ཡི་ཤུའི་ ཞབ་རྟོག་ ཞུ་ཀ་ནེ་ པོ་མོ་རྒུན་།
8
ལྟིང་མ་ཞག་ལ་ ཡི་ཤུ་ ཀོན་འཇོག་རྒེ་ རྒྱལ་སྲིད་རྡེ་ ནེ་ཚུལ་ ཟང་པོ་ ཤེད་ཅེ་ལ་ ཀྲོང་ཁྱེར་ རྡང་ འགམ་ཡུལ་ ཅིག་ནི་ ཅིག་ལ་ རྐྱོད་, ཡང་ ཁོང་ ཉམ་པོ་ ལོབ་ཀྲུག་ ཅུག་ཉི་རྦོ་ ཡང་ 2 རྡུད་ ཞུ་ཧན་ འདང་ ནེད་རྒུ་ནི་ རྒྱལ་ཅུག་རྒེ་ ཛེད་ཀ་ནེ་ པོ་མོ་ ཁ་ཅིག་ ཡོད་པེན་: རྡུད་ རྡུན་ ཕིང་ངེ་ ཛེད་ཀ་ནེ་ མར་ཡམ་ མ་ཧ་འདལ་ལེན་མ་, 3 ཧེ་རོད་འདེ་ ཆག་ཛོད་ ཀུ་ཟཱེ་ ན་མ་ ཡོ་འན་ན་, སུ་སན་ནཱ་ རྡང་ ཡང་ པོ་མོ་ མང་པོ་། ཁོང་རྒུ་ནི་ རང་ངེ་ ནོར་ རྒྱུད་རྡེ་ ཡི་ཤུ་ རྡང་ ཁོང་ངེ་ ལོབ་ཀྲུག་ ཅུག་ཉི་རྦེ་ རྒོའེ་ཤེ་ཅན་རྒུན་ རིག་རྒེ་ཡོད་པེན་།ཞིང་འབད་པེ་ ས་ངོན་ ཏབ་ཀ་ནེ་ སྲུང་ངུ་།
4 ཀྲོང་ཁྱེར་ སོ་སོ་ནི་ མི་རྒུན་ ཡོྃ་རྡེ་ ཡི་ཤུ་ས་ མི་ཚོག་ མང་པོ་ ཛོམ་མེན་ ཡོད་ཟ་ནི་ ཁོང་ངེ་ འི་ སྲུང་ངུ་རྦོ་ ཤེད་རྡེ་ ཛེད་, 5 “ཞིང་འབད་པ་ཞིག་ ས་ངོན་ ཏབ་རྦེ་ལ་ སོང་། ཞིང་ལ་ ས་ངོན་ ཏབ་ཟ་ནི་ ཁ་ཅིག་ ལམ་མེ་ཀ་ ཀྲུལ་, ཏོ་རྒུན་ མི་ ཧང་པེ་ ནེན་ ཡང་ ནམ་ཀེ་ ཅ་རྒུན་ ཡོྃ་རྡེ་ ཟོའེ་། 6 ས་ངོན་ ཁ་ཅིག་ ཀྲག་རྒེ་ཀ་ ཀྲུལ་ ཡང་ རྐྱེ་རྡང་, ས་ཀྱེཏ་རྡེ་ན་ ཧུའི་ མེད་པེ་ ཧམ་འདེ་ ཤི་། 7 ས་ངོན་ ཁ་ཅིག་ ཚེར་མེ་ ཕྲོ་ ཀྲུལ་ ཡང་ ས་ངོན་ ཉམ་པོ་ ཚེར་མང་ རྐྱེ་རྡེ་ ནེན་འབེ་ ཞིང་འབོ་ ལྡན་ མ་ཉེན་། 8 ཞེན་ ས་ངོན་རྒུན་ ས་ཀྱེཏ་ རྒྱ་ལེ་ ཡོད་སེ་ ཞིང་ངེ་ཀ་ ཀྲུལ་རྦེ་, རྐྱེ་རྡེ་ རྟོན་ཏོག་ མིན་, ཀ་འབོ་ ས་ངོན་ ཏབ་ཀ་ནེ་སང་ རྒྱ་ འགྱུར་རྡེ་ མིན་།” ཏོ་ མོལ་ ཚར་རེ་རྡང་ ཁོང་ངེ་ ཤེད་ཏང་ མོལ་, “ནམ་ཅོག་ ཡོ་ཀན་རྒུ་ནི་ ངེ་ ཟེར་ཧན་ལ་ ཉོན་ཧེ་།”
