེ་ འཇི་སྤོ་ ཐོང་འདེ་ ཧ་ལེ་།

མི་ཚང་མེ་ ཡི་ཤུའི་ ཛེད་ཀན་ ཚང་མ་ ཧ་ལེ་རྡེ་ ལྟོའེན་ ཡོད་ཟ་ནི་, ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ མོལ་། 44 “ངེ་ ཟེར་ཤེ་ཅེན་འབོ་ལ་ རྒྱལ་ལེ་ ཅོའེ་རྡེ་ ཉོན་; མི་རིག་རྒེ་པུ་ འགོམ་ཧོར་ ཏྃ་རྡེ་ འགྲ་ཝོ་རྒུ་ནི་ ལག་ལ་ ལྟེ་རྡེན་།” 45 འིན་ན་ ཁོང་རྒུན་ལ་ ཡི་ཤུའི་ མོལ་ཧན་འབོ་ ཧ་མ་ཀོ་ ཅེ་ཟེར་ནི་ ཏོ་རྒུན་ སང་སྤེར་ན་ པོ་རེ་ ཛེད་ཏེ་ འིན་འབེན་, ཡང་ ཁོང་རྒུན་ལ་ ཏོ་རྦེ་ ཏོན་འབོ་ འདྲི་ཅེ་ ཧམ་པ་ མ་ཡོྃ་།

ཀོན་འཇོག་རྒེ་ རྒྱལ་སྲིད་རྡེ་ན་ ཀྲག་ཤོག་།

46 ལོབ་ཀྲུག་རྒུ་ནི་ན་ ཁོ་རང་རྒུ་ནི་ ཕྲོ་ནི་ ཀྲག་ཤོག་ སུ་ འིན་ ཟེ་རེན་ ཟེར་ཟེར་ ཏང་ཅེ་ འགོ་ཟུག་། 47 ཡི་ཤུའི་ ཁོང་རྒུ་ནི་ སམ་བ་ ཁྱེན་རྡེ་, ཁོང་ངེ་ ཕྲུ་རྒུ་ ཆུང་ཙེ་ཞིག་ ཁྱོྃ་རྡེ་ ཁོ་རང་ངེ་ འགྲམ་ལ་ ལྃ་ཤུག་རྒེ་ ཛེད་། 48 ཏེ་ནི་ ཡི་ཤུའི་ ཁོང་རྒུན་ལ་ མོལ་, “ངེ་ མིང་ངེ་ཕི་ སུ་ཞིག་རྒེ་ འི་ ཕྲུ་རྒུ་ ཙོག་སེ་ལ་ རྒ་སུའི་ ཅོ་ནི་ ང་ རྒ་སུའི་ ཅོའེ་རྡེ་ འིན་ ཡང་ སུ་ཞིག་རྒེ་ ང་ རྒ་སུའི་ ཅོ་ན་ ང་ ཀ་ལེ་ ཛེད་ཀ་ནེ་ ཡབ་ལ་ རྒ་སུའི་ ཞུའི་རྡེ་ འིན་། ཁྱི་ཞི་ ཕྲོ་ནི་ ཆུང་ཤོག་རྦོ་ ཀྲག་ཤོག་ འིན་།”

49 ཡོ་ཧཱ་ནན་ནེ་ ཟེར་, “ཙོབོ་, མི་ཞིག་རྒེ་ ཉེ་རང་ངེ་ ཚེན་ ཁུར་རྡེ་ རྡུད་ ཕིང་ལ་ ང་ཞི་ ཐོང་, ཡང་ ང་ཞི་ ཁོ་ ཏོ་ ཅོ་ མི་ཅུག་ཤི་ ཙོན་འགྲུའི་ ཅོའེ་རྦེན་ ཅེ་ཟེར་ནི་ ཁོ་ ཨ་ཧོའེ་ ཁྲོ་པ་ མན་འབེན་།”

50 འིན་ན་ ཡི་ཤུའི་ མོལ་, “ཁོ་ རྒག་ མ་རྒག་, སུ་ཞིག་རྒེ་ ཁྱི་ཞི་ རྒྱཔ་འགལ་ མ་ཅོ་ནི་ ཁོ་ ཁྱི་ཞི་ ཆོག་ལ་ ནོག་།”