9 ཏེ་ནི་ ཡི་ཤུའི་ ལོབ་ཀྲུག་རྒུ་ནི་ ཁོང་ངེ་ ཤེད་རྡེ་ ཛེད་ཀ་ནེ་ སྲུང་ངུའི་ ཏོན་འབོ་ ཁོང་ལ་ འདྲི་། 10 ཁོང་ངེ་ ཁོང་རྒུན་ལ་ མོལ་, “ཀོན་འཇོག་རྒེ་ རྒྱལ་སྲིད་རྡེ་ སང་སྤེར་རྒུན་ ཁྱི་ཞ་ ཧ་ཀོ་ཅེ་ལ་ རྒོང་སྤ་ སལ་ལེ་ ཛེད་ཏེ་ ནོག་, འིན་ན་ ཏམ་པེ་ སུང་རབ་རྦེ་ན་ འབྲི་ཛེད་ཀན་འབོ་ འདྲན་འདྲ་ ཀྲུཔ་ཅེ་ལ་ ངེ་ ཞེན་རྒུན་ལ་ སྲུང་ངུ་ རྒྱུད་ཏེ་ ཤེད་རྡེ་ཡོད་, ཏོ་རྦོ་,
‘ཁོང་རྒུ་ནི་ ངེ་ ཅོ་ཀན་རྒུན་ ཐོང་འདེ་ ང་ སུ་ འིན་ཀན་འབོ་ ངོ་ཤེ་རྡེ་ མི་འདུག་།
ཁོང་རྒུ་ནི་ ངེ་ ཤེད་ཀན་རྒུན་ ཚོར་ནྃ་ ཧ་ཀོ་ཉེ་ མི་འདུག་།’”
11 “ཏེ་ སྲུང་ངུའི་ ཏོན་འབོ་ འི་རྦོ་ འིན་, ས་ངོན་འབོ་ ཀོན་འཇོག་རྒེ་ ཀའ་ འིན་། 12 ལམ་མེ་ཀ་ ས་ངོན་ ཀྲུལ་ཧན་རྒུ་ནི་ ཀོན་འཇོག་རྒེ་ ཀའ་ ཚོར་ཧན་རྒུན་ ནོག་, འིན་ན་ ཏེཏ་པ་ ཅོའེ་རྡེ་ ཐར་པ་ མི་ཐོབ་ཅེ་ལ་ རྡུད་ ཡོྃ་རྡེ་ ཁོང་རྒུ་ནི་ ཉིང་ངེ་ ནང་ནི་ ཏོ་ ཀོག་ཏེ་ ཁྱེ་རེ་ནོག་། 13 ཀྲག་རྒེ་ཀ་ ས་ངོན་ ཀྲུལ་ཧན་འབོ་ ཀོན་འཇོག་རྒེ་ ཀའ་ ཚོར་རེ་རྡང་ ཐེད་པོ་ ཉམ་པོ་ ཏེཏ་པ་ ཅོ་ཀན་རྒུན་ ནོག་། ཏོ་ལ་ པ་ཀྲག་ ཐིལ་ལ་ མེད་ཅེ་ཀ་ནི་ ཁོང་རྒུ་ནི་ ཏུའི་ ཉུང་ཙེ་ཞིག་རྒེ་ཕི་ ཏེཏ་པ་ ཅོ་རུག་, ཡང་ ཚོད་ལྟ་ ཏུའི་ལ་ ཏེཏ་པ་ ཕང་ངེན་། 14 ཚེར་མ་རྡེ་ ཕྲོ་ ཀྲུལ་ཧན་ནེ་ ས་ངོན་རྒུ་ནི་, ཀོན་འཇོག་རྒེ་ ཀའ་ ཚོར་ཧན་རྒུན་ ནོག་ འིན་ན་ མི་ཙེ་ ཚེར་ཧ་, རྒྱུ་ནོར་ རྡང་ རྐྱིད་པོ་རྒུ་ནི་ ནེན་འདེ་ ཁོང་རྒུ་ནི་ ཏེཏ་པ་ ལྡན་ནེ་ མག་། 15 འིན་ན་ ས་ཀྱེཏ་ ཟང་པེ་ཀ་ ས་ངོན་ ཀྲུལ་ཧན་འབོ་ ཉིང་ ཟང་པོ་ རྡང་ ཀྲང་པོ་ ཉམ་པོ་ ཀོན་འཇོག་རྒེ་ ཀའ་ ཉེན་ཀན་རྒུན་ ནོག་ ཡང་ ཟོད་པ་ ཉམ་པོ་ ཏོ་ རྟེམ་པོ་ ཐམ་འདེ་ འདེད་པེ་ འབྲེ་རྦུ་ མང་པོ་ མིན་ནེ་ནོག་།”
འོད་ ཏང་ འོད་རྟག་རྡེ་ སྲུང་ངུ་།
16 “མི་རྒུ་ནི་ འོད་ ཏུག་ཏེ་ ཟྃ་རྦུའི་ ཡོག་ལ་ རྦེ་རྡེ་ ཡང་ ཅར་པ་ ཡོག་ལ་ མ་པོ་རེ་ ཡོང་ཀན་རྒུ་ནི་ ཏོ་རྦེ་ འདྃ་རྡེ་ ནང་ལ་ ཐོང་ཅེ་ལ་ འོད་རྟག་སེ་ཀ་ པོ་རེན་། 17 རྦེ་རྡེ་ པོར་ཧན་ ཚང་མ་ ཕི་ལོག་ལ་ ཕིང་ངེ་ ཛེ་རྡེན་, ཡང་ ཀབ་ཏེ་ པོར་ཧན་ ཚང་མ་ འོད་རྡེ་ན་ ཁྱོང་ངེ་ ཛེད་ཏེ་ ཚང་མ་ ངོན་ཅུག་རྒེ་ ཛེ་རྡེན་།”
18 “ཏོ་ཕི་ ཁྱི་ཞི་ ཉེན་ཚུལ་རྦེ་ཀ་ ནྃ་ ཏོང་། ངེ་ ལབ་ཞ་ ཉེན་ཀན་རྒུན་ལ་ མང་ངེ་ ཧ་ཀོ་ཅུག་རྒེ་ ཛེ་རྡེན་, འིན་ན་ མ་ཉེན་ཀན་རྒུ་ནི་ ཧ་ཀོ་རྡེ་ ཡོད་ སམ་ཀན་འབོ་ལ་ ཁྱེར་རེ་ ཛེ་རྡེན་།”
ཡི་ཤུའི་ རྡེན་འབེ་ ནང་མི་།
19 ཏེ་ནི་ ཡི་ཤུའི་ ཨ་མ་ རྡང་ ནོ་རྒུན་ ཁོང་ ཐུག་རྒེ་ལ་ ཡོྃ་, འིན་ན་ མི་ཚོག་ མང་པོ་ ཡོད་ཅེ་རྦེ་ ཁོང་ངེ་ འདུན་ལ་ ལེཔ་ མ་ཉེན་། 20 མི་ཞིག་རྒེ་ ཁོང་ལ་ ཟེར་, “ཉེ་རང་ངེ་ ཨ་མ་ རྡང་ ནོ་རྒུན་ ཉེ་རང་ ཐུག་རྒེ་ལ་ ཕི་ལོག་ལ་ སྲུྃ་རྡེ་ འདུག་།”