ས་མ་རི་ཡཱ་པ་རྒུ་ནི་ ཡི་ཤུ་ སི་ཝ་ མ་ཅོའེ་།

51 ཡི་ཤུ་ རྡེ་བ་ཅན་ན་ ནེན་ཅེ་ ཏུའི་ ཉེ་མོ་ ལེབ་རྦེ་ལ་ སེམ་མེ་ན་ ཐེ་ཚོམ་ མ་ཛེ་རྡེ་ ཁོང་ ཡེ་རུ་ཤ་ལེམ་ ཆོག་ལ་ རྐྱོད་རྡེ་ ཛེད་། 52 ཁོང་ངེ་ ཁྲིན་ ཁྱེར་ཧན་ ཁ་ཅིག་ ངུལ་ལ་ ལམ་ཅུག་རྒེ་ ཛེད་, ཆེན་ ཡོད་ཟ་ནི་ ཁོང་རྒུན་ ས་མ་རི་ཡཱ་ ཡུལ་ཞོང་ངེ་ འགམ་ཡུལ་ཞིག་ལ་ སོང་འདེ་ ཡི་ཤུ་ མི་རྒུན་ ཉམ་པོ་ ཐུག་ཅེ་ལ་ ཀྲལ་འགྲིག་ ཅོའེ་། 53 འིན་ན་ ཏེ་ འགམ་ཡུལ་པ་རྒུ་ནི་ ཁོང་ལ་ རྒ་སུའི་ མ་ཞུའི་ ཅེ་ཟེར་ནི་ ཁོང་ ཡེ་རུ་ཤ་ལེམ་ལ་ རྐྱོད་རྡེ་ ཛེད་ཅེ་འབོ་ ཁོང་རྒུན་ལ་ རྒྱུའི་སོང་། 54 ཁོང་ངེ་ ལོབ་ཀྲུག་ ཡ་ཀུབ་ ཏང་ ཡོ་ཧཱ་ནན་ནེ་ ཏོ་ ཐོང་ངེ་རྡང་ ཟེར་, “ཙོབོ་, ཉེ་རང་ ཐུག་ཐེད་ནི་ ང་ཞི་ ནམ་ཀ་ནི་ མེ་ སྤབ་ཏེ་ ཁོང་རྒུན་ མེ་ཀན་ ཅོ་ཅེ་ལ་ ཀཱ་ ཏང་ངེ་?”

55 འིན་ན་ ཡི་ཤུའི་ ཁོང་ ཆོག་ལ་ འགྱུར་རེ་ ཛེད་ཏེ་ ཀབ་རྐྱོན་ ཛེད་། 56 མི་རིག་རྒེ་པུ་ མི་རྒུ་ནི་ མི་ཙེ་ མེ་ཀན་ ཅོ་ལ་ མ་ཡོང་རྦེན་རྦེ་, རྐྱོབ་རྦེ་ལ་ ཡོྃ་རྡེ་ འིན་འབེན་། ཏེ་ནི་ ཁོང་རྒུན་ ཞེན་ འགམ་ཡུལ་ཞིག་ལ་ རྐྱོད་།

ཡི་ཤུ་ འགྲྃ་ཤེ་ ལ་མོ་ མན་།

57 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ ལམ་ནི་ རྐྱོད་ཟ་ནི་ མི་ཞིག་རྒེ་ ཡི་ཤུ་ ཟེར་, “ཉེ་རང་ ཀ་རུ་ རྐྱོད་ན་ ང་ ཉེ་རང་ ཉམ་པོ་ འགྲྃ་རྡེ་ ཡོང་ངེན་།”

58 ཡི་ཤུའི་ ལེན་སལ་, “ཝ་ཙེ་ལ་ ཝ་ཚང་ འདང་, ནམ་ཀེ་ ཅ་ ཅ་ཚང་ ཡོད་ཏེ་ ནོག་, འིན་ན་ ང་ མི་རིག་རྒེ་པུ་ལ་ འགོ་ པོར་རྡེ་ ངལ་ཚོ་ཅེ་ མལ་རྦོ་ མེད་།”

59 ཡི་ཤུའི་ ཞེན་ མི་ཞིག་ལ་ མོལ་, “ངེ་ ལྟིང་འགྲྃ་ནི་ འགྲོྃ་”, འིན་ན་ ཁོའེ་ ཟེར་, “ཙོབོ་ལེ་, ངུལ་ལ་ ང་ ཁང་པ་ སོང་འདེ་ ང་རང་ངེ་ ཨ་རྦ་ ཤི་རྡེ་ ཧུང་ཅེ་ཕི་ ཀྲལ་འགྲིག་ ཅོ་ཅེ་ལ་ རྒོང་སྤ་ སལ་།”

60 ཡི་ཤུའི་ ཁོ་ མོལ་, “སེམ་ཡིད་རྡེ་ ཐོག་ནི་ ཤི་ཀན་རྒུན་ལ་ ཁོ་རང་རྒུ་ནི་ ཤི་ཀན་རྒུན་ ཧུང་ཅུག་, འིན་ན་ ཁྱེ་རང་ སོང་འདེ་ མི་རྒུན་ལ་ ཀོན་འཇོག་རྒེ་ རྒྱལ་སྲིད་རྡེ་ ཧོར་ལ་ ཤོད་།”

61 ཡང་ མི་ཞིག་རྒེ་ ཟེར་, “ཙོབོ་, ང་ ཉེ་རང་ངེ་ ལྟིང་འགྲྃ་ནི་ འགྲྃ་རྡེན་, འིན་ན་ ངུལ་ལ་ ང་ ངེ་ ནང་ཚང་ལ་ འཇུ་ ཟེར་རེ་ལ་ ཆ་ཅུག་རྒེ་ ཛེད་།”

62 ཡི་ཤུའི་ ཁོ་ མོལ་, “ཤོལ་ལ་ ཐམ་འདེ་ རྒྱབ་ལ་ ལྟ་ཀན་རྒུན་, ཀོན་འཇོག་རྒེ་ རྒྱལ་སྲིད་རྡེ་ན་ ཞབ་ཤི་ ཞུ་ཅེ་ལ་ འོའེ་སྤ་ མན་།”