21 ཡི་ཤུའི་ ལེན་སལ་, “ཀོན་འཇོག་རྒེ་ ཀའ་ ཉེན་འདེ་ ལག་ལེན་ ཅོ་ཀན་རྒུན་ ངེ་ ཨ་མ་ རྡང་ ནོ་རྒུན་ འིན་།”
ཡི་ཤུའི་ ལུང་ཀྲག་ མེ་ཀན་ ཛེད་།
22 ཞག་ཤིག་ ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ མོལ་, “ཨ་ཧོ་ ཚོའེ་ ཕར་ཧ་ ཆེན་།” ཏེ་ནི་ ཁོང་རྒུན་ ཆུ་འགྲུལ་ཞིག་རྒེ་ན་ ཞོན་འདེ་ རྐྱོད་། 23 ཆུ་འགྲུལ་ལེ་ན་ ཆ་ཟ་ནི་ ཡི་ཤུ་ ཧུ་ཉིད་ལ་ རྐྱོད་། ནམ་ཚུབ་ཏེ་ ཚོའེ་ན་ ལུང་ཀྲག་ ཀྲག་པོ་ ཡོྃ་རྡེ་ ཆུ་འགྲུལ་ ཆུའི་ ཀང་འདེ་ ནུབ་ཅེ་ འཇི་ནང་ ཡོད་པེན་།
24 ལོབ་ཀྲུག་རྒུན་ སོང་འདེ་ ཡི་ཤུ་ ཉིད་ཚེད་རྡེ་ ཛེད་ཏེ་ ཟེར་, “སྤོན་འབོ་ལེ་, སྤོན་འབོ་ལེ་, ང་ཞ་རྒུན་ ཆུའི་ན་ ནུབ་ཏེ་ ཤི་ཅེ་ འདུག་།” ཁོང་ ཞྃ་རྡེ་ ལུང་ཀྲག་ ཏང་ ཆུལ་རྦག་རྒུན་ལ་ ཀབ་རྐྱོན་ ཛེད་, ཏེ་རྒ་མ་རྒ་ ཏོ་རྒུན་ མེ་ཀན་ སོང་འདེ་ ཞིའི་རྡེ་ སོང་། 25 ཁོང་ངེ་ ཁོང་རྒུན་ལ་ མོལ་, “ཁྱི་ཞི་ ཏེཏ་པ་ ཀ་རུ་ སོང་?”
ལོབ་ཀྲུག་རྒུན་ འཇིའི་རྡེན་ ཧ་ལེ་རྡེ་ ཅིག་ ཏང་ ཅིག་ལ་ ཟེར་, “ཁོང་ སུ་ ནོག་? ཁོང་ངེ་ ཀཱ་ སལ་ལེ་རྡང་ ལུང་སྤོ་ རྡང་ ཚོའེ་ལ་ ཁ་ ཉེན་འདུག་།”
ཡི་ཤུའི་ མི་ཞིག་ནི་ རྡུད་རྒུན་ ཕིང་ངེ་ ཛེད་།
26 ཏེ་ནི་ ཁོང་རྒུ་ནི་ ཆུ་འགྲུལ་ལེ་ན་ འགཱ་ལིལ་ལེ་ ཡུལ་ཞོང་ནི་ ཚོའེ་ ཕར་ཧ་ ཡོ་ཀ་ནེ་ འགཱ་འདཱ་རཱེ་ ཡུལ་ཞོང་ལ་ ལེཔ་། 27 ཡི་ཤུ་ ཆུ་འགྲུལ་ནི་ འབིང་ངེ་ ཛེ་རྡེ་རྡང་, ཏེ་རྒ་ ཀྲོང་ཁྱེར་རེ་ མི་, རྡུད་ ཞུ་ཧན་ ཞིག་ ཁོང་ འཇལ་ལེ་ལ་ ཡོྃ་། ཁོ་ ཏུའི་ མང་པོ་ཞིག་ནི་ཕ་ལ་ ཁང་པ་ མ་འདེད་རྡེ་ རོམ་ཀང་རྒུ་ནི་ན་ ལྕུ་རུ་ འདེད་རྡེ་ཡོད་པེན་།
28 ཁོའེ་ ཡེ་ཤུ་ འཇལ་ལེ་རྡང་ ཀུ་ཅུ་ སྲན་ཀྲེ་ ཏང་ངེན་ ཡི་ཤུའི་ ཞབ་རྦེ་ འདུན་ལ་ འགྱེལ་རྡེ་ ཟེར་, “ཡི་ཤུ་ ཀོན་འཇོག་ ཀུན་ཝང་ངེ་ སྲེ་, ཉེ་རང་ ངེ་ ལེ་ཧེ་ན་ ཅེ་ འདྲེའེ་རྡེ་ཡོད་? འཇུ་འཇུ་ ང་ ནག་ ལྟན་ནེ་ མ་ཛེད་།” 29 ཅེ་ཟེར་ནི་ ཡི་ཤུའི་ རྡུད་པོ་ལ་, མི་རྦེ་ ནང་ནི་ འབིང་འདེ་ ཤོག་ མོལ་རྡེ་ ཀཱ་ སལ་། མི་རྦེ་ ཧང་ལག་ ལྕ་རྟག་ ཉམ་པོ་ ཅིང་འདེ་ སྲུང་ཀན་ འདེད་ཏེ་ལ་ རྡུད་པེ་ ལེན་ མང་པོ་ ཁོའེ་ཀ་ ཝང་སྲུལ་རྡེ་ ལྕ་རྟག་ ཅག་ཏེ་ ཁོ་ རི་ལྟོང་ལ་ ཁྱེར་རེ་ཡོད་པེན་།
30 ཡི་ཤུའི་ ཁོ་ འདྲི་ ཛེད་, “ཁྱེ་རང་ངེ་ མིང་ ཅི་ འིན་?”
ཁོའེ་ ལེན་ཏྃ་, “རྡུད་ཚོག་” ཅེ་ཟེར་ནི་ མི་རྦེ་ན་ རྡུད་ མང་པོ་ ཞུ་རྡེ་ ཡོད་པེན་། 31 ཡང་ ཏོ་རྒུ་ནི་ ལེན་ མང་པོ་ ཡི་ཤུ་ ཁོང་རྒུན་ ཐ་ མ་ནི་ མེ་ཀ་ནེ་ རྒོ་རོང་ ཐིལ་ལེ་ན་ ཕང་ངེ་ མི་ཛེད་ཅེ་ལ་ འཇུ་འཇུ་ ཞུའི་།
32 ཏུ་རུ་ རི་ཀ་ ཕག་རྒེ་ ཏུམ་འབུ་ ཆོན་མོ་ཞིག་ ས་ ཟོའེན་ ཡོད་པེན་། རྡུད་རྒུ་ནི་ ཡི་ཤུ་ འཇུ་འཇུ་ ཞུའི་རྡེ་ ཁོང་རྒུན་ ཏེ་ ཕག་རྒུ་ནི་ན་ ཆ་ཅུག་རྒེ་ ཛེད་ཅེ་ལ་ ཟེར་, ཡི་ཤུའི་ ཏོ་རྒུན་ལ་ རྒོང་སྤ་ སལ་ལེ་ ཛེད་། 33 ཏེ་ནི་ རྡུད་རྒུན་ མི་རྦེ་ཀ་ནི་ འབིང་འདེ་ ཕག་རྒུ་ནི་ན་ ཞུའུ་། ཡང་ ཕག་རྒེ་ ཏུམ་འབུ་ རི་ནི་ ཡོག་ལ་ རྒྱུག་རྒེན་ཏེ་ ཚོའེ་ན་ ཀྲུལ་ ཡང་ ཆུའི་ན་ ནུབ་ཏེ་ ཤི་།
34 ཕག་ཟི་རྒུ་ནི་ ཏེ་ སོང་ཀན་རྒུན་ ཐོང་ངེ་རྡང་, ཀྲོང་ཁྱེར་ རྡང་ ཉེ་ཁོར་རྒུན་ལ་ རྒྱུག་རྒེན་འདང་ སོང་ ཡང་ ཏོ་རྒུན་ ཤེད་། 35 ཏེ་ནི་ སོང་ཀན་རྒུན་ ལྟ་ལ་ མི་རྒུན་ སོང་, ཡི་ཤུ་ས་ ལེབ་རྦེ་རྡང་, རྡུད་རྒུན་ ཕིང་ཀ་ནེ་ མིའུ་ ཡི་ཤུའི་ ཞབ་རྦེ་ འདུན་ལ་ ཀོའེ་ལག་ ཀོན་འདེ་ ཉོ་ མ་ཉོ་ལ་ འདེད་ཏེ་ ཐོང་འབེ་ ཁོང་རྒུ་ནི་ འཇིའི་། 36 ཏེ་ ཚང་མ་ ཐོང་ཀན་རྒུ་ནི་ རྡུད་རྒུན་ ཞུ་ཧ་ནེ་ མིའུ་ ཡི་ཤུའི་ ཀ་ཟུག་རྒེ་ རྒྱལ་ཅུག་རྒེ་ ཛེད་ཀན་འབོ་ མི་རྒུན་ལ་ ཞིབ་སལ་ ཅོའེ་རྡེ་ ཤེད་། 37 འགཱ་འདཱ་རཱ་ ཡུལ་ཞོང་ངེ་ མི་ཚང་མ་ ཧོཔ་ འཇིའི་རྦེ་, ཁོང་རྒུ་ནི་ ཡི་ཤུ་ ཁོང་རྒུ་ནི་ ཡུལ་ནི་ འབིང་འདེ་ རྐྱོད་ ཟེར་། ཏེ་ནི་ ཡི་ཤུ་ རྡང་ ལོབ་ཀྲུག་རྒུན་ ཆུ་འགྲུལ་ན་ ཞོན་འདེ་ ལོག་ཏེ་ རྐྱོད་།
38 རྡུད་རྒུན་ ཕིང་ཀ་ནེ་ མི་རྦེ་ ཡི་ཤུ་, ཁོ་ ཁོང་ ཉམ་པོ་ ཡོང་ཅུག་རྒེ་ ཛེད་ཅེ་ལ་ འཇུ་འཇུ་ ཟེ་རེན་ ཞུ་ཝ་ པུལ་, འིན་ན་ ཡི་ཤུའི་ ཁོ་ ལོག་ཏེ་ ལམ་ཅུག་རྒེ་ ཛེད་ཏེ་ མོལ་། 39 “ཁང་པ་ ལོག་ཏེ་ སོང་, ཡང་ མི་ཚང་མ་ལ་ ཁྱེ་རང་ངེ་ཕི་ ཀོན་འཇོག་རྒེ་ ཛེད་ཀན་ ཚང་མ་ ཤོད་།” ཏེ་ནི་ ཁོ་ སོང་འདེ་ ཀྲོང་ཁྱེར་ སོན་ཏེ་ན་ ཡི་ཤུའི་ ཁོའེ་ཕི་ ཛེད་ཀན་ ཚང་མ་ ཤེད་།
པོ་མོ་ ཆུང་ཙེ་ ཤི་ཀན་ འདང་ ན་ཅུང་ ཟུར་མོ་ ཡོ་ཀན་།
40 ཚོའེ་ འ་ངོ་ ཆོག་རྡེ་ ཕར་ཧ་ ལེབ་རྦེ་རྡང་ མི་ཚོག་ མང་པོ་ཞིག་ ཡི་ཤུ་ རྒ་སུའི་ ཞུའི་ ཅེ་ཟེར་ནི་ ཁོང་རྒུན་ ཁོང་ རྐྱོད་ཅེ་ལ་ སྲུྃ་རྡེ་ ཡོད་པེན་། 41 ཏེ་ནི་ ཡ་ཧུ་འདཱ་པེ་ འདུ་ཀང་ངེ་ འུ་རྐྱོང་ ཡ་ཨིར་ ཟེར་ཧན་འབོ་ ཡོྃ་རྡེ་ ཡི་ཤུའི་ ཞབ་རྦེ་ འདུན་ལ་ འགྱེལ་རྡེ་ འཇུ་འཇུ་ ཞུའིན་ ཁོའེ་ ཁང་པ་ རྐྱོད་ཅེ་ལ་ ཟེར་, 42 ཅེ་ཟེར་ནི་ ཧ་ལམ་ ལོ་ ཅུག་ཉི་ ཆ་ཀ་ནེ་ ཁོའེ་ པོ་མོ་ ཅིག་ཅིག་པོ་ ཤི་ཆོག་ཆོག་ ཡོད་པེན་།
ཡི་ཤུ་ ཁོ་ ཉམ་པོ་ རྐྱོད་ཟ་ནི་ མི་ཚོག་ མང་པོ་ ཁོང་ལ་ ནེན་འདེ་ ཁྱོྃ་། 43 པུད་ཀ་ནེ་ ལོ་ ཅུག་ཉི་ནི་ཕ་ལ་ ཏུའི་རྒྱུན་ ཟུྃ་སྤོ་ ཞིག་ཅེ་ ཟུར་མོ་ ཡོང་ཀ་ནེ་ པོ་མོ་ཞིག་ མི་ཚོག་རྒེ་ ཕྲོ་ ཡོད་པེན་། སུ་ཞི་ལ་ ཁོའེ་ ནེད་པོ་ ཕན་ཅུག་ མ་ཉེན་། 44 ཁོ་ ཡི་ཤུའི་ རྒྱབ་ནི་ ཡོྃ་རྡེ་ ཁོང་ངེ་ ནམ་ཟེ་ ཀྲུ་ཞིག་ལ་ ལག་པ་ ཐུག་རྒེ་རྡང་, ཁོའེ་ ཁྲག་པོ་ ཆེད་།
45 ཡི་ཤུའི་ མོལ་, “ང་ སུའི་ ལག་པ་ ཐུག་པེན་?”
མི་ཚང་མེ་ ལག་པ་ མ་ཐུག་པེན་ ཟེར་, ཏེ་ནི་ པི་ཏྲ་རེ་ ཟེར་, “སྤོན་འབོ་ལེ་, མི་ཚོག་རྒེ་ ཉེ་རང་ ནེ་ནེན་ ཕུ་ལེན་ ཁྱོང་འདུག་།”
46 འིན་ན་ ཡི་ཤུའི་ མོལ་, “སུ་ཞིག་རྒེ་ ང་ ལག་པ་ ཐུག་, ཅེ་ཟེར་ནི་ ངེ་ ནང་ནི་ ཕན་ཅུག་ཀ་ནེ་ ཤུག་ འབིང་འདེ་ ཆ་ཀན་འབོ་ ང་ ཚོར་།” 47 ཏེ་ནེ་ པོ་མོ་རྦེ་ ཏོ་ རྦེའེ་རྡེ་ པོར་ ཉེན་ནེ་ མག་ སམ་འདེ་, འདར་རེན་ ཡི་ཤུའི་ འདུན་ལ་ ཡོྃ་རྡེ་ ཁོང་ངེ་ ཞབ་རྦེ་ཀ་ འགྱེལ་། མི་ཚང་མེ་ འདུན་ལ་ ཁོའེ་ ཡི་ཤུ་ ལག་པ་ ཅེ་ སེ་རྦེན་ ཡང་ ལག་པ་ ཐུག་རྒེ་རྡང་ ཏེ་རྒ་མ་རྒ་ ཁོའེ་ ཟུར་མོ་ ཕན་ཀན་འབོ་ ཤེད་། 48 ཏེ་ནི་ ཡི་ཤུའི་ ཁོ་ མོལ་, “པོ་མོ་ ཁྱེ་རང་ངེ་ ཏེཏ་པེ་ ཁྱེ་རང་ ཕན་ཅུག་ཏེ་ འིན་། ཞིའི་རྡེ་ ཉམ་པོ་ སོང་།”
49 ཁོང་ངེ་ ཞལ་ཏ་ ས་ལེན་ ཡོད་ཟ་ནི་, འདུ་ཀང་ངེ་ འུ་རྐྱོང་ ཡ་ཝེར་རེ་ ཁང་པ་ནི་ མི་ཞིག་ ཡོྃ་རྡེ་ ཁོ་ ཟེར་, “ཉེ་རང་ངེ་ པོ་མོ་ནི་ ཤི་། ཏ་ ལོབ་རྦོན་ལེ་ འོབ་རྒྱལ་ ལྟན་ནེ་ མ་ཛེད་།”
50 ཏོ་ ཚོར་རེ་རྡང་, ཡི་ཤུའི་ ཡ་ཝེར་ལ་ མོལ་, “འཇིའི་ མ་འཇིའི་, ཏེཏ་པ་ རྡང་ ཅོའེ་ ཁྱེ་རང་ངེ་ པོ་མོ་ རྒྱལ་ལེན་།”
51 ཡི་ཤུ་ ཡ་ཝེར་རེ་ ཁང་པ་ ལེབ་རྦེ་རྡང་, པི་ཏྲར་, ཡ་ཀུབ་, ཡོ་ཧཱ་ནན་ འདང་ པོ་མེ་ ཕ་མ་ མ་ཐེ་ལ་ ཞེན་སུ་ཞིག་ལ་ ཁོང་ ཉམ་པོ་ ཡོང་ཅུག་རྒེ་ མ་ཛེད་། 52 ཏེ་རྒ་ ཏུའི་ལ་ མི་ཚང་མ་ ངུའིན་ ཉ་ངན་ ཅོ་ཡོད་པེན་, ཡི་ཤུའི་ ཁོང་རྒུན་ལ་ མོལ་, “མ་ངུ་, ཁོ་ མ་ཤི་ལ་ ཉིད་ལོག་ཏེ་ འིན་།”
53 ཁོང་རྒུ་ནི་ ཁྲེལ་རྒོད་ ཏྃ་ ཅེ་ཟེར་ནི་ ཁོང་རྒུན་ལ་ པོ་མོ་ ཤི་རྡེ་ འིན་ཀན་ རྒྱུའི་ཡོད་པེན་། 54 འིན་ན་ ཡི་ཤུའི་ པོ་མེ་ ལག་པ་ ཐམ་མེ་ ཛེད་ཏེ་ ཁོ་ མོལ་, “ངེ་ ཕྲུ་རྒུ་, ལོྃ་།” 55 ཏེ་རྒ་མ་རྒ་ པོ་མེ་ སེམ་ཡིད་ ལོག་ཏེ་ ཡོྃ་རྦེ་ ཁོ་ ཀོའག་ ལྃ་ ཡང་ ཡི་ཤུའི་ ཁོང་རྒུན་ལ་ པོ་མོ་ལ་ ཅི་ཏོང་འཇིག་ ཟ་ ཏང་ཅེ་ལ་ མོལ་། 56 ཕ་མ་རྒུན་ མ་སྲན་ཀྲེ་ ཧ་ལེ་ འིན་ན་ ཡི་ཤུའི་ ཁོང་རྒུན་ལ་ སོང་ཀན་འབོ་ སུ་ལ་ མི་ཤེད་ཅེ་ལ་ ཀཱ་ སལ་།